رواية بعد فوات الأوان الفصل الرابع والعشرون 24 - بقلم آنين الليل

مروه
ما اعرف شنو اوصف وضع يوسف مره اشوفه حنين ومره اشوفه قاسي
مره انطي العذر ومرات اگولن علي ظالم
لمن اجه واتسامح مني وگلي انتي شورتي بيه واريدج اتسامحيني صار عندي امل انو ممكن هذا الانسان يتغير
نحو الافضل

حاولت بكل استطاعتي ان اغيره سحگت على نفسي بس حتى ارضي بعمري ما طلبت منه شي لان
اعرف حدودي
ولان بنفس الوكت صرت اخاف على ابني الي شايلته ابطني وانا ما اعرف هو بشنو يفكر
اشترا كهربائيات  وبنالي مطبخ واسس بي ماي واشترالي ملابس وگلي بعد لا تطلعين للحقل لكن بعمره ما طلعني
ولا ونسني ولا سولف عليه مجرد يجي ياكل وينام ويطلع يروح يغيب يومين تلاثه ويجي عصريه ويروح

دووم مرت بشير تجي يمي شويه وتروح وانا اشوفهم شلون سعداء واحد يضحي للثاني وشلون دووم وكت العصر
ياخذها ويونسها هي وجهالها

اما اختي سماح فمن يروح زوجها تجي يمي وهي حانقه على يوسف والعيشه الي انا عايشتها وحانقه عليه لان ساكته
لكن هي ما تعرف اذا انا حچيت شنو ممكن يصير يجوز افقد طفلي او يجوز افقد واحد من اخوتي

كل سكوتي الخاطر امي واخوي امين لان همه اكثر اثنيين اتعذبو ما اريد ازيد عذابهم وهسه اكو باحشاىي روح
لازم احافظ علي خصوصا وانا يوم بعد يوم اتعلق بهذا الكائن الموجود بكل حركه يتحركها احس روحي وكلبي وعقلي
يتحركن ويا

يوميه الساعه 11بالليل بعد ان اتاكد بيت بشير نامو ومحد يجي اطلع اروح اجيب النقال الي صرت اضمه بالمطبخ
وانا شادته بعلاگتين بس حتى محد يعرف هو موجود لان يوسف من يعرف اكيد راح ايموتني يوميه اخابر اخوي
امين الي اعرف بي ينتظرني بالمحل ومرات يروح واخابر عمتي الي كل فتره اسمع صوت امي تجي بس
حتى تخابرني وتطمن عليه

عرفت امين مشتري قطعه وبادي يبنيها بيت وهم عرفت ابوي ما قابل يبيع البيت لكن امي وامين مطالبينه بفلوس
خوالي الي كملت بيهن البيت وفعلا ابوي بايعه للبيت وبس منطي فلوس امي والباقي گايل الامين
انت دبر حالك مو هو بيتك هذني فلوسي وتعبي ما انطيكم من عدهن

انا من اسمع من امين تصرفات ابوي وكلامه ما استغرب لان اتذكر شگد هو ظالم ويانه وشنو سووا بينه
على مود جمال وملاك
خلال الشهرين الي مرن يوسف اتبدل ما صار يجي ولا يتقرب الي ولا يسال شنو محتاجه يجي باوقات متباعده
ياخذني للطبيبه
ومره خلا ام بشير هي تاخذني وطلب من بشير يوصلنه

چنت اشوف بوجهه غضب وعصبيه ما الها مبرر وصرت اتحاشا وهو مو مثل قبل يجي وياكل لا بعيد عني يجي
يگعد بالغرفه دقايق ويباوع وبعدها كأنما يختنك يطلع بسرعه يروح يم بشير او يتمشى بالحقل
اما انا فاعرف حدود وضعي ويا ما احاول اناقشه ولا احچي بشي اله هو يسالني

چنت بالثلث الاول من شهر الثامن لمن گعدت شفت روحي مورمه كلش والالم والانقباضات متكاثره عليه
بيومها طلعت وگفت بالباب شافني بشير راح صاح الامه الي اجت وهي تشوفني اتلوى
اخذتني ومددتني وهي تگول // تشاليع لا تخافين كل حامل تمر بيها

سوتلي ريوگ انا ما گدرت اكل والالم بي وما يزيد الظهر گالت خلي اروح البشير يخابر يوسف يجي ياخذج
للطبيب
يوسف الي صار اكثر من شهر ونص وهو ما حاچي وياي ومن يجي اشوف بعيونه نظرات تخوفني وما يتحمل
لو كلمه مني صرت ساكته مثل قبل واكثر ودائما اذكر كلام سماح من تگول
- - لازم تقررين تنطيين الطفل وترجعين الاهلي لو تبقيين طول عمرج بهذا السجن

