رواية بعد فوات الأوان الفصل الاول 1 - بقلم آنين الليل

بسم الله الرحمن الرحيم
نبدأ على بركة الله
//❣️❣️///

💙بعد فوات الاوان 💔💙
🌷البارت الاول 🌷
#بقلمي آنيين الليل

////////////💙💔💔💙/////////
يممه شكو شصاير
ما ادري يممه لا تصرخن علاوي وين
اجت سماح وهي تصرخ هذا علاوي يمه شكو

امي حضنت علاوي وهي تگول ما ادري شنو صار شلون بينه ما ادري
اندك باب البيتونه حييل امي گالت //معقوله صعدوا علينه وراحوا ايكتلونه
جاوبتها بخوف =لا يمه منين صعدوا بيت ابو باقر نفس السياج خلي اصعد اشوف منو
زينب وهي تبچي //لا مروه وين صاعده خاف يكتلوج
=خلي اتدنى ع الدرج واتصنت اشوف منو

رحت ازحف والبيت احترك من الرمي وانا اسمع ام باقر
:خيه ام امين افتحولي الباب بسرعه
رحت زحف ع البايات لمن ما وصلت وگلت =منو منو
اجاني صوت جارتنا ام باقر //انا خاله بسرعه ابو باقر يكول اعبرو من البيتونه البيتنا
جاوبتها بخوف =ليش خاله شصاير ؟

ام باقر //ما ندري بس بره الدنيا انگلبت ما ادري ياهو من الولد كاتله واحد
رجعت الامي الي خرطت خدها دمته وهي تگول
:لا لا اوليداتي ما يكتلون احد شنو هالفقره

جاوبتها وانا ابچي = ياالله يمه خلي ناخذ علاوي ونطلع لا يحرگون علينه البيت
باوعتلي وهي يابس ريگها وشفتها بيضه //روحي البسي عباتج انتي واخواتج واصعدن وانا اجي وراجن
=وانتي يمه
:خلي اجيب الجناسي وفليسات امين

لبست سماح عباتها الاسلاميه وانا لبست عباتي مالت الراس وزينب بدشداشه بس شال على راسها واخذنا علاوي
ورحنا رصلنا للبيتونه لگيت ام باقر واگفه وعبرنا السياج ونزلنه على بيت ابو باقر
واجت امي ورانا وهي شايله جنطه
ونسمع صوت ابو باقر بره وهو يگلهم

:عمي البيت فارغ واحنا جوارينهم والبيت بعهدتنا
اسمع صوت يرجف ويگله //حجي اتكتر
ابو باقر //عمي امشي عليكم الله ومحمد وعلي تره بس حريم بالبيت
صوت ثاني گله //احنا اليوم نريد الحريم اول ما ناخذ الحريم
اجه صوت من الجوارين //اتخسا تجيس اظفر وحده منهن اله كلنه مجطلين

نفس الصوت //حجي جاي انگلكم اتكتروا مو مال مراجل هسه هذا ثار وثار چبير
ابو باقر //شلون نتكتر جوارين وحريم شنو ما عدنا غيره
واحد رد بعصبيه //لا تحچون زايد اكسروا الباب واليوصل ينكتل احنه ناس طلابت ثار

ابو باقر //عمي ماكو هيچ شي تفوتون على البيت البيوت الها حرمه
ما سمعوا الكلام والمصايح كسروا الباب وما ندري شنو صار بالبيت بس نسمع الرمي بكل مكان وامي تدك على وجهها
واحنه بس نبچي وخايفات  بعدها صار هدوء وصرنا نسمع ناس تحچي بره
لمن ما اجه ابو باقر

امي تلگته //حجي باالله وبيك شبيهم ولدي
ابو باقر // ما ندري ان شالله ما بيهم شي خابري امين وانا اخابر ابو امين خلي استفسر

امي //فدوه حجي ما عرفت شصاير
ابو باقر //ما ندري ناس يگولون الولد كاتلين واحد وناس يكولون حادث وناس بي ميته
وهسه دخلوا ع البيت ما خلو شي لا تلفزيون ولا ثلاجه ولا مجمده وحرگوا الحديقه وكتبوا ع الباب مطلوب دم

