رواية بعد فوات الأوان الفصل السادس والعشرون 26 - بقلم آنين الليل

صباح الخير
اشكر الاعزاء الي يسالون عن صحتي يارب ما تشوفون شر
انا صارلي يومين بالمستشفى لان اختنك فاروح حتى ايخلولي اوكسجين لكن الطبيب اصر على بقائي للمراقبه
وهذا الشي خلاني اتاخر بكتابة البارت ونشره

احبابي التمسولي العذر انتم حقكم لكن انا ما بايدي شي صدگوني اذا الله ينطينه عمر راح اكملها وانتو
تستمتعون بقراءتها وانشر غيرها بس انتوا اصبروا وياي

الله لا يراويكم من اختنك شنو يصير وياي 😭😭
اتمنولي الشفاء والسعاده🤲🤲
تحياتي 🥰🥰🥰🥰
# آنيين الليل#

/////////........///////////........//////////.......////////

امين
ابوي اتفاجأ من كلامي ويا ما رد عليه ولان شاف الفاتحه شگد چبيره والناس الي اجت وانا رغم حزني على امي
لكن مضطر اكون قوي واستقبل العالم الي اجت على مودي

من اتوفت امي كلنه فقدنا عليها حسينا بعد ما النه احد يشيل همنا رغم همها وما عدنا حضن دافي نلجأ اله
بيومها كلنه حضناها وصرنا نبچي عليها كأنما اطفال وفعلا حسينا باليتم
ابچي وانا حاضنها واگلها لا يمه لا اگعدي احنه بحاجتج
اما صادق فهذا صار يصرخ ويضرب راسه بالحايط وعلي ايكلها ماما اكعدي الخاطري

اخواتي سماح وزينب يبچن ويعاتبن بمروه ويكللها تعاي مروه تعاي بقينا بدون ام

لكن كل شي واله نهايه رحت انا وعمتي وجهاد للدفنه ماخليت البنات يجن بقت خالتي ونسوان خالي
وانا بالسياره مهموم وابچي لكن سرعان ماتجي الاحداث گدامي صرت اخابر بصادق واوصي
اذا ابوي موجود لا تحچي الى ان اجي
وصادق يتهدد ويگلي //اذا يجي اسحله

انا حچيت بعصبيه //صادق ما تفك حلگك اذا يجي روح الغير مكان تعبت ما عندي طاقه
صادق سالني //شبيك اميين
اهنا ما اتحملت بچييت بعبره // ما بيه شي بس توني دفنت امي واختي ما اجت شافتها وانت جاي
تتهدد تريد تكتل ابوك وتريدني اتحمل
صادق //خلص اميين انا اسكت بس المهم انت ترتاح

ورجعت وانا محمل بالذكريات الحزينه لان امي ما ارتاحت ولا شافت الراحه وكله من وره ابوي
حتى الصار المروه وانحرمت ان تشوفها امي كله سببه ابوي

مروه خابرتني اول يوم الفاتحه چنت راجع من الدفنه بالطريق حاچيتها وهي تگلي
= شبيك امين احس بيك مو على بعضك
ردت اگللها لكن اتذكرت كلام امي من كالت مروه حامله كل شي الخاطر ابنها
جاوبتها // لا بس يمي جماعه جايينه خطار
مروه = منو ذول
جماعه تجار جايين يشترون شغلات وراح يبقون يمي شكم يووم
= زين امين سلم على امي وصدوقي وزنوبه وعلاوي
الله يسلمج لاتتصلين لان مشغول وياهم
= لا ما اتصل من تفرغ اكتبلي مسج
ان شالله

سديته ما اتحملت صرت ابجي عبالك جاهل جهاد گلي // كافي امين هاي حال الدنيا
امل // اذكر الله عمه واترحم الها
خال ايدي على وجهي // عمه مو بس على امي ابچي لا ابچي على المسكينه الي تگلي سلملي على
امي وهاي ماتدري انا جاي من دفنتها
عمتي امل صارت تبچي على مروه واشوف جهاد يمسح دموعه

وصلت واتلگوني خوالي وصادق وعلي وهمه يبچون انا گتلهم // كافي اطلبولها الرحمه
صادق گلي // هذا ابوك اجه للفاتحه وانا ما سويت شي امتانيك اتطرده لا ارتكب بي جريمه
باوعتله  بعتب // اسكت صادق وخليني اتصرف
ورحت للچادر ولان ليل وفايت وكت ما چان احد موجود بس اقاربنا وصلت يمه وگتله بدون ما اسلم

