بعد فوات الأوان الفصل الثاني وخمسون 52 - بقلم آنين الليل

جهاد
طلعت من بيت جدي وسط ذهول هلال وابنه الي بقو كاعدين ركبت بسيارتي واحجي
مروه كله منج خبلتيني فتحتي عليه بيبان چنت قافلها وجروح ساحك عليها
وما اعرف يجوز اتزفضيني لو الكاج عندج علا... استغفر الله

وصلت للمحامي وسولفت اله هو گلي
- - جهاد والله جاي اتعجب منك انت مو تريد تهاجر ليش رحت العمك
هزيت راسي // ايي اريد اهاجر بس ما اريد اخلي شي يخصني متعلك وراي
—- وهسه جهاد
- - هسه تتوكل عني اريد حصتي بورث جدي

سويتله وكاله وكلي راح يحاول بطريقته يعرف املاك جدي وشكد يسوون وبعدها يروح يتفاهم وياهم واذا
ما قبلو هناك نقيم عليهم دعوه // بس اخاف الدعوه تاخذ وكت وانت تدري انا وراي سفر
—— لاتخاف جهاد هيج قضايا ما تاخذ وكت وحتى لو اخذت انت مسويلي وكاله يعني انت الك الصافي

هزيت راسي // تمام ما دامك هيج تشوف
- - - بس بالاول خلي اروح واناور وياهم وبعدها امشي باجراءات الدوله
- - براحتك
المحامي باوعلي وگال // جهاد بعيونك كلام كوله لا تخلي شي بگلبك
- - لا ماكو شي
- - زين جهاد اني خلي اگلك يعني بما انه انت وراك سفر فاذا عمامك قبلو ينطوك حقك انت هم لازم اتقدم تنازلات

باوعتله مستفسر من كلامه هو هز راسه وگال
اي قصدي اگلك همه اكيد عدهم ولد شباب واكيد مثلك مو قاصرين وحلالهم غالي عليهم مو صحيح
جاوبته // صحيح بس انا ما اريد اله حقي
—- —- جايك بالكلام انت هسه ياجهاد اني اعتبر نفسي مو بس المحامي مالتك لا انت صديقي وبما انه انت
وراك سفر فاانا ما احبذ مشاكل وعرك ويجوز يصير اعتداء وشرطه وهذا الشي يضر بيك انت بالدرجه الاولى
لان انت ناوي تسافر ولازم ملفك يكون ابيض فانا راح اعرف ملكية جدك ونخمنها وبعدها اروح اتفاهم وياهم

—تمام
- - اتفقنا
—- وشنو سويت بقضيتي ؟
—- اوووووه تصدك نسيت لان فاجاتني ابيت عمك او ورث جدك
—- يعني فكرت
—- اي وراح تروح وتتزوجها من غير اي شي
—— شلون

——من ترجع للبصره تبين نفسك مرتاح وفرحان ودووم اتراسل بالموبايل
—- اراسل اراسل منو ؟
لملم حلگه // انت مبين مطفي من جهة النسوان زين يابه راسلني اني المهم اريد امين يشوفك بعدها بايام
خلي انگول اسبوع اكثر راح ايسالك وراح يعرف انت قررت تتزوج لان وكعت بالحب

رفعت حواجبي هو هز راسه وهو يبتسم // ايي راح تتزوج لان بسفراتك البغداد شفت ابنيه وعجبتك وسويت
علاقه وياها وقررت تخطبها من اهلها وتتزوجها بس تظل عندك مشكلة السكن لان البنيه تريد تبقى ابغداد

حكيت گصتي // يعني تريدني افهمهم انا راح اتزوج واستقر ابغداد وانا اسافر هناك واتزوج مروه شلون يصير
هز راسه وابتسم // لا مو هذا قصدي
— - - شنو قصدك وضح
- - اسمعني جهاد بهاي الفتره انت كلش فرحان ومرتاح وتقرر تروح تخطب البنيه لكن فجأه ترفضك
وتنخطب الواحد ثاني لذلك انت راح تتأزم حالتك وما يصير عندك ثقه باي احد وتقرر تسافر حتى ترتاح وتنسى
وانت بالاساس مصفي امورك
ومن تسافر تقرر اتهاجر ومن توصل وتتاكد من مشاعر مروه تفاتح اخوتها بالموضوع وهمه راح ايوافقون
لان ما يلكون احسن منك

