رواية ازمة ضمير الفصل الرابع والعشرون 24 - بقلم Rozaya1122

ازمة ضمير ... البارت الرابع والعشرون
«للكاتبه روزايه»

يخنگني النفس كلما اكول انساك..
وارجع عن قراري واتذكر العشره
مو شغلة وفه بس گلبي طيب حيل..
مثل طيب الحمام الصادق لشجره
صح قاسي بس بطبعي انطي ادروس
انطي ادروس كلمن ماعرف قدره...
بس انت الوحيد الطاك خلگي وياك...
حبيتك يخايب هيج على الفطره...

ثريا... كل الي نعيشو من صنع ادينه ومرات نكون متعمدين نسبب الاذيه لنفسنه وبعدنه مصرين ومتمسكين بقرارتنه الخاطئه بعد مايفوت الاوان يله ننتبه ع نفسنه ونرجع نعالج اخطائنه بس بعد مايفيد نلگه كلشي فايتنه والناس مو مثل ناسنه القديمه....

هاي انه ثريا عشت وتربيت بعز اخوتي مايوم واحد زگح بيه ولا واحد سمعني كلمه جارحه طول 23 سنه من عمري اخوتي يدورون رضاي ...

وبيوم الي يدحگوني ابجي واحدهم يهد ع الثاني يكلو ليش مزعل ثريا هاي النعمه الي عنده جثير بنات مفتقدتهه ويتحسرون عليهه ...

طول عمري سامعه كلامهم وما يوم نزلت راسهم ولا جبتلهم العيبه بس مرات العناد وعدم التفكير يكلفنه اشياء جثيره...

رجعت موافقتي لفاروق بس مارجعلهم خبر سلام يوميه ادحكو بالدوام عيونو تشع حب وغزل ولهفه حته رحاب دكلي شكد يحبج خطيه...

يوميه يجيني يگلي ثريا شلعتي گلبي شمنتظره ليش ماتردين الجواب انه احبج واخليج اسعد انسانه انه هيج وهيج وجثير وعود كاذبه...

بديت اتقبلو ومنتظره فاروق يرجع الخبر مر الاسبوع ومر الاسبوع الثاني واجه الشهر وفاروق ساكت لا اكدر اكلو ليش مارديت ولا اعرف السبب ...

بليل اجاني كال ثريا ما اريد تعيشين حياة بائسه انه مامقتنع بالولد سلام احسو واحد مطكطك وانه اريدلج زلمه يكمل دلالنه مو يذلج...

ما ادري شحس بهذاك الوقت بس كتلو انه موافقه ومقتنعه بي هو طبعو هيج يتشاقه بس شخصيتو حلوه ...

ابتسم بوجهي وكال انه الي عليه كلتو الج راح ارجعلهم خبر لخاطر مشاعرج اتجاهو بس والله انه ياثريا مامقتنع بي ولو بشعره...

حاول ويايه فاروق ايام بس راد يغير رأي بس جنت ادحك سلام انسان طيب وانه معجبه بي وحابتو وهو وعدني باشياء جثيره وكال اسويلج هيج وهيج ...

من رجعنه الموافقه ثاني يوم اجه سلام طاير والفرحه ماليه وجهو وعبالك طفل زدت فرحه لان دحكت هاي اللهفه والحب بعيونو...

اجت النسوان وتحددت مشيه الزلم والخطبه كله صار سريع باسبوع واحد ذهب وفلوس غركوني ويدفعون بدون وجع كلب شريد واتمنى يكولون هاج ضعفين...

اليوم جمعه يصادف 25 / 8 / 2007 هذا التاريخ ياريت لو اكعد ازلغو موبس امسحو واكعد اشطبو من حياتي بكد ماجنت فرحانه بي بكد ما عضيت اصابعي ندم ع هذا اليوم...

جنت لابسه فستان لونو اوف وايت بسيط ومسويه شعري واول مره اخلي مكياج وحواجبي رتبتهن وخجلانه ومدنكه راسي وصوت الهلاهل والهوسات وسلام طب وامو ورا اطش جكليت فوك راسو ...

