رواية بعد فوات الأوان الفصل الثاني 2 - بقلم آنين الليل

السلام عليكم
احب انوه انو النشر راح يكون
يومين انشر ويومين لا
اتمنى اتصوتون وحتى الاعزاء الي يقرون اتمنى يصوتون حتى لو ما تعجبهم القصه خلي يصوتون
ويگلولي القصه ما عجبتنا وانا تعرفوني اتقبل كل وجهات النظر واحترمها
تحياتي
آنيين الليل
///////////////❤️🌷❤️//////////
امين
من اخذت المجلات وانطيتهن الغزوان وهو گلي جهاد  ذاك هو ويگول لاتخاف انا اطمنت ويمكن بوكتها من
الشفته اليوم كبرني عشرين سنه رجعت وانا اسمع  ابوي ايگل الجمال

—— شنو تصعد فوگ لا تنام اهنا لو بالصاله لو بغرفتي
جمال //عمي تدري بيه ما اعرف انام اله ابحدي
امي //خاله خلي عمك ياخذك للطبيب
:لا خاله هسه اخذلي كبسوله حباية وجع راس واصير زين

ابوي باوع الامي وگلها // سهام افرشيله بالديوان وانا كل شويه اجي اشوفك
راحت امي واخذت فراش وهو راح ينام ابوي راح ورا ويگله
: لو تعرفهم لا تضم عليه اله ارجعهم البطون امهاتهم
: لا عمي ما اعرفهم جبانيه خذوني غدر
:لا تهتم ولا تجيب طاري والي ايسألك گله سويت حادث
: اي مثل ما تگول

اجت امي وجابتله براسيتول وفلو اوت هو اخذهن ودار وجهه وابوي گله //نام وارتاح
ابوي طلع من الديوان انا اجيت يمه للغرفه لان امي راحت للمطبخ هو باوعلي وگال
:ها شكو عدك
:لا بويه بس ...
:بس شنو شكو
:بويه المجلات
:يامجلات
:الهسه اجه صاحب جمال اخذهن
:ايي شبيهن مجلات مال سيارات شبيهن ؟

:انا ما ادري ادور عليهن بالكنتور لكيتهن بعلاكه طلعت وحده وشفتها
ابوي عكف حاجبه وگلي بقلة صبر //شنو بيها ما تحچي
: بويه مو مجلة سيارات
:چا شنو
:مجله كلها صور استغفر الله مو زينه
ابوي اتقرب عليه وخله ايده على حلگي وهو ايگلي // ولك شنو هالحچي

هزيت راسي //: اي بويه مثل ما اگلك والله السالفه مو سالفة سياره وتسليب
ابوي بعصبيه // اشش بسك كافي ما اسمعلك نفس وسوي روحك كل شي ما شايف
هزيت راسي وگتله //وحتى هذا صاحبه مخربط ومبين علي ملطلط
ابوي // شگلت انا ياالله فوت روح نام بساع ولا چنك سمعت لو شفت شي

ورحت وبليلتها يمكن ما غمضلي جفن بين الخوف والمفاجئه وكلساع استذكر الحوادث الي مرت بيه
الصبح گعدت لگيت ابوي طالع اتريگت ورحت للشغل وانا الف حسبه ابالي وما طولني بالشغل
كل ما يجي احد عبالي جمال وجايب ابوي لو جمال جايبله جماعه يهدون علينه
شافني جهاد  شلون خايف اجه يمي وگلي //خايف مو ؟

انا هزيت راسي وصارن شفايفي يرجفن من الخوف واريد ابچي جهاد گلي
: اسمعني امين جمال راح يفكر مليون مره گبل لا يحاول يحچي وياك
بلعت ريگي //يعني ما راح يگل الابوي لو يودي جماعه يضربوني لو يهجم ع المحل
ابتسم واتثاوب //ايي ماراح يسوي شي وكبل لاتروح البيتكم راح انطيك شي ياالله عدنا شغل على باب الله
وخلصت من شغلي ومن ردت اروح جهاد  گلي //هاك امين اخذ هاي العلاگه وضمها زين
:شنو بيها

جهاد باستهزاء//بيها ملابسه الداخليه الهذا السگط ونقاله وفلوسه وساعته
هزيت راسي //لا جهاد خلي الفلوس الك والصحبانك
جهاد // ايباااخ عود ايوجب ما عليك بصحباني اخذهن الك وبس يفك حلگه اوگف واشمر غراضه
بوجهه  و واساله  منو ضربك وذني شيسون عدي ولو انا متاكد ما راح يفك حلگه وياك
:اي بس فلوسه ما اريدهن
جهاد //اخذهن واشتريلك بيهن ملابس واشتري فواكه هو مو گاعد يتزمهر احسبهن فلوس اكله

