رواية ازمة ضمير الفصل السابع وثلاثون 37 - بقلم Rozaya1122

ازمة ضمير ... البارت الخامس والثلاثون
«للكاتبه روزايه»

شو هسه مآ أكشخ گمُت ،
‏ويآهُم أتذكر چنت
‏بآليها بلُوه مرآيتي..

الحجيه.. لطفك يارب العالمين شلون عايشه هالبنت وشلون يساعدوهه وهي ماجاي تساعدهم..

امنيه... بدموع مثل الجمر وكلبي يسعر مثل النار واني اعيد كلام نيران وارجع اقره وما اصدك العاشته اختي..

الحجيه.. كافي يمه اذكري الله راح تموتين يولي الله ماينساهه وقريب عليهه اقرب من عدنه...

امنيه.. هسه من القهر تسوي بنفسهه شي شنو السوته حته عاشت هيج كمت اضرب بوجهي الله ياخذني شلون اذيتهه بكلامي مثل السم عيرتهه وهنتهه وهي جانت تطلب المساعده مجبوره...

انهاريت واني اتذكر وكفتهه وكسرتهه كدامنه واني اكول جايه على طمع وهي من حلاة روحهه حته تخلص من العذاب هانت نفسهه...

الحجيه.. تخبلتي يولي هسه يدحكون حل الهه ويخلصوهه كافي راح يصير بيج شي ..

يابنتي الله ماينساهه وقريب عليهه لا انه ولا انتي نكدر نسويلهه شي غير رب العباد الي اقرب ع العبد من حبل الوريد ...

نكول رب العالمين احن من الام على ولدها اسمعي هاي القصه
بزمن النبي موسى ع  لقبه كليم الله سأل ربه كال يارب كم تحب عبدك يالله؟  كال صاحب العزه والجلال روح  لذاك المكان ودحك شكد احب عبدي...

راح النبي يكول دحكت شاب يطلع من كهف وبيده عجوز وهو يسحلها بالكاع كلها شوك والدم يطلع منها سأل النبي الناس القريب منه كال منو هذا ومنو هاي؟؟  كالوا هذا ولد عاق وهاي امه يكول النبي دحكت العجوز تحرك شفايفهه بصوت مقطوع وسمعتها تكول ربي احفظ ابني لكي لا تأذيه هذه الاشواك...

نزلت دموع النبي من سمعها تكول هاي الكلام فكال رب العزه ياموسى اني احن منها على عبدي ...

يعني يابنتي لاتخافين على نيران هو ربنه القسملهه هاي الحياة هو قادر يخلصهه كومي غسلي وارتاحي وخلي نكعد ندعيلهه واندحك ولد عمج شيسوون...

امنيه.. احس نفسي جاي احمل فوك طاقتي نيران منا وادهم وهاي اسماء الي ليل نهار تركض ورا حته اكو رقم غريب يدك علي ومن يفتخ خط يسمع صوت ابنيه وتسكت ...

هو ما مخبي عليه بس خايفه من عدهه حيل خاف يصير شي وداخلي مامطئن من كل النواحي لا من ناحيه ادهم ولا من سالفه اختي...

ثريا.. شذره وامهه كملن الاسبوع يمنه والمشكله موهنا فاروق من يوم الي دحكهه ثاني يوم راح لرمادي عندو شغل وحته بسالفه نيران ماعندو علم ...

خلص الاسبوع ورجعت المره وبتهه وفاروق ماتحرك ولا اهتم لا عاف البيت وطلع الشغل بهذا الاسبوع...

اجه فاروق وكعدو اخوتي كلهم يتناقشون بموضوع نيران قيس جان ساكت ومخلي ايده على خده ...

ايوب.. يول ماتحجي تريد تنقذهه كلنه انروح لو نخلصهه لونموت شبيك ساكت..

قيس.. حته اذا اريد اروح بس انه انتم ماتروحون ..
ايوب.. التفت ع فاروق وحجه بعصبيه يول احجي ويا لا اكوم ابتلي بي ..

فاروق.. ايوب ع كيفك انت منفعل اكثر واحد غير نكعد وانفكر شلون انروح وشنحجي ...

ايوب.. ياب سكتو سويتوهه قصه مايرادلهه تفكير انروح وناخذهه منو واذا حجه نكتلو الحق ويانه بتنه بنص عائله ارهابيه وكاعدين ادورون حلول...