كعد بصفي وجان جريء لابعد حد وعبالك متعود ع هيج اجواء بسرعه لزم ايدي واني اسحب بيهه وهو يجرهه ....

لبسني الذهب ومراسيم الخطبه مال ايام زمان وكلي كيكه وخلي يوكلج وشربي عصير ومن الخجل ذبيتو ع قميصو ايدي ترجف ومتوتره....

اخواتو وامو وكرايبو فرحانات وانه ادحك بالوجه امنيه ونيران مخبوصات بالتقديم وياقوت وامل يرحبن بالمعازيم والحجيه لازمتلهه وحده بعمرهه وادك سوالف ....

كالت امو خلي يكعد ويه مرتو شويه كلهه كالت ااي خلي يكعدون وحدهم بس اجه الرد القاسي من الحجيه...

الحجيه.. لا يمه اخوتهه مايقبلون كالو غير مره خلت امو تفر بحلكهه وماعاجبهه الوضع...

بعد الهوسه اكتشفت الحجيه حجت من يمهه واخوتي اصلا مايدرون بس دكول خايبه شنهي يكعد وياج غير للعرس ....

همس يم اذني كلام غزل وحب خلاني اضيع بهاي اللحظه وانسه كلشي فرحتي جانت ماتنوصف واحس نفسي طير حر ومحلق بالسما...

طلع سلام وانه كمت بدلت وغسلت ومستحيه من اخوتي خاف يدحكون حواجبي احس نفسي مسويه جريمه...

امنيه...
مخبوصه بنص الهوسه وبس اقدم مي وعصير ونيران تركض تلم الفارغ مثل مايكولون البوش ...

جنت لابسه فستان طويل اقماشه جرجيت ثخين وفصال قبل يسمو برنسيسه حلو لونه سمائي ...

واكفه بالمطبخ اشرب بقايا ابطالة الببسي حرامات يروح واحنه مشتري بفلوس عاد ابطني ولا يروح بسنك...

اندك باب المطبخ صوت ادهم كتله تعال ماكو احد لان اهل سلام راحو اول ما دخل شافني مصفطه فوك 8 ابطاله كدامي كال يولي بسلا شربتي هاي البطاله كلهه...

... لا شنو السالفه هن بيهن ربع كلاص واني خلصت علي مواحسن مايروحن هيج...

... لا يابه ابطنج ولا بالسنك يولي راح العريس الشفيه لوبعدو...
... ليش انت ماجنت هنا ايي راح...

... لا موهين ما اريد ادحكو لان احتمال اضربو اخذ ثريا مستحيل راح احبو ...

... ليش عيوني اولهه وتاليهه تتزوج غير تفرحلوهه ...
... منو كالج مافرحانين بس ثريا تختلف معزتهه خاصه ولو بيدي اخليهه طول العمر يمنه بس بعد هاي سنه الحياة...

امنيه... شلت  البطاله وخليتهم بالصندوك وادهم يدحك عليه بعدين كال طالعه حلوه بس حجاهه بارتباك وعبالك اسقاط فرض علي حجاهه وطلع بسرعه...

ابتسمت على كلامه وبنفس الوقت ابد موجريئين ويستحون يابه حليمه شنو من تربيه ربيتيهم الي بس يشوفون الجنس اللطيف ينهزمون...

ثريا... كمت اعزل وانظف بالبيت وكلساع واحد من اخوتي يباركلي كعدنه نتعشه والحجيه كالت بيهه المبارك يمه صيري سباعيه وضبي هالمهلس هذا....

ثريا... شبي جده؟؟
... يمه جنه دجاجه منكريهه الديوجه شعراتو مهلسات وبنطرونو كامز دحكي اخوتج شلون زلم وهو كيكي مدري شسمو...

امنيه.. لا موهيج بيبي لاتكسرين بخاطرهه هذا خطيبهه لاتقلدين علي هسه اني ما اقبل تحجين ع ادهم...

جان ادهم ياكل بقلاوه من سمعهه غص بيهه وايوب يدك ع ظهرو ويكلو ماتت عمتك وعيونو صارن حمر ...

امنيه ... اسم الله هاي الحجيه مخليه عينهه عليك هي حسدتك وانطتو كلاص مي...

