رواية بعد فوات الأوان الفصل السادس وأربعون 46 - بقلم آنين الليل

مرحبا
جدا اسفه خليتكم تنتظرون لكن صدقا الطبيب منعني من الكتابه ايدي من اكتب جمله على بعضها تخدر 😭😭
وتصير ثگيله راجعت طبيب كلي بسبب الحادث وحتى البرد صار عندج تعب بالانسجه ونصحني بالراحه وعدم الكتابه
لذلك صرت اكتب البارت واتاخر بي
هذا البارت قصير بس حتى اشيل العتب 😘😘😘
تحياتي 🥰🥰
آنيين الليل 💕💕
وغلسو اذا اكو سحك 😱😜
///////////////////////////////
جهاد
قررت وخلص راح اترك كل شي واروح وره مروه واذا صادف ورفضتني اعيش ما بقى من حياتي وهي گدامي اشوفها
اما اذا الله هداها او وافقت راح اكون اسعد انسان بالدنيا
اتصلت  ابايوب وگتله // امشي بالاجراءات

هو اكدلي انو راح يبذل جهده وراح ايبلغني اول بااول ولازم اكون مستعد باي لحظه ممكن الاتصال بيه
وبعدها اتصلت بالولد الي كلي راح يبيعلي البيت وبديت احصر الفلوس الي عندي والي عد الناس الي تشتري
مني وتاخذ وقت حتى اتسدد وصار لازم اتحرك واطالبهم ايسددون وقررت ابيع المحل والمخزن مالتي
وهنا اكيد لازم اعرضهن على امين لان هو اله الحق بان يشتريهن اكثر من اي احد غيره
اهنا اتوقفت عن التفكير وشلون لازم افاتحه بقراري

ما اعرف ليش عرگت يمكن خجل او حتى خوف ان يعرف انو انا الي اخذت اخته وسفرتها وهسه
راح اخلي كل شي وراي والحگها
شوفو انا بحياتي ممكن اتقبل اخسر كل شي اي كل شي اله اشياء اثنيين اذا خسرتهن معناتها هاي القاضيه
اول شي امين وخوته النظيفه امين الي يمكن لو عندي اخ من امي وابويه ما راح احبه واخاف علي مثل امين
لو هو ولهفته عليه وانا اشوف احترامه الي بكل مكان وهو يقدمني گدامه واذا احد سأله عني يرد  ويگول
اخوي الچبير لذلك انا ضميري ابد ما مرتاح
والشي الثاني الي اخاف اخسره  هو حلم حياتي الي عايش على موده (مروه )

مروه مو بس احبها لا مروه عايشه بروحي بدمي هيچ احبها وحتى من هي متزوجه يوسف انا چنت اعاقب نفسي
بأن ما اتزوج ولا ارتبط باي وحده لان چان عندي امل تصير معجزه والله سبحانه يجمعني بيها
لذلك صار لازم افكر شلون ابلغ امين بسفري وشلون راح ارتبط بمروه

هاي الثانيه اكبر مصيبه تواجهني صرت ليلي ما انامه ولا مرتاح كل تفكيري شلون اصارح امين بالحقيقه
هذا الشي خلاني متوتر وما اگدر انام وامين ينطيني العذر بسبب ارتفاع ضغطي چنت عايش
بدوامه وعصبي ومرتبك محتار شلون افاتح امين بالموضوع وشنو اگله وشلون اعتذر
ما لگيت شي يقنعني ولا طريقه حتى افاتحه

صرت هاي الايام اطلع للمحل واعتكف بالمكتب واخلي العمال همه الي يشتغلون ومن يجي امين احاول
الهي نفسي عنه او بالاحرى ما اگدر اباوع بوجهه ولا اخلي عيني بعينه دووم گاعد وانتظر مكالمه من ايوب
الي ابد ما رجعلي جواب

