رواية ازمة ضمير الفصل السابع وخمسون 57 - بقلم Rozaya1122

ازمة ضمير ... البارت الاخير / الجزء الاول
«للكاتبه روزايه»

لا رضينا نعيش چذبه
ولا تونسنا بصـدگ
ولا عشـگناهم واخذنا
ولا اخذنا بلا عشـگ
...

ثريا...  لكحت المصفي من ايدي وركضت حافيه لشارع وامل طلعت بثوبهه وهي تصيح يايمه وليدنه...

طلعت بدون شعور وادحك الناس متجمعه موجثير قليله لفيت حجابي زين واركض ورا امل وكعت على رگبي وانه اصرخ بعلو صوتي..

وليدي عمر غركان بدمو ومغمض عيونو ومحد من اهلو يمو وين عمامو وينكم اخوتي...

ما جنت حاسه باي شي بس صوت صريخي ولحكتني الحجيه وام شذره ما مستوعبه اي شي بهاي اللحظه شلون طالعه بثوبي وشلون كاعده بنص هاي الزلم..

رجال جيرانه صاح جيبو سياره خلي ناخذ الولد بلكي بي روح جنت ضامتو على صدري واديه غركانه بدمو...

ما احس غير ايوب اخذو من حضني واتفرقت الناس وام شذره وامل ركضن ورا السياره ..

كل الي اتذكرو انخلت ستره ع اكتافي وصوت رجال كال فوتي جوه مايصير يا اختي ...

التفتت علي ابراهيم صديق ايوب سترني بسترتو لان ملابسي كلهه دم ...

طبيت اسحل بروحي للطرمه كعدت ادك على رجليه واملخ بنفسي بعد يامصيبه مالحكتنه يامصيبه ماوكعت ع راسنه..

اصرخ بصوت عالي شسوينه ياربي شنو هالعقوبه الي ماتخلص كلشي حلو اخذتو من فاروق ماصايم؟؟ ما مصلي؟؟ مو ينطي من ايدو مو يساعد جثير ناس ...

دكيت ولطمت لحدما حيلي انهد ورجعت اتعوذ من الشيطان واستغفر عماتي يمنه كعدن كدامي وينوحن ..

ماكو فرحه دامت النه ولا يوم عدت فرحتنه لازم نتلوع ولازم انضوك المر بعدنه شباب وشيبنه من وقت ..

ايدي ترجف وما اكدر اتصل بفاروق اكيد هسه عرف شحال كلبك يا اخوي انت بعدك مانسيت امو وانوبه عمر..

كمت بدلت ملابسي وانه دموعي ماوكفت واتوسلت بعمو ابوحسن ياخذني انه وعمتي رحت وراهم للمستشفى..

ماكدرنه انفوت من الهوسه وكلهه زلم وشباب وشرطه مكلوبه كلاب..

عندي هويتي كدرت اطب بيهه امشي واسمع الناس تسولف ويكولون شكو اليوم منو ميت مكلوبه المستشفى..

اريد اهد عليهم واكلهم محد مات عمر مايموت اذا مقدر علي ياربي اجعل يومي قبلو ولاتفجع فاروق..

كوه كدرت اوصل للممر المجتمعين بي بس ماكدرت اطب خفت من اخوتي بس دحكت ضباط واكفين وناس شخصيات ماكدرت اوصل ..

رجعت اسال الممرضات كل وحده دكول شكل بس وحده كالت هذا الطفل عمر طببو للعمليات ومدري شيشتغل ابو المستشفى انكلبت صار ساعه..

ماكدرت اكلهه هذا ابو ما دحك الفرح بحياتو من هو وصغير لهذا اليوم مشلوع كلب ماكدرت اكلهه ترى مايملك من هاي الدنيا بس هالولد ...

مرت ساعه ونص وانه كاعده بالممر انه وعمتي كامت تطلع هاي الزلم والضباط وانه عيني بلكي واحد من اخوتي يجي وادحكو..

كاعده واداري بدموعي التنزل بحرگه وادحك قيس الي الصبح التحق اجه يركض وشكو واحد كدامو دفعو وهو يركض على جهه الممر ..

مالحكت اصيحو ولاجايبه تليفوني وياي وظليت انتظر بلكي واحد بكلبو رحمه ويطمني..

حيلي خلص وروحي بدت تشتعل وكلشي توقف عندي بهاي اللحظه اتمنيت انه الي مضروبه ولا عمر الي يخاف من الابره ...

كاعده وفات ادهم الجكاره بحلكو والتليفون على اذنو يخابر بسرعه كمزت ورا من دحكني سد التليفون وعاط بيه شجابج..

ثريا.. ادهم هسه اذب روحي جوه السياره كلي عمر بي شي..

