رواية ازمة ضمير الفصل الثاني وثلاثون 32 - بقلم Rozaya1122

ازمة ضمير ... البارت الثلاثون
«للكاتبه روزايه»

هذوله احنه
مشت دنیانه ب المگلوب
والتمت علینه حروب
وانسڈت دروب وبوب
لكن ابد ما طحنه
هذوله احنه
سمر سحنه
ورد جوري اذا فحنه
...

ثريا... من كدما افتر راسي دخت شكد جبيره بغداد وشكد بيهه ناس ماطالعه خارج الانبار ابد حدي للكليه وارجع ...

نزلنه غراضنه ودخلنه برجلنه اليمين للبيت جان بيت بناءه قديم بس هو جبير وبي حديقه و٣ غرف جوه وفوك غرفتين ومطبخين فوك وجوه وحمام هم اثنين بس تعبان ويرادلو ترميم من جديد ...

غراضنه مجودره بالكاع وتعبانين من الطريق لسه ما متخيله اخوتي شلون اقتنعو يجون لبغداد ويتركون الانبار بس اللوعات الي دحكوهه هناك خلتهم يكرهون ارضهم لان اخذت منهم ما انطتهم...

ادهم يندل بالمنطقه راح جابلنه اكل بنص الهوسه فرشنه سفره وكعدنه ناكل ويسولفون بترتيب البيت كالو نكعد بي هسه ع وضعو هذا وبعدين نرموو ...

هلكانين من تعب الطريق كامت امنيه لمت السفره وانه رتبت وحده من الغرفه ومسحتهه ع السريع وفرشتلهم فراش خاف واحد بيهم ينام...

لحد المغرب وانه وامنيه نايمين بغرفه وحده من كدما قديمه وكعت ادينه من الغسل نكعد ننظف كاشيه كاشيه يراد شهر واحنه انظف لان كالو متروك ماساكنين بي اهلو دائما يسافرون...

ثاني يوم كعدنه من الصبح واخوتي ما اعرف ابيش يفكرون طلعوا كلهم جنت انظف واحجي ويه الحجيه ..

.. جده ابيش انعيش هين هناك عدنه املاك واراضي هين مانعرف لا جار ولا صديق..

الحجيه.. يابنتي رزق ربج موجود بكل مكان واخوتج موجهال ويخطون هيج خطوه قبل مايفكرون بكلشي حته ما يتورطون...

عدهم اصدقاء هين ومعارف وهذوله الزلم الجانو يجون لفاروق اساتذه وياا وهم الي خلوهه براسو اصلهم من بغداد ولاكين مجمع ومحلات ومشتريهن بشراكه ويه فاروق وراح يرجعون اخوتج من جديد لنفس شغلهم..

اوس وادهم عندهم راتب وايوب يلزم المجمع وفاروق يكول ادرس وانتي هم راح تتعينين كولي الحمدلله يابنتي...

بعدنه نسولف واندك الباب اخاف افتحو بس طلعت الحجيه فتحت الباب طبن نسوان متوسطات بالعمر  شايلات بيدهن علاكه مال فواكه ...

استحيت من هوستنه لان كالو بس نصبغو وع اساس الظهر يصبغو ماكدرت ارجع الغراض فرشتلهن مده وكعدن بالمطبخ الوحيد كامل ونظيف...

رحبو بينه بالمنطقه وعرفتنه ع نفسهه يكلولهه ام نجم بس ماعدهه جهال مجرد لقب..

ام نجم.. اهلا وسهلا بيكم احنه جيرانكم البيت الي كدامكم اي شي تحتاجو ما تردكم غير نفسكم ...

الحجيه... ماتقصرون يايمه ونعم من اصلج احنه جدد هين وبعدنه مهوسين اعذرينه...

ام نجم.. لا يمه انتم اعذرونه بس البارحه ابونه ما موجود وماكدرنه نقوم بالواجب اليوم لاتسوون غده غداكم علينه...

الحجيه.. يايمه شنو هالزحمه ذكرتينه بايام قبل الجار لازم يضيف جارو...

... بعدهه هاي العاده حجيه هذا البيت هوايه انباع وكل الي يسكن بي نقوم بالواجب الجار اكثر من الاهل بس ماعرفناكم منين ...

الحجيه.. احنه من الرمادي وانه جدتهم وشالو هين لان دوامهم كلو ببغداد وعفنه اراضينه واجينه ...

ان نجم.. وهذني البنات جناين لو بناتج..
... لا هم خمسه اخوه وعدهم هاي الاخت الوحيده اسمهه ثريا وهاي امنيه خطيبه الصغير ...