قررت اسافر البغداد احاول ارتاح وافكر بحل وبيومها اجاني امين وگعد يمي وبقى ساكت اعرف يريد
يحچي وياي  وسالني
اشلونك جهاد
جاوبته وعيني بالموبايل //الحمد لله
جهاد بيك شي
باوعتله وانا رافع تك حاجب // ليش شصاير
هز راسه // ما صاير شي بس اشوفك ضايج ومن اجي  تحاول تطلع انا مسويلك شي سامع مني شي
مخليك زعلان عليه

كلامه ذكرني اب امين الزغير الي من يسوي غلط او يشوفني ضايج يصير خايف ويبقى محتار ومن كبر يبقى ساكت
بس يلووب على ما يعرف شبيه وهذا حال امين هسه
ما عرفت شرد علي جريت نفس قوي وگتله
—— باچر اريد اروح البغداد ومن ارجع راح تعرف كل شي

حتى من گلت هاي الجمله ما عرفت شنو قصدي منها او ليش حچيتها هو باوعلي وهز راسه گلي
—— تريدني اروح وياك تره انا خويك اعين واعاون
  هزيت راسي //لا تسلم اروح ابحدي
براحتك يابه
وطلع مشى خطوتين ودار عليه وگلي
—— عود لاتنسى علاجك اخذه وياك

باوعتله وهزيتله راسي هو طلع وادري بي. مقهور عليه يريد يعرف شبيه
بقيت صافن على حالي وانا اشوف امين وصار لازم فعلا اروح البغداد اقلها ابعد شويه
وثاني يوم الصبح سافرت حتى بدون ما امر على امين هو خابرني وسالني اذا وصلت او لا وانا جاوبته ابرود

رحت النفس الفندق واخذت غرفه وبعدها صعدت واخذت حمام واتمددت ع الجربايه حاولت انام لكن ما گدرت
لزمت التلفون واتصلت بالمحامي  علي الي انطاني موعد الساعه اربعه العصر  بدلت ونزلت ركبت سيارتي
وصرت افتر بعدها ركنتها يم احد المطاعم وطلبت غدا ومن كملت طلعت وانا اباوع الساعتي اريد بس تصير
بالاربعه حتى اروح للمحامي

وصلت المكتب المحامي والسكرتير گلي هو منتظرك انا فتت وسلمت علي وگعدت وهو طلبلي گهوه
باوعلي وابتسم وگلي //شكو جهاد اسمعك
جريت نفس قوي وانا ادخن رديت //تصدك انا ما اعرف ليش طلبت اشوفك
هو اتقرب ع الميز وگلي // خير جهاد شصاير وياك
- - ما اعرف

وگف واجه يمي وكلي // على كيفك واهدا وبعدين شتريد تحچي احچي واعتبرني صديقك وانا فعلا صديقك
اخذت جكاره ورثتها وگتله //حتى جيتي البغداد ما چنت حاسب الها
—- شلون يعني
—- يعني اجت عفويه وصار لازم اجي
—- لا هاي يراد الها گعده شنو رايك نطلع الفد مكان هادي ونسولف براحتنا
—- بكيفك بس مكتبك والزبائن
يمعود تشوف الشغل كاتل نفسه ياالله

هو طلع وحجى ويه السكرتير // هاك هاي مفاتيح السياره واي احد يجي گله الاستاذ عنده شغل وانطيهم
موعد على باچر
  باوعتله // لا استاذ ما اريد اعطلك
—- ما عندي شي امشي

وطلعنا بسيارتي وهو صار يسوق وصلنه الفد كوفي الصراحه اول مره اشوفه دخلنه وگعدنا المكان هادي جدا
والي بي مبين عليهم كلهم ناس واصله هو ابتسم وكلي
—- هذا المكان فقط النخب يجوله
رفعت حواجبي هو هز راسه // اي يعني ذوله الي تشوفهم اغلبهم اساتذة جامعه مفكرين شعراء
ابتسمت // يعني بس انا المومثقف الوحيد اهنا

