رواية ازمة ضمير الفصل السابع وأربعون 47 - بقلم Rozaya1122

ازمة ضمير ... البارت الخامس والاربعون
«للكاتبه روزايه»

انه الما غمضت عـينه...
انه المالگه الحب وضاعت بالهوه أسنينه
أنه المنسـي ع الشباج وأتنطـر...
وانه المو بالخمر سگران بذكراكم گمت أسگر
أنه الـ شحت عليـه الناس بـ شلونگ
أنه التعبـان من دونـگ
انه المبيوك انه المامش...انه الأسمه بشر عايش
انه الثكلت عليه روحه... انه الكل تايهه وكل عابره تلوحه
انه المتروس صدره عتاب... انه العينه عله دكت باب
انه الما أدري شكبره ... انه الفدوه انه الماله عمر يسوه
انه البالغربه يتغنون...
انه الينشد انه اليفكد ولا يتركد تركد
وانه المجتوف مايفتك ...
وانه الينشاف جنه بخير
وانه الجذاب من يضحك!!
.....

ثريا... رجعو الهويات للبنات وحرك السايق وادهم يحجي ويه الضابط البصفه بس ظلت عينو على السياره ...

وصلنه لمنطقه دحكت جد امنيه واكف ع شارع ومستند ع عكازتو وكانو ينتظر احد وكفت السياره مقابيلو ونزلت هاي البنيه الي مخليه شال ثاني ع وجهه حته طخت بكتفي وما التفتت...

حركت السياره وعيني ع جد امنيه ينتظر منو كلت بلكي ادحكهه بس من مشت السياره صار عندي فضول اسال عن هاي البنيه...

كالت اخت الموضفه الي وياي ... هاي اسمهه امنيه وماتحب اسمهه ودائما اندلعهه اماني...

ثريا.. ارمش بعيوني واسال بلاسئله دفعه وحده معقوله هاي امنيه جانت كاعده ويتي نفس المكان وماعرفتهه كتلهه عجل ليش مغطيه وجهه...

... والله مانعرف دائما من توصل للسيطره تغطي وجهه بالشال الي جايبته احتياط لهيج حالات وتروح ساكته وترجع ساكته ..

.. شتدرس هي وشكد عمرهه وبت منو؟؟
.. ويانه معهد صحه مسائي قسم الصيدله وعمرهه ٢٠ ومانعرف اهلهه لان ماتحجي ابد ولاعدهه صديقه بس هذا جدهه ينتظرهه...

... تخبلت وانه اسمع كلامهه هاي امنيه بنفس المكان وياي وماحجيت وياهه ولا سمحتلي اعرفهه معناتهه كارهه وجودنه...

اكيد دحكت ادهم واكيد تاذت بهاي اللحظه ادهم الي حس بيهه وعرفهه وعينو عليهه وما انطت هويتهه مجرد اجراء روتيني...

وصلت لبيتنه تلكتني شذره تنشر ملابس ما اعرف شسوي احجي لو اسكت ادهم يتعذب كدامنه وايوب رافض نهائيا يدلي مكانهه...

انتظرت فاروق للعصر من اجه كعدت ويا وحجيتلو كال يا ثريا ادري واندل مكانهه وانروحلهه والبارحه انه يمهن بس مانكدر نكول...

امنيه لحد الان بس ينذكر اسم ادهم كدامهه توكع دموعهه حلفتنه مانكول مكانهه ماتريد ادحكو طلبت الطلاك واحنه براسهه انكول لعلى وعسه يجي يوم ويرجعون...

لحد البارحه وكفت كدامي وبجت وكالت اريد حريتي من ادهم تكدر ترفع دعوه علي بس لخاطرنه والا ادهم بداخلهه مات ...

ثريا.. كلنه نعرف ادهم حالتو موطبيعيه والصار بسبب سحر كلنه اذينهه من ورا اسماء..

فاروق.. دحكي يا ثريا صح اكو سحر بس اذا يحبهه لاتقنعيني بسحر ادهم راد يجرب ويه غيرهه عبالو امنيه ماعدهه احد وتظل تنتظرو وتكعد تبجي كدامو...

وفعلا لو ما وكفت ايوب جان امنيه ظلت لحد الان تعاني بس ايوب الي جازف وكال مستعد اخسر ادهم وما اخسرهن...