/////////////// /. ///////////////. //////////
مرحبا
انا مروه اعيش ويه ابوي وامي واخواني انا الچبيره عمري من صارت الاحداث چان عمري اثنين وعشرين سنه
انا مواليد 1989

ابوي اسمه طالب  وامي اسمها سهام بس هي دووم تگول سموني منسيه على اسم بيبي امها الله يرحمها
امي چانت تحمل وهي ترضع يعني الرضاعه ما تنطيها مناعه وراي بسنه اجه اخوي امين وبعده اجت اختي سماح
وراها اجه صادق وبعدين زينب واخر العنقود علي

امين ترك المدرسه وصار يشتغل نجار بغير منطقه بس حتى يفتك من لومة ابوي الي دووم يگول

—- لو عدي ولد يشتغل ويساعدني  چان ما صار هذا حالي فامين بس نجح من السادس وصار بالاول متوسط بطل
واشتغل صانع نجار ويه واحد صديق خالي اسمه حجي عبد ابو زهير
اما صادق يدرس وهو هسه بصف الرابع اعدادي وعلاوي بصف الخامس ابتدائي

انا من اخذت الثالث متوسط ابوي بطلني ولبسني عباية راس وسماح همه بس وصلت الصف الثالث متوسط
ونجحت هم بطلها رغم احنه شاطرات وشاطرات كلش وبشهادة المدرسات لكن هو يگول
—— ما عدي بنيه تكمل البنيه الها رجلها وبيتها
وزينب هسه بصف الاول متوسط واكيد بس توصل للثالث هم يبطلها

ابوي عنده اخ اكبر منه اسمه چاسب واخت وحيده اسمها امل عمي چاسب اتوفى وهو شاب  چان عمري
اقل السنه وترك ولد اسمه جمال وچان عمره ثمن سنوات وبنيه اسمها ملاك وعمرها ست سنوات
رباهم ابوي وزوج ملاك الواحد من اقارب بيبيتي ام ابوي زوجها بارادتها ما جبرها بالعكس چان ايگللها اريدج
تكملين دراسه وتحصليلج شهاده تفيدج لكن هي ما تحب المدرسه چان كل همها تلبس وتطلع 
ومن اتزوجت ابوي دووم يروح ويطمن عليها ومن تجي يحتار شيسويلها وينطيها مصرف رغم ما عايزه
عكسنا احنا الي چان العوز والفقر مبين علينه

اما جمال فهو مثل ما يگولون اهلنه چان (الكل والكليه )يحكم وينهى ويتدخل بكل زغيره وچبيره وابوي ما يگله لا
بالعكس چان ايئيده بكل كلمه يگولها وياويلنه اذا ولد او ابنيه اعترضوعلى كلامه بذاك اليوم ما نعرف شنو يصير بينه
من ضرب وغلط واهانه

عمي چاسب الي ما اتذكره وشايفته بس بالصوره چان موظف بالمستشفى بصفة كاتب يعني عنده راتب وهم عنده
محل زغيراشترا تگول امي اخذ فلوسه من ابوي وصار من يرجع من الدوام يبيع بي حلويات وعصائر وبعدين صار
يبيع بي مواد غذائيه

وره ما اتوفى عمي چاسب ابوي شاف ولد يعرفه گعده بالمحل مقابل يوميه لكن من كبر جمال باع المحل وصار
يشتغل بتجارة السيارات بدا يشتري سياره وراها بفتره يبيعها وهيج الى ان مشت الشغله بايده لان اشوفه كل
يوم يشتري سياره ويبيعها على ما صار عنده معرض سيارات خاص بي ومن تجي ملاك چان دووم ينطيها فلوس
والبيت مأجره وبعدها فاتح ملاك يبيعه وهي تاخذ حصتها لان هو يريد يشتغل بحصته حتى يكون نفسه ويشتريله بيت
وفعلا ملاك ما رفضت وافقت وباع البيت وانطاها حصتها وگلها لازم تشوفلها بيت زغير او قطعة ارض حتى تبنيها

الكل يتساءل ام جمال وين
بعد وفاة عمي بقت ام جمال والي اسمها رباب بقت ابيتها هي وجهالها وصار ابوي يتردد عليهم ويلبي كل احتياجاتهم
قبل ان تطلبها بحكم انو هي ارملة اخو
ام جمال حسب ما تسولف عليها امي وعمه امل چانت حلوه ومهتمه حييل حييل بنفسها يعني من اتوفى زوجها
ما اهتمت حتى لبسها الاسود چان اسقاط واجب وكله ع الموديل

