رواية ازمة ضمير الفصل الثامن والعشرون 28 - بقلم Rozaya1122

ازمة ضمير ... البارت السابع والعشرون
«للكاتبه روزايه»

رايحين.......!
شعدنه نبچي
لوادم تذم الدموع المالحه
رايحين........!
الدنيا ضحكه
وسالفه وهم رايحه
خاف باچر.......!
مانمر ابابكم
ولانحن يوم ونشم ترابكم
احنه بعنه…
بيوتنه من البارحه..

ثريا... هدى حفيدة الحجي راضي اخو جدتي حليمه اتذكرهه زين جانو كاعدين يمنه من جانت جدتي عايشه وبعدين باعوا كاعهم وراحو للفلوجه...

صار اسنين مامدحكتهه وحته ناسيتهه بس من اجينه للفاتحه عرفتهه شكلهه زين مو ذاك الجمال بس دمهه محبوب وسمره صافنه شلون اخوي يحبهه قبل ....

ما اكدر اسال فاروق لان ماراح احصل من عندو جواب بس هي الي راح تحجيلي رحت وراهه لكيتهه تغسل مواعين وكفت بصفهه كتلهه هدى اريد احجي وياج...

ارتبكت وعيونهه مبينه باجيه هي تاهت مدري ع الفاتحه مدري بواجيهه لفاروق غسلت ايدهه وكالت تعالي نصعد فوك...

صعدنه فوك وهي الي فتحت الموضوع لان دحكتني سمعتوهم كالت منين ابديلج ياثريا بس قبل كلشي لاتلوميني...

انه هدى عمري صار 27 ولسه انتظر العطف من اخوج وگلبه مالان ولا نهز بكد الشعره ...

تدرين ياثريا شتحملت كتل من ابوي واخوتي لان كل الي يجي يخطبني ما ارضه بي ويكلولي ليش ترفضين صرت حته ما اطلع حته خاف يعرفون عدنه بنيه مامتزوجه ويخطبوني...

اخواتي الصغار اتزوجن وراحن وبناتهن شكبرهن وانه اداري بحب فاروق واتمنى ادحكو ولو ساعه تالي دحكتو هسه وسمعتي كلامو شكد قاسي وما اهتم لدموعي وسهر ليلي...

انه حبيت فاروق من جنه صغار بس هو صلب ماحبني ولا انطاني اهتمام من جنه ساكنين يمكم اجيكم للبيت وادحكلو بس مايهتم ابد وهو صديق اخوي ويجينه جثير وبيتنه واحد ...

بديت انتبه علي يدحكلي بنظرات خاطفه هذا الحجي جان عمرو 19 وانه 18 فرق بيني وبينو سنه وحده  زادت النظرات وتحولت الى اعجاب وبعده العجب تحول الى حب...

اخوج ياثريا مايعبر عن مشاعرو ابد ولا وكف كدامي وكال احبج ولا سمعني كلمه حلوه ادل ع انو هو حابني ورايدني بس كال اني بالمستقبل اريد اتقدملج توافقين عندج مشاعر اتجاهي؟؟؟

جاوبتو وكتلو اي انه احبك وانت هم تحبني بس مادكول جنت اعرف هالشي من عيونو لا علاقه بيناتنه ولارساله ولا اتصال حبنه فطره وعايشين ع النظرات...

من انتقلتو وعفتو ابوكم سمعت من جدي هم يشتغلون ويدرسون حاولت اوصلو بكل الطرق وجان يجي على اخوي وحجيت ويا كتلو فاروق اخطبني لان انه كامت تجيني ناس واخاف من ابوي...

كال هدى انه حاير بعيشه اخوتي شلون اعيشج اصبري عليه بس هاي السنه اتحمليهه لو اعرف اشتغل ليل نهار حته اخطبج هاي كلمات اخوج جانت بلسم بالنسبه الي...

اعرف بوضعكم وسكتت وكلت اتحمل هاي السنه بس بعدهه ماخلصت واجاني ابن عمي خطبني وابوي جان موافق واخوتي ومن اعترضت صار الدك على راسي تعرفين ناسنه هين شنو...

يومين وانه بدون اكل وشرب بس اريد ادحك فاروق واحجيلو كتلو هيج وهيج عصب وكام يسب بابو وكال شبيدي الف دينار ما عندي اتقدملج بي ...

