رواية ازمة ضمير الفصل الثامن وخمسون 58 - بقلم Rozaya1122

ازمة ضمير ... البارت الاخير
«للكاتبه روزايه»

خايب .
الفرگة  خمر
واحنه وادم نعرف الله
شجابنه عل سيئات
....

ثريا.. امنيه جانت كاعده وتفاجات باسماء خفت عليهه تتخربط كمت لزمتهه كتلهه تعالي للغرفه ماقبلت ظلت واكفه..

اسماء مدنكه راسهه وايدهه ترعش وعمتهه ساندتهه بدت تحجي بصوت متقطع والرجفه واضحه عليهه..

بدت تسولف من اول يوم تعرفت بي ع ادهم لحد هذا اليوم وهو تحجي بكامل التفاصيل ...

شلون مشت بدرب السحر وشلون باكت فلوس عمهه وشلون اذت امنيه بالسحر ...

جانت تحجي وتبجي وشلون متندمه وتطلب السماح طلعت علاكه متروسه بس ملابس ادهم وتصيح هذني الملابس اشكال سحر مر عليهن...

كامت تصرخ وتصيح اني اذيته اني احبه واريده اليه انتي امنيه ربحتي واني خسرت اني احب ادهم وتبجي وتصيح..

امنيه جانت واكفه يم الدرج ودارت وجهه تريد تمشي بس صاحت اسماء امنيه ابريني الذمه انه مريضه ابريني الذمه..

امنيه التفتت عليهه وكالت يوم القيامه اخذ حقي من عندج وعافتهه ومشت..

ظلت اسماء تتوسل بينه وتطلب السماح رادت تنتظر ادهم بس ماقبلت عمتهه ..

الي عرفنا اسماء مريضه ومرض مايعرفو شنو؟؟ يكولون ما خلينه طبيب يعتب علينه ويكولون مابيهه شي بس هي مورمه وكلياتهه منفوخه عبالك شايله جنطه جواهه..

استغفر الله الحجيه دكول هاي من اعمالهه انكلب السحر عليهه وياما ناس اتهدمت من ورا السحر وحته ناس ماتت ..

اخذنهه وطلعن انه ماحجيت بس كتلهه الله يسامحج رحت ادحك امنيه خاف بيهه شي دكيت باب الغرفه وطبيت..

لكيتهه واكفه تكوي بقميص ادهم حجيت وياهه حاولت الطف الجو جاوبتني عادي كالت لاتفكرين مهتمه الصار صار وماكو داعي احزن على ماضي..

الي اطلبه من عندج ياثريا هذا الموضوع سدي وابد لاتذكرين اسماء كدام ادهم ولادكولين اجت اني ماراح احجي ماريد ولا ثانيه تمر بحياتنه ومزاجنه معكر ..

ثريا.. رغم صغر سنهه بس احسهه عاقله وتفتهم اكثر من عندي وانه جنت متحضره بس يجي اسولفلو واصلا دكيت علي ومارد ...

نزلت جوه وبديت احضر علمود نطلع ورا الظهر حسب ماواعدنه ايوب..

تغدينه وبدلنه وكلنه متحضرين اجه ادهم ماقبل امنيه تروح اسمعهه دكلو ازعل عليك وهو يكلهه هو انه اريدج تزعلين؟؟

تالي ماخلاهه تروح وكالهه اختاري تريدين وياي تريدين وياهم وتالي مااجت ويانه وراحت ويه ادهم ...

زينب ماقبلت تروح على صدمه البارحه انه من يمي كلبي محروك ...

راحت ويانه ياقوت تونسنه جثير ونسه ماصايره شويه كدرنه نغير جو ايوب عافنه وراح ولكينه عائله هناك تصير  كرايبنه من بعيد وتونسنه وياهم..

بحيث رجعنه للبيت هلكانين من التعب كال ايوب حته بعد مادكولن انريد نطلع..

ثاني يوم عمتي راحت لبيتهه بعد ملحت زينب وخلصتهه بس بواجي وتريد ترجع..

ماتحملت اسكت رحت لايوب حجيت ويا يخصوص زينب بعدني هستوني حجيت زكح بيه وكال اطلعي من هين ماعوزني تمسلت...

... ليش تتهرب شبيهه البنيه مادحك عيونهه شلون تحبك..

... ثرياااااا اطلعي برا منو كالهه تحبني انه مافيدهه ..