بقى ابوي اكثر من عشر تشهر بعد وفاة عمي وهي شنو تريد هي وجهالها تطلبه من ابوي وهوه
ينفذ بدون ما يناقشها
ودائما ياخذها للزياره ومناك يرحون يزورون قبر عمي

وبهاي الفتره ما خلاها تصرف لو فلس على جهالها وعلى نفسها كله من ابوي والي بنفس الوقت
حارم امي وحارمنا من ابسط متطلبات العيشه 
رباب من تريد اي شي يجيبه الها زايد مو ناقص وصار اخوي امين واهنا اتمنت امي ان ابوي ايغير اسلوبه
لكن بقى نفس ما هو وبيوم اجه ابوي وصاح الامي وگلها

—- سهام اليوم دز عليه طاهر اخو رباب مرت چاسب
امي// خيير ان شالله
ابوي //كل الخير بس الولد گلي ابو امين ما يصير يارايح ياراد على بيت چاسب
امي //ليش ياستار غير بيت اخوك
ابوي //اي بس اخوها يگول صعبه روحتك ورجعتك وهي اختنا بعدهي شابه
امي //لا مو صعبه ابنها جمال الله يسلمه صبي عمره تسع سنوات

ابوي //انا هم گتله  هالشكل بس هو گال لازم وجودك يمهم اله صيغه شرعيه لو ماكو راح اهلها ياخذوها
هي وجهالها واياجرلها بيت تگعد يمهم وبيت چاسب اياجره
امي //زين يسوي احسن اختهم تبقى يمهم وگبال عينهم
ابوي بنتر //شنو زين يسوي اولاد اخوي يتربون عد الناس الغربه
امي //مو غربه طالب ذوله خوالهم

ابوي //اي خوالهم وباجر عكبه على بو اختنا زغيره يزوجوها
امي عرفت شنو براس ابوي گالت //طالب رباب صحيح زغيره بس وين تلگى مثل چاسب دللها وهو عدل وهو ميت
ابوي //. صح كلامج وانا حتى الم ابن اخوي وبته قررت اتزوج رباب الخاطير جهال اخوي
امي باستغراب وخوف //تحچي صدك طالب
ابوي //چا شني اتشاقى وياچ
امي //انا ما ارضى انا ما مقصره بش.........
ابوي خلى ايده على حلگه وگال //بسچ ما اسمع نفس شنو جاي اخذ رايج واشوفج تقبلين لو لا انا اجيت ابلغج
خاف احد ماحود يجي ويگلج وتگولين ما ادري (ابوي هز ايده وحچى باستهزاء )هههي هي عبالها اخذ
رايها صدگ مو بعقلها

بيومها امي ما نامت وبقت بس تبچي خصوصا وابوي ما رجع للبيت ثاني يوم الصبح اخذتنا وراحت
العمتي امل اخت ابوي وهاي للامانه تحب امي وتحبنا كلنه وحچتلها عمتي هزت راسها وگالت

—- تخبل طالب شبي شيريد
امي // چا رحت الاهلي بس اخواني يكلولي ذبي جهاله علي واحنه نخليج على راسنا وانا ما اكدر اعوف الجهال
عمه // ادري بيج سهومه طالب ما ينجرع وانتي كل شي اتحملتي الخاطر جهالجو
امي بترجي // فدوه اموله مو تگليله انا گتلج
عمه //لا خيه شنو قابل ما اعرفه

رجعنا ويه عمتي الي انتظرت ابوي الى ان اجه وسلم عليها وهو يباوع الامي ويخزرها بعين الغضب بعدها عمتي راحت
ورا للغرفه وسالته// طالب صدك السمعته
ابوي بلا مبالاة هز راسه وكلها //اي صدك
عمتي //طالب خويه ليش تريد اتخرب بيتك بايدك الحمد لله مرتك بعدهي جاهل وحلوه وعندك وليد وبنيه
وانت هم بعدك شباب