... امشي ثريا ارجعي ويه ابو حسن وعمر بالعمليات وحالتو خطره لا تخلين فاروق يعصب وهو اصلا مايدري بنفسو..

... طب ادهم وانه وعمتي طلعنه للسياره صعدنه وادحك سيارة   نزلو منهه زلم بعمر فاروق واكبر واشرو لواحد من حمايتهم وكالوله خابرو السيطرات تحجزهه ...

عمر طلع يلعب بالباب ويوميه يطلع لان شارعنه ماتفوت بي سيارات جثيره وحته موشارع عام هو فرع وكل الجهال تطلع ...

والضربو مارجع علي ضربو ومنهزم وعاف هاليتيم غركان بدمو والناس مجتمعه فوك راسو..

رجعت للبيت نصبتهه عزاا تحول عرس ادهم وفرحتو لمصيبه ادك ع رجليه وابجي وامنيه كدامي تبجي وياي ومنا ياقوت...

لليل واحنه ع فد صريخ ولوعه والجيران ناس رايحه وناس راجعه ياقوت خابرت ع اوس كالهه موزين فاقد وراح ننتظر ٧٢ ساعه يكول الطبيب حتلو يكعد يظل معوق ..

بعد شتتحمل يكلبي يالوعات تتحملهه هم بعد يمر خيط الفرح وهم يضحك سني على هاي المصايب الي جابتنه تركض ورانه من عمري سنه ...

محد رجع بهذاك اليوم ولا ظل دمع بالعين ساعه ندعي وساعه نبجي وساعه احاجي ربي ليش هاي الفواجع بس لفاروق..

ثاني يوم ويه اذان المغرب ودك اوس واسمعو يكل لياقوت بصوت عالي يكلهه راح يروح اخوي من ادينه يولي فاروق بلانعاش...

ولا انسه هذيج الساعه فريت مثل الطير المذبوح على فد ركضه من باب البيت وارجع للمطبخ بدون وعي ...

ادعي يكوم عمر يوكع فاروق كمت ادك بالباب اريد ابوحسن يفتحو وماقبل موصي اخوتي محد تطلع من عدنه..

امنيه .. ثريا فقدت لازميهه وهي تضرب برجليهه بالكاع وتصيح اخوووي ..

صحنه وردنه من ابوحسن وماقبل كال وين تروحن مايقبلون هسه اخابرهم..

انطه التليفون للحجيه حاجت قيس كالتلو مابكلبكم محنه ع اختكم فرفح كلبهه تعالو لثريا ...

وصدك نص ساعه واجه قيس يريد يلمهه بحضنه مايكدر قويه حيل وجانت منهاره ماتدري بنفسهه شتسوي..

ادهم كالي وماكدرت اكلهه فاروق من سامع كلام الطبيب على حاله عمر كال ظل كوه واكف رغم ضغطو معلك وماقبل يعوف باب العمليات ...

لحدما متخربط وماخذي للانعاش كايلهم ضاربتو ذبحه صدريه وضغطو معلك رغم العلاج ومانزل ابد ..

فهمهه قيس بان فاروق مابي شي تعرفين فاروق جبل ويتحمل لاتخافين شويه ارتفع ضغطو بس هسه زين ..

كوه كدر يقنعهه بس ماكامت ولاتحركت من مكانهه اباب المطبخ ومنهاره فدمره ..

تليفون قيس ماسكت تالي عافنه وراح وثريا بلاشعور اندارت ع امهه وصرخت بيهه..

ثريا.. انتي مو ام انتي مودعائج مستجاب شكو كاعده كومي ادعي يرجع اخوي وابنو..

كومي كليلو خلي ياخذنه انه وياج ويرجعهم اذا انتي ام كومي رجعيلي اخوتي ...

امنيه ..امهه من حلاة روحهه وحركه الكلب كامت ويه الاذان وكفت بنص الحديقه وشكت ثوبهه وهي تصيح انه ام اخذني ورجع ابني افدي بعمري ...

ماساه هذيج الايام ولا اكدر انساهه محد هدء ولا احد وكف دمعه بس نباوع لثريا نتخبل بالزايد ٣ ايام وهي مامخليه شي بحلكهه ...

عدت ٧٢ وعمر منتبه شويه وطلعونه سالفه جديده لازم يشيلون الكلى وحده منتهيه نزف ووحده تعبانه ولازم يدبرون متبرع..

كلهم عمامه كالو موبس نتبرع بالكلى بارواحنه نفدي بس كالو لازم نفس العمر وكلى مال طفل وما خلو مستشفى ومحافظه تعتب عليهم محافظات العراق وحده وحده افتروهه...

