رواية بعد فوات الأوان الفصل الثالث والعشرون 23 - بقلم آنين الليل

السلام عليكم
اعتذر منكم لان فجأه انتكست وساءت حالتي ونقلوني للمستشفى لگوا عندي نقص حاد بالاوكسجيين
بعدها طلب مني الطبيب ان ما اجهد نفسي بشي
لذلك ارجو المعذره واريدكم تتحملون تاخير النشر لان والله العظيم جاي اتعب
ادعولي بالسلامه ولكم المثل 🤲
تحياتي ❤️🌷❤️
#آنيين الليل #
/////////////////////////////
يوسف
سماح اتقربت مني وكالت وهي خاله عينها بعيني // اوگف يوسف وين رايح
:: ايسحبون دم
هزت راسها وحجت بقهر // لا يوسف مروه تاخذ من الناس كلها بس انت بالذات لا

ردت احچي هي قاطعتني وتاشر باصبعها // لان هذا الي هي بي منك خلص مروه فصلتك واتحضر اذا يصير
بيها شي
جاوبتها وانا لو بيدي اسحلها ::مو چنچ اتهددين
اجاها سالم ونهرها//.    اسكتي ولا نفس شنو هالحچي مو انطيتج مجال
سماح باوعتله  وجاوبته بعبره // انت هم اضربني بس اقلها من اكول وگعت من الدرج فعلا الدرج موجود
ابيتك  كافي حرام عليكم الله انطاكم قوه وفلوس تتجبرون بيها ع الفقره يوسف ما نريد منك دم وانا
انطي الاختي وانت اذا ابنك طلع عدل واحتاج دم عود اتبرعله

سالم //انتي شتحچيين كافي ضبي السانج
اتقربت من سماح وگتلها :: ناسيه اختج فصليه وشنو اسوي بيها محد اله عندي شي
سماح باوعت السالم وبعيونها دموع // لا ما ناسيه وما ناسيه الله موجود وهو على كل ظالم وطاغي مثل
ما اخذتها فصليه كل شي ما بيها اذا صار عليها شي انت تتحمل كل شي گدام اهلها لان انطوك اياها صاغ سليم
ومحد طالع من فطر الگاع

راحت سماح ورا الممرضه وهي تگول // فرحان يگول فصليه
سالم  بعيونه عتب عليه لان يعرف هذا البي مروه مني راح وره سماح وانا بقيت گاعد وادخن
اقل النص  ساعه رجعوا وراح سالم جاب عصير السماح الي تشرب وتبچي فعلا بذيج اللحظه حسيت بنفسي
انسان ما الي وجود

اجه سالم اخذني على صفحه  وهو ايگلي //ليش هيج شنو الي يستوجب تجرم هذا الاجرام بالبنيه
بقيت ساكت سالم رد عليه // اعرف تگول بينك وبين نفسك قابل مثلك السانها شطوله وانت ساكت الها
بس خلي اگلك هذني البنات بالذات مكسورات جناح ما يملكن بس السانهن واعرف بسماح تحچي لكن
مروه ابد حتى ما تحچي لو كلمه واذا حجت فبعد ان يكون وصل حد التعب والضيم الشافته منك
خلي اگلك يايوسف العلمك مروه مو فقيره مروه سباعيه ومن يصير شي تلگاها بعشر زلم لان
الي تفدي اخوها بروحها هاي مو هينه هاي الي ينشد بيها الظهر

صرت اتنفس قوي سالم  گعد وگلي //هسه انت مو ماخذ اختي والمفروض انا هسه اگلك ياالله ولاتهتم وهي
اكيد غلطانه بس انا مشكلتي ما اعرف اجامل الغلط غلط والصح صح لو على گص رگبتي

بقيت مدنك اول مره ما اگدر اجاوب ولا انطي اعذار لان اعرف انا بكل شي غلطان طلعت الممرضه وهي شايله
طفل وگالت بسرعه اريد مره وياكم
ركضت سماح انطته الها وگالت //بهاي الوضعيه للخدج بمستشفى ال...الحكومي اهنا ما عدنا ردهة خدج
بسرعه ياالله اخذوا بالاسعاف

اخذته سماح  وسالم انا حتى ما شفته  وبقيت ويه ام بشير الي راحت شويه ورجعت بيدها علاگه وهي بس
تباوعلي وبعيونها عتاب ولوم بقيت منتظر وبس ادخن واعصابي مشدوده ساعه ورجعوا سماح
وسالم من المستشفى ومروه بعد ما مطلعينها من العمليات بقينا واحد يباوع للثاني لان اتاخرت شنو صار
سماح وگفت على صفحه وهي تباوع وتدعي وانا گاعد ادخن واجه بشير وگف ويه سالم رن تلفون سالم
الي جابه السماح گلها // امج تريد تحچي وياج
سماح مسحت دموعها وهي تگول