.. اصحه ايوب جاي تعاقب نفسك عليمن التحبهه ماتت وصار سنين راحت لازم تعيش..

.. راح ابتلي بيج والله امشي من هين ثريا ولاتفتحين هاي السيره كدامي..

ثريا.. طلعت من عندو ولايتفاهم عصبي خلي يظل حابس نفسو بهاي القوقعه ...

رحت خابرت قيس حجيت ويا شويه زين وكال هين العيشه حلوه بس الفراك صعب ..

فارگتكم مجبور ثريا لاتتوقعين مرتاح ولا تتوقعين اخوج راح يعيش بسعاده..

ياريت اكون مثل هاي الناس تحب وتنسه وتكمل وتتزوج بس انه ظليت اداري بكلبي لا اكدر انساهه ولا اكدر احصلهه..

.. جان يحجي بصوت مكسور ومبين علي مامرتاح بس جانت بغداد سجن بالنسبه الو بعد فراك نيران..

تمر الايام سريعه والحال مثل ماهو وامنيه بشهرهه وتنتظر شوكت الله يسهل ولادتهه...

اخذت سونار وصحه الطفل زينه وبيهه ولد بس ندعي تكوم بالسلامه لوعتنه بهيج حالات ما تنسي..

فاروق مكرس كل وقتو للشغل يجي يكعد ويانه شويه ويصعد لغرفتو لو يطلع بشغل ...

...

سنه ٢٠١٨ / شهر السابع...

حكمت المحكمه حضوريا على المتهم فلاح شاكر ال.... لمده 15 عام ..... رفعت الجلسه..

هاي الكلمات الي جانت تصدح بقاعه المحكمه سب عمي فلاح وتهجمه على فاروق والشرطه لازمتو وهو يهد علي ويتوعد..

احنه الحاضرين جنه من ضمن الشهود على قضيه نيران طول هاي السنين وفاروق يشتغل بصمت .

اسنين وهو يدور ويجمع ادله على فلاح بحيث قوه فلاح ونفوذو جبير احسن المحامين مخلي كلو عصابات ومافيات يشتغل بيهه..

حته رشاوي دافع وكل مره يطلع من عدهه بس هالمره صارت القضيه بيد فاروق وجان حالف يدمرو ويخلي يتوسل الرحمه..

احذو وفلاح وهو يهدد بفاروق ويكلو ما اكتلك بس راح افجعك ...

جان فاروق هيبه وكاعد حته المحامين واكفين بعيد وكلمه سيدي اتلوك الو وهم يناقشو ويحاورو...

صافنه ع اخوي هذا الجبل الهادئ محد يعرف بداخلو شنو من براكين محد يعرف روحو تحترك باليوم الف مره ...

رجعنه للبيت وهاي اول علامه نصر وكل ظالم لازم ياخذ جزاؤؤ ...

امنيه حست بالولاده وبساعات متاخره من الليل وبيومهه انخبصنه والكل يدعي تطلع سلامات بس الحمدلله الله سهل ولادتهه وجابت ولد ..

فرحانين جثير وسمينا علي وعمر زعلان يكول انه اريد تسموني علي احب اسم علي وصيحولي علاوي..

خلصناهه ضحك ويه عمر الي مصر على اسم علي ويكول بعد عمو اوس يجيب ولد. ونسمي عثمان وعمو ايوب يسمي بكر وتصير عدنه الخلفاء الاربعه ويكعد يعدد بيهم...

ايامنه عاديه وحالهه حال كل بيت عراقي اكو حزن دفين واكو ايام فرح..

ملينه من ايوب الي مايرضه يتزوج لحينه جثير وهو قافل مايفكر بالموضوع ابد...

قنعو فاروق يرجع يكمل دراستو ماقبل بس بعد ايام وفاروق كالو ازعل عليك يله اقتنع ورجع للكليه القانون ...

انه مثل حالي جثير ناس تتقدملي بس ما اقبل جربت مرتين وفشلت هيج معززه مكرمه بجال اخوتي احسنلي جثير..

يوم من عدهن كاعدين واجه ايوب كال اليوم تفاجات بشي..

اليوم رحت ويه صديقي رجلو مكسوره وراد يجبرهه وهناك ننتظر السره..

وادحك الناس مخبوصه واكو ممرضات يحجن وانصدم باسماء تركض بالمستشفى وفاقده عقلهه ..

