رواية ازمة ضمير الفصل الثالث وأربعون 43 - بقلم Rozaya1122

ازمة ضمير ... البارت الواحد والاربعون
«للكاتبه روزايه»

عفت كلشي
وبديت اتذكر اشكلتي ؟
اتذكر حجيتي هواي
غيرك ما يحط حنتي
ولحيتك كافي خلها اطول
اريد ازين ابزفتي
واجت زفتج شفت وياج ليركصون لا صحباني لا اهلي
عفت كلشي
وبديت اتذكر اشكلتي
...

ثريا... الساعه 30: 3 مساءآ..

كاعده انه وشذره الي فاتحه ملزمتهه تقره وصوت اغنيه حسام الرسام الطالعه على قناة القيثاره ومركزه بكلماتهه وعبالك توصف حالتنه...

تانيت ع الباب واحس كلبي بعد ميتاني
على النار منتظرك واون يحبيبي ميت اني
كلساعه كلبي ينجرح... يتخيل الباب انفتح
شفت الفراك شكد صعب مثل الطفل بجاني
بجيت ودموعي احس نزلت وياهه عيوني
مو على روحي خفت خايف تموت بدوني
يذوب كلبي من العذاب لو الهوه يحرك الباب
طلعلي عاد تعذبت والله القلق اذاني...

اقرا بالشريط وهاي تسال كنترول كلي احمد يحبني لو وحده تسال دكول اكو زواج بين ايات وسامر جنت مندمجه على الاغنيه..

التفتت اجت عيني على المطبخ ادهم كاعد بالكاع وممد رجلي ومخلي راسو على الحايط ما ادري كاعد يسمع بلاغنيه لوكلماتهه لامست جرحو ...

الحجيه.. ثريا خايبه ليش ماخابرتي فاروق يجي يدحك ايوب شعندو ويه هاي البنت؟؟

ثريا.. جده هو ايوب يتحاجه مادحكتي شلون انخبص من خابرتو مثل الطلقه اجه يركض ..

ادهم.. كاعد بالمطبخ وسمعنه كال شبي ايوب؟؟
ثريا.. ماندري البارحه اندك الباب رحت فتحتو ابنيه صغيره كالت هذا بيت ايوب كلتلهه تفضلي ماقبلت تحجي الا يجي ايوب...

رحت خابرتو كتلو ايوب ابنيه عليك جاي تسال وتنتظرك؟؟
ايوب... يولي يابنيه منيلي بنات انه ..

ثريا.. تعال ودحك بعينك ماترضه تحجي ودكول مستعجله..
ايوب.. جاي هسه يولي ثريا كعدي البنيه بالديوانيه والحكيلي بتشيرت هذا الابسو كلو تراب...

ثريا.. طلعتلو تشيرت وانتظرتو برا والحجيه سوت استجواب وياهه وماقبلت تحجي اصلا لونهه مخطوف وخايفه ...

اجه ايوب من الباب بدل ملابسو ويمشي ويعدل بشعرو طب لديوانيه كال السلام عليكم الظاهر يعرفهه لان تفاجى بوجودهه لفظ اسمهه ساره !!!

ماقبل يحجي كدامنه اشر للحجيه براسو وطلعتنه من الديوانيه ماتاخر عشر دقايق والبنيه راحت وايوب صعد للغرفه مدري شأخذ وطلع...

ادهم.. ماسالتي وين راح؟؟
ثريا.. ركضت ورا وماقبل يحجي وادك علي مايجاوب وبليل حجيت لفاروق زكح بيه كال لاتتدخلين ومن البارحه ما اجه ومانعرف شي عنو...

ادهم.. حته فاروق ماموجود اليوم مامداوم والمجمع مسدود ولا ايوب ولا فاروق عبالك احنه غربه واحد مايعرف الثاني شبي..

طلع تليفونو ودك على ايوب طلعلو مغلق رجع دك على فاروق جابو كالو عندي شغل وماعرفنه شبيهم...

اجه الليل وبس فاروق رجع تعبان حته ماقبل يتعشه ردت شذره تصعد ادحكو شبي ماقبلت كالت خاف يعصب عليه هو من يرتاح اسالو...