رفعت حواجبي // تتصور ما يشكون وتعبر عليهم
هز راسه // يجوز يشكون وما تعبر عليهم لكن انت ما مسوي شي حرام او عيب انت بالغربه تريد تستقر
وهي بنيه صعبه تبقى بالغربه ابحدها فيشوفون ارتباطك بيها احسن حل
عضيت شفتي // كلامك بي وجهة نظر
—— هسه صار الامر واضح موجهاد
– اي واضح

لجالمحامي //. تمام انت باچر ترجع للبصره وتكون متأهب يمته ما اخابرك تجي
- - ان شالله
- - ومثل ما فهمتك تتصرف

هزيت راسي بعدها سلمت ورجعت للفندق ومثل كل يوم النوم بالقدره الصبح اتوكلت ورجعت للبصره وصلت
بعد الظهر للبيت واتصل بيه امين لان اكيد شاف سيارتي جاوبته وبينتله اريد انام تعبان وهو كلي ما تاكل شي
ررديت اريد انام ومن اكعد اكل اي شي

وفعلا بقيت بالبيت وما اسولف الكم عن الافكار التي تاخذني وتجيبني ومرات الوم نفسي لكن اعذرها وانطيها مبررات
ثاني يوم گعدت صليت الفجر وبعدها طلعت للمحل رحت بسطت وراي اجه امين وشافني سلم عليه واتصافح وياي
وهو يكلي // شلونها سفرتك
ممتازه وصلت البضاعه
اي وصلت
تمام

والتهيت بالنقال مثل ما وصاني المحامي وامين راح للمحل الثاني فتحه وانا اعرف بي مستغرب تصرفي
وبدو العمال يجوون تقريبا الساعه بالتسعه الصبح اجه امين وجايب ريوك اتريگنا وانا عيني بالموبايل بعدها كملت
وشربنه چاي واول مره نبقى ساكتين ما نحچي ولا نصنف انا كملت ورحت غسلت ورحعت باديه الجنطه
خليتها گبال امين الي سألني

شنو هاي
هذا جهاز الطفل
وليش زاحمت نفسك امه راح اتجهزه
لا انا عمه والجهاز انا اشتري
تسلم جهاد ما نريد نزاحمك
شنو هالحچي هذا ما بيناتنا

اباوع الامين اشوفه ضايج واول مره اغلس عنه ما اسأله هو اخذ الجنطه وكلي
مشكور جهاد يوم ان شاالله اشتري جهاز ابنك
مثلت الضحكه وانا اگله // ان شالله
هو باوعلي وابتسم // ها چنك ناوي
سكتت وانا ابتسم هو رفع ايده ويگول // يا الله ياالله

طلع امين وانا بقيت الوم بنفسي لان ما سالته ولا حتى انطيته وجه واگول بگلبي
كله من وراج مروه حتى اخوچ راح اعوفه
اي اعوفه واعوف الدنيا كلها الخاطرج

بقيت يوميه اطلع للمحل مثل ما انا ما صرت اروح يم جهاد اله اذا اكو حساب او بيعه قويه وصرت كله اعتمد
على العمال. طبعا اراقبهم لان هذا شغلي وتعبي ومن اشوف امين التهي عنه بالنقال واوهمه اني جاي اتراسل
او مرات اذا اشوفه بعيد اوهمه انو انا جاي اتصل ومبينه عليه الفرحه

تقريبا اسبوع اتصل عليه المحامي وگلي لازم اجي البغداد حتى نتفاهم على ورث جدي وبيومها طلعت الفجر
بدون ما اخبر امين الي اتصل عليه الصبح وسالني

