رواية ازمة ضمير الفصل الثالث والعشرون 23 - بقلم Rozaya1122

ازمة ضمير ... البارت الثالث والعشرون
«للكاتبه روزايه»

بشرني
بتوالي الليل وين تروح
هم تهيج بيك جروح
هم تگضيها بس تنوح
هم بيك النفس مخنوك
هم جرحك يظل مفتوح
هم شوفك يظل مشبوح
هم گلبك تحس مجروح
هم تذكرني لومره وجع داسك
هم اتشوف وجهي بعين كل ناسك
هم الشيب مالي ازلوفك وراسك
هم مكسور بيك الشوك واحساسك
هم مهدوم بيك من الحزن ساسك
هم تشتاگ ... هم مخنوك... هم بيك الگلب محروك
ذني البيه صارن شنهو البيك يصير ؟؟
....

ثريا... طلع فاروق واخوتي يدحكون ابوي شعندو جاي 
ثريا تعالي احجي وياج !!! كول اوس ..
اوس.. ثريا هاي ياقوت بنت امل شكد عمرهه وشتدرس؟؟

...ياقوت اصغر من نيران بسنه ومادارسه لحد الثاني متوسط ومبطليهه وعايشه يم الشيخ ناصر وهسه ابن عمهه يريدهه وهي ماتريدو وهاي اجت يمنه  الشيخ دزهه كالهه علما ينسون السالفه ويتزوج الولد ...

اوس.. ليش مادارسه لحد الثاني؟؟ دكول عمامي ماخلوني واغلب البنات هناك مايخلوهن لان مدارس مختلطه بالقريه وبطلت...

اوس ليش تسأل عليهه؟؟ لا ماكو شي خله وطلع بس انه اعرفو من اول ما اجتي عينو عليهه بس اوس يختلف عن اخوتي عندو الدراسه فوق كل شي...

ودائما يكول انه ما اتزوج الا وحده دارسه لذلك سأل عليهه شمخلصه بس العشك اذا دك ابوابهم بعد مو بالكيف...

صارت ب١١ مددت بفراشي واتخيلت البيت مملي جهال ونسوان اخوتي وانه حماتهن واكون صديقتهن التفتت ع نيران جانت غافيه دحكت عليهه بشرتهه ناعمه وبيضه بس ضعيفه ماتنلام الحجيه من دكلهه اليابسه...

امنيه المدلله نومهه عبث والدشداشه مرفوعه ومطلعه الرجلين بيض كمت غطيتهن ورجعت غطيت بنوم عميق...

كعدت الصبح بين ماتريكنه اليوم ناويه اسوي دولمه خليت المواد وكعدت بالكاع وامنيه كاعده تصفط سوالف والحجيه كلساع وداهرتهه...

كعد ادهم من النوم الشعر مبعثر والخاولي ع كتفه انتبهت ع امنيه مثل الي ارتبكت وترمش بعيونهه ضحكت بيني وبين نفسي دكول اخوي ومالحكت ووكعت بحبو...

اجه كعد يمنه بالمطبخ كتلهه امنيه كومي سوي جاي لادهم كامت بخجل ونيران وامل كلساع وابتسمن منين نزل عليهه هذا الهدوء ...

انطتنه الكوب وكعدت صار كدامو وكلساع تسرق نظره هو يحجي ويه الحجيه وهي عبالك اول مره ادحكو...

الحجيه... جده من تتخرج اتزوج هاي اخيتكم وحدهه خطيه ..
ادهم... لا جده بعد موهسه ..
... ليش يولي شو بنت عمك وموجوده شمنتظر...
... امنيه اختي بمثابه ثريا وانه وعدتهه تبقه نفس مكانتهه ماراح تتغير...

الحجيه... جده شجاكم الي بعمركم عدو كومه جهال ليش لسه عزابيه وانتو خير من الله...

ادهم.. هذا الحجي كولي لفاروق احنه مانتزوج اذا ماهو قبلنه جان يحجي ويشرب جاي وعيون امنيه تفتر علي...