مرات اگول بس يصير الطفل انطي الهم وارجع الاهلي لكن مجرد ما يتحرك وكانما يحچي وياي
المن اتعوفيني ومنو يرحمني
اصير ابچي واگول مستحييل اتركك اموت وما اتركك
اجه يوسف واول ما دخل چان بوجهه خوف عليه سالني
::شبيج
جاوبته = ألم كلش متاذيه
لكن مجرد ما گتله ام بشير تگول كل حامل هيج يصير وياها هوصار يعيط ويحچي ويغلط
انا لا اراديا وما اقصد بالكلمه شي جاوبته شبيك اتخبلت

واهنا هو ما خلى شي ما سووا بيه وعلى اثرها ردت افقد الطفل صرت انزف واعيط من الالم وانا بيني وبين نفسي
اگول = اذا صار بابني شي صدگني يوسف ما راح اسامحك
هو من شافني انزف انهبط او خاف ما اعرف وصلنه للمستشفى ومجرد ما شافتني الطبيبه باوعتله وكلتلته
- - هاي معنفه وانت معتدي عليها
بعدين طلبت منه يطلع واتقربت عليه وانا نايمه فحصتني وانا اعيط هي گلتلي
- - اسمعيني مروه انا متاكده هذا رجلج هو الي مسوي بيج هالشكل انتي لاتضميين عليه وانا اساعدج بس گليلي

انا موجوعه جاوبتها =لا دكتوره انا رجلي التوت او وگعت من الدرج
الطبيبه ردت - - بس الدرج ما يسوي هاي الكدمات بوجهج گليلي الحقيقه وانا اساعدج
صرت ابچي = دكتوره انقذيني الله يخليج راح اموت
بعدها الدكتوره صاحتله وانطته ورقه وگلتله اخذها للمستشفى هو گلها ادخلها مستشفى اهلي

واخذني وانا مره ابچي مره اعيط وصلنه وشافني الطبيب الي نفس سؤال الدكتوره سألني منو معتدي عليج
ونفس الجواب لان بوكتها اعرف اذا اگول هو راح يطلگني وياخذ الولد اذا بقى عايش لكن قررت اذا صاير
على ابني شي راح احچي كل شي وحتى اشتكي علي

ودخلت غرفة العمليات وطلعت وانا ما اعرف شي بعدها انتبهت واجه الطبيب المناوب وشافني وگال السماح
حاولي تشربيها عصير والصبح جيبولها شوربه
واجو اهلي واعرف بيهم ما اقتنعوا انو انا وگعت من الدرج لكن سماح حچت وياهم
وراحو گالو يمرون ع المستشفى ويشوفون ابني ومناك يرجعون بيومها يوسف اجه اتحمدلي السلامه
بعد ان طلعوا سماح وسالم وام بشير لكن بمجرد ما اتقرب مني انا نزيت وبعدت وجهي عنه لان اتذكرت وحشيته
والسوا وياي

بعدها صرت اروح وارضع ابني وهو خلاني ابيت سالم الى ان طلع ابني من الخدج ورجعنا للحقل
وانا خاله ابني بحضني وساكته وهو نفس الشي ما حچى وياي ولا اعتذر ولا كاني ام ابنه مجرد وصلنه للحقل
  وطلع وما اهتميت اليوسف صار كل اهتمامي الابني الي بعده زغير ولازمله رعايه

من يجي يوسف ما اگعد يمه ولا حتى اگله الله يساعدك وهو نفس الشي چان من يجي الساعتين او التلاثه يخلصها
ويه محمد يشيله ويبوسه ويلعبه وانا احاول اتحاشا اروح للمطبخ واسويله اكل بدون ما يطلب واخلي گدامه
چان يجي كل اسبوع ومرات كل خمس تيام ساعتين تلاثه ويروح
وانا بالمقابل احس بي انتهى من حياتي

چنت اتواصل ويه اخوي امين الي عرفت بي انو راح يكمل البيت وراح يشيلون بي وچان دائما يردد عليه نفس الجمله
- - مروه احنه ظلمناج وانتي مخيره ترجعين او تبقيين واذا ترجعين صدگيني اخليج على راسي واخليج
تمتحنيين خارجي وتدخلين كليه