جهاد انت وين
هلا امين الناس تكول السلام عليكم
السلام عليكم انت وين
طلعت البغداد
ها يمته اشو ما خبرتني
اجت بسرعه ليش اكو شي
لا اخذ راحتك ودير بالك على نفسك
شبيك امين صاير شي
لا ما صاير من ترجع نسولف فيمان الله
الله وياك

عرفت امين شال بخاطره مني لان ما خبرته بطلعتي البغداد
وصلت تقريبا الساعه عشره ونص وخابرت علي المحامي وما جاوبني ركنت سيارتي يم مطعم واتريگت وشربت گهوه
تقريبا الساعه 12 وصلني مسج منه وگلي تجيني للمحكمه لان عنده قضيه وفعلا رحت للمحكمه وانتظرت الساعه بالثنتين
اجه وگلي // خلي نطلع نروح نتغدا
ورحنا اتغدينا وانا صرت اتثاوب لان تعبان وطالع من الفجر هو باوعلي وكلي
شنو منعس
هزيت راسي وجاوبته // اي والله لاتنسى طلعت من فجر الله
الحمد لله على سلامتك هسه تروح تنام ونأجل حديثنا لا...
قاطعته // لا يمعود احچي خلي اسمع

هو شبك اصابيعه واتقرب عليه وكلي // بشي يشبه الهمس
جهاد حاولت احصر املاك جدك وعرفت عنده اربع محلات بالشورجه ومخزن كلش كبير يمكن الف متر
وعنده محلات بمنطقة السباع تقريبا سته يبيعون بيها مواد احتياطيه لازمينها ولد عمامك وعنده غير البيت
الگاعد بي عمك هلال بيتين وقطعه كلش چبيره ومزارع اثنين من غير البيوت الي مشتريهن العمامك وعمارات اثنين

بقيت متفاجئ من عرفت املاك جدي واتذكر شلون خلونه بالشارع انا واختي انتهلي علي سالني // شبيك حهاد
جاوبته بحزن // والسيوله
هز راسه // اكيد ماكو سيوله
- - تقصد ابطن عمامي
- - اكيد
- - وانت شسويت
- تقريبا گدرت اقنعهم بان ينطونك حصتك من الورث
جاوبته باستهزاء // تقنعهم ليش انا ما الي حصه هذا شلون حچي

دخن جكاره // على كيفك جهاد وافتهم كلامي انت الك حصه حالك من حالهم بس حصتك شلون تاخذها
(وصار يعد على اصابعه )
مشاكل وطلايب ويه عمامك او ولدهم احتمال تتضاربون
توصل للشرطه شكاوى
وهواي امور

باوعتله // وانت شسويت
—- اتفاهمت وياهم
—- شلون
—- يعني بشوية تنازلات منك راح تاخذ حصة ابوك من ورث جدك بس ناقصه

وگفت على حيلي //هاا وبأي قانون
اگعد جهاد وافهمني
كعدت وجاوبته //فهمني
جهاد لاتنسى انت بالنسبه الهم (اتحسر وگلي ) اسمحلي بالنسبه الهم نكره

باوعتله هو جاوبني ويحرك بايده //رجاءا لا تفهمني غلط الي اقصده عمامك عايشين ابيت جدك وچانو يشتغلون
باملاك جدك يعني همه اهل الشغل واجو اولادهم انت وابوك ما چنتو حاضرين بالساحه
بس لاتنسى استاذ علي انا ما مطالبهم بفلوس شغلهم ولا باملاكهم ولا حتى بحقي من الشغل وره ما اتوفى جدي
انا مطالبهم بحصة ابوي من املاك جدي الي باسمه هسه اذا واحد مهاجر صار عشرين سنه ويموت ابو شنو
ما ينطونه حصته خلي يعتبروني انا مهاجر

