رواية ازمة ضمير الفصل الثلاثون 30 - بقلم Rozaya1122

ازمة ضمير ... البارت التاسع والعشرون
«للكاتبه روزايه»

آول يوم مآخذني الزهو وفرحآن
مآ مشتآقلك..مآ آجيت يم بآبك..
بعدهآ بـ روحي تلعب ريحه ثيآبك ..
ثآلث يوم متأخر أجآني النوم ..
آحس بـ نقص مآ موجود ..كآمل كلشي بس نآقص
مر آسبوع آحس النقص بـ الألوآن
نآقص لون مآ آعرفه ..
صفنت بـ صورتك وآحترت الغرفه
شهر عَده صآر النوم مو شرده ..
آشوف عيونك بـ كُل صفنه تتبده
وضآع العَد ..وضآع من المَحنه شگد
نهر مَره الربيع وچآن وجهك سَد .!
‏وانـه المتعـوب .. ادگ يا باب
أدگ يا باب ما ينسد
عرفت البوب كلها وما عرفني أحد..
....

فاروق... يخوي المايريدك ربح لاتريدو خساره انت العليك سويتو وماقصرت وياهه بعد ليش وشلون مابيدنه شي اعرفهه صعبه عليك وما تكدر تعديهه بس بعد الصار صار والبيدك شنو؟؟

قيس.. ساكت وماحجه ولاكلمه يريد يستوعب كلام فاروق مايكدر جله صوتو وكال فاروق انت متاكد من الي دكولو ؟؟

فاروق..قابل مجذب عليك يخوي رحت ودحكت بعيني تريد تروح بنفسك روح وتاكد ...

قيس.. نيران ربت على ادينه وانه ثاق بيهه الا مجبوره او ابوهه ماذيهه جان يحجي بكل هدوء حته موعصبي بس طلع بعده تحت تاثير الصدمه...

كام يريد يروح للفلوجه واخوتي يمنعو يكلولو على باجر بس جان مصر ويكول لازم اروح هي مجبوره وخافت وحجت هيج خوما اظل ادحك عليهه تضيع من ايدي...

ركب السياره وانه اركض ورا ماردت اعوفو وحدو صاح بيه ارجعي بس اشرلي فاروق معناتهه روحي اوس هو الي يسوق لان قيس رغم هدوءه بس رجفة ايدو واضحه...

طول الطريق ساكتين والهدوء مسيطر وصلنه للفلوجه بعد ساعه كامله بسرعه نزلت قبلهم ادك بالباب تمنيت تفتحلي الباب هي واكلهه لاتخافين كلنه وياج ...

طلع عمي يصيح شكو صاير شي شعدكم هادين عليه؟؟
قيس.. شلون هادين عليك؟؟ كل الي يدك الباب يصير هاد عليك  ماعندي شي وياك بس مرتي العفتهه يمك وادريك موكد الامانه...

فلاح.. ليش تذب الصوج بيه هي البت ماتريدك فوت يا بويه واسمع بنفسك وياريت تقنعهه لان انه مالي حمل روحي..

ثريا .. استغفر ربو قيس وطبينه جوه لمحت خيالهه من دحكتنه انهزمت  كعدنه بالديوانيه وابوهه يصيح عليهه اجت تمشي بنفس حالتهه قبل يومين حته قيس من دحكهه وكف ع حيلو وكال نيران شصاير بيج؟؟

كعدت ومن اول حجايه كالت قيس اني جنت مراهقه ماحبيتك ولامستعده اكمل حياتي وياك اني طلبت من بابا يطلكني غيابيا لان ايست من جيتك...

قيس.. ليش ايستي موكل اسبوع اخابرج وتعرفين شوكت اجي شنو الجديد بالموضوع نيران احجي لاتخافين ...

نيران.. ماخايفه من احد بس ما اريدك يوميه جايني واحد من عدكم عوفوني بحالي اني اطلكت وهاهي روحو بعد لاتجون..