ثريا.. ايوب يدحك رؤى من يدحك امنيه لذلك هيج سوه...

... ايوب اتخيل رؤى الله يرحمهه نفس الموقف وكفلهن هاي الوكفه وبعدو مصر اذا يستوجب يتخلى عن ادهم ومايتخلى عنهن...

لذلك ثريا الج السكوت لاتحجين ولا تتدخلين ابد باي شي  ترى ايوب تعرفين خبالاتو اذا عرف بيج ...

ثريا... رجع ادهم المغرب راح يسبح وطلع الجكاره بيدو وكال سويلي جاي ...

كعد بالمطبخ وشذره كاعده تسوي كبه وامهه والحجيه كاعدات يسولفن...

الحجيه.. هاجده شلونك معدتك شلونهه؟؟
...الحمدلله من اثكل بلاكل اتاذه هسه هيج احسن ..

الحجيه.. جده ولو الكلام ياذي بس يايمه حته الماتت مرتو تزوج بهاي السنتين...

الله قاسملك هالقهر لاتظل تراوح بمكانك ياوليدي فكر بروحك قسمه وماصارت ..

... شنو هالحجي ياجده نعيمه تريدين انسه امنيه والله ما اعرف شحجي لو اظل طول عمري اعتذر الهه مااستاهل تسامحني...

بكل مكان احسهه وصرت موصاحي بالسيطره ادحكهه واستغفر ربي بالطريق اكول هاي واكول لا تعبت جثير...

لو بس ادحكهه ساعه وحده طلعت من البيت وما ادري شبيهه ما ادري احساسهه بهذيج الساعه وعدتهه بشي وجازيتهه بشي...

ما ادري هاي اللعنه منين طلعت بطريقي فرك وجهه بقله صبر واستغفر ربو وكال اريد احجي ويه فاروق نبيع البيت...

لو اطلع انه بغير مكان مختنك من عندو وبس اطلع الكاهه واكفتلي بالباب ...

الحجيه.. ياجده يوميه شايلين ابيت وهين بغداد غاليه وهذا البيت جبير ولامكم كلكم ...

ادهم.. ما اكدر اظل بعد يوميه من اطلع تطلع كدامي لايفيد رزاله ولا كرامه والله لو ما بنت ناس لا اشمرهه بتهمه واخلص منهه...

ثريا... شرب الجاي وطلع بسيارتو وانه كمت خابرت فارس كال بعد ٣ ايام واجي ظليت شويه احجي ويا وسديتو...

اسمع ايوب يغني وصوتو حلو جثير مثل صوت مطربين الزمن القديم جان يغني باغنيه قديمه ...

گلب مامال للغير گلب عدكم واسألو ادور وانشد الناس واعاين بس بالوجوه...
  لا اندل واجيكم اسالمن عليكم ....

طلعت من الغرفه لكيتو يمشط بشعرو على مرايه المغسله التفت عليه ...

ايوب.. ثريا تدرين من اتزوجتي عقلتي والسانج براغيو مضبوبه ..

ثريا.. عجل شبيه قبل غير انت باليني بلوه بس شتقصد ..

ايوب.. بس صح اتزوجتي بس ظليتي نعجه ثوله..

... ماتجوز من سوالفك لو يسمعك فارس شيكول بله؟؟

.. ديله يسمعني فارس وهو منو فارس عود صار عدهه رجل وتحجي بي المهم ماعلينه السانج يرادلو اسبانه عشره حته ينضب خاف يفلت..

ثريا.. افتهمت قصدك اطمئن مايفلت لان عمري مامدحكه مثل قساوه كلبك على اخوك..

ايوب.. يولي انه كلبي حنين بس كدام الظلم لا واخوج ظالم واذا فات الفوت ماينفع الصوت...

انه صح قمتي بواجبي بس حاليا مابيدي شي القرار الاول الهن وانه عبدُ مطيع...

ثريا... ااوف من عندك تذكر جدتي الله يرحمهه تسميك ابو البلاوي وصدك ابو البلاوي حته اخوتك ماخلصو من عندك...

عدل شعرو وطلع وتحارش بالحجيه يكلهه خاف اجيبلج حلويات وتموتين شحجي شكول...

