رواية ازمة ضمير الفصل الثاني وأربعون 42 - بقلم Rozaya1122

ازمة ضمير ... البارت الاربعون
«للكاتبه روزايه»

كولوله ما يعشك بعد..
الشاف ظلم من ايدك
كولوله يحبك تره ..
بس حلف بعد ميريدك
كولوله ما يعشك بعد ..
مره وچوتة الحرگه
كولوله ماينشف دمع ..
مو هينه هيج الفرگه
كولوله تغير بعد ..
بـيوم التغيرت انت
كولوله ضل عالوعد..
وانت الوعد ماصنته
...

ثريا... شذره مدده ع السديه ومخليلهه مغذي وانه كاعده يمهه وفاروق راح يحجي ويه الطبيب قربت الكرسي بصفهه كتلهه يولي شبيج مورحتي تغسلين ملابس شوداج للمضيف؟؟

شذره.. لج الله عليج اسكتي وين اودي وجهي من الفشله شراح يكول عليه فاروق ...

ثريا.. غير افتهم شبيج وعليمن فشلانه غير تخربطتي..

شذره.. لج ثريا غير اخوج السبع باسني وتخربطت ..

ثريا... لطمت صدري عزا العزاني من البوسه تخربطتي يولي شجاج..

شذره.. من نوصل للبيت احجيلج هسه راح اسوي نفسي بعدني متخربطه وانتي كلي لاخوج خطيه هي دائما تتخربط...

ثريا.. عليمن اجذب يولي وانتي كلشي مابيج غير الهبوط دكعدي خلص المغذي خلي اشيلو الج...

شذره.. لج ثريا لاتصيرين دنغوزيه وتعوفيني وحدي لج عيب خليته بموقف موحلو...

ثريا.. محد يدري عبالهم متخربطه صدك وخطيه امج عفناهه واكفه برا يله هسه كلبهه نار...

كاعدين ننتظر فاروق واجه من برا بدون كلام زايد كال يله خلي نطلع والحواجب معكوده خطيه شذره كامت اطكطك...

صعدنه بالسياره جان ايوب يسوق واحنه كاعدين ورا الهدوء مسيطر ع الموقف وتليفون ايوب يمكن دك عشرين مره وينطي رفض ...

حته كام يسوق سريع بس يريد يوصلنه بسرعه نزلنه اني اخر وحده نزلت سمعتو من يخابر بس اجت الكلمه باذاني ...

وهو يكول يولي لاتخافين هاي انه جاي بالطريق سدي الباب وانه افتحو ...

ماوكف ولا التفت بسرعه راح طبيت ليجوه وبالي الف حسبه منو هاي شنو ايوب متزوج وما ندري منو هاي الي يكلهه لاتخافين...

طبيت لديوانيه شذره كاعده وامهه قلقانه وتسال بفاروق شبيهه كالهه هبوط مابيهه شي وامهه تشكر منو...

اخذت شذره للغرفه كتلهه احجي يولي شبيج؟؟
شذره.. جنت اغسل ملابس بالحمام وكملتهن وطلعت بالممر نشرتهن ورجعت شفت فاروق هستوه فات ومخلي الكوت على اكتافه والجو بارد والجكاره بحلكه ويسد بالباب...

اني فهيت علي وظليت صافنه التفت عليه واني ماحاسه بوكفتي وشايله السله رفعلي حاجبه وهزلي راسه اني بسرعه دنكت وردت اكمل طريقي واجي يمج..

بس صار كدامي ولزمني من ايدي وكال حدري هين واخذني للمضيف...

لج ثريا رزليني وكفخيني على راسي شبيه هيج ثوله لاعرفت اسولف ولاعرفت اتصرف بس فاتحه حلكي...

كعد ع التخم وكعدت بصفه بس اخوج الا صارت كعدتنه لزك يله بده يحجي جان كلامنه عادي شبه تعارف يسالني عن حياتي العامه وانصدم قبل لا اجاوبه يطلع يعرف كلشي...

متحري عني بالتفصيل حته شحب وشكره ومن سالته شمدريك بس ابتسم كال لاتسالين لان ماراح اجاوبج...

شو شويه والوضع حسيته مريب والجو شكد بارد صار دافي وبدت حراره المكان تتغير كلما اريد ارفع راسي واباوعله الكا مثبت نظره عليه واخجل من عيونه...