الحجيه... من كون خفه هالحلك المايع المايعرف يسولف يولو ما تهدوني عليهه هالفعصه اليابسه...

ايوب.. جده امنيه ماكالت غلط خطيه طلعتي سلام صفر ...
... يولي جده غير اقارنو وياكم فرق من السما للكاع لاتزعلين بنيتي بس انه ما اكدر اسكت...

كل شوي ورافع بنطرونو جنو جاي بدون احزام وفاتح دكم قميصو ومطلعنه شعرات صدرو شبيهه هاي الزلم استهترت ثريا ضبي زين ترى انه تعرفيني بس يجي اجحتو منا لمن يتعدل....

عوذه عود زلم الانبار عليهه العتب منين هذا منين اصلو جنه امريكي مسلوع...

ايوب.. جده امو من الانبار وهو طالع ع خوالو بس ثريا سباعيه هي تعلمو وتخلي مثلنه ...

الحجيه.. اكول جده انت شمالك لاتحب لاغركان بالعسل شو اخوتك مفلفلين بس انته يوميه ضاربيك سجينه مكطعه مصارينك....

ايوب... هههه منو بيهم يحب ترى بس قيس خاف عندج معلومات سريه واحنه ماندري...

الحجيه.. دحكو انه من جنت قبل حته رجلي الله يرحمو مايكدر يجذب عليه لانو اكشفو واسويهه كعده ويااا...

هسه انتو هم ماتكدرون تضمون لهفتكم  هذا اوس ساتر عيونو بالنظارات لو ينزعهه يفضح روحو....

اوس.. لا لا حجيه منيلج هالحجي؟؟؟
... اسكت يمه انه نعيمه حته ابوي جان قبل يخاف مني اكشفو اكشفو...

وقيس غركان بهاي اليابسه المابيهه علج لحم وفاروق لا هذا ع جده لمن مات وحليمه دكول مايوم كال احبج وانتي ام ولدي ....

ادهم... بس انه ماكو واتحداج دكولين اكو؟؟
الحجيه.. انت يبزر الشيب جايتك عاصفه تكسرك وتكسر عظامك بس ها هالله لهالله ببنت عمك لنهه مسكينه ومابيهه حظ...

امنيه.. بيبي لاتحجين عليه كايلتلج انه وادهم اصدقاء لا تتبلين علينه احنه متفقين ع كلشي مو ادهم؟؟

ادهم... عليمن متفقين يولي مروتج سدي حلكج من تفتحي تفجرين صواريخ وما الحك بيج بعد...

الحجيه سمعوني يمه انتم متعوبين وراح اتعبون بعد بس هذني البنيات امانه عدكم لاتكسرون بختهن وخاصه هاي الصفيره امنيه مكروده ...

ايوب.. والله ياجده ماعرفنه تمدحين بيهه لو اطيحين حظهه ...

الحجيه.. يوليدي ايوب المات راح لربو والعايش ينتظرك هدي گلبك وطمن جوارحك والتفت لنفسك الراح مايعود يوليدي مايعود...

ثريا... كلمات الحجيه مثل الصاعقه نزلت ع ايوب خلتو صافن بوجهه ومسحو وجهو وكام والله يانعيمه تخوفين تدري بالصغيره والجبيره مرات احسهه حته الي بگلوبنه تعرفو ...

بدت فتره خطوبتي وبدينه انداوم مرحله رابعه وسلام يوم عن يوم اكتشف بي شغله سيئه واحاول اعدلهه بس مايفيد ...

كام يخابرني جثير وانه اتحجج عندي امتحان لان انه بطبعي اخجل من اخوتي اخابر ويدك تليفوني كدامهم...

كام يلح ع لقاء وانه ويا بالكليه ويدحكني بعد اللقاء لشنو ما اعرف كال اريد التقي بيج ابيتكم وسواهه خبصه وشنو انه اتسمه خطيبج ومالهم حق اخوتج....

والحقيقه اخوتي مايعارضون ولا فاتحه الموضوع وياهم بس انه من يمي ارفض احتراما الهم ...