ابوي بنرفزه //ها اسهيمه راحت وشكتلج
امل // لا ما شكتلي طالب انت يادوب عايش انت وجهالك  بعد شلك بشلعان الگلب
ابوي // على مود احافظ على اولاد اخوي اهلها ما يخلونها يزوجونها ويضيعون الولد والبت
امل //خويه تره رباب مو زغيره

ابوي //شبيج امل رباب بعدهي زغيره وحلوه ومثقفه والناس ما ترحم والولد والبنيه هواي يحتاجون
امل باستغراب //شيحتاجون خويه عدهم خير المحل وراتب چاسب يعني احسن من عيشتك
ابوي بعصبيه //اسمعي امل گليلها الصاحبتج انا راح اتزوج رباب عجبها اهلا وسهلا ما عجبها اخليها خدامه هي
وبتها وابنها (يقصد انا واخوي امين ) الرباب وجهالها
امل //سهام ما الها غرض بس رباب ما تصيرلك نسيت شسوت بامي الله يرحمها

ابوي //باالله فهميني شسوت
امل تهز بايدها //لا ما سوت شي بس ترمت ما تگعد عدها وخلت شوفت ابنها حسره لو نسيت من غير تكبرها
علينه لومن چنا نروح نشوف چاسب شلون يثگل وجهها
ابوي //لا متوهمه بالعكس هي هادئه وانتن ما تحبنها تكولن متكبره
امل //اي مبينه هادئه من لمن تگل الچاسب غير اسمك مو حلو وما تقبل انسمي اله ابو جمال

ابوي بقى ساكت اتقربت علي عمتي امل وهي تگله //اسمعني طالب اذا تاخذ رباب راح تغربك وحتى تصير ما تعرفنه
جاوبها //اي مو تشوفيني زعطوط گدامج امل انا راح اخذ رباب واربي جمال واخته وان شالله تحمل وتجيبلي جهال
امل //انت عدك خير من الله
ابوي //وانا ما گايل شي اريد يصيرون عدي اولاد يصيرون عدي عزوه شنو چاسب راح وخلا بس جمال
لو تردين مثل ابوي الله يرحمه اخذ امي وحصلتنه تلاثتنا وبعد ما اخذ وراها وهاي انا چاسب مات وبقيت بس انا
لو ابوي ماخذله مره چان هسه عندي اربع خمس اخوان

بعدها ابوي فات برايه واتزوج ام جمال وبقت عنده سنه وبهاي السنه چان يمر مرات قليله على امي الي چانت ساكته
ما تحچي ويا لان تعرف مو بس هي الي راح تتاذى لا انا وامين راح نتاذى اكثر لذلك هو چان يجي يجيب مسواك
كل اسبوع او عشر تيام يمر ساعة زمان ويروح

من ازوج ابوي ام جمال بقت سنه وحملت ولمن وصلت للشهر السادس بالليل صارت تنزف وابوي نقلها للمستشفى
وهناك سبحان الله اتوفت وابوي بوكتها حزن عليها ومن يومها صار جمال وملاك عايشين عدنا وكلمتهم
هي الي تمشي ولو شنو يردون ابوي يلبي الهم وهو الممنون
اما امي واحنه وياها  فما النه اي كلمه گدام ابوي وجمال

دووم اسمع عمه امل وهي تگل الامي //خيه سهومه احنه ابختج انتي فقيره ومن اهل الله
وامي ترد عليها //انا دووم مسلمه امرنا ال الله

اشوف امي حزينه ومقهوره وهواي مرات اشوف ابوي شلون يضربها على اتفه الاسباب ومرات اذا ملاك او جمال
گلوله زمخت علينه او ردنا الحاجه الفلانيه وما نطتها النه ينگلب عليها شيطان رجيم وهو ايگلها
—— ما كفاج ام السحوره الي سويتي ما كفاج موتي المره
هي جوابها نفس ما هو //لو انا ام السحوره چان عدلت بختي وبخت جهالي وياك

ابوي چان يشتغل بياع شراي بالحلال يعني يطلع من وره صلاة الفجر ويرجع الساعه عشره الصبح وهو جايب بايده
راسين او تلاثه من الحلال الي يربطهن بالترك الوره وامي هي تدير بالها عليهن وتنظف مكانهن وتنطيهن علف
چان ابوي من يجي ينام ويا ويلنه اذا طلعنه صوت معناتها كل الموجود راح ينضرب
فچنا نگعد من غبشه ونخلص الشغل انا وامي قبل لا يجي ابوي

