بعد فوات الأوان الفصل الثالث وخمسون 53 - بقلم آنين الليل

جهاد
ركبت سيارتي وطلعت الكربلا وصلت بالليل كلش فعلا حسيت بتعب لان انا ما مرتاح هاي شكم يووم
وصلت واخذت غرفه بفندق سبحت وطلعت خابرت ايوب الي اكدت علي ان يحاول باسرع وقت ان اسافر لان
ما بقى عندي تحمل وفعلا الرجل اكدلي انو هو جاي يسعى بالشغله وان شالله ايكملها باسرع وقت ممكن

نمت والفجر طلعت اصلي وازور المرقدين الشريفيين من كملت صلاة اتقربت من شباك الامام الحسين
عليه السلام صرت احجي
يا ابا عبدالله ياسيدي ساعدني محتتاج مساعدتك انا فقير ودكييت بابك واعرف انت ما تقصر
دائما انت وابوك واخوك واگفيين وياي وما قصرتو الحمد لله والشكر هسه انا من طفل ضايع
وحيد فقير الى انسان واگف على رجليه. وتاجر وهذا كله من خير الله وخيركم

ما عرفت شنو اطلب بعدها اتوجهت الى الامام العباس عليه السلام
سلمت علي وطلبت منه ان يساعدني ان امين يقتنع وما يخيب ظنه بيه

تلقائيا بچييت لان امين عزيز عليه ولان هو واهله حسسوني بالامان وانا بنظر نفسي خاين لكن هذا
الامر مو بيدي وانا ما جاي اخالف شرع رب العالمين
صرت ادعي ربي بجاه الامام الحسين واخيه ابا الفضل ان يهدؤون بالي وينطوني السكينه لان انا دائما
بالشده والرخاء ادعي ربي بجاههم عنده ما اعرف بذاك الوكت گلبي صار بارد رغم خجلي من الي سويته
ورغم الخوف من ان ازغر بنظر امين
لكن مضطر لان انا مو بس احب مروه لا انا اخاف عليها يمكن اكثر من اخوانها ورغم ثقتي بيها لكن بقيت خايف عليها

قررت ابقى يومين بكربلا واتواصل ويه علي او ويه ايوب على الرقم الجديد ولو اعرف انا هسه امين جاي يغلي
عليه لان غالق نقالي الصراحه بهاي اليومين خلصتها بالزياره بين الحرمين ومن اتعب اروح للفندق ارتاح شويه
وارجع الى ذلك المكان الي اعتبره جوهره وجوهره غاليه من جواهر الجنه لاتقدر بكل كنوز العالم

بعدها باتفاق ويه علي رجعت الى البصره وصار وصولي للبيت قبل الفجر يعني الكل نايميين دخلت للبيت
وسبحت وانتظرت اذن الفجر وصليت بعدها نمت وگعدت وره الظهر اكلت اي شي وابد ما طلعت وطفيت كل
الاضويه وسرگيت الباب من داخل بعد ان قفلته وانا اسمع دك الباب لكن ما فتحته ثاني يوم اندك الجرس والباب
وصوت امين داخل الگراج وهو يكلي جهاد افتح الباب لا اكسره افتح جهاد

بالبدايه ما جاوبته سمعته يگول// جهاد شكو شصاير يمعود مو راح انجلط افتح جهاد الخاطر الخوه افتح ياخوي
والله اذا ما تفتح راح ابقى اهنا وما اروح الاي مكان

من سمعت هذا الكلام ما جاوبته وفعلا بقى گاعد بالگراج بعدها دگ الباب صدگوني انقهرت علي رحت
فتحت الباب وما انتظرته يدخل دخلت الغرفتي ونمت على وجهي اجه بسرعه دخل وراي وهو يگلي
شبيك جهاد شصاير ليش هيج شبيك ياخوي گلي
ما جاوبته اتقرب مني //جهاد اكعد فهمني شكو شبيك ليش غالق نقالك شصاير
اذا ما تحچي راح ادوخك ابقى اگلك شصاير وشبيك

