رواية ازمة ضمير الفصل الرابع وثلاثون 34 - بقلم Rozaya1122

ازمة ضمير ... البارت الثاني والثلاثون
«للكاتبه روزايه»

وهسة تريدني!!!
بطرگ الهله اتلگاك
چاااا والشيب؟!!!!
...
ثريا... مونيران الكدامي شبح انثى ضعيفه هزيله والبشره هذيج الترفه مكلوبه سوده وبقع جوه عيونهه والشفه زركه مثل اليدخنون واكبر من عمرهه بعشر سنوات...

بس ادحك عليهه انه وامنيه مانعرف شنحجي طببتهه الحجيه واحمد الله بس احنه بالبيت اخوتي كلهم ماموجودين..

ساكتين كلنه وهي مدنكه ولابسه ملابس رثه وترفع براسهه وترجع تنزلو بس مابجت ولاوكعت دمعه من عينهه مثل الصخر كدامي...

نيران.. امنيه شلونج؟؟
امنيه.. جنت بخير بس من شفتج هسه صرت موزينه شعندج جايه ماكفاج السويتي..

نيران.. حقكم شماتحجون..
امنيه.. احجي الي عندج وروحي ما اريد اشوف وجهج ولا اذكر اسمج..

الحجيه.. امنيه موهيج الحجي نيران مانحجي تعرفين حجم ذنبج هسه كليلنه منو جابج وشلون اجيتي من الانبار ...

نيران.. رجلي جابني من البارحه احنه ابغداد وهو وصلني الكم اخذت العنوان من عمتي ام جاسم..

الحجيه.. شرايده وخير جيتج بعد هاي المده الطويله..
نيران.. اني ما اريد تسامحوني لان ما استاهل بس جايه بشغله وياريت تساعدوني..

ثريا.. ماكدرت احجي الساني انعكد ادحكلي تريدني اسالهه بس مصدومه بكلشي بحالتهه وبجيتهه ..

الحجيه.. بشنو انساعدج؟؟
نيران.. اني اعيش حياة بائسه ومابيدي اي شي شيكلولي اسوي ماردت اجي لان اعرف عيب عليه واصلا ما استحي بس مجبوره..

امنيه.. دائما تسوين الفاينه ودكولين مجبوره وهسه بشنو انجبرتي ...

نيران.. ابوي ورجلي يضغطون عليه حيل واكعين بمشكله ودزوني اتقرض افلوس من عدكم واني ما اعرف شسوي وجابوني غصب ...

امنيه.. ياماتستحين ياعرمه ياصلفه ولج شكد شفت حقيرات بس مثلج عمري ماشايفه كومي اطلعي برا لا اطلعج سحل لابوج العار تفو عليج وعلى فلاح  ...

غدرتيهم ودرتي ظهرج وهسه جايه عبالي تشرحين اسبابج التافهه مثلج طلعتي جايه ادورين فلوس عديمه الكرامه ...

حرامات ماما خلفت وحده مثلج عديمه ضمير اكرهج واتخبل من شوفتج بسببج قيس مايباوع حته بوجهي لان يشوف خلقتج الزفره خليتيني اكره نفسي لان انتي اختي وعبالهم اني مثلج وطبعنه الغدر ...

الحجيه.. موهيج يا امنيه عيب يايمه خلي نفتهم منهه ندري بكلبج ملجوم منهه واحنه هم حركتنه بنارهه  بس موهيج يولي..

ثريا.. امنيه ع كيفج خلي نفتهم السالفه..
امنيه.. شتفتهمن حجتهه كدامجن تريد فلوس ماجايه تعتذر ولاجابهه الشوك لاختهه اجت ادور فلوس تشبع بطن ابوهه ورجلهه ولج حته مابررتي عملتج السوده  ...

صار فوك السنه ماسالتي على اختج عايشه ميته شلون وضعهه عفتيني طفله كلشي ما اعرف هم تكدرين تنامين وتغمضين عينج وغدرتي رجال واطلكتي من عنده بدون علمه..

ثريا.. زكحت بامنيه انفعلت وكامت ترجف من العصبيه ما الومهه حته انه ضجت شلون تكدر تطلب من العائله الدمرتهه بس حالتهه ماتسمح للوم والاهانه...

