رواية ازمة ضمير الفصل السابع والعشرون 27 - بقلم Rozaya1122

ازمة ضمير ... البارت السادس والعشرون
«للكاتبه روزايه»

اكول انسى وارد اهواك...
وبنفس الحجر اعثر
عندي احساس راح انساك
بس احساس مو اكثر....
.....

ثريا... سحبت امنيه من ايدهه وطبيت جوه نقذت اخوي من هاي الورطه الي وجهو كام ينطي الوان وايوب لزم ادهم من ركبتو بشقه...

ثريا... يولي امنيه سدي حلكج عفيه ترى جاي تحجين شغلات ماتعرفيهه ..

امنيه.. ليش شحجيت هو مو خطيبي؟؟
... اي خطيبج بس انتي بنفسج كلتي اعتبرو اخوي واذا اعتبرتي اخوج مايصير تحجين اي شي يجي ابالج وتحرجي...

امنيه هسه مخبوصين بالليل اكعد وياج ونسولف اخت لاختهه وراح تنطيني وعد تسمعين كلامي...

ثريا.. لازم اكعد ويه امنيه واحجي وياهه هي بطبيعتهه مرحه وكلبهه طيب وكل الي يجي ع السانهه دكولو بدون ماتفكر صح لو غلط ...

والاكثر من هذا احس امنيه راح تحب ادهم ومرات الكاهه ادحك علي وما اريدهه تتعذب ولايهون عليه ادحكهه تعاني بسبب حب اخوي ...

التهينه ويه قيس وفتح الجنط وجاييلنه هدايا جانت الحصه الاكبر الي يكول وين ما اروح وادحك شي حلو اكول هاي لثريا...

طلع علاكه انطاهه لنيران الي كاعده بصفو ومبتسمه كل واحد بينه الو نصيب من الهدايا حته الحجيه وامل وياقوت ضميناهن من يجن...

بهاي الليله محد طلع من اخوتي والكل فرحان وشقه وضحك كالعاده ايوب وقيس ابد مايتراهمون تالي الشقه مالتهم ينكلب غلط وايوب يكوم زعلان وهاي العاده بي من صغرو...

نيران...كلساع اريد اكوم ويهمسلي اكعدي شويه يولي مشتاكلج واظل كاعده وخجلانه نظرات ادهم وايوب تربك الواحد يحسسوني مسويه جريمه...

الكل كام وظلينه بس اني ويا وثريا اخذت امنيه وراحت للغرفه الفتت عليه كال تعالي نكعد بالمضيف محد بي بس سد الباب سحبني من ايدي بقوه وضمني حيل لصدره.. بادلته الحضن وهو مشدد قبضته وايده تتجول على ظهري بكل حنان ورومانسيه...

جسمه ضخم صاير وهو طويل بعدني من حضنه ومد ايده على كذلتي خلاهه ورا اذني وهو يباوع بعيوني جنت قريبه على صدره حيل اديه بعدهه محاوطه اكتافه ...

نزل نفسه يم اذاني وهمسلي بكلمات عذبه ممليه حب وحنان واللهفه واضحه علي عيونه تشع بالحب ماكدرت اقاوم عيونه الي بيهن جاذبيه موطبيعه خليت راسي ع صدره وهو مستمر يسمعني احلى الكلمات...

شويه وابتعد ولزمني من فكي ورفع راسي بهاي اللحظه رجفت شفايفي وغمضت عيني بس انفاسه تلهب بوجهي كلما يقترب اكثر احس بحرارته ولمساته الجريئه...

طبع بوسات خفيفه متتاليه على شفايفي وبعدهه اخذهن باتقان اصبحت مسلوبه الاراده بس اديه تضغط على اكتافه وكانو انطي ايعاز بلاستمرار اكثر...

طولت البوسه وحسيت الهوه شح عليه ابتعد من عندي بس مافتحت عيوني ابد ولاعفت حضنه اخذني من ايدي وكعدنه ع التخم كلما اباوعله انصي راسي من الخجل ....

قيس... شوو نيراني خلي ادحكج ليش هيج خجلانه..
... موهاي دا اباوعلك لايجي احد خلي انكوم...