المحامي // هو هذا الي اريد افهمك ايا جهاد مو هين عليهم ينطووك حصه كامله لاتنسى ابوك العفو منك
چان منبوذ وحتى جدك ما يريده بس ما كتب وصيه ولا شهد
همه يگولون هو وصى ما اله شي لكن انا گتلهم تنطوني وصيه وشهود وقسم وبذلك يسقط حق جهاد وما يطالبكم بشي
- وبعدين
- - الي صار انا گعدت وياهم واتفاهمت بعد ان خمنت حصتك ب اربعميه وخمسين مليون ويجوز اكثر
راح ينطوك 250 مليون
— وليش كل هذا ليش ما اخذ حصتي كامله

- - - لان مثل ما عرفت من كلامك انت رجال باي لحظه تهاجر ولازم تلم نفسك تدري لو عدهم علم
انت تريد تسافر چان ظلو ايماطلون سنيين ما ينطوك حصتك
- - - وانت شتشوف
- - - انا اشوف تقبل وتاخذهن بدون وجع راس

بقيت صافن وانا الملم حلگي بعدها رفعت راسي ليفوك وحركت رگبتي يمنه ويسره لان احس اتشنجت وگتله
- - - علي خلي ايسووهن 300واريدهن كاش ما ناقصات فلس لان حصتي من املاك جدي اكثر بهواي
هاا واتعابك عليهم
ابتسم // لا ياجهاد تدور وياي
هزيت راسي // ايي ادور وياك حصتي اكثر من 600وانت تگلي بس 400
لا جهاد صدگ حصتك تكتل نفسها اربعيه وخمسين
——- ههههه بكل هاي الاملاك بس اربعمه وخمسين ليش تخليني افقد الثقه بقدراتك

- - - يمعود جهاد خلي نكول 600 بس من المستحييل ينطوك هذا المبلغ
- - - خلص وانا قابل بتلثميه مو يگولون منهوب النص ما منهوب لاتنسى علي انا ابن سووك واعرف
- - - واذا رفضو
- - - وداعتك اخليهم معلگيين واحيب مخمنيين يخمنون حصتي بمليار ونص واغيب شكم سنه واجي اشتريهن وعيونهم
تشوف بعد انت وشطارتك

——- ههههه تدلل بس حلينه حلگنا
——- والله حسب الي تطلعه منهم انت هم تدلل واذا ما تگدر لا تستحي علي گلي اشوف واحد غيرك
باوعلي وهو ململ حلكه ورافع حواجبه // صدك من گلت ابن سوگ بس ما عبالي تبيعني بسرعه
هزيت راسي // لا مو هذا قصدي مثل ما گلتلي وراي سفر وهواي امور ولازم استعجل

ابتسم // اعتمد جهاد ما يصير خاطرك اله طيب بس ممكن اسالك
- - - اي اتفضل
- - هسه انت راح تاخذ حصتك من ورث جدك وتبيع القطعه
هزيت راسي // اي
- - واملاكك الي بالبصره
- - اشوف اذا المبلغ يغطي سفري ومشروعي ما ابيعهن

— ليش
—- اخليهن يجي يوم واستفاد منهن
—- براحتك لكن اني اشوف انو تاخذ فلوس من ورث جدك وتبيع املاكك الي بالبصره والبيت الي انطته الك امك اتعوفه للزمن
ابتسمت بمراره // لا شغلي الي بالبصره رغم اقل من الي حصلته منا ذاك ما افرط بي لان ذاك اجه بتعب وحرمان وسهر ليل
وهواي امور اما البيت والفلوس فذني حصة ابوي الله يرحمه
—- مثل ما تشوف جهاد

وصار الاتفاق يتفاهم وياهم يدفعولي 300 ورحت للفندق اخذت غرفه ودخلت ارتاح وخليت الموبايل ع الواتساب
نمت ما صحيت اله نص الليل وانا اباوع اشوف اتصالات من امين وانا ما راد علي صليت ورجعت نمت گعدت
الساعه ثمانيه الصبح اخذت حمام وبدلت ونزلت