بقينا ساكتين وهو كاعد ع الكرسي صدگوني عيوني غورگت واريد ابچي على امين وانا اشوفه شلون مقهور
ويريد يعرف شبيه جريت نفس وصرت ادخن وانا حابس دموعي ما يوگعن وامين يباوعلي يريدني احچي
عضيت شفتي وگتله // رفضتني هي واهلها
امين باوعلي متفاجأ //انت شتحچي
هزيت راسي //ايي مثل ما سمعت
ليش انت شبيك

غمضت عيوني وبلعت ريكي //ابوها يكلي رووح بابا شوفلك وحده من ثوبك انت امين انت كلي انا شبيه
جاوبني بعصبيه // يولون الحقراء انت تاج راسهم جهاد الف وحده تتمنى نظره منك دليني عليهم ذوله اولاد
الكلب خلي اعرفهم منو جهاد وشنو من زلم ورا اله اشيلهم من بغداد كلها وداعتك

كلامه وحرگته عليه خلن دموعي ينزلن شهگت هو اتقرب عليه وگلي
افه مو جهاد الي تكسره مره مو جهاد الي يكون بحاجة اصل وعشيره باچر ازفلك اختي زينب بس لا تنقهر

بگلبي اگول انوب كلامه الي موتني اتمالكت نفسي وكتله // لا تاخذ ابالك امين رووح ارتاح
اشارتاح وانت بهاي حالتك
مي خالف امين محتاج ابقى ابحدي

وكف وراح يمشي بعدها رجعلي وكلي // احلفك بروح جنه لا تنقهر والي تريده تاخذه من هالشارب
صدكوني بچييت خجل منه واحچي ويه نفسي
والله ما استاهل كلمه طيبه منك انا ينطبق عليه المثل الي يگول يقتل القتييل ويمشي بجنازته

طلع امين وانا بقيت بين كلام امين وتانيب الضمير وخيال مروه
وثاني يوم هم ما طلعت هو خابرني گلي // جهاد جبتلك فواكه الخاطري اطلع اخذهن خليتهن بالباب
وطلعت لگيته جايب غدا وفواكه وخبز واشوفه يمشي ما دار وجهه عليه دخلتهن واكلت شويه

ثالث يوم طلعت شويه للمحل ورجعت وهو يباوعلي ورابع يوم نفس الشي وخليت العمال همه يبيعون ويتصرفون
وانا ما الي خلك اي شي وفعلا انا ما الي خلك لان يوم بعد يوم يقرب سفري وره تقريبا ثمن تيام شفت امين
ركب السياره وطلع انا رحت للمكتب وسالت العامل الي كلي // خابرو انو زوجته عدها ولاده

انا رجعت اخذت سيارتي وطلعت ورا شفته واگف هو وابوها وامها اجيت سلمت عليهم وانا اكله // شنو امين
باوعلي ورد وهو يتحسر // صار عدها ولاده مبكره ولازم عمليه
- - اي وشنو عمليه عمليه المهم تگوم بالسلامه
رفع راسه للسما // ان شالله

بقينه منتظرين وهو راح يكمل الاجراءات واجه سالم وزوجته بعدها طلعت الممرضه وگالت مبارك ما اجاكم بنيه تخبل
امين //وامها شلونها
الممرضه //الحمد لله زينه
اتقربت من الممرضه وانطيتها فلوس وگتلها //ديري بالج عليهن
-تدلل من عيوني

ونقلو زوجة امين الغرفه هي والبنيه امين فرحان اجيت يمه وحضنته وگلت
-ابني الزغير صار اب مبارك ما اجاك
واجه سالم باركله وكله //شنسميها للنشميه
امين والعبره بصدره // سهام على اسم امي

اجت سماح وهي تضحك وباست امين وسلمت عليه وهي تكله //ها اموني شنسميها
سالم كال //يريدها على اسم المرحومه
سماح نزلن دموعها وحضنته وكالت //الله يقسم الها ايام حلوه وما تتعذب مثل امي ومثل مروه