ثريا.. عمي كاعد مايحجي ابد كام قيس وسحلهه من ايدهه ومامنعو ابوهه انه كمت وراهه اخذهه للغرفه وسد الباب كالهه نيران لاتخافين احجي منو معلمج تحجين هيج ..

نيران .. محد معلمني شنو اني ماريدك ..
قيس.. نيران انه وياج لحد اخر لحظه ابد لاتخافين ادري بيج متاذيه سولفيلي ولاتخافين هسه اخذج من بين عيونو واحميج بروحي ..

نيران.. قيس ما اريدك اني ما اريدك تحجي وتغطي باديهه مدري شصار بيهه بسرعه سحبتهه من ايدهه ورفعت اردانهه جانت لابسه بدي جوه ملابسهه ردت ارفعو ماخلتني صحت صاحت منهاره عوفوني جاي اكلكم ماريدكم لزكتو روحو منا...

تقرب عليهه قيس ولزمهه من اكتافهه حجه بهدوء وحنيه نيران حبيبتي اهدئي وثقي بيه بس تعالي وياي هسه ودحكي شلون احميج لاتخافين يابنتي بشنو مهددج ...

نيران.. محد مهددني اني ما احبك حاولت احبك وماكدرت واريد اعيش بعيده عنك..

قيس..  ميخالف ماتريدني ما اخليج ادحكيني ابد بس ارجعي للبيت ابوج ياذيج لاتامنين بي امشي يم اختج واوعدج ما ادحكيني ابد يله يانيران ...

ثريا.. دارت ظهرهه وطلعت خلت اخوي لاحول ولاقوه مايعرف شيكول عمي يطرد بينه ويكول روحو بنتي موتوهه روحو ..

احمد الله واشكرو قيس مو مثل اخوتي بالعصبيه والا جان كتلو بمكانو طلعنه برا بعد ما انطردنه بموقف يخزي والجيران ادحك علينه واخوتي العليهم العتب طلعوا فشلانين ...

رجعنه للبيت تلكتنه الحجيه سولفتلهه تصفك بديهه وتصيح ياربي اهدي هالبنيه وارحم گلب هالوليد ...

حته عشه ما تعشينه وامنيه حابسه نفسهه وماتقبل ادحك اي واحد ولا ترضه تاكل وانه اتنقل بين اخوي وبين امنيه وبين نار گلبي...

فرشت سجادتي ودعيت بحرگه كلب الله يحفظ نيران ويحفظ اخوتي من لوعه الگلب  ياربي اذا جانت بخطر احميهه واذا هي الرادت هالشي اسعدهه واسعد اخوي  بجيت ع السجاده وانه اتذكر شلون حجيت عليهه وذميتهه وحملتهه المسوؤليه...

رغم بعدني ما اعرف الاسباب بس نيران ربت يمنه واعرفهه مثل براءه امنيه وصدك حبت قيس بس ليش هيج سوت ما ادري ...

قيس جان هادىء الى ابعد حد حته مايسمح لاحد بينه يحجي بالموضوع ويكول خليهه ترتاح ما اعوفهه لو شما يصير الحجي مو منهه طالع مجبوره وتحجي...

مرن يومين واحنه نفس حالنه ماخلو اخوتي احد مادزو عليهم ويرجعون بفشله يكولون البنيه ماتريدو شكد صعبه الكلمه ع قيس بس رغم هذا وجان متمسك بيهه يكول لا مجبوره بس هالكلمتين يحجيهن...

اجانه الحجي راضي ويكول البت طلعتنه وكالت لاتجون بعد انه ماريدو شبيكم ماتفتهمون اخوتي حجو ع قيس كالوله كافي  خليهه تروح بس كالعاده هو ماعندو غير بس مو بيدهه مجبوره...

يوم 20/ 4/ 2009 صادف يوم الاثنين كعدت من الصبح على صوت قيس وهو يتقيء جانت الساعه ب6 الصبح ركضت علي لازمه الخاولي واكفه يم راسو حسيته راح يوكع من ما تقيء ...

ركضت ع فاروق جان طالع لشغل كعدت ادهم كعد يركض سندو وجبتلو مي ماماكل شي بس ضغطو متخربط قست ضغطو جان عندو هبوط...

