رواية ازمة ضمير الفصل الحادي وخمسون 51 - بقلم Rozaya1122

ازمة ضمير ... البارت الثامن والاربعون
«للكاتبه روزايه»

جنت اعشكه عشك عربي
مثل اهلنه الاولي
ولا صفيت بجفه محبس
لا صفى نسيب الهلي
.....

2016 شهر الثالث..

ثريا... اجينه نمشي انه وعموري جنت جايبتو من الروضه جنطتو على شكل دبدوب بظهرو وذكي الى درجه يسال اسئله ما اعرف اجاوبو..

سالني عمه ثريا اني ليش ماعندي ام كل الولد عدهم امهات ويكولون انت ماعندك ام هاي عمتك...

... حبيبي ماما بالجنه وعايشه احسن من عدنه..

... ليش انه مادحكتهه؟
... ماما ماتت من جابتك تمرضت عموري اني ماعندي جهال انت ابني وانه اصير امك  ...

... انتي عمتي مايصير تصيرين ماما...
... لا كلي ماما ونتفق اني اصير امك..

... هز راسو الصغير وشعراتو عاليه كال لا بابا مايقبل كال مادكول ماما لاي وحده انت عندك ام وحده وماتت...

... دمعت عيني على كلامو رغم صغر سنو وما دحك امو بعينو بس دائما يسال وين ماما ليش ماعندي ام ...

مره طلب من فاروق بزعل ويبجي ويصيح اريد ام الاطفال الي ويا يتباهون بامهاتهم وهو ذكي ويرجع زعلان..

ام شذره حاجت فاروق كالتلو اتزوج يا ابني الولد يحتاج منو يربي شوفلك بنت حلال ؟؟

بوقتهه فاروق كالهه احنه ٥ زلم ماربتنه ام ربينه نفسنه ومامستعد اجيب مرت اب واخلي ابني يعاني اليتم مرتين...

وصلنه للباب يدك الباب بيديناتو الصغار بعد مافتحو ودحك ايوب اجه من بعيد وترك ايدي وركض ع ايوب ويصيح اوبي اوبي...

شالو ايوب ويبوس بي هيج ساندو ع كلبو ويكلو اروح فدوه لهاي السنينات...

طبينه جوه ويسولف لايوب يكلو اليوم اكو ولد كتل بنيه خطيه وكامت تبجي اخذ اللفه مالتهه وانه كمت ضربتو ابطنو ورجعت  اللفه الهه...

ايوب... عفيه بالسبع هيج اريدك ايدك والطك ..

عموري.. المعلمه دزت علينه وكامت تصيح وكالت اطردكم لاهلكم والولد كالهه انه بابا ضابط اشتكي عليج وانه كتلهم اسكتو ترى بابا قاضي والله اخلي يعدمكم...

الحجيه.. يابعد طوايف اهلي اروح فدوه لهالحلك منيلك هالحجي يالغالي ..

عموري.. بيبي انه من اكبر اريد اصير مثل بابا قاضي..
الحجيه.. تصير ياوليدي انت سبع وابن فاروق ماينخاف عليك...

اخذو بحضني اشمو وابوسو وما اشبع من عندو من يجي يحجيلنه بطولاتو ويصرع راسنه بالسوالف ينتظر ابو يجي ويتلكا يحضنو ويشمشم بي...

اوس تزوج ياقوت وماصار عدهه حمل بلبدايه الا بعد مراجعات لان عدهه ضعف وبعدين صارت حامل وهسه بشهر السادس...

حالنه مثل ماهو ماكو شي جديد وقيس وادهم ايسو من بنات عمهم وكعدو وفاروق رفض الزواج نهائيا ومالو نفس بالنسوان بعد ...

حاولنه ويه ايوب جثير بس انريدو يتزوج ومايقبل يكول هيج مرتاح من افكر بالزواج اكلكم لاتفتحون هاي السيره وياي...

مره من عدهن اجه ادهم يضحك وايوب ورا وادهم يكلو طيح الله حظكم يول هو انت بيك حظ حته صديقك...

الحجيه.. الله يجعلهه ضحكه خير يمه
ادهم.. حجيه صديق ايوب اليوم متعارك واحد هتلي جابو للمركز وخابرني ايوب اتوسطلو...

رحت للضابط وبالشافعات قبل يطلق سراحو وهذاك العينتين اجه يريد يعتذر من الضابط لان اتجاوز بالحجي على الضابط...

عود يريد يكلو سيدي انعالك ع راسي يكلو انعالي على راسك....

وخله الضابط تخبل والله عوزه بس يبوس ايده كوه خلصنا ...

الحجيه.. عزا العزا زلة اللسان وين لكيتو يول ايوب..