هذا الشي فرحني لكن اعرف شنو الثمن اني لازم اتخلى عن ابني عن قطعه من گلبي وانا اشوفه گدامي شلون بدا يكبر
وشلون صار يناغي ابني الي اتحملت كل شي على موده شلون اگدر اعوفه ومن اعوفه شلون راح يعيش ومن
يكبر شنو راح يگول على امه الي تركته وهو بامس الحاجه الها

رفضت هاي الفكره وگلت الامين انو لازم ينتبه النفسه بعد ان عرفت انو ابوي اخذ فلوس البيت وما انطاهم بس
حق امي الي من ورث ابوها والي ما سوا شي  ابوي الي من اتزوجت ما كلف نفسه يسأل عليه ولا حتى
حاول يجي يشوفني

والي افتهمته من امين انو ابوي صار اكثر وكته مو بالبيت يعني يغيب تلث تيام او اربعه ويجي يوم يخلصها
عصبيه وتزمخ
حتى انو گايل الزينب لازم تبطلين وتگعدين بالبيت حالج حال اخواتج لكن المفاجأه انو حتى علاوي اخوي
الزغير واگف بوجهه وگايله ويه اخواني
  (زينب ما تبطل )

وصاير يعيط ويغلط على امي وهو يگلها //هاي تربيتج
انا فهمت امين انو ما دام كمل البيت لازم ينتبه النفسه ويشوفله بنيه بت حلال ويتزوجها
سماح بهاي الفتره جهضت الطفل بالشهر الثالث واجه يوسف واخذني يمها اداريها اشوف سالم مقهور وبعيونه خوف
على سماح وانا حاولت اخفف عنه = فدوه الكم ان شالله يعوضكم بعدكم شباب وبداية حياتكم
هو جاوبني ويباعلها بحب // انا مقهور على سماح لان تعبت المهم عندي سلامتها هيه

عرفت سالم يحب اختي ومتعلق بيها وخايف على مشاعرها فرحت لان احس باختي استقرت
بقيت يمها يومين واجه يوسف رجعني للحقل وعرفت من امين انو امي وزينب جايات السماح وياهم صادق
بعد ان سالم مخابرهم وصرت اسأل نفسي =ليش يوسف ما يتصرف مثل سالم اتجاه اهلي

وما الگه رد اله انو سالم يحب سماح لكن يوسف ما يحبني ولا يطيقني لذلك لازم اقنع نفسي انو يوسف ما راح
بيوم من الايام يفكر ان اكون اله زوجه وام الاطفاله انا مجرد اداة يكسر بيها عيون اهلي او اخواني بالذات
ومن يومها قررت انو احسب نفسي انا ما متزوجه وانما انا باقيه عد يوسف لان هو يطلب اهلي دين ولازم اسدده

صار هذا روتيني انا ويه يوسف يوم عن يوم انا وهو واحد يبتعد عن الثاني وكأننا اغراب
وبعمري ما راح انسى او هوه بلحظه راد يموتني او يموت ابني
وره اربع تشهر من عمر ابني اجه وگلي بدون اي مقدمات

:: من باجر تبدين اتعلفين العجول
باوعتله بدون ما اجاوب هو هز راسه وگلي ::ابنج يمج ما علي شي
ما جاوبته اكتفيت بهز راسي هو اتقرب مني وگال
::انتي خرسه لو جلدج ايحكج ترديلج كتله
ابتسمت بقهر ورديت = ذيج المره ردت تموتني انا وابني لكن الله نقذني هالمره يمكن تموتني بس انا لكن شنو
راح تگل الابنك من يكبر ليش موتتني ه...
هو قاطعني وگال :: لا ما اموتج بس اخلي بيج عاهه
غمضت عيوني وابتسمت بمراره وباوعتله = ومن يكبر ويسالك ليش شنو سوت گله هيج عفه طغيان كره او حتى
گله عدم خوف من الله

من سمع ردي هو طلع لان حسيت بي رجف وصرت اروح واحش بعد ان اخلي محمد على صفحه وچنت اشيله
واسحل الكاره مال الجت والبرسيم
اعرف بي من هيج يسوي يريد يجزعني حتى اعوفله الولد لكن انا حاربته بسكوتي وصرت اتفنن مره اشيل
حمودي على صدري ومره على ظهري اربطه بشالي بحيث ما يوگع واشيل العلف فوك راسي المهم ما اقصر
بشي وصدگوني اذا اگلكم انو من طلب مني ارجع للگاع انا فرحت لان اريد اشتغل واريد احس بنفسي موجوده
واطلع من سجن الغرفه چان عندي مو مهم اشتغل بالحقل بالبيت بس المهم من اكبر اتذكر شگد انا ضحيت
وسويت هذا الشي مو بس الابني والنفسي هم