نيران.. كتلكم مابيدي شي جابوني غصب..
الحجيه.. نيران يمه اذا مامتندمه وجايه تعتذرين الدرب الجابج يرجعج وماراح نوصلهه لولد عمج حته  مايكرهوج اكثر عيب يابنتي عيب انتي موعبده وتسوين الي يطلبو من عندج..

نيران.. اني ما اطلع من هنا اريد تساعدوني اذا رحت بدون فلوس اتاذه والله واني تعبت حيل ساعدوني الله عليكم..

الحجيه.. استغفر الله شنحجي يانيران والمن اخابرلج كلهم ولد عمج كارهيج المن احجي انتي ماخليتي خط رجعه...

نيران.. جده ساعديني والله اتاذه جابوني من الفلوجه لهنا حته يحصلون فلوس اذا ماحصلو اني اوكع بيهه..

ثريا.. كل عقلج نيران تعب اخوتي انطي الج ولابوج ورجلج المانعرفو منو انتي صاحيه يولي تعبهم هذا انطي الج ليش شنو فضلج علينه اصحي وخلي لنفسج كرامه متفاجئه بيج..

نيران.. ماعندي فضل بس احسبوني غريبه ودكيت بابكم ثريا اني متاذيه الله عليج ساعديني..

الحجيه.. كومي ثريا خابري فاروق لو ايوب خلي يجون يدحكون هاي المصيبه..

ثريا.. جده تحجين صدك اذا سمع قيس شيكول ماعوزه قهر هستوه بده ينسه حرام علينه اناذي..

الحجيه.. حرام علينه انرد طالب وداك بابنه احسبيهه غريبه يابنت حليمه كومي خابري اخويتج خلي يجون...

ثريا.. نار بداخلي وتغلي احس كل كلمه دكولهه مثل المنشار وتحز بداخلي وتنثر نشارتو من الحرگه ابدي اهجم ع عمي واطعنو بكلبو...

رحت خابرت ع فاروق ماجاوبني دكيت ع ايوب هو سمع بيهه كال شعدهه هاي جاي لاتخابرين قيس هسه انه جاي بالطريق...

رجعت كعدت يمهه انتظرهه تحجي الاسباب توضح الصار بس ساكته ومدنكه وامنيه تهز برجلهه ...

ثريا.. نيران راح انساعدج لوجه الله ودفع بلاء عن اخوتي بس رجاءا لاتجين بعد لان احنه مو محطه استراحه وشوكت مايعجبج تجين...

نيران.. ان شاء الله..
امنيه.. نرفزتني ببرودهه ومسويه نفسهه مسكينه ما اتحملت اشوفهه كدامي اتذكرت ليله زواجهه وصوت قيس وخرابه ويه فاروق وتشتت خوتهم..

كمت هديت عليهه اريد اشفي كلبي مسويه نفسهه بريئه جبانه بعدهه مصره تساعدهم معناتهه برضاتهه تكدر تستغل الفرصه وتسولف وينقذوهه وهم ولد عمهه كلهم واصلين...

جريتهه من جبتهه وتلاويت وياهه بعدني اتعارك جفلني صوت ادهم صاح بيه وجرني من ايدي...

ثريا.. خليت ايدي گلبي وانه ادحك ادهم وقيس واكفين بنص الديوانيه جانو جايين ع رسلهم مايدرون بيهه...

انه من يمي گلبي صار مثل البالون من القهر شحال الواكف كدامهه ويدحك بيهه من فوك ليجوه...

قيس ماحجه اي شي بس ادهم كالهه شعندج جايه يانيران ؟؟

امنيه.. لا تغركم وكفتهه ترى جايه تداين فلوس لابوهه وزوجهه حته ماكلفت نفسهه تعتذر وتبرر موحبا بينه هاي طماعه..

ادهم.. امنيه سدي حلكج اخذيهه ثريا للغرفه وخزرني رحت للغرفه واني اغلي عليهه..

الحجيه.. يمه ادهم واكعه بمشكله ومهدديهه يكتلوهه لو تجيب فلوس وتعرفون عمكم بعد ياجده ساعدوهه لوجه الله مولخاطر واحد...

قيس.. الدرب الجابج يرجعج والكو.... الشمرج هين ردي الو ولايتختل ورا النسوان ...

ثريا.. ماحجت اي شي واكفه وانتبهت على ايدهه ترعش وبيهه مثل الانحراف ما ادري اوكف ويه اخوتي لو وياهه الي راح توكع من دحكت قيس..