جنت لافه الشال شلون ماجان وكلساع يزحلك ليورا عفت فاروق ولزكت بالشال اعدل بي ...

ما احس غير تنمد ايده وياخذه من راسي وكال شو نزعي ذبحتيني بي...

لو اتذبحيني ماتلكين قطره دم بيه اول مره واحد يشوف شعري وخاصه فاروق اول مره انزع الحجاب كدامه...

والمصيبه مو هنا المصيبه بايده الي تخللت بين خصلات شعري وانمدت ليجوه واني احس روحي راح اخرب ...

الهدوء الي عنده فضيع وايده حاره حيل ماقاومت ولاكدرت اظل فاتحه عيوني غمضت جفوني اريد احس بلمساته البطيئه...

احس انفاسه القريبه تلهب بوجهي معناتهه صار قريب عليه حيل ايده نزلهه من شعري وحوط ركبتي بيهه وقربني اكثر علي..

بس همس بصوته الرجولي يم اذاني وكال منو مايعرف يبوس؟؟ وليش هلكد مستعجله على البوسه؟؟

ولج خاف جنت ناويه افتح هسه لو اعرف اظل اسبوع ما افتح عيني على هذا الموقف ظليت مغمضه وهو يكلي ماراح تحجين ؟؟؟

شحجي شكول واني عملتي سوده حركت راسي لليسار بس ردت اخلص من لمسه اصابعه الي على ركبتي ويحرك بيهن ببطء...

بس جان ناوي نيه سوده اخوج كل هذا الهدوء والرومانسيه تحولت الى بوسه عنيفه وهو يلتهم شفايفي بوسه لهنا وكافي بعد ما احجيلج...

ثريا..  يولي احجي لا اكوم اسولف لامج كملي صارلج ساعه جنج واحد يكتب انشاء...

شذره.. ولج شحجي غير حاولت ادفعه ماكدرت لان جان لازمني حيل وحسيت كانو واحد شلع كلبي من مكانه بلحظه البوسه...

اتجرأ اكثر ونزل على ركبتي مالحك يبوسهه هواي لان بديت ادوخ وكمت اشوف المكان يفتر وماحسيت بشي ...

اشهد ياثريا اخوج ثم اخوج لامثيل له ...

هذا الجبل بداخله رومانسيه فضيعه وعنده قدره سيطره موطبيعيه يوزع قبلات على ركبتي وبعده بكامل قوته وجبروته ....

ثريا... يولي بله هسه المن نحجي من بوسه تخربطتي عجل بعرسج شلون..

شذره.. ليش بعد اكو بالعرس اقوه من هاي البوسه ...

شوفي ثريا لاتضحكين عليه اني اعرف مضمون الزواج سمعته من صديقتي بشكل مختصر بس ما متعمقه لكلشي صح عمري هذا وراح دكولين دارسه وعندج صديقات بس والله ماما مايوم سمحتلي حته اكعد يم نسوان واسمع كلامهن...

تدرين حته مامتابعه افلام لان تلفزيونه بي بس العراقيه والشرقيه ساحبين من جيرانه واني ما عندي هذيج الصداقه القويه ويه البنات حته احجي بهيج شغلات اعظم موضوع حاجين بي هو البوسه..

لذلك من اسالج مو تغلسين جاوبيني ولاتضحكين عليه احسن ما اروح لاخوج وتعرفي يشرح شرح مضبوط...

ثريا.. ذكرتيني بامنيه سوده عليه قبل لا يخطب ادهم بشهر جنه نحجي بهذا الموضوع وجانت دكول اخذ حقي من ادهم من بين عيونو ...

شذره.. ان شاء الله ترجع بسلامه ويفرح كلب ادهم ...
ثريا.. بعدنه كاعدين نسولف اندك الباب وفات فاروق شبح ابتسامه مرسومه على وجه وشذره مدنكه...

فاروق.. ثريا ممنوع ينفتح موضوع امنيه كدام ادهم بهاي الفتره شويه خلي نفسيتو تهدء ...

ثريا.. اثنينه هزينه روسنه وطلع التفتت عليه شذره وكالت هذا اخوج شمدري ذكرناهه ....