-الو ها ماما
-بعدهي بالعمليات ادعيلها
-اي ماما جابت ولد ودوا للخدج
- ماما انتي هسه وين
- اي ماما ابقي  بره وادعي انتي امها ادعيلها الله يگومها بالسلامه المروه حبيبتي وانتي هم ديري بالج
على نفسج انا بس تطلع اخابركم
- لا ماما لاتخلين امين يجي ادعيلها يمه ادعيلها

اسمع سالم ايگلها //اذكري الله ما يصير اله الكاتبه ربج
هزت راسها وكالت //والنعم باالله ما عدنا ملجأ اله هو على كل ظالم
رفعت ايدها وهي تگول //ياغياث المستغيثين ياصريخ المستصرخين يارب المظلومين والعالمين اغفر وارحم
وانت ارحم الراحمين يآلهي وسيدي ومولاي اريد منك اختي (هي ما اتحملت شهگت بعبره )
باسها سالم براسها يمكن ذيج اللحظه اتنومس لان عنده هيج مره

عشر دقايق وطلعوها المروه جابوها الغرفتها وهي فاقده ومعلگيلها دم ونزلوها على جربايتها وانا طلعت فلوس
وانطيتهم السلامتها بعدها بشويه اجه الطبيب وكال
- - نقذناها بمعجزه بقت يم رب العالمين اذا الليله ما نزفت نكون بالف خيرللعلم لكينه المثانه مشگوگه وسوينالها
عمليه وگعتها اذا صحيح واگعه فوگعة موت
سالم هو وسماح باوعولي وكال للطبيب // طال عمرك دكتور ما قصرت
الطبيب //واجبنا هذا لازم تبقى تحت المراقبه يبقن يمها اثنيين مرافقات تراقبنها  اريدها بهاي وضعيتها ما
اريدها تتحرك مفهوم

سماح //اي دكتور
باوع الطبيب السماح //انتي اختها
هزت راسها //اي اختها
الطبيب //تمام تبقيين يمها ومن تصحى راح تسالج على الطفل لا تگليلها بالخدج گليلها بالغرفه الثانيه وهو زين
اتقوي حتى ترضعينه واذا گالت اريد اشوفه گليلها اي بس البنج يروح منج اجيبه لان مو زين علي
سماح //صار دكتور
الطبيب //عدها العافيه وانا وصيتهم كل ساعه يجون يشوفوها
جاوبته :: شكرا دكتور ما قصرت

اتقربت سماح من سالم وگلتله //سالم اريد اخابر اهلي واگللهم طلعت وزينه
اتصل سالم
- الو
- هلا امين هاي اختك وياك
سماح // ها امين الحمد لله هسه طلعت والطبيب يگول امورها بخير
- - اي انا باقيه يمها والله هاي نايمه ما بيها شي انطيني امي
- - ها ماما والله ما بيها شي توها طلعوها والطبيب طمنه المهم انتي
- - ها ارتفع عدج السكر
- - ماما حبيبتي صدكيني احنا بخير والكاتبه الله يصير انتي لا تنقهرين اخذي علاجج بداعة مروه عدج
- - ان شالله هي اختي روحي من الدنيا ما اعوفها والله
- - الله يسلمج هذا هو يمي انتي احچي ويا واتشكري
باوعت السالم //امي وياك

سالم //الو هلا خاله
- الله يسلمج
- - لا افه عليج ماكو اي زحمه مروه اختي
- - ويطول عمرج اطمني ما بيها بس العافيه ووليدها ان شالله زين نريد دعائج
- - الله يكون بعونج
- - سالمه الله وياج

سماح گلتله //شكو
سالم //خطيه تگلي واگفه بالحوش وادعي ومرتفع عدها السكر وما تقبل ياخذوها للطبيب
سماح تباوعلي //بعد ام الله يساعدها
باوعت السماح وشلون دموعها عبالك حنفيه مفتوحه اتقرب منها سالم وگال //هاي شنو انتي القويه السباعيه
كافي تبچيين الحمد لله من الله طلعها بالسلامه

سماح وهي تمسح بدموعها //ماسمعت الطبيب يگول بس تعدي هاي الليله وديروا بالكم عليها من النزف
سالم // ان شالله ماكو شي انتي ادعيلها
اجه بشير وجاب علاگتين انطاهن السالم وگله //هذا عشا امي واختي وانتم عشاكم بره جبته
سالم // بشير صدك چذب منو يشتهي
بشير // الكل لازم ياكل ويتقوى والكاتبه الله يصير ياالله خليهن ياخذن راحتهن وانا مضطر اروح لان محد
بقى هناك ابو يعكوب انا حاضر انت بس أأمر

:: مشكور ما قصرت انت وخالتي
ام بشير // لا تحچي هيچ يمه مروه مثل بتي ادعولها الله يگومها بالسلامه