لا دكولون هي كالت لاتجون هي لو تفتهم ماراحت برجليهه لابوهه قيس اذا مارحت انت انه اروح ...

فاروق.. دومك مستعجل انطينه مجال نسال واندحك الاجراءات مانخطي خطوه نتندم عليهه ..

ثريا ... قيس مادري شبي حالتو اكثر حزن من يوم الي اتزوجت خلال اسبوع تغير بشكل موطبيعي بس ساكت وحسبه تاخذه وحسبه ترجعه...

بدو اخوتي يجمعون معلومات عن مكانهه ورجلهه وادخلو ضباج ويه قيس ويه ادهم والتليفونات ماسكتت ابد يوميه لنص الليل وهم يخابرون ويدورون على خيط يساعدهم مارادو ياخذوهه بالغصب ورجلهه وفلاح يكسبون القضيه او يتربصون لاخوتي...

ايوب راح لانبار عرس صديقو وكال  احاول اوصل خبر لحجي راضي بلكي بساعدنه ...

فاروق ليش ساكت اكثر من قيس ما ادري كلما احجي وكالو شغله ماتعرفيهه لا تحجين بيهه ....

الساعه ب3 الظهر ودك تليفون ادهم جنت واكفه يمو ملامحو تغيرت وبسرعه صاح يول شتحجي انت؟؟

سد التليفون وركض يصيح فاروق واصيح ادهم شكو شصاير ؟؟

ادهم.. يولي ايوب راح برجلي لنيران وماخذهه وجايبهه كوه عنهم ومتلكي بالطريق ومصوبي ...

ثريا.. اريد افتهم ما ادري شسوي كلهه ركضت يريدون يلحكون يصعدون بالسياره انخبصوا بس الي سمعتو ايوب بمستشفى بغداد وجماعتو وياا...

كاعده الوب وابجي والحجي فاتحه شيلتهه وتدعي يرجع سالم اندك الباب ركضت افتحو وما ادحك غير نيران واكفه كدامي بنفس الهيئه التعبانه وبتهه بحضنهه...

اجاني صوت الشاب البرا كال اختي هاي امانه ايوب وصلتهه الكم وانه راح اروح للمستشفى...

سديت الباب واخذتهه من ايدهه بعد مابوستهه وطبت جوه بس دحكت امنيه لكحت بتهه ع التخم وركضت ع امنيه..

لحظات ما اكدر اوصفهه شتحمل من معاني شوك وعتاب وحزن وكسره اخوات متحاضنات ويبجن بصوت عالي ...

بتهه بجت رحت شلتهه وانه ادحك عليهه هاي الطفله الي عمرهه اقل من سنه معقوقه ورجلهه بيهه انحراف نهائيا ماتشبه نيران مبينه على اهلهه ...

اهز بيهه وجفلني صوت امنيه ووكعه نيران بالكاع انغمى عليهه لحكت بتهه وركضت اهز بيهه غركناهه بالمي وهي ماتستجيب ولا تحرك ايد ورجل...

ركضت ع التليفون ادك ع ادهم ماجاوب دكيت ع قيس جاوبني كتلو الحك قيس نيران هين ووكعت بالكاع وماتتحرك ...

الحجيه اخذت بتهه تسكتهه وامنيه مخليه راس نيران بحضنهه وتبجي وانه اضرب بخدهه بس ماكو كل رد...

الحجيه ركضت لشارع تريد ادحك سياره ناخذهه دكول البت ماتت وانتن تنتظرن قيس...

بعدهه بالباب واجه قيس وادهم يركضون اول مافات للديوانيه ارتد ليورا عبالك رجلي تحنطت بس صياح امنيه والبواجي تخلي اكبر واحد يرتبك...

تقرب عليهه قيس خله ايدو جوه راسهه وشالهه بحضنو وايدهه ممتده بالهوا ...

وادهم اخذ امنيه جوه جنحو حالتهه ماتسر وانه ركضت ورا قيس صعدتهه ورا وخليت راسهه بحضني وهو طول مايسوق عينو عليهه وكلساع ويلتفت عليهه ...

وصلنه للمستشفى واخذوهه من عدنه بهويه قيس لان ضابط كدرنه ندخلهه بردهه خاصه واجه اكثر من دكتور عليهه ...