عوزت معجون كتلو ادهم جيب معجون من المحل اريد الف الدولمه للغده ...

ادهم.. يولي ثريا محد يكعد يمج اذا ما طلعيلو شغله من جوه الكاع طلع للمحل والحجيه خلت نظاراتهه ع خشمهه واستلمت امنيه ...

الحجيه.. بنيتي امينه ليش ما تتوددين لادهم حته مايلعب بذيلو...

امنيه.. بيبي اني اسمي امنيه مو امينه وبعدين شتقصدين يلعب بذيلو هو عوعو..

الحجيه.. دحكن الحلك الاعوج من كون غمه تغمج هذا الزلمه الحوك دكولين علي عوعو من كون اكلج العوعو وخلاج مجلوبه...

امنيه.. شجاج بيبي انتي ليش شاده ويايه غير انتي كلتي عنده ذيل هو شنو الي عنده ذيل...

الحجيه.. خايبات ماتنطني شي اضربهه ع سنونهه هذني الجنهن كاشي كافع لسانج متبري منج ...

امنيه... لا يرتفع ضغطج بيبي راح اكوم من يمج لان انتي شاده وياج وعبالك ضرتج...

ثريا... متونسين ع سوالفهن كامت امنيه واحنه نشتغل سمعت الباب انفتح واسمع صوت بنات جيرانه اصغار وادهم جاب المعجون وطب جوه...

شويه ونسمع الهوسه كمت ادحك شكو والكا امنيه تكمز بنص الطرمه والجهال مجلبين وراهه ومسويه دائره وتغني...

آس آس آسيلوووو... آسيلو بالمغامره... طفرت عليهه الفاره
والفاره هندي هندي والليله باتت عندي
جابتلي ثلاث هدايا حمره وصفره وماويه بيه سبع واويه...

وتكمز وتسوي هييي والجهال وراهه بيهم 5 جهال بنات ولد وفرحانين ويكمزون واكفه وصافنين عليهه امل واكفه يمي ...

كالت يولي ثريا هاي تصير مرت ادهم حتلو صغيره بس عقلهه طفولي حيل...

... هي هاي امنيه من صغرهه نفس التصرفات وماتغيرت بس بعدهه هسه تكبر هستوهه دخلت ب١٥ ...

واكفه احجي وادهم واكف بالباب ومخلي ايده ع خصره وصافن عليهه ومبتسم وهي مستمره اس اس اسيلو...

طلع للطرمه بس دحكتو وكفت وسوت نفسهه خجلانه كرصهه من خدهه وكالهه عفيه استمري بس طول ولاذره عقل بهاي الجمجمه...

عافهه وطلع وهي واكفه لازمه خدهه ومبتسمه والجهال يجرون بثوبهه يله امنيه خلي نكمل وهي دكلهم لا كافي بطلت غير يوم نلعب غيرهه ..

صارت الساعه ب12 ونص بين ماصلينه وصبينه الغده اخوتي كلهم مجتمعين بس قيس مكانو فارغ كاعدين ناكل وانفتح موضوع البيت جانو كلهم مايدين فاروق يبيعون هذا ويشترون ارض جبيره ويريدون حديقه وكل واحد غرفتو...

يتناقشون والحجيه تدلي برايهه وياخذو بعين الاعتبار معتبريهه جدتي حليمه وقررنه بس هذا الشهر ونشيل من هين لان هم مخلين بيت واسع ببالهم ...

ورا الغده كعدت بصف فاروق كتلو شنو سالفه الحلم وشتقصد جدتي ياباب؟؟

يشرب جاي نزل الاستكان والتفتت عليه كال لاتشتغلين بالج ماكو شي ...

اعرفو فاروق ما ناخذ منو لاحق ولا باطل ويجوز بعد عشر اسنين يله اعرف تفسير الحلم...

ورا يومين اشترو البيت واخذوني دحكتو جان جثير واسع وبي حديقه وبي غرفتين جوه والديوانيه والمطبخ ومجمع صحيات وفوك هم غرفتين وبيناتهم صاله وصحيات فرحت بي اريدو يمتلي بجهال اخوي...