... وخلي يجون شمسوين جريمه يابه گلبي طاك عليج يوميه قبل لا انام اطلع صورتج ادحكلهه مخليهه بمحفظتي خفت لايصير شي وما اشبع من عندج...

... اسم الله عليك اني هم مثلك يوميه انام على تخيلاتي وادعي ترجع سالم...

... خلصت بعد سنه وحده وهاي السنه قسمين كل ست اشهر وحدهه ...
...شكد راح تظل هنا؟؟
... شهر واحد وارجع ورا 6 اشهر اجي اصبري نيران بس اتخرج نتزوج انه هم مابيه حيل افاركج بعد...
... اي اصبر وانتظرك لاتشيل هم ابد باسني من راسي وكمنه اني رحت للغرفه وهو صعد فوك...

ثريا... اسمعيني يا امنيه انتي مفتهمه الزواج غلط وعبالج ادهم راح يبقه اخوج لا غلطانه انتي الي راح احجي لازم تعرفي حته تكونين حذره بتعاملج وياا...

بديت احجيلهه واعلمهه بشكل علمي وثقافي شنو الزواج مثل ماحجيت لنيران بعدني ما كملت كلامي بس وصلت للحقوق وهاي الخبله كمزت عليه وسدت حلكي...

امنيه... اسكتي لاتحجين ما اريد اسمع ثريا اسكتي وساده اذانهه ومصدومه ..

بعدني مادخلت بالمفيد هستوني احجيلهه الحقوق عجل لوتدري بالباقي شتسوي ظليت ساكته وهي لفت نفسهه بالبطانيه وانطتني ظهرهه ونامت ...

خليهه تنصدم بس المهم تعرف وتتعلم وتاخذ حذر من تصرفاتهه مددت بصفهه وظليت العب بشعرهه وهي ساكنه لحدما غفت ...

ثاني يوم كعدنه الصبح تفاجات بيهه لابسه حجابهه باحكام ومنين ما ادحك ادهم تركض لغير مكان حته صاح عليهه وماردت علي يامعزايه مو هيج شلون بيهه ياربي...

امنيه... كلام ثريا خلاني بصدمه ماجنت اعرف الحقوق الي اطالب بيهه هي هاي ولا جنت اعرف العلاقه بين الرجال والمره هيج كل ضني يبوسهه ويحضنهه وتصير مرته...

كلساع افز بالليل واتذكر تفاهتي وشلون جنت احجي منطلقه واداعي بحقوقي وكدام فاروق كلما اتذكر اغم نفسي ليش ماحجن وياي ليش هسه يله حجت ثريا ...

اخذت حذر من كلشي وغيرت تصرفاتي وبديت اوعه وافتهم الصح من الغلط بس المشكله مو هنا المشكله گلبي الي يخبصني من يشوف ادهم..

احاول اتهرب من عنده بس كلبي يسحبني غصب عني والكه نفسي اباوعله واحفظ كل تفاصيله كلما يروح ويرجع احسب الساعات واعد الايام...

كل مايجي حليان اكثر واكثر دائما يكولون ادهم احلى اخوته كلهم احب عيونه ورموشه حيل ووجهه الضاحك مايوم شفته مبوز حتلو ضايج يقابل الكل بابتسامه...

حته هو حس عليه وكام مايباوعلي وعلى كد السؤال والجواب راح الشقه مالتنه وراحت الميانه صار يتجنبني واني اتجنبه وكل واحد من عدنه بصوب بس اسمائنه ملتقيه ونسمه مخطوبين...

نيران اختي غركانه بالعسل ويه قيس وكام يطلعهه وياا ويشتريلهه هوايه شغلات وتجي فرحانه من تشوفني تحضني ودكلي اعرف الي بداخلج بس حظج هذا ...

بديت اضوج وانقهر من حالي ليش بابا سوه بينه هيج وليش انكتب عليه احب ادهم واعاني من طرف واحد وينج يا ماما شكد محتاجه اكعد واحجيلهه مشاعري...

بجيت واني كاعده اعزل بملابسي وكعت دموعي غصب عني لان بديت احس باليأس واحس مصيري ومستقبلي مجهول ويه ادهم ...