هو دخن جكاره وگال // مع الاسف عدنا توقاس الثقافه بالشهاده بينما هي الثقافه من صنع الانسان نفسه
   —— والشهاده
هزراسه // اكيد لكن الشهاده في كثير من الاحيان تلتزم بالعمل
بعدين ابتسم وگلي // خير جهاد اكيد ما جبتك لهنا حتى نسولف ع الثقافه
ابتسمت// شكو بيها نسولف
—- بس ما اتصور جيتك من البصره حتى نسولف ع الثقافه
—-ههههه صحيح
 
——- شوف حتى ضحكتك بيها مراره وبما انو انا المحامي مالتك (ضحك واشر بايده ) بين قوسين انا
نصبت نفسي لازم تسولفلي كل شي
لملمت حلكي // والله ما ادري
—-شنو ما تدري ؟
هو باوع للعامل وگلي //
  چاي
هز راسه//   لا بالاول اشرب عصير ليمون وبعدين اطلبلك چاي اكلك تنركل
هزيت راسي // ما اشتهي

جابلي عصير ليمون وهو اخذ گهوه وطلب نرگيله
شربت الليمون ودخنت چكاره جريت نفس قوي وگتله // انا يا استاذ محتار
هو باوعلي // اهنا احنه اصدقاء ما شفتهم كل الي يمر يكلي اشلونك ابو حسين  انت نفس الشي
  — اشكرك
——- سولف اذا ما چنت الگالك حل فاقلها راح تحس براحه لا تخلي كل شي بگلبك لان انت وصلت الهاي
المرحله الي خلتك ما تتحمل واجيت من البصره البغدادلان انت بالاساس ما تعرف شتريد

صرت احچي عن كل شي صادفني بحياتي وعن مروه والي صار الها وشلون انا ساعدتها
سالني // تحبها مو
غمضت عيوني وجريت نفس ما جاوبته هو گلي
—— احچي جهاد گول احبها
   فتحت عيوني واتنفس بقوه // مو بس احبها واموت عليها واعشق التراب الي تمشي بي

هز راسه // هذا هو تحبها حارب كل شي على مودها
—— اخاف اخسر امين الي اعزه اكثر من روحي
—— ما راح تخسره انت ذكي وكتوم وصبور وبعدين حتى لو خسرته تكون ربحت نفسك
هزيت راسي //لا استاذ ما تعرف امين شنو يعنيلي امين الاخ الي انحرمت منه العضيد الي وگفلي وكت الشده

ابتسم // ما راح تخسره
—- اتمنى اريدك تساعدني
هز راسه // اكيد اساعدك عين خيير
صار يسالني وانا اجاوبه هو وگف وگلي // ياالله نمشي نتعشى
—- والله ما اگدر

—— شنو عبالك على حسابي لا عمي على حسابك
ابتسمت //تدلل
—- تسلم
رحنا اتعشينا وشربنا گهوه وكف // الليله راح ادرس قضيتك وبكرى نتشاوف
  ——  ههههه شنو سويتها قضيه
باوعلي وربت على چتفي // تدري قضايا الحب من اصعب واعقد القضايا

وصلته بسيارتي البيتهم وهو عزمني ادخل ويا وضيفني لكن انا جاوبته ان شالله بغير وقت

  وصلت للفندق وانا شايل هموم الدنيا ومحتار بامري وصرت اتگلب بفراشي الى ان غفيت گعدت على تلفون امين
الي سالني عن احوالي جاوبته انا زين وان شالله باچر لو عگبه ارجع وسالته محتاج اجيب شي وياي هو گلي سلامتك