بده يطوخ بكلامو ويتعدى الحواجز ويحجي كلام عن نفسي اسمي بذيء واول مره اسمعو احاول اردو وافشلو بس لاحياة لمن تنادي...

اكثر من مره اسد التليفون بوجهو واكلو من نتزوج عودين احجي هيج انه ما احب هيج اسلوب ناس قبل عايشه ع الفطره وكل كلام اسمعو افسرو قله ادب...

حتلو انه خطيبتو المفروض يراعي مشاعري ويكول ماتحب هيج كلام ولازم اكسبهه واخليهه تامن وتثق لا سلام بالعكس جان يستمر يحجي وكانو سكران وماداري بالدنيا شبيهه...

ثاني يوم يعتذرلي ويظل يمشخط بالحجي بس بعديش بعد مالعب نفسي من عندو...

بعد اصرارو وراح لفاروق للمجمع وكالو اريد اجيكم للبيت بس نتفق ع شغلات الغرفه وسوه نفسو مسكين لابعد حد...

هاي الكلاوات ماتعبر على فاروق وبيومهه حذرني بالقلم العريض بحيث من يحجي فتت بثوبي من الخجل...

فاروق.. اعرف كلاوات سلام وخبصنه يريد يجي للبيت واحنه مامنعي بس كتلو الا بوجودنه اثق بيج اكثر من نفسي بس هو بالذات ما اثق...

راح يجي اليوم يريد تختارون غرفه بس اخذي حذر من عندو لا يوهمج بالكلام المعسول وتعاي انطيني بوسه وهالكلاوات ...

ثريا اتفهم الشغلات التصير بين المخطوبين بس هاي اذا جان الانسان صادق وانه عن نفسي  احس سلام واحد ملعب ولوتي ومعتبر فتره الخطوبه ونسه....

ثريا... هزيتلو راسي وانهزمت من الفشله شكول عليك ياسلام هذا اللقاء الذابح نفسك علي شراح تحصل من عندو والله متوهم انه ثريا تربيه ٥ زلم ما تكدر تقشمرني بحرفين...

العصر اجه وجايب حلويات وكرزات  وخابص الجو كعدت يمو وانسولف والباب مال الديوانيه مفتوح شويه وكمز سدو...

بسرعه وكفت ع حيلي كتلو ليش سديتو عيب اخوتي خاف يجون ...
كال كلمه وكفت عدهه ورفعت صوتي ولاول مره اتجرأ  واحجي بنتر ...

كال يله هسه شلونهم اخوتج هم من جوه ليجوه مسوين نفسهم صاحبين اخلاق...

... صاحبين اخلاق وغصبا عليك واذا موصاحبين اخلاق ليش اجيت ناسبتهم اسمع سلام والله ادير ظهري الك ومايرفلي جفن مجرد ماتسيء لاخوتي ...

سلام... يابه ع كيفج شنو هالصوت العالي اخوتي اخوتي اكلتي راسي بيهم كلما احاجيج وكلتي اخوتي هسه اذا خطبو ماراح يبوسون ويحضنون...

... يعني انت عندك الخطبه بس هاي بيهه وبعدين كل واحد وقابليته انه ما احب هالشي وخلاص من نتزوج اخذ الي يعجبك...

... وانه اظل انتظر لزواجنه لا وداعه اخوتج ما انتظر بسرعه سحبني من ايدي وطبك شفايفو ع شفايفي بلاول دافعت بس جان لازم اديه ....

بحكم اول مره اجربهه وهو تعامل برومانسيه ما عرفت شيصير بيه رجفت رجليه وظليت ساكنه بحضنو وهو مستمر بالبوسه...

ابتعدت عنو ودرت وجهي بس مد ايدو لزمني من خدي بحنيه وهمس يم اذني انه اسف بس ما كاعد اتحمل ادحكج كدامي وانتي حلالي وما اكدر اسوي شي ...

كالعاده قنعني بشكم كلمه وسكتت من طلع صفنت ع نفسي واتذكرت كلامي من كلت تربيه 5 زلم وما اخلي ومدري ايش طلع كلو جذب بجذب....

سلام استمر ع هذا الحال اذا ماكو لقاء يحجي بالتليفون كلام لعبان نفس وعبالك فتره الخطوبه خلوهه بس لهيج سوالف ....