من سمعت باسم مروه رجف گلبي وانا اشوف امين شلون نزلن دموعه اتقرب سالم وگال
-دي كافي عاد انتو حتى فرحكم بچي
انا طلعت من المستشفى ورجعت للمحل وثاني يوم هم طلعت للمحل وشفت امين اجه الصبح وراح للمستشفى
واشتريت خروف وديته البيت امين السلامة المولوده وامين اجه وكلي // شنو هالزحمه هاي جهاد داز خروف
باوعتله // ليش مو انا عمها وفرحان بيها
—— الله يخليك ويديمك

اشوف امين بعيونه كلام وانا ما حاولت اعرف شبي لان بصراحه اي شي ما صار يهمني وطلعت زوجته
من المستشفى ورحت عليهم بالليل وانا مشتري تراجي للزغيره امين ما قبل ياخذهن وكلي
—-انت مو دزيت خروف وجهزتها ملابس بعد شنو هذن
—- انت شعليك بت اخوي وانا عمها وبكيفي
باوعلي وكال // تدري جهاد احساس الابوه شي چبير يكبرك سنين فوك عمرك
ربتت على چتفه // ان شاالله يصيرون عندك جهال وتبقى خيمتهم
ابتسم // الله يخليك

عرفت امين موصي صادق وعلي وسالم ما يكلولي يوم ال الك او يمته تتزوج وما اعرف رغم امين مبين هو شگد
فرحان بجية بنته لكن اكو شي بي وانا ما حاولت اسأله جابولي البنيه حلوه بستها واتمنيت الها ايام حلوه وعمر طويل

رجعت للبيت وثاني يوم طلعت للشغل الي صرت بس اتواجد بي ما ابيع ولا احاسب لان خلص هذا الشغل
والمحلات راح اخليهن ال امين لان هو اولى واحد بيهن چنت اشوفه يراقبني وما يحچي وياي لان ما يريد
ايغثني وقررت انهي هاي المهزله الي انا عايش بيها خابرت ايوب وطلبت منه يستعجلي بشغلة الهجره هو طمني
وانو باقرب وقت راح يرجعلي خبر

بقيت اكثر من عشر تيام وانا اطلع للمحل كأنما غريب عنه رحت الامين وگعدت بالمكتب هو شافني واجه سلم
عليه وسالته عن الزغيره الي اشوفه فرحان بيها وصار يسترسل بالكلام عنها وعن جمالها ومن تبچي ينقهر عليها
بصراحه ما ردت انغص علي الفرحه
جابولنه چاي صرت اخوط وادخن هو انتبه عليه وكلي
جهاد اشرب چايك وكافي جگاير

صرت ارتشف الچاي باوعتله وحچيت // باچر اسافر البغداد
اتفاجأ من كلامي هز راسه وگلي //شتسوي تروح
جريت نفس لازم اروح اريد ...(سكتت)
شتريد جهاد شتريد تسوي

اتحسرت // امين خليني اروح محتاج ابقى بوحدي الملم نفسي واقرر
تلملم نفسك شنو
ما جاوبته هو رد گلي // جهاد الى متى هيج تحرك بنفسك ( دنك ) العمال ايگلولي انت
ما صرت تنتبه ع الشغل كله صافن جهاد تره انت مو اول واحد ...

رفعت ايدي وقاطعته وانا احرك ايدي واگول // امين انا راح اسافر وانت دير بالك ع الشغل
وگفت وطلعت رحت للبيت والفجر ركبت سيارتي وطلعت وصلت الضحى وخابرت ايوب وجاوبني انو الاكي
بنفس المطعم الساعه تلاثه رحت للفندق وارتاحييت ونزلت اتغديت واجاني ايوب طلبنه گهوه انا سالته

ايوب شصار وياك
هو بابتسامه // اشو حتى استاذ ما گلتها
انا وين وانت وين يمعود فهمني حتى اذا ما تگدر اشوفلي چاره
باوعلي وهو رافع حاجبه //شنو هاي هيچ صار الحچي
-شسوي مضطر الهذا الكلام لان انا بعد ما اگدر ابقى

