رواية بعد فوات الأوان الفصل الخامس وأربعون 45 - بقلم آنين الليل

مروه
هالايام صرت اتعب بسرعه وعندي زياده بضربات القلب وطبعا من اراجع يعطوني مكملات غذائيه
والطبيبه نصحتني امشي وايضا انطتني جدول للطعام وكيف اتصرف عند احساسي باالالام مفاجئه

وبصراحه بيني وبين نفسي انا چنت خايفه من المجهول الي منتظرني وخايفه اكثر بالولاده خصوصا وانا محد
يمي من اهلي اتذكرت ام بشير وعمتي امل واختي سماح الي ما صارت تتصل بيه ولا تقبل تحچي وياي اله ارجع

رغم ام عبد الله كانت تشجعني وتگلي انو هي وياي وما راح تتركني لكن يمكن الغربه والبعد عن الوطن
صرت ما انام والتفكير ماذيني ومن اشعر هالشكل اصير احچي ويه نفسي

=كافي مروه شنو خوف شنو مجهول مو انتي الي ركبتي البحر ابحدج مو انتي الي كل شي اتحملتي
بس حتى تعيشين انتي وابنج
=  ايي واذا اثناء الولاده صار عليه شي وين اخلي محمد وشنو يصير بيه

لذلك انا ذممت ام عبد الله انو اذا صار عليه شي تاخذ التلفون وانطيتها الرقم السري وتخابر امين وجهاد
وتدز الصور الي بجهازي الامين وترجع اطفالي اله هو يربيهم

صرت ابجي وهيه اتطمني انو هذا الشي وهاي الافكار تصير عد كل وحده تحمل وانو هيه ما راح تتركني
وان شاالله ما يصير اله كل خير

وسرعان ما يخطر ابالي جهاد الي چان مستعد ان يسوي اي شي وهاي صار ست اشهر لا خابر وحضرني
عرفت جهاد التهى بنفسه لان انا غلطت بحقه واذيته بكلامي ودووم اگول
= الله يوفقه ما قصر وياي ومستحييل انسى فضله

اما امين فدائما يتصل بيه ويكلي ارجعي وعيشي ابيناتنا وهذا الكلام يخليني ابچي لان اذكر لمتنا واحنه زغار
وما تعرفون شگد چانت فرحتي لمن اجته بنيه وسماها سهام على اسم امي الله يرحمها
بيومها بچييت حييل وانا احچي =. يمه كون انتي هسه يمي وتساعديني

چنت اتمنى اسأل عن جهاد لكن خفت يعرفون انو هو الي ساعدني
چانت الساعه بالسبعه بالليل لمن اندك الباب فتحته شفت شرطه اثنيين واگفيين بالباب وياهم واحد ثالث لابس
مدني اتقرب عليه وسمعت لهجته الي طمنتني من سألني // انتي مروه طالب
هزيت راسي وجاوبته //اي انا
- - اتفضلي ويانه للسفاره
بلعت ريگي =خيير استاذ

- - هناك راح تعرفين كل شي
=بس انا ما مسويه شي
- - ياريت تستعجلين وهناك راح تعرفين كل شي

شلت محمد رغم تعبانه واستأذنت الموظف ان اخلي ابيت جيرانه هو هز راسه دكيت الباب وفتحت
ام عبد الله الي شافت الشرطه والي وياهم انا گتلها
= الله يخليج ام عبد الله خلي محمد يمكم الى ان اوصل للسفاره واشوف شرايدين
هي اخذت محمد //صار (اجه زوجها وسالني (شكو )
هزيت راسي = ما اعرف بس هذا عراقي من السفاره
ابو عبدالله // لا تخافيين يمكن تدوين معلومات او شغل او سكن جديد اخذتي جهازج
هزيت راسي = اي
هذا هو اي شي خابريني
=ان شاالله