كوه اكل شويه يله كدر يستعيك توازنو خابرت ع فاروق سد المجمع واجا اول مره يتخربط ضغطو صارت الساعه ب12 ونص الظهر كال اريد اروح للفلوجه ادحك نيران ...

توسلت بي اروح ويااا وادهم اخذنه جنت ادحكلو شارد بعالم ثاني لحد ماوصلنه لمنطقتهم وهو ساكت ومخلي ايدو جوه فكو...

نمشي بشارعهم وسيارات وهوسه وصلنه قريب ع البيت بس الجهال والالوان اخضر واحمر وصوت طلقات وهلاهل احسهه ذبحتني قبل ماذبحت قيس...

وصلنه مقابيل البيت واندحك بيت عمي مفتوح والزلم الواكفه جثيره وابوي يرحب بالناس وصوت هلاهل جاي من جوه ردت انزل بدون شعور بس منعني ادهم ...

من الهوسه محد انتبه ع سيارتنه بس قيس ما اتحمل بسرعه نزل وماخلوني انزل ادحكهم يحجون ويه ابوي والهلاهل والجكليت يطاير وطلعت نيران ابدلتهه البيضه وعريسهه بصفهه يكود بيهه...

السياره مقفله عليه وما اكدر انزل بس مثل الحمامه المحبوسه ظليت اريد انزل اسحبهه من ايدهه هاي مرت اخوي مو لواحد ثاني ادور ع قيس من بين الزلم الواكفه ما كدرت المحهم ...

دقايق وطلعت سيارة العروس وسيارات الزفه وراهه ادك هورنات والجهال مطلعه روسهه من الجامه وتصفك..

ادحك ع اخوي الواكف باثر صدمه ما منطي اي ردة فعل وادهم لازمو من كتفو وهو واكف يدحك على مرتو اطلكت بدون علمو وانزفت كدامو...

عيوني غوشت من الدموع موقف ماينوصف باي كلمه ولا اكدر اعبر عنو انتبه على وضعو قيس وما احسو غير يهد على عمي بالبوكسيات وهو رجال جبير وكع بمكانو...

ادهم اجه يركض وفتح السياره اخذ المسدس وانه نزلت ورا اكو ناس من كرايبنه اجمعو يفكون بيهم بس عمي وكع وشالو للمستشفى وابوي ركض ورا ورجعوا اخوتي باسى ومدنكين روسهم..

بسرعه صعدنه وداس بانزين ادهم بحيث كلساع اكول راح ننكلب قيس مخلي ايدو على كصتو وساكت ولا كدر يحجي حرف وانه حته اخاف ابجي خاف يصيحون بيه...

وصلنه للبيت واخوتي يهدون ع عمي والحجيه توكفهم بس جانو من العصبيه مايعرفون يتصرفون لحدما صارت الساعه ب٩ بالليل انتبه قيس على حالتو وكانو هسه استوعب الخبر...

جانو برا كلهم وطلعنه نركض على صوت قيس وهو متكاون ويه فاروق لاول مره ادحك هالمنظر قيس يضرب فاروق بوكسيات ومايرد علي ومخلي بكيفو...

كلما يدخلون اخوتي فاروق يمنعهم وقيس فاقد ولايدري بنفسو يرجع ع اخو ويضرب بكل قوه ويصيح امنتهه يمك ليش مو كد الامانه ...

لزم فاروق من ركبتو ويكلو انت السبب انت لو تريد جان منعتهه من الروحه انت السبب انت تكرهم وتريد تنتقم منهم انت دمرتني ...

ماحاس بنفسو ولا صوتو وصريخو واصل لشارع وفاروق تاركو براحتو ويحاسب بي ومحملو المسوؤليه..

لحدما تعب وكعد بالكاع وهو ايده لازمه ياخة فاروق واخوتي ركضوا علي كلما واحد يحاجي ينهد بي ويكلهم انتم السبب ...

اشرلهم فاروق تركو من عصبيتو مايعرف شيسوي رادو حاولو ويا بس بدون نفع وكلهم دخلو جوه وهو ظل للصبح برا...

