رواية بعد فوات الأوان الفصل السابع والعشرون 27 - بقلم آنين الليل

يوسف
من ضربت مروه وصار عدها نزيف احس انو انا ماكنت واعي انا شسوي مجرد ما ركبتها بالسياره صار كلبي
يدك وخفت يصير بيها شي وانا اسمعها تكول وهي تعيط راح اموت
بعدها اتهامات الطبيب ونظرة سالم وكلام سماح چنت خايف عليها ومتندم ومن صار محمد لاول مره افرح
  وانا خايف خاف ما يعيش من باوعتله حچيت ويا عبالك يسمعني وگتله

:: محمد عيش الخاطر امك حارب من اجل حياتك لاتقهرها فوك ظلمي الها
اتعجبت من نفسي يعني انا اعرف بنفسي انا ظالم بحق مروه ورغم هذا جاي اتمادى
ورحت اشوفها ومن اتقربت يمها هي ابتعدت عني خايفه

ما حاولت ابرر او اعتذر وصار كل وكتي ويه ضحى ومن اروح للدوام وانا ما مستقر اريد ارجع اشوف
ضحى
صرت اشتاق الها وما احب اتركها وتقريبا نسيت مروه او اتناسيتها لان هي واقع حال

ضحى من اروح للدائره تخابرني وتگلي مشتاقه الك وانا كانما عاشك اريد بس ينتهي الدوام حتى
ارجع الحضنها

والعصر توصيني على شغلات لو اضطر اسافر الغير محافظه اروح اجيبهن الها

صرنا كل خميس وجمعه نروح نزور او نسافر البغداد وانا بس اريد ضحى ترضى عليه لكن وانا ويه ضحى
تمر مروه ابالي مثل النسمه اصير اشتاق الها اغمض عيوني وانا اشوف مروه وهي تبتسم ابتسامتها البريئه
وهي تبچي وهي ساكته وتشتغل واتمنى اروح يمها واقرر لكن اكو شي يمنعني ما يخليني اروح ومن اروح
اشوف الشغل واشوف محمد الي لا امي ولا ضحى سالن او استفسرن اذا چانت مروه ولدت وشنو صار عندي
وكان هذا الشي ما يخصهن

بسام مره سالني وگلي //يوسف ليش تضم علينه
باوعتله باستغراب :: شضام بسام
بسام //اليوم شفت سالم بالسوك وگلي انو انت صار عندك ولد وهو بالخدج
شفت عدم اللا مبالاة بوجه امي اما ضحى فحسيت بيها تريد تنفجر من الغيض لكن لازمه نفسها جاوبته
:: اي والله بسام بالخدج لان نزل قبل وكته

بسام // وهسه اشلونه
:: زين الحمد لله
بسام // الحمد لله الله يخلي وتقر عينك بي
:: مشكور
امي باوعت الضحى وسألت //وهذا اخوج شبي صاير مثل النسوان يجيب اخبار ويرجع اخبار
ضحى جاوبتها // خاله انتي گلتيها وطلع كلامج صحيح هاي بت الكلب ساحرته وثاولته
حچيت ويه نفسي /اذا ساحرته ليش ما تسوي چاره الاختها الي ما اشوفها بعيني

وثاني يوم اجه بسام للمستشفى وشافه ومن طلع محمد من الخدج بقى ابيت سالم هو ومروه وبعدها رجعتهم للحقل
مروه ما تحچي وياي ولا توصيني على شي صارت تتجنبني

ومن اجي اريد اعتذر منها لكن مجرد ما اشوفها گدامي اختنك وما احب اباوع بوجهها واريدها بس تحچي وياي
حتى يصير عندي عذر واضربها لكن هي ساكته فصرت احاول استفزها حتى بس ترد عليه لكن هي اخذت
موقف السكوت والتحاشي

صرت اجي وانا اشوف حمودي الي من اشوفه افرح وساعات احس بالتباهي انو صار عندي ولد يشيل اسمي
ابقى العبه واحضنه واشيله وهي تعوفني يمه وتروح للمطبخ

اشوف محمد شلون نظيف وملابسه شگد مرتبات اما الغرفه والمطبخ فنظافتهن خرافيه وهي نظيفه ومرتبه
وحتى انيقه رغم ملابسها البسيطه