وبنفس الوكت چنت اوصي ام بشير من تنزل للسوك تجيبلي قماش وبديت اغير وجوه المخاد واشتغل جراجف 
وغيرت البردات
وسويت لمحمد كريكوت اگعده بي واخذه وياي من اروح للحقل وخيطتله ملابس  رغم يوسف كل ما يجي يجيبله
ملابس لكن انا احب ابني يلبس من شغل ايدي چنت اشغل نفسي بهواي امور بس حتى انسى الي انا بي وما اشغل
نفسي بتفكير ما يجيبلي اله وجع الراس

سماح  دووم يجيبها سالم من يروح للبصره ومن صار عمر محمد ثمن تشهر سماح بدا يبين عليها اعراض الحمل
واشوف بعيون سالم لمعه وفرحه لكن سماح حزينه ومن سالتها جاوبتني
- - مروه من حملت بذاك الطفل الي راح چان ابالي بس يصير انطي وارجع الاهلي بس لو تعرفين شنو احساسي
من جهضته كأنما قطعه من گلبي راحت ويا لذلك انا منطيتج العذر ليش ما تعوفين ابنج وترجعين الاهلي لكن ...
= لكن شنو سماح شبيج
سماح //هسه يامروه ما ردت  احمل لان القرار صعب
جاوبتها = سالم خوش ولد ويحبج وانتي احتويتي وكل بنيه بالاخير تتزوج اذا الله كاتب الها الزواج وتكون بيت واسره
وهذا قدرنا مو انتي دووم تحچيلي هو ايگلج انتي مو فصليه انتي زوجتي

سماح //بس اخاف من يجي الطفل يتبدل
=بوكتها الله كريم وانتي ذكيه ما ينخاف عليج
سماح باوعتلي وردت //بس مو بذكائج وهسه انتي ما الج كلمه ويوميه يوسف يحتار شيسوي بيج وانتي ساكته
=ايي ساكته على مود ابني ما اريد يوسف يربي لان انا اتحملت كل شي الخاطره ويوسف من يربي راح
ايسمم افكاره عليه وانا ابني حتى من اتطلگ من يوسف ما اريده يكرهني

سماح باوعتلي باستغراب //شنو يعني بنيتج تتطلگين
اتوترت = ما تعرفين شنو ضام النه الوكت لكن انا كل الي جاي اتحمله الخاطر ابني
سماح // اگلج صدك مروه امه ومرته ما اجو حتى يشوفون حمودي
هزيت راسي وجاوبتها. = لا ولا اي واحد مر وهذا الشي الي مخوفني

سماح // ايولن شيردن ايسون بعدين سمعت من سالم انو هاي مرته يعني اخت سالم جاي تعالج حتى يصير
عدها طفل فسكتتهن ما يردن يخلنه يجي يمج دووم ويتعلق بابنه بس الشهاده لله يامروه يوسف ذاك اليوم مرعلى
سالم وبقوا يسولفون وانا اتصنط چان كل كلامه بحمودي من يسولف تتعجبين ولا چنه يوسف

=شلون يعني
سماح //يعني تحسينه فرحان متباهي بنفسه لان عنده ولد من اجه وگله اتفضل ابو محمد احس بيوسف فرح ومن
ساله سالم شلون حمودي يوسف ايگله كبران وحليان ومن ايشوفني ايناغيلي
=اي صحيح من يجي ايشيله ويبوسه ودووم يجيب العاب وملابس

زاد حقدي علي وابد ما راح انساها اله هو الشي الي سووا والي چان اكثر من كل الضيم والقهر الي مريت
بي والي لا يمكن اغفر له وياي وهذا الشي خلالي عذر انو ما راح اسامحه لو شيصيربالعكس صرت اشوفه
انسان طاغي ما يخاف من الله وانا ممكن اسامحه بكل شي اله بالي سووا خلاني مو بس اكرهه لا واحقد علي
واتمناله الموت
صار عمر محمد عشر تشهر وهاي الايام احس گلبي مقبوض وانا اتصل باخوي امين ومره حاچتني امي
لكن مو مثل كل مره ما طولت وياي وانقطع الخط بعدها خابرت امين ما رد عليه وثاني يوم جاوبني ابرود
وگلي انو عنده جماعه تجار من اهل بغداد وانو مشغول وياهم هاي الايام