انه مانمت وكعدت اباب المطبخ ادحك علي ساعه يمشي ساعه يكعد وساعه يدخن وساعه يلزم راسو بالم شجاي يتخيل وشجاي يفكر هسه ....

كعدت الحجيه لصلاة الفجر وطلعت برا تحجي وياا وكعدت يمو اسمعهه تحجي ويا وتهدي بي بس حجه بصوت مبحوح...

كال هي موبس غدرتني هانتني وماحسبتلي حساب ابد اطلكت بدون علمي واعتبرت الكدامهه جاهل مو زلمه وراحت وانزفت كدام عيني وانه انتظرهه ...

اقنع نفسي واكول مجبوره واكول متاذيه وابوهه موخوش ادمي بس لوتريد جان كالت انقذني جان كدرت كلشي تسوي بس بعد ماتفيد اليش ...

الحجيه.. العوض على الله يايمه محد مات ورا حرمه واعرفنكم انتم زلم عليهه العتب مايذلكم حب وسوالف النسوان..

قيس.. لا يابه محد مات ورا واحد ولا انه اخر واحد يتعرض لخيانه بس بعدهه جديده الاذيه هسه شكم يوم واتعود ...

الحجيه.. يايمه السويتو غلط مديت ايدك ع اخوك سندك وهو مامنعك لان يعرف كلبك ملجوم بس هذا فاروق ياقيس اذكرك بي لونسيت...

اذكرك بتعبو شلون يكعد بالبرد الفجر يروح للشغل حته يدزلكم مصرف وانتم ادرسون راح تتخرج بس المن الفضل منو جان كاسر ظهرو غيرو حته توصلون وترفعون راسو...

تدري بي مايسمح لمخلوق يكلو يول ودحكتو شلون وكفلك من الجبل وخلاك تفرغ غضبك بي وما اتندم ويكول معذور...

اعرف مابينكم فرق وعمركم قريب بس يبقه اخوك الجبير وبمثابه ابوكم العافكم طول بالك ياوليدي ولا تحملهم ذنب موذنبهم...

قيس.. انه من رحت لزمت ايدو بالمطار وكتلو نيران وثريا بامانتك مثل ما تحافظ ع ثريا حافظ عليهه بس اجيت شلكيت لكيت خطيبتي وع ذمتي مطلكه من مكيفهه وانزفت وتكليلي موذنبهم ...

تعرفين فاروق محد يكدر يوكف بوجهو ويكدر بلحظتهه يمنعهه ومايخليهه تروح ويكدر ثاني يوم يوكف فلاح عند حدو ويرجعهه..

كتلو لاتخلي نيران تروح خلي فلاح يمكم مؤقت بسبيل ماتروح ويااا لان تتقشمر بسرعه وتستخطي ابوهه وماتميز الصح من الغلط ماقبل لان حقدو عامي وكال مافاتح بيتي ملجأ لفلاح وبنتو موصغيره...

شحصلت من حقد فاروق كلشي يكدر يسوي ويكدر يسكت ديوان كامل بس هو الي وصلهه لهاي المواصيل لان گلبو حجر ولاعبالج هسه هو متندم لا هسه هو زاد حقدو وضاف واحد لقائمتو الجديده وينتظر شوكت ياخذ ثارو....

الحجيه.. الله يبعد عنكم الشيطان ياولد حليمه ومايشتت شملكم كامت الحجيه وكعدوا اخوتي سويتلهم ريوك والكل ساكت...

قيس ماقبل يتريك وراح لغرفتو وفاروق بدل وطلع هو وايوب واوس وادهم وراهم طلعوا افتر بالبيت واستغفر لحدماصارت بالعشره نزل قيس وجنطته بيدو ...

باس راس الحجيه وباسني وطلع ركضت ورا وين رايح كال راح ارجع ماكو داعي انتظر تخلص اجازتي وكلي لفاروق ماراح اسامحو وخلي يفيدو هذا الحقد...