چنت اتمنى لو بس تحچي لكن هي سكوتها ونظرتها اليه ما تخليني اسوي بيها شي چنت اتمنى تحچي حتى
يصيرلي حجه عليها لكن هي ساكته واكثر من مره سالم كلي //الى متى تبقى هالشكل اذا ما تريدها طلگها
وصرت افكر اطلگها واخذ ابني منها
لكن مجرد ما افكر بالطلاك ارفض الفكره ما اعرف ليش وابقى اسأل نفسي
::ليش مخليها ما دام ما احبها
::ليش ما اخذ ابني واوديها الاهلها واطلكها

چنت ما الگى جواب ومجرد ما ارجع للحقل واشوفها اتفنن بتعذيبها واهانتها وهالمره اريد اجزعها بس حتى
تتركلي الولد

من افكر بالشي الي جاي اسوي اشوف التناقض بتصرفاتي لكن ما حاولت اسال نفسي ليش اسوي هذا الشي بقيت
عبالك واحد يتعاطى مخدرات ما يعرف شلون يتصرف ولا ليش هالشكل يتصرف

چنت من اجي للحقل اتمنى اشوف مروه لكن مجرد ما اشوفها اختنك واريدها بس اتزل حتى اضربها وهي تحاول
تجنبني قدر الامكان فابقى ساعتين او تلاثه يم محمد بدون ما احچي وياها واروح يم بشير شويه بعدها اركب سيارتي
وارجع بالطريق اظل الوم بنفسي :: ليش انا هيج اسوي وياها
::هي شنو ذنبها
::لازم احاول اغير من نفسي

وبمجرد ما اوصل للبيت ما اصير اشوف اله ضحى اما مروه فما اشوفها اله عدوتي بعدها بفتره صرت اتعمد اروح
حتى اتحارش بيها واتشفى صار كلام ضحى هو الماشي وابتعدت هاي الفتره عن سالم وعن شيخ عون
وما صرت اتواصل ويه ماهر

اجيتها وچان محمد عمره اربع تشهر او اكثر شويه وامرتها ان تطلع وتروح اتحش من الگاع هي باوعتلي واتساءلت
يعني وين اخلي حمودي
جاوبتها ::عادي اخذي وياج كبر ما علي شي
هي باوعتلي وهزت راسها وكأنما هذا الشي عدها عادي
اتقربت منها وحاچيتها بعصبيه ::بعد ما تهزين راسج وتجاوبيني لو اموتج لان انتي مو خرسه

عبالي تبقى ساكته بس اتفاجأت باجابتها وهي تباوعلي
= موجديده عليك قبل ردت اتموتني انا وابنك بس هسه اذا موتتني شنو تگول الابنك
رديت عليها بتشفي :: ما اموتج بس اخلي بيج عاهه
باوعت لمحمد وخلت عينها بعيني وهي اتاشر على محمد
=ومن يكبر ويسالك ليش عوقتها شتگله شنو عذرك (خلت اصبعها على حلگها ) انا اگلك گله عوقتها هيج عفه
اوطغيان او كره او گله عدم خوف من الله

من حچت هالشكل اتذكرت لمن انگلبت بيه السياره وشلون قبلها مرتين ردت انگلب والله نجاني من موت محتم ومن
سالتها شنو دعيتي عليه هي ما نكرت كالت = حسبي الله ونعم الوكيل
اهنا انا يمكن خفت من دعائها او يمكن خفت من الموت تركتها وطلعت من الغرفه ورحت بسيارتي واگول

:: ها شو طلعت وما رديت عليها لان خفت من الموت خفت تدعي عليك مروه
:: لو عرفت بنفسك متعافي وطاغي
بقيت منتبه للطريق واعرف شنو السبب خفت انگلب مثل المره الفاتت

وبمجرد ما وصلت للبيت وشفت ضحى نسيت كل شي ضحى الي صارت تعتني بنفسها وبلبسها وصارت
كل اسبوع تروح تراجع الطبيب وعلاج مكثف بس حتى يصير عدها طفل ودائما اسمعها الكلام
انو انا اريدها هي ما اريد اطفال لا تلعبين بنفسج وعلاجات وادويه وتالي يصير عندج مضاعفات