- - تخلص الفاتحه وبعد ما اريد اشوفك نهائيا

هو اتفاجأ وبقى ساكت وكعد على صفحه وهو يشوف الناس الي اجت الفاتحة امي اكثرهم معارفي
وكملنا ثالث يوم بعدها جبت صادق واعتذر من سالم لان صار كلام وغلط بالمستشفى سالم اتفهم الوضع
وگال الصادق // انا عاذرك ولا يهمك

اما ابوي فرغم وجوده بالفاتحه لكن متكتر وما ادخل باي شي حتى نوم نام بالچادر ومن انتهى يوم ثالث دار
وجهه وراح حتى ما  طلب يشوف سماح او يسلم عليها وابد ما سأل ولا گال شگد خسرتو

عرفنا بوكتها انو احنا مو بس اتيتمنا من امنا لا احنا بالاساس چنا ايتام من ابونا الي مات واحنه زغار
سالم بعد ان انتهت الفاتحه سافر وخلا سماح يمنه وگللها اسبوع ويجيها سماح الي ما بطلت بجي

بعد يوم ثالث صاروا يجونه ناس بالليل ويكعدون بالديوان انا واخواني صادق وعلي وجهاد الي بقى يمنا
وابد ما فارگنا وحتى نوم ينام يمنا بالديوان

چنا منتكسين ومقهورين كلنه على امي ومن نبقى ابحدنا نبچي واحنا نباوع الغرفتها وبعدنا ما مستوعبين انو امنا
راحت وبعد ما ترجع خالاتي بقن اليوم السابع لكن عمتي امل بقت الى ان اجه سالم عاشر يوم وفاة امي اجه الصبح
واخذ سماح ورجعو البيتهم

ومن راحت سماح صرنا انودعها ونبجي لان اتصورنه شنو راح يصير بمروه من تعرف انو امنا خلص اتوفت
وهي ما شايفتها
عمتي امل وصت سماح انو ما تگللها شنو سووا يوسف
صادق جاوب عمتي //شنو عمه ما تردين مروه تعرف انو امي اتوفت من وره يوسف الي حرمها ما تشوف بتها
سماح رفعت اديها // الله لا يوفقه خله امي تموت بحسرتها

صادق //شنو عبالج اعبرها اله وداعتج اله اخلي يندم ع الساعه الي صار بيها
عمتي //كافي هو هذا شلون حچي
صادق //هو هذا الحچي يوسف ما راح انساها اله وبيوم ابسنه اكتله لو اعوقه لو اموته
زينب وهي تبچي //كافي لا تحچون وتتهددون امي الله يرحمها ما تقبل ما سمعتوها تگول ابد لحد اياذي مروه
لان انظلمت

صادق اتقرب من زينب وحضنها // وداعتج ما ناذيها راح نخليها ترتاح وتجي وتبدي من جديد
زينب //لا صادق مروه لو تريد تجي اول ما جابت ابنها چان عافته واجت لكن مروه مثل امي
( وصارت تشهك وتبچي )
مثل امي الي اتحملت كل شي الخاطيرنا وكسرت ظهرها على مودنا

اتقربت من زينب وحضنتها وهي تبچي حييل وبحركه وگتلها // وانتي كافي لا تبچيين خلي سماح تروح عيب
من رجلها واگف بره
زينب وهي تشهك // ما تريدني ابچي سكت صادق وخلو مروه هي اتقرر

هزيت راسي وبستها وكتلها // هذا هو انتي اتامرين وكلامج صحيح مروه هي الي لازم اتقرر
عمتي امل گالت // عمه سماح روحي ويه رجلج وفهمي اختج بهداوه الله ايساعدج شلون راح اتگليلها
سماح وهي تمسح بدموعها  // الله كريم

وراحت سماح وهي توصي بزينب اندير بالنه عليها
من راحت سماح حسينه بفراغ والبيت صار موحش علينه لكن صار لازم نگعد ونبرمج حياتنا بالليل التمينه
بالهول ويانه عمتي امل الي  گالت

يمه امين من باچر اطلع على باب الله وانتي زنوبه لازم تداومين
زينب //دواميش عمه واخواني منو الهم
امل // عمه امين ليش ساكت
هزيت راسي وباوعت الزينب //من باجر ترحين للمدرسه هواي صار غايبه وهواي فاتتج دروس

زينب // لا امين ما اداوم هذا هو
// وليش
زينب // منو الكم طبخ وغسل ملابس وتنظيف وكوي
وگفت وجريت نفس // نبرمج حياتنا وكل الي حلمت بي امي راح نسوي وراح يصير