فتحت عينهه بتعب رمشت اكثر من مره اجت عينهه بعين قيس ورجعت غمضت وكانو تتهرب من عيونو...

طلع قيس يحجي ويه الدكتور وانه كعدت بصفهه لزمت ايدهه فتحت عينهه كالت ثريا ايوب شلونه؟؟

ثريا.. انخبصت بيج ونسيت اخوي هسه بس كالو زين متصوب برجله وزين ...

نيران.. ليش دزيتو ايوب مايخلون الواحد عايش موكتلكم لاتنقذوني ماراح يعوفونكم بحالكم ..

ثريا.. فهميني شصار وشجاب ايوب؟؟
نيران.. جنه بس النسوان بالبيت واجت الجهال تركض كالو اخو نيران اجه بالسلاح وتكاون ويه الزلم البرا ..

طلعت مفزوعه اشوف منو اخوي واشوف ايوب زانك اخو رجلي عادل ومتكاونين طلعت اريد افكهم واهدي ايوب لان عدهم الكتل عادي...

بس ايوب ماجاي وحدو ويا 3 شباب بعمره وهدو على حماي الوحده بدون سلاح صاح بيه اجي ويا بسرعه جبت بنتي ورحت ويه ايوب بعدما صوبو حماي برجله

طلعت ويه ايوب بمجازفه وما ادري شراح اوجه بالسياره ايوب كالي ما اتحملت انتظر خطط اخوتي ويريدوهه بتاني وهاي اجيتج وحدي...

تقريبا راح نوصل بغداد ولحكتنه سياره وكفت ايوب بنص الطريق وصار بينهم نقاش حاد ومن ضمنهم عادل وايوب وجماعته حموني بقوه لحدما تصوب ايوب...

والناس تمر من يمنه ومحد وكف وخلصنه ناس ماتت الرحمه بكلوبهم تالي اجت دوريه شرطه لحكو عادل واخوته واحنه اجينه لبغداد..

ثريا اني ما اريد اسببلكم مشاكل خلوني اصارع وحدي ولا يصير بيكم شي بسببي...

ثريا.. هسه اجيتي يمنه انتهت بعد ما اطلعين الا ع جثتهم انتي الج الصافي هم يحلوهه غطيتهه وطلعت لكيت قيس يخابر وادهم واكف يمو...

ثريا.. شلونو ايوب رحتو الو؟؟
ادهم.. زين باجر يطلع مثل كل مره ياكلهه ويكوم حته الدكتور صار يعرفو...

..شكالكم الطبيب ع نيران..
.. راح نطلعهه هسه وباجر نرجعهه للعياده يسويلهه تحاليل لان يكول ماكدرت احدد حالتهه...

... تعتقد نيران مدمنه مخدرات؟؟
.. الله لايكولهه حجينه حالتهه للطبيب وكال ما اعتقد مخدرات لان جان هسه بينت الاعراض عليهه وجان ماتت الطفله ...

بس احتمال نوع من الحبوب الممنوعه مال صرع او هلوسه او غير نوع باجر ناخذهه واندحك شيكول هسه خلي اخذجن للبيت لان امنيه عفتهه تبجي وقيس راح لايوب...

ثريا... رجعنه للبيت ونيران كوه تتحرك لكيت امنيه محضرتلهه فراشهه ومددت بي وبتهه منيمتهه الحجيه بس ادحك بعيونهه وتحس نفسهه ثكيله ...

طلعنه من يمهه وكلنالهه ارتاحي انتي ولاتشيلين هم ابد كعدنه بالديوانيه نحجي بسيرتهه طب فاروق يريد يبدل كال شلونهه نيران..

.. زينه وهسه نامت هم انطوهه مهدئات .
.. اسمعن ممنوع تفتحن الباب لاي بشر احنه نفتحه يندك ممنوع توصلن للباب ..

... ليش فاروق لهدرجه الوضع يخوف؟؟
..طبعا يخوف من حجيت كلمن ركب راسو وهذا المخبل ايوب راح برجلي للموت لوكاتلي ودافني ما ندري بي ...

تورطنه بارهابيه وماحاس حضرتو بحجم الكارثه لايروح برجلو ويجيبهه من بين عيونهم حته ماخله طريقه نفكر بيهه..