وسماح ما اجتني هاي اكثر من اسبوعين اكيد سالم هالايام ما عنده شغل ويسافر للبصره وانا ما اگدر
اخابرها اخاف زوجها يعرف انو انا عندي جهاز ويسولف اليوسف الي چان يريدله حجه حتى ياخذ مني
محمد او يتخلص مني
چان گلبي يرجف ومقبوض وانا خايفه احس صاير شي وچنت مترقبه وانا مرات دموعي اينزلن بدون
مبرر او تفكير

رجعت الظهر غسلت وصبيتلي چنت اطبخ بالليل على فرغتي اطبخ واتغديت انا وحمودي الي صرت اوكله
اشياء خفيفه غسلنه واتمددت  وخليت حمودي بحضني
وانا مره اشم بي ومره ادغدغه ومره ابوسه وهو بطبيعته حلو ويضحك وبسرعه ينام يمكن لان اخذه وياي
يجوز هم يتعب اتمددت وحمودي على ايدي نام وانا بين الغافيه والگاعده حسيت سياره وگفت قريبه من البيت
بعدين اندك الباب گمت فتحت الضوه وفتحت الباب وانا اشوف سماح وهي تباوعلي وتبچي

اجه ابالي انها متعاركه ويه سالم حضنتها واسمعها تشهك وتگلي
- - چان ابدها تشوفچ ماتت بحسرتها

جمدت بمكاني ما اعرف شجاوب بس گلبي صار يدك قوي حسيت بريگي نشف ما عرفت شجاوبها هي باوعتلي
ودموعها ينزلن انتبهت الاختي لابسه اسود وحزينه باوعت الها بعيوني يعني منو
صارت تبچي اكثر وتگلي // امنا مروه امنا ماتت وهي ما شايفتج

اهنا انا ما اعرف شنو صار بيه گعدت بالكاع وانا استذكر امي حبيبتي الي گضت عمرها وهي تداري علينه الي شافت
ما شافت من ابوي والي كل شي اتحملت گعدت وانا ساكته ما گدرت لا اصرخ ولا حتىى ابچي گعدت وانا متندمه
ومتندمه حييل لان ما شفتها ولان بعد ماكو احد اصيحه يمه

يمكن دخل سالم بعد ان صاحته سماح وهو اجه وگعد گبالي هو وسماح الي لازمه ايدي وگلي
- - البقيه بحياتج خويه الله يصبركم
باوعتله وانا ارجف عبالك سعفه صارن بس دموعي ينزلن اتقربت مني سماح وهي تهز بچتفي وتگول
- - شبيچ مروه اصرخي ابچي بس لا تبقيين ساكته

باوعت الها وشهگت اريد احچي ما اگدر اشرت الها بايدي يعني خلي نروح بس ما گدرت احچي 
سماح // شتردين مروه
سالم // شدي حيلج خويه صيري قويه كلنه على هالطريق
باوعت السماح واجر نفس وگتلها وانا ابجي =. لا امي ما تعوفني هسه اخذلها محمد تشوفه ياالله خلي نروح

وگفت اريد اروح اخذ حمودي واروح اشوف امي سماح لزمت ايدي وهي تگلي
- - مروه وين ترحين
= اروح الامي انا وحمودي
سماح وهي تبچي لزمتني من چتفي // امي اتوفت صار عشر تيام

من سمعت كلام سماح انذهلت واختنكت اكثر والغرفه تفتر بيه والدنيا ظلمه صحيت وانا اشوف سماح
تشممني عطر وتذب على وجهي ماي باوعت شفت سالم واگف على صفحه گعدت وانا استرجع كلام سماح
اهنا صرخت وصرت احچي ويه سماح وانا اهز بايدي
= امي سهومه راحت لا چذب امي الي حملت على مودنا كل شي راحت والي انا حملت على مودها بس حتى
ما تنقهر راحت ماگالت وين اخلي بنيتي لو منو الها

صرت اصرخ واصرخ واصرخ لمن ما صوتي صار ما يطلع وانا الطم على وجهي واملش بشعري واجت ام بشير
وام بهاء
وسالم طلع وام بشير صارت تنعى وتبچي وانا حتى بالحايط ضربت راسي لان آيست ويقنت امي اتوفت
امي الي ما شفتها والي من وگعت مريضه انا مو يمها

