رواية ازمة ضمير الفصل السادس وثلاثون 36 - بقلم Rozaya1122

ازمة ضمير ... البارت الرابع والثلاثون
«للكاتبه روزايه»

كمت اكلها شلونه ليلج من وراي ؟؟     
تكلي مثل الماحضت باطفالها
لاتغمض عينها ولاتستراح
شما تريد تنام يتراوالها
اي وحك هاي البحضني بجفاك!!
احسد المرتاحه عند عيالها
-وانت تدري الماحضت باول حبيبي
دووم يبقى اول عشك جتالها
حته هاي المكبره ام خلك الجبير
ليش ما تاخذني مدري شمالها ...!!

نيران... كل كلام ينكال عليه ما الوم صاحبه ولا اعتذاري وتبريري ينفع بشي ...

كلشي مريت بي من صنع ايدي اني جبت الاهانه وجبت الحزن لنفسي ما اكول جنت عميه لا جنت مفتحه وادرك كلشي يصير بس انحصرت بالزاويه بعد ما اكدر لا ارجع ولا اتقدم خطوه...

قيس اتمنى تقره كل كلامي بتمعن حته اذا جنت ضايج من عندي ما اطلب منك غير بس هاي المره تقره كلشي كتبته ...

ما اطلب منك تحن عليه ولا اريد تستخطيني بس حته ما تظل حزين وادور ع الاسباب وتاكل بنفسك...

بيوم الي اجه الرجال الي اكول علي بابا وانقهرت علي لان صحته تعبانه وفريده عافته موبيدي الرابطه الي تجمعنه هي قادتني اله وكلت يبقه بابا وواجبي بر الوالدين...

جنت خايفه اروح ويتعامل وياي بطريقه وحشيه بس جنت افكر بان هو والدي وانت اكيد من تسمع راح تعذرني لان كلت هو شهر واحد اروح بس اطمئن علي وارجع ...

قيس انصدمت بالواقع العايش بي فلاح اول عشرين يوم شايلني ع كفوف الراحه ومرتاحه رغم هو مريض بس حياة هادئه وجنت اتصل بيك وبثريا واطمنهه ...

بيوم من عدهن جنت نايمه بالليل كعدت على اصوات ضحك عالي كمت فتحت الباب وانصدم بالي شفته ...

فلاح يمه 4 زلم نفس عمره ويشربون ويحجون بسالفه تسليب وقتل بسرعه سديت الباب بس الظاهر فلاح شافني...

ما انتظر يرحون بسرعه فتح الباب عليه وخنكني ويهدد يكتلني ويذبحني اذا حجيت وطلع يكمل السهره...

قيس بهاي الليله احتاجيتك حيل صرت مثل الغركان اهمش على منفذ اتمنيت اكدر انهزم بهذا اليوم ووين ما عند الله كاع اروح بس حبسني بالغرفه لثاني يوم ب9 الصبح يله فتحه...

من فحتلي الباب عطت بي ماقبلت بالي يسوي وماخضعت اله ابد بس نفس الضرب والكلام البذيء الجان يسمعه لماما عاده عليه من جديد...

ظليت ايام محبوسه بالغرفه وحته الي وجبه وحده اكل كل ضنه سمعت كل الي حجو بي وبالحقيقه اني ماسمعت غير هالكلام لذلك صرت اشكل خطر علي...

صرتو كلما ادكون عليه هو يجي ينطيني الموبايل ويوكف كدامي ويهدد وياشرلي اذبحج اذا حجيتي جنت خايفه حيل منه..

كذبت عليك وع ثريا واكلكم مابيه شي وزينه بس هو العكس اني موزينه واظل للصبح كاعده من الخوف واني اسمع اصوات الزلم يوميه...

بعيني شفت سجين وحربه ومسدس ودم ع قميص فلاح وزاد خوفي اكثر واني اسمعه يحجي بالتليفون ويكلهم اي تمت العمليه..

فلاح حس بيه جاي اشكل خطر علي وحاول يقمعني باي شكل من الاشكال بده يضربني ضرب مبرح واني جنت ارادد بي واغلج واكله اشتكي عليك ...

حاولت بالف طريقه بس اريد اطلع من البيت ماكدرت كمت احس بنفسي افقد السيطره يوم ورا يوم ومونيران القديمه...

صار من يجي الليل انهار من العصبيه واكوم اضرب براسي بالحايط واصرخ واريد امزق كلشي بيه ...

يسمعني هو يجي ينطيني عصير بحجه اهدء وبعدهه ما ادري بنفسي واغط بالنوم وظليت مستمره على هذا الحال...

تعبت حيل وردت اوصلكم خبر وحاولت اطلع من البيت وهو جان طالع وشافني ومنا حكمت على نفسي وصرت تحت رحمته وهو مابكلبه ولو ذره ...

ماجان يضربني لا ياريت لو سالخ جلدي ابدال هاي الابر الي يحقنهه بوريدي اجباري ...