حتى من اجت اختي زهره اتفاجأت بتصرفاتتي ومن طلبت مني تروح وتشوف محمد امي ما قبلت ومنعتها
وهي تسب بمروه واهلها
بوكتها ما حچيت وانا اسمع حتى من امي صارت تدعي على مروه بالموت وكون محمد يبقى يتيم
ابتعدت عن مروه وصرت ما اروح اله كل شكم يوم اشوف حمودي ساعتين وارجع بدون ما اسولف وياها
ولا اتقرب الها كزوجه

وهي من اجي تحاول تطلع من الغرفه تغسل ملابس او تروح ترتب المطبخ لان دائما اجي العصر يعني ما
عدها شغل بالحقل وچنت اخلي بشير يتسوك الها ويودي بايد امه

الى ان فد يوم انا بالدائره واتصل عليه سالم الي صار اكثر من اسبوعين ما متصل عليه ولان من يحچي وياي انا
احاول اختصر المكالمه عرفت عنده شغل ويريد يسافر ويريد يستاذني حتى يودي سماح يم مروه
سماح انا صرت ما اطيقها وما ودي تروح يم مروه لكن استحي من سالم ولان ادري بي يخاف عليها تبقى ابحدها

انا رديت علي ::الو هلا سالم
هلا بيك يوسف اشلونك
::الحمد لله بخير
دووم ان شالله اگلك ابو محمد
:...گوول
سالم اتنفس شهيق وزفير وگلي //خابروني اهل سماح يگولون ام اميين بالمستشفى وحالتها خطره
جاوبته بدون اهتمام ::ايي وشنو

سالم //يوسف المره طالبه تشوف بناتها
:: هاا قصدك يردون مروه
- ايي يوسف تشوف امها خطيه المره مخوطره
تنفست وجاوبته ::والله تعذرني سالم مروه ما تروح
- وليش اذا انت ما تريد تروح انا اخذها ويه اختها
رديت على سالم بحده :: انت تريد تاخذ مرتك اخذها محد ايمنعك بس مروه ما تروح

سالم //وليش يوسف
:: لان مروه فصليتي وانا بكيفي وانا اقرر الها
سالم بعصبيه // تره ما صايره واذا فصليه امها بين الحياة والموت تروح تشوفها وترجع
::لا ما تروح وهذا اخر كلام
- - بس حرام عليك
:: اگلك سالم الحرام عليه ومروه ما تروح واذا تريد تروح وتبلغها تخلي ابالك لازم تعوف الولد وبعد ما ترجع
وشنو يصير باابني انا احقهم

سالم // على كيفك يوسف مو الهلدرجه
جاوبته بنتر //واكثر اذا انت نسيت ما عليه بيك
سالم // ما نسيت بس هنه ما الهن يد بالمشكله
جاوبته بقلة صبر :: ليش اتعب نفسك وياي اذا يردوها تجيهم ما الها رجعه وتعوف الولد
- - شدعواك يوسف ع...
قاطعته :: هذا اخر كلام

سالم // هسه مو انا راح اخذ سماح شيصير اذا تروح ويه اختها قابل يروح نصها
:: انا هذا عقلي ما اريدها تروح تشوف امها مو اخذتها وهمه انطوها فصليه خلص ينسوون عدهم بت ومو كل ساع
واحد مطلع اله عذر
سالم // شنو هالحچي على كيفك شدعوه عليك
:: والله هذا العندي يردون بتهم يعوفولي الولد وابني يرضع ما تعرف شنو يصير بي فانا احملهم كل المسؤوليه م...
قاطعني سالم //هذا هو يوسف بكيفك

:: طبعا بكيفي انا صاحب الانا ومحد اله شغل بيه
- -   تمتم يابه براحتك انا هم ياالله اخذ مرتي واروح نلحك ع المره
:: اي رووح منو لازمك
سالم بعصبيه // ولا اكبر واحد يلزمني انا الي براسي اسوي 
جاوبته باستهزاء:: ههههه لا هاي قديمه
سالم //شقصدك قديمه ؟

:: قصدي انت واحد جبان وتخاف من مرتك الي هي فصليه بالاساس
سالم // مشكور ابن عمي تموون بس انا مو جبان لان حتى لو فصليه فهي تبقى عرضي وكرامتها من كرامتي
وغصبن ما عليه احفظ كرامتها