بدينه نشيل بغراضنه لحدما ظل اخر يوم بس شي قليل جانت عصريه ومنتظرين السياره حته هاهي نقفل البيت  ونروح...

جانت اكو جدريه مالهه مكان شايلتهه ياقوت ومخلين الجنط وكاعدين عليهه والحجيه وامل لابسات وينتظرن شوكت يجونه ...

ياقوت اخذهه الواهس وكامت اطبل ع الجدريه بلبدايه جانت الدكات خفيفه شو شويه وبدت تقوه والحجيه تصيح يولن انكلبتن دمبكجيات...

ياقوت اطبل وامنيه تغني باغنيه مدري منين جايبتهه دكول سمعتهه بعرس خالي من جنت صغيره وحفظتهه....

لبست عبايتهه ومشت وراحت لابوهه واشتكت عذبوني ولد المنطقه شوفلنه حل يابويه خلي نشيل منانه خلي نشيل منانه...

وياقوت تقوي بالدك والحجيه نزعت شحاطتهه حشاكم ولگحتو ع امنيه وكع بحضنهه ونزعت التك الثاني ولگحتو ع ياقوت ...

سكتن والحجيه انهدت بيهن يا ماتستحن دمبكجيات صايرات بنات الاوادم كومن لابارك الله بيجن كومن شدن وصله وهزن ...

ياقوت.. جده ع كيفج غير نتشاقه..
... هذا شقه يالغمه شيجي من ورا الدك والهز غير الفكر تريدن تفكرن اهل البيت من كون خفه ع الوجه وبله...

سكتن بعد رزاله غسل ولبس وكل وحده شايله تك من شحاطه الحجيه ومدنكه ....

اجه ادهم كال يله يكومن هذا اخر درب شلنه جنطنه وصعدنه بسياره شلون كعده كسيفه السياره صغيره نيران والحجيه وامل وياقوت ورا ...

وانه وامنيه بالصدر عود امنيه صغيره كعدناهه بصف ادهم ويريد يسوق مايكدر وكلساع وكالهه اكحزي يولي وهي دكلو شنو هاي المصطلحات الغريبه...

امنيه... صايره لزك بصف ادم وثريا مدري شتاكل صايره شسمنهه ادني بيهه ودكلي راح اطلع من الجامه والحجيه دكول يله وصلنه هي شمرة عصا...

كلما يحرك الگير يطخ فخذي وصاح بيه ولج صخام اگحزي ليغاد واني ارتبك وتصيبني قشعريره من لمسته...

صار الطريق شطوله بس اريد اوصل احس نفسي راح اموع يم الكير ومايلگوني مركز ع الطريق وفاتت سياره كدامه وداس بريك وكلنه انشمرنه ليكدام...

اني ما ادري موقعي شنو بس شوصلني بحضن ادهم شنو من ابريك الي شمرنه هاي الشمره جرتني ثريا واني احس روحي مثل الزبده المايعه ...

هو ولا اهتم كام يسب ويغلط ع ابو السياره واني بعدني مصدومه ما احس غير الكرصه اجتني من ورا من خاصرتي التفتت واشوف الحجيه تخزرني بحواجبهه المدكوكه خضر ..

همستلهه شبيج بيبي مافهمت شكالت بس سوتلي حركه مال كرص بعدين فهمتهه قصدهه كرصي روحج واكعدي يمكن شافوني من معت ..

رديت اباوع ع الطريق ومد ايده حرك الكير هلمره لا صارت الشغله خطيره ظلت ايده ع الكير ورفع راسه باوعلي لان اني جنت كاعده ع جنطه وصايره عاليه ...

رموشك يا ادهم احبهم حيل لاتباوعلي هيج رمش عيونه وابتسم ورجع يسوق شمرت نفسي ع ثريا لان الظاهر عجبه الكير واول مره يستخدمه....

صاحت ثريا خنتيني يولي راح اطلع من الجامه همستلهه يم اذنهه مو اخوج كلساع يمد ايده ع الكير ويلامسني والعياذ بالله خاف اوكع بالحرام...