صحت ورا وبجيت بس ما اهتم وكلبو مات ولا جنو هذا الحنين  ركضت دكيت ع فاروق كتلو قيس راح وابجي كال اسكتي هسه راح اروح ورا...

للعصر يله اجو من الشغل الوجوه مغبره وضايجين كل الي عرفتو متكاون قيس وفاروق وسافر قيس لبغداد ومناك يروح لروسيا ...

هملت دراستي بهذا الاسبوع رجعت اداوم بس جفيان شر ومالي خلك كلشي اجواء البيت ماتساعد وبس ينافخون ويتكاونون...
....

بعد مرور شهرين...
استلمت نتيجتي ناجحه واخيرا اتخرجت من كلية الصيدله واوس تعين قسم تخدير بالمستشفى القريبه علينه وادهم يروح كل عشرة ايام ويجي عشرة....

قيس مره وحده اتصلت بي لان ما يجاوب ولو ما احصلو كال زين بس صوتو مايكول هيج وكل اخبار عن نيران ماكو ...

بيوم منهن جانو كل اخوتي موجودين وامنيه كالت اريد اروح لابوي بدون مقدمات زكح بيهن ادهم كالهه ماعندج ابو انسي...

امنيه.. موحبنا بي ولا باختي بس اريد اعرف الحقيقه وين لازم اروح واشوف...

ادهم.. واذا عرفتي شراح تسوين الفات مات وبعد مايفيد كلشي واختج صار شهرين من تزوجت تروحين شكو حاولت وياا بس ماقبل وهالمره فاروق جان ساكت...

من سالفه قيس ما يدخل باي شي ولا الو علاقه وكلما حجه وكال كبرتو اعتمدو ع نفسكم ...

الحجيه غيرت جو لان دحكتهم شلون كأبه كالت يول ايوب ابو سمره لكيتلك بنيه شلونهه جنهه حلقومه...

ايوب.. وشسوي بيهه ياجده انه ماناوي اتزوج هسه ترى كدامي 3 غير يتزوجون..

الحجيه.. خايب اسكت غير لو ادحكهه اتيه الاول والتالي هيج تخبل حليوه وزغيره وبيضه انه كلت انت محروك خلي ناخذلك وحده بيضه...

ايوب.. شبيه محروك اني اسمر حجيه مو اسود..
الحجيه.. جده فاروق اسعه وياي خلي انزوجو بلكي لنو سامع من عندك انه كلبي مفرفح اريد اهلهل واطش جكليت...

فاروق.. عوفي ايوب زوجي ادهم شو خطيبتو وكدامو شننتظر بعد ...
الحجيه.. هو انه كلت اثنينهم بيوم واحد شدكولون ..

ادهم.. والله مدام فتحتو الموضوع انه ناوي اتزوج بس دوامي مقيدني قدمت ع نقل وبلكي انقل هذا الشهر للانبار ونتزوج جنت انتظرهه تكبر وهاي كبرت..

ثريا.. يعني اطلع اشتري ملابس ما اصدك واخير نطلع من جو الكأبه شويه خلي نفرح...

فاروق.. مدام الموضوع كلو ع الزواج انه اريد اخبركم بشي جده اذا نتقدم لياقوت بنت امل ينطوهه اوس رايدهه ...

الحجيه.. وين تلگه هاي الفرخه مثل اوس بس مو هذا ابن عمهه المنعول كاعدلهه ركبه ونص بس انتو لاتحجون هسه خلي انجس نبض واندحكهم عوفوهه وراي...

ثريا.. دحكتلهم واحد واحد ايوب جان نايم ع ظهرو ومعليك رجلي ع الحايط ويدحك ع تلفزيون ...

واوس طابك المخده ومرتجي بالكاع ويسولف ويه فاروق الكاعد ع التخم ومنزل رجل وثاني رجل..

ادهم عينو على امنيه الي ادحك بالتلفزيون ع مسلسل هندي متابعتو هي وايوب ويتكاونون علي ...

بنص الكعده ومانحس غير امنيه كمزت من مكانهه وتصيح فاره فاره وترفع بثوبهه للركبه انه عود صرت سباعيه اريد استر امنيه فاتت الفاره من جواي ومثلهه شايله ثوبي واكمز واصيح فاره فاره...