باوعولي هزيت راسي // اي ليش اتباعولي احنه انحب امنا لان تعبت علينه وربتنا ولازم انكافئها نترحم الها
ونصير خوش ناس ومن نحچي انگول الفضل الامنا
(باوعت الزينب ) انتي تكملين دراسه وعلي هم يكمل يمكن راح نتعب لكن نتحمل ماكو شي يبقى على حاله

زينب // اميين البيت والشغل والدراسه ما اشوفها ترهم
- - ترهم زنوبه بس شويه يراد الها تعب  ( حكيت شعري ) انتي وعلي دوامكم الصبح من تحلون يجي علاوي
وياخذ الغدا من يمي
زينب //شلون

- - عادي اعتبركم عمال عندي ومن ادز على غدا ادزلكم وياي وصادق يعجبه ياكل بالكليه يعجبه ياكل وياكم
والبيت احنه مو زغار ونوصخ  يعني يومين بالاسبوع التنظيف وكل واحد مسؤول عن ملابسه وهذا هو انحلت
زينب بين الفرحه والقهر دنكت وصارت تبچي بسكته اتقربت عليها وحضنتها
- - لا تبچيين هسه انتي صرتي امنا
عمتي امل تمسح بدموعها // الله يخليكم ياعمه ويرحم امكم صدك ربت ونعم التربيه

وراها بتلث تيام راحت عمه امل وثاني يوم گعدت من الصبح خدرت چاي وگليت بيض وگعدتهم زينب
باوعتلي وگالت // ليش ما ندهتني انا اسوي ريوك
ابتسمت // لا الريوك عليه
زينب بابتسامه  // زين وملابسك عليه
علي // ههههه كله تبادل منفعه
جاوبته // وانت علاوي شد حيلك وانجح

ومشت حياتنا وكل يوم خميس تجي عمتي امل وخالاتي ونسوي ثواب وقرايه سماح وسالم دائما يخابروني اما
مروه فمن عرفت بخبر وفاة امي ما خابرتني اله وره خمس تيام لان حسب كلام سماح
مروه مصدومه لكن ضامه بگلبها وهذا الشي خوفني عليها ومن خابرتني بس سلام وسألت على زينب ونهت
المكالمه عرفت بيها مصدومه واتخايلتها شلون تحچي وكانما انسان آلي مبرمجينه
خليتها براحتها رغم خفت عليها بس ما بايدي شي فصرت اتصل بسماح الي اكدت لي انو مروه فعلا اتغيرت
لكن ساكته ما تحچي شي

ورحنا للاربعينيه اجرت سياره كوستر حديثه واخذت زينب وعمتي امل وخالاتي وبناتهم وخوالي ونسوانهم وبناتهم
وعمي جمعه واتفاجأت ابوي جاي من شفته اجه ما حبيت احچي گدام الناس وصادق گال
هذا ينزل من السياره  لا اقترف جريمه هو شيسوي جاي
نزلت صادق وركبته بسيارة جهاد وگتله //خلي يروح لاتنسى هي زوجته وعاشت ويا عمر

صادق //ايي وهو چان وفي الها انت نسيت امين هو السبب بوفاة امنا
هزيت راسي //ايي اعرف هو السبب احنا رايحيين الامي وما اريد نتصايح گدام الناس

شفت جهاد مسح دمعه من عينه عرفت جهاد اتذكر ابو ومقدار الضيم والقهر الي مر بي هو واخته الله يرحمها
من جوه راس امه

وصلنه للنجف ولگينا سماح هي وسالم قبلنه واصلين احنه ما اتحملنه اربعتنا نمنا ع الگبر صرنا نصرخ عبالك جهال
زغار والي اثر بينه اكثر انو اختنا الچبيره ما موجوده ويانه زينب تبچي وتكلها

ماما انتي رحتي بحسرتج على مروه واحنا الهسه ما شفناها ماما اگعدي اتلگينه احنا جهالج اجيناج

بعدها گومونا خوالي وصارن خالاتي ونسوان خوالي وعمتي امل يبچن على امي خصوصا عمتي امل لان من هنه
زغار ما تفارگن چانن اكثر من اخوات انا واخواني صرنا على صفحه وانا اختلس النظر الابوي الي چان گاعد بسد
گبر وهو يدخن

جهاد استاذن عرفت يريد يروح الابو واخته انا رحت ويا هو ما قبل بس انا اصريت اروح
شفته شلون غسل قبورهم وما اعرف شنو صار يحچي ويه ابو اما اخته الي مخلي صورتها جديده فچانت آيه
بالجمال من وصل يمها صار يبچي ويشهك اول مره اشوف جهاد هلكد ضعيف وهو يگلها