الحجيه... خايب ما اكل جثير هو شباج زلابيه..

ايوب.. جده ذاك اليوم ابو صاحبي تزوج وهو جبير واخذلو وحده فايتهه القطار جبيره بالعمر..

وثاني يوم جايبلهه كيمر وكاهي وضاربتهه جلطه وتاهت على الاطباء مدري من الكيمر مدري من الحجي..

الحجيه.. دهر فر السانك خايب ماعندك بريك لاطسه لايسمعنك البنات...

ثريا... جان واكف بباب المطبخ ويحجي وياهه واحنه بالهول وبس هي وام شذره يشاقن ويا...

ايوب.. منين عدنه بنات وحده مرت فاروق معلمهه فاروق ع كل درب ...

بس خاف استحيتي من الكيمر ...

الحجيه..يول اطلع لا تخرب مسامعنه وتخلينه انه وام شذره انروح نعاتب الموتى بهالساعه...

ايوب.. شتعاتبين عاتبنه ومحد سمعنه النه الله بس هم حقجن بعدجن حديثات...

ثريا.. اسمع مداهر ايوب ونضحك وهو طلع والحجيه دكلو ابو الكيمر لاتنسه الزلابيه خايب مشتهيتهه ....

بليل ورا العشه ماطلعو اخوتي وقيس جان نازل كلنه مجتمعين وشذره بصف فاروق مايكعدهه الابسدو...

كمت خليت الحلويات الجابهه ايوب واجيت قدمتلهم ياكلون ويتناقشون جان بوقتهه وضع الانبار موشي يوميه قتل ونهب...

وعمتي ام جاسم مخابره ع فاروق وتريد تجي يمنه شكم يوم بين مايلكون مكان وايوب انهد بيهم فد هده يكول بس تجي الا اسمط جاسم وعشيرتو...

الحجيه.. عجل يمه انه امل ام ياقوت خابرتني كالت كاتلين حماهه بسوالف الطائفيه صدك يايمه الوضع موهين...

ايوب.. وهسه امل وين كاعده؟؟
... كاعده يم ياقوت بتهه مواخذت ابن عمهه وماخلفت وابن المشعول يكومهه بكتله ويكعدهه بكتله...

اتزوج عليهه وحده من غير ديره وهذيج هم ماخلفت ويصيح انه مابيه الصوج وساكم البنات سكم..

ثريا.. جانت تحجي واوس مخلي ايدو على خدو وصافن على كلامهه الحجيه هيجت المواجع وحركت مشاعرو من انذكر اسم ياقوت...

جانت تحجيه بعفويه وما منتبهه للكاعد يمهه ومركز ويه كل كلمه يلفظ بيهه اسمهه هم حبهه وماحب بعدهه...

ايوب.. ماتتطلك من عندو المن متحمله الاهانه..

... جده وين تتطلك هو ابن عمهه ووين تكعد لا عدهن بيت لا صخام بنتي ثوله ضحكو عليهه وطول هاي السنين كعدت يمهم واتزوجت بتهه وكعدت وياهه...

من يطلكهه وين تعيش ترجع لامهه وانه تركت الانبار وديرتي من اجيت يمكم عظم ابن ادم ثكيل يا وليدي محد يتحملو...

ايوب.. لا والله جده قصرت متحمله الكتل على يامال لاتحبو ولا عدهه جهال الانسان بدون كرامه فلسين مايسوه...

تكعد بغرفه وتنام مرتاحه احسن ما تكوم بالغلط والذل عجيب امرهن هذني المحتملات الكتل...

الحجيه.. الحجي سهل يا ايوب بس بالواقع مر اطلكت ياقوت منو ياخذهه؟؟ وعمامهه يعوفوهه بحاله...

ايوب.. والله ما ادري بس الانسان هو يكدر يخلي قيمة لنفسو وهو يكدر يذلهه وانه برأي ما ادحك الرجال اعظم من المره بس اكو البعض من عدهن هن ضعيفات..

ادهم.. موكلهه سوه اكو من عدهن ضعفهن لاسباب لوماعدهن اهل لو ماعدهن معين..

قبل فتره طلعنه كشف ع وحده انتحرت بالشط وبعد التحقيق طلع رجلهه موخوش ادمي وهي اهلهه ناس معروفين وتكدر تطلك وترجع لاهلهه بس هي ضعيفه اختارت الانتحار...