اتصلت بالولد الي گلي راح يبيعلي القطعه واتفقنا على مكان نتلاگى بي طلعت اتريگت وبعدها شفت الولد الي
گلي هواي يسالون عليها وهي وصلت 400 انا گتله بيع واعرف هي تجيب اكثر لان موقعها تجاري
تلث تيام وبعدها رجعت للبصره وانا اشوف او احس اموري جاي تتسهل يعني سفري قريب
وصار لازم ابلش ويه امين اقنعه

من رجعت لگيت امين بالمحل ومن شاف سيارتي هو اجه وسلم عليه واتحمدلي السلامه شافني مرتاح وفرحان
هو فرح وياي وما حب يسالني عن سبب فرحتي رادني انا احچيله
ومر يومين اجه يمي جابلي ريوك وگعدنا ناكل وانا اكل وعيني بالتلفون هو باوعلي

شنو هاي جهاد عيونك راح تعمى
ها لا مو منتظر ولد صديق مكلفه بشغله
الله يوفقك بس اگول اذا مكلفه بشغله اكيد راح يخابرك او انت راح تخابره
اي انا قبل شويه اتصلت وگلي انتظر مني رد
الله يوفقك جهاد ان شا الله شغلتك مكضيه
تسلم تسلم

ورجعتاباوع للنقال رغم اعرف هذا الشي ضوج امين بس مضطر اسوي هذا الشي هو طلع واحس بي ضاج
كلش بعدها بيومين اجه امين وانا صحت على ولد يشتغل ويانه اسمه ربيع وسالته گدام امين

اكلك ربيع هذا ابو غسان گلي جابلك الفلوس
اي جابهن امس وانا الصبح انطيتهن الك
شكد جاب
تلث ملايين
وچزيت احسابه
مالكيت اسمه
هاي شنو متأكد
اي جهاد متأكد

هاا يجوز انا نسيت ما سجلت اسمه
امين // ليش هو يمته اجه اخذ البضاعه
قبل اربع تيام
شعجب ما تفوتك هيچ شغله
لا ما تفوتني بس نسيت
وانت تعرف شگد بقن علي كتبتله وصل

لا انا متعود ويه ابو غسان بس اكتب هلگد اطلبه
ليش جهاد من يمته
انا باوعت الربيع واشرته يطلع // شنو امين اكو شي
انا اريد اسألك جهاد بيك شي صار شي وانا ما اعرف
رفعت اچتافي // ليش شبيه
هز راسه // ما ادري بس مو انت جهاد دومك عينك بالموبايل ولا الك خلك الشغل ولا تسولف ويانه ما ادري شبيك

لا متوهم ماكو هيچ شي
اي مبين من انت تحچي وياي والموبايل بعيونك
مو چنك اتحاسبني
لا العفو شنو انا واحاسبك

وطلع امين يمكن زعلان او ماخذ بخاطره اما انا فاتگطع من داخلي واسب بنفسي وانا صرت فعلا خاين ونذل
بقيت فتره ورحت ورا شفته واكف بالمحل مال المفروشات هو شافني بقى يحچي ويه العمال ولا چني موجود
بيني وبين نفسي گلت //بعدني يامروه ما واصلج وفرقتيني انا وامين
نفخت حييل ودخلت للمكتب هو اتاخر واجه انا گلت للعامل جيب چاي
وبقيت گاعد وهو يباوع للسجلات اليمه جريت نفس وگتله // زعلت مو
بدون ما يباوعلي هز راسه // لا على شنو ازعل

جاب العامل الچاي اخذته منه وخلا يم امين صرت اخوط وحچيت ويا // اعذرني انا يمكن هالايام صاير مخربط
ما رد عليه
- - يعني انا صدك مخربط مو
هو جر نفس وگال // لا كل واحد حر بنفسه
هزيت راسي // ما طوول گلت هالشكل يعني زعلان
واذا زعلان شنو قابل انا منو
—— امين لاتزيد حيرتي تره والله ما اعرف شسوي

