رواية ازمة ضمير الفصل الثامن وأربعون 48 - بقلم Rozaya1122

ازمة ضمير ... البارت السادس والاربعون
«للكاتبه روزايه»

مرآت أحتآج العتب بس قررت مآ أعآتبه ..
وآصعب أحآسيس البُعُد
من يمشي وآبقى مرآقبه !
چنه مثل مآي و هَوى
حآله صدآقه و حُب سوه
هسه آني وآحد منهدم فآرك
حبيبه و صآحبه
....

ثريا... واكفين اباب غرفه العمليات بلاستراحه وننتظر يطلع الدكتور ويبشرنه بنيران...

عمليتهه ع الخاص وكال راح بلاول انشيل الورم وندزو لتحليل واذا منتشر نقلع الثدي...

عيونه على الباب شوكت تنفتح جدهه وبيبيتهه واكفين واحنه كلنه موجودين ...

امنيه ما اجتي ماوكفت ويه اختهه بهذا اليوم بس حته لا ادحكنه ولا ادحك ادهم...

لحظات انتظار صعبه ويه كل حركه ميل الساعه نلفظ انفاسنه من الحزن كلنه ندعي يطلع مابيهه شي...

طلع الدكتور وكال عمليتهه ناجحه بس راح اندزو لتحليل خاف منتقل لغير مكان لان بالسونار جان ورمه وحده الي لكيتهن هسه ٣ زغار يعني ع الاغلب منتشر...

اجت عيني على قيس الي دمر نفسو بالمكابر اشهد على اخوي يحبهه حب ماصاير بس من كدما تعلق بيهه وحبهه حب حقيقي وانصدم حس نفسو ضايع وغلف نفسو بالحزن والوحده...

طلعوهه من الغرفه ونقلوهه للردهه وهي بعدهه ما مستفيقه من البنج بس صوتهه الخافت وهي تردد يا الله...

خلوهه بالغرفه وحاولت تكعدهه الممرضه ماحجت شي بس تصيح يا الله لحدما انتبهت بالكامل...

كعدت يمهه وبستهه من راسهه والحجيه كابلتهه وكعدت  جانت تون من الالم واول مافتحت عينهه وانتبهت صاحت امنيه خوما اجت...

جاوبتهه جدتهه كالتلهه لا سوده عليه لا اكل ولاشرب من البارحه وروحهه لايبه عليج بس ماكدرت تجي..

نيران.. من طلعت شفت وجهه اصفر وصيت جدي عليهه خاف تتخربط..

... اي يمه تخربطت وركضنه على علاجهه واخاف عليهه وحدهه لايرتفع سكرهه هاي الايام حالتهه النفسيه تعبانه ...

نيران.. روحي بيبي اني ماعليه شي ويمي الحجيه روحي وخابريني طمنيني عليهه ...

ثريا... ما اصدك امنيه هلكد كارهتنه وكارهه ادحك ادهم شنو من جرح حاملتو وخلاج هيج..

كلنه اشتركنه بجريمه وحده شهر كامل عينهه ماوكفت من الدموع تستنجد بكل واحد ادحكو تريدو يساعدهه...

انه شكد حقيره وناكره الجميل ماتنلام من ماقبلت ادحكني نفسهه هاي الطفله جانت تكعد نص الليل تبجي تكعدني دكلي ثريا مختنكه كعدي احجي وياج اني احب ادهم ..

وجنت اغطي راسهه عنهه واكلهه هو مايحبج وخري اريد انام واعوفهه بحزنهه تعاني...

ما ادري شلون اجت كل هاي الاحداث كدامي وبجيت نيران ادحك عليه وعبالك عرفت ابجي ع امنيه..

ماتكدر تحجي لان تعبانه ومتالمه طب فاروق وايوب اتحمدولهه ع السلامه واوس وادهم من طلعت راحو...

قيس ماكو ولا اجه ولا وكف يم راسهه رغم طول ماهي بالعمليه احسو راح يتخربط ووجهه شاحب...