كدامي حلين يا اما اطلب من عنده من اكبر يعوفني واتزوج واروح يا اما اظل اعاني بحبه وهو مايشوفني غير اخته لا اكثر....

نبهني صوت الحجيه وهي دكول ليش يا اماني تبجين هذا اسم الدلع عدهه؟؟ مابيه شي جده...

الحجيه... خلي اسولفلج سالفه يابنتي عمرو الحب ماصار فرض ولا صار اجبار ولا اكو واحد حب بلاكراه الحب فطره الله خلاهه بگلوبنه ومانتخلص منو الا تنتزع روحنه...

اعرف البيج وانه جدتج وراح اكلج وراج طريق طويل واظلم ومعتم ومابي بصيص امل ولا نور وراح تبقين يابنتي تصارعين بهذا الطريق وحدج حته ادحكين الضوه...

اتعبين وتتعذبين بس بعدين الله يجبر خاطرج بس بعد مايموت كلشي بداخلج وما ترجعين امنيه القديمه من احجيلج هيج ماريد اخوفج بس اريد تنتبهين ع نفسج وتخلين لكلشي حد...

امنيه... جده شتقصدين وشمدريج اني احب ادهم؟؟
... لا تساليني شمدريني ادري وادهم ماراح يحبج بس الج مكانه عندو انصحج يابنتي لا تتقربين اكثر وبس تحسين نفسج كد المسوؤليه افسخي خطبتج وروحي لحال سبيلج حته مايبقه حب ادهم لعنه اطاردج...

امنيه.. جده شبيج تحجين بلالغاز ماكو امل يجي يوم ويحبني؟؟
... لا ادورين ع الامل بوسط الظلام لان لو يحبج جان اجاج بنفسو مثل قيس والعگربه الي بطريقو وتنتظرو هي راح تحول حبج لرماد...

امنيه.. ياعگربه؟؟ جده بيج شبي شو مافهمت كلشي..
الحجيه.. اي عگربه حيه ام راسين عدهه الف جلد تبدلو حيه عگربه جانت تردد بهاي الكلمات وهي عينهه بالفراغ وكانو مامنتبهه على نفسهه من تحجي...

هزيتهه من ايدهه فزت وتعوذت من الشيطان كالت يا جده مرات اكوم امشخط مالج علاقه بيه ضغطي صاعد وما ادري شحجيت...

امنيه.. حجيتي شغلات مافهمتهه شبي ادهم وياعگربه هاي؟؟
... انه كلت هيج؟؟ يااا يا امنيه موكتلج امشخط مالي خلك ومن اتعب اكوم اهلوس كومي بنتي غسلي وانه راح اصلي...

امنيه.. كلامهه غريب حيل وماعرفت اربط ولو حرف من حجيهه افتهمت ادهم ماراح يحبني وطريقي طويل ومظلم بس ياعگربه وحيه شتحجي الحجيه نعيمه!!!

طلعت من الغرفه صار بوجهي ادهم بسرعه دنكت ومشيت من يمه صاح وراي امنيه اوكفي!!!

وكفت وكتله ها ادهم بس ابد ماباوعتله جانت عيوني تتحرك لكلشي داير مدايره بس ما اجت علي بس هو حسيته يباوعلي ...

ادهم... امنيه بيج شي شو متغيره ضايجه من شي؟؟
.. لا مابيه شي وماضايجه..
... متاكده؟؟ انه ما ادحك هيج حته مو امنيه القديمه..
.. اي متاكده مابيه شي ..ظل ساكت اني بسرعه مشيت احس كلبي راح يفضحني شلون بيه ياربي لشوكت اظل هيج ...

نيران.. الايام الموجود بيهه قيس ما اكدر اوصفهه كميه الحنان والحب الي عنده مخليني احس نفسي ملكه يوميه نطلع وماكو شي بنفسي ما يشتري ...

حته من نتلاغه ع شي بسيط رغم مايعصب بس بسرعه يرجع من جديد ويكدر يتلافه المشاكل ويكول مامستعد اطير شكم يوم من عمرنه بالمشاكل والزعل...