رحت وياهم وانا خايفه مرعوبه لكن امثل الهدوء وعدم اللامبالاة اتاكدت انو يوسف اهنا ويريد ياخذ ابني
بعدين ضحكت على نفسي وگلت = ولج يايوسف اصلا بس يجي اقيم علي دعوه واسجنه
=زين شنو صاير شكو
=هسه اوصل وافتهم انتي بس اهدي اهدي مروه
= شهدى خاف شكوى كيديه ويرجعوني
= ياربي لا تخليني بذاك الموقف ياربي احميني انا غريبه وانت تعلم بحالي

صرت اقرا ايات بگلبي رغم احس گلبي بارد وصلنه ونزل الرجال المدني وانا هم نزلت
هو دخل للسفاره او مكتب السفاره بهاي المدينه وانا دخلت امشي بصعوبه
ودخلني الى غرفه جان اكو كاعد بيها واحد هو شافني گام من مكانه ورحب بيه وهو يكلي

- - مدام جدا اسفيين جبنه حضرتج وانتي بهذا الوضع لكن كان ضروري تجيين اهنا
انا بلعت ريگي جاوبته = ليش استاذ شصاير
هو ابتسم // من ناحية صاير (هز راسه )  - -ان شاالله خيير
= ممكن اعرف انا ليش اهنا
- - الحقيقه يامدام اكو ناس جايين مخصوص حتى يشوفوج هسه يجون وتعرفيهم

دك جرس وانا باوعت وراي لان انفتح الباب وشفت شي مستحييل چنت اتوقعه حتى لو بالاحلام شفت جهاد
انا جمدت بمكاني وبلحظتها اتمنيت ان احضنه رغم ما مصدگه بان هو اجه ولحگني هو گعد اگبالي وكلي
- - اشلونج مروه
باوعتله ودنكت وموظف السفاره گال //اتفاجاتي ست مروه شنو ما بيناتكم تواصل واتفاق
قبل ما اجاوبه جهاد رد // استاذ هاي الايام انا انشغلت هواي بأمور السفر وما لحگت حتى اراسلها
وابلغها بجيتي واساسا حبيت اسويها الها مفاجئه

- - هههه يعني سويت الها سبرايز اوكي هسه. لازم نبلش بالاجراءات
من سمعت كلمة اجراءات انا سألت جهاد بعيوني جهاد باوع للموظف
- - استاذ اتمنى منك خمس دقايق انا ومروه حتى افهمها
هز راسه وگال// تمام

وطلع الموظف وسد الباب اهنا جهاد اتقرب عليه واول مره احس بنفسه قريب مني يمكن حتى سمعت دگات گلبه
وهو يگلي //مروه مو گتلج انتظريني راح اجيج وهاي انا وفيت بوعدي

///////////////////////////////

جهاد
بعد ان سمعت كلام مروه وانها هي خايفه على اطفالها مني اتصورو خايفه مني انا الي مستعد افديها بعمري
بس حتى اشوف ابتسامة رضا منها لكن انها تشك باني بيوم راح ااذيها وااذي اطفالها هاي النظره شانت عليه
قررت انساها واترك كل شي وراي وابدي من جديد لكن هزيت ايدي وضحكت على نفسي وانا اگول

- - ها جهاد تگدر تنسى مروه چان نسيتها من اتزوجت مو هسه من صارت حره تريد تنساها
- - والله انت مخبل حره وبعيده وبيناتنا قارات
- - بس ليش هيج تعتقد بيه
- - حقها الي مرت بي مو شويه

هزيت راسي //اكيد مو شويه واله وحده تترك كل شي وتروح وياها طفل ما تدري تغرك ما تدري
شنو يصادفها
جريت نفس وگلت //شكم وحده مثل حال مروه تتمنى الخلاص

صرت اخذ شهيق وزفير وانا بين المخنوك والمقهور والتايه النقال يمي لزمته وبقيت صافن دقيقه
واتصلت باايوب

الي رد عليه //هذا انت لو تتشاقى
—— اشلونك استاذ
——  عمي گلي ليش گطعت بينه منو اذااك وانا فصالك
  ——- ههههه تسلم ابو صبر بس لا گعدتك من النوم
  ——.  مي خالف المهم سمعنا صوتك
   ——- تسلم  راح ادخل بالموضوع مباشرة اريد اهاجر بس هالمره هجره شرعيه