المصيبه ايوب بهذا اليوم ما اجه وبات برا البيت صادف ثاني يوم جمعه وماعندي دوام وكاعدين بالمطبخ حته اسماء وهو طب الساعه ب١٠...

كال السلام عليكم ردينه علي ووكف يشرب مي وعينو على الحجيه وعبالك حاجهه بعيونو..

ثريا.. ايوب البارحه بايت برا البيت وتليفونك خبصك خير ..

ايوب.. لا بروح حليمه حدري اقدملج عريضه يولي انتي ما اتوبين من فضولج ..

ثريا.. تريد تضيع السالفه غير لازم اعرف..
ايوب.. الصمي من دكتج الاخيره وصادقتي وين المابيهه خير غسلت ايدي من عندج...

ثريا.. جان يحجي واسماء عرفت المقصد عليهه بس سوت نفسهه مويمهه الحجي...

الحجيه.. ايوب بسلا هم تكاونت ترى بطنك تبجيلهه على سجينه..

ايوب.. اذكري الله جده هن ٣ سجاجين وطلقه سويتهن مثل ينضرب بي..

الحجيه.. خايب ماتزوج يايمه يول ابو سميره الف وحده تتمناك ...

ايوب .. جان واكف ومرتجي ع الكاونتر وبيدو كلاص عصير بسرعه غص وكام يكح بس ينذكر طاري الزواج يتخربط حالو...

الحجيه.. ماتت الحيه كلشي وبرا لعدوينك..

ام شذره.. اي والله خاله ليش ماتزوج شمنتظر بعد..
ايوب.. دحكن هاي كعدتجن تخوف وبس الله يستر منهه من تكعدن تخططن لازم تنفذن ...

الحجيه.. عجل غير مامخليتك براسي يول خليت فاروق وهاي خطب..

ايوب.. جده فاروق كلبو فاروق واجه من صادو بس انه گلبي مليان ومقبط

حجه هيج وطلع ايوب الوحيد الي مانسه حبه ووفي الو ع الرغم ماجانت اكو علاقه بيناتهم بس حبهه حب صادق والموت اقرب منو جان...

ضيع علينه السالفه وماكال وين جان لكيت تليفونو على الشحن ماينعرف راسو من رجلو بس الرقم الاخير يطلع منو ومدري شلون يجاوب...

بليل كاعدين ورا العشه واسماء هادئه وعبالك جاي تكيد مكيده انه مالي علاقه بيهه تكعد شويه وتصعد لغرفتهه مالهه وجه يمنه شويه وصعدت..

ايوب طلع وقيس بالدوام واوس وفاروق كاعدين يدحكون اخبار وانه وشذره بالمطبخ نسوي كاستر ....

طب ادهم مستعجل اسمعو يكول لفاروق يول فاروق منو من خوال امنيه سافرت ويا...

فاروق.. ليش تسالني روح اسال جدهه..
ادهم.. امنيه مامسافره لان ماعدهه جواز ...

فاروق.. وشمدريك ماطلعن جواز لو لازم هم تستأذن من عندك...

ادهم.. صار 3 ايام ادور بالجوازات وعندي ضباط كلفتهم ماطالعه جوازات باسمهن لاهي ولا نيران...

وخوالهه اثنينهم مسافرين من زمان واصلا مارجعوا للعراق من السقوط ...

فاروق.. يجوز صدك مامسافرات وحاولو يلعبون باعصابك جان فاروق يحجي ورافع حاجبو بكل ثقه ...

ادهم... يعني موانت طلعتهن ما الك ايد بيهه..
فاروق.. جاي تحاسبني يول واذا الي ايد بيهه اشورك مثلا ..

ادهم.. فاروق انه اخوك وجاي ادحك حالتي شلونهه بروح حليمه لا تضغط عليه اذا تعرف وين كلي ...

فاروق.. ما اعرف وحتلو اعرف ما اكلك لان ماتستاهل واعيدهه عليك خسارتك جبيره انت وقيس ..

الحجيه.. استهدو بالرحمن يمه اكعد جده ادهم الله كفيل بجرحك...

ادهم.. انتي هم تدرين وساكته كلكم تدرون وين هي تعرفون من يوم الي طلعت من  البيت ماغمضت عيني ولا نمت مثل الناس ...

احلفكم بلله اذا تعرفون وين بس اطمن عليهه ما اريد شي مو لخاطري لخاطر قيس..