الحجيه كاعده تحوم تريد تعرف شصاير ومحد سولف ظل بالنه ع ايوب بس فاروق كال مابي شي عندو شغل...

كلنه ظلينه نسال منو هاي البنيه وليش ايوب صار ليلتين برا البيت معقوله متزوج شنو هاي شبيهم اخوتي تخبلو ؟؟

ثاني يوم رحت للدوام وبالي يمو دكيت علي مغلق مافتحو رجعت للبيت تلكتني ام شذره كالت اجه ايوب ونايم وماقبل واحد يكعدو..

بدلت وكعدت يم الحجيه سالتهه ماتعرف وين جان بس هزت راسهه جانت تسبح بالسبحه ...

سالت على شذره وينهه كالت امهه فاروق طلعهه ويا شويه ويجون..

صار المغرب وكفت اسوي عشه سمعت الباب يندك رحت فتحتو تفاجات عمه اسماء ومرت عمهه سلمت عليهم وكتلهم تفضلو...

ام نجم .. حجيه انتم ناس اجاويد وماشفنه شي عليكم احنه جاينكم انريد نعرف قصور بتنه شنو بعدهه عروس وتنظرب..

الحجيه.. يا يمه هاي الاسئله سألوهه لرجلهه احنه ليش تسألونه هو الي كتلهه مواحنه...

ام نجم.. تعرفون اسماء يتيمه وتحب رجلهه اذا اكو مشكله نحاول نحلهه بس موتنضرب بتنه وادزوهه النه مدمايه موهيج الحجي..

الحجيه.. الله وصانه باليتيم وموبس بتكم يتيمه اسماء هدمت عائله كامله اسمعيني يم نجم حتلو كلامي يخشن الخاطر بس لازم تسمعنه..

ادهم رجال خاطب بنت عمو ويتيمه وماعدهه بالدنيا بس ادهم لا ام ولا اب عاشت وتربت كدام عينو ..

هاي غرفتو ونيشانهه اختارتو بديهه ما نتهم بتكم بس رجلهه طويله وتجي لبيتنه وانه من الناس حذرتهه وطردتهه ومافاد...

طبت بنصهم وخربتهم انه اجيتج برجلي وكتلج ياعمتهه لزمي بتكم عن ابنه رجال خاطب لاتخرب حياتو ماسمعتيني جان ردج الي مره ماتاكل مره...

من اجيتج متعنيه وكتلج تنهدم حياتهم كتيلي اذا اسماء موافقه احنه ماعدنه اعتراض زوجتو بتكم على حساب يتيمه اخذتو فرحتهه بالغصب ...

ماسالتو ليش ماسوينه عرس وليش ما احتفل وفرح بعرسو لان بنت عمه ومرتو بعدهه على ذمتو طلعت من البيت واجت بتكم على نيشان بتنه ...

وكل هذا انكول قسمه ونصيب والله قاسم هالشي ولازم اندحكو بس كل هذا ماكفاهه توكف كدامي وانه مره جبيره تعلي صوتهه وتزكح بينه بالصغير والجبير هاي تربيه بتكم..

ما ادخلنه ولا حجينه والمشكله بينهه وبين رجلهه صعد ونزل يسحل بيهه سالو رجلهه وسالو بتكم ماعدنه جواب احنه..

ام نجم.. ما اعرف شجاوبج ياحجيه الي افتهمته بتنه خربت عائلتكم وادهم مايريدهه لان يحب مرتو ...

راح نرجع ونسولف لعمهه ونفتهم منهه ونخابر على ادهم ونكعد نحلهه بمايرضي الله...

ثريا.. طلعن مايعرفن شيحجن الحجيه كتت الاول والتالي رجعت اكمل العشا اجت شذره شايله علاليك بيدهه وفاروق وراهه يسد بالباب..

لزمتهه من ايدهه كتلهه وين جنتي اتخمين يولي ؟؟

شذره.. دخيلج ثريا عوفيني رجليه ماتساعدني لج راح اخرب اخوج ثم اخوج ..