وسدا سالم بوجهي بقيت اعض بشفتي وادخن وانا استرجع كلامي ويه سالم بعدين عاتبت نفسي
::شلون هيج احچي ويه سالم وانا اعرفه هو ايذب روحه بالموت الخاطري شلون انعته بالجبان
:: ايي بس هو زودها عبالك ما شايف كله ماخذله قحط فصليه دارت راسه ودوخته
اخذت جگاره ودخنتها اتصل عليه رقم جاوبته

عرفني عن نفسه انو هو امين اخو مروه وطلب مني اوافق مروه تجي تشوف امها لكن انا ما وافقت وگتله انتو
وافقتو تنطوها فصليه بعد على شنو تخابرون

وصارت ابيناتنا مشاده وتهديد وغلقت التلفون بوجه امين واتصلت بسالم وانا صاير بركان هو جاوبني  وانا فهمته
من يروح ايگللهم ينسوون عدهم بت يمي وخليهم يعتبروها ميته

ثاني يوم سالم اتصل بيه وگلي انو ام مروه حالتها مو مطمئنه وهي تريد تشوف مروه ونفس الرد ما وافقت
چنت اشعر بالراحه وانا اشوفهم شلون متعذبين وهمه يتوسلون بس تجي حتى امها تشوفها بعدها اتصلت بيه امها
المروه من نقال سالم وطلبت تشوفها ورديت عليها بكل برود

انو مثل ما امي انحرمت شوفت بتها انتي هم اعتبريها ماتت وما تشوفينها
واخذ صادق التلفون وصار ايعيط ويهدد وكال كلمه اذتني بعد ان گتله اذا تردون بتكم تجي تتخلى عن
ابنها واحملكم المسؤوليه هو رد عليه وگلي طز بيك وبابنك عود انفصلك مثل ما فصلناك قبل

كلام صادق خلاني احقد عليهم اكثر واكثر خابرني سالم وگلي انو ام امين انجلطت والاطباء كالوا حالتها تعبانه
انا ما جاوبت رجعت للبيت وانا ما الي خلك ضحى وامي حاولن ايعرفن شكو لكن انا ما رديت عليهن صعدت
الغرفتي وكل شويه اباوع للنقال وره يومين الظهر اتصل بيه سالم وگلي انو ام امين  اتوفت اتوفت وهي تتمنى
تشوف بتها

بقيت صافن وبذيج اللحظه كرهت نفسي وصرت اشوف نفسي فعلا انسان طاغي وما يخاف من الله
بعد الدوام طلعت ما رحت للبيت اتصلت ضحى جاوبتها :: عندي شغل اتاخر لا يظل بالج
صرت اسوق  بالسياره ما اعرف وين وكفت اكثر من مره ونزلت وانا احچي ويه نفسي

:: لا تگول مقهور يوسف لو متندم انت سويت الشي الي محد مسوي بس حتى ترضي غرورك
اتذكرت كلام سماح بالمستشفى لمن تكول
- - الله انطاكم قوه وفلوس واتجبرتو وصرتو ظلام

صرت اتنفس قوي واختنگت وانا يتهيأ الي مروه من تعرف شنو راح يكون موقفها وشنو راح اتسوي
ممكن تترك ابنها وتروح البيت اهلها وهي ما تشوفني اله ظالم وحقير وهسه تعتبرني عدو الها

مجرد ما اجه ابالي هذا الشي صرت اهز براسي واكول :: لا مروه ما اخليج ترحين لو ادري اموتج
::ليش ما تخليها لا تكلي اتحبها كافي يوسف كافي ما رضيت غرورك ظلمت واتجبرت شنو منتظر

ركبت سيارتي وانا اكول :: ليش ليش هالشكل اسوي ليش انا عمري ما ظلمت احد
:: ماكو داعي تظلم احد لان ظلمك المروه وامها كلش كافي يخليك حالك حال اي ظالم ما يخاف الله

وگفت السياره ودنگت على الاستيرن وانا اضرب على كصتي واگول
::ليش هيج يوسف ليش
:: ما اعرف ما ادري انا نفسي ما مفتهم شبيه
::شتگول اتسامحك من تعرف
::ليش انت سامحتها على شي هي ما مسويته حتى تسامحك على شي انت سويته