وصلت بي المواصيل اذا ما اقبل من نلتقي يبوسني كوه عني لذلك رحت كلت لفاروق اذا اجه كلو ماكو لقاء ع الاقل اخلص من هاي الفقره....

بالكليه ادحكو عندو لواكه فضيعه وعبالك هسه انتبهت علي مرات احاول اقنع نفسي واكول ضالمتو وعادي كل الشباب هيج بس من اجي اقارنو ويه اخوتي اكول انه اختاريت الشخص الغلط..

جنه مقررين نتزوج بنصف السنه وحياتي ويا مد وجزر نتعارك وانهي من الغلط ويتوب ورا يومين نرجع لنفس المنوال امل وياقوت رجعن للفلوجه والحجيه اجه شيخ ناصر عليهه وماقبلنه غير نضيع وراهه...

نيران... اليوم خابر قيس وكلنه حجينه ويا وفاروق انطاني التليفون سلمت علي وكوه حابسه دموعي وهو يكلي هانيراني شلونج...

... اني زينه اذا انت زين ومشتاقتلك شوكت ترجع؟؟
... بعد يانيران بعد انتظريني واعوضج عن كل لحظه انه بعيد عنج وخليتج تعيشيهه وحدج....

... انت بس تعال سالم ما اريد كلشي قيس اني احبك حيل...
... ياروح قيس انه هم احبج ديربالج ع نفسج واي شي تحتاجي كولي لثريا لا تتردين...

... سديته من عنده ودموعي تجري شيخلصهه هاي السنتين  ضجت ومليت واصلا تعبت واني كاعده اتصفن بين اربع حيطان...

سديته من عنده وصعدت فوك اريد اصعد ع السطح اشتم هوه  باب السطح جان مفتوح تقربت للباب صار كدامي ايوب جان كاعد ويدخن وبيده دفتر صغير ويقره بي منمدج...

ظليت واكفه صافنه علي شفت ايوب يمسح بعيونه وكانو يكابر بسرعه حطه بجيبه وداس ع الجكاره وكام ...

راد ينزل صرت بوجهه ماحجه شي بس عيونه جانت حمر حيل محبوس بيهه الدمع ومامنطي مجال ينزلن بس نزل ركضت كلت لثريا...

لطمت ع صدرهه وكالت عزا العزاني ع اساس احرك الدفتر ونسيته واليوم عزلت واكيد لكا شلون حظ عليك ايوب...

... يادفتر هو شبي ؟؟
.. لا هيج دفتر قديم ... بس ظليت احوم فوك ثريا من ارتباكهه مبين اكو شي الا حجتلي وخلصتهه بواجي واني اتذكر مصيبه اختي ...

ثريا... ايوب عندو دراجه والخوذه مالتهه ابد مايصعد بسيارتنه كلو بالدراجه عافهه وطلع كال اغسلوهه اذا شغلتي الماطور...

اجيت لكيت المشعوذه امنيه صاعده عليهه وتريد تشغلهه صحت بيهه يامعزايه وين تعرفين لاتنكلب بيج كالت اسكتي هي شيرادلهه ...

حاولت بيهه حاولت ما اشتغلت هستوهه رادت تنزل وجلبت دشداشتهه بحديده وانشخطت رجلهه لحد فخذهه كعدت بالكاع ادك وتنوح وتبجي ...

ويه بواجيهه طب ادهم جايبلهه حلويات وكاكو ابو العصاره تحبه ثنى ركبه وكعد يمهه وهي دكله كله  من ورا الدراجه...

جان تصرف ادهم عفوي ومتعود ع امنيه من صغرهه سحبهه من كتفهه وحضنهه ...

امنيه... تصرف ادهم خلاني بحاله يرثى لها اريده وما اريده اريد ادفعه واكله عيب واريد يقوي حضنته ويكسر اضلاعي...

جان يحاول يطيب خاطري وهذا الشي موجديد متعوده علي لان معتبرته صديق بس اني الي كمت افكر للبعيد واحسبهه غير تصرف...

من ابتعد عني شافني شلون خجلانه حسيته انتبه ع نفسه بسرعه كام بدون مايحجي اي شي...