- - جنه مشتاق الج ليش هالايام ما تجيني بالحلم نسيتيني لو زعلانه عليه
اتذكرت مروه وغلبتني دموعي اتقربت يمه وگتله //ياالله خلي نروح
هو صار يبچي وهو ايگلها
البنات الي بگدج اتزوجن وصار عدهن جهال وبيهن اتخرجن واتوظفن وانتي يا جنه عشتي محرومه ومتي محرومه
بچى حييل وصار يشهك ويحچي كلمات // جنه ياروح اخوج تدرين بيه محتاجج ومحتاج دعائج گلبي نار
وما جاي يبرد ادعيلي خليني ارتاح وبالي يرتاح

رجعنه بالطريق سالته
- - جهاد صورة اختك المرحومه جديده منو مخليها
جهاد //انا كل شهر اغيرها نفس الصوره بس اغيرها لان ما عندي شي اسوي الها

خانتنا دموعنا وصرنا نبچي ورجعنا القبر امي وبعدها ودعنا الاحباب وركبنا بالسياره وانا اشوف ابوي اتقرب على
گبر امي وگف يمكن دقيقتين تلاثه وراح ما ركب بالسياره راح مشي عرفت انو هو وصادق متشاكلين خابرت
سماح شنو صاير

سماح //وره ما رحت نسوان خوالي راحن الاهلهن وبقينا انا وعمه امل وسالم
اي وشنو صار
هذا ابوك راح ...
وين راح ؟
عمي جمعه ساله وين رايح گال اروح ازور جمال

اهنا صادق صار يحچي ويسب بجمال وحتى سب ابوي وگله بعد لاتجي وما نريدك ولاتوصل لهنا
وابوي صار يغلط وصادق يتهدد لمن ما خالي ابو معتز ضرب صادق ودفعه وابوي راح بعد ان گله صادق
مو امين كلك بعد لا توصل بعد لا توصل لان انت بالنسبه النه ميت وميت من زمان

هزيت راسي قهر وانا احچي ويه جهاد // شلون بصادق ما صار اله سووا مشكله

ونزلنه بالمطعم وسالم هو الي دفع وگال هذا بثواب خالتي هي هم بمثابة امي
رحنا بعدها الكربلا واهنا اصر علينه سالم انو نروح ويا البيته اتشكرت منه وجاوبته
نبقى بكربلا نزور ونبات ونطلع

هو وسماح رجعو واحنه بقينا اجرنه فندق وثاني يوم رجعنا واحنه مايسين انو خلص امنا ما بعد ترجع
دخلنه للبيت صرنا نبچي لان شفنا موحش وصرنا نباوع ونبچي وزينب دخلت الغرفتها وتگلها
- - يمه احنه رجعنا اتلگينا
رحنا على زينب وحضناها وبعدها سكتنا والقهر يعتصرنا

ومشت ايامنا زينب تروح للمدرسه وترجع علي ياخذ غدا ويروح والعشا هي تسوي والريوك انا اگعد من وكت اسوي
وره اسبوع من رجوعنا العصر اجاني عمي جمعه مر عليه للمحل وبعد السلام گال
- - اجينه انشوفكم انا وعمتك
جاوبته // هلا بيك عمي بيتك

بقى يمي الى ان عزلت ورجعنا سووا للبيت ولگينه عمتي امل مسويه عشا سلمنه وهي صبت النه بالهول
وهي وزينب بالمطبخ بعدها شال صادق الصينيه وعمه جابت الچاي وصارت تصب النه اشوف بوجههم كلام
باوعت العمتي وگتلها وانا ابتسم //خير عمه اكو شي
هي ابتسمت وگالت // لا ليش تسأل ؟
- اشوف بعيونج حچي

صادق //ما شاء تعرف لغة العيون باالله شنو بعيوني من كلام
باوعتله // لا عيونك بس تباوع بيهن وتندل الطريق الكلام دووم على السانك
جمعه // احنه جايين نشوفكم لان عمتكم ليل ونهار اتهم بيكم
- الله كريم تخلص ما تبقى هالشكل

امل //ان شالله والله عمه الليل كله افكر بزينب ومقهوره عليها
- بعد شنسوي كلنه مساعديها
جمعه //الصدك امين احنه جايين نشوفكم وهم مودايين عليكم واسطة خيير