ايوب.. بالحظ يانصيب غير صاحبي ..

جنت ماعرفو بس اشتريت من عندو بطه لعمر وصادقته ...

الحجيه.. وينهه البطه شومادحكناهه؟؟
ايوب.. جبتهه يوم وللعصر لكيت عمر الخارق خانكهه وجايب طابوكه وحاطهه ع راسهه ...

واجه صاحني يكلي تعال دحكهه خاف تنكرني وهو مطلع روحهه...

الحجيه.. يول جده ترى عمر ملاحظتو عنيف يكسر وين الاجرام يحبو ..

ايوب.. ماعلي شي كلنه هيج بطفولتنه انه اتذكر دجيت الخروف مال جدتي بالسجينه ابطنو...

وخطيه مات وراح خساره احنه عائله عنيفه موبدينه...

الحجيه.. انت ابو البلاوي الخروف والديج الكسرت رجلي بالطابوك ...

ايوب.. غير نكرني ولازم اخذ حقي بس حصلت كتله من فاروق لسه اتذكرهه لان الديج مال ثريا وتلعب علي وكامت تبجي ...

خطيه والله جنت قاسي طفوله شنيعه معوز بيهه حنان...

الحجيه.. خاف تزوج وتطلع ع مرتك هم قاسي...

ايوب.. اااافه انه قاسي شلج بيهه هاي اني اذوب انصهر باللحظات الحميمه...

الحجيه.. خايب كوم تلوث مسامعنه .. هذا هو ايوب لازم يشمرلو كلمه قويه

....

امنيه... مرت سنوات طويله وتعينت وهاي اني كاعده بالصيدليه مال المستوصف اجرد بلادويه واسلم الطلبيات ...

ماعاد كلشي مثل قبل داخلي مكسور متهشم مرات الانسان يكدر يتجاوز وينسه المرحله الصعبه ومرات يوكف عدهه ...

اني صح كملت دراسه بس وكفت بعيني هاي المرحله وماكدرت انسه ابد ادهم حبي الاول والاخير فتحت عيني وبديت اتعلم الحب وعشت كل بدايه شعور جميل على ايده..

ماجنت متهيئه لهيج صدمه ولابيوم توقعت ادهم يكدر يسوي بيه هيج اتذكر كلشي عندي ذاكره تأبى النسيان ...

اتذكر دموعي كدامه وحالي الضعيف واتوسله اتذكر كلامه وهو يكلي اني احب اسماء كلهن هذني يوميه يمرن على بالي وانام واني استعيدهن وحده وحده...

هذيج الليله الي ماتنسي مرات اكول ابالغ بيهه بس موبيدي شي يخنكني ويعصر كلبي من اتذكرهه...

كل يوم عشته اخذ نص حيلي اول صدمه يوم الخطوبه جنت اريد اشرد اريد املخ نفسي اريد اصرخ بكل قوتي لا تاذوني بس جنت بالخارج عكس الداخل الي يعصف بيه...

نار ولهيبهه يحرك شكو شي حي بداخلي بس المقابل يشوفني مصدومه لويشوفني هادئه...

ردت احد يواسيني يطيب خاطري بس اختي الي تعاني امر من عندي دكلي الله يعوضج...

دموعي نزلت ومسحتهه بكف ايدي ع السريع بس ابت توكف كاكت عيني تمطر بغزاره وخاف يشوفوني الموضفين ...

اتذكرت نيشاني الي فردشو كدامي وقلدت علي وثريا تضحك ودكلهه هو هذا ذوقهه...

حجيت بصوت مبحوح ثريا لاتسوين هيج هذني الي مالاتي !!! كالت لامومالتج اشترتيتيهن بفلوس اخوي منيلج انتي...

صرت عاجزه عن الكلام والاجابه بس اباوع بعيوني واختارت اسماء احلى الملابس وسيتات النوم وكامت واني اتلوع بناري...

شكد حاولت اغمض عيني بهاي الليله وماكدرت شكد استنجدت بثريا وسمعتني كلام يحس الكلب ...

جنت مغلوب ع امرهه وتنتظر زفة خطيبهه كدامهه تطلع باجر عرس ادهم والحنه واشوف الكل فرحان وثريا زينت البيت ومخبوصه وماكالت اكو وحده مكسوره خاطر ....

مانمت ولاغمضت عيني ونيران كاعده وياي كمت اريد اغسل تلكاني ايوب مانايم شاف حالتي حاول يطيب خاطري بشكم كلمه بس محد يكدر يطلعني من القهر البي...

موقفه ولا انسه ابد واظل ممنونه اله كل عمري وما اوفيله ذره من تعبه...