هو باوعلي وگلي // شبيك جهاد
بهاي اللحظه ردت اعترف اله والي يصير يصير لكن صورة مروه صارت گدام عيني جاوبته وانا مدنك وافرك بديه
- - - اخوك وگع بالحب
هو ابتسم بذهوول //تحچي صدك
هزيت راسي // ايي
—— صلوات واخيرا منو هاي كلي
—— بنيه من بغداد شفتها
—- ايي
——ايي من سنه حسيت من اشوفها افرح ارتاح
فتح عيونه ع الاخر // من سنه وضام عليه
بالبدايه ما جنت متاكد

رد بقفرح // المهم يمته نخطب
اتحسرت // عن قريب بس عدها شرط
امين // خلي شتريد تامر ويتنفذ المهم تتزوج وتستقر
——- تريد نسكن بغداد

هو اتفاجأ بكلامي بعدين رد عليه //اي مي خالف حقها
بس انا
انت شبيك
ما اريد اسكن بغداد
مي خالف اكيد بمرور الوكت تتعود او هي بعدين تطلب منك ترجع للبصره من تشوفك ما مرتاح

حكيت خدي // ها انت تشوف هيچ
—— اكيد بس گلي من يمته
—- مو كتلك من قبل سنه رحت وشفتها من چنت اروح اتسوك
وضام هذا الشي
هزيت راسي // ايي على ما اتاكدت منها ومن مشاعري اتجاهها وهم عرفت كل شي عنها

ضرب على فخذي // بيها الخير ما تدري اليوم لو بيدي اذبح ذبيحه لوجه الله
—- تسلم ياصاحبي
—— وگلت الها عندك اخوان واخوات بالبصره
هزيت راسي // اي كل شي فهمتها

—- يمته نروح نخطب
—— ان شالله خلال هاالايام هي تنطيني خبر
اتقرب مني وباسني بچتفي وگلي // انا بالي مشغول واحاسب نفسي خاف غلطان وياك اثاري انت واكع بالحب
فرگت گصتي وجريت نفس // انت ما تغلط امين حشاك من الغلط
—- بس ليش ضميت عليه
—- بالبدايه ردت اتاكد من مشاعري وهم اتاكد من البنيه بعدين سالفة ابوك وانوب اختك

هو جر نفس // باالله اختي هاي مصيبه تدري الهسه ما جايب طاري الاي احد من گرايبنا
—-بس اول وتالي لازم تخلي عدهم علم
——شگلهم
اتنست // گول سافرت هي وزوجها وبعدين هناك طلبت الطلاك منه وهو طلكها

——- :صعبه جهاد صعبه
——. اعرف بس لازم الناس يصير عدها علم

ورحت من يم امين بعد ان طيبت خاطره وانا مقهور على هالشاب الي يوميه مشكله من وره ابو وكملتها مروه
كل ساع اتهدد اريد اعترف الامين لكن روحي تلزمني واگول ليش احطم نفسي واحطمه خليني امشي للاخير
وان شالله ربي يسترنا

بعدها بخمس ايام اجيت يم امين وانا اصطنع الفرح گتله
باچر ان شالله اسافر البغداد
ها واحنه
قبل شويه دزتلي خبر ابوها يريد يشوفني حتى نحدد موعد اجيبكم ونخطبها
امين رفع ايده //ياالله ياالله
بس امين هسه لا تحچي بالموضوع على ما اكمل كل شي واحدد بوم الخطبه
وداعتك جهاد المهر كله عليه لو شنو يطلبون

من سمعت كلامه عيوني غورگن بالدموع لان انا غدرت اخوي وصاحبي
وسافرت ثاني يوم وامين على تواصل وياي وهو يوصيني
دير بالك بالسياقه
انتبه ع الطريق
انزل ارتاح
جاوبته // هاي شبيك شنو اول مره مسافر انا
ضحك //. هههه لا بس هاي المره سفره خاصه
ههههه صار عمي تامرني بشي ثاني