لزمني من اكتافي وهزني حيل كال هدى ارفضي لاتوافقين اليوم احاجي اخوج بس خلي ينتظروني انه خسرت جثير وبعد مامستعد اخسر الانسانه الي احبهه...

طمنتو وانطيتو وعد كتلو راح اتحمل علمودك ورجعت للبيت هذا الحجي جان الصبح للظهر اهلي سحلوني سحل للشيخ ابوي يصيح تريدين تصخمين وجهي ليش ترفضين واخوتي يكلولي عندج واحد ...

بجيت وتوسلت بس محد سمعني تخيلي ياثريا ردت احرك نفسي وكال احركيهه بس بسبيل مايكولون بناتنه ظالات مامتزوجات همج وعرب وعدهم المره بس للخدمه طبعا موكلهه بس عائلتي من هذا النوع...

عدهم البنيه اذا عدت 15 وماتزوجت اتجيبلهم العار ولازم يتخلصون منهه باقرب فرصه وفوكاهه الخطبني ابن عمي...

صارت خطبتي وصرت ع ذمة رجال ثاني ووعدي وحبي وكلبي ظلو يم فاروق لليل واسمع اخوي يحجي ويه جدي راضي يكلو استعجلنه وزوجناهه فاروق خطبهه وكال بس هاي السنه...

جدي جان يحب فاروق ظل يلوم بنفسو وشلون ما انطاهه لفاروق وهذا صدك زلمه وابن عمي يصيحولو الحرمه جنت اسمع وابجي وشلون راح اقابل فاروق...

فاروق من هاي وماكدر يسوي شي لان اخوي كالو العصر عقدهه وبعد ماترهم ثاني يوم انتظرتو بنفس المكان وما اجه ومر ثالث يوم واسبوع وسنه وانه يوميه انتظر فاروق بنفس المكان ومادحكتو بعد...

شلنه من الرمادي للفلوجه وراح اثر فاروق وابن عمي يماطل بالزواج لحد ماجابو شهيد باحداث السقوط ورجعت من جديد لبيت ابوي وعيني شابحه ع الدرب يايوم ادحكو واكحل عيني بي...

اسمع اخبارو من جدي راضي ويكول فاروق محامي وعندو خير من الله املاك وزلمه يعتمد علي وحكيم مثل جدو وانه اتلوع بنيران العشك ...

ماسمع مني ولا حجه حرف من سمع انخطبت بعد مااجه لصوبنه ودفن حبي نفس المكان الي نلتقي بي ...

اليوم من سمعت اجه فاروق رجليه ماساعدتني وامي تدري بحبي وشكد انكتلت من عدهه بس مقرره الكح نفسي بالشط وما اتزوج ...

ثريا... انه ماخنتو بس جنت ضعيفه وخفت من اهلي قاسين وعقدولي غصب فاروق مايريد يسمع من عندي كل حجايه لان بوقتهه سائل اخوي هي موافقه واخوي كايلو اي هي اختارتو لان حالتهم الماديه زينه...

كل ضنو انه تخليت عنو لان فاروق جان ماعندو بس والله انه موهيج انه ما املك غير حبي الو ومستعده اعيش ويا على المر بس كون ينصف شبابي الراح...

هسه حجيت ويا وصدني بطريقه قاسيه وماحاول يسمع من عندي انه جنت مجبوره والله...

ثريا... والله ما اعرف شكلج بس يا هدى انسي فاروق وعيشي حياتج اخوي صلب وقاسي وماينسه ابد ومستعد يتخلى عن كلشي بسبيل كرامتو...

ولاتحاولين تبررين الو لان فاروق الو نظره وحده بالشخص ويفتهمو مهما تحاولين ماراح يسمعج ابد...

ثريا.. تعمدت احاجيهه هيج لان انه سمعت قبل هي هم رايده ابن عمهه لان حالتهم الماديه زينه واشكال الذهب والفلوس وبيت وحدهه ومستحيل تختار فاروق الي يشتغل عماله...

اخوي اعرفو مايظلم شخص ابد اكيد سمع وتاكد بنواياهه ودار ظهرو عنهه ظليت حايره بين الي اصدكهه واصدك دموعهه وبين اني كلي ثقه بفاروق مستعد يضحي بكلشي ولا يدحكلو انسان حزين بسببو...