اجه فارس وطلبت من عندو اظل هين وياهه ماكال لا اصلا احسو منطيني مطلق الحريه وزايده عن اللزوم وبلاحرى يمكن يريد يخلص من عندي يعني ابات يوم عشره مايهتم..

علاقتنه بارده الى ابعد حد رغم يحبني وواثقه من هالشي بس هو بطبيعتو بارد وحته بالعلاقه الزوجيه قطعه ثلج...

رجعت كعدت يم نيران والحجيه تسولف وياهه بس هي نفس هدوءهه السابق بس تسمع ما اتجاوب بس للضروره...

اندك الباب وطب قيس وكف يم راسهه كالهه الحمدلله ع السلامه بس كوه تطلع من عندو مثل الواحد غاص ومخنوك...

جاوبتو ودارت وجهه لجهه الثانيه تصرفهه اثبت بان ماتريد ادحكو هو هم اترخص وطلع وماحجه حرف..

اثنينهم يعانون واثنينهم يكابرون جذابين واحدهم يحمل بداخلو حب هائل لطرف الثاني بس المكابر العدهم خلاهم هيج...

كلساع تجي الممرضه عليهه وبعدين ضربوهه ابره ونامت وانه والحجيه لصبح كاعدين متغير مكانه وماكدرنه انام...

ثاني يوم كتبلونه خروج واجه جدهه اخذهه وايوب الي وصلهه توسلت بايوب اروح وياهم بس ادحك امنيه...

نيران ماقبلت هاي كلماتهه جانت ... امنيه مومثل قبل ثريا امنيه مريضه وبس تنقهر تتخربط محذرينه من الحزن عفيه اذا الهه محبه بكلوبكم ابتعدو عنهه ...

مجرد ذكر اسمائكم وطاري ادهم تنهار حيل متأثره وطول هاي السنوات هي مانست ولاراح تنسه ...

سلمت على نيران ورجعنه للبيت قيس ملتحق موحبا بالدوام بس يريد يشرد من الواقع العايش بي ادهم هم بالدوام ...

وبس شذره بالبيت هي وامهه وشذره نايمه ع ظهرهه بس انريد توصلو لشهر التاسع حته نسويلهه عمليه ...

دكيت على فارس كتلو تعال اخذني كال عندي خفر اليوم باتي يم اهلج بوقتهه حيل انفعلت ومنا انه ضايجه كبيت علي بالحجي ...

فاجاني بكلامو وهويكلي ثريا اكسري حاجز الشر وظلي يم اهلج كوه مسكت امي ولو انتي لوهي ما ادحكين صار شكد منطيج كامل الحريه بس حته لاتنصدمين وياهه ...

.. بس انه مامسويه شي لامك ولا مقلله من احترامهه ليش تكرهني قسمه وماصارت بلاول شدعوه عليهه...

... شوفي ثريا امي من اول خطبه ماقبلت هي من الاول رايده بنت اخوهه وماقبلت واجت خطبتج ورفضتي وراحت اسنين وانه مااكلج افكر بيج لا نسيتج بس حبيتج من صدك...

وافقت اتزوج زواج تقليدي وبنت خالي ماقاصره وهم واصله بالدراسه بس من طلعتي كدامي حن كلبي ورجعت فاتحتهم بالموضوع وامي اعترضت...

حقدت عليج لان تفشلت ويه اخوهه ولان رفضتي من الاساس هاي تفكيرهه بعد شسوي ثريا تحملي لخاطري..

... بس انت يافارس حته بارد وياي وعلاقتنه روتينيه ولا عبالك تحبني ...

...  ثريا كل انسان وطبعه اني هذا طبعي موبالواجب اجي واكلج احبج المهم اني احبج ماله داعي كلساع افتح هاي السيره ...

ثريا.. لا اخذت من عندو لاحق ولاباطل حاول يتغزل بيه لان دحكني ضجت كل اهتمام ينطلب هذا مو اهتمام هذا اسقاط فرض...

كتلو راح اظل يم اهلي واتفقت ويا بيوم الخفر هو اجي يم اهلي ومن يجي للبيت ارجع واظل هيج مهجوله من بيت لبيت..