من ارجع بفرح اضوج ع اختي امنيه مو مثل قبل كلنه منتبهين عليهه شلون تجنب ادهم وتريد تبعد نفسهه بس ماتكدر تحاول بس بيوم الي يجي نازل من الدوام اول وحده تركض توكف ع جهه تباوعله...

حجيت وياهه بس الحجي مايفيد مامسويه شي هي بس ساكته تسمعني وتهز براسهه ما الومهه خطيبهه هو وتحبه بس تحسه مايحبهه ومعتبرهه مثل ثريا...

بعد اسبوع ع سفر قيس واجن عماتي كلهن تغدن يمنه والامور طبيعيه مدري صدك حنينات مدري لواگه لان شافن ولد عمي وصلو وصارو صاحبين شأن...

للعصر نعزل بالمواعين وجان يندك الباب راحت ثريا فتحته تفاجات واني اشوف بابا ومرته فريده ما ادري ليش اخذتني رجليه ورحت حضنته...

جان لازم عكاز بيده وتعبان حيل واللحيه بيضه والشيب غازي شعره حضنه اني وامنيه ويبوس بينه وسلمنه ع مرته وطبو جوه ...

عدنه امنيه تشبه ماما نسخه من عدهه كلساع يحضنهه ويكلهه ياريحه بيان ما ادري شغير بابا كسرة رؤى لو مريض لوشنو؟؟

صافنه علي وهو يسولف ويه الحجيه شكد دفن اعزاز من عمر وراهه ماما ووراهه رؤى واحنه ابتعدنه عنه واختارينه حياتنه خسر هواي وظل بس هو وفريده الي ماتخلف ...

راحت ثريا خابرت اخوتهه واجو جايبين وياهم اشكال الاكل رغم السوا بس صاحبين عزوبيه ولو عدوهم يقيمون بواجبه ع اتم وجه...

تعشينه وكعدنه بابا يسولف ع صحته التعبانه عنده سكر وضغط وحته ماخذ اجازه من الدوام مايكدر يداوم قهرني حيل والندم واضح علي ...

باتو يمنه وثاني يوم راحو قبل مايطلع لزم ايد قيس وادهم ووصاهم بينه انتبهت ع ايوب يهز بايدي ماعاجبه الوضع ...

راح بابا ورجعنه نحضر بغراض قيس جنت كاعده بالكاع ارتب بجنتطه وهو كاعد ع الجربايه كدامي وانسولف ما احسه غير يكمز عليه ويلزمني من زندي وخلا ظهري ع الكنتور...

بدون سابق ولا احم ولادستور اخذ شفايفي بشغف وايدي محاوطه ركبته ونزل ع ركبتي ادغدغت من لحيته بس ما اريده يبتعد...

مندمجين وجان ينفتح الباب حيل وهو يصيح يول قيس اطرش انت؟؟؟

عزااا بعيني فتت بهدومي حرت وين اودي وجهي وايوب واكف بالباب وصافن بوجه قيس هو هم تيه شيريد بس يسوي ااا اااااءء...

قيس.. ماتعرف ادك الباب يول جنك مخروع؟؟
ايوب.. انه ؟؟؟؟ انه؟؟؟ ما ادري بيك غركان يخوي المهم اعتذر وبشده

جماعتك بالباب يريدوك حجه هيج وطلع واني دايره وجهي ع الكنتور وقيس حاوطني من خصري وكال كملي وانزلي ..

بلعت الساني شحجي وشكول فوكاهه بحلك ايوب الي ينطيهه بالكصه وفوكاهه اني جنت مندمجه...

نزلت جوه اتختل من ايوب جان يشرب مي من شافني سوه نفسه طبيعي يحجي ويه الحجيه وهي دكله جده موكتلك حب الضغط خلصان جيبلي وياك...

... اي نسيت والله هسه اروح اجيبلج ..
ثريا.. ايوب امنيه صار اسبوع مدري شبيهه واكلهه موشي جيبلهه وياك حلويات ..
ايوب.. صار وانتي ثريا ماتريدين شي؟؟ لا تسلم ما اريد ...