—. لا بربك
— اي مثل ما سمعت اريد اهاجر
ايوب // والله فاجأتني هاي يرادلها گعده ونسولف تعال ويصير خير
يمته
مبين عليك مستعجل
ما جاوبته هو رد عليه وكال // يمته تريد تجي
  رديت بدون تفكير // اليوم
  ايوب /// لا هاالايام عندي ارتباط خليها بعد اربع تيام الساعه ثمانيه بالليل بنفس المكان
تمام
فيمان الله
الله وياك

سديت النقال وخليته ع الميز غمضت عيوني لان احس بيهن ثگل وصرت اتنفس بعدها غفيت گعدت اخذت النقال
وانا مغمض شفت الساعه ب11 ونص رجعت نمت لان ما گدرت اگوم احس بعدني تعبان قريب الساعه بالثنتيين
رن المبايل اخذته وانا متمدد على وجهي شفته أمين رديت بتعب

- - الو
- - ها جهاد شلونك اليوم
- - الحمد لله احسن
- - الحمد لله چنت نايم ؟
- - اي ليش
- - لان اتصلت اربع مرات وما رديت عليه ياالله جايك
- - هلا بيك

اجه امين هو عنده نسخه من المفتاح ماخذها علي دخل للغرفه لگاني متمدد اتقرب مني وخله ايده
على جبيني وكال //  بعد شويه عندك حراره
باوعتله وانا. احس بثكل بعيوني  هو راح للصاله فتح الثلاجه وجابلي ماي وگلي
- - اگعد جهاد اشرب ماي وخلي نتغدا
جاوبته //ما اشتهي امين

  —  هوه شنو ما تشتهي اشو اگعد اتغدا حتى نروح للطبيب
باوعتله واتثاوبت //ياطبيب
- - اريد اخذك جهاد
- - مو امس اخذتني
امين // اليوم ارجعك الغير طبيب ليش مصخن

- - ياخي ما بيه شي شوية تعب وهسه من نمت راح اصير زين
- - ولو كان اخذك واطمن عليك اگعد غسل وانا راح اصب الغدا

هو راح للمطبخ بقيت بفراشي وانا الملم بحلگي واهز راسي واكول
- - ااااه لو تدري البيه يمكن اذا ما كتلتني يمكن بعد ما تباوع بوجهي
گمت غسلت ورجعت لگيته جايب صينيه ومخلي بيها دجاج وتمن وروبه وخضره وخبز هو كلي

- - عمتي ام مرتي اجت وجابت خبز حار واشتهيتلك وياي
- - وليش كلفت نفسك
ابتسم وگلي // اتغدا بعد اخوك ما بيناتنا تكلفه
صرنا ناكل واحنا ساكتين اشوف بعيون امين كلام ولو انا اعرفه بس حبيت اسمعه من عنده سالته

- - شكو امين مو على بعضك
— ما بيه شي
هزيت راسي //بكيفك
بقيت اكل هو گلي //انت تعبان وما اريد اضوجك بمشاكلي
- - براحتك
جر نفس وباوعلي // وهم تدري بيه ما اگدر اضم عليك
باوعتله //شكو فهمني

- اختي
-منو ؟
- - مروه
- - شبيها ؟
- - طلعت حامل
باوعتله //استغفر الله
- - اي هي حامل من راحت منا ويه زوجها وهناك اتاكد حملها
- - منو گلك ؟

- - هي ومخبره هذا يوسف
- - ايي وشنو گال
- - ما گايل شي يتمنى ترجع
- - وانت شتكول ؟
اتحسر وگال // انا ابدي ترجع بس اعرف بعد ما الها رجعه
- - هونها وتهون

نفخ وگال //شهونها جهاد رجلها يكول رحنه انا وياها وما مخلي بيها كل صووج
- - هذا هو بعد شبيك
- - جهاد الناس اذا عرفت ولد عمي
سالته // ليش الهسه ما حاچي ؟
هز راسه // لا ما صارلي مجال التهييت بسالفة ابوي
- - تنحل اميين تنحل