ثريا.. قيس خلي نساعدهه عدنه خير من الله دكول ياذيني اذا رجعت بدون فلوس ..

قيس.. راح اطلع ما اريد ادحكهه واياكم اسمع واحد بيكم منطيهه الف جان استحت على نفسهه واكفه بنصنه وتطلب فلوس من الدمرتهم خلي تروح لابوهه هو يساعدهه...

ثريا.. هستوه يريد يطلع قطعت الطريق علي بس مارفعت راسهه ابد جانت تحجي وهي مدنكه وايدهه ترعش ما ادري انتبه عليهه قيس لولا..

نيران... قيس الله عليك بروح جدتي ساعدوني والله جاي اتاذه والله اذا رجعت بدون فلوس اتاذه سويهه لله احسبوني غريبه ...

ثريا.. جانت كلماتهه مثل السهام وترميهن على قيس مابجت بس نبرتهه حزينه ماالتفت الهه قيس ابد خله وطلع وصاح ع ادهم وراا ...

ظلت واكفه بنص الديوانيه وادحك بعينهه قهرني موقفهه شكد ضعيفه ومسلوبه الاراده وماتعرف شتسوي مثل الغركان ويهمش ...

الحجيه صفكت باديهه وكالت اعوذ بالله من ضمير بني ادم ......

رادت تطلع بس طب ايوب كعدت تتوسل بايوب كالهه راح انطيج الفلوس بس اياج تجين بعد يانيران وراح انطيج من عندي  محد يدري من اخوتي ...

طلع من جيبهه فلوس حسبلهه وانطاهه وكالهه روحي مشت بخطوات ثقيله وصلت للباب عثرت جنت ادحك عليهه من الشباك ما التفتت ابد ..

ثريا.. ليش ساعدتهه قيس جان هنا وادهم اثنينهم ماقبلو وطردوهه ليش انت بالذات؟؟

ايوب.. مو انه قيس تلكاني بالباب وكال انطيهه وخلي تروح وبعد لاتجي..

لايغرج المكابر مالتو بلحظه لان گلبو عليهه وكال انطيهه اي شي تريده ولادكول من عندي..

ثريا.. ماكاعد افهم الي سوتو ليش هيج نيران متغيره تذكرهه يا ايوب شكد بريئه وفقيره وماتحب الغلط لوماهي احنه ماكعدنه ابيت واخذنه حقنه شنو الخلاهه تسكت وماتحجي حتلو ابوهه مهدده غير تسولفنه والله يللگحو بالسجن..

ايوب.. هسه بعد ليش ماليش مايفيد اتزوجت وراحت ماسالتيهه عدهه اطفال..

ثريا.. لا ماسالتهه اصلا هي كلشي ماحجت بس كالت ساعدوني ..

للعصر اجه فاروق وحجينالو ماكال شي من سمع بقيس هو الي انطاهه الفلوس لان من يحجي يطلع موزين لذلك ظل ساكت ...

قيس بهذا اليوم مارجع للبيت وشكد دكيت علي مغلق بعدين اوس كال يم صديقو لايظل بالج...

وهم راحت نيران وماعرفنه السر الوراهه خابرت كل عماتي كل الي اسالهه دكول اصلا مامدحكيهه من جانت يمكم شلون عايشه بدون اهل وشلونهه عيشتهه ؟؟

بهاي اليومين انتبهت ع فاروق ضايج ومالو خلك وعصبي ويه اخوتي كلما اسالو يكول يولي مابيه شي شكد تلحين...

انتظرت ايوب مستودع اسرارو بس اجه تلكيتو كتلو ايوب شبي فاروق؟؟

ايوب.. شبي مابي شي؟؟ لا شو ضايج وعصبي..
.. يعني ياثريا تريدين الواحد ليل نهار مزاجه عدل ..

ثريا.. ايوب الله عليك شبي فاروق ظليت بربع ساعه الح وهو مايقبل يحجي اخر شي كتله بروح اعزاز كلبك...

ايوب.. حسيته كوه بلعهه هاي الكلمه وكال تاجل قبولو بمعهد القضاه مده شهر ؟؟

... ليش تاجل؟؟ الشروط مال القبول لازم عندو ممارسه وهاي امشيهه الو الدكتور الجان يجينه عندو معارف بس الشرط الاساس لازم متزوج واخوج اعزب ...