ثريا... جانت الكعده كلهه عن حقوق المراه وتذم الرجال وفاروق يدحك اخبار وشذره بطنهه جنهه طوبه تفتر مثل الفراشه كدامو رغم مامركز بلاخبار وعينو عليهه...

يدحك عليهه بكل شغف وكانو هستوهم يعيشون علاقه حب ...

قيس يتصفح بتليفونو وجان الفيس هستوه طاش وموجثير ناس عدهه واخوتي كلهم عدهم بس ايوب يقنعون بي يكلولو سوي صفحه...

كاعدين وقنعو ايوب يسوي صفحه ويكلولو تتونس وادحك تعليقات وتنشر وتصير عندك اصدقاء..

ايوب... مو خاف اتعارك وانه خلكي كصير ويوميه هاد على واحد بالتعليقات...

قيس... لا الشي المايعجبك اعبرو راح اسويلك حساب يول اسمي باسمك..

ثريا.. سوالو حساب وسما ايوب العراقي بلانكليزي وكاعد يتصفحون بي ويضحكون...

فاروق اخذ شذره وصعدو للغرفه وانه تعبانه من الدوام رحت نمت واخوتي عفتهم كاعدين ويه الحجيه...

اجه فارس ورجعت لعيالي ونفس المنوال والوجوه مكلوبه ومحد يحجي وياي وماعدهم سيره غير بس سالفه الحمل حته كرهت هالموضوع...

اصعد لغرفتي ابجي ويجي فارس يهدي بيه ويكلي بعد ماصارلنه جثير من اتزوجنه اصبري بس انه ماعندي اعتراض ع المقسوم بس كلام امو واختو ومرات يجون بيت خالتو يسم البدن...

اتواصل ويه شذره يوميه من ارجع من الدوام وتسولفلي وضعهم كالت ادهم مصر ينتقل من البيت وفاروق يكول ماريد اخسرو وبعنه البيت وراح نشتري غيرو...

وهسه لكو بيت بلاعظميه بس غالي لان جبير وقيس كال انه ادفع وياكم وع اساس يشترو...

انه ادري بقيس راتبو عالي وماعلي مصرف ويضمو يعني يكدر يشارك وياهم ادعيلهم براحه البال ع الاقل يبتعدون عن المشاكل...

ماطولو اقل من شهر وانتقلو من البيت رحت وياهم ساعدتهم البيت حلو والجيران ناس اوادم وكلهم واصلين حته جيرانه بهذيج المنطقه خوش ناس بس اسماء خلتنه انضوك المر ...

شذره تعبت جثير وتحس بتقلصات وهي بنهايه السابع رحت وياهه للدكتوره كالتلهه الطفل نازل ولازم تنامين ع ظهرج وتمتنعين عن الفراش...

كمت يوميه من اجي من الدوام انزل يمهم وفارس المغرب يجي ياخذني يكول احسن ما تختلطين بامي يدري بيهه واكثر من مره سمعهه...

بيوم من عدهن جنت اعزل بغرفتي ودك التليفون شذره بس كلت الو اجاني صوتهه كالت ثريا بسرعه خلي فارس يجيبج وتعالي..

... شكو يولي جفلتيني شبيهم اخوتي؟؟
... مابيهم شي بسرعه تعالي نيران بالمستشفى وقيس كال خلي تجي ثريا يريد ياخذج ويا...

... بسرعه بدلت وخابرت ع فارس جان طالع كال راح ادزلج سايق وصلت لاهلي لكيت الحجيه كاعده تنوح وتصيح يا مظلومه يانيران...

... كابلتهه وكعدت كتلهه شكو جده وكعتو كلبي شصاير؟؟

الحجيه... يولي يثريا خابرو ع قيس واحد من ربعو كايلو قريت اسم بنت عمك بالمستشفى وركض قيس عبالو يلحك بيهه ...

طلعت نيران مريضه ياثريا وطالعتلهه ورمه بالثدي والورمه موحميده وعارضيهه ع طبيب ويكول الا عمليه...

راحو اخوتج وانه ما اندل وعافوني ادك على ايوب مايرد امشينه انروح انه وياج ...