فاروق.. خاطرهن اهم من عدكم اثنينكم ادهم عوف البنات يدحكن مستقبلهن وانت عيش حياتك..

ثريا.. العبره واكفه ابلعوم ادهم ماكدر يجاوب ولاكدر يحجي حته العصبيه الي بداخلو ماجاي تطلع مكسور من كل جانب...

طلع يجر بذيال الخيبه بعد ما ايس من فاروق وتاكدت فاروق الو علم بكلشي لان مستحيل يسكت ع سفرهن وعيشتهن بغير مكان...

كملنه الكاستر واجه ايوب وكوه سحبت شذره وياي ورحنه قدمنالهم وكعدنه وياهم ...

ايوب جان مشتري تليفون هو يسمي ابو الخمس سماعات يصيحلو العنكبوت...

لكحو اليه كال يولي نقليلي هاي اللعبه مال المكعبات نقلتهه الو عدنه ايوب ماياكل حلا ابد ...

فاروق عينو على شذره الي تستحي من امهه بسرعه كامت وكامو بالسره يكومون ظلينه انه وايوب..

مندمجه ادحك تلفزيون وما احس غير ايوب يلكح تليفونو ع الحايط وكسرو...

ثريا.. ليش ايوب انكسر..
ايوب.. هاي 6 مره اخسر فرك راسو بعصبيه وكال يولي هاي العصبيه راح ادمرني..

ثريا.. بعدو جديد شجاك يا ايوب يله فدوه الك بس انت ملاحظ نفسك شكد عصبي ..

ايوب .. لا ماملاحظ اكلهه ثور دكلي كف كفين حليب...

اكلج العصبيه مدمرتني دكلي مدحك نفسك ليش ماتكومين من هين لا اجربو براسج خاف بعدو مامكسور ...

ثريا.. كمت والله يساعدهه التاخذك امهه داعيه عليهه بليله ظلمه...

ايوب.. امشي ولي خفه هالوجه وهاي اللغود جنج عجله ليل نهار تعلفين ...

ثريا... اذا مايقلد عليه مايرتاح من صغرو هيج بس كلبو حنين ويتندم بسرعه ...

ادهم....

اسوق بنص ازدحامات بغداد وواكف السير وماجاي يتحرك وبس صوت الهورنات الصدعت راسي وعيني بالفارغ الي مادحك بس امنيه ...

وكفت سياره بصفي جانت سياره تكسي بيهه بس بنات احس گلبي دك بسرعه جنت مطلع ايدي من الجامه التفتت صوب السياره...

دحكت بنات ماعرفهن بس الكاعده يم الجامه مغطيه وجهه بشال ومسويته مثل البرده من جهتي ما ادري ليش ركزت على هاي البنيه ...

ايدهه نسخه من ايد امنيه ناعمه حيل وبيهه شامه يم الاصبع الجبير للحظه ردت افتح باب السياره وانزل احاجيهه وادحكهه منو...

تعوذت من الشيطان وطردت هاي الافكار من راسي شجاب امنيه هين وهذني مبينات طالبات لان شايلات كتب تحرك السير وعيني بالمرايه على هاي السياره والبنيه بعدهه مغطيه وجهه لحدما اختفت ...

متاكد امنيه قريبه عليه احس بيهه داير مدايري يوميه اسمع صوتهه باذاني ضحكتهه وروحهه البريئه هدن حيلي هد...

ثريا... جان ادهم كاعد ومدنك راسو ويسولفلي دموعي تنزل بغزاره وهو يحجي بحرگه كلب ويكول راح اظل ادور عليهه طول عمري...

...

اسماء.. كلشي انكلب ضدي محد يدري بادهم من يصعد للغرفه بين مايطلع ملابسه اشبع كتل وغلط

شلون جانت الامور ماشيه وشلون صار كلشي بالعكس كمت اطلع من الدوام لام معتز تاخذ بهاي الفلوس وترجع ليورا حته بعت التراجي مالتي وماجابت نتيجه...

دكول ما اكدرلهم محصنين اكو وحده مسويتلهم تحصين ودلتني على اماكن بالبيت كالت القران مفتوح بكل زاويه بالبيت ما اكدر جاي يرجع عليه العمل ...