هو بخباثه //ما تگدر تبقى بعيد عنها
اتنفست وهزيت راسي //ايي هسه عرفت ليش احچي هالشكل
انطيني يومين وانا اضبطلك كل شي
ابو صبر انا كلش قلق وخاف ما تصير طلعتي
وداعتك كل شي يصير ما طول عدك المني (وسوا حركة الفلوس بايده )

بقينه گاعدين وانا استاذنته هو ما قبل اله اتعشى اعتذرت هو باستهزاء گلي
-ابقى اتعشى جهاد على حسابي اقلها ضوگ فلوسي
ضحكت من كلامه وبقيت اكلت شويه واشوفه يتصل وناس هواي يتصلون بي ومن خلال كلامه عرفت بهذا
البلد كل شي يصير بالفلوس

رجعت للفندق وما حبيت اطلع گعدت بالبالكونه وصرت ادخن بعدها نمت وثاني يوم اتصلت بالمحامي وكتله
اريدك وياي من نروح الايوب
وفعلا اتصل ايوب وانا مريت على علي وطلعنه بالسياره وقبل ما نوصل اتصل بيه امين رديت علي هو سالني
شلونك جهاد
اهلا امين
وصلت بالسلامه

جاوبته باستهزاء // شنو چنت نايم
لا ياصاحبي بس اعرف من اتصل بيك تضوج لكن گلبي ما انطاني
انا زين
ويمته ترجع
جريت نفس ونفخت //ويجوز ما ارجع
امين بخوف // شنو شتگول
هيچ لا تاخذ ابالك

——- جهاد لا تتهور والله هسه اجيك انا وصادق واروح اطيح حظها وحظ ابوها
لا امين عليمن الناس ما طلبو اله حقهم فعلا انا لا اهل لا عزوه لا عشيره
ليش هيچ تحچي واحنه وين رحنا
انت على عيني وراسي بس هاي الحقيقه
تره جهاد محد طالع من فطر الگاع انت الي غربت نفسك وبارادتك

- - ايي ياصاحبي وقررت راح ابقى غريب طوول عمري
شنو قررت جهاد لا تخوفني
ما يصير اله الي الله كاتبه
جهاد بروح ابوك واختك لا تتهور
لا اطمن ما راح انتحر

وسديته وانا اشوف شلون علي يهز براسه ويكلي //عفيه عليك هسه تمام مثلت الاحباط ولا اكبر ممثل
باوعتله ورديت //صدگني هذا احساسي مو تمثيل فعلا انا محبط
بس الي يريد شي يعوف شي
گول ايعوف اشياء واشياء عزيزه
علي // معقوله كل هذا حب

اتحسرت وما جاوبته وصلنه يم ايوب وبعد ان طلبنه گهوه سالني
جهاد يمته تريد اتسافر
جاوبته //باسرع وقت
تمام راح اتسافر للاردن ومناك جماعه يضبطولك السفر والاقامه لان اهنا راح تتاخر هواي وانت تگول مستعجل
باوعت العلي //يعني يسوونها
اكيد والف بالميه

علي سأله // عندك ناس مالي ايدك منهم
جدا
تمام
وگف ايوب وگلي // خلص من تتوكل تنطيني خبر وانا امهدلك الامور انت فكر وانا حاضر واكيد حصتي مضمونه
هزيت راسي //اكيد طبعا
راح ايوب بعد ان گلي //لازم اتخذ قرار باسرع وقت ممكن

من راح ايوب سالت علي هو اكدلي //اكيد الامر ما يخلو من المجازفه لكن ما دام فلوسك بالبنك اذن ما كو اي اشكال
شلون يعني
- يعني فلوسك باسمك وهناك راح ينطوك بطاقة ضمان فلا تخاف من شي
-اريدك تسافر وياي
هو باوعلي مستفسر //اقصد للاردن واكيد كل شي بحسابه
- ولو انت عزيز عليه وهم اگلك سفرك للاردن احسن الك
-شلون ؟
——- بلبدايه ما راح اتبين الهم انت راح تهاجر بس انت انسان محبط وضايج وراح تروح اتغير جو
ومن تبقى هناك راح اتبلغهم انو انت قررت اتهاجر
هزيت راسي // ليش اكلك نروح وياي اريدك وياي ياسبحان الله الناس صايره مافيات ما تثق بااحد