انا بخوف // جهاد مو انا الاعرفه الهذا جمال يضمها الي
هز راسه // لك هذا جبان لاتخاف منه انا والجماعه هددنا گلناله لو انت جاي تمشي وتعثر نموته خلاص
لاتخاف امين اخوك جهاد دووم تلگا وراك وساندك

هدأت وانا اسمع كلام  جهاد  ورحت للبيت واتسوكت بقسم من الفلوس فواكه ومخضر واشتريتلي ملابس
واخذت تيشيرت الصادق وصلت وسالت مروه گالت فووك ما نزل وصادق اخذله الغدا
وابوي
ابوي ما اجه ع الغدا تگول امي هو گللها الصبح يروح للمعرض

//////////////////// //////////

مروه
ثاني يوم گعدت الصبح ورحت للدوام وبيومها ما امتحنت واتحججت بالمرض والمدرسه اجلت الي الامتحان لان
انا شاطره ومؤدبه ولان بذاك الامتحان جبت 100رجعت للبيت وانا اترقب جية امين واخاف يجي جمال قبله
بيومها ما اشتهيت اكل واجانه امين من وكت وهو ايگل الامي من الباب ما دخل
يمه لا يظل بالج عدي شغل بالورشه

انا بقيت اترقب وما مرتاحه وحتى من خلينه العشا هم ما اشتهييت اكل تقريبا الساعه بالعشره ونص اجه
امين وامي اتلگته  //يمه ظل بالي عليك 
امين //يمه مو اجيت وگلت عندي شغل
اخاف عليك من هاي الدنيا المگلوبه ما تسمع ذاك انكتل وذاك انخطف
امين // يمه انا عامل بسيط وامشي بصف الحايط مالي شغل بكل شي يصير

اهنا وجعني گلبي حسيت امين ايوجه كلامه الي وكانما ايگلي انا ما الي شغل بمشكلتج دخل سبح وخليتله العشا
اكل بسرعه وجبتله چاي واجه ابوي بس دخل الكل وگف بالاستعداد والانذار ابوي گال
: جمال ما اجه اهنا
امي ردت // لا ليش
ابوي بتوتر // ما ادري طلع وما رجع للمعرض واخابر مغلق تلفونه
امي // يجوز راح ويه صاحبه لو عنده شغل لا يظل بالك ما تحسه اله اجه اصبلك عشا
: لا اكلت ويه العمال
بالعافيه

صار ابوي كل شويه وطلع يباوع ويرجع ايباوع التلفونه اندك الباب قوي وراح صادق يفتحه ابوي كال
ان شالله اجه
ردت امي // لا ما ظن جمال لو هو چان دك هورن شني هيج يدك الجرس والباب
اجه صادق وهو مستغرب وجمال اجه ورا وهو صاير عباره عن قطعة دم وجهه مورم الكل وگف وابوي
ساله وهو خايف // منو سووا بيك هيج

هو خزرني ورجع باوع الامين وگال الابوي //لا عمي جماعه سرسريه رادو يسلبون سيارتي
ابوي رد گال //سلامات فدوه السياره ما طولك سالم
بيني وبين نفسي گلت = هاي لو واحد من عدنا مضيعله الف دينار چان موته من الكتل وصرت تعير بينه عشر سنين
جمال رد علي // لا عمي ايخسون ما انطيتها الهم

وصار يسولف الابوي وانا اشوفه شلون يخزر بيه وبامين لكن من راح للحمام وامين ما ادري شنو شاور ابوي
ومن طلع واندك الباب وامين طفر راح للباب ورجع گله غزوان يريد المجلات وراح امين بدون ما يسمع طلب
جمال نزلهن و
واشوف ابوي صار مستغرب من جية غزوان نص الليل على مود مجلات وهو يباوع الجمال بعدها قررو ان جمال ينام بالديوان بس حتى ابوي كل ساعه يطمن ويشوفه نمنا والصبح گعدنا ولگينه ابوي طالع للصفاة مال الغنم اتريگنا وامين طلع گبلنه
لان احنه شويه نتاخر عنه وما گدرت اساله گدام امي وصادق وسماح لكن من نظرة عيونه حسيت بشي
من الراحه داومت ورجعنا انا وسماح وسالت امي = شلونه جمال