راح بشير وهو يگلي // شد حيلك يوسف الزلم كل شي ايمر  عليها
هزيت راسي وانا اجاوبه // الله كريم
بقينا  واگفين بره  اجت دكتوره روضه باوعتلي بدون ما تحچي دخلت للغرفه ودخلنه وراها باوعتلنه
وسألت  السماح // انتي شتعوديلها
- اختها
- - ابقي وانتوا اطلعوا

طلعنا وبقت اكثر من خمس دقايق بعدين سماح فتحت الباب ودخلنه هي باوعتلي
- - شوف يوسف ما نكذب عليك واتصور الدكتور فهمك بحالتها الساعات القادمه هي الفاصل لحد هاللحظه امورها
لاباس بيها جاي تستجيب للدم لكن لو نقطه توگع منها معناتها ضروري نتلاحگها ونقلع الرحم يعني بعد تحلم يصير
عندك طفل وبهاي الحاله انا اجزملك مروه ما راح تسكت وراح تگول شلون وكعت
ردت احچي سكتتني بايدها (باوعت السماح )

- - اسمعيني ماما الليله ما اريدج هيج ترمشين تنتبهيلها واذا حاولت تگوم ابد لا تخلينها فهمتج ع الحمام
واهم شي الحاله النفسيه وانا وصيت الممرضه بعد فد ساعه ابلش وياها العلاج الجديد
اذا استقر امرها منا للصبح احنه بالف خير

سماح // دكتوره والطفل
الطبيبه تباوعلي // الطفل اتمنى يكون ما بيها شي المروه وتاخذوها ترضعه وترجعوها بس هسه ما نگدر نجزم بشي
هناك الطبيب شنو سجل الكم
سماح // الطبيبه سجلت حليب واشترينه هو وممه وماي وحفاظات
هزت راسها //تمام انا باچر الصبح اجي واشوفها (وباوعتلي انا وسالم ) بقائكم ما منه فائده روحوا وباجر
بالتسعه تعالو

باوعتلي الطبيبه وگالت //رووح شوف ابنك احتمال يعيش واحتمال لا
سالم //الاعمار بايد الله دكتوره
الطبيبه // فعلا الاعمار بيد الله اذا ما كان اكو مسبب ياالله بالسلامه
طلعت الدكتوره وراها الممرضه سالم اتقرب يم سماح گلها // نروح لو نبقى
سماح //لا شكو باقيين
- - واذا صار شي
- - انا اخابرك من اي نقال اهنا

سالم مد ايده على جيبه // هاج هاي فلوس خليهن جوى ايدج
اخذتهن وهي تگله //مشكور ربي يخليك
باوعلها //ديري بالج على نفسج وعلى مروه
- - ان شالله
- - وام بشير تعبت خليها تنام
- ايي
سماح گالت //سالم
- - ها سموحه
- - اذا ما يعجبك الاكل انا مسويه فطائر بالمجمده طلعهن وحميهن بالمايكرويف

هو ضحك // تدرين بيه ما يعجبني اله طبخج
- - وچاي افتح الغلايه لا تفتح الطباخ
- - صار عمتي
ابتسمت واتقرب يمها باس راسها وهي ما اعرف شنو شاورته بس حسيت بي فرح بينه وبين نفسه
ردنا نطلع مروه اتحركت وصاحت = ااااه يمه الحگيلي راح اموت
اتقربت يمها سماح وهي حاضنتها وتگلها //  اسم الله عليج الرحمن حبيبيتي ما بيچ اله العافيه
حاولت تگلب لكن سماح منعتها وهي تگلها //مراوي مراوي لا تگلبين مو زين عليج حبيبتي تسمعيني لا تگلبيين

هي مغمضه وتحچي بألم = موجوعه اريد امي اريد اشوف امي گبل لا اموت
سماح //لا حبيبتي اسم الله عليج صيري زينه واخابرها هسه من تسمعج امي هي الي تموت ياالله احبيبية
اتمددي عدل ياالله خيتي
انا اتقربت من سماح خزرتني او وخرت وانا بستها براسها وگتلها :: مروه ما بيج اله العافيه

هي ما جاوبتني بس دموع وگعن على خدها سالم راح صاح للممرضه الي اجت وشافتها وهي تگلها
ياالله شدي حيلج
بعدين الممرضه سالتني //اگلگم شنو سميتوا البطل
سالم // محمد
- والنعم ياالله شدي حيلج ام محمد حتى ترضعينه ياالله حبيبتي تسمعيني
= ايي
الممرضه //تبقيين على هاي نومتج ما نريد غلط بالموضوع

وضربتها ابره وهي تگلها // انتي عزيزه على دكتوره روضه تمشي وتوصي بيج
سماح //شكرا ربي يخليج ويخليها
- - ولو تتدللون (باوعت النه )انتو بعد روحوا هي شويه وتنام واحنه يمها
طلعت فلوس وخليت بايدها  :: شكرا ما قصرتي
الممرضه //شنو هالزحمه هذا واجبنا
طلعنا من باب المستشفى رحت السيارتي سالم حاچاني // يالله نمشي للبيت