——- صدگني جهاد هاي الناس الي تحچي بالمليارات اكيد لو من بخل لو من حرام لكن اشوف ماكو بالمساله بخل
هزيت راسي //اذن المسأله حرام
علي // اكيد وهم اكيد احنا ما راح نغير شي
- على گولتك
- شنو راح تسوي

حكيت خدي // ارجع للبصره واصفي اموري
- ان شالله ومروه
باوعتله هو گلي //اقصد انت ومروه
- بالاول اوصل واشوفها وبعدين اطلبها من اخوها
عين العقل تدري احسدك على صبرك
اتنفست //انا كل حياتي صبر ونگول عسى ان يكون خير

- شبيك جهاد
- تصدك علي شگد مرت بيه شغلات اتصدگني من اگلك خايف.
من شنو خايف
ما گدرت اجاوبه وگفت واتسالمت ويا وگتله //علي يجوز احتاجك تجيني للبصره
هز راسه // ولا يهمك حاضر يمته ما تريدني

رجعت للفندق حتى الصبح ارجع للبصره وحتى احاول اخلي نهايه الوجودي وانا ابين اهلي وبدايه الوجودي
وانا غريب وبعيد عن هواي ناس حبوني وحبيتهم بس مضطر ان افارقهم

//////////////////////////////////////////////////////////////////////

يوسف
هاي الايام يمكن عشت مستقر رغم الحزن والالم الي يعتصرني لان ضيعت زوجتي وابني ولان چنت
اناني وغبي
مرات اعاتب نفسي واحاربها واصير اغلط على نفسي واسب ومرات اكول
لا مروه ما تختلف عن ضحى وازهار بنذالتهن هنه خانني وهي ابتزتني

هواي مرات ياخذني عقلي وتفكيري يكون سئ بمروه وهي بالغربه ودووم اكول
معقوله مروه ما تنجرف هناك لا حسيب ولا رقيب ايي اكيد هسه انجرفت

ويجيني الرد راسأ :: دا كافي جاي تضحك على نفسك مو اختك چانت ابيتك معززه مكرمه ومدللى وكلمتها
ما تصير اثنيين ومخطوبه وهي لاعبه جوله ومخليه راسك بالوحل جاي تتجنى على مروه وهي بايدها دليل تفضحك
وتفضح اختك وابنها يبقى عدها وكرامتها ترجع وفلوس الفصل يرجعن وانت تفصل اهلها عن كل شي لكن هي
لان شريفه ولان تفكر لبعيد وتريد تربي ابنها بعيد عن كل شي يذكرها بالي صار من ظلم واهانه
وغلط اختك وابن عمها راحت للغربه اسكت يوسف وكافي تشمر حچي وتنطي اعذار النفسك

منال ابد ما مقصره وياي انسانه مثقفه وراقيه وتحبني تحاول تحتويني بكل سيئاتي وتنسيني كل
الي مريت بي ومن تشوفني صافن تسوي المستحييل حتى اتعايش وياها

اما امي وضحى فابتعدت عنهم امي تتصل ما اجاوبها وطلبت من سالم ان ما يجيب اي سيره الزواجي يم
امي او ضحى لان انا اريد اشوف الوقت المناسب واعلن زواجي
بسام يجي للدائره وما حاول يسأل على عنواني

بعد ثلاث اشهر من زواجي اجتني منال وبعيونها لمعه وفرحه وهي تگلي
——. يوسف انا حامل

هذا الخبر ما أثر بيه بالعكس هذا الخبر فتح ذكريات عندي لا يمكن انساها لكن احاول اتناساها
اتقربت منها وبستها بگصتها هي حضنتني وكالت
يوسف انا فرحتي الك مو الي لان انت بحاجة الطفل اكثر مني.