هي ردت //زين ابوج الضحى اجه وجايبله معلاك وشويتله من عنده
= واكل
ايي اكل شويه ورجع نام
= وابوي وين
راح للمعرض يگول ما يتيه يم العمال ياالله غسلي وبدلي حتى تتغدين
= ايي ان شالله

رحت بدلت وغسلت وگعدنا نتغدا ولميت المواعين غسلتهن ورحت نمت ما احس اله على ايد تحرك بيه فزيت
وانا خايفه شفت امين وهو يبتسم ويگلي //اگعدي امي تگلي من يمته نايمه
گعدت على حيلي وگال //ياالله امشي اتعشي
= ما تسولفلي
عليمن
= شنو امين عليمن على هذا الحقير جمال
تتصورين انا اگدر اسويله هالشكل
= ها چا منو

رد بابتسامته الحلوه // صاحبي جهاد سولفتله وساعدني
رفعت اديه للسما بالدعاء = الله ينطي العافيه ويخلي
آآميين
= بس هذا جمال خاف يرجع يتحرش بيه
امين بابتسامه //بالحلم
=وما ايگل الابوي
هز راسه وگلي //علوا ايگله حتى افضحه

وگفت وحضنت امين وانا اريد ابچي هو گلي //ياالله تره انا كلش جوعان وتعبان
رحنا گعدنا نتعشى وامي دزت عشا الجمال بايد صادق وهو رجعه گله ما اشتهي من اجه ابوي چان اول شي
سووا راح شاف جمال رسأله على احواله ومن دخل للهول سألته امي //اصبلك عشا
:لا ماكل بره جمال اتعشى
وديتله بيد صادق بس هو رجع الصينيه گال ما اشتهي
ابوي بنتر //صبيله بسرعه وانا راح اجيبه يگعد يمنا وياكل

راح ابوي وامي صبتله معلاك وشوربه وزلاطه ومسويتله شربت نومي بصره طبعا كلهن اوامر ابوي الها
انا بقيت بالمطبخ اغسل المواعين واسوي الجاي گعد وامي تگله //هلا خاله الحمد لله على سلامتك
ابوي //ياالله عمي اتعشى لا تضوج وين يرحون لازم نعرفهم
هو ما جاوب ابوي گله //ياالله جمال خلي ناكل انا وياك ياالله بعد ابوك اكل الخاطري

وصار ايوكل بي وهو هم ياكل متعجبه على هيچ اب اهم شي عده يرضي حتى من نتمرض ما يسأل علينه
باوع الامين //ها امين شگد لميت من شغلك تره هالايام ابوك ولا فلس
امين //ما لميت شي
ابوي باستهزاء //ايي كلهن ابطن امك
امين // بويه هنه اسبوعيه ياالله يكفنه والباقي امي تلمه اريد ابنيلي غرفه فوك
جاوبه باستهزاء //هههه باسبوعيتك تبني لا عليمن اول وتالي البنات يتزوجن وننطيك غرفتهن انت واخوانك
حتى ما گال جمال يتزوج و يطلع يشتريله بيت لا رجع على غرفتنه

امين //هاي هي يصير عمري تلاثين لو احصل الغرفه لو ما احصلها اجمع احسن وابنيلي غرفه بلكي بخمس
ست سنين ولا ابقى على ما يكبرن البنات
شال صادق الصينيه وامي جابت الچاي لان ما قبلت اخذه الهم وجمال گال اريد اصعد الغرفتي
ابوي //لا لا تصعد اهنا ابقى خاف تحتاج شي
لا عمي صاعد وباچر اطلع للشغل
امين //ايي اطلع غير جو احسنلك

هو خزر امين وصعد وثاني يوم داومنا ومن طلعنه من الدوام شفنه جمال واگف اباب المدرسه انا جمدت وسماح كالت
ياا هذا جمال شجايبه
وصلنه يمه وهو اياشر براسه// ياالله اصعدن خلي اوصلچن للبيت
صعدنا واحنا ساكتات وهو گال السماح انزلي دگي الباب وانتظري افتحيلي الطلاگه الثانيه

نزلت سماح وهو گلي بدون ما يباوع //شعبالج افوتها الج انتي وامين انا وراج والزمن طويل اله اندمج وهذا
امين لو بعد مية سنه اطلعها منه انا الج يا ساقطه يا دايحه بس اصطبريلي
انا من الخوف والمفاجأه جمدت ابمكاني بس بعدين جريت نفس وگتله
=لو بيك خير لا تتشطر عليه روح الامين وصحبانه ورجع المجلات