- - ان شالله (وگف) ياالله خلي اسويلك چاي وبعدها نروح
لزمته من ايده // ما بيه شي
- - حتى لو اريد اتطمن عليك
سالته // وانت تبقى شايل همي
- - انا الشايل همك لو انت من انا هلگدودتني وانت محتار بيه
رديت علي // مو يكولون الله ياخذ شي وينطي ابداله احسن الله حرمني من اهلي ومن اختي
وانطاكم الي اهل وعزوه

رحت غسلت وهو اتاخر شويه جابلي چاي واجه شربنا وطلعنا رحنا للطبيب الي گال بعده ضغطك بي ارتفاع
بس لا باس امورك مستقره وطلب مني ارتاح واقلل التدخين امين گله

لا دكتور جهاد ممكن يسمع كلامك بكل شي بس بالتدخين لا
الدكتور ابتسم // بس لازم تحاول
انا ما جاوبت رجعنا للبيت وامين انطاني علاجي وصرت اتثاوب حتى يبين عليه اريد ارتاح لان مو من حقي
اخذه من زوجته هو گلي // هسه اخلي علي يجيك لو تريد انا ابقى يمك
هزيت راسي // لا امين صرت زين هسه انام لان كلش تعبان
طبطب على چتفي // براحتك بس تحتاج شي رمش عليه
- - تسلم

طلع وبقيت متمدد ع الجربايه واخذ العلاج مفعوله  نمت ثاني يوم طلعت للمحل ومن شافني امين
ما قبل وصار يحچي // شنو ليش ما بقيت بالبيت ترتاح
- - اضوج ابحدي
- - اي شسويلك عمي دخذلك مره وبعد ما تضوج شتگول ابو فلاح (عامل ويانه بالمحل )
ابو فلاح فرك خشمه //لا عمي جهاد دير بالك تاخذ تره اذا ما ضايج تاخذ منك فلوس وتشتريلك ضوجه

امين //ههههه جبتك عون طلعت فرعون مبين خوش مربيتك ام فليح
ابو فلاح //تف برد شرها
امين // ها ليش مو اخابرها
ابو فلاح //خابرها اموتتني يوميه شغله
جاوبته // هم حقها

باوعلي وگال // والله وانا ما مقصر
امين // ابو فلاح انت عصبي وياها
—— شسوي هالتشوفوني اشتغل باديه ورجليه
  امين // وهيه هم متحملتك
هز راسه // اي والله شسوي الوكت والظروف الله كريم
امين // ابو فلاح هسه احنه نريد نزوج هذا الخيير

ابو فلاح باوعلي // والله عمي جهاد المره مريوده هي صدك مرات تغم روحك الف مره چيفن اخذتلك
مره بس مريوده
جاوبته وانا ابتسم // ها ابو فلاح شو بدلت
ابو فلاح // عمي جهاد اخذلك مره واستقر
هزيت راسي //ان شالله

وره يومين رحت الامين وگتله// باچر اسافر البغداد
—— خيير جهاد شصاير
   — ماكو شي امي خابرتني تگلي اريد اشوفك
امين اتقرب مني //جهاد صاير شي
هزيت راسي // لا ما صاير ليش هاي شبيك

امين لملم حلكه // لان اشوفك مو على بعضك هاي اكثر من شهرين اكو شي
هزيت راسي //لا امين بس انا متوتر
  جر نفس // جهاد تصعد تنزل هاي تبقى امك يحتاج اروح وياك
  حركت ايدي // لا وين تروح انا ما اتاخر
امين // انت تعبان اروح وياك واسوق ما اگدر اخليك تروح ابحدك
ابتسمت // لاتخاف عليه ما بيه شي
  —— براحتك جهاد

وسافرت وطول الطريق امين يتصل بيه اعرف بي يخاف عليه لان انا مريض وصلت ورحت للفندق
اخذت غرفه ارتاحييت شويه بعدها اتصلت باايوب الي التقييت بي حسب الموعد وبعد ان طلبنه گهوه
هو سالني // ها جهاد تريد اسافر
هزيت راسي //اي
غمزلي وابتسم بخبث // وراها مو ؟
   اتنفست بعمق //. ابو صبر اريد اهاجر بس هجره شرعيه