سديتو وطلعت من الغرفه اجه كدامي فاروق وهو حاضن شذره الواكفه تغسل بالمغسله وهو مدنك على ركبتهه وهي دكلو دغدغتني ...

ماردت احرجهم بسرعه رجعت للغرفه الدنيا ابد مانصفتنه ماخلت مصيبه مالحكتهه على راسنه كلما اندحك الضوه من بعيد تجينه غيمه سوده وريح عاليه تهدم الاول والتالي...

ثاني رحت للدوام ورجعت ويه فارس للبيت طبيت سلمت امه ماردت السلام ولا اخته دحكت على فارس هزلي راسو وعفتهه ومشيت...

كوه متحمله هالوضع ليش هيج البشر انعدم الضمير عندو فدمره يوم عن يوم اكتشف هالبشر عايش بغابه وناس تاكل بناس وكولت اهلنه قبل كل واحد يودي النار لكرصتو...

بدلت وغسلت وخابرت على ايوب سالتو عن نيران كال زينه وكلنه نتتظر التحليل مالتهه...

مر الاسبوع واجه موعد التحليل وجان مثل مامتوقعي نيران بيهه المرض ولازم يستئصلون الثدي الايمن بالكامل ويضربوهه اشعاع...

لحد الان اتذكر اللوعه بهذا اليوم بجيت بجي ودكيت على صدري احس كلبي مثل النار ومشتعله بيهه ...

صدك اتمنيت اكدر اشيل ولو جزء بسيط من المرض الي عدهه الحجيه تبجي واخوتي مدنكين روسهم باسى قهرنه بس ع شبابهه الراح...

هذيج الورده المفتحه الي ماتلبس غير البنطرون القماش الاسود والقميص الماروني تطلع مثل الشمعه الضاويه والكصيبه تضفرهه صفح ...

كلشي انهدم عدهه وهي بعز شبابهه عمرهه ٢٥ سنه ومن الحركه واللوعات الي عاشتهه صار بيهه هيج...

ما ادري شصار بيه حسيت راح اخسر موبنت عمي عبالك واحد من اخوتي هسه حسيت بقيمتهن تخبلت وكمت افرفح بس اخذوني الهه...

ايوب اخذني انه والحجيه وطول الطريق ابجي قيس باجر ينزل محد خابرو وكالو يجي ويتفاجى وحدو مع العلم يدري اليوم يطلع تحليلهه وكلساع يتصل ونكلو ماطالع...

واكفه اباب بيت جدهن وامسح بدموعي واجانه صوت الحجي الجبير وهو يصيح يا الله فتحلنه الباب اغتاض وجهو بس الحجيه وياي كال تفضلو...

طبينه بلاستقبال واجتنه الحجيه رحبت بينه دحكت حالتنه وشكد باجين كامت تبجي ويانه وراحت صاحت نيران...

جانت جامده جثير مانزلت دمعه وحده من عدهه رغم بواجينه بس ما بجت بس تلم بشفايفهه وتحاول تحبس دموعهه...

عيني على الصاله المفتوحه كدامنه كلساع واكول هسه تجي امنيه على الاقل لو بس اسمع صوتهه ...

طمنه نيران وكنالهه تتعالجين وترجعين مثل قبل لا تنقهرين ناخذج لاخر الدنيا بس القهر بهالحاله موزين عليج...

الحجيه.. نيران بنيتي كلشي مكتوب ومقدر الله كاتبلج هاي الايام تذكرين من دحكت بوجهج شكتلج ...

نيران ... اي اتذكر كلشي ... كتيلي انتي نار مثل اسمج وراح تحركين شكو عزيز عليج وصدك حجيج هاي النار لاحت قيس وموبس قيس حركت نفسي ويا...

وكتيلي ابتعدي عن طريقهم احسن الج والهم بس ماصدكتج كلت خرافات وكتيلي بعد هالشده راح تبصرين خيط الامل وترجعين اطفين هاي النار ...

وماتطفي النار الي شعلتيهه وترجع تنفتح من جديد والخسران الوحيد انتي ...