ادهم ركض ع امنيه ينزل بثوبهه وهي تصيح فاتت جوه ولازمه ثوبهه وهو يكلهه وين جوه يولي...

سحلهه من ايدهه للغرفه والفاره ركضت ورا المجمده وركض وراهه ايوب طبعهه بالكاع من قوه الضربه...

امنيه... اني من جنت زغيره اتخبل من الفاره واحسهه تمشي ع رجلي كلت صعدت ليفوك اكمز واصيح فاتت جوه سحبني ادهم للغرفه ويكلي فضحتينه يولي...

انتبهت ع نفسي لازمه ثوبي مثل الجهال المطهره وهو صافن عليه وعيونه تلمع بوكاحه ...

يتقرب واني ارجع ليورا طخيت بالحايط وهو قريب عليه صار ولزمني من ثوبي من نفس المكان الازمته وكال وين فاتت شوو خلي ادحكهه...

... لازمة ثوبي بيدي وابعد بي بايدي اكله روح ادهم طلعت الفاره ..
... شلون فاتت جوه وشلون طلعت يولي ياب هاي ممتلكاتي لازم اطمن عليهه ...

... خليت ايدي ع صدره اريد ابعده وانهزم من عنده بس جان اسرع من عنده ولزمني من خصري ضعت بين اديه اني يادوب اوصل لصدره وهو يسحبني علي...

نزلت راسي واحجي ادهم وخر لايجون اخوتك راحت الفاره خلي اطلع..

... لا يابه دخول الحمام مو زي خروگو والله يا امنيه اخذ حيفي من عندج على رفعة الثوب...

... هستوني اريد احجي لوه اديه بايد وحده ليورا والثانيه ملتفه ع ركبتي وسحب شفايفي بقوه كلما اريد اتحرك مايخليني...

جان يبوس بسرعه ويرجع ابوسات متفرقه على كل وجهي حسيته ايده الي لازمتني صارت قطعه جمر...

هستوني اريد ادفعه انفتح الباب وما انشوف غير ايوب واكف وصافن ويصيح يول فاروق ليش ما اتزوج ادهم...

ادهم تركني وراح يطلع بي وايوب صوته شعلوه ويصيح زوجو ادهم باقرب فرصه اني عليه بلغت...

حجيه ادهم يمارس الفحشاء بغرفتج مال العباده وانتي كاعده هين وماتدرين...

امنيه.. انفضحت وكعت بالسان ايوب الي ماعندو كلمه تنظم ظليت خاتله بالغرفه والهوسه برا وصوت الضحك خلو ادهم مايعرف شيكول طلعت البوسه سم علي...

الحجيه.. ياجده ادهم مستفرد بالبنت جنهه عجينه وانت ضابط ملعب ومحد يكدرلك...

ادهم... لاتصدكين بي جده هذا هتلي وسربوت هي خطيبتي طيح الله حظك يا ايوب ...

الحجيه.. من حجه ايوب الصدك طلع سربوت ايوب جده مالك علاقه بي كل ضابط مطكطك وهذا بدت العلامات علي...

ثريا... شقاهم ويه الحجيه قوي وهي متعوده عليهم انه رحت يم امنيه خربانه ضحك عليهه وهم برا لازمين ادهم دك تصنيف...

ورا شكم يوم كاعدين عصريه ودك التليفون رقم غريب ماجاوبت بس من كدما لح بالاتصال رديت...

بس كلت الووو اجاني صوت ابنيه خافت كالت ثريا انه نيران شلونكم امنيه شلونهه وقيس شلونه حجتهن كلهن دفعه وحده...

اتصنمت ماعرفت شحجي كتلهه زينين انتي شلونج ؟؟
اني ما اكدر احجي ثريا كلي لقيس يسامحني ويبريني الذمه اني ماخنته ...

ثريا ديربالج ع امنيه امانه عدكم لا تأذوهه ولاتخلوهه تروح يم ابوي ابد امانه كلي لقيس يسامحني ...