وفتحت الباب ورگعته حييل وباوعتله من الجامه = اذا ما تجوز مني والله ارجع اگل الامين هالمره راح اسكت لان
ما اريد اسولفله ويرجعون يتعاركون وياك ويمكن يموتونك مو مثل ذاك اليوم بس نعنعوك

ورحت دخلت للبيت وانا يمكن قطرة دم ماكو بيه وقررت بس يجي امين اگله ورحت للغرفه وانا ما اشتهي
اكل اتحججت بالتعب واتمددت وظليت افكر = يعني اذا اسولف الامين يجوز يكتله موت ويروح بيها اخوي
=وامي خطيه شراح يصير بيها لو ابوي شنو راح يسوي بينه
= المهم ما عليه بي وهذا يحچي هالشكل من حرگة گلبه

العصر طلعت وبديت اقرا وامي تحضر بالعشا واجه امين وانا اشوف التعب على وجهه وبيومها سكتت
وسلمت امري ال الله
وصرت ادرس واتحاشه جمال يعني ما اخلي ايشوفني ولا احچي ويا ومن يگعدون بالصاله الداخليه انا لو
ابقى بالغرفه لو بالمطبخ الى ان  دخلت بكلوريا وبدت امتحاناتي وانا واثقه من نفسي اجيب الاولى وكملت
امتحانات والامور عاديه

وانطونه النتائج وطلعت الاولى وهاي الفرحه بعمري ما انساها وامي هلهلت وكلنه فرحنه واتذكر بيومها اجت
عمتي امل وجابت جكليت بالليل اجه ابوي وصادق گله
بويه مروه طلعت الاولى ع المدرسه
هز راسه وگال// مبروك
انا حتى ضحكتي ختلت مني عمتي امل جاوبته //والله يامروه عفيه عليج رفعتي راسنا ان شالله تبقيين هيج
للسادس وتطلعين الطبيه
ابوي باوع العمتي باستهزاء وهو يگول //لا امل هذا هو مروه اخذت شهادة الثالث متوسط كافي وزايد عليها ،

الكل باوع الابوي هو گام وگال // شبيكم تباوعون شنو ما سمعتو مروه تگعد واول وتالي يجي نصيبها
انا غورگت عيوني وانا اباوع الامي الي وصلت يم ابوي //ابو امين هي مروه شنووكلافتها خل......
قاطعها //شگلت انا ماكو مدرسه واي احچايه زايده ما اسمع
امل // طالب على كيفك مو هيج الحچي
رد بتهكم // : اي ست امل نتعلم منج انا گلت مروه ما تداوم ومو بس مروه سماح هم تاخذ الثالث وتگعد واذا
تريد سماح خلي اتبطل ويه اختها حچي زايد ما اريد وتلبس عباية راس والباب ما تشوفه

امل //شلقصه طالب تره بناتك ينحلف بشرفهن
هز راسه //ادري والبنيه الها بيت اهلها وانوب تتزوج وتنتبه البيتها ذيچ ملاك ما شاء الله ابيت رجلها صاينته وصاينها

طلع راح للديوان وانا بقيت ابچي وامين وصادق ساكتين شيردون يسوون ويه اب متعجرف كلمته بس هي الماشيه

وبقيت بالعطله اگول بلكي يتراجع عن قراره ورجعت عمتي حچت ويا وخوالي لكن هو ابد
وبطلني وگعدت بالبيت اشتغل واطبخ واعجن واخبز كل هذني اتعلمتهن بسبب الملل الي كتلني
شويه التلفزيون من ما يكون ابوي موجود اگعد اباوع مسلسل او فلم چنت دووم ابچي على مدرستي وعلى
احلامي الي ضاعن بلحظه

صار امين يجيبلي كتب ومجلات صرت اقرا بيهن واتعلم شغلات من المجلات وصرت اطلب من عمتي امل
من تجي تعلمني الحفافه مالت الوجه وصرت اشغل نفسي بهواي امور
بعد ما بطلت بحوالي سبع تشهر امين جابلي تلفزيون وبيومها قامت القيامه علي من ابوي لكن هو گله
بابا بنات ويعجبهن يباعن على مسلسل على قناة طبخ ما يصير گاعدات يمنا واحنه بس ندور التلفزيون كل
ساع على قناة