كمت ادور بالبيت وصدك بكل زاويه بالبيت معلكين ورقه بيضه مكتوب بيهه بسم الله الرحمن الرحيم ١٤ مره ...

واكيد سوالف هاي عجوز البين حسيت نفسي خسرت كلشي وادهم رجع مثل ماشفته بالاول كل فكره يم امنيه ...

حاولت اصير حبابه ومطيعه بلكي يحبوني واكسبهم لجانبي بس مايفيد ...

خاصه ايوب اول مره اشوف رجال بهالجراه كدامي ويكول لو امرج بيدي لعلكج اسبوع ومايبرد كلبي...

ومن اساله ليش تكرهني شمسويتلك انت بالذات؟؟
يكلي انتي اكرهج لا يابه كولي اشوف دم اسنوني وما اشوفج بسببج اختفت ضحكه امنيه من البيت وتريديني ما اكرهج...

ايست من عدهم وتعبت من ادهم كمت اتجنبه وام رنا صديقتي ماخلت وحده ماراحتلهه وكل التروحلهه دكلهه ما اكدر محصنين هذوله من جبيرهم لصغيرهم...

اخر شي دلونه بواحد خارج بغداد صبي وكال مضبوط وام رنا طلبت من عندي هواي وبعت من ذهبي بدون محد يدري وانطيتهه ...
...

ثريا... صعدت لغرفه اخوتي اطلع الملابس الوسخه اريد اغسلهم شلت قمصله ايوب اريد اعلكهه دحكت بيهه تراب كلت خلي اغسلهه مدام اكو شمس اليوم...

طلعت الغراض من عدهه محفضتو وسبحه وسجينه هاي التنفتح خليتهم على الميز ...

وبجيب الثاني فلوس طلعتهن فتحت محفضتو اريد اخليهن بس فتحتهه نفس الصوره المقلوبه سحبتهه وكعدت ادحك عليهه...

صار ٥ سنوات وايوب محتفظ بصورة رؤى ولا راحت من بالو دقيقه رغم شقاوته وضحكته بس الحب مدفون بكلبو...

شكد اشتاقيتلهه واشتاقيت لاخواتهه ماعدهن حظ وعاشن محرومات بالدنيا الله يعوضهه الاخيره...

ضميتهن ونزلت لكيت ايوب راجع ومو من عوايدو يرجع الصبح بعدني هستوني اريد اسال ...

كال دخيلج لاتسالين انه راح اجاوبج اجيت اخذ فلوس ارتاحيتي...

الحجيه.. ابو سميره شجاك ويه اخيتك غير من خوفهه عليكم تسال لو مريتك باجر عكبه جان طكيت اصبع من تسالك..

ايوب.. مره ومثل فضول ثريا وانه منا طكه ونص لا ع بختج حجيه ...

الحجيه.. لازم تزوج يول والله كلبي مفرفح عليك شاب جنك ورد اعزب ...

ايوب.. هو منو متزوج من الكبار يله انه اتزوج وبعدين حدري هين شو باليتني بلوه عندج وحده محضرتهه...

الحجيه.. اااي عندي يول تعرفهه هاي البنيه جيرانه الذاك اليوم صعدت ويانه هي وامهه من اخذتني لام شذره وصلناهن ...

ايوب.. وروح حليمه ما اتذكر شكلهه لان ما ادحك ياجده ماتسويلي حبشكول تحصين شي شياتين وبلكي لني احب وحده اريد اعيش اللحظه...

الحجيه.. خايب شكالولك عليه اسويلك سحر وماتحب منو لازمك ...

ايوب.. غير لو احب جان حته عصبيتي راحت ..

الحجيه.. خاف ادجهه سجينه وهاي الدكه وجيب الفصل ورد الفصل..

ايوب.. هههههههه شلون اجت حجايه بحلكي يابه اجي يمج بس الم اذنوب واروح...

ثريا... ضحك ضحكه من كل كلبو واول مره ادحكو هيج يضحك من كالتلو الحجيه ادجهه سجينه حته احنه ضحكنه ويااا...

اخذ فلوسو وطلع والحجيه صافنه ورا كعدت بصفهه كتلهه جده تذكرين من كلتي ع رؤى حياتهه حلوه ومرتاحه عجل شوماتت؟؟

الحجيه.. هذا اليوازيك ع الضيم انعل امو وابو النطاج الشهاده دكلي شوماتت...