صارت ام بشير وام  بهاء يصبرني لكن انا مو وياهن بقيت اصفن شويه وبعدين ابچي لو اضرب وجهي
وارجع اصفن
وانا اگول =   ليش محد خبرني بمرض امي ليش امي صار عشر تيام متوفيه محد گلي ليش

اهنا اتذكرت لمن اجه قبل عشر تيام من اجه بالليل وچان ضايج وانا اتعجبت من جيته وچان بوجهه كلام
لكن هو. بقى بس يدخن وحتى بليلتها بات يمي وحسيت بي يبچي
اجيت يم سماح گتلها = يوسف يعرف بوفاة امي مو ؟
سماح هزت راسها وسكتت سالم دك الباب وراحتله سماح ورجعت عليه وبقت ام بشير يمنا وانا ابچي واكول

= ليش يمه ليش عفتيني وما شفتج هلگد هنت عليج هلگد ما تحبيني
سماح تشهك من البچي وبعيونها كلام وانا كل هذا الي سويته ما طلع عبرتي الي انحبست بصدري
صرت املخ بروحي واخمش وجهي بايدي وام بهاء لازمتني  اتقربت عليه ام بشير وحضنتني وكالت
- - خاله مروه گومي اذكري الله كافي خاله امج راحت الرحمة الله كل هذا الي تسوينه ما يفيد

رديت عليها بصوت ما ينسمع لان تقريبا ضاع من كثر الصريخ = خاله امي راحت وما شفتها ومحد گلي
حتى من خابرت امين گلي ملتهي بالشغل ما جاي ارد عليج
باوعت السماح = يعني من خابرته هو بالفاتحه زين ليش ما گلي
ام بشير // ياالله خاله كومي صلي وادعيلها بالرحمه امج راحت راضيه عليج گومي كل هذا الشي الي
تسوينه انتي واختج ما يفيد صلن واقرن قرآن وادعلها بالرحمه
گمت وانا اكول = يايمه بقت حسره عليه شوفتج يايمه ياحبيبتي الله لا يوفق كلمن حرمني منج

ورجعت صليت وانا دموعي تسبقني وگلبي احس  بي جاي ينزف بعدها كعدت وانا ادعي الامي
بالرحمه ما اتحملت شهگت وسماح سمعتها تبچي وهي تصلي اكيد جاي نبچي من كثر الظلم
كملنه صلاة وحتى ام بشير هم صلت يمنا واجت زوجة بشير وهي جايبه العشا واهنا گالت
- - ياالله مروه اذا ما اكلتي كلنه ما راح ناكل هذا العشا ثواب الامج وحتى دزيت منه للناس الي حوالينه

ام بشير اتقربت عليه وهي تبوس بخدي وتگلي //يالله خاله الخاطري انتي مرضع وهاي من الظهر حمودي
ما راضع واختج اكيد اجت من البصره وهي تعبانه ياالله خاله هذا ثواب الامج ومحوللا وموهبه
(مسحت دموعها ) وقربت الصينيه وانا وسماح وحده تباوع للثانيه ودموعنا تنزل اكلنه شويه وبعدها
مرت بشير راحت للمطبخ
سووت چاي وبقن گاعدات يمنا الحد الساعه عشره او اكثر بعدها استاذنن وراحن وام بشير توصي بيه

- - ديري بالج على ابنج وانا رايحه وباچر اجي چان بقيت ابات يمچن بس انتن من زمان وحده ما شايفه الثانيه
لزمت ايدي وگالت // خاله مروه الحياة طويله والشجاع مو الي يطك ويسب لا الشجاع الي يتحمل

بقيت بس انا وسماح الي اتمددت لان تعبانه وهي حامل اباوع الها وانا احچي وياهه
= سماح انتي رحتي الاهلي يعني شفتي امي قبل لاتموت
سماح وهي تبچي // اي شفتها وچانت تتمنى تشوفج
اتقربت يمها وانا ابچي واعاتبها = وليش ليش ما خابرتو يوسف ليش ما اجيتوني واخذتوني اشوفها

سماح گعدت //كافي هذا القهر والبچي مو زين على حمودي شوفي شلون يباوع الج
= امي هاي سماح امي الي اتمرضت واتوفت وما حضرت فاتحتها
سماح تبچي بعبره وهي تگول // الاخر لحظه بحياتها تتمنى تشوفج

باوعت السماح الي لازمه حمودي ومخليته بحضنها = ااااااخ يايمه ااخ ما اسامح نفسي يايمه صرت انانيه على
مود ابني يايمه سامحيني يابعد روحي يمه راح اعيش طول عمري متندمه چي ما شفتج ااخ يايمه يا فراگج