ثريا.. شكو يولي شبي فاروق؟؟
شذره.. خلي اغسل واستعيد طاقتي الي نهبهه اخوج

ثريا.. راحت للغرفه وطب فاروق خله السويج على الميز وصعد بسرعه كملت العشا ورحت لشذره لكيتهه كاعده تعزل بالاشياء المشتريتهه...

شذره.. تعالي ثريا شوفي ششتريت ..
ثريا.. بالعافيه تلبسيهن بالهنا جانت مشتريه ملابس طلعه وفستان قصير كتلهه حدري هين شبيج مخطوفه؟؟

شذره.. ثريا اني مدري شبيه من اشوف اخوج كلشي يتخربط عندي اني ضعيفه لو هو يسلب كامل طاقتي..

ثريا.. لا موضعيفه بس انتي بريئه وتحبين فاروق وجاي تعيشين هذا الاحساس من كل گلبج..

شذره.. شوفي اني صار 3 ايام زعلانه علي ويدري بيه زعلانه ومايهتم صح من يجي يسلم عليه ومرات يبوسني من راسي بس مايكعد ويايه ولا اشوفه يادوب على العشا...

ادري مايلحك وادري عنده شغل بس ثريا موهيج ولامهتم مقدره وضعوا بس بالجذب مايكول خلي اشوفهه اكعد وياهه مرات حته اشك هو مايحبني مجرد تمم دراسته بفضلي وخلاص..

زعلت علي ومن اجه سلم عليه رديت السلام من ورا خشمي وهم ما اهتم وصعد بس بليل البارحه صاحني جنتي نايمه جان واكف ع الدرج واشرلي اصعد ..

ترددت بالبدايه وردت ارجع للغرفه بس اجاني صوته وهو يصيح حدري هين لاتظلين صافنه...

صعدت واني گلبي يدك بسرعه اول مره اتجرأ واصعد برجليه لغرفته ولوتدري ماما تموتني وكفت اباب الغرفه وكتله ها فاروق صحتني...

هو جان بالغرفه والباب مفتوح كال حدري هين شبيج واكفه بلباب..

شذره.. لا مو خاف تكعد ماما كول اكو شي..
فاروق.. واذا كعدت ماما تخوفنه مثلا يولي انتي مرتي شرعا وقانونا لو علمود الزفه..

شذره.. شجاوبه ما اعرف اتقارش ويا دخلت للغرفه وگلبي يريد يوكف من الارتباك والخوف لا احد يشوفنه..

جان واكف بنص الغرفه واني بالباب عاط بيه بصوت خلاني اتقدم ٤ خطوات بدون وعي صرت كدامه...

واكفه قريبه علي وابلع بريگي احس نفسي متهمه وجاي يحاكمني وانتظر قراره..

سحبني من ايدي لجربايه كعد وخلاني على رجلي وايده التفت على خصري ...

لوتذبحيني ماتلكين قطرة دم بيه كاعده على رجلي وارجف حجه بنبرات هادئه حيل خلتني اذوب مثل قطعه الثلج بين احضانه الحاره...

فاروق.. ليش ترجفين هدي حالج يولي!!

شذره.. ماكدرت اجاوبه نزلت راسي واجت عيني بعينه بسرعه غمضت ما اقاومه ولا اكدر اسيطر على حالي...

فاروق.. زعلانه من عندي؟؟
شذره.. لا موزعلانه بس انت مامهتم الي ابد وما احسك تحبني..

فاروق.. دحكي شذره انه حاليا بجهاد بين الدراسه وبين المجمع الي ايوب ملتهي عنو وبين حبج واريدج دائما يمي وماجاي اكدر اتمم الزواج لان السنه الاولى مال القضاة يرادلهه مجهود عالي..

شذره تحسيني بارد واحتمال يخطر ابالج ما احبج ذاك الحب بس ثقي بالله ياشذره ما اكلج اول حب بحياتي بس ان شاء الله تكونين الاولى والاخيره...