يولي الراحه قابل بس بالدنيا هي طفله وراحت لربهه مظلومه ترتاح يمو ماكو راحه يم البشر...

انه بوكتهه دحكت معاني الراحه والسعاده على وجهه الجميل الله يرحمهه ويجبر كلب ايوب...

ثريا.. جده ايوب لسه يحبهه ومايكدر ينساهه...

الحجيه.. ايوب يكابر ويلهي نفسو بالضحكه والسالفه بس من يختلي ويه نفسو يرجع يفكر بيهه

واكبر دليل دحكي اخوج مايدحك على بنيه ابد ولا يهتم وعبالك مشاعرو ماتت...

ثريا... الله يجبر بخواطرهم...

....

بعد مرور شهر...

فاروق اندحكو ساعه لوماندحكو ليل نهار دوام وقرايه وشغل يرجع بليل يبوس شذره من راسهه ويصعد ينام...

الله يحبو وانطا هيج بنيه لاتشتكي ولاتذمر وكلما تحجي امهه كالتلهه اوكفيلوا بالمره حته يعيشج الحلوه...

قيس ينزل اسبوع ويلتحق مثل ماهو عليه لاضحكه ولا سالفه واوس هادئ مالو علاقه ...

جانت ظهريه واجه ادهم يركض ويصيح ايوب يول ايوب انطيني سويج السياره...

ايوب جان واكف كدام المغسله يزين بلحيتو ولابس فانيله تعلاكه سوده وبجامه سوده ...

ايوب.. شكو شبيك ؟؟
ادهم.. يول ايوب مدري حلمان مدري صدك دحكت امنيه طلعت من معهد تدريس خصوصي وياهه بنات دحكتهه بالصدفه وجنت صاعد ويه صديقي ومالحكت بيهه...

ايوب.. هاك السويج بس وين راح تفتر وراهه وانت مالحكت لو شلون...

ادهم.. لا راح اروح اسال المعهد اذا موجود اسمهه انتظرهه باجر يول مدري امنيه مدري لا...

ايوب.. ماتعرف حبيبتك يالغم ..

ادهم.. لك بس ظهرهه دحكتو وفاتت بسرعه بس متاكد امنيه صح متغيره وكبرانه بس هي امنيه...

ثريا.. جان يحجي بفزع والعيون تلمع اخذ السويج وطلع بسرعه...

بس العجبني ايوب مايلحك يلبس التشيرت مالتو ولحك ادهم والتليفون على اذنو يخابر عكس ردة فعلو من حجالو ادهم...

كلنه كاعدين ننتظر يجي ادهم ويبشرنه اجه فاروق تلكيتو من الباب سولفتلو ما اهتم كال الله كريم...

ايوب رجع قبل ادهم وسالتو كال ما ادري مارحت ورا عندي غير شغله كلشي غريب بيهم هذولي الاثنين...

للمغرب واجه ادهم يجر بذيال الخيبه وكال سألت عليهه وماكو هيج اسم بالمعهد بس انه كلبي يكول امنيه قريبه عليه...

صعد ليفوك يريد يبدل ونسمع صوت الضرب والغلط ردنه ندخل وفاروق منعنه ماقبل واحد يصعد ...

شويه وينزل يسحل باسماء وهي مدمايه اول مره ادحك اخوي بهالعنف كاتلهه كتله يجوز لسه تذكرهه ...

ماتلحك تلبس نعالهه واخذهه كبل لبيت عمهه لكحهه عليهم ورجع محد حجه ويا لان عصبي بس حسيت برد كلبي ع هاي الكتله....

ثاني يوم العصر اندك الباب رحت اريد افتحو كلت منو اجاني صوت بنيه ناعم كالت اني...

فتحتو وادحك بنيه ما اعرفهه تطلع بعمر شذره كتلهه تفضلي بدون مقدمات كالت هذا بيت ايوب....

يتبببع .... متابعه شيقه..

مشهد ..
امنيه... كاعده والحر فضيع كلساع اباوع لساعه شوكت يخلص الدوام واطلع اكلب بلاوراق جان اسم واحد من المراجعين ادهم انتفض كلبي وانه اتذكر ادهم شنو يعنيلي هذا الاسم مرت سنين وما نسيت هذيج العيون....