:: لا اروح البيتنا
- يابيت هذا
::ما شفتهم خبصوني
سالم //وشنو يعني امشي وياي انت تعبان واذا سالوك گلهم يم سالم امشي يوسف انت ما الك خلك الحچي واللومه

رحنا  البيت سالم ودخلنه للبيت الي چان عباره عن جنه من الترتيب والنظافه والنزاكه انا دخلت للديوان لكن
سالم گلي // من يمته تدخل للديوان تعال للصاله راح انزلك تراك واسبح انت واگف على رجليك من الصبح الهسه
اتصلت ضحى جاوبتها // يوسف ما تگلي انت وين

امي اخذت التلفون منها //اگلك انت شبيك الف مره اتصلنه وانت ماكو ما تگول عدي امي مرتي ارد اطمنهن
جاوبتها بتعب :: ها حجيه
امي بعصبيه // لا باالله سويت زحمه انا فاير دمي وضغطي مرتفع وانت تگول ها حجيه
::يمه شكو
-انت وين
:: بالحقل ارتاحيتي بالحقل بايت

بقت تحچي وتعيط وانا سديت التلفون ورحت للحمام سبحت طلعت والخاولي على شعري سالم گلي
تعال يوسف اتعشى
:: لا ما اشتهي كلش تعبان اريد انام
سالم // شتنام هسه لو تبلع باكيت حبوب ادري بيك ما تنام تعال اكل ونشرب چاي وربك كريم تبات نار تصبح رماد
گعدت وانا اهز براسي واگول ::استغفر الله
رحت شفت سالم مخلي كباب وصمون وفطائر وجاي ومقبلات گعدت اكل بدون نفس وسالم هم اكل كملنه ورحت
غسلت والبقه سالم ضمه بالثلاجه وجاب جاي واجه بالصاله شربت الچاي سالم حجى

- باچر الصبح ان شالله نمر ع المستشفى نشوف الطفل ونسأل الطبيب عنه
هزيت راسي :: الله يعدي الليله على خير
سالم //ان شالله الله يباوع الشبابها مسكينه بس ليش يوسف
باوعتله رجع سالني //ليش شنو سوت استحقت منك هيج تجرم بيها يااخي هي ما الها لاناقه ولاجمل لاهي
ولا اختها ولا كل بيتهم كل ما بالامر جمال ابن عمهم يتيم ابوها ربا وربا اخته وعزهم اكثر من ولده لا يجوز
اكثر بهواي تره حتى ابوهم ما اله شغل بالعكس الرجال خسر كل شي للفصل لان محد شال ويا نجي احنه نكمل
عليهم اخذنا بناتهم بس حتى نرضي غرورنا

باوعتله بتساؤل ::شنو قصدك ؟
سالم //قصدي لو واحد من عدنا انا او انت الشيطان وازانا نسوي نفس سواية جمال نقبل احد يسوي بعرضنا من
ياخذ فصليه الي تسوي انت هذا الشي ما يجوز يوسف
جاوبته :: انت تحچي هالشكل لان الجمره ما حارگه گلبك وكل ما تريد تطفى ترجع مره ثانيه تشتعل
سالم //كافي يوسف الله ستار ويحب الساترين
::شنو قصدك

سالم // - - قصدي انا ادري كلش زين امك واختي ما مخليات ستر مغطى يحچن على ابو چان خاطبها جمال
بس الي عرفته وسمعته شي ايدوخ
::شنو ؟
- - ليش هي مرتك ما سولفتلك
شعلت جگاره :: احنه ما نحچي وهي ما تجاوب اله گد السؤال

سالم وهو رافع حواجبه // هاا گد السؤال وهيج جرمت بيها اذا تحچي وتسولف وتدافع عن نفسها وتطالب بحقوقها
چان ثاني يوم موتتها
جاوبته بقلة صبر :: سالم احچي شنو الي تعرفه
- - الي اعرفه انو جمال هو السبب بان البنات يبطلن من المدرسه وانو هاي مرتك الناس الي خطبوها اكثر من شعر
راسك وكلها ناس واصله شهايد وامكانيه لكن هو نهى عليها ما رادها تتزوج راد ايذلها
اتفاجات من كلامه :: شلون ؟