هو صار يلملم بشفايفه وكلي // جهاد انت تعرف شنو هجره شرعيه
   ابتسمت // لو اعرف ما چان اتصلت بيك
... شوف جهاد لازم تعرف سواء هجره عاديه او شرعيه كلها يراد الها فلوس مصاري (يحرك باصابعه )

هزيت راسي //- - اعرف
...  وهم لازم تعرف اكو فرق بين الاثنيين
- - وانا اسمعك
... الهجره الشرعيه يعني سكن وجنسيه وتامين صحي
- - اي هيه هاي الاريدها
... تكلف جهاد تكلف
رفعت حواجبي //شلون يعني

ايوب  //  يعني يرادلها راس مال قوي جدا عندك فلوس تروح هناك تاخذهن وتقدمهن استثمار وبالتالي
راح تكون مواطن والك حقوق وعليك واجبات
- - وشگد هاي تكلف
... هوااي جهاد هوااي
- - يعني شگد
... تگدر تگول مليون دولار اذا مو اكثر

من سمعت الرقم بصراحه اتفاجأت ايوب هز راسه وگلي //لا تنسى انت تريد تستقر هناك وتعيش
- -بس هواي ايوب
هز راسه ... اي طبعا هواي
بقيت صافن بعدها گتله// زين ابو صبر انتظر مني تلفون
... انا جاهز يمته ما تريد خابرني وابلش بالاجراءات
- تسلم
.
هو ابتسم //  اكلك جهاد هذا كله الي تسوي الخاطيرها مو
- لا ابو صبر انا اريد اهاجر بعد ما الي عيشه
... تكرم عيونك وتدلل جهاد الي اگدر علي اسوي الك راجع نفسك وحضر فلوسك واتصل وانا بالخدمه
اكملك الاجراءات
سالته // يا اجراءات ؟
... شبيك جهاد هاي هجره اصوليه
- - انا ما اعرف الي اريده اوصل هناك واعيش

هو غمزلي وكال //تعيش ابحدك لو
- - لو هسه عرفت
ابتسم //من اول ما شفتك وشلون كاتل نفسك عليها عرفتك تحبها وراح تلحگها
غمضت عيوني // هسه اعتمد ؟
... الاعتماد على الله ونگول ان شاالله خير
- - ان شاالله

... انت حضر نفسك وانتظر مني تلفون وطبعا لا تنسى سمسرتي
خليت ايدي على صدري //عندي محفوظه
... من تتوكل وتتأكد من نفسك خابرني
- - تمام

وراح ايوب وانا متفاجئ من الرقم الي سمعته ركبت سيارتي وصرت امشي بيها وانا صافن حتى ما جاي افكر
ركنت السياره باحد الگراجات وصرت امشي على رجليه وانا ما اعرف وين رايح اريد اعبر الشارع صارت عيني
على لوحه مكتوب بيها علي نجم المحامي رحت للمكتب مالته چان بالدور الثاني وصلت شفت رجال گاعد سالته

اذا المحامي موجود
جوبني // اي بس يمه مراجع
هزيت راسي وانتظرت على ما طلع المراجع هو گلي اتفضل من شافني المحامي وگف ورحب بيه عرفته على نفسي
واني انا جاي باستشاره قانونيه والرجل رحب بيه خصوصا من عرف انا ساكن بالبصره
وگلي انو عنده هواي اصدقاء ومعارف هناك المهم سولفتله انو انا اريد اهاجر هجره تكون شرعيه وحبيت اسمع رايه
طبعا ما گتله انو انا شفت واحد ممكن يساعدني الرجال طلبلي گهوه وقدملي جگاره وكلي