ثريا.. الحجيه اندمجت وياهن بعد شوط كامل من السوالف راحن والحجيه تمدح بيهن وكلساع وكالت صدك لاكالو نساوين بغداد عبالك بنات العشرين دهر فرجن شتخلن هالوجوه...

ايوب واوس رجعو وهم الي صبغو البيت وامنيه عدهه تحسس من ريحتو وخطيه تاذت من كدما سعلت جابولنه غده بيت ام نجم وبدينه نتكيف ع الوضع ...

اسماء..
سكنو ناس جدد بالبيت الي كدامنه وهاي عاده عند بيت عمي يسوون غده للجار واكفه اساعدهم وعمتي كالت مبينين خوش ناس حته ابو نجم يكول اعرف واحد بيهم...

ام نجم.. منو الي يعرفه ووين الحجيه كالت من الرمادي..
... يكول واحد من عدهم مساعد اسماء من ضربتهه دراجه ومتشكر منه البارحه من جاي شايفهم ينزلون بغراضهم ومسلم ع الولد ...

كايله احنه انتقلنه جديد واني جنت ساكن بهاي المنطقه وهسه اشترينه بيت وراح نستقر هنا ..

ام نجم.. اي الحمدلله اهم شي خوش ناس تعبنه من الي يكعدون هنا كلهه مطيرجيه...

اسماء.. احس اطرافي جمدت من كالت نفسه الولد الساعد اسماء ومن الانبار معقوله ادهم اجه سكن هنا والمصيبه هو وعائلته...

صح ماراح عن بالي ابد وكلت هسه اتزوج كل هاي الفتره بس معقوله الصدف هيج تسوي يجوز مقسوم الي بعد ماراح سنه صار وهسه رجع من جديد...

ام نجم مرت عمي بيهه طبع تحب تساعد الجيران ومن شافتهم يرممون بالبيت ودكول بيتهم لسه هوسه كالت راح اروح اساعدهم هذا الحجي جان ثاني يوم بعد ما ودينه الغده..

توسلتلهه اروح وياهه دكينه الباب طلعتلنه مره جبيره يصيحولهه الحجيه كعدنه بالمطبخ والحجيه صاحت يبنيات ثريا وينج امنيه...

عيني تترقب اريد اشوف اخته لومرته عقلي مشوش وما اعرف حته اتزن كلساع وكالت ام نجم اثكلي ولج...

اجت ابنيه الضحكه ماليه وجهه وكالت اهلا وسهلا وسلمت عليه عرفتني ع نفسهه اسمهه ثريا يعني هاي اخت ادهم حسب كلام ام نجم...

اندمجن بالسوالف وام نجم تخرب ع سوالف الحجيات واني عيني تصعد وتنزل ع البيت وع الغرف كالت ام نجم خالهةثريا اخذي اسماء تساعدكم ...

ثريا.. ما اعرف شحجي صح حلوه المساعده للجار بس شيعرفون عنه وخاصه جايين من الغربيه شبسرعه باعو ميانه وعادي عدهم يجوز كلبهم طيب وهاي طبيعتهم...

كامت البنيه تساعدنه وانه ماعدنه شي تقريبا بدينه نخلص بس بقت شغلات بسيطه...

اسماء.. كمت وياهه اتريد تصعد الغراض لطابق الثاني وبديت اصعد وياهه صاحت امنيه وينج يولي تعالي فوك...

صعدت ابنيه صغيره اصغر من عندي بهواي جسمهه رشيق وناعمه بشرتهه بيضه وصافيه عبالك مرايه ملامحهه عاديه بس شفايفهه مبرومه ...

سلمت عليه وعاگده حواجبهه واصلا ولا اهتمتلي تحجي ويه ثريا واني اتسمعلهن...

امنيه.. اسمعي ثريا خانم مو ماخذنه الكنتور حاصل فاصل وين اخلي ملابسي بالمطبخ..

ثريا.. يولي مو عفتلج خانه كامله مثل من جنه هناك..
امنيه.. مايكفني انطيني وحده بعد ملابسي لسه بالجنط..

ثريا.. يولي امنيه اخذي خانه من ادهم هو كنتور ابو ٤ ماخذهن كلهن حته لايوب ما يرضه ينطي..

امنيه.. شلون اخذ من ادهم واخلي ملابسي وياا طفر شي شياتين ويه ملابسه تريدين تخليني بحلك اخوج ماناقصني...