جمال باستهزاء//بس منا وغاد راح يبقى الشغل على خالتي لان التلفزيون ليل ونهار فراح يسهرن للصبح
امين //ايي ويبقى امي ما شاكيه
ابوي //ولك امين ليش هيج اتحاچي اخوك الچبير
امين يباوع الجمال //بابا ما گتله شي
احترم نفسك واعرف ترد عدل لااشك حلگك

جمال //عمي على كيفك امين ما يقصد
ابوي //هسه الواحد يقترف جريمه ويكسر التلفزيون على راسه وراس الخلفته
جمال //عمي امين ما گال شي لا تسويها مشكله
ابوي //راح اسكت الخاطرك جمال بس خلي ايعيدها اله اموته خلاص

ابوي سكت واحنه بينه ومايزيد حقدنا على هذا الاب الي لازم نكون عده امانه لكن احنه يمكن نتمنى يموت
ولا يبقى معذبنا طول عمرنا وبقيت بالبيت اگعد الصبح اخلص شغل وبعدين اروح ع التلفزيون الي هو صار
تسليتي الوحيده
خصوصا وما صار احد يجيب بناته النه لا خالاتي ولا حتى عمتي امل لان ابوي من يجن يبدي يسمعهن كلام
البنيه ما الها اله بيت اهلها واذا طلعت البنيه طلعت عينها
چانت حياة ممله بكل معنى الكلمه

ولان چنت گاعده بالبيت شبيت اكثر وصرت بيضه وحتى سمنت شويه وصرت ابتكر طبخات واتعلم للمكياج
بس حتى اگضي وكت ودائما اوصي امي تجيبلي شغلات واگعد اسوي اعمال يدويه وتقريبا كلنه نحاول
ان نبتعد عن ابونه بس مجرد الله يساعدك واذا سالنه نجاوبه لكن من تجي ملاك بت عمي الوضع يختلف

المسواك ابوي يجيبه اشكال ولازم تگعد هي وجهالها اثنينهم بغرفتنا ولازم نقدم الها والجهالها فروض الطاعه
هي تشبه امها من ناحية التكبر وهذا الشي عمتي امل گالته النه واكيد جيتها ما تخلو من المشاكل الي تحاول
تسويها بينه وبين ابوي لكن احنه قدر المستطاع نتجنبها وكل واحد بينه عنده احلام يتمنى يحققها
بس يمته لمن ما .........

وبطل ابوي سماح وهي حتى ما فكت حلگها ولا بچت ولا اتحسرت لان سماح انسانه عمليه كل شي عدها
عزيز حتى دمعتها
وتگول //سواء حچيت او لا اتحسرت او بچيت ابوي راح ايبطلني ايبطلني بعد ليش اقهر نفسي واحرك
گلب امي

وصرنا نتقاسم انا وسماح الشغل وصرت اخيط واحف واعرف اسوي طبخات واعرف بفن المكياج
صرنا نگعد انا وسماح من الصبح نخلص الشغل ونبلش مره انا ومره هي نسوي تسريحات ومكياج وبعدين
الزم المكينه الي اشتراها الي امين وكل همي ما ابقى بمكاني واخلي حجتي لان بطلوني من المدرسه

امين صار تقريبا اسطه بالنجاره والحجي اخذ المحلات الي بصف الورشه امين هو الي اقترح ع الحجي
يسويهن مفروشات حتى الي يجي ياخذ من عنده غرفه يشتري فراشها وياها
وفعلا الحجي اخذ برأي اخوي وخلا هو الي يدير محل المفروشات وجهاد صار هو المسؤول عن الورشه
وزادت اسبوعية امين وخلاها الحجي شهريه واحس بامي فرحانه لان ابنها شال عن كاهلها هواي امور
واهمهن منية ابوي على اللگمه الي يجيبها النه

صرت احب اخيط واوصي امي تجيبلي قماش مال چراچف صرت اخيط نزلات هنه ومخادهن
مرات عمتي امل تاخذ وحده اثنين وخالاتي من يجن هم ياخذن لان الوالد ما يقبل احد يدخل علينه
وتصير طبه وطلعه

من صار عمري 18سنه اجو بيت خالي الثاني عبد الواحد وخطبوني الابنهم الي مكمل قانون ويشتغل ويه ابو
ابيع وشرا العقارات چانت فرحة امي ما تنوصف لان راح اخلص من ضيم ابوي ولان تعرف بابن اخوها
مؤدب وهادئ ويحترم المره حاله حال اخوانها وفاتحت ابوي بالموضوع الي رد عليها //يصير خير