سالم هز راسه // اي جمال حاول يتحارش بيها وهي رادت تحچي الابوها لكن تعرف جمال نذل يفر السالفه
راحت حچت الاخوها الي چان عمره 14سنه ويجوز ازغر وهو طيح حظ جمال
حكيت شعري :: هاا امين
سالم // اي امين طلب من صاحبه يساعده وفعلا الولد ابن ناس وساعده اخذو جمال ضربو وطيحو حظه
واخذو موبايله وكسرو سيارته وحتى ملابسه الداخليه نزعوهن منه ورجعو وخلوهن بايد امين حتى اذا
يحاول يسوي اي مكسوره امين يفضحه وهنا جمال ضماها وبحجة بت عمي واريدها خلا البنيه مثل بيت الوقف
وبنفس اليوم الي سوو بيها عملته هوه بالليل حاول يتحرش بمروه لكن هي صدته وگلتله افضحك اذا تقربت مني
والصبح صارت الحادثه

انا راسا اتذكرت شلون من ضربتها وصار الحادث يقنت انو مروه انسانه شريفه باوعت السالم وانا اگول
:: سالم انا ادري بيها شريفه واشرف من الشرف  واعرف كلش زين هي شگد نقيه بس سالم انا ما اعرف شبيه
من اكون ابيتنا اختنك اريد بس اوصل يمها مجرد ما اشوفها اشوف شي اكرهه ما اعرف شنو اگوم اضرب بيها
لان ما اشوفها مروه گدامي

سالم باهتمام // يوسف اسم الله شنو شتشوفها
:: ما ادري وبس اطلع اتقيأ وارجع البيتنا ارتاح
سالم // طلگها يوسف طلگها انت جاي تشيل خطيتها حرام عليك وحرام عليه لان ادري هذا الشي حرام طلگها
يااخي واكسب نفسك
هزيت راسي ::ما اگدر
- على مود الولد
::مو بس الولد
- تحبها
::لا

سالم بعصبيه // شنو اذا ما تحبها ومو على مود الولد شنو يوسف ليش امبقيها بس تشيل آثام
جريت نفس قوي :: رووح نام سالم وخليني
سالم اشر على الغرفه الجوه //گوم للغرفه نام بيها وانا اجي انام يمك
::لا يابه  انت اصعد الغرفتك نام
سالم بابتسامه // والله غرفتي اذا ما بيها مريتي ما انام بيها انت شتحچي
ضحكت :... صدك على گولة خالتك خوش رابطتك

- - وليش خالتي من يمها غفور رحيم ومن يمي شديد العقاب شنو ما چانت رابطه عمي لو نسيت كلمتها ما تصير اثنين
::شقصدك
- قصدي تعرفه
:: لا والله ما اعرفه
سالم اتحسر // تره مرت ابوي ام سيف  گلتلي على كل شي ولو چنت  ادري صدگني ما انطي ضحى لو تنطبك
السموات ع الارض
:: شقصدك ؟

سالم //قصدي اللعبه الدنيئه الي لعبوها ابوي وابوك وامك واختك وحتى اختي بس يبعدونك عن سحر
باوعتله :: يعني سالم تريد اتفهمني انت ما تعرف
- - افه عليك يوسف اعرف واسكت شبيه اذا مو اخلاقي رجولتي صدگني ذاك اليوم عرفت حديث جر حديث
:: هاا وشلون
سالم // الصراحه انا قبل ما اخطب ازهار الله يرحمها
:: تعيش

- قبل ما اخطبها چانت بنيتي اخطب بت اخوها المرت ابوي وحچيت وياها والبنيه وافقت بس تكمل كليه وانا هم
گلت الخالتي وفجأه انا بدلت رأيي مو شفت شي على البنيه لا سامح الله  لكن ابوي واختي وخالتي قنعوني على بت
عمي ومن عرفت انو انت تريد لك بنيه وياك انا فرحت گلت نخطبلك ونكمل وبعدين افاتح عمي والصار بسرعه
بسرعه تفركشت خطبتك وزوجوك اختي وانت ساكت

::لا والله ما ساكت لكن اشوفها چبيره عمي يجيب بته وينطيني اياها ما گدرت اخجله
سالم //ومن عرفت ؟
:: من عرفت چان الوكت مو بصالحنه وحتى سحر  رفضت الارتباط بيه سالم لاتزعل حتى گتلها اطلك ضحى
بس هي ما قبلت
سالم // سوت عين العقل انها رفضتك
:: وليش انا شبيه هلگد طايح من عينك

سالم //لا تفهمني غلط بس تدري ما راح يخلوها بحالها اقصد امك واختي وحتى اختك  النساء  اذا وحده حبت الثانيه
تسوي كل شي على مودها وخالتي تحب ضحى لان ربتها وسحر ذكيه اتگلك اتراهمو عليه وخربو خطبتي قبل
ما تصير فليش ارجع واخرب حياتي بايدي واعيش كابوس ما اصحى منه اله بطلاگي
::هاا هيج

سالم هز راسه // اي يوسف وطاحت براس مروه المسكينه
عضيت شفتي قهر :: بس على كلامك مروه مو مسكينه
- - لا مو مسكينه مروه مؤدبه وعايشه العيشه الي انكتبت وانفرضت عليها لان هي بت اصول
:: يعني شتشوف ؟