ثريا... ودعنه قيس بالدموع وبوسنه من راسنه وراح ونيران معلكه بركبته وتبجي صاح بيهه ايوب يمعوده وين رايح للحبهه هو رايح للروسيات...

طلع قيس ونيران كلبتهه مناحه كوه سكتناهه واخوتي راحو ويا وادهم هناك ابغداد يلكا لان ماكدر ينزل...

بغداد....
اسماء... طلعت امشي اني وصديقتي وشفت ادهم واكف برا يخابر لابس اتراك ويدخن من مرينه من يمه عيني علي اباوعله ...

هو انتبه عليه ركز بوجهي واني اباوعله من بعيد لحدما وصلت قريب علي قابلني بنظره تفاجأ ورفع تك حاجب وكانو يكلي شكو؟؟

ما اهتميت وظلت عيني علي حيل عاجبني وكلما اشوفه احبه اكثر احب عيونه بشكل موطبيعي واتمنى لو اخذلهن صوره واظل اباوعلهن ...

بيهن لون وكبار ويجذبن اكبر واحد مشه كدامنه مبين رايح للاسواق واحنه ورا شفته من دخل للاسواق دخلنه ورا جانت صديقتي مايدتني ودكول لازم اتجذبين انتباهه...

ما ادري شاشترى بس جان بيده باكيت جكاير والباقي بعلاكه منتظر يرجعوله الباقي لان المحل ازدحام من الهوسه والتدفع صرت بصفه هم واكفه منتظره يرجعلي صرف...

اتلاقت عيونه بس عيوني فاضحتني وهو طبيعي حيل ولا اهتم ابد وابتعد عني حته يسوي مجال...

الرجال رجعله الصرف وكاله انطي هاي وياك للاخت مد ايده بدون مايلتفت وانطانيهن كتله شكرا مارد عليه خله وطلع...

مبين صعب حيل ومبين واحد موهين وراح يتعبني بس شلون بيا طريقه لازم الفت انتباهه وسمعت بس هاي الاشهر وينتقل لان راح يكمل....

تقربت من هاي البنيه الي عدهه علاقه بالولد الي بالشقق وحاولت هوايه وياهه وجابتلي رقمه ...

جنت متردده وخايفه حيل اتصل بي لولا وحايره خاف ياخذ عليه غير نظره ضميت الرقم ماكدرت اتصل بي...

ليش مابيوم من عدهن رجعت من الدوام ميته تعب اسحل بنفسي سحل وامشي ع الرصيف ما احس غير ابو الدراجه شمرني بعيد احس اعظامي تكسرت وهو هم وكع ويه الدراجه...

امشي وحدي وصديقتي غايبه كمت نفظت ملابسي والدم يجري من اصابعي وخشمي محد وكفلي كل الي يشوفني يكلي سلامات ويمشي...

وابو الدراجه انهزم واني لازمه الحايط مال المحل وتفتر بيه الدنيا اريد اطلع تليفوني اتصل بعمي بعدني ادور علي فززني صوته اعرفه وعطره الغريب...

سلامات اختي محتاجه شي منو سوه بيج هيج؟؟
رفعت راسي علي ودموعي تجري وايدي ع خشمي الغركانه دم كتله واحد ضربني وراح عنده دراجه...

ادهم.. وين بيتكم قريب لو بعيد؟؟
لا موبعيد بس راح اخابر عمي اتصلت بعمي وهو واكف يباوعلي كتله عمو دراجه ضربتني وخشمي ينزف ورجلي متعوره ...

... عمي اني بالدوام انتي وين انطي التليفون لابو الاسواق ابو محمد خلي احاجي والحكج للمستشفى...
... عمو بعيد عليه ابو الاسواق اني قريبه ع البيت اشرلي ادهم انطي التليفون وهو حاجي عمي كاله اني مستطرق وشفتهه راح اخذهه للمستشفى وتعال هناك ...

انطاني التليفون وكالي تكدرين تمشين هزيتله راسي كتله اي اشر لتكسي وصعدت ورا واشترالي كلينس لان خشمي ماوكف ابد...