ادهم راح وخاف يدحك امنيه ويصير العزا عزاوين امشينه يمه اناجر سياره ونروح...

ثريا.. اخابر بفارس ودموعي تجري لطفك ياربي اندور الراحه ونسمع بيهه ماندحكهه اخذت اذن من عندو وكال انه امرلكم بالمستشفى....

طلعنه انه والحجيه والطريق كلو نبجي عليهه مادحكت شي من عمرهه من العز للذل طول هاي السنين...

وصلت للمستشفى وركضت على الردهات اندلهن جنت اداوم هين تلكاني ايوب شايل بيدو علاكه ادويه...

ايوب.. بسم الله اشجابجن منو وياجن؟؟
... محد ويانه اجينه باجره سولفنه شبيهه نيران...

... هسه راح نحولهه للسونار الاخير ويقرر روحي ثريا ولا تحجين حرف ويا نيران حالتهه النفسيه تعبانه...

امشي وامسح بدموعي تلكتني دكتوره وياي سلمت عليهه وسالتني شتسوين هين كتلهه عندي مريضه...

وصلت  للغرفه الي بيهه فتحت الباب والحجيه وياي وادحك نيران الي لاحهه شرار من اسمهه ...

ضعفانه وصايره حلوه جثير بس مختفي كلشي بوجهه لا شعاع ولا امل مجرد ملامح مسيطر عليهه اليأس..

حضنتهه بقوه وابجي والحجيه نفس الشي بس مابدلتنه الحضن بس دموعهه تنزل وتمسح بيهه بكف ايدهه...

لزمت ايدهه وبستهه وبستهه من راسهه ومسحت دموعهخ بايدي ...

... نيران منين اجتج لاتخافين مانعوفج وحدج؟؟
... هزت راسهه باسى وحجت بصوت مبحوح وكالت شكرا ..

استفسرت عن حالتهه من الطبيبه كالت عدهه ورمه بصدرهه ولازم ينرفع الثدي كامل لان الورمه مو حميده وماننصح بالتاخير ولازم تاخذ اشعاع بعدهه ...

كعدت يمهه وانه ادحك عليهه دك تليفونهه امنيه جاوبت امنيه واسمعهه دكلهه هنا بيت عمي كلهم وكأنو جاي تكلهه ادهم هين ...

اسمعهه بوضوح كالتلهه لاتجين اذيتي كافيه ما اكدر اشوف اذيتج يا امنيه لاتجين خلي بيبي تجي يمي...

... حسيت بالغربه العايشاتهه ومايمهن لا ام ولا وحده من الحبايب وانه حاسباتني غريبه ...

بعدني كاعده واندك الباب ايوب وقيس هي بسرعه دنكت راسهه وقيس كالهه ماعندج غير العافيه جاوبتو بهدوء وسكتت...

ايوب.. نيران عمليتج اذا ع العام بعد شهر واذا ع الخاص بعد اسبوع استعجلي لان التاخير موبصالحنه...

نيران.. اي بكيفك ايوب بالعام بالخاص بكيفك بس ما اريد اموت امنيه ما اكدر اعوفهه ...

حجت هيج وبجت كلنه بجينه وياهه وقيس يحاول يخبي عيونو الي اكلتهه وابدو يضمهه داخل جفونو...

قيس.. كولي يا الله جثير سوو هاي العمليه وطابو توكلي ع الله وان شاء الله ماكو غير الخير...

ثريا.. كوه طلعت هاي الكلمات من عندو وطلع اجه فاروق وادهم اطمنو عليهه وادهم يدور بعيونو على امنيه بس ما اجت ولا وصلت اعتاب المستشفى...

كلنه خايفين على نيران بالفحوصات عدهه فقر دم وعدهه بدايه التهاب الكبد الفايروسي وهذا المرض...

بحيث ماكدرت ارجع للبيت بس هي ماقبلت وظلت الحجيه يمهه واحنه رجعنه...

خسارة قيس بيهه وماتكبر خسرهه ورجعت كدامو وخسرهه مره ثانيه وضيعهه وهاي المره الاخيره...

نيران لو ترجع لحضن الحياة لو راح تغادر الدنيا وهي انسانه مظلومه وضاع شبابهه ....

يتتتبع..... متابعه شيقه