اهنا انا اتنفست قوي وجاوبتها :: آن الاوان ان نروح انا وياچ الامي حتى تتعرف عليچ
سالتني // امك لو ضحى ؟
حركت اصابعي //اثنينهن
—— ليش بهالوكت
نفخت ::لان هو هذا انسب وكت منال وانتي تعرفين ليش

هزت راسها وابتسمت وهي تكلي //يوسف هم آن الاوان تنسى وتنتبه النفسك
::اعرف اذيتج وصبرتي وياي
خليت اديها علىرگبتي وحچت بابتسامه // تدري ليش لان احبك ومستعده كل شي اسوي حتى بس تفرح واشوفك سعيد
::كلامچ حلو وتصرفاتچ احلى ترحين وياي وشنو تشوفين او تسمعين ما تديرين بال

—— يوسف انا اروح بس اي كلام وعتب رجاءا مو گدامي
هزيت راسي وجاوبتها ::تدللين
خابرت بسام ::الو بسام
—- هلا يوسف شعجب حلمان
:: لا صاحي اگلك انت بالبيت

—- اي ليش
:: تمام راح اجي انتظرني بره وافتح لي الباب البراني مال الديوان وياي ضيوف
—— هاا هلا بيك منو وياك
:: هسه اجي وتعرف بس ما اريد لا امي ولا ضحى تعرف انا جاي اريد اسويها مفاجأه
—— صار
::: بسام اقصد لا تگول انا جاي افتهمت
——- اي افتهمت

طلبت من منال تبدل ع السريع وانا دخلت اسبح فتحت الماي وصرت احچي ويه نفسي
:: راح تاخذ منال وايدك فارغه من مروه
:: ولك يوسف لو شتسوي ما راح تنسى مروه
:::ضيعتها ضيعتها وامي وضحى السبب ولازم انتقم لان ما اگدر انسى مروه ورغم حب منال الي وتفانيها الراحتي
بس ما تنسيني مروه وابني
:: اي شكو رايح انسى يوسف
:: لازم اروح لازم اخذ حقي من ضحى ومن امي امي الي حرمتني من سحر وعذبتني لان عرفت احب مروه
لازم اروح اريد اتشفى بضحى وافهمها لو تموت ما احبها وامي لو تموت ما اسامحها

سبحت وطلعت لبست ملابسي ورحنا انا ومنال وصلنه شفت بسام واگف بالباب نزلت وفتحت الباب المنال
سلمت على بسام ومنال هم سلمت ودخلنه للديوان بعدها خليت منال وطلعت انا وبسام الي گال
—— يووم يووم تعالي شوفي منو اجه
دخلت للصاله شفت امي تباوع شافتني اتقربت مني باستني بخدي وهي تگلي
—— هلا بيك يمه ليش هيچ ولا چني امك ما تسأل عليه
باوعت وگعدت ع القنفه وسالتها :: وين ضحى

هي ابتسمت وگالت وهي اتاشر على غرفة بسام // اهنا بهاي الغرفه وبسام صعد فووك لان الطبيبه منعتها من الدرج
رووح شوفها واخذ من خاطرها راح تفرح
:: صيحيها انتي
وراحت امي هي طلعت وره دقايق ومبين تعب الحمل عليها شافتني باوعتلي اجت يمي
اشلونك يوسف
:: الحمد لله زين
—— دووم يارب شعجب اتذكرت واجيت
امي باوعت الها يعني اسكتي جاوبتها :: وياي ناس اريد تسلمون عليهن
امي // مني وياك
:: تعالن وانتن تعرفن

فتحت باب الديوان الداخلي دخلت امي وراها ضحى بقن صافنات وانا اشوف منال وگفت امي سالتني
وتاشر باصبعها // مني هاي
—- زوجتي
منال لزمت بالحايط ما حچت وامي اتفاجأت انا استردفت :: زوجتي منال موظفه وياي بالدائره اتزوجنا قبل تلث تشهر
امي //هاا قبل تلث تشهر وهسه جايبها