وهذا حجيج كله صحيح انه الخسرانه خسرت كلشي حلو عندي امي واختي وخطيبي وخسرت صحتي وضحكتي كلشي خسرته...

الحجيه.. يعني تصدكين بيه من احجي وهسه اكلج علم الغيب عند ربنه بس يابنتي من الملامح التتغير بمرور السنين اكدر اميز واحجي...

وهسه انتي ترجعين ورده مفتحه وترجعين نيران الحلوه بس يبقه الجرح بالكلب اذكري الله واريدج قويه وترجعين لاخيتج الماعدهه بالدنيا بس انتي...

... ان شاء الله...
... كلي لامينه ماتريد ادحك الحجيه نعيمه مااشتاكت لسوالفي من يوم الراحت محد كالي زكيه الداكوكه وتمسهد عليه....

جدة البنات.. اعذريهه ياحجيه امنيه ماتريد احد مانكدر نجبرهه لوتريد هي تطلع تسلم عليكم بس هي من شافتكم انهزمت للغرفه...

الحجيه.. لا خليهه محد يلومهه نترخص احنه باست نيران وكالتلهه بوسي امينه ...

طلعنه لايوب ورجعنه للبيت كالعاده فارس خفر ورجعت لاهلي ايوب كال اشو انتي هين ماعندج رجال...

... خليني هيج احسن هو خفر وين اروح عاد التهي ويه شذره..

ثاني يوم اجه قيس والظاهر واصلو الخبر الوجه مايتفسر واحنه اصلا بالسنين الاخيره محد كدر يفسر قيس والي يمر بي ...

عايش وحدو لانقاش ولاكلام انتظر فاروق يجي المغرب واخذ اخوتي وراحو بس ادهم بالدوام...

الي عرفتو من ايوب قيس ناوي يطلعهه للهند واخذ تقاريهه ورسلهن لدكتور قبل لايطلع التحليل ومتفق ويا على العلاج...

كايلو لازم نستئصل الورم والمكان المنتشر بي وننطيهه جرع كيماوي واشعاع ما انطه امل لشفاء لان كالو هذا المرض ايامو معدوده وهذا مجرد تهدئه...

السفر والعمليه مكلفه بهذاك الوقت جثير مكلفه وجدهه كال ابيع البيت بس ما اخليهه تعاني بس قيس تكفل بكلشي ونيران ماقبلت...

صارت الهوسه قيس يكلهه اخذج غصب عنج وهي دكلو ما اروح وياك ولا اخليك تصرف فلس عليه...

اخر اتفاق جان الصرف من فاروق وتعهدلهه فاروق مايخلي قيس يدفع يله اقتنعت ...

وجدهه كالهم بس ابيع البيت انطيكم كرامة حفيداتي اهم من الفلوس ...

حضرو الاوراق وسوينالهه الجواز بقه منو يسافر وياهه قيس حاول بكل الطرق وماكدر لان ضابط وممنوع السفر عليهم الا بطلب وزاري وجان الوقت ضيك ومايلحكون ...

قيس كفل اوس وكالو انت روح لو ايوب وصار الاختيار على اوس لان يعرف بامور الطب حته يكدر يفتهم من عدهم....

اخذهه اوس وسافرو جان قيس وياهه لحد اخر لحظه من صعدت بالطياره بس نيران ما التفتت علي ولا سمحتلو يدحك عيونهه ...

ظلينه ع تواصل ويه اوس وسوولهه العمليه وظلت اربعين يوم بين الجرع والفحوصات يله رجعو...

صحتهه مدهوره وتعبانه ومتغيره جثير الشعر الحلو الي جانت تتباهه بي راح وبده التساقط والجلد محروك...

حته حواجبهه واكعه وتاخذ النفس كوه مهدود حيلهه وتجيهه ساعات مثل الطير المذبوخ تكوم ترفس بالكاع من الالم ...

كامت تتمنى الموت تصيح بعلو صوتهه خلصوني اريد اموت الالم ياكل بيه اروح ادحكهه لو اشبع بجي وارجع...

بيوم من عدهن خابرنه جدهه كال خلي ايوب يجينه ناخذهه للمستشفى ينطوهه مغذي ماجاي تاكل...