ماغمضت عيونهم ابد ومالكو كلى كال فاروق بملايين الدنيا اشتريهه حته نشرو اعلان حارو شسوو ومالكو..

ثريا... ماكو متبرع نفس العمر وقريب علي ومايصير احنه لان كبار ماتتوالم اخر شي قرر فاروق يطلعو للهند بعد مادزو التقارير ولكو كلى بس بمبلغ عالي ماينوصف ..

من المستشفى للهند اخذو عمر شهر دحكت الموت بعيني ولا اتمنى اكمل حياتي ولا اريد اعيش بهالقهر...

...

اليوم اجه عمر من الهند شايلو فاروق وهو ضام راسو بركبة ابو ويصيح اااخ بابا العمليه توجعني..

لزمتو من اصبع رجلو لحد راسو ابوس بي واشم وارجع احضنو وابوسو وهو يكلي عمه خنكتيني شبيج ما شايفه ...

احس الروح ردت بيه تروحلك فدوه عمتك وعشيرتهه يا وليدي السبع ...

ادحك ع فاروق كبر عشر اسنين بهاي الضربه عماتي رجعن لبيوتهن وبيوم الي اجو كلهه اجت تتحمد ع سلامه..

جان مار ع عرس ادهم شهرين وحللت امنيه وطلعت حامل بيومهه رجعنه انه وياهه من المختبر وادهم مايدري..

امنيه.. احس باعراض الحمل بس حيل خايفه من سكري وخاف ياثر ع الحمل رحت ويه ثريا حللت وطلعت حامل ..

فرحتي برغم ماهي جبيره بس بداخلي خوف واخاف اخسر حملي وخاف وخاف حته احس الفرحه ناقصه..

ادهم تعب بهاي الشهرين عمر اثر ع البيت والكل عاش ايام سوده وقليل الوصف بحقهه من حزن ومعاناه...

رتبت الغرفه وسبحت ولبست دشداشه قصيره وفتحت شعري مكياج خفيف وكلساع اباوع ع نفسي واصلي ع محمد اكول صايره حلوه مدري لان فرحانه احس كلشي حلو ...

اسمع سيارة ادهم ومتعوده اني اتلكا بس هالمره مانزلت شويه وانفتح باب الغرفه واني جنت كاعده ع الجربايه...

جان شايل علاكه بيده خلاهه ع الميز وتقرب عليه وهو يمد ايده ع خصري ويغمر راسه بركبتي..

يشم بيهه ويبوس وهو يكلي اليوم من وقت متحضره ؟؟

... ااي اريدك تظل يمي ماتنزل جوه بس نتعشه ونرجع..
... شلون ننزل وانتي هيج لابسه يحجي ويشم بركبتي ويدغدغني بلحيته..

... البس فوك هذني وننزل نتعشه ونرجع بسرعه حجيت هيج وابتعدت من حضنه وهو ينزع بقميصه ويباوعلي ومبتسم..

طلعتله تراك  من الكنتور لبسه واني لبست دشداشه طويله وضبطت حجابي وخففت الحمره ونزلت..

لكيت ياقوت تشيل بالمواعين للسفره كمت ارتب وياهه ويوميه لازم انسوي لعمر اوزمو وحليب كلهم كعدو واني سويتله واجيت..

لكيت ادهم عايفلي مكان اكعد بي بصفه ردت اخذ عمر اوكله بس بعد الحادث حيل تعلق بابو بحيث يكعد بحضنه وياكل وهو شابگه من ركبته. .

صاير زعول وحساس حيل رغم شكد مدللي وشيطلب وشيريد بس دائما زعلان واقل ماواحد يحاجي تنزل دموعه...

كملنه عشا واني اعد الدقايق شوكت نصعد للغرفه واخبر ادهم واشوف فرحته استحيت ورا العشا بسرعه اصعد كعدنه وياهم شويه..

الحجيه.. فاروق يمه اليوم خابرتك عمتك باجر تجي رجلهه عندو شغل بالبصره يظل شهر ودكول اريد اجي يمكم ..

وانه كتلهه هله بيج انتم تحبوهه هاي عمتكم ماعدهه اذيه ..

فاروق.. هله بيهه عدهه جهال زغير بلكي عمر يلتهي وياهم..

الحجيه.. اي جده عدهه جهال صغار وعدهه حمامه تخبل بس الغراب مالتنه مايدحكهه..

ايوب.. انتي كلتيهه غراب صدك اثول لان مايدحك للحلوات..

الحجيه.. اسمع ايوب عمتك حاجتني وكالت اذا يريد من الصبح انطي تحرك يول البنت حلوه ودارسه شتريد بعد ..