المصيبه الحجيه جانت واكفه بباب المطبخ والنظارات معلكتهن اجاني صوتهه وكالت هااا يولي جنج ذبانه كل البله بيج شايلتنه شيل بطنينج....

جنت ماعندي طاقه ارد لان مايعه من لمسة ادهم بس هزيتلهه راسي بابتسامه...

الحجيه... يولي نيران كومي جيبيهه ساحت البت من كون بله البلاج كل البله بيج ام الحقوق...

بهاي الاثناء اندك الباب ركضت جوه لان جان ثوبي مشكوك وطلع ادهم ورجع كال هذا سلام جاي عليج ثريا...

الحجيه.. شعنده سليم سوه الدرب سجه لو مامحصل مصقول مامر يوميه...

ثريا... جده لايسمعج ادهم شيكول..
الحجيه.. يكول اختي مفتحه دكان ومعوده هذا الديج ع المصاص عجل لو مامحصل ما اجه يوميه...

ثريا... جده انفضحت اسكتي ...
... ليش يمه حاجيه جذب يولي هذا ابو الشوارب المهلسه جنه سكير ما مرتاحتلو ثكلي وخلي اخوج يكعد يمج مو وحدج...

... استحي من اخوتي تعالي انتي كعدي...
... دفوتي كدامي خلي البس فوطتي واجي ادحك تاليتهه ويااا هذا الحامي...

ثريا... كعدت يمنه الحجيه وما انطت مجال لسلام بكد الشعره ضاج وطلع وهي فرحانه بانجازهه...

ثاني يوم تعارك وياي وانه هم ماسكتت كتلو ليش تحسسني انت خاطبني بس علمود هاي السالفه حته ماتتغزل بيه الا اذا جان هذا الموضوع...

ما حبيت جوابه ويراوغ بالحجي يوميه اتعارك ويا على سالفه شكل يوم يم بنيه يوم يخابر بوحده تعبت منو ....

جنت مقرره التقي بي واحجي ويا بهدوء ونتفاهم صعدت ويا بسياره وحاول يبوسني ويسوي اشياء بذيئه وانه بيومهه تخبلت وكرهتو ....

نزلت وضربت باب السياره ورجعت امشي للكليه ودموعي ع خدي شورطني ويه واحد مخبل وسمعت عنو يشرب والدليل الريحه اليوم الي بي تلعب النفس.. 

رجعت للبيت وقفلت تليفوني وثاني يوم ماداومت لحدما اجه يتعذر ويبوس بايدي وانه غلطت وسامحيني هم عديتهه...

بيوم منهن اجت وحده من غير مرحله سلمت عليه وجابت تليفونهه كالت اخذ ودحكي ماعرفهه البنيه بس صدمني تصرفهه ...

جنت ادحك والنار مشتعله بيه دموعي نزلت ع خدي وانه ادحك هذا رقم سلام والرسائل والغزل والخزي وفوك كل هذا ذاكرني بالرسائل ويحجي عليه....

يكلهه تلعب نفسي منهه واخوتهه مستهترين ويكو..... عليهه لايغرج مظهرهم عائله سكط وتورطت بيهه وهسه اريد اعوفهه لان ماريد جهالي يطلعون ع خوالهم...

اقره ودموعي تصب تخبلت اريد احجي ويه البنيه واكلهه شنو مصلحتج من كل هذا ماكدرت بس رحاب سالتهه كالتلهه انه احترم ثريا واعرف اخوتهه عن طريق اخوتي وهاي الرسائل مو الي هاي عندو علاقه بصديقتي وانه اخذت تليفونهه واذا تريدين اجيبلج دليل اقوى...

تخبلت بالزايد وبديت انهار اريد اروحلو واهد علي واريد واريد بس لاول مره تتعرض ثريا لهيج خيبه ولاول مره تنزل دمعتي من خذلان...

طول عمري مدلله وهسه دنكت راسي شنو موقفي كدام اخوتي شلون طاوعتو وخليتو يبوسني بجيت بحرگه وانه اتذكر كلام فاروق...