گمت من فراشي غسلت وبدلت ونزلت طلعت من الفندق ركبت سيارتي وطبگت يم كشك زغير شربت چاي
واكلت بسكت لان ما اشتهي بس حتى ما تبقى معدتي فارغه  صرت على صقحه وگفت وصافن على حالي
واتذكرت قبل ما اروح ويشوفني حجي عبد واشتغل عنده وشلون اجه امين وصرنا نشتغل انا ويا عرفت
انو الانسان شگد ما يملك بعد ايريد جريت نفس وحچييت
   ——-  اي اله انا مستعد انطي كل شي من اجل مروه

ركبت سيارتي بعد ان شربت الحبايه مالت الضغط وخابرت ولد تاجر رحتله وكملت ويا صفقه مالت كهربائيات
احچي ويه نفسي اذا اريد اصفي كل شي ليش اشتري بضاعه ما لگيت جواب الكل هاي الدوامه

التاجر عزمني ع الغدا لكن انا اعتذرت وطلعت بسيارتي شفت محل ملابس اطفال وحديثي الولاده نزلت
من سيارتي ودخلت للمحل واخذت جهاز طفل كامل رغم ابو المحل سالني عن جنس المولود جاوبته باني
ما اعرف فهو خلالي تشكيله

واخذتهن وطلعت افتر بالسياره واتذكرت محلات جدي بالشورجه رحت ودخلت يا الله شگد متبدله الاماكن والناس
مريت ع المحلات شفتهن موجودات لكن الوجوه مو نفسها رغم انا مريت عليهن خطف وگلبي يدك وانا اتذكر
شلون طردو ابوي وضربو واتذكر ابوي شگد انذل كله من وره امي

عصرت چف ايدي وطلعت بسرعه ورحت للبيت الي اتسجل باسمي واتحسست الطابو الي بجيبي وكفت
وصرت اباوعله واحچي واگول
——. شصار عليچ يايمه لو راضيه وقانعه بالي يجيبه ابوي وهسه انا واختي وحتى ابوي يجوز موجود ويانه

استغفرت ربي واتذكرت شكد ابوي عانى من اهله من وره امي لان چانو رافضيين يرتبط بيها وهو خلا كل شي
ورا وراح وياها لكن هي ما جازته اله بكل شي مو زين اتذكرت لمن ابوي انسجن وهي ودتنا بايد جيرانه البيت
عمي الي طرد الرجال وصار يدفع بيه وانا لازم جنه وصوته يرن باذني وهو يگل للرجال

——. اخذهم لا هسه ادفنهم وهمه عدليين وديهم الامهم شوف جايبتهم من يازباله وبركستهم براس الحمار
ومن رجعنا واحنا الطريق كله نبچي والرجال اخذنا الها صارت تضرب بينا وتكول
—— ما عليه بيكم انت دير بالك على اختك

اباوع للبيت وانا الدمعه بطرف عيني واگول // لو الف بيت ما راح اسامحج

طلعت بالسياره وقررت اروح اشوف عمي هلال طبعا للعلم عندي تلث عمام لكن انا ما اتذكر بس عمي الچبير
الي دووم يتعارك ويه ابوي وحتى يضربه وكله بسبب تصرفات امي وصلت يم البيت الي ما نسيت مكانه رغم كل
هاي السنيين ورغم شفته مبني ع الطراز الحديث وبيني وبين نفسي معقوله اشوفه موجود
—— اي يجوز بعده موجود الاعمار بيد الله

نزلت يم محل قريب شفت ولد بعمري بالمحل سلمت علي وطلبت منه عصير بارد وباكيت جكاير بعدها سالته
وانا اشرب بالعصير سالته على بيت عمي گتله // سمعت يردون ايبيعونه
    رد عليه // فعلا عارضينه للبيع
  - - - وانا اريد اشتري بس لويش مال ورثه هو لو شنو
——. اي مال جدهم وهو گاعد بي ابنهم الحجي الجبير  بعد ان رضى اخوته وانطاهم حقهم

——- ليش يردون ايبيعونه ؟
—— تعرف شباب وكلمن يريد يستقل بنفسه
  —— ها يعني ابوهم موجود
  —- اي موجود اصلا بعده بحيله
—— وشعجب هيج تحچي علي احسك ما تحبه