ثريا... ضحكت بصوت عالي ع خبالاتهه جذابه هي خربانه والخدود حمر ودكول مااريدو...

وصلنه للبيت بعد ما اختنكه رتبنه البيت الشغلات الثكيله اخوتي يسووهه بس التخم ظل اخر شي يرتبون بي اوس وياقوت والنظرات مستحوذه ع المكان...

اوس من النوع الخجول وابد مو مثل اخوته دائما منعزل عنهم كلما تمر من يمو ياقوت يرتبك وينزع النظاره ويمسحهه بلكي هذا بيهم ما يتلوع مثل اخوتو....

جابولنه عشا جاهز وبدينه نتعشه دحكت ع ايوب متغير حيل ضعفان وصاير اسمر دكلي صافنه بوجهو رفعلي حاجبو الايسر بمعنى شكو؟؟

ابتسمت بوجهه ردلي بابتسامه جذابيه مومن گلبو نيران لمت السفره وانه غسلت واجيت فتحلي ايدو فاروق كال تعالي ثريتي....

كعد بينو وبين ايوب وصرت تحت جناح فاروق كال عجبج البيت؟؟
اااي حلو وجثير واسع اريدو مملي بجهالكم....

ضحك بصوت عالي ياثريا لاحكه ع الهوسه...
ياهوسه منتظره شوكت يصيحولي عمه وانه اصير حماة ويخافن مني لان اني الجبيره...

ايوب... من هسه تحضرتي وصرتي حماة موخوش ويخافن من عندج بالهداوه يولي ...

ثريا... انت بس اتزوج والله لاخليهه بعيوني شعندي غيركم...
ايوب.. هاي السالفه انسيهه ...
... ليش انساهه اول وتالي تتزوج قابل تظل اعزب...

فاروق... ثريااا اني موكايلج لاتصيرين لحوحه كبرتي ونفس طبعج ماتغير ...

... تتذكر من جنت الح الا تشترولي قمر الدين واكلو واتقيء لان عندي حساسيه منو...
... اي اتذكر كبرتي ومعزتج كبرت وياج وشايل هم لليوم الي ازفج بيدي...

... فاروق لاتحجي هيج اني ما اتزوج الا تتزوجون انتم... كرصني من خدي وكام وهو مبتسم ...

اليوم تعبنه حيل فرشنه بالكاع انه والبنات وكل وحده عدهه سالفه بدت تحجيهه جان الموضوع عن الحب...

كعدت بنصهن وبديت احجيلهن الكلام الي جان يكولو قيس من جنت صغيره ما انام الا بحضنو ويحجيلي قصص...

مره من المرات جانت عركه بين عماتي وجدتي حجت ع المشاكل والرحمه والالفه من نمت سولفت القيس ليش هاي الناس واحد مايحب الثاني ويريد السوء لفيرو...

قيس... اسمعي ياثريا بقديم الزمان اكو كوكبين  واحد اسمو المريخ وعايشين بي بس الرجال واحد اسمو الزهره وعايشات بي بس النساء...

كل واحد عايش حياتو بعيد عن الثاني ومرتاحين وخاصه كوكب المريخ جان احلى كوكب ليش ما افترت المجموعه الشمسيه وتقابلن هذني الكواكب والتقه المريخ بالزهره...

وكعو رجال المريخ بحب نساء الزهره وعاشو بكوكب واحد اسمو الارض المريخ يريد نساء الزهره يمشون ع تصرفاتو والزهره كذلك ...

ومن هاي الحادثه انولدت المشاكل والكراهيه لان المريخ مايتوالم ويه الزهره جانت القصه خياليه بس مستمعه بيهه جثير ولحد هاي اللحظه ببالي...

ع السوالف والهدوء امنيه غفت واحنه ظلينه نسولف لحدما داهمنه النعاس...

ثاني يوم ادهم حضر غراضو وراح لبغداد واحنه اجن عماتي يباركن للبيت بس مالهن وجه يمنه كعدن شويه وراحن ....