وصلت وشفت علي المحامي وطلبت يجيبلي شريحه جديده وجهاز حتى اغلق شريحتي القديمه كم يوم
واتصلت باايوب وطلبت اشوفه وفعلا اجه بنفس المطعم وگلي خلال شهرين اكون انا مسافر وفهمني
على هواي امور
وثاني يوم انطيت موافقتي وتم بيع القطعه واستلمت فلوسها والمخمن يگلي لو تصطبر تجيب اكثر لكن
انا بعتها لان اريد اخلص وحولتها باسم الشاري واخذت الفلوس خليتهن بالبنك وشفت علي الي جابلي
جهاز وشريحه وعرفت منه انو هو اتوصل الحل ويه عمامي وقبلو ينطوني 300 مقابل اتنازل عن حصتي
وفعلا اتنازلت وطلبو عمامي وعماتي ان ايشوفوني لكن انا رفضت ودزيت الهم رساله ورقيه بايد المحامي
كتبت بيها وطلبت من علي يقراها الهم

انتو رفضتو ابوي وچنتو سبب بوفاة اختي فاانا ما يشرفني ان تكونون اهلي وعزوتي
هاي الفلوس الي اخذتهن انا مو بحاجتهن وحتى لو انا فقير هم مو بحاجتهن بس حرامات اخليهن الكم وهنه بوقت
من الاوقات كان ممكن ان يطلعن ابوي من السجن او ان ناخذهن انا واختي ونعيش حياة كريمه بدل حياة الضياع
انتو بذاك الوقت انكرتوني انا واختي
وبقيت وحيد وعشت حياة فقر وعوز وذل وما طرقت بابكم مو لان اخاف منكم لا بس ما ردت تشوفون ضعفي
وتكولون اجه يستجدي من عدنا
لكن هسه انا عندي خير من الله واخذت حق ابوي وانا ما عايز اخذت حق ابوي وانا قوي ولو ما عندي شي مهم
ولازم اسوي صدكوني وروح ابوي چان اشتريت كل املاكم وخليتكم تمشون وتحجون ويه نفسكم بس عندي
عمل اهم منكم ومن فلوسكم

ورجعلي المحامي وهو يگلي لو تشوفهم شلون انذهلو وهمه يسمعون كلامك
هزيت راسي وگتله // هذا هو طويت صفحتهم باقي صفحه وحده لازم احركها
طلعت ورحت للمركز ونزلت دكيت الباب وطلعت الموظفه راحت بلغتها واجت كالت
اتفضل بالمكتب
لا خبريها اريد اشوفها اهنا

هزت راسها وراحت بعدها بدقايق اجت امي وهي خاله شال دانتيل على شعرها الي طالع نصه بذيج اللحظه
اتذكرت ام امين وحجابها وخجلها ودموعها وتضحيتها باوعتلي وكالت
اول مره اشوف ولد ما عنده رقم امه
باوعت الها وما حچييت هي كملت // وليش ما دخلت للمكتب
مديت الساني ابلل شفتي // لا اهنا احسن لان عندي شغل
ها جهاد محتاج فل...
قاطعتها // لا ما محتاج بس اجيت ابلغج انو انا بعت القطعه الي وهبتيها الي

فتحت عيونها // بعتها ليش
- - لان هي حقي مو
هزت راسها // اي انا ردتك تسوي بيها مشروع او تسويها الك سكن
- - - وليش ترديني اسكن اهنا
- شبيك جهاد ؟

نفخت // اسمعيني القطعه انتي ما وهبتيها الي لان هي بالحقيقه مالتي
رفعت حاجبها // هاا شلون مالتك
هزيت راسي //اي بفلوس ابوي الي اخذتيهن واتزوجتي واتمتعتي بيهن انتي وزوجج لو نسيتي
——. جهاد شنو هالكلام

ابتسمت // هذا الصدك وانا بعد الي يمج هواي بس ما الي خلك المشاكل او اعتبر اخذتهن من ضربتج وخليتج
تعيشين بكلى وحده
ردت عليه وهيه تهزابايدها // باالله ما تستحي لك انا امك
هزيت راسي وابتسمت / لا مو امي تدرين منو امي (حركت ايدي يعني بين قوسين ) تدرين منو رباني ومنو
عيشني ومنو نيمني تردين تعرفين امي منو انا اكلج