اما الظهر يجي جمال ابن عمي وهم نفس الشي لازم نسكت وما نحچي لان يريد ينام حتى يطلع العصر وما يجي
اله نص الليل من اشترا جمال المعرض مال السيارات صار ابوي ما يرجع الضحى للبيت لان يروح للمعرض
وحتى الظهر اكثر المرات يبقى وما يرجع اله المغرب وهاي يمكن الحسنه الوحيده الي سواها جمال خلا ابوي
يشتغل وياا وما يجي اله بالليل

ابوي ويانه عصبي وما يتفاهم ولا مره حسينا بي ايحبنا او يحب اخواني او ايحب امي
نحس كل عاطفته الجمال وملاك
جمال واخته چانوا خبيثين جمال دائما يسوي مشاكل ولا واحد بينه ايحبه بس ابوي چان ايفضله علينه وكلمته
عنده ما تصير اثنيين وملاك متكبره وتباوع النه باستزغار

بيتنا مساحته چبيره بس قديم جدي الله يرحمه كتبه باسم ابوي وعمتي امل لان اشترى بيت العمي چاسب الي سكن بي
هو ومرته
عمتي امل متزوجه رجال اسمه جمعه يصير ابو وجدي اولاد عم لذلك احنه نسمي عمي
ابوي بعد وفاة جدي انطى عمه امل حصتها من البيت وصار كله باسم ابوي

وره سنين قرر ابوي يبني البيت لان قديم وتعب وخاف يطيح علينه وكعه للگاع واجرنه بيت بنفس المنطقه متكون
من غرفتين ومطبخ وحمام فصرنا احنا البنات وامي بغرفه وابوي وجمال واخواني بغرفه واتذكر وصل للشبابيك
او. وگف بيومها اجه خالي وشافنه شلون گاعدين بالبيت الاجار وسولف ويه ابوي وابوي گله ما عندي اكمل خالي
راح وره يومين اجوا خوالي
تلاثتهم وشالوا خمس ملايين انطوها الامي وگلولها هاي حصتج من بيت ابونه واحنه چملناج من عدنا هاچ كملي
بيها بيتج

چانو العمال يشتغلون بالنهار اما بالليل فچنت انا وامي واخوي امين نروح للبيت نشتغل ابدال العمال
لا تستغربون چنا نشيل الطابوگ ونحضره وندني السمنت وننگل الرمل ومن يساله الاسطى ايگله منو سووا
كل هذا ابوي ايجاوبه ويگله جبت عمال حتى يسهل الشغل ويمشي بسرعه

البيت چان ديوان وهول وموزع چبير ومطبخ وغرفتين ومره سمعت امي تگل الامين // الغرفه الجوه الاخواتك
اخلي ابوك يبنيلكم غرفه انتو وجمال ابن عمكم وچان رد جمال
—- لا عمه انا شاب واحتاجلي غرفه الي ابحدي ما اريد احد يشاركني بيها
امي //بس عمه انت سمعت عمك،يگول ما عنده فلوس اتحمل عمه سنه سنتين يصير عده ويكمل الطابق الثاني

سكت جمال ما جاوبها وبيومها اجه ابوي بالليل وجمال بس شافه اجه وبيده جنطة ملابسه وگال الابوي
—— عمي ملاك تبقى يمكم وانا اروح اسكن بالفندق على ما المؤجر الي ابيت ابوي يطلع
واهنا ابوي جن جنونه  وبدون ما يساله ليش ومنو وياك لزمنا انا وامي وامين وطاح بينه كتل وهو يگول
——- ولج اسهيمه انتي او ولدج وبناتج ترحن فدوه لجمال واخته

ومن يومها صرنا نتحاشى جمال وما نحچي ويا وابوي بناله غرفه فوگ بس اله وكل ما ينزل منها يباوع بشماته
الامي وكانما ايگلها اخذت الغرفه غصبن عليج وعلى ابنج