- - اذا ما تريدها طلگها وكافي تشيل خطيتها
:: والولد ؟
سالم هز ايده //انت شتشوف
جاوبته بعصبيه :: اذا اطلگها تحلم تشوف الولد بعينها
- - ما سويت شي ياصاحبي الحرام راكبك راكبك

بقيت ساكت سالم گلي //شفتها اول ما انتبهت صارت تصرخ وتگول اريد امي وهي چبيره مو زغيره باچر هذا
اذا گطعته من امه شلون تواجه رب العالمين

ما جاوبته درت وجهي عباله نمت لكن انا افكار متضاربه براسي يعني الولد الي منتظره اجه ويجوز ما يعيش
بسبب عصبيتي الي بدون مبرر واذا عاش وطلگت امه شلون راح اتعامل ويا وشنو  راح يصير بي ومنو الي يربي
ومن يكبر يغفر لي لو اعيشه بوهم وچذبه چبيره انو امك هي الي ما رادتك وذبتك عليه حتى تشوف نفسها
اويلي منك ياجمال انت السبب لو اگدر اطلعك واسحك عليك بشفل واحرك اعظامك هم ما تبرد جمرة گلبي

الصبح گعدنا صلينه وسووا ريوك وراح جاب صمون من الفرن انا اتصلت بالدائره واخذت اجازه وطلعنه
للمستشفى الحكومي
اول مره اروح اشوف ابني الي يمكن يعيش او لا ابني الي انا السبب بان نزل بغير وكته
وصلنه شافتنا الطبيبه وسالناها عنه گالت
- - ...الطفل ناقص بعده بالخدج وياريت امه تگدر تجي ترضعه لان الرضاعه الطبيعيه جدا مهمه حاولوا تجيبوها

سالم جاوبها //دكتوره مسويه عمليه
هزت راسها وانا رحت شفته من وره الزجاج رغم زغير كلش بس دنفوش ما اعرف گلبي صار يدك وعيوني
دمعن شفت الممرضه المسؤوله صحتلها على صفحه وشلت الها مبلغ وخليتهن بايدها وگتلها
::ابني تديرين بالج علي
من شافت المبلغ ردت عليه // من عيوني استاذ حتى اليوم مو خفارتي ابقى يمه
:: ايي لان امه وخالته بالمستشفى وانا امي مره چبيره واختي متزوجه بعيد

- - ولا يهمك استاذ بعيني
:: سالمه عينج وانتي تتدللين بس كون يبقى
- - ان شالله ما بي بس العافيه يكبر وتزوجه وتشوف اولاد اولاده
:: هاج هذا رقم تلفوني واتصلي بيه اذا يصير شي

رحنا انا وسالم للمستشفى دخلنه لگيت مروه گاعده وجاي تشرب عصير هي بس شافتني دنگت ما باوعتلي
سالم اشر السماح هي وام بشير طلعوبقيت يمها
جريت نفس :: اشلونج اليوم
= الحمد لله
::بيج ترحين ترضعين حمودي
=خلي تجي الطبيبه
:: ان شالله انا رحت شفته

هي برطمت ونزلت دموعها اتقربت يمها ردت امسح دموعها هي نزت وابتعدت عني ما حاولت اعقب طلعت وخليت
الباب مفتوح دخلت سماح گلتلها  = عدليني اريد ارتاح
اتمددت واجت الدكتوره والطبيب المقيم شافت الضغط واتقربت يمها وحچت وياها بعدين گلتلها
- مروه تگدرين ترحين ترضعين ابنج اعرف الوضع صعب عليج وانتي بكيفج بس الي اشوفه الرضاعه الطبيعيه
زينه الابنج والج
هي هزت راسها الطبيبه گالت //هاا يعني موافقه
= اي

الطبيبه // زين لعد ( باوعتلي )  تاخذها بسياره شويه عريضه لان الدم راح يرافقها وراح ادز وياها ممرضه واختها
ماشي ترضع نالطفل عشر دقايق وترجع والعصر همه اذا استقرت حالتها احتمال اخليها تنام مستشفى اهناك وتبقى يم طفلها
جاوبتها :: انا اشكرج دكتوره لان انتي تعبتي ويانه
الدكتوره حاچتني بعدم اهتمام //تؤ انا تعبت الخاطر مروه لان هي فعلا انسانه تستاهل كل خير وياالله روح
حضر السياره (باوعت للسستر ) روحي وياها عبير هسه اكتبلج ورقه عشر دقايق ترضع الطفل وترجعون
- صار دكتوره