باوعت الها وخزرتها وجريت نفس // امي يامدام (الشارع ) هو الي حضني والي نيمني والي بيوم من الايام جعت رحت ادور بحاويات الزباله حتى الكط الصمون والخبز وامسحه بايدي واكله وانتي متزوجه ومرتاحه ومتونسه
اجيت اگلج انا حق ابوي بحلاله وصلني ومن تموتين الي حق بورثج لان انا بالجنسيه مكتوب اسم امي امينه مو الشارع
وراح اخذه واقاسم ابنج وبتج بكل فلوسج هاا وبعد اطلبج
حق جنه وحق دموعها وخوفها ورجفتها
وحق موتتها واناي لاهيه ويه صاحبج العفو رجلج

هي انذهلت من سمعت كلامي وانا ركبت سيارتي وشخطتها حتى ما اسمع صوتها

طلعت بسيارتي اسوق وانا ادخن وعيوني ما بطلن دموع المفروض واحد مثلي هسه يكون قمه بالفرح
صرت اسوق وطلعت على طريق النجف وامين كل شويه يتصل بيه بالبدايه ما جاوبته اله لمن صار يلح
جاوبته وهو حس اكو شي لكن انا فهمته انو انا مرهق شويه وضغطي مرتفع وهو گلي راح يركب ويجيني
لكن انا فهمته انو ما بيه شي واخذت علاج وهسه اصير زين

وصلت للنجف ورحت زرت امير المؤمنيين صليت ودعيت ان الله ياخذ بايدي ويكملها وياي لان انا تعبت واريد ارتاح
بعدها رحت للمقبره واخذت ماي وشموع وبخور ورحت القبر ابوي وجنه وصلت غسلت القبر واجه قارئ
طلبت منه يقرالهم وبعدها انطيته مبلغ وذممته كل ليلة جمعه يجي يقرا الهم
و گعدت وانا اباوع الاسم ابوي واگله

يابه رجعتلك حقك اي رجعت حقك من اهلك الي ظلموك وظلموني عرفتهم منو جهاد ابن مسلم
جهاد الي شككوا بنسبي الك وانو امي ما اعرف منين جايبتني لكن انت يابابا انت ما انطيت بيه وگلت هذوله جهالي
عرفتهم انو مسلم عده ولد ما ينام عن حقه وصدگني وروحك لو ما السفر چان اخذت كل املاكهم بس انا يابابا مثلك
مو انت تكول انت من تحب تتخبل وانا حبيت واتخبلت
يابابا انت اذا راضي عليه ادعيلي انا بحااجة دعائك ادعيلي الله يوفقني واخذ مروه
يابه نام وارتاح اخذت حقك من اهلك واخذت حقك من امينه الي هي مو امينه ياريتك موجود يمي والله چان
افتحرت ابابنك
يابه ادعيلي وانتي (باعت الاسم اختي ) جنه يابعد اخوج من رحتي وفارگتيني كرهت الدنيا صرت عايش جسد
بدون رووح الى ان شفتها ولكيتها
جنه مروه مثلج تشبهج مثل اخلاقج وخجلج حبيبتي انتي رحتي مظلومه ادعيلي
والله انا احس انتم فرحانيين بس ما اعرف ليش انا ابچي ومقهور

بقيت كاعد وبعدها صار لازم اودعهم واروح صرت ابوس باسمائهم وانا ابچي لان اعرف بعد ما راح اشوفهم
بس انا مجبور صورت قبورهم وحفظتها بالموبايل
ودعتهم وانا اشهگ من البچي ركبت بسيارتي وغلقت جهازي وصار لازم اغيب يومين او اكثر وبعدها
ارجع واتحضر للسفر

///////////////////////////يتبع
غلسوا ع السحگ لان جاي اكتب جمله وبعدها ارتاح
تحياتي
آنيين الليل