هذا طبعي لا اعبر ولا احب اسولف جثير بمرور الايام تتعودين عليه بس خلي ابالج زين فاروق يحبج ومن زمان قبل لا تجين هين..

شذره.. خجلني كلامو كتلو شتقصد من زمان وين تعرفني؟؟
فاروق.. اعرفج عن طريق واحد من كرايب ابوج واكثر من مره دحكتج من رحتي للدوام لان محل شغلو قريب على بيتكم..

ما انكر عجبتيني وراقبتج جثير وعيني مانزلت من عندج بس جنت احسج مومناسبه الي بسبب فارق العمر لان بعدج صغيره لذلك صرفت النظر عنج والتهيت بشغلي..

ورا فتره تفاجات من دحكتج بنص بيتنه وهي هاي التقصدهه الحجيه كلت احتمال الله قاسمج الي وخلاج بطريقي..

شذره.. ما اعرف شحجي بس والله فاجاتني انت تحبني قبل لا اني احبك ..

فاروق.. انه صعب بلاختيار ومافكرت احب ولا اعبر عن مشاعري الا بصعوبه بس دائما خلي ابالج فاروق يحبج...

شذره.. دنكت راسي واني على رجلي الخجل ماكلني وايده الي تتلمس بخصري ادغدغت من حركه اصابيعه مديت ايدي لزمت ايده اريده يوكف لان كمت احس برعشه سرت بكل جسمي...

ماكدرت اقاوم لمساته وبديت اضعف واني بين اديه وشفايفه انطبعت ببوسات متفرقه على ركبتي ولحيتي الي دغدغتني على بشرتي الحساسه...

حركة ايده صارت اكثر جرأه حسيت نفسي راح اخرب واني بين لمساته الجريئه كوه كدرت اقوي نفسي وحجيت بصوت خافت ...

فاروق ما اكدر بعد حباب عوفني جنت كل كلمه اكولهه طالعه من عندي بدون وعي ...

بعده مستمر وهو يبوس بركبتي الي احسه يحبهه اكثر جزء بجسمي لان هاي ثاني مره يفضلهه...

دك تليفونه هو الي نقذني وخلا يبتعد ويمد ايده ياخذ تليفونه وهو حاضني بكل حنيه ويحجي بالتليفون..

مافهمت شحجه بس الي عرفته ايوب مخابره وايوب هو الي يحجي بس فاروق كاله هاهي توكل وسده...

رجع يريد يكمل اشواط اضافيه بس سمعت صوت ماما وهي تصيح شذره حته ما التفتت على فاروق ما ادري شلون كمت من حضنه ونزلت اركض ...

لكيت ماما واكفتلي على الدرج طلعت حجتي صعدت جاي لفاروق بس ماعبرت عليهه ...

واليوم عربون صلح قدملي وكال حضري نفسج نطلع شويه وبالرجعه بس صافنه علي وعلى رزانته كلشي بي يعجبني ...

مرات اتخيل ورا هدوءه وبروده عاصفه مااكدر اقاومهه وماتظهر هسه الا بعد ما ينطيهه اذن واشوف فاروق ثاني...

ثريا... هسه انتي تحجيلي وانه متعجبه باخوي لان من يومو هو بارد ورزن حته من جنه زغار نبجي ونحزن بس هو ابد لا يعبر عن حزنو ولا عن فرحو..

شذره.. مرات اخاف من عنده اكول خاف يتغير عليه لو اتعب ويا لان طبعه صعب..

ثريا... اخذتني السوالف ويه شذره سمعت ادهم صاح ثريا وين العشا طلعنه اثنينه انحضر بالعشه دحكت ايوب نزل كوه مفتح عينو غسل وكعد ع السفره..

كلساع اريد احجي واسالو وين جنت بس يخزرني اسكت ورا العشا شذره كعدت بصف فاروق هو سوالهه مجال ومخلي ايدو ورا ظهرهه ..

كلنه ملتمين ودحكت ع ايوب كتلو ايوب منو هاي البنيه الي اجت عليك ؟؟ وانت وين جنت صار يومين..

ايوب.. بجهنم الحمره ادري انتي امج بيمن اتنست بيج يرادلج گلب مامدشن ...