وابوهه يريد يزوجهه لان ناس مهجرين وكاعدين اجار ويخاف عليهه من هالزمن ..

ايوب.. ومنو كالج ايوب الشاب العراقي الوحيد اعزب خير من الله ويروح يزوجهه. 

.. لاتخلينه نحجي البنت مبينه هاويتك لاتظل ويه الماضي التفت على حياتك ..

ايوب.. اكلج حجيه ماتريدين زلابيه راح اطلع ..

الحجيه.. ظل انت توكل بينه حلا وكلشي مامحصلين بس السكر..

ايوب.. عجل شسويلج منين اجيبلج ويه الحلا اكعدي عاتبي المرحوم ..

الحجيه.. كون عمري طويل وادحك التاخذهه منو وشلون تتحمل سوادينك ..

ثريا.. عمر بحضني وايوب اداهر ويه الحجيه وطلع وقيس استقال نهائي وبده يحضر بغراضو شكد حجينه وشكد توسلنه بي جان قافل ...

امنيه... صعدت للغرفه لكيت ادهم مدد ع الجريابه ويدحك تلفزيون اخذت الخاولي ورحت للحمام ..

غسلت وبدلت لبست كيمونه ربع ردن وشورت فوك الركبه قماشهم حرير ولونهم بنفسجي غامق ولبست فوكاهن الروب وطلعت..

من شافني عدل كعدته وفتحلي ايده كتله بس امشط شعري ..

.. تعالي يولي ياشعر انه امشطه الج بعدين ...

.. تقربت علي وخليت راسي على صدره جان لابس تشيرت ابيض ربع ردن وبي علامه صح بصدره ..

اعرف ادهم يدغدغ من صدره مديت ايدي من جوه التشيرت وبس خليت ايدي بسرعه لزمهه ونكلب فوكاي..

كمت اضحك وهو يدغدغني من ركبتي ويبوس بيه وايده تتحرك ع جسمي ..

بديت افقد السيطره نهائي وهو استحوذ ع كلشي حته نسيت اني ع شنو اريد احجي ..

كل ليله ويه ادهم اني اعيش شعور جديد واحساسه ما اكدر اوصفه ..

خاصه من يلتحق ويجي احسه مثل يوم العرس واكثر يجي محمل لهفه وشوك..

تعمق اكثر وصلت قريب ع الاستسلام مدنك يبوس بشفايفي ابتعد عنهن وخلا راسه ع راسي وواحد ياخذ انفاس الثاني..

كدرت اهمس بصوت مقطوع ومسلوب الاراده وعيوني بعيونه كتله ادهم اني حامل..

بلاول ما استوعب الخبر بعدين انهال عليه بوسات من كل مكان مثل المحروم وعبالك هستوه شايفني...

كعد ع حيله ولبس التشيرت مالته ورجع اخذني بحضني وهو يبوس براسي ويكلي فرحتي ماتنوصف بيج ..

ادهم.. فلتي هاي الليله ومنا وهيج تعال اخذ حذر موخوش سالفه..

.. لابس الاشهر الاولى غير علمود ابنك..

.. لا يابه يا ابني وابو شيصبرنه امنيه اني ليل نهار مشتاگلج ..

مدحكه شيصير بيه بالدوام اطلع قهري بالجنود والضباط ذاك اليوم واحد كالي سيدي دخيلك انزل لان كمت ما ادحك شي بس بغداد يقصد عليج..

وحقهم اكوم اخبط بيهم وهم مايحجون يكولون مثلك احنه نعاني وخاصه بيوم الانذار عوزهم يدعون عليه..

امنيه.. اني هنا هم تصير بين عيوني والايام تصير طويله ماتخلص..

... ان شاء الله اذا ترقيت راح انتقل هين كلت لفاروق يدبرلي واسطه ويحولني ع استخبارات بغداد تعبت من الدوام..

... خليت راسي بركبته وابوس بي وهو يكلي شلون بيج يامره ارحمي حالي ترى ابني بعده جديد ومامتعود ع الوضع...

ظلينه بفراشنه نسولف ونتشاقه لحدما نعست اخذني بحضنه كالمعتاد وهو يلف ادي داير مدايري واغفه ع دكات كلبه...

ثريا... كعدت الصبح بدلت اريد اروح للدوام اني وامنيه نفس الخط ابو حسن ياخذنه وياقوت تكعد ويه اوس ..

ادهم ظل نايم لان ماعنده دوام وفاروق يطلع مرات ويانه وايوب بالطخات مرات يكعد ومرات يدز العمال...

جنت كاعده بالغرفه واجاني موضف كال دكتوره المدير يريدج اخذت تليفوني ورحت لكيت شكم دكتور موجودين والمدير العام ..