من صرت بصف السادس ابتدائي صارت تغييرات بجسمي حالي حال اي بنيه بديت اشب انا طويله وبيضه
بس مو كلش شعري اسود بي لمعه لان امي دووم تخلينه حنه تقريبا كل اسبوعين والزيت تلث مرات بالاسبوع
من بديت اشب صرت اشوف جمال شلون يباوعلي بنظرات كلها خبث واكثر من مره يگلي صبيلي چاي ومن
انطي  الاستكان احس بي يريد يلزم ايدي لكن انا رغم زغيره بذاك الوكت بس اعرف الصح من الخطأ

چانت الغرفه الجوه الابوي وامي والي اكثر الاحيان تجي تنام يمنا بالغرفه الثانيه الي بيها انا واخواتي واخواني
الغرفه الفوك چانت الجمال من كبرو امين وصادق صاروا اينامون بالموزع  لان احنا البنات هم كبرنا
فهمه يخجلون يبقون يمنا قرووا ينامون بالموزع لو بالهول وملابسهم خاليهن ويانه

جمال حلو اسم على مسمى لكن ولا واحد بينه يرتاحله چان يتدخل بكل زغيره وچبيره ودووم اسمعه اياجج الوضع
بين ابوي واخواني والي انتهى الامر بان امين ايبطل حتى يشتغل ويساعد ابوي بمصرف البيت
وفعلا من اشتغل امين صار اكثر مصرف البيت علي اما ابوي فشال ايده وكانما احنه مو اولاده ولا بناته

انا شاطره بالمدرسه وبليلة النتائج ما انام الليل كله ابقى ادعي ربي انجح لان چنت اخاف من ابوي
من اجيب النتيجه ناجحه الكل يفرح ويشجعوني اله ابوي يباوع للكارت ويحاول يشوف اي درجه ضعيفه بيها
حتى يرزلني
ومن يشوف ماكو يكون كلامه الي
اي شدي حيلج اكثر حتى ما ابطلج
حتى كلمة عفيه مستخسرها علينه

نجحت من صف الثاني للثالث المتوسط وصرت اداوم اتذكر يوم الظهر اجه ابوي وجمال يتغدون همه اذا الشغل
قليل يجون يتغدون ويرتاحون والعصر يرجعون وره ما اتغدينا الكل راح نام بقيت بس انا
امي گالت // روحي نامي اشويه
جاوبتها = لا ماما راح اغسل المواعين واگعد اقرا بالصاله عندي امتحان
جمال بوكتها يسمع هو طلع وگلي گدام ابوي // بلكي تصعدين ترتبين غرفتي (شمر المفاتيح )

انا اخذتهن وهزيت راسي هو طلع وابوي  دخل للغرفه حتى ينام واخواني لازم محد يطلع
نفس فالكل نايم او گاعد بس مسوي روحه نايم وامين بوكتها بمحل النجاره ما يرجع اله المغرب
صعدت ارتب الغرفه الي بيها چربايه نفر وكنتور بابين وميز مرايه وبيها تعلاگه الملابسه الي يلبسهن وبيها
تلفزيون وثلاجه ومكيف وهذني هو اشتراهن من شغله

صرت ارتب بالغرفه لفت انتباهي على الچربايه اوراق وكتاب بداخله اوراق  اجيت اشيلهن من درت الاوراق شفتهن
صور ومن فتحت الكتاب شفت نفس محتوى الصور  صرت ارجف لان چانن صور اباحيه اول مره اشوف هيچ شي
شلتهن بسرعه  خليتهن ع الميز باوعت شفت جمال واگف ويباوع لي بنظرات خبيثه وهو مبتسم

من شفته حاولت ما ابين انو انا شايفه شي وصلت يمه گتله وانا ابلع ريگي = رتبتها اصلا هي نظيفه
هو رد عليه// شكرا تعبتج
=العفو
اجيت اطلع هو سالني // مروه چان اكو ع الچربايه صور وينهن
انا جاوبته بتوتر = هاا ايي ذني ع الميز
اتقرب يمي اكثر گلي //شفتيهن
رديت بخوف = لا لا ما باوعت الهن
هو ضحك وگال // على كيفج واذا باوعتيلهن شنو يعني واكيد شفتيهن

لزمني من ايدي وحاول يجرني
انا عتيت ايده وگتله بعصبيه = انت شجاي تسوي
هو بنفس ابتسامته // ما اسوي شي انتي الي امورج مكركبه وما اعرف شنو بيج
جاوبته بنترر= انا ما بيه شي هاي رتبت الغرفه
رفعت حاجبه // على كيفج ليش تزمخين