حسب الي سمعتو من الموجودين يكولون هاي البنيه مخبله وكلما يجيبوهه لومريضه لو تضرب ابره تطلع تركض وشكو واحد كدامهه تضربو..

الحجيه.. دخيلك ياربي هالشابه شعملت بروحهه..
.. اي والله جده انقهرت عليهه شلون لعب بعقلهه الشيطان وشلون خلاهه تمشي بهيج درب وتاليتهه خسرت كلشي..

منظرهه يقهر شابه مثل الورد متخبله ومحد يعرف علتهه من طلعت تلكاني عمهه يكول حاير وين اوديهه وع اساس يوديهه لمستشفى الامراض العقليه..

يكول امهه متوفيه واخواتهه متزوجات واخوهه مايريدهه يكول ما اتحملهه وعمهه مقدم اوراقهه للمستشفى واحتمال يوديهه..

الحجيه.. يايمه من العز للشماعيه راح عقلهه من ورا اعمال الشيطان ..

.. والله ياجده لوكل وحده تمشي بهيج درب الله يعاقبهه بهيج عوقبه جان كلنه بخير ولاناس خربت ولا عوائل تهدمت..

بس بعدهن يمشن بطولهن ويمارسن اعمال الشعوذه صارت الي تريد تتزوج تروح تسوي عمل والي تريد تطلك تركض للسحارات ..

يابه هجمن بيوت عليهه العتب وزلم تمرضت والي تخبل من وراهن ..

ثريا.. ما اعرف انقهر لونكول حوبتنه بس صدك الله يشافيهه حبت الشخص الي مايحبهه واصرت تحصله بالقوه...

اكيد متندمه لان اعترفت بلسانهه بايكه عمهه وعمتهه وكدامهن تعترف معناتهه متندمه ع كلشي...
...

الحجيه.. يول ايوب ابو الدكايك سمعت تريد تروح لاذربيجان هاااا..

... منين سمعتي؟؟

.. سمعت !! طلعت موهين يكلك هناك النسوان مكومه بالشارع..

... هسه وحد ايوب ماتخليني ادحك اتونس اشو الوادم شبعت وانه لسه من تطلع لقطه بالتلفزيون اكوم ارجف..

... عمة عينك انت ترجف شو ليل نهار مدحك بالتليفون وتكلب بي اشكال ادحك ...

.. شدحك ياجده لايغرج كلامي ترى انه رجال اخاف الله صايم ومصلي خوما اروح ادحك اباحي..

..والله ما ابعدهه يا ايوب المثلك صابر بدون زواج شمصبرو..

... استغفر الله يجوز ماتصدكيني!! بس قسما بالله مايوم دورت هالسوالف انه ع ساعه مودع ورايح شكل لمنكر ونكير ..

بس انتي دومج ظالمتني وماخذتني بالسوء وانه مالي شغل بالسوء مريت اشوفه!!!

الحجيه.. دهر يابه هم ادحكك عريس يول منو هاي التسد حلكك وتغرك بالعسل..

... جان كاعد وبيدو خشبه ويكشط بيهه بالسجين ويحجي وياهه..

ماكو ياجده هذا الكلب مات انعل ابليسه حجاره ومحطوط مال الزمو هسه وادوس علي بلكي يصحه...

الحجيه.. ايوب يمه اعرفهه صعبه عليك تنذكر المرحومه بس من طلعنه من الرمادي مازرناهه هي وامهه ..

ايوب.. شلج بهاي ياجده انه كل شهر اروح بس من جانت اوضاع داعش كطعت ...

... هسه هي لو عدله والله تتمنالك الخير وماترضه هيج تفني عمرك وانت تعاني..

... رحمه لامه محمد هو بيدي والله جربت بس ماحبيت هسه عوفيني من هاي السالفه ..

ثريا اكو دكتور مال اسنان وياج واليوم حاجه فاروق وانه هاي جاي اكلج توافقين..

... منو هذا ؟؟
... واحد متزوج اثنين ومن كل وحده عندو ٤ جهال وانتي يريدج الثالثه وهو ترى يحب الخلفه يكول اريد تكثر بالنسل..

ويكول كلهن ابيت واحد لان هو من الطراز القديم ويحب اللمه بين نسوانو..

الحجيه.. خايب هسه هو هيج الي يحجي حته اذا تريد توافق من كلامك بطلت ..

ايوب.  انه ما اغشهه بس جاي اوضحلهه صفاتو الحميده ..