سلمت وكعدت جان جاي كتاب يحولوني لمديره مستوصف بمنطقه معروفه ببغداد ..

كالو خاف عندج اعتراض كتلهم لا بالعكس حلو الواحد يرتفع اسمو ويوصل وقعت ع الكتاب وكالو من الاحد لازم تباشرين هناك...

طلعت من الغرفه امشي بالممر وايدي بجيب الصدريه اكو فرحه بداخل فرحه انجاز صح الله حرمني من الاطفال وماعندي رجال حالي حال اغلب الوياي بس الله عوضني بشهادتي وسمعتي الطيبه ..

الله عوضني باخوتي وماخلاني يوم انذل وادنك راسي جثير بنات اطلكن وماكدرن يكملن وظلن يعانن بسبب سوء معامله اهلهن بس انه الحمدلله الله رزقني باخوان لو افديهم بعمري اكون مقصره..

رجعت للبيت خبرت اخوتي باركولي وكالو ان شاء الله للاحسن والله يعوضج عن كل تعبج ...

للعصر اجت عمتي ام بهاء عدهه بهاء الجبير متزوج بنت عمه ومسافر ويه عمه بتركيا وعدهه زينب واثنين جهال صغار بكد عمر ...

احبهه هاي عمتي نسخه من جدتي حليمه اتذكر اسنين وهس ماتجي لاهلهه لان مره ابوي زكح بيهه وزعلت..

جانت دكول عندي رجال عوضني عن الف اخو وموبحاجه اخوان مثل عماد وفلاح لذلك جانت ماتجي لاهلهه بالصدف...

انطلق عمر ويه الجهال واحنه كاعدين نسولف ونضحك ماسوينه عشه لان وصينه عمو ابو حسن يجيبلنه جاهز ...

الكل جان فرحان بامنيه لان حامل ومداريهه علمود سكرهه كل اسبوع تروح مراجعه للطبيب حته نطمئن ..

فرشنه السفره والتمينه وهاي جانت اخر ليله قيس موجود ويانه باجر الطياره مالته ..

وعدنه يرجع بس يستقر وللاسف اخوي طلع من بغداد وبعد ماداس اعتابهه ولا اشتم هوه العراق بعد..

ايوب ما اجه ع العشه واعرفه زين يريد يحب زينب ومايسمح لنفسه لذلك كام يتجنب وجودهه...

ثاني يوم ودعنه قيس بالدموع مامكتوبلي اعيش الفرحه كامله لازم ابجي ولازم احسن راح قيس وترك العراق بعد ما اندفن گلبو وحبو هين

شكد حجينه علي وشكد يلومون بي اخوتي بس العناد والكرامه الي عند نيران وقيس حالت دونهم..

امنيه وادهم حبهم تفوق ع كرامتهم وتنازلو وهاي يعيشون ايام حلوه ولو ظالين يعاندون جان هسه حالهم من حال قيس...

فتحنه الموضوع اكثر من مره ويه فاروق بلكي يتزوج بس جان عصبي من ناحيه هالشي ومايسمح لاحد يناقشه ...

الافضل نسكت لان لسه غرفتهه وغراضهه نفس الترتيب معناتهه اخوي ماناوي ينساهه...

يومين واتصل بينه قيس كال وصلت وزين ولايظل بالكم وويا اثنين من جماعتو ....

...
اليوم عشانه كبه برغل من ايد عمتي وايوب ماياكلهه كال سويلي بس جاي وياكل جبن وجاي..

كعدنه نتعشه وعمتي تسولف ع ايام قبل حسيت البيت بي روح رغم الاحزان المكتومه بكلب كل واحد بينه ...

انقهرت ع زينب صح ثكيله وما ادحك ع ايوب بس الحب واضح عليهه وهذا الحب التعيشه من طرف واحد وللاسف الطرف الثاني گلبو موالو...

ورا العشه جبت حلاوه وكيك وعصير شقه وسوالف وايوب لاول مره ادحكو حزين كلما تجي زينب ويتقرب اكثر يخيم الحزن علي من جديد..

جان مركز ع التلفزيون ومايدحك عليهه ابد بس موذاك ايوب الي الضحكه ماتفاركو ابد ...

انتبه علي فاروق وادحكو يشاورو وايوب ابتسم بعدين كامو اثنينهم طلعوا..

اخذت زينب للمطبخ اغسل مواعين واحجي وياهه زل الساني وسالتهه انتي معجبه بايوب؟؟

بسرعه كامت من مكانهه وتتلفت وكالت لا شنو هالحجي ثريا وعافتني وطلعت ما انطت مجال للحجي بس هي ارتبكت حيل ...