صرنا نحلم بشوية سعاده ممكن نعيشها
امي صارت تحلم ياخذني ابن اخوها وارتاح من ضيم ابوي
وانا صرت احلم بغرفه خاصه بيه وملابس جديدات ورجال يحبني واهم شي يحترمني
وسماح صارت تحلم انو بيوم العرس راح تلبس بدله حلوه وهم بلكي يجي نصيبها وراي

وره اسبوع امي فاتحت ابوي وگلتله انو مرت خالي اجت وتريد الرد ابوي جاوبها // گليلهم ما الهم نصيب عدنا
الكل اتفاجأ واشوف جمال انسحب صعد فووك امي گالتله// ليش ابو امين ابن اخوي خوش ول...+
ابوي قاطعها بنتر //اي ايي ندري خوش ولد وابن اخوج ومتربي وعده شهاده بس ما اريد اطي
امي // ياا ليش ابنيه وگاعده

ابوي بعصبيه // اگلج ما اريد دوخه من تنشدج مرت اخوج گليلها ما الكم قسمه يمنا
امي // ايي اگللها بس هم تگلي احنه شبينه
:عوود گليلها البنيه موگفه الابن عمها
امي باستغراب // هااا

ابوي // او وجعاا مثل ما سمعتي وحچايه زايده ما اسمع جمال يريد مروه وهذا هو ابن عمها ياخذها لو عدچن درب
امي //دربيش يا ستار هذا هو تجي واگللها
بيومها ما نمت وبس ابچي وثاني يوم الصبح اجت امي وهي تگول
يمه مروه جمال ابن عمج ورابي ويانه ويريدج وانتي تعرفين ابوج يگول ابن اخوي اولى
جاوبتها بحزن = يمه ما اريده ما احبه
اسكتي يمعوده استري علينه ما شفتي البارحه شلون يخوزر ويگول اذا عدچن درب گولن

باوعت الها بعتب = يمه ليش
امي // شنو ليش
= ليش بقيتي عد ابوي والله احس بي ما يحبج ليش تسكتين وهو يهينج ويضربج
امي هزت راسها ودارت دمعه من عينها وردت بعبره مكسوره
:حقچ يمكن غلطتي الوحيده ما عفته بس سويت كل هذا على مودكم
سماح //شنو يمه على مودنا

امي //ايي انا بس اتزوجت حبلت بيج وعلى الاربعين حبلت بامين شفته وعرفت اخلاقه من اول اسبوع
ماگدرت ارجع الاهلي لان الناس ماترحم گلت اصبر ومن طلعت حامل گلت هذا هو هسه يجي طفل وبلكي
يتبدل واجيتي انتي مروه وانا اشوف بعيونه كره وحقد عليه وبقيت ويا ومن رحت الاهلي وره الاربعين قررت
ما ارجع بس طلعت حامل باخوج
وبيبيتج تگلي يمه اصبري بلكي يجي الوليد ويتبدل وصبرت واتوفى عمچ وزاد بخباله واجه امين ومن تزوج
رباب قبلت لان اقل شي راح افتك وما يجينه يوميه وانا اربيكم لكن القدر هي اتوفت وانوب صرت مسؤوله
عن تربية اربعه بدل اثنين
شنو عبالج ما افكر اتطلك منه لليوم وبعد مية سنه ما ارتاح اله اتطلك...

قاطعتها سماح // وهسه سويتينه سته
الامر مو بيدي وانا الخاطركم سويت وحملت كل شي استفقر واتحمل ضرب وجوع وقهر بس اشوفكم گدامي

رحت يمها وحضنتها وگتلها
= يمه انتي من ما تركتي ابوي صدگيني جنيتي على نفسج وعلى سته وياج چان ممكن تتطلگين منه وياخذني
وبس انا متعذبه ولا هسه متعذبين انا وانتي واخواني وهسه يريد يطيني الجمال حتى اعيش نفس عيشتج
امي // بعد يابتي هذا قدرنا
اجتها سماح وگالت //لاتزعلين من عدنا بس والله اتاذينا

امي حاولت تلطف الموضوع //مروه تره جمال ابن عمج وخوش ولد وهم عده خير من الله
= يمه هاي عشرين سنه عايش ويانه اشفنه منه
امي / / شنو يمه احنه محتاجيله اسمعيني مروه ابوج وتعرفينه ايده طويله والسانه وصخ
= وانا شحاچيه
—- ادري بس جاي اگلج ومن يفتح موضوع وياي اگله البنيه قابله