... ياجده شجاكم كبرتوهه بتنه يمنه وناخذهه نشتكي علي ..
.. اي نشتكي ويجيبوهم وينسجنون والذيول العدهم تدرين هم عباره عن خليه ارهابيه ومشتغلين ويه عصابات وعدهم القتل لاشي ...

من اجحي اسمعو الكلمه كل واحد شوره من راسو  ويعاند واظل اسد وراهم...

جان معصب حيل وروحو بطرف خشمو رجعو اخوتي بليل وقبس ظل يم ايوب ونيران بس كعدت رضعت بتهه ورجعت نامت حته بدون اكل...

ادحك عليهه شلون نايمه في سبات وعبالك صاير سنه مانايمه  على جهه وحده غافيه حته من تكعد بتهه ماتحس الحجيه تاخذهه تسكتهه...

كعدنه الصبح بشعاع امل جديد ونوعا ما اكو فرحه ابيتنه رغم القلق والخوف بس وجود نيران بث الروح بارجاء المكان...

خاصه امنيه وين ماتروح نيران الكاهه وراهه وبس ادحك عليهه وكانو ادحك امهه حته ادهم لاحظهه البراءه الي تحملهه امنيه نادر نلكاهه بهذا الزمن...

حطينه الصينيه بالمطبخ وكعدنه نتريك اخوتي طالعين وانه حته ماكعدت سويتلهم ريوك نحاول نضحك نيران بس شبح ابتسامه ترسم على وجهه ومن ارجع ادحك بتهه اموت قهر ...

صارت ب١٠ انفتح الباب وادهم ساند ايوب الي رجله ماتساعدو وقيس يمشي وراهم شايل علاكه الدوه وبيده السويج والموبايل...

كالو السلام عليكم ودخلو اتحمدلنه لايوب ومايكدر يصعد فوك خلينالو سرير بالديوانيه ومدد ...

كعدت يمو الحجيه اداهر بي ودكلو هايمصخم شظل بيك يوم سجينه يوم طلقه جنك منخل صرت مزرف ...

ايوب.. جده اسكتي لاتحجين كدام فاروق اي شي ترى كاب كبه الله يستر منو..

... حقو موتو موكالك لاتروح شلون تسوي هاي السالفه لوكاتلين..

ايوب.. تححين صدك انتي المابي خير على عرضو يطم نفسو ياب دحكي البنيه شصاير بحاله واخوتي كاعدين يسوون خط وضباط وياهم ...

الحجيه.. من كونك هيج ماخايف ورحت برجليك عجل هسه ليش خايف من فاروق ..

ايوب.. ماكو شي اسمو خوف بس احترام فاروق واجب علينه ...

غير مادحكتي هسه الصبح شسوه بينه غسلنه وجه وكفه وبعده كلبو مابرد ...

الحجيه.. تستاهلون يولو شلعتو كلبو خطيه اخيكم يركض ليل نهار وانتم تسوون البراسكم..

ايوب.. انه عاذرو رغم الرزاله الحصلتهه منو...

تدرين جده اول ماطلعت من العمليات واكف ع راسي ويصيح هابويه ايوب شتحس جاي تتوجع وعبالك بعدني ايوب الصغير ...

لا والمصيبه من انتبهت وكمت احجي استلمني اكس مربع حته كدام الممرض خلاني لا اخذ ولا انطي ...

ثريا.. قيس سلم وصعد ومادحك بنيران ابد الكاعده مخليه بتهه بحضنهه اوس سلم عليهه ولاشه بتهه ويضحكهه ...

وادهم راح اختله بامنيه الزعلانه لان ما اخذهه ويا للمستشفى من وكعت نيران..

ادهم.. امنيه اليوم انتي وابن عمج العود ناوين ع سحلي يابه والله فاروق اخذ حيفو كافي عاد...

امنيه.. روح ما احاجيك عفتني حال الضيم حالي وماقبلت تاخذني...

... يله من تتخربط مره ثانيه اخذج كافي امنيه وين اخذج وانه مناك رحت لايوب..

شو تعالي يابويه اروح فدوه للزعلان اشتعلت صفحتك فلاح على هاي الخلفه المخلصتهه دلال...

امنيه.. لا تقنعني اني زعلانه..
ادهم.. عندي الج هديه جنت ناوي بعيد ميلادج بس هسه امري لله احجيهه هسه..