لزمني من اكتافي وهزني حيل خلاني مثل استعاديت وعي جان يهز بيه ويحجي...

امنيه لاتسوين هيج بحالج مايستاهلج انتي اعظم من تكونين لواحد خاين مثل ادهم ابد لاتفكرين انتي وحدج انه وياج مثل ظلج وبس اشري ودحكي شلون ادفعو الثمن...

امنيه.. بجيت وكتله باجر عرسه ايوب ما اكدر اشوفه ارحمني...

... باسني من راسي وكال روحي كعدي نيران وتعالي وياي ماسالته بوقتهه وين وشلون بس ردت اخلص طلعنه ويا الفجر وماكو مكان انروح بي بس نفتر خابر صديقه واجه اخذنه يم زوجته...

يومين ظلين يمهم وبعدين ودانه لبيت جدي واتفق وياهم مايحجون ابد جنت اخاف اساله عن ادهم ..

بس الي سمعته يدور علينه ومامسوي عرس بس اجت اسماء وكعدت بغرفتي ...

ما كدرت اتحمل ورا اسبوع تخربطت واستمريت ايام ع هذا الحال تالي طلع عندي سكر مزمن...

ايوب هو تكفل بدراستي ورجعني ادرس اكثر من مره شفت ادهم بس اغمض عيوني ما اريد اشوفه ومرت الايام والسنين الطويله وذكرا وخيانته شبح يطاردني...

نبهني صوت الموضف وياي حسن الي عينه عليه ونظراته توحي بشي ثاني بس اتجنبه..

حسن.. امنيه جهزي هاي الوصف لمراجع وانطانيهه بابتسامه ..

اخذتهه من عنده واقره بلاسم واجتاحتني عواصف كلبت كياني  اسم المريض ادهم عماد ...

اتلفت يمنه ويسرى وينه ادهم سالته بسرعه كال هذا واشر علي جان طفل صغير اخذت نفس بعدما جنت حابسته بصدري...

مااكدر اواجه ولا اكدر اسامح موطبعي هذا بس ما اكدر اسمع اخبارهم وثريا اطلكت وماتت مرت فاروق واوس اتزوج شلون دنيا خلت واحد مايعرف شي عن الثاني..

انتهه الدوام اخذت جنطتي وطلعت عندي خط ياخذني كلشي متكفله ايوب الي يوميه بالصلاه ادعيله وبيبي ترفع اديهه بدعوه صادقه اله ...

ثاني يوم داومت ونفس شغلي بس فجأه اجانه كشف اني جنت كاعده بمكاني ومغيرين المدير وجاينه كشف من الوزاره...

عبالك اكو اخباريه بس يدورون بالوصولات والعلاجات وانصدم من يطلعون كارتونه صغيره مال حبوب ممنوعه وبنص الصيدليه ...

والاكثر من هذا موبس يمي حته يم الفرع الثاني وبالقطاع العام وكانها فعلت فاعل...

يسالني المفتش ودموعي تجري واكله والله ما اعرف اني هنا انقلت جديده حسن راد يتحملهه هو بس اني الي اوقع ع استلام الصيدليه وافتحهه يوميه واجرد الادويه ...

البارحه ماكو شي اليوم منين اجن هذني احس نفسي راح اوكع وصوت زلم عالي واسمع سالفه شرطه ااشر لحسن اريد يلحكلي بابره الانسولين وهاي اول مره يدري بيه اني مريضه ..

بحيث يطلع بيهه ومصدوم ضربتهه يله كدرت اسيطر سالوني واستجوبني وجانو مصرين الا يدزون ع الشرطه واحتمال اروح بيهه سجن...

كاعده بغرفه المدير ويسالون بيه وعيون شكم واحد خسيس اكلتني طلعت تليفوني دكيت ع ايوب مارد ...

شويه وكالو اجه ضابط التحقيق طب الضابط وبده يستجوب بعده شاب بكد ادهم ونظرته غريبه ...

شفته اخذ تليفونه وطلع برا وشويه ورجع كمل الاجراءات جان يماطل بالوقت ودزو العينات لتحليل وجيب الشهود ورد الشهود..

ما احس غير الباب ينفتح ويكوم هذا الضابط ينطي تحيه ويكول اتفضل سيدي..

جنت مدنكه وامسح بدمعتي الفشلتني رفعت راسي واشوف اخر انسان اتمنى اشوفه بهاي اللحظه ..

طلعت من عنده وعاهدت نفسي اكون قويه ما اريد يشوفني بيوم ضعيفه...

جانت عينه تحجي قبل السانه ماكدرت اواجهه ولا اخلي عيني بعينه بسرعه لزمت التليفون ودكيت ع ايوب رد بس كتله تعالي بسرعه ...