= اي بس گليله ما اتزوج اهنا اريد بيت
—- ايي يمه عفيه عليج اقبلي وافتكي من ضيم طالب انتاني امين يوم يوم حتى لو يجيبلچن دشداشه لو نعال عاد
عد رجلج غصبن ما علي ايگوم بيج

سكتت وانا حرگه بگلبي شلون اتزوج واحد اكرهه واحتقره بس شسوي ابوي مو من النوع اليتفاهم واذا صادف
وگتله رافضه ماراح يعاقبني بس انا لا راح يعاقب البيت كله واولهن امي واخواني يعني لازم اسكت واضحي مثل امي
بنفس اليوم اجه ابوي ابحده وچان هادئ وامي استغلت الفرصه وگلتله // ابو امين اليوم اجت مرت اخوي وانا گتلها
احنه نتشرف بيكم بس البنيه الابن عمها
: اه وشگالت
ضاجت وتالي گالت هذا هو الله يسعدهم
رد باستهزاء// وضوجتهم شنو مطوگينه

امي ردت // ابو امين وانا هم حچيت ويه مروه وهي تگول بكييف ابوي بس گالت انا ما اتزوج اله يخليله بيت
ابوي باوع الامي وخزرها وصاحني //مريوه تعاي
اجيت وانا اجر نفس //شني شگايله الامج
امي ردت //اي گالتلي ما يصير اتزوج ابيت ابوي اخواني واخواتي
امين //اي بابا مروه ما طلبت اله حقها

: انچب انت محد طلب رايك
باوعت الامين يعني اسكت ابوي گلي// شنو حضرت جنابج تتشرطين
= لا بويه بس حالي من حال البنات جمال يخليلي بيت ياالله اتزوجه هو ما عايز ولا انا ناقصه
: وشنو البيت خاتون تردينه طابقين تلاثه
امي رادت تحچي جاوبته = لا بويه حيا الله لو غرفه بس ما اتزوج اهنا

ابوي سكت لان شاف كلامي منطقي وبقينه هو ساكت واحنه ساكتين واكثر من مره اجو عليه ناس من الجوارين
ومن المنطقه وامي تگللهم موگفه الابن عمها وابن عمي ابد ولا چن الموضوع يمه الى ان فديوم اجت جوارينه
يسموها الحجيه ام باقر
وره ما سلمت وانا جبت الجاي كالت الامي گدامي
خيه ام امين اليوم جايه اريد اخطب بنيتج مروه الابن اخوي
انا درت اريد اروح الحجيه لزمت ايدي وكالت لا يمه اريد الحچي گدامج
امي // بس خيه
ام باقر // اوگفيلي واسمعيني ابن اخوي ولد يتيم امه ربته وگعدت ما قبلت تتزوج وهسه هو مهندس ومتوظف وعنده بيت
وسياره وخير من الله وذاك اليوم من اجيتكم واجه وراي وليد باقر گال اجونه خطار من فتحت الباب الولد لچحها
وسالني عليها
وتالي العصر من اجيت انا وامه بحجة تسلم عليج

امي // ها هي هاي
: اي خيه وشافت البنيه وحمدتها وهي مو چي مرت اخوي لا والله تنحط ع الجرح ويطيب ترملت وهو عمره سنتين
وشگد خطبوها وهي ما قبلت گالت عدي رجال ما اخذ لو اموت وهسه تباوع ال الله وتباوعله
امي //الله يخلي ويحفظه بس ام باقر البنيه موگفه الجمال وهواي اجو عليها وحتى ابن اخوي

ام باقر //موگفه مو عاقده لو ملبسها الحلقه والله انا احبچ واعرف اخلاق بناتچ وهاي مو چي لابن اخوي
بس ابنيتج راح ترتاح وتشوف وجه الله الكريم
امي بحسره // شگلج
لاتگولين سولفي على ابوها وگليله
امي //الله كريم ايي راح اسولف ويه ابوها والله يقدم البي الخير

الصدك انا قبل ما تجي ام باقر بخمس تيام هي لان دووم تدخل علينه وتشوفني اخيط فجابتلي قماش مال نزلات
اثنين وگالت //خيطيهن البناتي المتزوجات
انا كملتهن العصر من طلع ابوي گلت الامي = اخذيهن البيت ام باقر
امي گالت //ما طول ابوج طلع انتي وديهن وارجعي بسرعه ما بيه حييل اوديهن ،