راح دكول شلون تخلي وليش تسمحيله اني ضعيفه كل جسمي يرعش بسرعه اوكع واستسلم احس جسمي اتشبع بهاي الماده ...

صرت ابوس بايده بس ينطيناهه لان راسي يريد ينفجر وجسمي يفقد اتزانه وكلشي يصير عندي مر حته المي ما اكدر اشربه...

قويت نفسي وواجهته بالحقيقه بان هو قاتل واني ماراح اسكت  ولازم اشتكي علي عبالي اخوفه طلعت اضر نفسي ...

كمت انكتل يوميه وانربط بالشباك لحدما يجي خاف اطلع وافضحه واذا اجه ولكاني متمرده علي يضربني الابره لذلك فضلت الهدوء...

كمت اوكع واتخربط ومايمي احد اتذكر من خابرتني ثريا وكالت قيس راح يجي وهو فاتح سماعه وياشرلي بلابره الي بيده...

دائما يكول بسببج راحت فلوسي انتي انطيتي الوصيه وهسه كشفتي عملي لو موبنتي اكتلج وادفنج...

اجاني بوحشيه ضربني وكال اخذج من الصبح تطلكين من قيس شكد عانيت بهذا اليوم جنت اصرخ باسمك بعلو صوتي وماتسمعني..

جنت اردد قيس محتاجتك قيس انقذني بس اني مريضه وكمت اتوسل بس ينطيني ابره وحده تخلصني من هذا الالم...

هددني اذا ما اطلكت اكتل قيس وكل هذا وماخفت لان اعرفك انت رجال وماينخاف عليك

بس من شافني مصره وكتله اموت وما اطلك راح جمع ربعه واجو بسهره يمنه وسمعته ينطيهم عنوانك واسمك ويكلهم خلصو علي...

تخبلت لابيه اكوم ولا اكدر اصيح كمت ادك بالباب بكل قوتي لحد الانهيار وصلت غير راسي الي ضربته بالحايط ...

اجاني فتح الباب بالسب والغلط والفشار اتوسل بي ولازمه رجلي ماياذيك اطلك من عندك بس ماياذيك...

قيس اعرف حجم غلطي وانت مايخوفك واحد جبان مثله بس جنت فاقده من خوفي عليك وادري بي قاتل يعني مستعد يكتلك واني شسوي بحياتي من دونك...

فضلت اعيش بعذاب طول العمر ولا انت تنمس بكد الشعره اني ما استاهل تعبك ولا استاهل ذره من لوعتك وحركه كلبك عليه...

انجبرت ارفض وانجبرت انزف لغيرك لواحد من رجال فلاح واني تحت تاثير الابر مدمنه وما اعرف مدمنه مخدرات لو شنو هاي الماده ...

قسيت عليك وعلى عائلتك كلهه واكيد تهمتوني بابشع الكلمات بس والله ماخنتك اني متاذيه متاذيه حيل...

طلعت من فلاح بس اريد اخلص من عنده واجيت لواحد متزوج اثنين وعاملني معامله الحيوان لان فلاح باعني بفلوس مو زواج عادي...

عشت خدامه لهذا اليوم مجرد اخدم باكل بطني هم حاولت انهزم وانتحر بس كل المحاولات فاشله لان اني موملك نفسي الادمان دمرني...

راح تلومني ليش ماحجيت لفاروق لو ليش مارحت وياك ليش ماكتلك انقذني وهوايه اسئله ادور ابالك

بس والله وروح ماما جنت خايفه عليك خاف تتاذى بسببي واعرفكم ماراح تسكتون وهو كدامي وصاهم كالهم اذا صار شي عليه اكتلو ولد اخوي..

ماردت اكون سبب دماركم ولاردت اذيكم ابد اذيت نفسي بنفسي..

قيس لو اكعد احجيلك بعد شهر مايخلص الكلام ولا اكدر اعبرلك عن الحزن البداخلي...

انت تستاهل اكثر واكثر ياريت تنساني وتروح تعيش حياتك بعيد عن ذكر نيران اني انتهيت واتحطم كلشي بيه ...

بعد مستحيل ارجع مثل قبل واعد ايام بس انتظر شوكت الله يخلصني من هاي الالم الي جاي تاكل بعظمي مثل الارضه...

سامحني انت وخلي يسامحوني اخوتك وثريا وامنيه اني موخاينه ابد موخاينه حبك بي ومايكبر بداخلي بس اني جنيت على نفسي وماسمعت كلام فاروق...

اتمنى كدرت اوصل الك جزء من اسبابي واتمنى تقرا هالكلام لان اني كتبته خاص الك وتعمدت اشمره بالباب لعلى وعسى تلكوهن...

الي فتحت هاي الرساله اتمنى وامانه عليك لهنا وتكتفي بالقراءه الورقه الاخير لقيس امانه لاتقروهه....