ايوب اندك علي تليفونو مغلق وجان قيس هستوه نازل ورحت ويا طبينه للاستقبال وانصدم بيهه...

نايمه بالكاع ومكرفصه نفسهه وتون مثل الحمامه وجدتهه يم راسهه تمسح دموعهه بشيلتهه ...

تقربت عليهه رفعت راسهه جانت شفايفهه مفطره وكوه تفتح عينهه الله لايسلط هذا المرض على عبد مسلم ياكل بالانسان اكل...

ابدايتو محد يحس بي بس من يوصل لمرحله متقدمه يكوم الانسان يتمنى الموت بس حته يخلص من الالم ...

جدتهه ادنت ليورا واجه قيس ثنى ركبه يم راسهه وشال راسهه وخلا على رجلو ومسح كصتهه بايدو...

قيس.. نيراني كومي اخذج للمستشفى وشدي حيلج..

ثريا... يادوب نطق هاي الكلمات وهو منو يكدر يحجي ويعبر بهيج وضع رفعت نفسهه كوه وجان قيس ساندهه ولامهه لحضنو...

لبستهه ع السريع الجبه والحجاب سالت ع امنيه كالت جدتهه مرتفع سكرهه ع اختهه ومتخربطه...

صعدتهه ورا واخذناهه للمستشفى انطوهه مغذي وابره شويه هدءت وراح قيس جابلهه عصير وبسكت كوه توسلنه الهه يله اكلت.....

شويه صارت احسن طلعنه من المستشفى جان الجو بدايه الشهر الرابع والجو حلو ودنيا المغرب كال قيس ثريا راح ارجعج للبيت واخذهه افرهه شويه...

رجعني لبيت عيالي وهو اخذهه تغير جو وماكدرت اسالو وين رحتو لان مايحجي بس فرحت بلكي شويه تطمن وتحس بامان وتفائل....

مر اسبوع جانت الساعه ب١٠ بليل ودك التليفون صوت ام شذره وهي تبجي وتصيح بنتي راح تموت الحكيلي ...

ع السريع لبست واخذني فارس للبيت لكيتهم ماخذيهه للمستشفى خابرت عليهم كالو بمستشفى الراهبات ع احسابنه...

انكطع كلبي وانه اوصل لصاله الولاده وهم مالكيتهه سالت الممرضه كالت جانت اكو مريضه اسمهه شذره وكالو عسرت بالولاده ونقلوهه للعمليات...

احس رجليه بعد ماتعيني اركض بالممر مثل المخبله جثير عليه هذا الحزن والقهر وصلت للعمليات...

لكيت ام شذره كاعده بالكاع وادك على صدرهه وفاروق يروح ويجي وادي بجيبوبه وايوب واكف ع جهه ...

ام شذره... ثريا بنتي راح تروح يكولون حالتهه خطره ثريا ما اريد كلشي بس بنتي...

ثريا... كولي يا الله يا خاله استهدي بالرحمن هسه اتجيب وتطلع جنهه ورد..

... لا بنتي كالو موزينه الدكتوه كالت موزينه حته ماطلكت واكول عسرت بالولاده يمه بنتي ربي دخيلك قدر عليه ولاعليهه...

فاروق جان يسمعهه وكلساع يفرك وجهه ماظلت عدنه اعصاب ابد طولت العمليه وهي عمليه الولاده ربع ساعه...

طلعت الممرضه وهي تطلب دم ع السريع وركض ايوب يتبرع الهه لان فصيلتهه مثل فصيله ايوب...

جنت كاعده بالكاع والحيل مهدود وطلعت الطبيبه تهز راسهه بأسى وحزن وصاحت وين زوج المريضه.....

اتمنينه بهاي اللحظه تخيرنه بين الطفل والام ونختارهه اتمنت امهه تفديهه بكلشي ولاتخسرهه ...

هذا قدرنه وهاي ايامنه الحالفه علينه ما انضوك طعم الفرح وهاي اللعنه العاشت ويانه طول هاي السنين....

يتببببع.... متابعه ممتعه احبكم طووووخ....