امنيه.. شنو من هديه كول ع السريع..
ادهم.. امنيتي الجميله انه قدمتلج قبل اسبوع ادرسين ثالث متوسط خارحي ومن بعدهه اذا نجحتي ادرسي سادس وادخلي كليه ...

امنيه.. انت تحجي صدك ادهم كول والله مرتين..

ادهم.. ليش احلف قدمتلج والاسبوع الجاي تبدين تقرين وانه وياج بكل خطوه بس هاا موتاخذين الشهاده وتتكبرين عليه..

امنيه.. خلي اخذهه اصلا اطلكك حجيتهه بشقه ما احس غير ايده انمدت على شفايفي وكرصهن بقوه على اثرهه عطت اااخ ادهم هو هيج..

ادهم.. جربي تعيديهه مره ثانيه حته اعلمج شلون ام حلك كومي منا تخربين ابو اللحظات ...

امنيه.. عصب عليه وطلعت فرحانه اتذكرت من اخذ مستمسكاتي كال عندي شغله ومالحيت ركضت على نيران كتلهه ابتسمت وكالت تستاهلين كل خير...

ثريا... صبينه الغده وكلنه كعدنه داير مداير السفره الكل ياكل بهدوء ونيران ماقبلت تطلع من الغرفه اعرف هذا الهدوء ماقبل العاصفه وبعد العاصفه...

شويه ويتلاطخون ايوب واوس وواحد يكل لثاني انجب عوزهم يتضاربون بالمواعين ...

اوس يكلو غلط روحتك وايوب يكلو انت مالك علاقه اروح بالمكان اليعجبني ...

قيس .. موهيج الحجي يا ايوب ردنه ناخذ الحق ويعتقلوهم اثر شهود وانت بروحتك خربت كلشي..

ايوب.. يابرودك يا اخي وكاعد يحجي يول انت شنو من بشر الك عين تغمض وهي تعد ايام ...

اسمعو انه رحت لنيران لانهه بمقام ثريا لا علمودك ياقيس ولا اريد احصل عفيه ولو تنعاد هسه نفس الشي هم اروح...

واذا دكولون خربت عليكم بالعكس سهلتهه هاي نيران واخذوهه للمركز تشهد وفضت راحت صار يومين طيحتو حظي بس تتكاونون ..

فاروق.. كافي سدو الموضوع البنيه يمنه وخلي تتعالج وهذولاك يجي احسابهم ممنوع واحد بيكم يخطي خطوه ...

قيس اذا عرفت بيك رايح لومشتكي من ورا ظهري قسما بالله ازعل عليك والحجي موجه للكل ...

ادهم.. اليوم موعدهه ويه الطبيب حجزتلهه ..
قيس.. انه عندي دوره بكركوك وبليل اروح تبقه هي يمك اوس موجود خاف ادهم يلتحق...

فاروق.. ياريتكم ماكبرتو تفوو على عقولكم وبالذات انت قيس ...

حجه هيج وكام بعصبيه واخوتي كلهم سكتو وقيس كوه لازم نفسو ما اعرف الغايه من هذا التصرف شنو ...

العصر  اخذناهه للطبيب وادهم ويانه وتحاليل وخبصه واشعه وسونار وكومه فحوصات والتحاليل كالو غير يوم تطلع بس انطاهه علاج ورجعنه...

بليل اندك الباب اجه اوس كال هاي جيرانه اسماء وامهه صاح بينه ادهم ممنوع اطلعلهه وراح هو طلعلهن كالهن ماجودات شكد فشلت من مرت عمهه هسه شدكول...

قيس بليل راح وبالجذب مامر على نيران ولاسلم ولادحكهه خطيه مادري منين جاب هاي القساوه..

ثاني يوم الصبح كاعدين بالمطبخ واندك الباب حيل محد بالبيت بس ايوب ماتساعدو رجلو صاحت الحجيه منو؟؟

اجانه صوت يول نيران ال..... اليوم ادفنج انتي وعشيقج ...

ايوب مايصرفلو هالكلام كام على العكازه والمسدس بيدو وانه لازمه ايدو واتوسل بي مايطلع بس تهديدات البرا خلت ايوب يدفعني ويطلع ....

يتببببع ... متابعه شيقه