هز راسه // هو صعب وقاسي ابوي گال اكل حق اخو وما خله ابو يشوفه لذلك ما احبه
واولاده
- - -  زينيين ما يلتقون هلكد بالمنطقه
يحوز متكبرين مثل ابوهم
مو علگد اعرفهم كتلك ما يلتقوونو

هزيت راسي وسلمت علي ورحت وگفت يم البيت ودگيت الباب طلعلي ولد شاب گلي اتفضل
السلام عليكم
عليكم السلام
رايد الحجي
ابوي
اي والله
خير شرايد منه
موضوع خاص اذا موجود ياريت تبلغه بجيتي
منو انگله
امين اسمي امين

سد الباب وراح وره فتره رجع وكلي // اتفضل
مشى گدامي وهو يسالني // شعجب جاي من وكت
مو انا مو منا من البصره
اها اهلا وسهلا منين تعرف ابويه

ما جاوبته فتحلي باب خارجي ودخلت الغرفه واسعه مبين عليها استقبال گلي // اتفضل
گعدت وانا اباوع صورة جدي الي ما اتذكره والي يشبه ابوي بشكل ما يصدق وصوره چبيره العمي
بقيت كاعد واجه نفس الولد فتح الباب وراه دخل رجال لابس دشداشه وچفيه وعگال وبيده عكازه
چان مربوع وجهه عريض وحنطي دخل وكال
ياالله
انا وگفت هو گال السلام عليكم (ومد ايده صافحني )
انا رديت عليكم السلام
اتفضل ابني اهلا وسهلا (اشرلي اگعد )

هلا بيك حجي
باوع  الابنه بابا جيب چاي (باوعلي ) الله بالخير
الله بالخير
اجه الولد جايب صينيه بيها بطلين ماي وخلى واحد گدام ابو والثاني گدامي وانا اشوف الرجال شلون يباوعلي
ويخزني طلعت جگاره قدمتله هو كلي // ما ادخن
جاوبته // الله ينطيك الصحه والعافيه لعد انا ما راح ادخن يجوز اضوجك
  - -  لا بابا اخذ راحتك
ورثت جگارتي ورجع ابنه جاب الچاي خلا گدامي والحجي حاچاني // اتفضل ابني ابيش اخدمك
  ——. العفو خادم ربك والله حجي گالو تريد تبيع هذا البيت
هو باوعلي وگال // وانت تريد تشتري
هزيت راسي // اذا الله راد
—-وين بيتكم ؟
  - - - الحقيقه بيتي بالبصره

الحجي وهو يباوعلي // ها وجاي اهنا تريد تشتري البيت
هزيت راسي // حجي قبل سنين اجيت انا وابوي الله يرحمه على ناس اقاربنا ومن شاف البيت ابوي اتمنى اتبيعو
وهو يشتري
  الحجي // الله يرحمه
—- واليوم اجيت بشغل وعرفت انو انتم عارضينه للبيع
  رد عليه // وانت عندك فلوسه

  باوعتله // حجي ليش تباوعلي باستزغار انا الي گدامك اكبر تاجر مفروشات ومواد كهربائيه بالبصره
  هز راسه // لا عمي مو هذا قصدي والنعم منك بس البيت بهاي المنطقه غالي وبعد عدنا مشاكل ويه الورثه
رفعت اچتافي // واذا غالي انا عندي بيت بمنطقة ال ... وهو ع الشارع التجاري شتگول ما يجيب سعر هذا البيت
—- شگد مساحته ؟
تلثميه وعشرين

حك گصته // اذا قطعه تحتاج فلوس تكمل عليها وتشتري بس اذا بيت تحتاج تكمل هواي لان مثل ما تعرف القطعه
يكدر الي يشتريها يسوي بيها المشروع الي اباله
- - - يعني انگول ان شاالله موافقين على البيع
سالني // انت عرفت اني ابيش اريده
ابتسمت // حاله من حال البيوت الي بنفس المنطقه وعلى كولتك لو قطعه يجوز جابت اكثر