انا هم لبست عباتي مالت الراس ورحت دگيت الباب طلعت مرت باقر الي رحبت بيه واجتني ام باقر وگالت
فوتي اگول الگمر طالع بالنهار اثاري مراوي جايتنا
انا گتلها = لا خاله بس شوفيهن حلوات عجبنچ
هو اكو شي تسوينه ما يعجبني ذاك اليوم ابو باقر اتعجب من الكيك الي تسوينه
= ولا يهمج كل ما اسوي كيك ادزلج تدللين

شالت ام باقر فلوس الخياط وانا ما قبلت بس هي اصرت عليه واستاذنت اريد ارجع فتحت الباب رصار وجهي بوجه
ولد شاب سبحان الله ما اعرف ليش گلبي صار يدك هو باوعلي وگلي
العفو عمتي موجوده
انا ما جاوبته ورحت امشي بسرعه ودخلت البيتنا ورا اربع تيام اجت ام باقر الصبح على امي وگالت
ام امين بلكي العصر مروه تدور عليه
امي //ليش خيه سلامات
—- ها مو مرت باقر رادت تخيط نزله وتگول اريد تسويلي نزله وبرده وتسويلي للزاويه برده
اامي // ايي خيه تدلل بس ليش مروه تروح
ام باقر //مو حتى تاخذ القياسات
: ام باقر تدرين ابابوها ما يقبل

——- يا چا اتگليلي ما اعرفه فدوه مثل ذاك اليوم من راح ما تتعطل ربع ساعه واذا تردين تعاي وياها
امي //ان شالله من يروح ابوها للمعرض اخليها تجيكم
—— فدوه العينج ما تقصرين

من طلع ابوي للمعرض امي كالت // روحي شوفي مرت باقر شتريد وارجعي بسرعه
وانا جاي اگدر القماش سمعت دگة الباب ما انتبهت منو اجه من طلعت للصاله شفت نفس الولد
جاي ام باقر گالت //خاله مراوي هذا معن ابن اخوي
انا ما باوعتله حسيت الولد اتقرب گلي //مروه اذا اخطبج توافقين

انا باوعت اله واحس ريگي يبس وصرت ارجف ما حچيت ويا ولا كلمه رحت امشي وصلت للباب ام باقر گلتلي
خاله مراوي معن من شافج ذاك اليوم وهو بس يفكر بيج صدك يريد يخطبج باچر انا يمكم
باوعت الها وانا خايفه = خاله من يسمع ابوي يذبحني
ام باقر //ياستار ليش يذبحج شمسويه انتي لا تخافين راح نجي نخطبج مو نخطفج روحي خاله بس هو الولد
يريد يسمع رايج قابله لا

انا دنگت هي جاوبت //ان شالله خير
من اجت ام باقر وامي گالت الها اشوف ابوها لكن انا ما سمعت امي سولفت على ابوي بس الصبح
وصت امين گالتله // خابر عمتك امل رايدتها
صادق //اميين اشتريلك نقال الامي عاد تخابرك تخابر عمتك خالاتك
امين //هاي هي كل شهر اريد اشتريلها وهي ما تقبل تگلي ما اعرف له
امي //اي صدك ما اعرفله

صادق //اشتريلها من هذا العادي
امين //تدلل ست الحبايب
امي //مو تنسى تخابر عمتك وتجيني
امين // لا بس اوصل للمحل اخابرها

بيومها امي دخلت الغرفتها وانا وسماح اشتغلنه وطبخنا واحنه ساكتات الساعه بالعشره اجت عمتي امل
وامي لاگتها وگعدت وهي تسالنه ها اشلونكم بعدين امي دخلت وياها للغرفه وبعدها اجوا اخواني وصبينه الغدا
الساعه بتلاثه اجه ابوي وعمتي امل لاگته باسته بخده وگعد وياها وهو يگلها //شنو تردين تموتين جايتنخ
عمه // خويه ملتهيه بالبيت ما فارغه
: ليش ما فارغه مو عدج بنات
بناتي ايدرسن ابوهن ما يقبل ايبطلهن من المدرسه
هز راسه وكال// بيها الخير

امل //اگلك ابو امين رايدتك بشغله
: اي اسمعج
لا خويه بيناتنا
تعاي وراي للديوان (باوعلي وگال )سويلي چاي
هو راح وانا اخذت كوب الچاي ورحت ورا وسمعت شي فسرلي نص تصرفات ابوي

///////// //////////////. . . .//////////////////////يتبع

القصه حقيقيه وبيها احداث ولا تگلولي جاي اعيد مرات الاعاده تقتضيها احداث القصه حتى اربط ما بيناتهم