ما جاوبته اريد افتح الباب لحگني وحصرني ع الحايط واتقرب مني وهو يگول = شبيج مروه ليش تصديني انا اريدج
جاوبته وانا ارجف = شنو هالحچي انت اخوي
جمال هز راسه //لا مو اخوج انا ابن عمج ورايدج (لزمني من چتفي )تعالي خلي نتونس
انا اتفاجآت من كلامه جاوبته بعصبيه = انچب شنو هالكلام تره انزل اگل الابوي

هو ما انطاني مجال راسا باغتني وضربني راشدي وگلي // ولچ منو الينچب انا اعلمچ ياساقطه لو بيچ خيير
روحي گليله وشوفي شنو راح اسوي بيچ
لزمت خدي وانا العبره متكسره بكلبي = شتسوي انا اگلهم گلي رتبي الغرفه وبعدين رجع حاول يس......

قاطعني وهو يضحك بقهقه // ههههههه ها اشو سكتي گولي شنو حاول ها ولچ انا لو انتي الي بحجة الدراسه 
جايبه من صديقاتچ ما اعرف منين صور اباحيه وصاعده للغرفه تتفرجين عليهن  طايحة الحظ
جاوبته بتوتر = انا يمته انت واحد ما تخاف من الله
رد عليه باستهزاء // اهاا زين ديري بالچ واتذكري بوكتها منو گل الابوچ يبطل امين من المدرسه ويشغله ومنو
خلى ابوج يبني هاي الغرفه وبس انا اگعد بيها ولا تفرحين جاي الدور عليچ لان انتي اتحديتيني فما افوتها الچ
(اتقرب مني وشاورني ونفسه يطخ بوجهي وهو يحچي باستهزاء )شوفي ولج اسمعيني يمته ما اصيحج تجيين لا
تشوفين مني شي كل عمرج ما شايفته

انا باغته ونزلت ركض عرفت جمال حقير ويريد مني اشياء حرام وعيب بس شسوي ياربي وهذا ممكن يقرا براس
ابوي ويخبله علينه
نزلت وانا مفرفحه من الخوف ومن الي سمعته رحت للغرفه واتمددت بالگاع وغطيت راسي وانا ارجف من الخوف
من الي شفته والي سمعته احتاريت شنو اسوي اذا اگل الابوي ما يتفاهم ويگلي هذا الكلام چذب انتي وامچ سويتي
لان امچ تكره جمال
واذا گلت الامي هاي مسكينه تبقى بس تلطم وتبچي وحتى اذا تروح وتعاتبه يجوز يرتكب عليها شسوي ياربي
دبرني

حسيت على ايد انمدت عليه انا صرخت من الخوف اتهيألي جمال سمعت صوت سماح وهي تگلي
—— اسم الله اسم الله شبيج مروه
انا بس ارجف ما جاوبتها هي ابتسمت وگالت // ياالله امشي اگعدي ويانه ع التلفزيون ابوي طلع
انا جاوبتها = لا ما الي خلك تعبانه اريد انام
سماح // مو عوايدج تنامين هيج وكت
= عوفيني تعبانه
:بكيفج

راحت سماح وزينب وعلاوي وصادق وانا بقيت بالغرفه متغطيه وخايفه واگول
=هذا شنو يريد مني ليش يگلي يمته ما اصيحج تجيين شنو يريد مني اكيد يريد شي مو زين وحرام وعيب
=لازم اگل الاهلي بس المن اگول هسه انا لو عدي عم لو جدي بعده عدل يمكن ما صار كل هذا
=شلون دبرني ياربي (جريت نفس وگعدت على حيلي )احسن شي اسولف الامين

امين اخوي ما اوصف الكم شگد يحبني وانا ويا عبالك توأم وچان يجيب اسبوعينه وينطيها الامي حتى
تصرف بيها علينه ومرات حتى تشتري بيها مخضر لو فواكه
وقررت احچي الامين
ابوي دووم يجيبلنه لحم بحكم شغله بالصفاة ويعرف الگصابين فيجيب لحم ودووم اسمعه يگل الجمال انو يعرف
منين يجيبه وبسعر ارخص من السوك ومرات يجيبلنه خضره كل الحمل شايله امين لذلك قررت احچيله كل شي