امل // عمه لازم تلگولكم حل ولاتنسى زينب سنه التجي سادس لو ناوين تبطلوها
جاوبتها // عمه شنو انبطلها هاي وصية امي اله اذا هي تريد تبطل ما اجبرها
امل // ها عمه زنوبه شگلتي تبطليين لو تبقيين

زينب هزت راسها // عمه ما ابطل لو شنو ما يصير اكمل وادري بامي تفرح من انجح
امل اتقربت منها وحضنتها //عفيه بتي الله يوفقج
عمتي دنگت انا سالتهم // انتو گلتوا مودايين شنو ما فهمت
جمعه باوع الامل وكال // ابوك ودانه عليكم

احنه باوعنه الهم باستغراب عمتي امل // ابوك اول البارحه اجانه
صادق بعصبيه // ايي وشيريد بس لايريدنه نبيع البيت وننطي حقه من الورث
خزرت صادق //كافي استهزاء وخلي نفتهم
جمعه // ابوكم گال خلي ننسى الماضي ونرجع
ابتسمت // شلون يعني نرجع ؟

جمعه // ابوكم يعرف بوضعكم ويكول زينب زغيره ومو مال مسؤوليه واخاف عليها تبقى ابحدها
فهو ودانه عليكم
انا بقلة صبر //ايي عمي جمعه وداكم شيريد غير نفتهم
يگول // يجيب مرته ويجي يعيش وياكم بالبيت

الكل انصدم صادق راد يحچي باوعتله وحچييت // مو انا الچبير المسؤول عنكم خليني احچي
صادق سكت انا جاوبت // والله عبالي جايين تشوفونه حتى انتي عمه هم اتخليتي عنه
امل // انا اتخلى عنكم هذا شلون حچي بس ابوكم اجه وندمان وحتى صار يبچي
صادق // قشمرج اخوج وتعرفينه هذا بچيه دموع تماسيح
سالتها // يريد يجي هو ومرته اهنا

امل هزت راسها //عمه هو هيج گال وكال ننسى الماضي ونرجع وهو ابوكم وهم كبر مو زغير وهم لازم تلمونه
وگفت على حيلي //ابونه ويريد يجيب مرت جمال اهنا يعني بذاك البيت ملاك وجمال چانوا يتحكمون بالبنات وبينه
وهسه يريد يجيب مرت جمال وابنه تتحكم بزينب اگلج عمه هو ابوي من طاحت امي بالمستشفى هم شفتي اجه
ومن اتوفت يمته حضر بالفاتحه

جمعه // لا تنسوون انتم ما خابرتو وهو ما يدري لو ما انا اخابره
- - ومن درا شنو سوا اجه گعد اتسامح منها گلها ظلمتج اذيتج اكلت حقج وحق جهالج رجاءا لاتجاملون
وانتي عمه اخوج وتعرفينه

جريت نفس قوي ونفخت // شوف ابو احمد تسلملي علي وتگله لو اكو قانون يخلينه نبدل جناسينه بغير اسمه
چان سويناها ومن زمان وفهمه يحلم يوصل للبيت واذا سكتت بالفاتحه ما طردته ومن اجه ويانه للاربعينيه هم بلعتها
گدام الناس ما حبيت اي احد يتورج علينه لكن لهنا وكافي

امل // بس ياعمه البيت يرادله مره
— صحيح بس مو مرت جمال الي ما نعرف منين ما منين ملفيها وانتي تدرين شلون اخذها
امل // والله حقكم ياعمه وانا اعرف شنو راح يكون ردكم
جمعه //اسمعني امين عمتك گالت الابوك ولدك ما يقبلون لكن هي اجت خاف بعدين تسمعون وتعاتبونه
ليش ما اجيتو وبلغتونه

جاوبتهم // واحنا هذا ردنا بعد لا يودي ناس ولا يتعب نفسه احنه ابونه مات من زمان وامنا هي الي ربتنا
اتقربت من عمتي وگتلها // لا تزعلين عليه عمه بس انتي چنتي شايفه بعينج وحاضره عذاب امي
امل جاوبتني وهي تبچي // مو بس عذاب امك وعذابكم ودولاب اخواتك صدگني ما زعلانه لان ما تردونه لا
زعلانه لان مع الاسف ما عرف يتصرف وخسركم ما لمكم وحباكم وداراكم لا التهى بجمال وعيشكم بضيم وقهر

جمعه //بس مثل ما گالت عمتكم البيت يرادله مره
جاوبته // شلون يعني ؟
امل // عمه امكم اتوفت الله يرحمها وهاي اختكم بالمدرسه ولو شتسوون مو مثل المره اذا بالبيت
- - شنو عمه يعني نجيب خدامه