ضجت واتمنيت نرجع بس كالو باجر تخلص الفاتحه ونرجع لبيتنه احس نفسي غريبه بنص اهلنه ولا عبالك ذوله بيت اجدادي اهل ابوي عماتي بصوب وعمي بس سلم ع بناتو وهو وابوي مايتحاجون..

ابوي سمع احنه هين ماكلف نفسو يسال عليه ويكول بنتي شلونهه معقوله هيج مرتو عاميتو المشكله اجن بناتو متزوجات الي هنه اخواتي حته مايسلمن ومتكبرات استغفرت ربي الف مره لا اخذ غيبتهن..

شنو من دنيا حقيره الاب مايعرف ببنتو شكبرهه صارت ولا اشتاكلهه بيوم واخواتي ماخذات طبع ابوهن ونفس الحقد والغل الي عدهن ...

رجعت دعيت لاخوتي الله يديمهم ويحفظهم الي من كل مكروه بلياهم اضيع كاعده هسه ورافعه راسي بزودي وعماتي وخالاتي الي حته اسمائهم ماعرفهه يتهامسن عليه ويكولن كبرانه وشايفه نفسهه ...

سمعت كلامهن ترس اذني خالاتي يكولن دحكتن ثريا حته سلام ماسلمت عليه وعبالك ماتعرفنه جاوبتهه الثانيه اااي رافعه خشمهه وعود انه دكتوره ...

لا رافعه راسهه بزود اخوتهه كل بناتنه عرسن ومادرسن ويدكن شغل ليل نهار وبس يخلفن ودحكيهه هي شلون عايشه بعز اخوتهه ضحو علمودهه واشتغلو ووصلوهه ...

يكولون جانو يشتغلون عماله حته يوفرلهه ملازم وتدرس ويكولون انخطبت ومره من عدهن متكاون وياهه ومزعلهه ورايحين مخلين دمو بطولو وفاسخ الخطبه...

قبل مايموت الشيخ اجو اهل الولد لشيخ ناصر سولفتلي جنه الحجي راضي دكول عوزهم بس يبوسون ادين وتوسل بيهم الشيخ واخوتهه كالو يحسب امو ماجابته الي يزعل ثريا ...

كالت وحده من النسوان اي خايبات اتعجب من يكولون ولد عماد يولن ربتهم حليمه على حكمه الحجي الله يرحمو من دحكت فاروق والله عبالك جده وواكف نسخه من عندو ..

ثريا... جنت كاعده اباب الغرفه ووجهي ع الديوانيه وهن بالغرفه ويحجن كلي فخر من يذكرن اخوتي وشلون يحسبولهم احساب بكلشي...

نمت وبصفي منا نيران ومنا امنيه التفتت ع امنيه غافيه وشعرهه ع عيونهه هاي البنيه انقهر عليهه وما اعرف اساعدهه بيا طريقه...

ثاني يوم الصبح هدى كلساع تجي تحاجيني واردهه واكلهه ما اكدر احاجي فاروق ابد لان مايسمح لواحد يدخل بحياتو بس اكو فضول بداخلي يريد يعرف الحقيقه وين ...

اذا البنيه حسب كلامهه تحبو وتنتظرو كل هاي السنين ليش مايسامحهه ويرجع لحبه بنت عمتي تصير مرت اخوهه كعدت وياهه ونسولف واثناء الكلام انذكر فاروق وليش مايتزوج...

حاولت اسحب منهه حجي وكتلهه هو خطب هدى قبل وماصارت بحكم هي مرت اخوهه وتعرف بكلشي هزت راسهه كالت فاروق الله يحبو وماصارتلو...

ثريا.. ليش؟؟ يولي هي موجانت تحب فاروق وامهه تدري وانه ادري بس من اجاهه ابن عمهه صح ماقبلت بس من جابو الفلوس والذهب وبيت وحدهه قبلت...

وانه جنت شاهده ع العقد سوت حفله وادك وتركص عمتهه الفلوس ومن تكعد تحجي بحبهه لفاروق هي التحب تكدر تصد بوجه واحد ثاني...

بعدين حسب حجيهه تندمت وتبجي ع فاروق ووكحه ويوميه مشكله ويه ابن عمهه لمن جابو شهيد ورجعت تحن لفاروق يولي ماخلت طريقه مارادت توصلو بس ماكدرت...