ادهم.. ع كيفك يول حجت الحقيقه لازم مانسال كل واحد يتصرف بكيفو بنيه اجتك وطلعت ويومين بايت برا مومن حقنه نعرف..

ايوب... لا مو من حقك لان مامستعد اقدم تبرير لاحد وهاي البنيه اخت صديقي واحتاجوني بشغله

ادهم.. العفو استاذ ايوب لا جبير بيكم ولاصغير يحجي وياي مثل خلك الله ادري عدوكم انه اخوكم لولا...

قيس من جهه اوس من جهه انت فاروق الجبير كلكم معاديني يولو انه اتحملت فوك طاقتي وادري بيكم انتم ورا كلشي صار وتعرفون امنيه وين بس متونسين ع عذابي..

فاروق.. ادهم موهيج الحجي امنيه اختارت حياتهه مثل ما انت اختاريت يعني مالنه سلطه عليهه ونمنعهه ...

ثريا ادهم جان يحجي بعصبيه وضاغط على ايدو كل كلمه تطلع من عندو ينكطع نفسو بيهه احسو مريض وبده يفقد صحتو بهاي الاشهر..

ماكدر يكمل لان ايوب انطا كلمه وحده خلت ادهم يفقد اكثر وطلع وسد الباب ورا بقوه ..

ايوب بكل اريحيه كاعد وكالو روح لاسماء الي رحت وخطبتهه كدام عين امنيه وجاي ادور سماح..

الحجيه.. ياجده يا ايوب موهيج الحجي ادهم اخيكم وتعبان والليل شاهد علي ماتغمض عينو..

ايوب.. والبيدنه شنو بلله عليج اسالج سؤال لو نفس الموقف سوتو امنيه وراحت فسخت لو مجرد طلبت تعوف ادهم وتزوج غيرو جان شكلتو عليهه؟؟

كلتو خاينه وعديمه تربيه وبعد وبعد واذا ما اخذت المقسوم وانكتلت بحجه احنه عاداتنه كذا وكذا..

ادري موقرين الرجال وذالين المره عليمن مثل ماهو دحك حياتو وخانهه هي هم انطتو على مايو وراحت تكمل بعيد عنو...

الحجيه.. والله انت يا ابو سميره محد يكدرلك خايب تريد تضيع علينه السالفه وين جنت ؟؟

ايوب.. يم مرتي ارتاحيتن..

الحجيه.. دهر فرك بسلا هاي البت متورط وياهه انه دحكتهه عينهه مانزلت من عندك وعبالك عدهه ضميمه وهاويتك..

ايوب.. الله اكبر محد يخلص من عندجن لاتاخذين غيبتهه البنيه اخت صديقي واحتاجوني بشغله ...

انه رجال فارغ لا حبييه ولا بطيخ بس انه ما اكدر ياجده دمي حار وصاحب نخوه لازم اركض وافزع..

الحجيه.. اسمع يول ايوب اخوكم واكع بظلام ومايكدر يطلع منو هالله الهالله بي طمنو على امنيه خلي يرتاح گلبو..

ايوب.. ليش انتي تعرفين وين امنيه عجل ما طمنينه عليهه ليش هيج بالنه يمهه

الحجيه... يولو كومو هالاسمر من هين ترى يكطع كلبي ويرفع ضغطي من سوالفو...

ايوب.. لا عليمن يرتفغ ضغطج انه طالع خوماتريدن تعرفن وين اروح...

الحجيه.. السانك ماكل غواربك روح جده بس اسكت ..

ثريا.. ايوب طلع وادهم طلع زعلان اوس طلع يم جماعتو وشذره كاعده تكتب بحث لفاروق وهو كاعد يمهه يعلم بيهه...

توزعنه كل واحد بجهه وكلساع ادحك شذره ياخذهه الخجل من همس فاروق يم اذانهه وهي اتذب القلم تريد دكوم ويرجع يكعدهه ...

....

مر ع زعله اسماء اسبوع وع اساس ادهم اليوم يلتحق واتفاجانه بعمهه وويا اثنين زلم جايين ومحد بالبيت عود خابرت اخوتي اجو...