وحضرو مروه بالعربانه بعدها ركبتها بالسياره السستر ركبت يمي وسماح يم اختها وسالم لحگنا بتكسي ام بشير
بقت بالغرفه
وصلنه للمستشفى نزلتها بالعربانه والسستر لازمه بطل الدم ودخلوها بس هي والسستر وشفتها شلون خلوا الطفل
بحضنها بالبدايه ما سيطرت ترضعه لان زغير لكن هو اخذ صدرها واشوفها ارتاحت قربته الها السستر وباسته
ورجعنا والعصر نفس الشي ثاني يوم استقرت حالتها وهم اخذتها ترضع ابني وثالث يوم ونقلتها الطبيبه للمستشفى
الحكومي بقت يومين وطلعت من المستشفى وانا خليتها  ابيت سالم ويوميه ناخذها ترضع الطفل وترجع الى ان قرروا
يطلعون الطفل بس الطبيبه وصت انو الغرفه  دائما تكون ظلمه وعدم دخول اشخاص علي بس امه تبقى يمه لذلك
انا خليتها ابيت سالم
///////////////////////////////////////

سماح
بعد ان طلعت مروه من العمليه انا خابرت امين وطمنته وطمنت امي وراح سالم ويوسف
بعد ان شويه صحت مروه وصار عليه لازم اراقبها تقريبا الساعه تلاثه الفجر ام بشير نايمه ومروه تتوجع وترجع
تنام وانا گاعده ما اگدر انام  لان اخاف عليها اندك الباب لبست حجابي وفتحته شفت امين وامي وصادق وعمتي
وزينب وعلاوي ما صدگت عيوني شلون جايين وهمه مقهورين وتعبانيين انا حضنتهم وانا ابچي وامي وعمتي
وزينب راحن المروه يبوسن بيها وامي تحچي وياها

ام بشير گعدت سلمت عليهم وانا صرت ابچي مروه من حست بامي فتحت عيونها
وهي تشوفها غمضت عبالها تحلم بس امي صارت تشهك بالبچي وتگلها //فتحي عيونج يمه انا امچ
عمتي امل تبوس بايدها اما زينب فچانت صافنه وبس دموع وصلت يمها حضنتها الزينب وانا اگلها
- -حبيبتي زنوبه مروه ما بيها شي شنو ما مشتاقتلي
هي ردت عليه وگالت // شگد اكره ابوي

ابتسمت الكلامها هاي وين انا احچي وهي وين صارت تشهك وهي تگول  // ليش مروه ما تحچي
ام بشير // اگعدو وارتاحو هسه تگعد
طلعت ماي من الثلاجه گعدو وامي واگفه تباوع وهي تگلها //مراوي يمه اگعدي خلي اشوفج
هي فتحت عيونها ومن شافتهم ابتسمت امي حضنتها وعمتي اما زينب يمكن مية بوسه باستها وهي تسال

= اريد امين علاوي وين
صادق اجه يمها //ايا بذات وانا ما ترديني ليش
هي برطمت من سمعت صوت صادق الي حضنها وعيونه صبن الموقف ما اعرف اشرحه وبقو اكثر من ساعتين
عمتي امل گالت // خلي نروح لا يجون وتصير سالفه
صادق رد بعصبيه  // منو هذا الي يروح ومنو الي يجون اهنا منتظرهم اريد اشوف الهمجيه مالتهم مو كافي منها

امل // انجب صادق مو اجيت تسوي طلايب بالمستشفى اختك امورها مو زينه والطفل بالخدج الحمد لله من الله گومها
بالسلامه
صادق // ها ونخليهن اسيرات واحنا نشتغل وناكل ونلبس ونضحك
اتقربت يمه وگتله // منو الاسيرات احنه ( ابتسمت باستهزاء ) لا صدوقي لا متوهم همه اسرى واسرى حرب وداعتك

صادق // اعرفج ذيبه ما ينخاف عليج بس الى متى ما تجن ما نشوفچن
- - مو بعيدين صادق اول  وتالي تبرد النفوس
امي //كلام اختك صحيح لا تتهور

اندك الباب صفنه راح صادق فتحه شفنا جهاد جايب ريوك سلم علينه وباوع المروه گلها // الحمد لله ع السلامه خويه
هي ردت بتعب = الله يسلمك
- مبروك ما اجالكم
= تسلم الله يخليك
- - ياالله هذا ريوكم اتريگو وانا متانيكم
صادق //خليهن يتريگن براحتهن احنه لاحگينك

واتريگنا انا وامي وزينب وعمتي مروه ما قبلت تاكل على ما تجي الطبيبه بس اصرت على امي تاكل شفت مروه
ارتاحت وامي توصي بيه تگلها //اصبري اول وتالي يصيرالها حل والله ما قصر ترس حضنج
امل // اي عمه وما طول اختج يمج انتي بخير وشنو تردين بتلفون تلث ساعات يمج

ورجعو الولد بوسو مروه وانطوني الها فلوس هي گالت = المن وشسوي بيهن فلوسكم ما صارفتهن
امين // مي خالف يجي وكتهن يفيدنج
چان المبلغ مليون الي خلا امين انا باوعتله // هلا هلا الدولار مرتفع
امين ابتسم // الحمد لله انتي هم من تجيبيبن الج مليون