حته جابت رقمو واتصلت بي من تليفون رجلي وردهه ورزلهه وبعدهه عدهه امل انه موضدهه ولا اكرهه هي ما ماذيتني بس انه جنت شاهده ع خطبتهه وبرضاتهه وتصيح احب فاروق...

ثريا... والله ناس غريبه الضمير عدهه منعدم كل واحد يسوي بلاوي ويرجع يسوي نفسو ملاك مابي كل غلط حتلو تحبو هسه بس اذتو قبل شلون تكدر ادحك بوجهو وتطلب من عندو يسامحهه...

انه جنت متاكده من اخوي واعرفو من يتخذ قرار محسب الو الف حساب ومايتندم علي ما انطيتهه مجال لحد العصر ورجعنه للبيت تعبانين بس تعشينه كل واحد راح لفراشو والحجيه ظلت هناك كالت شكم يوم واجي...

بغداد...
اسماء.. عقلي وگلبي كله يم ادهم الي جاي احبه يوميه اكثر من اليوم الي قبله تقريبا سنه كامله واني اطلب النظره من عنده وهو ما مهتم ابد...

حفظت اوقاته الي يطلع بيهه وصرت اطلع وياا اتعمد نتقابل لو للدوام لو اروح لصديقتي جنت واكفه ع الشارع العام وناس متفرقه واكفه منتظرين تجي الكيات ونصعد ...

وكفت السياره وبدت الناس تصعد صعد هو واني صعدت ورا صرت بصفه كعدنه بنفس المكان ظليت اباوع لملابسه وايده ما اكدر ارفع راسي واباوعله...

راد يدفع كروه بس كال شويه من رخصتج يريد يطلع محفظته ادنيت شويه لان الكاعده يمي مره ووياهه كومه جهال طلع الكروه ودفعهه ...

شكد متعجبه بي عبالك مايعرفني حته ماسالني شلونج ولا يحاول اصلا جنت متفقه انروح اني وصديقتي للمكتبه محتاجين شغلات ومتفقه وياهه الكاهه هناك امهه تاخذنه...

وكفت السياره ونزلنه كلنه للسوك وكل واحد راح لجهه هو يمشي كدامنه هم ناوي يتسوك ويمشي واحد ويا جان منتظره ...

لكيت صديقتي واكفه هي وامهه وبدت تفتر بينه بالمحلات وعيني علي وين يروح دخلو لمحل مال ملابس رجاليه وطلعو شايلين علاليك ويسولفون...

من الهوسه والخبصه ماشفته بعد وتيهته وين وانخاف تنتبه علينه ام صديقتي اخر محطه دخلنه لمجمع ملابس اريد اخذ تنوره امشي واباوع للمحلات واختار ...

حسيت صديقتي رنا ضربتني بخاصرتي عود شوفي التفتت شفت ادهم واكف يم محل مال ملابس نسائيه وصديقو واكف ع جهه يخابر...

حسيت بالغيره المن يشتري وخاف عنده حبيبه اخذت رنا ورحنه بحجه نشتري من المحل جان ابو المحل يدورله على قياس 38 لفستان يخبل وقصير ...

ابو المحل كاله اذا ماصار عليهه رجعه وابدله الك؟؟
ادهم.. انه مو من هين واروح اسبوعين يله ارجع بس هو قياسهه مضبوط 38...

اسماء..جانت ام رنا كاعده وعافتنه نختار مدري شحجاهه يمكن لان شافته شاب كالتله اذا ضعيفه خاله يصير عليهه لان هذا القماش يجي فت ماينطي باللبس...

ادهم.. والله خاله ما اعرف بسوالف القماش بس ابو المحل متعود عليه لان دائما اشتري من عنده ومايوم بدلت القطعه لان تجي فيت..

ام رنا... ان شاء الله يجي قالب المن تريده لاختك لو لمرتك ؟؟
ادهم.. ابتسم وكال لا لخطيبتي ...

ام رنا... الله يهنيكم وملبوس الهنا... ابدي اكوم اكسر غراض المحل كلهه ام رنا فضوليه وانطلقت ويه الولد...

من كال خطيبتي وسعت عيني على كبرهه وباوعتله عبالك يدري بيه راح التفتت علي قابلني بنظره وابتسامه مثل الاستهزاء ورفعلي حاجبه وكانو يكلي اي اني خاطب ....