رحت للحقل وانا محتار اگللها واخلي ام بشير تاخذها يومين وترجع لو اسكت ما احچي لا خلي بس اوصل افهمها
انو امها بالمستشفى واخليها تروح ويه ام بشير
بس خاف اهلها يعتبرون جيتها الهم ضعف او خوف منهم خصوصا وهي تاخذ وياها حمودي
لا عليمن خوف انا اخابر سالم واكله يفهمهم هو ما يدري بام امين متوفيه وراجع نفسه ودزاها
اي هو هيج وانا بس توصل اخابر امين وابو واعزيهم

وصلت وانا ابالي احچي وياها وابلغها انو امها بالمستشفى  لكن مجرد ما شفتها سبحان الله اتخربطت اموري
اختنگت وصار گلبي يدك وحتى لعبت نفسي
هي شافتني اتفاجأت لان وصلت  المغرب  انا اتوضيت وصليت وهي هم صلت وبعدها راحت تحضرلي عشا
اكلت وانا اباوع الها اشوف بعيونها حزن وترقب

كملت وصبتلي الچاي وخابرني بشير الي گلي // شفت سيارتك تعال يمنا
انا رحت وكانما اريد اهرب من نظرات عيونها الي كلهن تساول ومن شوفتها الي تخليني مختنك وما احب ابقى
بنفس المكان الي هي بي

رحت البشير وبقيت ويا اكثر  من ساعتين ومن خلال كلامه گلي بان اخوانه قرروا ايبيعون البيت وكل واحد ياخذ حصته
وهو ويه حصة امه وحصة اخو سجاد وعنده شكم فلس راح يشتري بيت ويخلي زوجته واطفاله يرحون يكعدون بي

انا باوعتله وسالته :: يعني شنو بشير راح تترك الشغل
هز راسه // لا ابو محمد شلون اترك الشغل بس ام بهاء ما قصرت وگفت وياي وهي صدگني اهلها يوميه مخابريها
تعالي يمنه واحنه نشتريلج بيت لكن هي تدري بيه ما اقبل لذلك صبرت وياي وهسه اجه الوكت الي اجازيها
على صبرها

جاوبته ::هاا يعني تبقى بس انت بالحقل
بشير // اي انا والوالده وكل يومين تلاثه اروح ابات يمهم وارجع الصبح
:: بكيفك ابو بهاء اهم شي الشغل ما اريد بي نقص
- - من هاي الناحيه اطمن
:: بس بشير بيوم الي تروح شلون منو يبقى يم الوالده وام محمد يعني لازم تشوف حارس

- - الله كريم خلي اشتري البيت وويحلها الحلال
:: الله كريم ابو بهاء ياالله تصبح على خير
- وانت بالف خير
طلعت اتمشى اتصلت ضحى //شنو يوسف مو اتاخرت
:: صديقنا امه اتوفت ورحنا ويا وهسه راح نروح ويا للدفنه
ضحى باستغراب // تحچي صدك ؟
:: اي ضحى ما عنده احد ولازم نوگف ويا

- - ومنو هذا
:: صديقي ما تعرفينه ياالله مع السلامه
سديته بوجهها رجعت اتصلت جاوبتها :: اشبيج ضحى
هي بعصبيه //ما بيه شي بس سديته بوجهي خو گول رايح المروه
جاوبتها بنتر :: كافي ولا كلمه من اريد اروح الها ما اخاف من جنابج

سديته مره ثانيه ودخلت للغرفه وشفت مروه كاعده ومخليه حمودي بحضنها باوعت الها وگلت
:: افرشيلي بصف محمد
واشرت الها ع المكان هي گامت وخلت الفراش بحيث محمد صار بالنص هي دارت وجهها ونامت وانا درت وجهي
وما نمت يمكن تانيب الضمير او يمكن احساس بالخطأ غلبتني دموعي على مروه نايمه وما تعرف بامها متوفيه ويمكن
هسه اذا احضنها او انام وياها راح تتقبلني باعتباري زوجها بس هي ما تعرف انو انا الي چنت السبب بوفاة امها
اول مره من شكم شهر حنيت واتمنى اتقرب الها واحضنها لكن هالمره خجلت من نفسي