ثريا.. مقتنع بي انت وجاي دكلي؟؟ ادري حضي بيا طينه نايم..

... احنه اصلا طردنا وكنالو ماعدنه اخت بس فاروق كال كللهه خاف نوكف بقسمتهه..

.. همزين رفضتو انه ماريد اتزوج شحصلت قبل حته احصل هسه..

... انه وياج انظل راس ع راس مثل القصه قبل تذكريهه جدتي تسولفهه..

ثريا..اي اتذكرهه جان جدتي دكول اكو واحد اسمه جبار واختو اسمه جبيره هذوله اتزوجو وهو ماتت مرتو وهي مات رجلهه...

وظلو راس ع راس لحدما ماتو وبس هي واخوهه ماقبلو يتزوجون ..

اتذكر من تحجيهه النه يتعاركون ادهم وايوب واحد يكل لثاني انه اسمي جبار وثريا جبيره ...

وجان ايوب يكتل ادهم بس بسبيل يصيحولو جبار ومن نسالو يكول مرتي ماتت ويكوم يبجي عود حزين هاي جنه مامتسجلين بالمدرسه..

ايوب.. ايباااا شلون ايام مرات يصير عندي زهايمر ماتذكر شي غير مقتطفات مدري المصايب المرينه بيهه نستنه كلشي...

ثريا... الخساره الجبيره تظل ملاحقتنه ومانكدر ننساهه ولانتعداهه واحنه ماكدرنه نكمل بسبب خسارتنه...

هاي حياتنه وهاي ايامنه الحزينه وايام الفرح كلهه شاركتهه وياكم ...

عايشين هسه بس كل واحد بينه داخلو مجروح بس اوس كون عائله وطلع بيت وحدو بصفنه وعندو شمس واسد..

وادهم بس علي وهسه امنيه حامل ٧ اشهر وعاييشين ويانه نفس البيت...

قيس بالغربه راح وبعد مارجع عايش بامريكا نتواصل ويا بس بعدو الحزن مالي كلبو...

نيران عايشه الحمدلله وماحصلت طفل بس ابن خالهه زين وياهه ...

ام شذره وامل وامي  راحن للعمره وداهن فاروق والحجيه طلع اسمهه للحج بهاي السنه هي وفاروق...

ايوب وما ادراكم ما ايوب من شهر العاشر هو نايم بساحه التحرير لا مل ولابزع..

مرات نحجي علي نكلو شكو رايح كلشي عندك يكول شعندي الله يرضاهه راتب ادهم ٣ ملايين وانه ولادينار...

وفوكاهن متظاهر ويصيح اخوي يستلم ٣ وانه ولافلس هاي شنو من حكومه لو فاروق عوزو يشتري التحرير وانه عايش ع المجمع...

جذاب اكثر واحد بيهم عندو فلوس ايوب لان شغل المجمع والمحلات توسعت والاجارات كلهه عندو

بس ع كولتو نريد وطن نريد نسوان زينه ...

اكثر من مره تصوب بدخانيات ويرجع يكول متونسين ع ابو الشغب شعدنه ...

عمر بالرابع ابتدائي مدخلي بمدرسه اهليه وشاطر وعاقل ومتعلق بابو بشكل موطبيعي...

وفاروق حاليا اربعيني وماكو وحده كدرت تاخذ كلبو بعد شذره...

....

لهنا انتهت قصتنه وياكم من ازمه ضمير شفتو شلون الضمير معدوم بهاي القصه وابطالنه شكد عانو ورجعلهم حقهم..

ابد لا تتوقعون الظالم يستمر بظلمه لازم يجي يوم وياخذ الجزاء العادل وابسط مثال اسماء وفلاح..

اتمنى استفاديتو من القصه الي تناولت هوايه مواضيع بمجتمعنه واتمنى كدرت اوصلهه بالصوره المطلوبه واكون اسعدتكم اكثر مما ابكيتكم...

انتظروني بقصه جديده بعد استراحه واول ما اعلن عنهه بهاي القصه لذلك لاتحذوفهه من المكتبه حته يوصلكم اشعار....

اشكركم ع تفاعلكم ووصول القصه للمليون بفضلكم

خوب اني الكاتبه شبعتهم غزل صح مامبينات الصور بس تفي بالغرض احسن ماتبقون تتخيلون ... احبكم

""""" روزايه """""""