بهذا الشهر عندي دوام بالمستشفى اخذني فاروق ولكيت رحاب والبنات هناك بديت اداوم يوميه وسلام لكيتو بنفس الكروب...

نظراتو تربكني اول ايام شكلت بخط ليش مابيوم ما اجاني الخط وظليت واكفه انتظر بالشارع وجنت متحلفه بس ارجع اكول لفاروق يشتريلي تليفون احتاجو ...

سلام عندو سياره اسمهه بيجو فات من يمي وتعداني بس دحكتو يرجع لحدماوصل يمي ونزل يحاجيني...

بهاي اللحظه بس اريد اخلص من عندو الي يدحكني شيكول البنات راحن كل وحده لبيتهه وانه محد ع طريقي ظليت واكفه انتظر رحاب كالت انه اخلي الخط مالتي يرجعلج...

سلام... ثريا ليش واكفه هين ؟؟
... ابو الخط ما اجه ومنتظره خط رحاب...
... تعالي اوصلج بطريقي لاتظلين واكفه هين وشمس حاره...
... لا شكرا هسه يجي الخط...
... ثريا اعرف بيج تجنبيني بكل الطرق بس انتو صرتو جيرانه ...

... شنو ياجيران؟؟ ااي احنه ساكنين يمكم دحكت اخوتج وسلمت عليهم سكنتو جديد بالمنطقه...

... هذا شلون لزكه وشراح يخلصني من عندو لو اعرف اظل بالشارع ما اصعد ويااا كتلو شكرا ماتقصر هسه يجي الخط  وادعي بكلبي وين صار ...

بعده يحجي واجه السايق بسرعه كتلو من رخصتك وعفتو واكف وركضت صعدت الحمدلله جان ماخلصت من عندو لان عندو قابليه للنقاش موطبيعيه...

رجعت للبيت وحجيت لفاروق وراح اشترالي تليفون اسمو سامسنوك لونو رصاصي جنت فرحانه بي بشكل موطبيعي

مر شهر كامل قريب ع الدوام عصريه اندك الباب وادحكهن نسوان مانعرفهن كالن احنه جيرانكم بيت ابو وهاب رحبنه بيهن وطبن جوه...

بعد الاخذ والعطا كالن احنه جايين خطابه ع ثريا ابنه سلام وياهه بنفس المرحله ويحمد بيهه وانتو سكنتو جديد وسالنه عليكم كلهه مدحت بيهه كالو تربيه ٥ زلم غمضوا واخطبوهه...

كالتلهن الحجيه نشاور اخوتهه ونرجعلكم خبر اذا اكو نصيب ما ادري شصابني نفسو سلام الي انعجبت بي وثبت نفسو واجه خطبني بس ليش ماهاويه ولا اتمنى ارتبط بي ...

حاجتني الحجيه وامل وما اعرف شكول سوالفهن والتقنيع كتلهن خلني افكر اخوتي سالو علي كالو خوش ناس والولد يمدحون بي...

ما اتحمبدلت قررت احجي لفاروق ع تضارب المشاعر الي عندي ورحتلو للغرفه جان هستوه امدد ..

ثريا.. فاروق اريد احجي وياك
... تعالي بنيتي..
... فاروق انه ما اعرف شكول بس اريد احجيلك عن الحاله الي امر بيهه ..
... يا حاله شصاير وياج؟؟
... بديت احجيلو عن تضارب مشاعري وشلون جنت بلاول متقبلتو وهسه لا وساعه اكول اريدو وساعه لا...

طمني بكلماتو المعتاده وانطاني وقت افكر اكثر وفعلا ظليت اسبوع كامل ورجعت خبر بان انه موافقه...

ياريتني ظليت مصره ع احساسي وما قبلت وياريت وياريت واشياء جثيره ظليت متندمه عليهه لهاي اللحظه....

يتببببع.... متابعه شيقه ...

راح اترككم مع البطل الثاني وبعد بكيفكم انتو احزرو منو بيهم اشكركم ع تفاعلكم القصه حصلت ع المراكز الاولى شكرا من الق

لب