امين من اشتغل بمحل النجاره احس بي كبر يعني حتى صار اكبر مني وچان يستهضم علينه وهو يشوف ابوي
شلون يوبخنا ويحچي ويسب بامي گدام جمال وملاك لذلك هو صار مايجي اله بالليل يبقى بالورشه حتى ما يصطدم
ويه ابوي

امين اجه وره المغرب بشويه حضرتله  الحمام وهو دووم يحب يتعشى لفات انا سلگت بتيته وگليتها ووخليتله خبز وكوب
چاي واخذتهن اله بالصاله شافني سالني بعيونه انا جاوبته يعني اسولفلك بالغرفه
رحت واجه جاب صينيته وگلي //شبيچ مروه شصاير
=ما صاير شي كمل عشاك
هز راسه // اي سولفي وانا اكل
=شبيك امين اريد اخذ رايك بموضوع بس اتعشى حتى تنتبهلي
هو. اكل بسرعه وگلي// ياالله احچي

=امين من احچي ما اريدك تتهور لان اذا اتهورت ابوك يذبحني
امين فتح عيونه ع الاخر // يعني ما جاي تاخذين رايي بموضوع گولي صايره مصيبه شكو سولفيلي
وگعدت اسولفله وشلون هددني يراوي الصور الابوي وشلون گلي يمته ما اصيحج تجين
امين عض شفته وظل يتنفس قوي وحك شعره باوعلي وگال //هذا هو اتصرفي عادي
=شلون واذا هذا الچلب صاحني
هز راسه //سهله مروه سوي مثل ما گتلج

جاوبته وانا ابچي ==يعني راح تساعدني
:ان شاالله بس مثل ما گتلج اتصرفي عادي هسه راح اطلع اگعد بالصاله وانتي عادي مثل يوميه اتعشي وادخلي نامي
والصبح روحي للدوام
هزيت راسي وانا خايفه هو گلي //مراوي لا تخافيين انا وراج

حضنته وهو مسح دموعي الي نزلن غصب عني وسويت مثل  ما گلي اتعشيت ودخلت نمت بس اچذب عليكم اذا غفيت
لو شفت شنو النوم وحسيت بابوي وجمال اجو وامين وصادق نايمين بالموزع قريب الغرفه مالتنا الصبح گعدنا اتريگنا
ورحنا للدوام وامين راح للورشه واول مره اروح للمدرسه حتى اتاجلي امتحان الكيميا وگتلها

= ست البارحه كله مريضه ما گدرت ادرس
وهي لان تعرف بيه انا شاطره اجلتلي الدرس
ورجعنا للبيت وانا على نار بالبدايه خايفه لكن من شفت جمال ما اجه ع الغدا ولا وره الغدا شويه ارتاحيت وخف توتري 
والعصر كله وانا اترقب بالليل اجه امين عادي ولو شويه متاخر وهاي تصير اذا اكو شغل
سلم ودخل سبح وانا خليتله العشا احاول اسأله بس هو ما منطي اهميه الي
غسلت ملابسه ودخلت للغرفه اقرا صارت الساعه عشره اجه ابوي وامي خلتله العشا واشوف ابوي
يتصل بالتلفون ومحد يجاوب وره ساعه اندك جرس  الباب وراح صادق يفتحه لان جمال من يجي يدك هورن
اسمع صادق وهو يحجي // شبيك جمال شصاير وياك

ابوي من سمع طفر ودخل  جمال وهو مدمى وملابسه مشگگات وعينه زرگه وجهه مورم كلنه اتفاجئنا وابوي
گله بخوف //عمي وين چنت ومنو سووا بيك هيچ گلي
هو باوع الامين الي يباوعله باستهزاء وباوعلي وهو يتوعدني ويخزرني وگال
—- لا عمي ماكو شي بس سرسريه رادوا يسلبون سيارتي واتضاربت وياهم

///////////////...//////////////..../////////////يتبع
هذا البارت الاول
اذا ما اشوف تفاعل وتصويت ما راح اكمل نشرها حاولوا توصلوها المتابعينكم قصه ما تتفوت حقيقيه وبعيده
عن الرتوش والمجامله والكذب