هزت راسها // لا عمه امين لازم انت لو صادق واحد بيكم لازم يتزوج
- - عمه الله يخليج امس رجعنه من اربعينية امي
امل // الله يرحمها وانا ما گلت باچر تتزوج بس لازم تلم نفسك وتتوكل على الله
صادق // كلام عمتي صحيح وحتى لو زينب مبطله من المدرسه اكيد هم لازم مره بالبيت
ا- - الله كريم

جمعه //والنعم باالله وانا والله لو عندي بنيه ما اعزها عليك بس تعرف البنات اتزوجن
جاوبته //تسلم عمي ما قصرت

وباتو يمنا والصبح راحو وانا بليلتها صرت افكر بكلامهم وصار لازم اشوفلي بت حلال واتزوجها
اجت ابالي بت خالي كريم (ريام ) هاي تقريبا ازغر مني بسنتين وصلت للسادس اعدادي واكملت بالانگليزي
وما نجحت وبعدها قررت تترك هي اشوفها خوش بنيه وملتزمه فقررت افاتح اخواني واشوف رايهم وبعدها
احچي ويه خالي

وره ما راحت عمتي بيومين گعدت ويه اخواني وحچيت وياهم انو لازم لو انا لو صادق نتزوج لان زينب السنه
التجي سادس ولازم بالعطله اندخلها دورات همه سكتو بعدين زينب گالت
- - ومنو هاي الي تريد تتزوجها
- - انا فكرت ابت خالي كريم
زينب // قصدك ريام ؟
- - ايي هيه
زينب // ايي هذا هو خوش ابنيه واهم شي بت خالنه

جاوبتهم // اهم شي انو انتو لازم تعرفون انا ما اريد اتزوج بطر بس حتى نرتب امورنا
صادق // امين لا يظل بالك هذا حال الدنيا لاحزن يبقى ولا فرح ولازم الحياة تستمر
جاوبتهم //يعني ما زعلانيين
علي // لويش نزعل اصلا امي وهي بگبرها تفرح

وره اسبوع خابرت  عمتي امل واجت وانا حچيت وياها هي فرحت وقررت تروح ثاني يوم هي وزينب البيت خالي
وثاني يوم وره الظهر صادق جاب تكسي واخذهن البيت خالي ورجعن العصر بعد ان كالتلهم مرت خالي اسولف
ويه البنيه وابوها وارجع الكم خبر وباتت عمتي يمنا والصبح اجرت الها سياره ورجعتها البيتهم وره اربع تيام اجت
عمتي وانا اشوفها شگد ضايجه وهي تگول مرت خالي مخابرتها وگايلتلها // ما الكم نصيب يمنا

وعمتي من سائلتها شنو السبب هي راده
بتي اريد الها موظف اريد اضمن مستقبلها
انا بيني وبين نفسي ضجت لكن ما بينت هذا الشي وگلت // يالله هذا هو الزواج قسمه ونصيب

وبيومها رحت يم جهاد بالورشه ومن شافني ضايج صار يلح عليه وانا سولفتله هو هز راسه وگلي
- - همه الخسرانيين لاتضوج
ثاني يوم اجاني خالي كريم للمحل انا تلگيته عادي
هلا خالي حياك الله
هلا امين شلونك
الحمد لله

وگعد وصيتله على چاي اشوف خالي بعيونه كلام ومتردد لكن انا ابتسمت بوجهه وكتله
اشلونكم خالي
هو جاوبني وهو مدنك // الحمد لله احنه زينين(رفع راسه وگال ) امين خالي لاتزعل الحياة
كلها قسمه ونصيب مو بس الزواج
ردييت بعدم مبالاة // لا خالي عليمن ازعل من حقها توافق او ترفض
خالي صدگني انت ماكو مثلك بس السبب ......

سكت خالي انا جاوبته // اعرف السبب البنيه تريد ولد عنده وظيفه وهذا حقها
خالي هز راسه // لا خالي مو هذا السبب
باوعتله وبعيوني تساؤل خالي گال // الحقيقه مرت خالك تكول امين خوش ولد بس ما اگدر انطي بتي الواحد ابو ظالم
هزيت راسي وجاوبته // هذا هو خالي ما صار شي

- - خالي امين صدگني انت معزتك من معزة امك الله يرحمها بس الدنيا قسمه ونصيب
رديت // وانا ما زعلان
خالي //تدري بيه انا رجال استحرم والزواج اختيار ما اگدر اجبر بتي
هزيت راسي //وانا ما اقبل تجبر البنيه او امها بس ياخالي الشغله مو بالوراثه احنا الي ربتنا امي الله يرحمها
خالي // وانتم خوش ولد الله يرحمها سهام ربت ونعم التربيه