... انو بالوقت الحاضر الهجره الشرعيه ممكنه واي دوله ترحب بأي شخص لكن لازم تكون عنده سيوله
ومن سالته شگد هو خمني نفس الرقم اكثر او اقل
سألته // ليش لازم هلكد عدنا فلوس
كان رده
... همه ما يردوك وينطوك الجنسيه وممكن تسحب اي احد من اهلك وتتعامل معاملة اي مواطن تابع الها
وشنو عبالك يسوون كل هذا الشي السواد عيونك لا همه راح ياخذون هاي الفلوس ويخلوها الك ابنگ
او يفتحون بيها مشروع تستفاد منه
انا سالته // زين استاذ اذا الفلوس او المشروع باسمي وانا الي استفاد الدوله شنو الي تستفاده

ضحك وجاوبني //هههه شنو تستفاد ليش انت المشروع وين تفتحه مو هناك الاستفاده مو من المشروع بقدر
ما يستفادون من الضريبه الي راح يحصلوها منك خلي اضرب الك مثال
... انت مثلا رحت وهناك عندك خلي نفرض خمسين شده يعني 500 الف دولار طيب راح تخليهن بالبنك التابع للدوله
البنك ما راح يعوفهن راح ينطيهن قروض او مشروع كله بفوائد قسم من هاي الفوائد طبعا ترجع الك والباقي للبنك
الفوائد الي اجتك راح تنسحب منك تأمين صحي ضريبة دخل لان هناك عدهم كل شي بالضرائب فاي شي راح تحصله
راح يرجع الهم وانت مستفاد وهمه مستفادين

- - اذا هالشكل انا شستفاد ؟
... اول شي الجنسيه ثاني شي حتى لو تريد تفتح عمل خاص بيك ما راح يمانعون مثلا سوبر ماركت عطور اي شي
ما يمانعون اولادك باي مدرسه او كليه يسجلون بدون روتين

هزيت راسي وسلمت ع المحامي بعد ان طلبت منه رقم تلفونه هو انطاني كرت خليته بجيبي وطلعت صرت
امشي الى ان وصلت الى حديقه عامه شفت ناس بيها انا هم رحت گعدت على مصطبه وانا افكر واحچي ويه نفسي
—ها جهاد على شنو نويت
—تعوف كل شي وتهاجر لو تبقى
—لاتنسى جهاد اهنا اهلك وناسك واصحابك لاتترك كل شي وتروح

—اهلي وناسي منو انا اهلي وناسي وروحي وعقلي مروه
—يعني قررت تروح
—اي اروح ما اتركها لو شيصير
—واذا رحت وهي رفضتك
—المهم اروح ويصير خير

—ولك جهاد عمره الحب ما صار بالگوه
اهنا سكتت لان ما لگيت جواب بعدها صارت نفسي توسوس الي
—مو يجوز هناك متعرفه على واحد
—يجوز تلگاها متزوجه
—يجوز تسويلك مشكله وتشتكي عليك مو عبالك هسه هي مروه الفقيره الفصليه لا هناك مروه الحره الي عايشه
ابحدهاواكيد شافت هواي اشياء حريه وقانون وحتى انفلات
هزيت راسي وانا اگول //لا لا مستحييل مروه تسوي شي غلط مستحييل

رجعت للفندق وسبحت وحاولت انام ما گدرت اتمنيت اتصل بيها لكن عزة نفسي منعتني اتصل عليه امين جاوبته

الو
اشلونك جهاد
الحمد لله
انت زين
زين الحمد لله
شكو ماكو
ما كو شي امين اتصلت باامي وباجر اشوفها
ليش
شنو ليش
اقصد ليش باچر تشوفها

زوجها واهله موجودين وانا اريد اشوفها ابحدنا
ها
امين صاير شي
لا وداعتك بس بالي يمك
الله لا يشغلك بال
انت هسه وين
بالفندق اريد انام
زين يابه اخذ راحتك تصبح على خير
اجمعيين

وبقيت ادخن وانا ما مستقر على قرار اروح او لا اترك كل شي وراي امين وخوته الي ما الگاها لو عندي
عشر اخوه
صادق وضحكته علي وكلامه حجي عبد ونصايحه وكفاته وياي الي ما تنسي بيتي منطقتي شغلي
هزيت راسي وگلت// ايي اي واحد تسمحله الفرصه يطلع ويعيش ويرتاح ما راح يفكر بيه
وهمه كلهم يگللولي انتبه النفسك اتزوج استقر وانا استقراري ويه مروه
—واذا رفضتك
—المهم اشوفها سعيده ومرتاحه
—اتچذب
هزيت راسي وحچيت بصوت مسموع //اي اچذب مروه احبها وابقى كل عمري احبها