بلعت الغصه وكوه مصبره ع نفسي كلشي ما اشتريت خليت وطلعت وهو يمشي ويه صديقه شكد بجيت بهذا اليوم صدك الحب من طرف واحد مذله واني ذليت نفسي هواي وحته نسيت الاداب وكمت افتر ورا الولد...

من هذا اليوم سحبت نفسب وانتهى ادهم ولا اشوفه ولا اطلع بنفس وقته واصلا سمعت بي تخرج وانتقل من الشقه بس هو جان حبي الاول وحب من طرف واحد...

ثريا...
ادهم تخرج والنجمه ع اكتافه اول مادحكته لگحت نفسي علي وحضنته وهو يكول يولي ثريا انه ضابط لاتحاجيني بعد واتشاقه ويا ونتذكر طفولتنه...

عينو ع امنيه الواكفه بالزاويه ومسويه نفسهه ملتهيه باضافيرهه بس جذابه تحاول تبعد نظرتهه عنو صاحهه يولي امنيه وين السانج مختفي؟؟

امنيه.. مبروك ع التخرج؟؟
ادهم.. تعالي دحكي اجبتلج اشتريت لثريا واتذكرتج كون يطلع ع قياسج ...
امنيه.. شكرا شنو هاي الزحمه...

ادهم.. الله عليج بلا رسميات وماتلوكلج هاي التصرفات يولي السانج من يغرد يخبل رجعي مثل اول لخاطر نفسج...

امنيه... وشبيهه نفسي انت جاي تشوفني هيج بس اني مابيه شي...

كام من مكانو ووكف كدامهه وعيونهه تلالي لاتكدر تحبس دمعتهه ولاتكدر تتغاضه عن نظرتهه ...

ادهم... اعرف الي تفكرين بي بس يا امنيه شيلي من راسج انتي عزيزه عليه وما اريد اخسرج باي شكل من الاشكال ولا اكدر اذيج ....

ماحجت اي كلمه عافتو ومشت للغرفه وهو فرك وجهو والتفت عليه كال ثريا جاي تفتهميني زين حاولي ويه امنيه لاتنجرف ورا عواطفهه ترى اتيه وسط الظلام ويدمرهه الحب من طرف واحد...

ثريا.. ادهم امنيه بنت عمك ليش جاي تصدهه وهي خطيبتك اذا ماناوي ترتبط بيهه افسخ الخطبه وخلي تروح بحال سبيلهه...

ادهم.. اساليهه اذا تريد ماكو مشكله افسخ الخطبه بس لليستاهلهه مو تتعذب وتظل تعاني...

ثريا... والله ما اعرف شكول وشحجي على حظ اخوتي وبنات عمي يكومون من وحده يوكعون بلاكبر منهه وفاروق مثل ماهو لا مبين علي ولا مهتم وكانو السمعته جان حلم ...

رجعت الحجيه ورا اربعين الشيخ ورجعنه لحياتنه الطبيعيه ببوم من عدهن اجه عمي فلاح تعبان كلش ظل يمنه يومين وبناتو حايرات بي...

مريض وهزيل وكعد يحجيلنه مرتو فريده طالبه الطلاك ورايحه لاهلهه لان ماعدهه جهال ودكول اظل حايره بي واداري وهو مريض...

انقهرت علي همست لفاروق خلي يمنه خطيه دحك حالتو؟؟ماشاء الله اخوي ماينطي مجال وجهلي خزره سكتت ولا حرف ...

راد يرجع لبيتو والمفاجأه جانت نيران كمزت وكالت اني اروح ويه بابا خطيه تعبان ابتسم هو وعيونو تجري دموع ويبوس براسهه...

صاح بيهه فاروق مافاد وكف بوجهه ايوب مافاد جريتهه من ايدهه وكتلهه يولي انتي خطيبه قيس ومايقبل اطلعين من البيت ...

نيران.. ما اكدر ادحك ابوي هيج يتعذب وهو موصاحب طويله ثريا هذا بابا تعرفين شنو ياما دللنه من جنه صغار حته الله يحاسبنه اروح يمو بين مانلگه حل...

ادحك لفاروق اريدو يمنعهه كال هي رايده كدام ابوهه واعتقد هي موصغيره وحته اوكف اعلمهه والظاهر نست هي ع ذمة رجال محلفهه ماتطلع بدون علمو...