كملت مواعين ورحت للغرفه لكيتهه كاعده ويه ياقوت وامنيه بس دحكتني سوت نفسهه تلعب بالتليفون التهينه بالسوالف واخوتي كلهم طلعو ...

تاخر الوقت وياقوت اخذت شمس وراحت لغرفتهه وادهم اجه واخذ امنيه وصعدو..

وانه فرشت بالغرفه ونمت ويه الحجيات وزينب بصفي سولفت وياهه ع الدوام واخذتنه السوالف ورجعت سيرة ايوب انفتحت...

حجت بخجل وكالت انه من جنت بلانبار دائما خالاتي يحجون بيكم واعرف قصتكم بالتفصيل شكد جنت اضوج واكول لماما ليش مانروحلهم..

اعرفكم كلكم بس ماشايفتكم لحدما انتقلنه بكركوك وصار عندي حساب بالفيس وصدفه لكيت بابا مصادق قيس وكمت اتصفح بحساباتكم وشفت ايوب ...

ما ابالغ بالحجي بس كمت يوميه ادخل ع حسابه واتابعه ماينشر شي من بعيد لبعيد اتابع تعليقاته وافتر بحسابات اصدقاءه بس حته اشوف شي من عنده..

مره عمتي ام جاسم سمعتهه تحجي ويه ماما ودكلهه مابينه بخت وحوينه واحد من ولد عماد وماما دكلهه يوم المنى يخطبون زينب وين الكه مثلهم...

خاف اني جنت مامعجبه بايوب زاد اعجابي بي وكمت باليوم عشرين مره ادخل ع حسابه حته كمت اضوج من نفسي معجبه بشخص حته مايعرفني وبعيد عني...

لحدما عزمتونه ع عرس ادهم جنت فرحانه حيل واخيرا راح اشوف ايوب مبين علي مرح ومرات مبين من تعليقاته ببيت شعر يدل على انو هو حزين بس ما اعرف السبب...

من اجينه وشفته احس كلبي موبس كام يدك لا كام يركص من الفرح بعد اكثر من ميه مره احلى من الصور اريد اتحكم بنظراتي ماجاي اسيطر ...

واحس الكل انتبه عليه الا هو ولاعبرني رغم ما اجت عيني بعينه اكثر من مره بس بسرعه يدير وجهه...

ولاطخ السانه وحاجاني بحرف اشوفه عادي يحاجي البنات الباقيه الا اني فد ضجت بوقتهه وكلت يجوز عنده وحده..

بس بيومهه بنت عمتي ام جاسم سمعت البنات يمدحن بي ويكولن حلو واني اسمعهن وافور جان دكول ترى هذا كلبه مواله جان يحب قبل .

وكالت يحب بنت عمه وماتت وظل وراهه ما اتزوج وحته ترك الكليه وهو مرحله ثالثه لاتحاولن ويااا..

ومن كلامهه ماكدرت اباوعله بعد لان صدك حسيت گلبه مواله ولايهتم لاي وحده كدامه ...

بيوم الي اخذت من عنده المسواك نظرته جانت تخبل وعيونه سود وباوعلي بنظره ماكدرت افسرهه ولحد الان ابالي...

بس بعدهه ماباوعلي ابد وحته البارحه موشافني بس سلم بصيغه جمع وماحجه وياي ..

اعرف الي اسوي غلط واني متعلقه بوهم واخوج ماناوي يحب واني اذا اظل هيج اعاني واعيش الحب من طرف واحد..

قررت احضر حسابه حته بعد ما ادور بس ماما من كالت انروحلكم اعترضت وكتلهه ما اروح بس بابا كال اني عندي شغل يطول شهرين واخاف عليكم بكركوك روحو باي مكان موالا يمهم...

بس ماما مصره الا يمكم تريد تجي يم الحجيه واجينه واني لازمه كلبي خاف اتعمق بحب ايوب وما احصل شي...

ثريا... زينب ما اريد اضوجج بس ايوب مايحب وحته اذا حب يتعبج لان كلبه موالو ابد وكلما يريد يحب توكف المرحومه كدامو..

انتي بكيفج تكدرين تتحملي وتنسي شويه شويه لو تبتعدين من اول خطوه  ..

اني ما انصحج بحب اخوتي لان وفائهم زايد عن حده وكلهم عدهم حب سابق وماينسوون ..

هذا اوس دحكي اهدء واحد بيهم ومايعبر عن حزنو ولا عم فرحو حب ياقوت بدون علاقه هم جانت تجي يمنه وخطبهه وماقبلو بيت عمهه وراحت اتزوجت غصب عنهه لابن عمهه ...

ومرت سنين واوس لاحب ولازواج اعتكف نهائي مع العلم شكد ادور وراهم واسمع جثير معجبات عدهم وجثير بنات توددن لاوس بس هم قفل كلبو..