ثريا.. لا يولي عود اقفلي محد يكدر ياخذ من عنده بس انتي هو اشترى لو عبالك مشتريلو ملك ..

اسماء.. اسمعهه تحجي بطاري ادهم وتريد تتقاسم الكنتور وياا لوشبت النار بيه منو هاي ويعني جذب ما متزوج لان ماعنده غرفه ..

سالتهه انتي اخت ثريا ؟؟
امنيه.. لاااا مو اختهه انتي منو ماعرفتج؟؟
... اني جيرانكم اجيت اساعدكم اسمي اسماء ..

امنيه.. اهلا وسهلا اني امنيه بنت عمهم وخطيبه ادهم اخو ثريا..

اسماء.. وسعت عيوني وبلعت ريكي وحرت شسوي صدك صدمه جانت كلماتهه مثل التيزاب وانرشت عليه من كالت خطيبته ...

بسرعه راح بالي شلون عايشه ويا بنفس المكان وهاي الزعطوطه خطيبهه هذاك الاسد الي شوفته وحدهه ترد الروح ...

ماكدرت اظل اكثر لان اديه كامت ترجف غرت من عدهه حيل وتخبلت كلما اباوعلهه ابدي اكوم اموتهه اشاف بيهه وخطبهه ...

ثريا.. ما ارتاحيت لهاي البنيه حاولت تقلل من قيمه امنيه سالتهه بياصف انتي؟؟

امنيه.. مادارسه اني لحد السادس الابتدائي..
اسماء.. ووووي يعني اميه الله يعينج المادارس صعب يتعايش ويه الحياة..

امنيه.. لا مو اميه الامي الي مايعرف ينتقن الكلمات ويحجي ويه المقابل ...

ياما تلكين وحده دارسه بس السانهه زفر وماعدهه اسلوب وياما تلكين وحده مادارسه كل كلمه دكولهه درر طبعا البعض موالكل...

اسماء.. اي صحيح يله بعدج صغيره والعمر كدامج تكملين دراسه ان شاء الله خطيبج شنو شغله؟؟

امنيه.. ليش تسألين؟؟ انتي طبعج هيج فضوليه ترى اني مامتعوده غير بس ع ثريا فما احب اجاوب ياهو الجان..

ثريا.. اعرف امنيه ماتسكت بسرعهه غيرت الموضوع بس هاي البنيه السانهه موحلو خلت وراحت وامنيه ادردم ...

راحت فرغت خانه من كنتور ادهم واخذتهه الهه من اجه تكاونن هو يكلهه وين وديتي غراضي وهي دكلو جمعتهن بوحده ...

امنيه.. ادهم ترى اكعد بالمطبخ اختك ماتقبل وانت ماتقبل وين احطهم بكارتونه شو فهمني..

ادهم.. يولي غير انتي وثريا بواحد شلون تجين تبدلين بالغرفه ومخمود يمي ايوب..

امنيه.. ما اجي بس الملابس مال الطلعه اخليهم هنا ...
ادهم.. اقفلي وياج مو اجي الكا فاتح حلكو والرايح والراد يدحك بيهن...

ثريا.. استقرينه واخيرا وادهم يداوم يوم خفاره ويوم كاعد بيهه واوس كذلك وفاروق وايوب فتحو مجمع جبير  جمله مال مواد غذائيه ويكولون الشغل هين احسن من الرمادي...

قيس مقاطع الكل بس اوس يخابرو ومرات انه من افتح موضوع اخوتي بسرعه يسدو ...

انقهر ع فاروق لان من يوم الراح قيس وهو ضايج وساكت ومحمل نفسو المسوؤليه يحس هو قصر ويااا وما وفالو...

نيران مانعرف اخبارهه ابد بس مره عمتي ام جاسم خابرتنه وسالتهه عليهه كالت لا والله محد يعرف شي عنهه اتزوجت بقريه ورجلهه جبير ومتزوج قبلهه 2 وهي الثالثه...

محد يعرف الاسباب وليش وشلون ابوي وعمي مشترين بيت وعدهم سياره منين جابوهه ما ادري...

....

امنيه.. ورا العشا كاعده اشوف تلفزيون واسمع ادهم يصيح امنيه جان فوك بالغرفه..

صعدت اشوفه شيريد بس فتحت الباب انصدمت بالي شفته فاتح كنتوره وبيده قطعه من ملابسي الداخليه وابتسامه مكر ع وجهه...

بسرعه انداريت واريد انهزم سحبني من ايدي والمصيبه البتاع بيده ماجاي ينزله...