باوعلي وهو ما مقتنع بيه يعني متوجس مني حاچيته // حجي مو چنك ما مقتنع بكلامي
هو رد عليه وگال // والله عمي الصدوك اني ما مقتنع بيك كلك
  عكفت حواجبي // وليش ياستار ؟

- - - جاي من البصره ولان ابوك شاف البيت قبل عشرين سنه ما ادري يمته وعندك قطعه راح تبيعها وتجي
تشتري هذا البيت هذا كله حچي بابا انت بعدك زغير على هيج امور
ابتسمت جاوبته ابرود // ياامور حجي
- - - انت دازينك علينه مو
- - منو دازني ؟
الولد گال // عمي فياض يريد حصته

هزيت رغسي // لا عمي متوهم انا اصلا ما اعرف منو فياض انا جاي اشتري البيت واريد اتخاصم وياكم بالسعر
جاوبني // احنه نريده اب تسعميه وخمسين
عبالهم اتفاجأ ابتسمت // يستاهل اكثر
ابنه جاوبني // ها يعني شراي
هزيت راسي // اي شراي وحتى الحجي يتاكد انا شراي راح اراوي صورة الطابو مال قطعتي الي بمنطقة ...
حتى يتاكد انا ابن ابوي وكلمتي وحده

طلعت الطابو وانطيته للولد الي باوع للاسم وصار يباوعلي وانا اهز راسي وصل يم ابو واشر على اسمي عمي
صار يرجف وباوعلي  وهو يگول // انت جهاد ابن امينه
هزيت راسي بالنفي وجاوبته // لا جهاد ابن اخوك مسلم
  —— امك وين
—-وليش ما تسال على اخوك وين
—- ما عندي اخ اسمه مسلم

وكفت وجاوبته // تمام حجي هلال مثل ما تريد ولا يهمك بس اكو اوراق رسميه تكول هو اله بورث ابو
رد بعصبيه // ياورث هذا
- - ورث من هذا الرجال واشرت ع الصوره
- - والله حاسبها زين ابن امينه
- - حجي ما الي كلام وياكم انتو والقانون

الولد فز من مكانه وكلي // انت تعرف شنو تحچي جاي اتهددنا
هزيت راسي وجاوبته ابرود //. تؤ انا جاي اطالب بحق من حقوق ابوي الي ابوك وعمامك كلوهن علي وخلو ...
قاطعني الرجال وهو يدك بالعكازه على الارض وكال // اطلع بابا روح ما الك اي شي عدنا
  خزرته اتقربت منه //  تمام بس وروح مسلم اخذ كل فلس حق ابوي
 
رد بعصبيه // شتريد اتسوي سوي
- - - من ناحية اسوي فاسوي هواي لا تنسى انا اتربيت من هلگدني بالشارع يعني اسوي اشياء اولاد
القصور ما يسوونها
الولد بنتر وهو يجر بكلامه // ياااالله اطلع بره ولا تهدد
- - - طالع بس اگللكم البيت هذا انتو تردون تبيعونه والي لازمكم انا لان باسم جدي فه فكرو ولا تتهورون

(باوعت للحجي وحچيت ابرود ) حجي العلم اتطور والدنيا اتبدلت اذا انت تنكر انا ابن مسلم وداعتك اطلب يسوولي
تحليل ومنك انت يشوفون اكو صلة قرابه بيناتنا واذا طلع التحليل راح اقاضيك واگاومك وكل شي اسوي
جاوبني باستهزاء // تگاومني
  هزيت راسي // اي ليش عبااك ما عندي عشيره لو ما وراي زلم انا هسه رايح وشوف الزلم شتسوي

////////////////////////////////////يتبع