هزيت راسي :: اي هسه لان ما يصير (باوعت الضحى الي واگفه صافنه ) ما يصير تبقون ما تعرفون
امي // شنعرف وهي هاي شتعرف
:: كل شي تعرف وانا سويت كل الي طلبته ضحى مني طلگت مروه بس اتزوجت منال
امي اتقربت مني وهي تكلي // ولك يوسف انت مخبل عاقل شنو طلكت شنو اتزوجت
:: بكيفچ يووم شتحسبيها احسبيها عاقل مخبل المهم طلگت مروه حسب طلبچ وطلب بت اختج واتزوجت منال
لان حبيتها وحبتني

باوعت المنال وگتلها :: شنو هاي واگفه روحي سلمي على امي وعلى ضحى
منال اتقربت وباست خد امي وراحت الضحى الي دارت وجهها بدون اي كلمه باوعت المنال وگلت
:: ياالله حبيبتي نروح الظاهر احنه ما مرغوب بينه
طلعنه وسط ذهول امي وضحى وحتى بسام ركبت بالسياره وانا اشوف منال ضايجه وصلنه للبيت دخلنه سالتها
:: حبيبتي ليش ضايجه
- -يوسف شنو انا بديله

:: شتقصدين
- - انت تعرف شقصد انت اخذتني بس حتى تقهر امك وضحى يعني كل الي سويته الك انت ما شايفه
:: لا منال ان...قاطعتني
- - شووف يوسف اذا انت ماخذني بس حتى تتشفى بامك وضحى اسمحلي اطلع من حياتك
جاوبتها بنتر :: شنو هالكلام اسكتي منال
هزت رااسها // لا يوسف ما اسكت انا حبيتك وقبلت بكل شي بس مو معناتها انا ولا شي

گعدت ع القنفه هي اتقربت // انت تحب مروه وما تگدر تنساها وانا فشلت انسيك اذن انا ما الي مكان بحياتك
راح اروح الاهلي
لزمتها من ايدها :: وين رايحه اكعذي منال ارجوچ انا ما چذبت عليچ وانتي صاحبة فضل عليه انتي وگفتي وياي
وحاولتي وجاي تحاولين مو هينه عليه زوجتي وابني يرحون من بين اديه اتحمليني منال ارجوج
جرت نفس وگالت //هذا هو يوسف بس ابعدني عن امك وزوجتك

هزيت راسي وحضنتها وانا اگللها ::اسف اسف اعذريني منال
اتصل بسام رديت :: الو ها بسام
انا ضحى رايدتك تجي عندي شغله وياك
:: هسه ما اگدر مشغول باچر ورا الدوام
انتظرك

چان مبين من كلامها متوتره بس تحاول ما تبينه الصبح داومت وبعد ان انتهى الدوام فهمتها المنال
اروح البيت اهلي لان رايديني
هي ضاجت بس ما بينت هذا الشي وصلتها ودارت عليه //راح انتظرك ع الغدا مو تتاخر
::اكلي منال مو زين عليج
-لا انتظرك بعدين مو اكلنه بالداىره

عرفت هاي مناوره حتى ما اتغدا يم اهلي وصلت للبيت ودگيت الباب فتحلي بسام وگلي// شنو مو عندك مفتاح
جاوبته وانا اساله بعيوني ::ضيعته ما اعرف وين
دخلت للصاله شفت امي كاعده ع القنفه وبيدها سبحه وضحى يمها سلمت ::السلام عليكم
امي ردت السلام ضحى باوعتلي وگالت // يوسف
باوعت الها بدون ما اجاوب هي ردت عليه وگالت //يوسف بدون اي مقدمات اريدك اتطلگني

امي اتفاجأت من كلام ضحى // شنو هالحچي اسم الله
هي قاطعت امي بايدها //لا خاله هو هذا الحچي يوسف طلگني
وگفت وجاوبتها :: تدللين ست ضحى انتي تجيبين بالسلامه واطمن ع المولود واطلگج
ضحى // شنو تقصد اجيب بالسلامه وتطمن ع المولود
هزيت راسي :: اي ست ضحى انتي تجيبين وبعدين ترحين الاخوج تطلبين الطلاك بعد ان تخلين الطفل عندي

هي رادت تحچي انا قاطعتها :: انتي مو طلبتي اطلگ مروه وتاخذين الولد اتسجلينه باسمج طلگتها ومن طلعتي
حامل اصلا ما سألتي على شي لذلك مروه اخذت ابني (ودرت على امي ) وهسه هي هم حامل