وصلنه للمستشفى اخذني للطوارىء وضمدوني وهو يحجي ويه الاطباء وكالوله سوي بلاغ ومدري ايش بس شفته طلع هويته الهم وسكتو...

نايمه ع السديه انتظر عمي وهو اجه جايب علاكه الدوه خلاهه يمي وكال الحمدلله ع السلامه ..

... الله يسلمك تعبتك ..
.. لا ماكو تعب الله قدر ولطف...
... اباوعله ياربي كلشي بي حلو وجهه ينكط عسل ودمه محبوب ورجال بمعنى الكلمه شخصيته تخبل هو جان مدنك ع تليفونه سده وخلا بجيبه...

كال اني راح انتظر عمج برا حته اروح محتاجه شي؟؟ لا شكرا مره ثانيه بس ماعرفت اسمك؟؟

.. شتسوين باسمي؟؟ لا بس حته ادعيلك بالصلاه ...
ضحك وكال اسمي جاسم كثريلي بدعائج لان محتاجه بهذا الوقت...

مدري شلون طلعت من عندي كتله يمته اسمك جاسم مو اسمك ادهم؟؟

ابتسم بمكر وكانو متعمد يكول هيج حته يبوك لساني كال مدام تعرفيني ليش سألتي؟؟

اسماء.. هااا لا بس سمعت مره صاحوك ادهم وين اعرفك؟؟
... هسه بكيفج جاسم ادهم المهم تدعيلي عندج العافيه ...

.. اني اسمي اسماء!! التفت عليه وكال عاشت الاسامي وطلع ياربي شنو هالثگل اني ساحله روحي وهو مامهتم شلون باك الساني بعدين عرفت ضابط استخبارات...

جاي عمي ومتشكر من عنده وشكد يمدح بي ويكول زلمه معدل لو هيج الشباب لو ماتنراد واني منا احبه ويمدحونه كدامي خلاني متولعه بي اكثر...

ثريا... اجانه خبر شيخ ناصر اتوفه والحجيه گلبت الدنيا ونبجي وياهه ولازم انروح للفلوجه وتحضرنه كلنه ورحنه وقفلنه البيت....

اول مره ادحك الفلوجه وناس وهوسه تلكتنه امل وطببتنه اني والبنات وناس كلهه تبجي وتمدح بكرمه واخلاقه واني كاعده ويه البنات واندحك بعيونه ...

اشكال البنات واكو بيهن يخبلن اجتماعيات وكعدن ويانه يسولفن وبدينه ناخذ ع الجو بليل اجتي طفله كالت الحجيه تريدج ....

كمت اريد ادحكهه كمت ادور ع حذائي تكرمون عفتو بالممر رحت اريد اجيبو دنيا ظلمه والكل جوه تعبانه الناس والجو بي بروده...

الباب مامسدود فتحتو وطلعت وكفني صوت اخوي فاروق وهو يحجي بنبرة غضب والادهى من هاي ويه بنيه كلامو...

اسمع صوت شهكات وبواجي بنيه وهو يكلهه مره وحده خلي لنفسج كرامه ولا اطلعين بوجهي حبج البكلبي مات ودفنته قبل عشر اسنين ولو يصبوج ذهب ما افكر ارتبط بيج...

وهي تبجي وصوتهه يطلع من بين شهكاتهه دكلو فاروق لاتسوي هيج صار اسنين انتظرك وتحملت الكتل والعذاب علمودك...

فاروق... كل هاي السنين ما خليت رجلي بالفلوجه حته لا ادحك وجهج وهسه طلعتي كدامي من جديد وكلما ادحكج حقدي عليج يزود ...

لهنا وبس يا هدى كلشي بيه مات بسببج وخليتيني كرهت شكو حرمه من وراج فوتي جوه ولا اطلعين كدامي بعد....

ثريا... خليت ايدي ع حلكي وعيوني مفتوحه بصدمه عزاااا هدى!!!! جان يحبهه فاروق وهاي السنين وغموضه بسببهه؟؟؟

يتبببع... متابعه شيقه....

هاي الاغنيه مشاركه من متابعتي الحلوه smmirll