وراح خالي الي اعرف بي هو شكد ايحب مرته وشنو اتگله هو يوافق
بقيت كاعد واگول // حقها مرت خالي تخاف اطلع مثل ابوي وبتها تتاذى مني مثل ما امي خلصت عمرها بضيم
ومرار من ابوي
بعدها ما صرت افكر بالزواج يمكن بسبب لهوة الشغل اجاني جهاد العصر وبقينا انسولف لمن ما كلي

جهاد // امين شنو رايك اب سلمان
جاوبته // خوش رجال طيب ليش تسأل
يعني انت شتشوفه من اشتغل عدك
شنو جهاد ما تعرفه السلمان رجال طيب ويخاف الله

جهاد باوعلي //انا مو اخوك الچبير ؟
- - اي جهاد هذا الشي منتهيين منه بس شنو مناسبة هذا الكلام
جهاد // قبل چم يوم اجه سلمان يمي وصرنا انسولف وعرفت عده بنيه عمرها 20 سنه متخرجه من
معهد المعلمات بس ما متوظفه بعدهي
هزيت راسي // ايي
جهاد // شنو ايي انا سالت عليهم وعرفت همه شلون عايله ملتزمه

- - ايي والنعم منهم
جهاد بعصبيه // انت ابقى بس كلي ايي
- - جهاد ما افتهمت شتريد اتكول
- - امين شنو رايك تخطب بت سلمان الك
ابتسمت وگتله // صاير ولي امري
جهاد //مو اخوك الچبير يعني ولي امرك

ابتسمت // ما دام انت تگول اخطبها هذا هو
اتقرب عليه وحضني وگلي // اي انا مو بس اخوك وابوك ومسؤول عنك ولازم ازوجك

ثاني يوم خابرت عمتي الي اجت وحچيت وياها وراحت هي وزينب وفاتحن اهل البنيه طبعا بعد ما شافتها للبنيه
الي چان اسمها (ولاء )
وبعد اسبوع رجعولنه خبر بالموافقه وبعدها بيوم رحت انا وزينب حتى اشوف البنيه وتشوفني وفعلا چانت مثل
ما وصفتها عمتي شابه حلوه وجهه حنطي وتقريبا بطولي وصارت الموافقه من الطرفين

وصارت الخطبه واجه وياي جهاد وعمي جمعه وابو عادل وحجي عبد الي ما قصر وگلهم امين ابني واجو خوالي
وراها بشهر قررنا نتزوج وفهمت ( ولاء )انو ما اگدر اسوي عرس انتي سوي حفله الج واعزمي اقاربج وصديقاتج
وراحت زينب وعمتي وبناتها وخالاتي ونسوان خوالي
بعدها بيوم انا اخذتها ورحنا للامام الكاظم بقينا تلث تيام وبعدها رحنا زرنا النجف وكربلا

وره اسبوع رجعنا البيتنا وبيومها لگيت عمتي واخواني وجهاد منتظرينه وهمه ذابحين ذبيحه وجايبين طباخ
ومشت امورنا ولاء خوش ابنيه ومرتبه ومؤدبه وچانت تحبني وتسمع كلامي خصوصا وانا اشوف زينب مرتاحه
وياهه وصارن صديقات
بعدها بشهرين اجاني جهاد وگلي // اكو شغله اذا صارت النه راح ننتقل نقله نوعيه

وعرفت انو قرر يفتح معرض كهربائيات خصوصا والمنطقه بدت تكبر وصارت الناس تشتري لكن انا چانت
عندي السيوله مشكله

وقررت اروح الحجي عبد الي مجرد ما فتحت ويا الموضوع هو طلعلي الفلوس وبدون لا وصل امانه ولا اي شي
وافتتحنا المعرض الي هو بالاساس المكان الي كان جهاد يشتغل بي مفروشات بعد ان نقلتهن يمي
وصار الشغل خير من الله والفضل الاول والاخير الجهاد صديقي واخوي

//////////////////////////////////////

جهاد
تعرفون قصتي ويه اهلي وتعرفون مدى تعلقي باختي الي اشوفها بنتي الي تعبت عليها وراحت بغمضة عين
وهي وحيده وچانت تدور بس عن حضن ام حضن دافي وام تمسد على شعرها وتطمنها لكن هاي كلها احلام