ادهم.. احطج هسه واخنكج بي يولي فهميني شكتلج انه لو واحد من اخوتي مدحكو..

امنيه.. دايره وجهي واحجي بلاول روح ضمه شنو ماكو خجل ..

ادهم.. لا يابه مستحيه حاجيني شوصلو اباب الكنتور حضرتج متيهه الاول والتالي..

امنيه .. خمطته من ايده انفضحت وركضت ضميته وسديت الباب وهو واكف كدامي وانهدي مرتجيه ع الباب وكلبي يدك سريع من الفشله...ماادري احتمال وكع من الملابس من طلعتهن ...

... موكلتي بس ملابس الطلعه اشجابو هين..
... هو تحقيق هو هم مال طلعه ...

ادهم.. ليش انتي عندج قسمين للبيت والطلعه وبعدين انه ما احب البنفسجي لاتشترين هيج الوان...

امنيه.. احس روحي معت مثل الزبده هو اني من قربه ارتبك وانوب بهيج فضيحه منين اطلع وانهزم من عنده...

يحجي ويتقرب عليه اعرفهه هاي خطوات الشيطان جاي يحضر بنفسه حته يفترسني...

ادهم.. يولي قياسو صغير طلعتي بوخه..

امنيه.. ادهم وخر خلي اطلع ولاتحجي هيج عيب ..
.. منين عيب العيب بالجيب هسه انه بطلت اسحب كلامي بسالفه الزواج عبالي كبرتي طلعتي مسويتلي تمويه ...

امنيه.. ياربي بعد ما اتحمل اتمنيت ايوب يجي ويكبسنه بهاي اللحظه لان ماراح اخلص من عنده ...

ما اعرف شحجي وشجاوبه بس مدنكه وافرك بايدي صدك الموقف فضيحه...

لزمني من زندي وخلاني ارفع راسي علي ما اباوعله عيوني تفتر بغير مكان وهو مستمر...

ادهم.. هسه شلون لازم نعقد اتفاق انه اتاكدت بعدج بطور النمو ننتظر لو نجرب نخليج تستعجلين بالنمو...

امنيه.. قرب نفسه اكثر لحدما انفاسه لفحت ركبتي وحسيت اشفايفه لامست بشرتي ...

انفتح الباب حيل وكالعاده ايوب هالمره ماحجه شي بس غم ادهم باثنين ادي ودار وجهه ..

ادهم... لك سريري ماتعرف ادك الباب..

ايوب.. والله ماكو سرسري غيرك اتزوج وخلصنه لو اهججك من البيت يول انه رجال اعزب اتقي الله...

امنيه.. عفتهم يتكاونون وشلتهه ركضه ليجوه ايوب فدمره جريء بشكل موطبيعي ومفضوح وينطيهه بالكصه...

جان راجع ع هويته من نزل لكاني كاعده يم الحجيه كعد بالكاع يلبس بحذائه ويكل للحجيه جده هاي امنيه كعديهه يمج ترى اكو ذيب فوك ...

الحجيه.. والله ياجده هاي النعجه هي راحت برجليهه للذيب  ..

امنيه.. طلع ايوب وهو يضحك والحجيه جرتني من دشداشتي وكالت اثكلي خلي طابوكه واثكلي ...

لو ادورون عليه ماتلكوني من الفشله شكول عليك ادهم هاي ثالث مره الحجيه تكشفنه...

اسماء.. يوميه اشوفه من غرفتي الفوك من يروح للدوام ومن يرجع كمت الليل كله سهرانه وابجي اريده الي باي شكل من الاشكال ما اتحمل بعد ...

لا اكدر اروحلهم باي حجه ولا اكدر اطلع لان صادفت عطله ماكو دوام قررت اصادق ثريا وبلكي اكدر من عدهه الفت انتباهه...

حتلو خاطب خطيبته مالايقه اله هو بس اخلي يحبني بعد ينسه ابو خطيبته...

بيوم من عدهن جان مي ماكو والبوري مالتنه مكسور كلت لعمتي اروح لثريا اجيب من عدهه صاحت بيه وماقبلت كتلهه البنيه صديقتي ونتراسل اني وياهه وهي صدكت...

دكيت الباب طلعلي واحد اسمر حواجبه معكوده ومبين عصبي حيل كال  اتفضلي ..

..  اريد ثريا اني جيرانكم.. ماحجه شي بس صاح ثريا وطلع رحبت بيه كتلهه انريد مي من عدكم البوري مكسور مالتنه...

ثريا.. اجاني ايوب كال وحده عليج بالباب شبسرعه صادقتي يولي ترى احنه ببغداد مو بالرمادي...