اسمع صوتهم ونقاشهم الحاد ويه فاروق وادهم وماينطون بنتهم ابد ولا احنه عدنه دليل ولانكدر نتهمهه...

واكفه اسوي جاي واسمع صوت ادهم وهو يغلط ويسب ومكاون والصوت بده يعلى..

الحجيه زكحت بيه اخابر على ايوب واوس كالو جايين ما افتهم الحجي من الهوسه بس اسمع صوت بوكسيات وضرب ...

اجو ايوب واوس يركضون وكوه فكو ادهم الي ماتعرف عليمن عصب وطلع الرجال المتوسط بالعمر مخلي ايدو على خشمو الي ينزف...

واكفين برا يحجون ويه فاروق وادهم اعصار وهايج ماخله شي ماكسره لاول مره ادحك ادهم هيج حالتو..

من عصبيتو كسر الطبله وشكو مزهريه وكعت بالكاع وتفلشت سد الباب فاروق واجه صوبو ولزمو من ايدو الي تجري دم وما حاس بيهه..

فاروق... يول ادهم تخبلت هو هيج تهين الرجال بنص مضيفنه..

ادهم.. انه يحجي وياي هالحجي انه خرح واحد عربنجي ما اعرف منين جايبو عمهه ويكلي هيج كلام..

فاروق.. ليش تهد ع الزلمه الصوج بالختاريتهه مره الماصنت كرامتك اكعد وخلي نفتهم العصبيه ماتحل شي...

ثريا.. كل الي افتهمتو اسماء كايله لعمهه بأن ادهم مايتقربلهه والسبب منو لان مايكدر وهي لحد الان بنت وهذا متخبل. جنت واكفه انه وام شذره وايوب وفاروق بالطرمه يسولفون ..

ايوب.. يابه شنو من بنيه هاي سوده بوجهك ادهم شلون اختاريتهه..

فاروق.. اسكت ايوب لاتزود النار حطب دحك حالتو شلونهه خايف علي قسينه علي جثير..

ايوب.. اسمع فاروق انه من خطيت هيج خطوه مامتندم عليهه ولو ما انت اخوي الجبير وتعرفني ماكدر اضم عليك وخليتك بالصوره جان لسه ماتعرف شي ..

فاروق.. يول مقدر هالشي وانه وياك مشاركين بنفس الجريمه بس دحك حالتو وايدو التنزف وماحاس بيهه من لوعه كلبو..

موبس خسر امنيه خسر نفسو وكرامتو كلنه نعرق ادهم اخونه الصغير ومن صغرو حساس وداخلو هش لا مثلي ولامثلك ...

ايوب.. يول لسه اتذكر يوم خطبتو انه اخو ورجال ودمعت عيني ع موقفهه نزع حلقتهه ولكحهه ولبس حلقة وحده زباله..

وثريا النعجه جابت الكيك ودكلهه اكلي وتسولفلهه شلون لبسهه الذهب وشلون ركصت يول بس اتذكر هذا اليوم اشتعل نار شحال طفله مثل امنيه ..

فاروق.. ايوب موبس ادهم المتاذي حته قيس الي مايلفي للبيت وصديقو يكول وين ماكو مكان خطر وغاره جويه هو اول متبرع يعني بزعان من نفسو..

ما اريد اخسركم بسبيل الانتقام كافي اتشتتنه صار سنتين كل واحد بصوب...

ايوب.. عوفكم من سالفه امنيه وحلو سالفه هالبغله اسماء بعد الحجته يكدر يطلكهه ادهم وتثبت علي التهمهه وترجع لاهلهه بنيه...

فاروق.. طبعا لا مايطلك اذا ماياخذهه المهم احذرك من كلامك القاسي ويا اتجنب الحديث ويه ادهم ..

ثريا.. بهذا اليوم ادهم مارجع للبيت وفاروق اضطر يعتذر من عم اسماء لان انضرب الرجال ابيتنه..