::شفتي يمه انا چنت اتمنى يصير عندي طفل ومن صار الولد انتي وبت اختج كرهتني بامه وبي
وسبحان الله هسه تلاثتهن حوامل شفتي ابنج الي بالبدايه بت اختج گالت ما يصير عندي جهال وبلعتها
وسكتت بعدين هددتني بان تفضح كل شي اتعرفه عن ازهار بتج (جريت نفس وانا افرك بايدي واگول )

::تدرين لازم من اول ما هددتني المفروض اطلگها تدرن ليش
اشرت باصبعي :: لان انتي وامي شريكات ازهار بالجريمه المفروض اطلگج واوديج الاخوج هو يتباصر
بيج لكن انا غبي وهسه انتي بكل عين وكحه جايه اتگليلي طلگني ليش انتي هسه شنو
امي // شنو هالكلام هذا يوسف

::لا حجيه هو هذا الكلام اسمعي ولچ انا مو بس اكرهج واكره الگاع الي تمشين بيها انتي وهاي (اشرت على امي )
لازم اكتلچن وادفنچن بصف ازهار لان انتن عار مثلها شنو عبالج اغفرلج الي سويتي اغفرلج ضياع ابني وزوجتي
عبالج من حملتي گلبي يصفى عليج (وصلت يمها وباصبعي على راسها )
لا افتهمي لا انتي ولا منال ولا الدنيا كلها تگدر تنسيني مروه

:: مروه الي ضيعتها ولا يمكن ترجع وهسه حابه اطلگج تدللين بس الي ابطنج تتنازلين عنه وباالف سلامه يعجبج
تبقيين يم خالتج وتربين طفلج ابقي مصرفج يوصلج ما يعجبج اطلكج بشروطي واهم شرط تتنازلين عن الطفل
وما تتشوفينه لان اساسا اسجله بااسم منال وما اخليج تلمحينه لمح هذا العندي وغير هالكلام ما كو فكري
وانا حاضر بالي تردينه بت عمي

طلعت بدون ما اسمع الرد وبعد ما مريت ولا سالت بس كل شهر ادز الها مصرف وسالم قلل جياته وحتى اتصالاته
بعد تلث تشهر خابرني بسام - الو يوسف
::هلا بسام خير
-ضحى بالمستشفى عدها ولاده ويريدوك تجي اتوقع ع العمليه
::ياالله جاي

ركبت سيارتي ورحت للمستشفى بعد ان استفسرت من بسام وصلت شفت امي واگفه يمها بنيه شابه
انا رحت وقعت وبقيت واگف اجه بسام يمي سالته
::منو هاي الي يم امي
بسام بخجل //هاي بنيه وياي بالكليه ومن شفت ضحى اتخربطت خابرتها واجت

باوعتله وابتسمت :: تحبها بسام
-هي خوش بنيه وبت عائله
:: المهم تحبها اذا تحبها دير بالك اتفرط بيها ويمته ما تريد اخطبها الك انت بس اشر
ابتسم وكلي// تسلم

بقينا اكثر من ساعه لمن ما طلعت الممرضه وكالت منو ويه ضحى
رحنه كلنه يمها وهي كالت //الحمد لله ع السلامه جابت بنيه
وطلعتها الوحده من الغرف لكن الطفله مو وياها سالت الممرضه ::وينها الطفله

شويه وضعها تعبان جاي ايخلولها اوكسجين بقيت منتظر تقريبا ساعه وجابو الطفله چانت زغيره كلش الدكتوره
اجت و گالت الامي //حاولو ترضعوها من صدر امها واذا ما اخذت صدرها كتبت الكم على حليب
باوعتلي وكالت// انت زوجها
هزيت راسي هي ردت //اتفضل وياي رايدتك
رحت وراها للغرفه دخلت وگعدت هي كالت //هذا اول طفل
انا جاوبتها:: اي دكتوره ليش شبيها الطفله ؟

//////////////////////////////////يتبع