ضليت كاعد ما اعرف يمته غفيت گعدت الصبح. صليت وهي جابتلي الريوك اتريگت وهي ريگت حمودي  وغسلتله
وبدلتله حتى تاخذه وياها شالت المواعين وغسلتهن وشفتها بقت بالمطبخ
عرفت تتريك چانت مهمومه ومبين عليها ضايجه اكيد احساسها اتنبهت على رنة الموبايل شفتها ضحى جاوبتها

:: الو
- - هاي شنو بتت بره اجيت لو بعدك
:: اجينا بس راح اطلع للدائره والظهر ارجع
هي ابرود // شعجب ؟
:: ما انطونه اجازه
- - زين مو تتاخر
:: لا ان شالله ما اتاخر

بقت واگفه تباوعلي وهي شايله حمودي وبيدها علاگه من شفتها عبالي تريد تروح الاهلها نسيت لازم تطلع للحقل
اتحش بس الي عجبني حمودي ونظافته وترتيبه سالتها
:: ليش واگفه
جاوبتني بدون ما تباوعلي = منتظرتك تطلع حتى اقفل الغرفه
:: هاا اي هسه اطلع

اتقربت من حمودي وبسته وانا ادغدغه وهو يضحك بعدين باوعت الها وبستها براسها شفتها اتفاجأت واتوترت
بعدها رحت ركبت سيارتي ورحت للدائره وبالطريق اسأل بنفسي
:: ها يوسف رضيت غرورك اخذت ثارك لو بعدك
بعدين احچي واگول :: انا شبيه ليش هيج احچي
:: لان انا ظالم ومجرم

ما اخفيكم بيومها وثاني يوم اتمنييت سالم ايخابرني لكن هو ما خابر اله وره عشر تيام بوقتها انا بالدوام وهو اتصل
بيه انا جاوبته ابرود وهو هم رد عليه ابرود
:: الو اهلا سالم
- - هلا يوسف انا هسه بالحقل وياي سماح اجت الاختها
اتوترت وانا يتهيأ الي الموقف :: ها ايي ليش لا ومروه مروه شنو سوت شكالت
سالم بعتب - - ليش هي شبيدها وشتريد تسوي صارت تصرخ وتبچي

بيومها ما چنت مستقر رجعت للبيت وره الظهر وضحى طلبت تروح ويه امي للطبيب اخذت فلوس وراحت بقيت
ابحدي نزلت لكيت بسام بغرفته وهو يخابر عرفت بي جاي ايخابر بزميله ويا بالكليه ومن شافني قطع المكالمه
وشفت بعيونه خجل

عرفت هاي مو مجرد زميله يمكن هاي ايحبها هو سالني بخجل //هاا يوسف
:: لا ماكو شي بس سمعت صوتك وانا عبالي طالع
- - لا قبل شويه اجيت
ابتسمت // قبل شويه جاي وهسه انت  تخابر اخذ راحتك

رحت گعدت بالصاله ودخنت جكاره خليت راسي ع القنفه وصرت افكر
::بسام يحبله ابنيه ويا بالكليه ياترى امي هم راح تسوي  وياها نفس ما سوت ويه سحر
وجواب يگلي ::  لا كل شي ما تسوي لان ماكو ضحى ولا حتى سالم
:: ليش بس ضحى وسالم خلي اكول ما كو ازهار

انذكرت سالم من گلي چنت اريد بت اخو مرت ابوي والبنيه موافقه بس تكمل كليه
جريت نفس قوي وگلت :: هذا كله الي صار بيه على مود ضحى وازهار

صعدت فووك سبحت وبدلت ملابسي وانا التفكير راح يموتني ::ياترى شنو راح تسوي مروه شنو رد
فعلها اتجاهي بس انا ليش ضايج ومقهور
:: خليها اتولي شنو قابل اخاف منها
:: لا ما اخاف بس ليش هيج جاي افكر
:: يمكن تانيب الضمير او يمكن انا احب مروه
استهزأت بنفسي ::مستحييل شنو احبها
:: ليش لا مروه ام ابني وبنيه مرتبه وحلوه ومؤدبه وتنحب