صادق وهو يضحك // اذا ولد ويشبه خاله صادق  بس اذا بنيه وتشبه زنيبه الدنفوسه خمسميه
قلدت علي // ههههه ما تضحك اصلا اخذ من الكل  بس منك ما اخذ
صادق // ليش لان اشتغل بالسمج
- - هههههه هم ما تضحك

امي  // ولج سماح تزوجتي وبعدج ارويسيه انتي وصادق
صادق //اي يمه ما تشوفين شورت بيها
سماح باستهزاء //دخييل جدك سيد وما ندري بيك
صرنا نضحك امين طلع  فلوس وگال // هاي من جهاد هدية للطفل وهاج هذني الج

اشوف زينب عيونها لمعت وسلمو على مروه ومن وصل امين يمي باسني براسي
وگلي // ما اوصيج ديري بالج على مروه
انا اشرت على عيوني // لا توصي اموني مروه بعيوني بس انت لازم تنتبه النفسك وتتزوج اوتستقر خلي امي
شويه ترتاح
مروه بتعب = ايي امين اتزوج
امين اياشر على امي // اساليها اگلها خلي اخذج عمره انتي وعمه امل وهي ما تقبل

- - ليش يمه روحي ما طول بحيلج
امي // ان شالله بس كون مراوي تشد حيلها وتگوم بالسلامه
= ان شالله
زينب // ما تگليلها على سوالف طالب
-امي // انجبي زينب
- انجبينا

جاوبتها // مو جديده لو شيسوي عادي المهم امين يمه خلي  يتزوج ويستقر ويفرح
- ان شالله بس ياالله مروه گومي على حيلج
= ان شالله ( اتحسرت ) يمه
- ها يابعد امج
حچت وهي تبچي = ادعي الحمودي الله يخلي
امي صارت تبچي وتشم بمروه وهي تگلها // من البارحه وانا بره وبالسياره مطلعه گصتي وادعي الله يكومج
ويخلي اوليدج
عمتي امل //تحبينه مروه
مروه طاحن دموعها عمتي اتقربت منها وكالت //شفتوما شايفته وتوها جايبته وشلون تبچي الله يساعد الامهات
شگد يحملن

امي //الله يخلي الج ويشيل عنج كل ضيم وتشوفينه عريس وتفرحين بي
صادق //دخلي يعرسون خواله بالاول
امل //ياالله شدو حيلكم
صادق //انا مستعد اذا تردون هسه
شوفولي ابنية حلال وعرسولي

ضحكنا رغم القهر وراحو اهلي امين اتاخر وسالني // سماح شبيها مروه ليش هيج وجهها
-ما بيها شي التوت رجلها وطاحت من الدرج الله ستر
امين //اسمعيني سماح صحيح انتن قبلتن لكن من ترجع للكرامه وداعتج احرك الدنيا ومو عبالج ساكت
جاي وخال كل شي كدام عيني اسمعيني لو اعرف بيج انتي او مروه مذلولات صدكي هذا حصتهم
طلع من جيبه مسدس من شفته بلعت ريگي واگله  // - اطمن امين ماكو شي

- - اتمنى سماح اتمنى
جاوبته وانا ابتسم //. لو تشوف يوسف من صار الولد طار وصار يوزع فلوس وهو ما قبل يسوي العمليه
اله بمستشفى اهلي
امين // ها شعجب
- - مو انتو ما تدرون يوسف ما يصير عنده جهال وهسه اجه ولي العهد طار بي
امين// وانتي سماح
اتاشر بايدها // انا سدكم امين من يمي كلها شهر شهرين وارجع يمكم وتملوني
امين // يعني اطمن
—-  هههه وخلي ابطنك بطيخهصيفي على گولت المصري

هز. راسه وباسني ما صبرت نزلن دموعي لكن حسينه براحه لان شفنه امي واخواني بسرعه لميت الغرفه 
والصبح اجت الممرضه وگالت // خلي تشرب عصير وتاكل سوائل ومشيها
واستقرت حالتها  وطلعت البيتي وبعدها باسبوع طلعنا حمودي عدنا
يوسف يروح ويرجع وهي ابد ما تگعد بنفس المكان من يجي ولا تحچي ويا ولا توصي على اي شي

انا من جهاز سالم اتواصل ويه امين بعدين سالم گلي خابري اخوج من جهازج بعد ان سيفلي الرقم
وره شهر حسيت باعراض دوخه
اخذني سالم حللي طلعت حامل وما اوصف الكم فرحته وقررت بيني وبين نفسي مجرد اذا جبت ولد اعوفه واتطلك
واذا جبت ابنيه اعوفها واخلي امين يدفع باقي الديه ولا ابقى طول عمري فصلية شرف من اجل ناس ما عدها ذرة الشرف

///////////////////////////////////يتبع