حاولنه وياهه وامنيه حاولت بس مايفيد اصرت تروح ويه ابوهه لان مريض وتعبان ولمت ملابسهه وراحت...

نيران.. رحت ويه بابا لان وضعه الصحي مايساعده يعيش وحده ليل نهار نايم بس يكعد ع كد العلاج وحزين شكد احاول اطلعه من هذا الحزن بس المرض هاد حيله...

بس اني ويا بالبيت ومايطلع ع كد المسواك ويرجع اعرف السويته غلط وقيس مايقبل ولا عندي اتصال بي واكيد هسه عرف بسوايتي بس ما اكدر اعوف بابا وحده يعيش يبقه ابونه ....

الفلوجه بعيده عن المنطقه الي ساكنين بيهه بيت عمي بس اخذ تليفون بابا واخابر ثريا واطمنهم انه زينه كلي فاروق ماقابل بتصرفج واخوتي حجو عليج وقيس عرف ولام فاروق كالو عفتهه بامانتك شلون تسمحلهه تروح...

وفاروق عصب علي وكالو موصغيره نيران واكعد اعلمهه الصح من الغلط لو اكعد اكلهه كدام ابوهه ترى ابوج موخوش ادمي انه مليت من الركض وراكم لاصغيركم ولاجبيركم يريحني...

جنت عميه عيوني مسدوده عن اي تصرف اشوفه واذاني طرشه ماتسمع صوت ونصايح الي داير مدايري شلون امنت وشلون نسيت بابا وسوالفه ...

شلون كدرت اتخذ هيج خطوه وشلون وشلون ماظل عندي بس هاي الكلمات اردده وماوصلت الحل كل الي اكعد احجيله يكول حيل بيج وسوء تصرفج كلفج هوايه...

اني نيران ومرات يكولون الانسان اله حصه من اسمه واني فعلا الي حصه من اسمي وصرت نار تحرك اعز انسان الي حركت ودمرت الشخص الي فداني بروحه الشخص الي راح اظل لاخر يوم بحياتي واني اطلب منه السماح والغفران...

ثريا.... التهيت بالدوام واخابر نيران بين مده ومده واسالهه شلونج دكول زينه ورا شهر اجت هي وعمي وظلو اسبوع ورجعو كالت بابا متغير وزين وياي اطمنه من هاي الناحيه...

بس قيس مايقبل يحجي وياهه بعد ماتوسلت بي يله قبل يحاجيهه وكالتله بس هذا الشهر وارجع وانطته وعد بس للاسف مجرد كلام...

سنه 2009 ... اني هاي اخر سنه الي واتخرج وفاروق تخرج وماقبل يمارس المهنه ودائما ادحكو عندو اتصالات ولقاءات ويه كبار يجونه للبيت مرات ويبقون ساعات ....

جانو 2 اشخاص بعمر ابوي ويكلهم دكتور ويحبون فاروق حيل ومرات هو يروح يمهم بس كالعاده من نساله مايجاوب ويكول بطلي فضول....

اوس تخرج ومنتظر التعين وادهم يداوم استخبارات ببغداد وامنيه تصارع بحبهه رغم شكد كعدت وحجيت وياهه تفسخ بس ماقبلت ...

كلنه عدنه سنه نتمنى نحذفهه من حياتنه وجانت هاي السنه 2009 اتمنى امسحهه من حياة اخوتي واكعد اضمد اجروحهم واحد واحد...

اتمنى لو اكدر احمل كل همومهم على ظهري بسبيل ضحكتهم تملي البيت بس للاسف ماينفع الكلام ولاتفيد المواساة...

بين يوم وليله تحول بيتنه من الضحكه والشقه للحزن والكابه والحسره دموعي تصب ع اخوتي الي صارو مجرد دمى وكلشي بداخلهم مات...

شكد دحكنه حزن ولوعات ونمنه بدون اكل بس الضحكه مافاركتهم بس هسه لااا الحب الي دخل حياتهم هو الي سلب كلشي من عدهم وخلاهم مسلوبين الحياة...

حطهم مثل تحطيم الفخار خلاهم يوكفون على جرف الاماني وكفه انكسار ....

يتبببببع.... متابعه شيقه

هذا الفيديو من احدى المتابعات توصف حال فاروق شكرا جزيلا ....