ومن اجيت للبصره وانا منهزم وتعبان وبنفس الوكت مهضوم وحزين على اختي وعلى ابوي واشتغلت عد حجي
عبد چانت حياتي فارغه مجرد اشتغل رغم كونت صداقات ومعارف واصدقائي يفدوني بعمرهم لان انا چنت سبع
وجسر وما اخاف خصوصا بالحق

لكن من ارجع للورشه احس بذاك الفراغ الرهيب واخلص ليلي ادخن وما اعرف يمته انام
الى ان اجه امين ذاك الجاهل الي جاي يشتغل والي اشوفه مطيع ويأدي عمله بكل اخلاص رغم زغر سنه
ومن عرفت بقصة اخته الي سولفها الي اتعجبت واحچي ويه نفسي //معقوله اكو بوكتنا هچي بنات ما ينجرفن
(اعذروني لان انا مصدووم من امي )

ورحت وساعدته وصار امين بالنسبه الي اخوي الزغير وهو ما يضم عليه اي شي
شفت مروه من وصلت امين بعد حادثة تحرش جمال ومن شفتها وانا افكر بيها وصرت اتمنى اشوفها
وصار امين مرات يعزمني على غدا او عشا لكن ما اشوفها لان همه ملتزمين

ومن خطبها معن اقارب جوارينهم وشفت بعيون امين شلون يتمنى اخته تتزوج بس حتى تفتك من ظلم
ابوها او وجود جمال بحياتهم اتمنيتلها السعاده لكن جمال كال اريد مروه وانا احق بيها

بذاك الوكت فكرت اقتله لكن الي افتهمته من امين انو مروه موافقه على جمال وعرفت هي مجبوره من ابوها
او وافقت الخاطر لا ياذيها وياذي امها ماگدرت ما افكر بمروه ولا امنع نفسي من التفكير بيها ومن اتوفى جمال
وعرفت الناس هاجميين ع البيت اخذت امين وبعدها جبت العائله كلها سكنتهم بالشقه مالتي وبعدها اخذتهم البيت
الحجي الي بالاطراف وانا من اشوف مروه احس الدنيا تضحكلي واحس ترجع الي الامل بالحياة

صرت افكر بيها واريد انجح والم نفسي كله الخاطرها وقررت ما اخليها تضوج ولا تنقهر
ما چان گدامي اله حجي عبد رحت وحچيتله كل شي وعرف بيه احبها ونيتي شريفه وياها هو
وعدني يخطبها الي

لكن الحظ العاثر انو مروه حبيبة عمري تروح فصل الناس ما تعرفهم من سمعت بيومها رحت للشقه وصرت ابچي
مثل الطفل الي مضيع امه الي تحبه (طبعا مو امي ) صرت ابچي ورجعت على حجي عبد وگتله يحاول وياهم ايفضها
بفلوس لكن همه ما قبلوا واتزوجت مروه وانا وحجي عبد الي زفيناها اتصوروني اشوف حلم حياتي گدامي ينباگ

وحاولت انساها لكن عبث صورتها گدامي ما تروح من بالي
وبعدها صرت احاول ومرات اجرجر امين بالكلام بس حتى اعرف اخبارها
ورحت ويه امين واهله مرتين بس حتى اشوفها

ما انكر مجرد تفكيري بيها حرام عليه لكن هذا الشي مو بيدي وانا ما اتجاوزت حدودي حتى رقم التلفون عندي
وكان ممكن اتواصل وياها لكن خوفي عليها هو الي منعني

وصرت اشوف بعيون زينب لمعه من تشوفني او هيج اتهيألي وبديت افكر ليش ما اتزوج زينب ممكن تنسيني مروه
لكن من صارت صدك وردت اتقدم اهنا انصدمت بنفسي الي منعتني ان ارتبط بزينب واظلمها وياي
واظلم نفسي وانا بالحقيقه عقلي وگلبي ومشاعري كلها يم مروه واذا اتزوجت زينب لازم حتى ما افكر بيها

وهذا الشي ما اكدر اسوي لان مروه عايشه وياي بكل لحظات حياتي وصرت اشتغل واوسع بشغلي انا وامين بس
حتى انسا مروه الي يوم عن يوم يزيد حبي واشتياقي الها ورغم صار عدها طفل لكن ما گدرت انساها
وچنت اروح الحجي عبد واسولفله وهو يهز براسه مره ايجاب ومره نفي الى ان سألني

- - جهاد ليش ما تتزوج شمنتظر
باوعتله هو رد عليه // انت مثل العطشان  والماي موجود يمه ويشوفه بس هو لاحگ السراب انت ياجهاد لاحگ
السراب شتتصور تحصله ؟
///////////////////////////////يتبع