الضابط طلع وطلع الموجودين وتلاقت عيونه بعد فراق طويل بعد سنين اخذت حيفهه من كل واحك بينه...

لزمت جنطتي وكمت اريد اطلع لزمني من ايدي ارتعش كل جسمي عطره نفسه الي جنت ابوكه من عنده ويجي يلكا خلصان ويتعارك ويه ايوب عباله هو ماخذه...

قويت حالي ورفعت راسي اجت عيني على النجمه والتاج بهاي السنين صار مقدم كلهن عاشهن وحده...

عيونه اي عيونه ورموشه الي زايدات جمال والشوارب الخفيفه والبشره الصافيه والحواجب المتلاقيه وتفاحه ادم الي عنده كلهن هذني جان بيوم مالاتي...

كوه كدر ينطق وحالته اكثر من حالتي سوء كال امنيه !!! يريد يكمل كلامه مايكدر ابد ..

جريت ايدي من عنده ودرت وجهي وانتظر ايوب يجي دك تليفوني جاوبت ودليته بالمكان ...

والهدوء سيد الموقف وكلوبنه هي التحجي انفتح الباب ايوب جان موقفه بلحظتهه ما احسبه بس اخوي اكدر امثله ابوي ..

جرني وخلاني ورا ظهره وكانو يحميني من اخو وكالي خوما بيج شي...

ادهم.. ايوب لاتخاف عليهه من عندي اخذهه تروح واني احل هاي السالفه ...

بس كلامه جان بصوت مخنوك وكانو يحجي بدون وعي طلعت بدون ما التفت علي صعدني ايوب بسياره ورجع لادهم...

كال بالي يمه ادحكه واجي موهينه علي هاي اللحظه ...

وصلني ايوب للبيت وانه استعيد هاي الصدفه شكد متغير ادهم وكبران وباطراف شعره شيب ...

ما انكر دك كلبي علي بس مستحيل ارجع اني الي باعني الماوكفلي شسوي بي وشلون اكمل حياتي ويااا...

سولفت لنيران الشايله حب قيس بكلبهه مثل الكلاده وتتعلك بالركبه وماتكدر تنزعهه دكول احبه بس ما ارجعله...

...

ثريا.. لك عميران لا اكوملك اموتك شمسوي بالديوانيه موهستوني عزلتهه صغيرون انت السنه الجايه بالمدرسه...

عمر.. لا تعيطين ما اخاف والله اكل لبابا عليج واخلي يذبج بالسجن..

الحجيه.. شلون يعمر كل الي يحاجيك ابوك يذبه بالسجن خايب اكعد راحه يبن القاضي .

ثريا.. خلي يجي فاروق الا اكلو عمر ماخذ ٦ بالاملاء وهسه يعاقبك...

عمر.. كليلو ما اخاف هو كال انت اعز من روحي يعني بابا مايضربني..

ثريا... بس هسه يزعل عليك ويكطع المصروف عنك وبعدماكو كاكو وازمو...

عمر.. عمي ايوب يشتريلي موذاك اليوم بابا زاعلني وما انطاني مصروف وعمي ايوب اشترالي كومه كال بكيف ابوك...

الحجيه.. شطيح حظ الفرخ غير ايوب ياجده ابوك يريدك توصل وتصير مثلو غير تقره..

عمر.. كام ويصفك بيدو ياحجيه انه بعدني بالروضه من اصير بلاول اقره ...

ثريا.. بعده يحجي وطب فاروق بسرعه ختل ورا الحجيه كنالو ها ياجذاب موجنت دكول ما اخاف ..

عمر.. ما اخاف بس بابا يزعل طلع من ورا الحجيه ووكف كدام فاروق كالو بابا عمه ثريا ماقرتني املاء واخذت ٦ ودكول هسه بابا يعاقبك...

نزل جنطتو من ايدو فاروق وفحتلو حضنو وشالو شمو من ركبتو ادحك اخوي يغمض عينو من يشمو ويطول ببوستو وكانو يشم امو...

فاروق.. بعدك صغير ما احاسبك بس من تصير بالمدرسه ازعل عليك ...

كعد فاروق ع التخم وهو بحضنو ويكلو احبك بابا انت احسن واحد حته المديره دكول احب فاروق...

طكهه ضحكه فاروق وكالو بعد بس المديره شلك بهاي السالفه عمر صاير السانك طويل عيب هالحجي كوم روح يم ايوب بالباب ...

طلع عموري وفاروق عدل كعدتو وكال اريد احجي وياكم بموضوع اسمعوني.....

يتبببببع...... احبكم ...