ثريا... سهله وعليمن ضايج خوب يتزوج يامسهلهه...
ايوب.. اي سهله بس عنده لااا مامفكر يتزوج هسه ابد ويكول حتلو بس عقد وبعدين اطلك...

ثريا.. موخوش سالفه وشراح يسوي قنعو خلي يتزوج..
ايوب.. الله عليج يولي كومي من هين ترفعين الضغط اقنعو شنو هو ابو 15 واقنعو ماتعرفين اخوج تقنع بغداد كلهه ومايقنع هو...

ثريا.. طردني ايوب من الديوانيه كومي منا اذا تظلين تاكلين كلبي صح الح انه بس غير اريد اعرف كلشي منين اجيب وحده تقبل بعقد زواج بس علمود يقدم...

ركضت للحجيه صاحبه المهمات الصعبه سولفتلهه السالفه خلت المخده بالكاع وارتجت وضربت صفنه وايدهه تسبح...

الحجيه.. موهذا اخوج محد يكدرلو انه عندي حل والله ويعجبو بس خاف المفجوعه توكع بحبو وتعال جيب اليطلكهه...

ثريا.. منو جده بلاول نسالو اذا ناوي زواج خلي يتزوج واذا بس عقد اتفقي وياهه ماتقبل اندحك غيرهه اكو جثير يمرن بظروف صعبه..

الحجيه.. خايبه انتي تحجين من كيفج يول هذا فاروق اخاف ع البنت من عندو وهسه منو بينه تصير سباعيه ودكوم تقترح علي ...

ثريا.. عجل شلون ياجده فاروق اعرفو زواج مايتزوج الا بقناعتو وحتلو يروح منو المعهد مايتنازل ولا يجي ويكول اريد اتزوج الا يختار هو...

الحجيه.. خليني اصفنلهه زين وادحك شلون كومي خلي انام هسه..

ثريا... كمت من يمهه شوي وصاحت ثريا اجيتهه لكيتهه كاعده بفراشهه...

الحجيه.. اسمعي يبنت عندي وحده اعرفهه جثير المعرفه عدهه بنت وحده صرفت دم گلبهه عليهه ووصلتهه هي من هين من بغداد وجانت ماخذه ابن عم رجلي ...

جنه انه وياهه ابيت واحد مره اصيله بغداديه خلفت بنت وحده ومات رجلهه واهلهه اخذوهه وابوهه بحزب صدام واخذ البنت يمو غصب ع عمامهه والمره ما اتزوجت وظلت ع بتهه...

بالسقوط اجينه لبغداد بشغله تنازل ولكيتهه حال الضيم حالهه اهلهه ميتين وظاله تلطلط بين نسوان الاخوه وبعدين اخوتهه لان بالحزب شردو وظلت بس هي وبتهه كاعده بغرفه تجاوز وتشتغل ببيوت الناس...

ثريا.. مارجعت لعيالهه ولعمام بتهه؟؟
... خايبه هو منو ظل منهم صارت اعظامهم كحل وهي وياهم گبل مشاكل ومايحبوهه وين ترجع هي من التسعينات ماطبت الفلوجه بعد...

ثريا... وهسه قصدج نقنعهه علمود بتهه؟؟
الحجيه.. لا يولي بتهه عزيزه عليهه وماتقبل هيج تبيعهه البت جنهه كمر تخبل ما اظن اخوج ابو خشم اليابس ماينعجب بيهه ...

البت دارسه بس مدري شنو انه اكول احجي ويه فاروق اكلو شكم يوم انجيبهه لان ماعدهه مكان بحجه المساعده وهو بلكي يدحكهه وينعجب بيهه..

امنيه.. جنت نايمه واسمع حديثهن المشوق رفعت راسي من البطانيه كتلهه جده والله عندج خيال واسع احسج مخرجه مال مسلسلات هنديه...

الحجيه.. انخمدي انتي ليل نهار نايمه جنج نفسه من كتلج جيبيلي مي سويتي نفسج قتيل بس هسه رفعتي راسج جنج زرافه...

ثريا.. جده حجي امنيه صدك يعني احنه من نسوي هيج ع اي اساس يجوز المره ماتقبل تجي ويجوز فاروق ماينعجب بيهه ...

الحجيه.. يولي هو انه وانعجبت بيهه حلوه البت وصغيره شيريد اخوج بعد هسه موالو لواحد من اخوتو وامهه تقبل بحجه الخدمه بالبيوت نكلهه محتاجين عدنه شغل ....