گعدت امشط واخذت الموبايل وردت اتصل بسالم لكن  حسيت بنفسي انا غلطان بحقه وما الي خلك الاعتذار
نزلت وگعدت بالكاع واباوع للاسماء شفت اسم ماهر عاتبت نفسي
:: هاي من يمته ما متصل بي اكثر من تلث تشهر وكل مكالماتنه ما تتخطى الدقيقتين وبعدها صرت ما اتواصل ويا
اتصلت على ماهر بدون ما افكر لان حسيت بنفسي بحاجة صديق احچي ويا ما جاوبني رجعت اتصلت مره ثانيه
رد عليه

- - الو
:: السلام عليكم اشلونك ماهر
ماهر // عليكم السلام منو
- - هاي شنو ماحافظ رقمي
حمحم // لا الحقيقه جهازي اتفرمت واغلب الارقام انحذفن
:: هههه هاي شلك بيها حتى لو انحذفن صوتي غريب عليك انا يوسف

ماهر // تره عرفتك من اول ما اتصلت
:: هاا وليش گلت اتفرمت الجهاز
- - الصدك هو اتفرمت لكن انا حافظ رقمك على گلبي
:: بس ما ضايفه بجهازك
ماهر // الحقيقه صحيح ما ضفته لان انت ابتعدت وصرت ما تسأل

جريت نفس :: ماهر محتاج اشوفك
ماهر // متاكد محتاج تشوفني ما اصدك
::ايي ماهر متاكد وحقك اذا ما صدگتني 
ماهر // خير يوسف شصاير وياك
:: تعبان تعبان كلش
ماهر بنفس البرود // سلامتك يوسف بيش اكدر اخدمك

:: گتلك اريد اشوفك
جاوبني // تعال يوسف احنه ابيتنا القديم وانت تندله
هزيت راسي :: ايي جايك
اخذت السويج وطلعت بالسياره چان دنيا غروب ومن صرت ع الشارع العام خابرت بسام وگتله
:: بسام انا طالع للبصره رايح اشوف ماهر لان عمه اتوفه عود من تجي امي بلغها
بسام // صار الله وياك

ما حبيت اخابر امي او ضحى لان اعرف راح يتقررن وانا ما الي خلك احچي نزلت بالطريق باستراحه صليت
واتعشييت وبعدها واصلت طريقي وامي اتصلت بيه // وليش تروح ابحدك وچان انا رحت وياك اشوف اختك زهره
جاوبتها ::  ما ادري بيج تردين ترحين اتشوفين زهره لان ولا مره كلتي اريد اروح الها

تقريبا الساعه 11 ونص وصلت البيت ماهر
هو ما صدك من خابرته وگتله انا ابابكم طلع واتلگاني هاي اكثر من سنه ما شايفه حتى من يجي البيت خاله صار
ما يمر بيه ولا يسأل
هو بس شافني حضني وگلي //من گلت جايك عبالي تتشاقى

ودخلت للبيت وانا اشوف ماهر اموره فووك الزينه ورغم هذا هو ما نسى صداقتنا فرح من شافني
واجت امه وسلمت عليه وجاب جهاله اثنيين ما شاء الله حلوين ومرتبيين
هو راح جابلي منشفه جديده وياها تراك وگلي
روح يوسف اسبح وبدل وبعدين نسولف
انا رحت للحمام سبحت وطلعت شفته جايب صينيه بيها مشاوي وفواكه ولبن جاوبته :: شنو هاي ماهر انا متعشي
هو رد عليه // مي خالف بس نقنق

وصرنا نضحك واتذكرنه ايام دراستنا وشلون كضيناها وعرفت بان ماهر مشتري بيت ابو واخوانه مشترين كل
واحد بيت وامهم گاعده عد اخوهم الزغير هي واخته الي بعدهي ما متزوجه واليوم جايه اتشوفهم صرنا ناكل وماهر
يسولف ويضحك على ايام گبل من جنه بالمعهد رحت غسلت وهو اخذ الصينيه وجاب جاي وگعدنا سالني

- -اشلونك يوسف
باوعتله بابتسامه باهته ورديت ::الحمد لله عايشين
هو هز راسه وگال // دووم الحمد  لله على كل حال
:: انت شلونك شغلك
ماهر // نعمه جاي نشتغل انا واخواني وخير من الله
::الله يزيد ويبارك