ركضت للقاعه ادري بي يكعد بيهه لكيتو هو وصديقو من دحكني طلع وهو تلگاني بكلماته الكذابه انهديت بي جنت احجي وارجف ...

كتلو منا لباجر تجي اطلكني والا اخلي اخوتي يسحلوك سحل واعلمك الزلم شلونهه ما اهتم والاتعس من هذا طردني وكال روحي طلاك ماطلك انه حبيتج وغصبا عنج اتزوجج...

سديت الباب باسى ودموعي تحركني رجعت للبيت تلكتني نيران وامنيه ماكدرت احجي غطيت راسي ونمت بملابسي وابجي احس نفسي ضايعه...

سمعت صوت ايوب اجه كمت بدلت وطلعت اريد احاجيهم طلعت من الغرفه لكيتهم كلهم موجودين بس فاروق بعدو...

دحكوني شلون باجيه تقربت عليهم ردت واحد منهم يسالني ويكول شبيج محد اهتملي...

كتلهم انه ما اريد سلام وين فاروق اريد احجي وياا ما احس غير الراشدي اجاني من ادهم خلاني بصدمه والدموع مثل التيزاب تحرك بخدي ..

التفتت ع ايوب اريد احتمي بي كالي مع الاسف ع كسرة ظهورنه عليج ياثريا...

صوبت عيني ع اوس دار وجهه عني وكال لا ادحكيني وجهج ابد ولاتخليني اكول ماعندي اخت اسمهه ثريا...

تخبلت وانهاريت صرت اتنقل من واحد لواحد واكلهم انه ثريا انه ثريا هاي الكلمه جان صداهه يردد ع مسامعهم وترن باركان البيت...

بس اسودي دارو ظهرهم عني وتخلو عن ثريتهم بدون ما اعرف الاسباب ماتوقعت يجي يوم وادحكهم يتخلون عني وتنهد ادينه ويتركوني...

عتبي عليكم يا احبائي الخمسه عتبي عليكم شلون انطتكم گلوبكم تتخلون عن ثريا لسه كلماتهم ترن باذاني ولسه راشدي ادهم يحز بخاطري...

لاول مره افقد وابجي واصرخ وهم ماهامهم ولا مسحو ع راسي الحجيه تصيح عليهم تخبلتو ولد حليمه وادهم يكلهه اخذيهه ماريد ادحك وجهه...

كعدت بالكاع ابجي واكلهم ليش انه شمسويه والله انه مامسويه شي ليش ادهم تضربني حسيت بالضعف وتاكدت انه وحده ضعيفه واخوتهه الي سانديهه...

طب فاروق ودحك الهوسه ودحك حالتي الماتسر العدو اعرفهه نظره فاروق هاي النظره اتدل بان هو ماراضي عليه بس ليش شمسويه اني؟؟

دحكلي بعينو الحنينه بجيت اكثر وكمت وكفت وتقربتلو كتلو فاروق ادهم ضربني وايوب اوس حجو عليه...

حال اخوتي مايبشر وابدهم ياكلوني اكل بهاي اللحظه اوس الي اكول علي هادئ انهد بيه وصاح سدي حلكج يولي هم الج عين وتحجين والله اذا ماسكتي لاكسر راسج...

عيني ع فاروق الي تشكيلو ع اخوتي صاح بيهم اوس احترم نفسك واياكم تتجاوزون حدوكم وياهه ...

وكل واحد يمد ايده عليهه انه اول واحد اكسرهه الو ولو موجان زلمه اياكم تخلوني اتصرف بتصرف اتندم علي...

ايوب.. دحك دلالك وين وصلهه وبعدك تحجي وادفعلهه...
فاروق... كتلكم اسكتو وراح ادفعون ثمن هاي العنتكه والصياح عليهه ..

بس جان يحجي من لاجاره الغضب بعيونو اتجاهي اشرلي افوت للغرفه وتعداني بس سمعت كلمه ادهم الي يكلو...

يول فاروق انه يعيروني بشرفي بسببهه وبسبب واحد كلب اختارتو....

يتببببع ....متابعه ممتعه

اتركم مع الاغنيه الي توصف حال ثريا من اختيار سارونه الجميلهHamzayhoocom1996