ما اعرف يمته نمت الصبح گعدت طلبت ريوگ وبقيت گاعد شويه بعدها طلعت بسيارتي ورحت زرت
الامام الكاظم عليه السلام وهناك بذاك المكان المقدس بثيت حزني وقهري سولفت كل شي التعب والحيره
القهر وتأنيب الضمير كل شي سولفته

حسيت براحه وانا اسمع صوت المؤذن صليت وقريت قرآن الساعه بتلاثه العصر طلعت من ذلك المكان المقدس
رحت اتغديت وبعدها خابرت المحامي شفته متواجد بالمكتب وصلت يمه وطلبت منه ان يبيعلي البيت الي واهبته
الي امي هو طلب مني اوراق الهبه لكن انا فهمته انو سمعت منها شفوي فهو اخذ اسم امي الرباعي واسمي
وگلي راح يحاول يتاكد من خلال معارفه ولازم اسويله توكيل وبهاي اليومين طلب مني اشوف امي واجيب اوراق
الهبه اذا اگدر

ورجعت للفندق ما اشتهييت اكل شي مجرد سبحت وبقيت الليل كله ويه افكاري وبس ادخن
ونفسي الي كل شويه تجيبلي فكره شكل وكلام شكل الصبح گعدت بدلت وطلعت اتريگت ورحت الامي للمركز
مالتها تدرون انا حتى رقمها ما حافظه دگيت الباب الخارجي طلعت بنيه سالتها اذا موجوده هي سالتني
منو اگلها
جاوبتها // اقاربها من البصره

غابت دقايق وفتحت الي الباب وگالت اتفضل
دخلت النفس المكتب وهي اجت من شافتني حضنتني وباستني بخدي وهي اتگلي // اشتاقيتلك
ردت اسألها من يمته تشتاقيلي او تحبيني انا واختي لكن بلعتها لان شغلتي يمها جريت نفس ما جاوبت هي سالتني

- - - شلونك ماما ليش هلگد مبين عليك التعب
هي اتقربت اكثر ولزمت شعري// حبيبي شنو بيك گلي
اتنفست //تعبان ورحت للطبيب كلي ارهاق ولازم ترتاح
- - اي ارتاح لا اتعب نفسك

باوعت الها هي هزت راسها // جهاد ماما اتزوج واستقر وسافر واتونس الى متى عايش وحيد شنو تكبر لو تزغر
بعدين شنو هاي اقاربها گول ابنها
رديت عليها //. احسن مو اخاف زوجج ما يقبل
نزلت حواجبها وجاوبتني //لا شنو ما يقبل قابل مايعرف عندي ولد

اتعجبت منها ولا كأنو صاير شي ولا عبالك مسويه شي جابولي گهوه بعد ان سالتني تجيبلي ريوك وانا رفضت
باوعت الها وكلت //من اجيت ذيج المره فهمتيني انو انتي واهبتلي بيت اكو هيج شي
- - اي ليش تسأل
- - يعني هو بااسمي
اي باسمك
هزيت راسي // تمام وين الطابو

——. موجوه ورقة تنازل باسمك بس غير افتهم شتسوي بي
فتحت عيوني ع الاخر وبعدها عكفت حواجبي هي گالت // جهاد ماما انا تنازلتك عن البيت لان اريده ايفيدك
وهم اريد اطمن عليك وتستقر

بيني وبين نفسي استهزأت بكلامها من يمته تهتم الي جريت نفس ورديت عليها // هو انا قررت استقر واتزوج
ابتسمت // ها يعني قررت تستقر اهنا
  - - لا بالوقت الحاضر ما اگدر بس انا تعرفيني ابن سوك اريد اروح اشوف البيت ويجوز ااجره او اسوي
بي مشروع واذا تراجعتي بكلامج بكيفج حلالج