لحدما اجه اليوم الي اطلكت ياقوت ورجع اتزوجهه ضربتلج مثال واحد على وفاء اخوتي يعني اتزوجهه رغم طلاكهه وما اتنازل عن حبهه...

اخوتي يتعبون يازينب واتمنى تصيرين لايوب والله افرح وسعه  بيهه بس ما اريدج تتاذين ابد...

ثريا.. البنيه احسهه ضايعه وبعدهه صغيره عمرهه ٢٠ سنه وايوب عمرو 33 يعني فرق بيناتهم وبعدهه صغيره وتتعلق بسهوله...

ثاني يوم جانت عصريه واسمع ايوب يخابر بالمطبخ وانه انظف بالثلاجه ...

اسمعه يكول لصديقو يول الي يجي هسه ويكلي باجر عطله ابوسو من حلكو...

ايوب جان بيومهه يريد باجر عطله لان عندو شغل هو وفاروق ويريد عطله علمود فاروق يروح ويا...

سد التليفون وواكف يمشط بشعرو باصابعو كدام الجامه مال الشباك ...

واجت زينب على نيتهه كالت ثريا انطوهه بلاخبار باجر عطله...

انه سويت نفسي مامهتمه لكلام ايوب السمعتو بس هي تحجي وياي وهو مرتجي ع الكاونتر ويدحك عليهه...

انه ردت شويه اسويلهم جو عفتهم وطلعت بحجه ادحك عمر وعفتهم بالمطبخ بس ردت ايوب يبادر شويه ...

بس ايوب حجر مايتحرك بسرعه طلع من المطبخ وعيون البنيه ورا ...

بليل كاعدين كلنه وعيني تراقب بس بايوب اريد ادحكو بلكي ينتبه الهه بس ماكو يحاول يلهي نفسو باي شي..

صاحت عمتي زينب يمه كومي جيبي عصير برتقال مسويته كامل بس صبي..

رادت دكوم ياقوت وماخلتهه عمتي كالتلهه بنتج نايمه بحظنج خطيه لادكومين...

راحت زينب صبت العصير واجت تنطيهم الي كاعد ع التخم والي كاعد بالكاع كلهه ادحك تلفزيون..

دنكت الصينيه كدام الحجيه وامي كاعدات بالكاع ما احس غير ينلگح السويج بحظني..

رفعت راسي اجت عيني ع ايوب وهو يخزرني وياشرلي بعيونو بمعناتهه كومي انتي..

ابتسمت وكمت اخذت الصينيه من ايدهه وقدمت وهي كعدت بصف امهه عرفت ايوب لا دنكت ماقبل وهي جسمهه متروس...

الحجيه.. اكول يمه ايوب انت موكلت اخذجن للمزرعه شو ماخذتنه ...

ايوب.. وين يامزرعه؟؟ باعوهه ..

.. يااا عجل ماكو غير مكان تاخذنه خايب ضايجين وهذني البنات هم يريدن يطلعن ...

هاي ياقوت الله يعينهه لاطبه ولاطلعه اوس مسوي عليهه حجر ...

اوس.. جده وين اطلعهه هو وينو المجال هو انه ما ادحكهه غير بس بليل ...

الحجيه.. هسه انتم دوام هذا ايوب كلشي ماعندو مايقبل ياخذنه...

لازواج لا طلعه مدكلي شجاك من دون اخوتك ..

عمر.. بيبي عمو ايوب يحب وحده ؟؟

الحجيه.. مني هاي الوحده؟؟ عفيه بالسبع سولفنه منو يحب ؟؟

ثريا.. صاح ايوب يول عمر سد حلكك لا اكوملك بس عمر طفل وقشمرتو الحجيه وادهم يكلو اشتريلك بايسكل بس احجي

وخلو عمر كت الاول وتالي ع رغم فاروق يريد يسكتو وهو منطلق ...

ادهم.. شمدريك يول؟ ومنو يحب؟؟

عمر.. ذاك اليوم اجو ابراهيم وادم هيين وانه يمهم وابراهيم يكول لعمو انت موصاحي مخبل...

وابراهيم ...حته المات رجلهه اتزوجت وعدهه جهال وانت بعدك بمكانك...

ايوب ... هو قابل بيدي انه حبيتهه ومستحيل اكدر انساهه احس كل الي اسوي خيانه الهه وما ارتاح ..

ابراهيم... يول انطي لنفسك فرصه محد مات ورا واحد حب بلاول واذا كدرت تتزوج كمل حياتك عمرك موصغير..

ايوب.. البنيه حلوه وعاجبتني بس ماجاي اتقبل احبهه باي شكل من الاشكال بس راح احاول ...