ثاني يوم الصبح صادفت جمعه ومسوين حمله تنظيف انه وشذره وما احس غير اسماء بنص الديوانيه واكفه ع راسنه...

بدون لاسلام ولاكلام ولاعبرتنه صعدت لغرفتهه وهي اطك بعلجهه اثنينه ساكتين والحجيه وام شذره بالمطبخ هم ماحجن ...

جانت شذره تنظف بالمغسله وباب الحمام ونزلت اسماء صاحت شذره كلي لامج تصعد تنظف غرفتي..

شذره.. ماما مو خدامه عند حضرتج نظفي غرفتج انتي. .

اسماء.. خدامه ياروحي وتاكلن من فضالتنه خاف نسيتي نفسج من خطبج فاروق ترى كلج ع بعض خدامه ...

شذره.. هيج نماذج من مثلج ما المفروض واحد يلطخ السانه وياهه استحسف الكلمات الي اناقشج بيهم..

ثريا.. اشو هاي مالحكت عليهه نزلت الدرج وركض ع شذره دفعتهه ما ادري كلشي صار بسرعه...

دفعت شذره على باب الحمام ماجان مقفول بس مردود رد انفتح بشذره ورجلهه زلكت ووكعت ع ظهرهه..

ركضت عليهه دفعت اسماء واكوم بشذره امهه اجت تركض والحجيه نزعت النعال ولكحتو ع اسماء ...

ما اهتمت كملت طريقهه وتهز بنفسهه شذره تبجي وماتكدر تتحرك تصيح ظهري كوه كومناهه للتخم ودكيت ع فاروق بس كتلو شذره وكعت كال جاي ..

دقايق وفاروق فوك راسنه راد يكومهه بس تبجي وماتعرف الالم وين بس تصيح اااخ شايلهه بين ادي واخذهه وامهه راحت وياهه...

رجعت ع اسماء تكاونت وياهه صلفه وعرمه تخلي ايده بصدري وتدفعني ودكلي امشي يالثوله ..

ماتنلام بيه صدك ثوله لومو ثوله ماصادقت وحده مثلج وهي دكلي امشي ك..... ام...... لوبيج خير ماظاله عانس ع كلب اخوتج...

بعدنه نتكاون واجه ايوب بدون تفاهم نزعلهه الشحاطه ووين اليوجعهه ادافعت ويه ايوب وغلطت علي ومالكت غير ايوب يحاول مايلمسهه بس بشحاطه ومافاد...

التفت يمو الماسحه وشيلهه وضربتين مواكثر انكسرت العوده على ظهرهه ووكعت بالكاع ترفس وتصيح يبو ...

منعتو الحجيه عنهه وانه حصلتلي كفخه ع راسي لان طلع سامعهه من فشرت عليه...

صعدت تسحل بنفسهه لغرفتهه وشذره اجت مجبرين رجلهه من الكعب وفاروق ماقبل ع تصرف ايوب بس ايوب كالو تحمد الله ما ذبحتهه ...

ما ادري ليش فاروق سكت وماحجه اي شي لحد الغده اجه ادهم بعده هستوه طب تلكا فاروق كالو كلمتين مواكثر..

فاروق.. ادهم اذا ماتكدر تربي العندك انه اربيهه...

ثريا.. ماحجه شي ادهم وكانو افتهم فاروق صعد لغرفتو ومانزل ورا ساعه ..

اعصابو مبينه واوردة رگبتو تريد تنفجر وطلع ع السريع وكانو يهرب من كلشي...

كل الي عرفتو ادهم متقرب لاسماء بعد ما عمهه تهمو برجولتو وشلون لسه بنت اخو باكر...

للعصر يله رجع ادهم تعودنه علي بدون سابق انذار وقرار مفاجئ رمه يمين الطلاك على اسماء وطلكهه....

يتببببع..... متابعه شيقه...

حبايبي الحلوين رجعنه ويه قصتنه واحداث الاخوه الخمسه ياريت اتصبرون عليه لان حيل تعبانه خاف اتاخر بالنشر احتمال بين يوم ويوم لان عقلي مايجمع الاحداث... احبكم