ثريا.. عيوني غوشت وانحجبت الرويه عندي صوت شهكاتي صارت مسموعه واني انتقل للورقه الاخيره الي من نصيب قيس...

مكتوب بيهه..

قيس اني احبك حيل اكثر مماتصور لحدالان عيونك مبصرتني على حزني كلما اتاذى اغمض واتخيلهن واسرح لعالم بس اني وانت بي...

اني ابد مانسيتك ولا لحظه ولا ثانيه ولا راح انساك انت ماتستاهل كل العذاب الي شفته من عندي...

اعرف صعبه عليك هاي الكلمات الي راح تقراهه بس حته تعرف اني ماخنتك...

قيس اني اتزوجت مجرد حبر على ورق ورفضت اكون زوجه اله وشكد عانيت واكلت كتل بس ماسمحت لنفسي اكون زوجه غيرك...

ادري طلاقي من عندك باطل لان بالاكراه لا اني ولا انت راضين جنت على امل انهزم واخلص نفسي واجيك وتلكاني بعدني نظيفه وطاهره مثل ماعفتني...

وطلعت بهذاك الليل مهزومه من عنده وما اندل شبر بالفلوجه ولوجه الصبح اني اتخبط بشوارعهه وما ادري شلون لكاني لان ما ابتعدت عن البيت هواي..

وبهذا اليوم تمم زواجه من عندي بالغصب لان انهزمت وكسرت كل وعودي الك وصرت من صدك ملوثه وما استاهلك...

رجعت على الابر بعد ماكدرت اتجاوزهه فتره ورجعت لنفس الوضع الاول وحالتي بيهه وماتزداد سوء...

باليوم الي اجيتكم اني جنت تاركه بنيه وراي اااي ياقيس اني عندي بنيه كلما ادير ظهري الهه اتذكر حالتي واكول خاف تتاذى مثلي...

طول فتره الحمل منعوني من الابر الي محد يعرف بسالفتهه بس فلاح والباعني اله اتخبلت من الالم واتعذبت اريد الابر حتلو على حساب روحي...

بس ما ضربوني لحدماجبت ولا راجعو بيه طبيب ولا جابولي علاج حته ولادتي بالبيت وشاء ربك طلعت البنيه معاقه وعدهه مرض ولادي ....

ما اعرف شكول حوبتك لو عقاب الي لو المن ما اعرف خاف جنت بهم صرت بهمين...

ابوهه مارادهه لان عنده بنات هواي وراد ينطيهه بس دافعت عنهه وهاي اني عيني بعينهه يوميه احلف ربي اذا هاي الطفله عدهه خاطر يمك اخذني وخلصني...

اخر شي اريد اكلك كل الي قريته يبقه يمك لا تجي ولاتنقذني رجلي ارهابي وعنده الدم والقتل عادي...

احلفك باغلى شي عندك ماتجي ادور عليه ولاتجي تنقذني انساني للابد ...

فلاح وكلهم الي هنا ارهابيه وبعيني شفتهم يكتلون حته النسوان هنا مشتركات وياهم ماراح يرحموني ولايرحموك...

قيس اذا عندي معزه بكلبك ماتجي ولا تسال عليه وعيش حياتك.... نيران...

ثريا... سديت الرساله وكمت وانه لازمه الحايط رحت ضميتهه بملابسي وما اعرف وين اودي وجهي عن الحجيه وامنيه الي راح يسالني شبيج. 

ماكدرت اكمل شغل وياهن طلعت حجتي تخربطت ورحت لفيت نفسي بالفراش دموعي تجري بغزاره شصاير بيج يانيران وشراح يصير بيج بعد...

انفتح الباب بسرعه قيس واكف كال وينهه الرساله ووين لكيتيهه؟؟

انطيتهه الو كتلو لكيتهه بالباب هي عايفتهه اقراهه زين ويكويك الله. 

اخذهه وطلع لغرفته الله يعينك ويصبرك على كل كلمه راح تقراهه رغم ماحذرته لاتجي بس ادري ماراح يسكت وراح يروح للموت برجلي...

سالتني الحجيه وامنيه شبيج ولحن ماحجيت انتظرت اسمع راي قيس قبل كلشي...

دحكته نزل وانه صافنه على وجهه بي ملامح حزن هو نفسه مغيم من يوم الي راحت بس بعده بقوته ...

تعداني ومر كتله وين رايح ماجاوبني لحدما طلع للباب وانه ادحك علي وهو يمشي محني الظهر...

شراح يسوي وشلون راح يحجي لاخوتي هاي الكلمات وينقذهه لو يلتزم بكلامهه هاي الاسئله الي تتردد براسي راخ تخبلني...

يتببببع...

جدا اعتذر على التاخير وعلى قصر البارت بس والله مالحكت وجنت خارج البيت اكتفيت لهنا بهذا البارت يوضح اسباب نيران وباجر اعوضكم احبكم