ثريا... ما صادقت بس خاف هاي اسماء جيرانه طلعت دحكتهه هي كالت اريد مي مدنكه اريد افتح الماطور حته انطيهه الصونده...

طب ادهم بس دحكتو وكفت بنص الطرمه وادحك ع ادهم انه من يمي استحيت وخجلت وهي بهالجراه...

اسماء.. لا حيل عندي ولا طاقه واني اشوف هذا الانسان الحبيته صار سنتين وحب من طرف واحد والمصيبه طلع خاطب ...

كلما اشوفه انعجب بي اكثر لابس بدله عسكريه والنجمه ع اكتافه وبيده علاكه من شافني بينت علي علامات التعجب بسرعه دار وجهه وتعداني...

تحجي وياي ثريا واني بس صافنه على اخوهه ياربي اتخبل اذا ماصار الي اخذه بكل الطرق لو مو عنده خطيبه...

ثريا تسوي الماطور واسمع صوت خطيبته الي اسمهه امنيه تضحك بصوت عالي وتصيح لا ادهم والله اكل لفاروق عوفني...

احس نفسي اشتعلت بنار الغيره وابدي افوت اسحلهه من ايدهه وهو مبين يشاقيهه ...

اخذت  الصونده وطلعت بس لو اسبح بهاي الصونده واشمر نفسي بدجله مايبرد كلبي...

ثريا... دخلت ليجوه لكيت ادهم حاضن امنيه من ظهرهه ومثبت اديناتو ع بطنهه ويدغدغ بيهه بلحيتو الخفيفه..

وهي تصيح وتضحك لان امنيه تغار بشكل من واحد يلمسهه وهو فرحان لفرحتهه...

بس دحكوني تركهه وهي انهزمت ودكلو الا اكل لفاروق عليك...وهو يكلهه مواجيج...

طلعت امنيه وادهم تقرب عليه كال ثريا منين هاي البنيه وشعرفج بيهه؟؟

... جيرانه اسمهه اسماء الكتلكم اجونه هسه اجت ماعدهم مي..

ادهم..  ثريا اخذي حذر من عدهه ما اريد تختلطين بيهه وخاصه امنيه ابعديهه عنهه مثل ماجنه بالرمادي هين نفس الشي ...

ثريا.. ليش انت تعرفهه شبيهه البنيه..
... مابيهه شي بس عينهه صلفه ...

حجه هيج وصعد ليفوك يجوز انتبه عليهه من وكفت ادحكلو صدك عينهه صلفه...

...

جانت الساعه ب3 ونص الظهر مدده بفراشي اجه ايوب يركض وهو يصيح ثريا وينج...

جفلت وكمت كتلو هااا شكوو؟؟
يولي وين جهاز الضغط تعالي لديوانيه فاروق يمكن مرتفع ضغطو خشمو ينزف...

ركضت بخوف للديوانيه لكيت فاروق مرتجي ع التخم ودشداشتو البيجي ملطخه دم من خشمو ...

وايوب كاعد بالكاع بمستوى رجلي ولازم ايدو مثل الطفل وقلقان ع ابو ...

واوس كاعد بصفو ومخلي ايدو على راس فاروق دموعي جرت بدون كلام...

اقيس بضغطو واصيح فاروق شتحس موهسه جان كلشي مابيك...

جان ضغطو معلك خفت علي جثير كتلهم اخذو للمستشفى مارضه ابد كال هسه ارتاح ويروح كام من مكانو ..

يمشي ومدنك راسو وحاني ظهرو اول مره ادحكو هيج مكسور هذا فاروق المايهتز ابد...

التفتت على ايوب كتلو شبي ليش تخربط؟؟

ايوب.. قيس النذل الي حرامات اكول اخوي كسر ظهرو علينه فاروق جان يشيل اللفه وينطيهه النه تالي خوش جازا قيس...

ثريا..  شبي قيس ايوب شبيكم ؟؟؟

ايوب.. قيس رجع ومثل كل مره اول واحد اتلكا فاروق تالي بالمطار وكدام كومه ضباط جويه اتلكتهم اهلهم ....

يدفع فاروق من صدرو كدام الناس حته الضباط الوايا ظلو يدحكون...

ايوب التفتت ع اوس وكالو روح كلو هالناكر الجميل صار سنتين يدرس بفلوس الخلفو لو بتعب فاروق ....

يتببببع.. متابعه ممتعه

اسمعوا هذا الفيديو صممته متابعتي الجميله