اهنا بچييت حييل وطلعت عبرتي الي خانگتني وصرت ابچي حييل وسماح تبچي وياي جاوبتها
= بس اعتب على امين من اخابره وكلي يمي جماعه اثاري يمه الناس الي جايه للفاتحه
سماح // الله يساعده امين شيريد يتحمل
سالتها =ليش شصاير ؟
اتحسرت سماح // ما صاير شي هو ملتهي بمرض امي من الشغل للمستشفى كلش تعب

   هزيت راسي = بس ما راح انساهه اله امي مريضه وما يكلي
سماح // واذا عرفتي شتسوين
= اتوسل بيوسف وابوس قندرته بس حتى يخليني اروح واشوفها
سماح جاوبت بعصبيه // كافي مروه كافي يوسف يدري بامي مريضه من اول يوم دخلت بي للمستشفى

باوعتلها مستغربه وهي هزت راسها وكالت //اي ليش مستغربه يوسف يدري امين خابر سالم وكله امي
مريضه وتريد تشوف البنات وياريت تنطيني رقم يوسف
سالم گله انا اخبر يوسف لايبقى بالك
وفعلا بيومها سالم خابر يوسف وكله انو راح ياخذني حتى اشوف امي لكن يوسف ما جاوب گال بس كلمه
يصير خير

انا باهتمام // اي وشنو صار
سماح //امين طلب رقم يوسف وحچى ويا وبعدين صاير ابيناتهم كلام ويوسف خابر سالم گله اذا مروه تروح
تعوف ابنها وبعد ما الها رجعه
وانا ما اجيتج لان حتى لو رايحه وياي امي بس تشوفج تنقهر وتموت (صارت تشهك )
عبالي امي تطيب وترجع النه
  مسحت خشمها بالكلنس وهيه تتحسر // بعدها اخذني سالم اشوف امي وهناك هي بالمستشفى
ومن شافتني صارت تبجي وتكول اريد اشوف مروه
وهي تتوسل بسالم ينطي رقم يوسف الامين

وامي كالت انا احچي ويا خابره سالم وفتح الحاكيه الها وانا اشوف امي لزمت التلفون وهي ترجف وگلتله
خاله اريد اشوف مروه گبل لا اموت
اباوع الها وانا مستغربه وسماح صارن عيونها يجرن وتحچي بحرگه
- - لو تدرين شنو رد عليها گللها اسف ما اكدر اجيبها
امي بتوسل // فدوه ياخاله الله يخليك

امين من سمع امي وشلون تبچي گللها // يمه لا تتوسلين بي هسه اروح واجيب مروه من عيونه شنو ماسرها
يوسف رد على امي
صارت سماح تشهك وانا اگللها= شنو شگال سماح فهميني
- - گال بالحرف الواحد ما تجي مروه مثل ما ازهار ماتت وامي انحرمت منها انتو هم احسبو مروه ماتت من يوم
الاجت عندي والرجال بيكم الي يجي وياخذها
سحب صادق التلفون من امي وهو يگله // يوسف انت ناقص ولازم اندمك وهسه اجي واجيبها وعينك تشوف

امي انتكست واجتها حالة اغماء وراها بساعتين ضربتها جلطه بالدماغ بقت يومين وحتى من اتوفت هم سالم خابره
هو ما قبل وگال اذا تردوها تجي تخلي الولد وتروح فد نوب وسالم زعل علي واتصايح هو ويا وحتى غلط
على سالم وگله بالحرف الواحد شنو تريدني اصير مثلك انت فد واحد جبان

انا تعجبت من كلام سماح  وصرت احچي ويه نفسي
=يعني يوسف هو السبب بوفاة امي يوسف حرم امي تشوفني وحرمني منها
=يوسف الي ذلني وضربني وخلاني خدامه وهسه يريد يحرمني من ابني

بهاي اللحظه مو بس حقدت على يوسف لا وكرهته واتمنيته يموت صرت اشهك واباوع الابني الي
صار من يشوفني ابچي يبچي وياي عبالك يعرف انو اذا تركته بعد ما اشوفه حضنته وصرت احچي ويا واگله
= حمودي انت هم مكتوبلك العذاب مثل امك انت هم مكتوب عليك ما تفرح واذا عفتك منو راح يربيك وشنو راح
تشوف من ضيم