بس خاف تجينه وحده وماتجيب البت يله عود انفوتلهه بدرب ثاني ومنو يكول بعدهه تخدم خلي اتاكد منهه يولي...

ثريا.. اجرت اتصالاتهه الحجيه ويه معارفهه القديمه وحصلت العنوان ساكنه بتجاوز بس هي وبتهه وبعدهه تخدم بالبيوت...

ماحجينه لاحد ثاني يوم من الصبح بدلنه واخذنه اوس يدرون الحجيه راحت لكرايبهه مريضه وانه ما اكدر اعوفهه وحدهه كلساع واكلهه جده خاف حرام ...

... ليش حرام اذا صارت النه قصر بالجنه..
... وانتي مصدكه فاروق يتزوج هو كلبه حجر مادك ابد..
... هسه دمشي خسرانين خساره هم نساعدهه ونساعد فاروق عجل تروح منو دراستو علمود حرمه يامكثرهن...

..وصلنه لمنطقه الله يعين اهلهه شلون عايشين بيهه غرف مكشوفه من طين والي من تنك ربي الك الف الحمدلله ع النعمه الي احنه بيهه...

نمشي ونسال وين بيت ام شذره حته اسمهه غريب متحمسه ادحكهه مثل كلام الحجيه ووصفهه...

دلتنه الجهال على باب سياج من سعف وغرفه من طين دكينه الباب جثير خفنه خاف ماموجودين شويه يله طلعت مره متوسطه بالعمر التجاعيد وتعب السنين ماخذه حيفهه من بشرتهه...

بس دحكت الحجيه بجت وتحضن بيهه ودكلهه نعيمه ما اصدك ونعيمه دكلهه يابشيره الترفه شصاير بيج نسن نفسهن بالباب همست لجدتي منا ناس جده..

بشيره.. اعذروني مامصدكه اشوفج يا نعيمه تفضلي تفضلي ولو بيتي موكد المقام ...

الحجيه.. يم كلب الطيب يا بشيره شلونج يولي بنيتج شلونهه شلون عايشه..

ثريا.. كعدنه بغرفه بيهه تلفزيون ومفروشه حصيره وطباخ ابو ٤ عيون منضدي حالتهم ابد ماتسر انطلقت الحجيه ووحده تشكي همومهه لثانيه.

بشيره.. من مات ابوي واخوتي شردو مطلوبين تعرفيهم شلون جانو خابصين الدنيا بالحزب وتالي صفيت وحدي ابوي الله يرحمه حرمنه البنات من الورث وانطه بس للولد واخواتي مايسالن عليه بالصدفه تغيرت الناس ومحد عنده ضمير صاحي ذاك من ذاك ...

وهاي شوفه عينج كاعده بغرفه تجاوز وادفع عليهه ايجار واخدم بالبيوت واظل حايره ابنتي حديثه واخاف عليهه ولاترضه تتزوج دكلي لاتظلميني بالفگر كل اليجي اتعس من حالتنه ...

الحجيه.. وينهه هي شذره بعدهه حلوه؟؟
... اي بعدهه ما اطلعهه وياي اخاف عليهه صاحت شذره وينج جانت تسبح بالحمام ...

اجت شذره ودخيل الله شنو من شذره ايه من الجمال بدون مبالغه بس حلوه بشكل موطبيعي سلمت علينه وكعدت يم امهه ولافه الشال ع شعرهه الرطب ...

بيضه ع حنطاوي والعيون كبار وسود والشفايف مرسومه والخدود متفحه وناعمه جنهه امنيه موضخمه انه انعجبت بيهه واتمنيت تصير لواحد من اخوتي...

الحجيه.. شلونج يشذره شدرستي وين وصلتي؟؟
شذره.. زينه الحمدلله درست معهد تقني محاسبه وهاي اخر سنه واتخرج هن سنتين..

الحجيه.. انتي مواليدج ويه وفاه ابوج بالواحد وتسعين مات يعني شكد عمرج هسه..
شذره.. عمري هسه 19 ...

ثريا.. صافنه عليهه وهن يحجن شويه وكالتلهه الحجيه بشيره جايتج بشغله...

هاي ثريا بنت عماد ابن اختي حليمه الله يرحمهه بس هي وبت عمهه بلبيت وانه مره جبيره وعدهم عمال واخوتهه ماتلحك ع طلباتهم انه اريدج تجين ويانه شكم يوم هم نكعد نتسامر وهم تساعدينه ..