صرت ادخن وصافن ماهر گلي // خيير يوسف شبيك
جريت نفس ورجعت دخنت ماهر گلي // يوسف شكو شصاير وياك
نفخت الدخان :: كل شي ما صاير بس اشتاقيت اشوفك واجيت
ماهر باوعلي // هاا يوسف تريد تقنعني جاي من الحله للبصره بس لان اشتاقيتلي

باوعتله :: شبيك ماهر اذا تريد هسه اطلع
ماهر // يوسف وين تطلع فهمني  شصاير وياك
وگفت واخذت السويج وانا احس نار تطلع من عيوني ::  اهوو ماهر بعدك ولا اتغيرت انا رايح
هو وگف // وين رايح انت مو جاي تشوفني
:: وشفتك وانت ما قصرت عبالك جاي اتداين منك

لزمني  من ايدي وگلي
- - اگعد يوسف انا اعتذر اذا بدر مني شي ارتاح انت مبين عليك تعبان
باوعت الماهر وگعدت هو گلي // يوسف انا اخوك واكثر من اخوك لكن انت بالفتره الاخيره ابتعدت
لا صرت تسأل وحتى من اخابرك كلمتين وتنهي المكالمه يوسف حاچيني يجوز اگدر اساعدك

ورثت جگاره وجاوبته :: تعبان ابو علي تعبان كلش
- - يوسف ارتاح ولا تحچي اي شي ارتاح وبعدين نسولف
جريت نفس وانا يتخايل لي مروه :: لا ماهر انا جاي حتى اسولف الك من زمان واحد ما سر الثاني يمكن
صحيح كلامك لان انا ابتعدت
ماهر // وانا اسمعك احچي كل شي شصاير وياك

سولفت الماهر واشوفه يسمع وهو متفاجئ قاطعني وكلي
- - انت شتگول معقوله انت يوسف الرزن الي ايخاف الله هيج اتسوي
باوعت اله وگتله :: شمسوي ماهر لو انت ابمكاني ...
رجع قاطعني وهو ايحرك ايده //يوسف لاتخلي هاي الكلمه شماعه تعلك عليها اخطاءك
جاوبته باستغراب ::يا كلمه ؟

ماهر // كل ما احچي وياك لو انت ابمكاني شنو راح تسوي  ايي يااخي لو انا بمكانك جمال غلط واختك اتوفت
والناس انحقو بس انت انت يوسف ظلمت مروه هواي وظلمت نفسك
جريت نفس ::صدگني ماهر مو بايدي انا من اشوفها اختنك
ماهر عكف حواجبه //تختنك ؟

هزيت راسي :: ايي اختنك اروح بلهفه الها لكن مجرد ما اشوف وجهها اكرهه لان اشوفها ...
- - شتشوفها يوسف هاي مرتك
:: ادري بس ما اشوفها مروه
-اي فهمني شكو (اتقرب عليه ) يوسف احنه اخوان ومن اختاريتني واجيتني حتى ما تضم عليه شبيك

::اشتاق الها واريد بس اوصل يمها لكن بمجرد ما اشوفها تمشي يتراوالي اشوف ذيب يريد يفترسني او خنزير
ومرات اشوفها نسر ياكل لحم
ماهر فتح عيونه وهو يگول // لا حول ولا قوة الا بالله العلي العظيم وتتصور هذا البي انت طبيعي
سالته ::شلون يعني ؟

ماهر وهو اياشر // يعني بشر يشوف زوجته ما اعرف شنو مع العلم هي گايمه بواجبها وراضيه بقسمتها شنو اتسمي
يوسف هسه انا راح اخلي نفسي ابمكانك واجي واگلك انا اشتاق المرتي واريد بس اروح واشوفها من اباوع الها
اشوفها مو مرتي اشوفها مكرم انت حيوانه  شنو اتفسرلي هذا الشي ومو بس هيج لا انا ابتعدت عن اصدقائي
لان ما اريد ايسمعوني كلمه او نصيحه هاي شتسميها

باوعتله هو هز راسه // انا اگلك ياصاحبي هذا سحر وسحر قوي

////////////////////يتبع