اتقربت عليه سماح وهي تكول //لا مروه ابد لا تفكرين اتركين ابنج شنو هالحچي
باوعتلها وانا مبرطمه وشفايفي يرجفن = مو خلا شرط ما اشوف امي اله اعوفه
سماح هزت راسها //ايي وامنا ماتت الله يرحمها المن تعوفين ابنج ومنو راح يرحمه
=والمن ابقى يا سماح انا كرهت يوسف كرهته لا شنو كرهته يوسف من هالحظه هاي عدوي مثل
ما چان جمال

- - مروه لا تتهورين امنا راحت الله يرحمها وانتي اول وتالي محد يبقالج بس ابنج
= لا سماح امين وصادق وعلي وزينب وانتي
باوعتلي سماح وهي تسألني //مروه انتي تگدرين تعوفين حمودي اذا تگولين ايي اگلج چذابه لان چان بامكانج
اتعوفينه وهو بالخدج بدون ما تشوفينه
جاوبتها وانا ابچي = بس ما اگدر اعيش ويه يوسف ما اگدر اعيش ويه الي صار السبب بموتة امي

- - استغفري ربج امي هذا اجلها واساسا من وصلنه لگيناها تعبانه
= بس انا سماح تعبت وهاي اول مره اگولها تعبت ياسماح بعد ما الي قابليه اتحمل واشوف يوسف بعيني
لان خلص صدكيني كرهته كرهته ما اشوفه اله عدو الي لو اتخلص منه لو يتخلص مني
سماح //حسبي الله ونعم الوكيل لو تشوفين امين وصادق وهمه يتهددون يردون يجون ياخذونج بالگوه بس انا
وعمتي امل ما قبلنه لان عرفنا لازم اتركيين ابنج وبعد ما تشوفينه (لزمت چتفي سماح وهي تكول ) يمكن امي لو
باقيه عدله يمكن چان خليناهم يجون وتعوفيين ابنج وبعدين يصير الها حل لكن من امي اتوفت شلون نخليج تعوفين
حمودي والمن ومنو يرحمه

باوعتلها وعيوني تجري = حمودي الله يرحم بحاله مو البشر بس انتي قصرتي من ما خليتي اخواني يجون
سماح // يعني نخليج تجيين وامي ما موجوده وتعوفين ولد امه موجوده لا مروه هالمره انا مو وياج
بچيت حييل واگلها = سماح مقهوره واريد اكتل نفسي واموت ليش ليش هيج جاي ينتقم مني ليش حرمني من امي
سماح //لان ما يخا ف من الله لا هو ولا اهله الله لا يوفقه الجمال الله يحرگه بنار جهنم

اتنفست = جمال مات هو والله بس العتب (صرت اشهك واحجي وانا عيوني ما بطلن ) العتب على العدل
والي حرمني ما اشوف امي (رفعت اديه بالدعاء وانا اباوع للسما )
الله لا يوفقه الله لا يخلي يشوف الراحه بحرگة گلبي على امي الله لا يوفقه
اجتني سماح وهي تحضني وتگلي // كافي مو عيونج عمن
= ياريت عميت لو متت ولا امي راحت وما شفتها
- - اسم الله عليج حمودي وين يبقى
جريت نفس وگتلها ==حسبي الله ونعم الوكيل حسبي الله ونعم الوكيل

اهنا اتذكرت وسالتها = ليش ابوي ما حچى ويا ما خلى ابو عادل يحچي ويه چبيرهم
اتحسرت سماح وهزت ايدها وهي تگول //انتي شتحچيين هو ابوي منو يشوفه بعد ما اتزوج مرت جمال

ما اتفاجأت من الي سووا ابوي لان انا اعرفه واعرف انانيته لكن صار شي ابالي
انو ابوي ويوسف هم الد اعدائي وما راح انسى الي سووا بيه راح ابقى عايشه اهنا الخاطر
ابني و راح اعتبر يوسف مات و دفنته مثل ما امي ماتت وراح اعامله على انه لاشئ بحياتي
اما ابوي فما راح اسامحه حاله حال جمال الي وصلني الهاي التهلكه وانو ابوي هو  وجمال ويوسف اعدائي
الي لازم ابد. ولا بيوم من الايام ممكن اسامحهم
///////////////////////////يتبع
اتمنى ترفعولي القصه ابين اهلكم واصدقائكم واحبابكم لان برغم مرضي والتعب الي جاي احس بي
وتأكيد الاطباء على الراحه وعدم بذل اي مجهود الا اني احاول ان ا كتب واقرا واعيد واصحح بعدها انشر
اتصور استحق منكم تصويت
تحياتي
آنيين 🥰🥰🥰