ثريا... اوكفي نيران لاتسدي كليلي انتي شلونج؟؟. نيران اذا جنتي مظلومه اصبري لاتسوين شي بنفسج ...

مالحكت اكمل كلامي بسرعه انسد الخط امنيه لازمه حلكي كتلهه دكول زينه كعدت تبجي ع اختهه والحجيه وصتني ما احجي لقيس من يخابر لان يتاذى اكثر خاف جان ناوي ينساهه....

....

اجت يمنه ياقوت وامهه واوس طاير بيهه وصارت بيه لوعه من اخوتي خاف هم يحب ويتعلق ويتاذى ع الاقل واحد بيهم خلي ينسعد ...

النظرات ومرات الكاهم كاعدين بالحديقه من ادحكني تخجل كعدت وياهه كتلهه تحبي كالت اي وهو هم يحبني وكال راح اخطبج شكد بسيطه هاي الامنيات ...

لا ضحكو ع البنات ولا سوو علاقات ليش هيج حظهم عاثر ومايحصلون حلمهم ...

من قررنه نخطب ياقوت وحصلنه موافقه من امهه اجانه الرد من ابن عمهه كال ما انطيهه انه اريدهه...

فاروق شكد تعب ودز ناس ومايفيد لان من صغرهه رايدهه وناهي عليهه ومن سمعو باوس بسرعه لموهه واخذوهه واتزوجت بشهر واحد...

ثاني واحد من اخوتي ضاك لوعه الحب ما اعترض ع قسمتو بس التزم الصمت ومجرد يداوم وينام هاي حياتو ومرات اسمعو يحجي ويه فاروق يكلو والله اول حب الي شلون انساهه .....

كل واحد بيهه حصل نصيبه من ايوب لقيس لاوس انه الي ضگت اللوعه كلو من ورا الحب ...

قيس واوس توأم واثنينهم نفس المعاناه مرو بيهه وشصار بقيس صار باوس ونفس ردة الفعل عدهم...

من يوم الي كعدنه بهذا البيت مادحكنه الراحه صدك لو كالو عتبتو موخير نكوم من وحده نوكع بالثانيه...

جان قرار اخوتي مفاجئ وكالو نشيل لبغداد لان ادهم ما يرهم ينقل ولازم يظل هناك وفاروق لازم يدرس ببغداد...

كالو مالنه ظلنه هين والوضع بهاي السنه خربان وطلعت احزاب وعصابات وبوقتهه جان مصعب الزرقاوي والكتل بالجمله حته ناس عافت الانبار وانهزمت...

وفاروق كال شمضيعين هين انبيع كلشي ونشيل الانبار اخذت من عدنه ما انطتنه وكل واحد بيهم عافت غصه بكلبو ...

وصدك صفوا كلشي اخوتي بشهر واحد ودزينه خبر لاهل الحجيه اخذناهه وياهه وحملنه بهذاك اليوم وودعنه الانبار وعفنه ذكرياتنه وايامنه الحلوه والمره وراح انعيش بمحافظه لاول مره ادخل بيهه وادحكهه شلونهه...

تحركت السياره وعيونه الدرب وامنيه دموعهه تجري ع اختهه العافتهه وراهه ومانعرف حياتهه شنو هي هاي الدنيا ماراح ترحم ناسهه ...

وصلنه لبغداد بعد طريق متعب وطويل سيارات جثيره وناس وهوسه راسي افتر وانه ما ادري حته وين نكعد بس الي ادري بي اشترو بيت والبيوت ببغداد غاليه...

خليت رجلي ببغداد وما اعرف شراح نواجه هين وياترى حياتنه للاحسن لو للاسوء واخوتي يكدرون ينسون المرو بي ويرجعون مثل قبل؟؟؟

يتببببع... احبكم كومه..

تعرفون اليوم استراحتي بس تفاعلكم يشجع انزلكم بارت تستاهلونه وشغله ثانيه اعتبر هذا البارت هديه عيد ميلاد لمتابعتي العزيزه كل عام وانتي بالف خير يارب تحقيق الاماني
user64766510