هي باوعتلي وفتحت باب موجود وره المكتب ورجعت بايدها فايل وخلته گدامي وكالت
- - - هذا التنازل مال البيت مني الك ويمته ما تحب تدوره بسرعه راح يندار
اخذت الورقه وشفت التنازل وتوقيعها يم كاتب عدل سالتها //شعجب اهنا مخليته
- - أأمن
عرفت مو للامان بس ما تريد احد يشوفه اخذته هي باوعتلي وكالت // اليوم امشي وياي
  سالتها // وين ؟

- - - للبيت شوف اخوك واختك
هزيت راسي وجاوبتها // غير وكت اجي مو هسه
- - - بس انا اريدهم يتعرفون بيك وانت تتعرف بيهم
- - - اي ليش لا بس انا لازم ارجع للبصره عندي شغل الفوك راسي
- - - مي خالف بس حد الغدا
- - - ما اگدر لان متواعد ويه ولد نروح سووا
هي اتقربت عليه وگالتلي //دير بالك على نفسك

هزيت راسي وسالتها على عنوان البيت وشنو اقرب نقطه داله علي وطلعت وصلت للمحامي وشوفته الورقه الي
استنسخها وكلي راح يمشي بالاجراءات ان يدور البيت باسمي
بعدها عرفني على مخمن عقارات واخذتهم غديتهم على حسابي وبعد الغدا رحنا على البيت وشافه المخمن وسالني

تريد تخمين دوله لو بيع
لا اريد ابيعه
ما مطلوب ولا متوازي
جريت نفس وهزيت راسي لا انا ما مطلوب بس محتاج ابيعه
ما اضم عليك ولان صار خبز وملح ابيناتنا بس نصبر شويه يجيبلك خوش سعر
وانت اذا بعته تدلل
ما بيناتنا
لا الحق حق

بقيت اكثر من خمس تيام والمحامي يمشي باوراق التنازل الى ان دار البيت باسمي وبهاي الايام امين يتصل بيه ويطمن
لان باله مشغول عليه وانا بهاي گعدتي ما بطلت اتصال اب ايوب الي گلي
راح يستدعونك جماعه من الصليب الاحمر ويسالونك عن سبب هجرتك
وفهمني بكليشه وكلام لازم اكوله يعني لازم اكون على اهبة الاستعداد واكيد كل هذا الشي مقابل فلوس
لان ماكو شي بالعراق ابلاش انا فهمت ايوب انو عندي بيت يجيبلي مبلغ محترم راح اعرضه للبيع والمحلات
وانا عندي سيوله بس مو هواي

هو رد عليه وكلي لازم احضر المبلغ ولازم تكون مستعد باي لحظه للسفر
من حاچاني هالشكل انا ما جاوبته هو گلي //شوف جهاد انت ترجع للبصره وتباشر شغلك وبنفس الوقت تفكر لان
هذا مصير وانت كل ما تملك راح تاخذه اهناك رووح جهاد وفكر وانا حاضر للمساعده

ثاني يوم رجعت للبصره وصلت بالليل والحقيقه اتعمدت ما اجي من وكت لان ما ردت اشوف امين
او اي واحد من اهل مروه
ما اعرف احس بنفسي خاين وجبان
دخلت للبيت الساعه 12 ورحت اتمددت على فراشي وانا كلام ايوب يرن باذني انو لازم افكر واختار
هزيت ايدي واحجي ويه نفسي باستهزاء

—-  كل عمري الي راح كووم وعمري الي جاي كوم ثاني لو اخسر مو فلوسي لو اخسر روحي هم اختارج انتي
يامروه ما يعرف ايوب وغيره يمكن هذا البيه وراثه من ابوي الله يرحمه انو احنه اذا حبيبنه نحب بجنون ونسوي كل
شي من اجل الي نحبه
يجيني السوال //. وهو ابوك شحصل من الحب بس التعب والاهانه وتالي خسر نفسه ومات مكتول بالسجن
هزيت راسي وكلت // مي خالف مستعد اخسر كل شي بس اخلص الباقي من حياتي ويه مروه

///////////////////////////////يتبع