فاروق.. عمر كافي شكم مره كايلك ماتنقل حجي تريد ازعل عليك..

عمر.. لا ما انقل بعد بس هو عمو ايوب يحب!!!

ادهم.. هاهي باجر من الصبح اخذك اشتريلك بايسكل وهذا عمك ايوب يحب!!!

ايوب.. جان مرتجي بكل اريحيه ولاهامه الكلام علي وبصفو كلاص العصير شارب نصو وهو يدحك عليهم ..

الحجيه.. ها ايوب طلعت موهين يول وتحب!!!

ايوب.. اااي طلع ايوب يحب!!!

ادري محسسيني حجاره بدون مشاعر شجاكم وانت عمر خلي ادهم يفيدك انه الك...

ثريا.. جان يحجي وصوب عيونو على زينب الي ماتعرف شتصرف بس مدنكه وتلعب بشمس ...

خلصت سهرتنه وكل حبيبين راحو لغرفتهم واحنه النه الله فرشت ومددت وهم نسولف انه وزينب جنت احجيلهه ع زواجي الفاشل...

تقريبا الساعه ب٢ بليل واسمع صوت ايوب وهو يگح مختنك شويه واكمز ع صوتو انه وزينب جان يسعل بشكل موطبيعي ...

طلعت من الغرفه لكيتو مدنك راسو بالمغسله ويسعل بقوه احس صدرو تشلع جان مختنك مثل الي غاص بنومتو ...

واكفه يمو بس يريد ياخذ نفس مايكدر وكانو بعدو موبوعيو مثل الحلمان بلحظه حسيتو موطبيعي...

انطيتو الخاولي وهو يسعل رحت اريد اجيبلو مي كعد بالكاع وارتجي ع الدرج ...

جان لابس تشيرت اسود ربع ردن وعيونو على زينب ...

وصلت لباب المطيخ وانه اتلفت علي دحكتو اشر لزينب تتقرب علي اشرلهه باصبعو...

هي تقربت علي وثنت ركبه كدامو جبت المي واجيت واتفاجئ بالموقف...

ايوب جان يحجي كوه ومفتح عيونو بتعب وماد ايدو ورا شعرهه وبايدو ملامس ركبتهه ...

يحجي بصوت متقطع ومتعوب وهو يكلهه رؤى ما اكدر انساج ساعديني وخليني انساج ...

جانت عيونو مغوركه بالدمع وهو يتوسل بزينب الي كدامو عبالو رؤى ...

صوتو تعبان وهو كلساع ويكلهه اموت على هاي عيونج المانسيتهه لحظه ...

قرب راسو على ركبتهه ويشم بيهه بشهكه ولاكانو هذا ايوب الي كدامي...

بسرعه عفت المي ولحكت البنيه الي دموعهه تجري بغزاره اريد اسندو يكوم ماقبل ...

من لزمت ايدو جانت جمر خليت ايدي على كصتو مصخن وموبوعيو وعبالك يهذي..

كلت لزينب روحي للغرفه ماقبلت واجت وياي للمضيف دفعني وكال خليني انام اطلعي..

ماكدرت اعوفو ايوب مصخن ويهذي هو من جان صغير الوحيد بينه اذا صخن يكوم يهذي ومايدري بنفسو ...

راحت زينب جابت مي وكمادات كعدت اسويلو وهي كاعده يم راسو تسمع صوتو وهو يطلع المكتوم الي بكلبو وبين دقيقه ودقيقه ويلفظ اسم رؤى بكسرة وعبره...

بعدني اسويلو وغفه طلعنه من المضيف رحت للغرفه هستوني اريد احجي كالت زينب لاتحجين شي وتغطت بفراشهه ونامت...

ثاني يوم صادفت عطله تريكنه وبديت انظف بالمطبخ وايوب كعد بوجهه للحمام يسبح طلع من الحمام وعيونو حمر دم ...

زينب ما واجهته كبل ركضت للغرفه وهو كال حضرن نفسجن ورا الظهر اخذكم للمزرعه...

كملت شغلي واسمع الباب يندك راحت امل فتحتو واجت وانه ادحك من الشباك .....

ادحك نسوان اثنين وساندات وحده بنصهن يسحلن بيهه من رفعت راسهه واتفاجئ بيهه اسماااااء...

يتببببع..  متابعه ممتعه

حبايبي ما اريد اوصل لختام القصه واختمهه على عجله لذلك قسمت البارت الاخير الى اجزاء وكل جزء يحجي كل التفاصيل ...

لاتزعلون مني ع التاخير مثل ماكتلكم اريد النهايه تكون مرضيه ..... احبكم