بشيره.. والله يانعيمه ما اكدر اطلع غير شكم ساعه شذره ما اكدر اخليهه وحدهه اخاف عليهه وعطله وماكو دوام اجيكم اني بعيوني بس بوقت محدد.

الحجيه... لا يولي بشيره البيت هو بيتج اتجيبين بنيتج وتكعدين يمي بالغرفه احنه مانريد مره غريبه انريدج انتي وانه تعنيت عليج اخذت عنوانج من اهلنه ...

بشيره.. زحمه يانعيمه مابايته بغير بيت وبنتي شابه اخاف عليهه والله كل تعبي علمودهه..

الحجيه.. اسكتي خايبه هذا بيتج هاي ثريا بعمرهه وهن شكم يوم ماريد تساعدينه انه جايه اعزمج تردين عزيمتي ...

بشيره.. جيتج ع راسي كلج بركه وما انسه وكفاتج وياي باجر اجيكم اليوم ما اكدر لان عندي طلعه العصر لبيت باجر من الصبح اني يمكم...

ثريا.. سلمنه عليهم وطلعنه والحجيه تسويلي باصبعهه اوك اوك رجعنه للبيت وانه فرحانه بلكي صدك وتصير لواحد لاخوتي موالا فاروق ...

البنيه حلوه ومؤدبه وامهه تعبانه عليهه حته حواجبهه اثخان وماماخذه منهن ولا شويه ضحكت ع نفسي شلون احجي يعني انه مو مؤدبه لان حافه حواجبي مرات اطلع بطلعات موخوش...

بليل اجتمعنه ع السفره كالت الحجيه اكلكم جده رايده منكم شغله صغيرونه طلبات جدتكم ماتخلص..

ايوب.. انتي مو اطلبين اتامرين امر..
الحجيه.. يمه منك يبو سمره وهذا اللسان ...

اكو وحده من كرايبنه تصير مرت ..... تذكروهه يجوز كلهم صاحو اييي رجلهه مات وهي من بغداد...

... اي يجده هاي تخدم بالبيوت وماعدهه احد وانه اليوم رحتلهه انه وثريا كسرت كلبي كاعده بغرفه تصيح منهه الغوث كلت تجي تساعدنه بهذا الاسبوع علمود العمال وانتم تنطوهه من خيركم...

انه كلت هيج لان هي ماتاخذ من احد الا بشغلهه بحجه تشتغل حته تساعدوهه والله ياجده تكسر الخاطر...

ايوب.. خلي تجي غرف خير من الله مرات الانسان يكون صاحب كرامه ومايتقبل المساعده الا بتعبو..

الحجيه.. بس عدهه بنيه وماتكدر تعوفهه بالبيت كتلهه تجيبه وياهه هو اسبوع...

فاروق.. جده بيتنه بي 5 زلم زحمه بتهه وياهه يعني هي تتقيد واحنه هم نتقيد ...

الحجيه.. لا ياجده انه كلت هاي الغرفتين البرا الي جنهن مخزن تكعد بيهه سويهه لله يا يمه ماعدهه تعبانه عاد التحصلهن تدفعهن ايجار...

فاروق... انه ما اعترض ع مساعده اي واحد قريب والا بعيد بس علمودهه هي دكولين عدهه بنيه شابه انه ادحكهه زحمه ...

الحجيه.. يله عجل اردلهه خبر اكلهه مامحتاجين هو احنه صدك مامحتاجين هاي امنيهه جنهه فاره ليل نهار تشتغل بس كلت ماتاخذ فلوس هيج الا تشتغل...

امنيه.. تفكيرج اسرائيلي جده اني هسه مصدومه مصدومه...

الحجيه غمزت لامنيه تسكتهه ودنكت تسبح وهدوء عم كال ايوب يول فاروق اول مره ترد مساعده واحد مدام المره تعبانه وتريد تشتغل بتعبهه ليش رافض...

فاروق.. انه فاتح بيتي وما اعترض بس علمود بتهه زحمه ترى  تريد مساعده اساعدهه بس مو مال تجي يمنه..

ثريا... نقاش مايتناقش سد الموضوع وما انطه واحد ينطي رايو رفض وكام واحنه باءت محاولاتنه بالفشل

يتببببع.... متابعه ممتعه