بعد فوات الأوان الفصل الخامس وخمسون 55 - بقلم آنين الليل

مرحبا يا اغلى قراء
هالمره طولت عليكم السببين
الاول كتبت البارت وبدل ما انشره انحذف عندي ورجعت عدته من جديد
والسبب الثاني صرت مجرد ما اكتب سطر اديه ايخدرن راجعت طبيب ومنعني من الكتابه وجاي اخذ جلسات
لان عندي العصب ملتهب فصرت اكتب شويه وارتاح وبعدها ارجع ادعولي بالسلامه 🤲🤲
لذلك اختصرت هواي امور انتو تعرفوها
////////////// /. ///////////.////////

يوسف
بعد ان ولدت ضحى بعمليه قيصريه طلعوها للغرفه هي كانت تقريبا ما منتبهه بعدها اجت الطبيبه وگالت
ضروري ترضع الطفله من صدرها لان هذا مفيد للام والطفل بنفس الوقت وسالتني
انت زوجها
هزيت راسي وهي كالت // اتفضل وياي
انا رحت وراها اشرتلي // اتفضل
گعدت وسالتني // هذا اول طفل
هزيت راسي //اي دكتوره اجتها بعد معاناة

زوجتك چانت تراجع مو
هواي راجعت من چنا بالبصره واهنا همه كل اسبوع
هزت راسها //واضح
دكتوره ممكن اتفهميني
الحقيقه انا طبيبة نسائيه وبمثل حالة مرتك الحمل صعب وصعب جدا
اعرف هذا الشي

لكن هي خطيه هم من حقها يصير عدها طفل
دكتوره شبيها الطفله
هي اتنفست بعمق وكالت // الطفله ما بيها شي مجرد عدها نقص بالاوكسجين شويه وننطيها الكم لكن
لازم تعرف انو الطفله والي انا اشوفه والي اكد علي طبيب الاطفال هي طفله (حكت ذقنها )
اشلون اوصلها الك
شنو دكتوره
الحقيقه البنيه حسب ما شفته عدها متلازمة داون تعرف شنو متلازمة داون
باوعت الها باستغراب :: منغوليه
هزت راسها // وهذا الشي اكيد ايقرره طبيب الاطفال واكيد هذا امر الله

جريت نفس :: لا حول ولا قوة الا باالله العلي العظيم
الطبيبه // انا اتمنى هسه ما تگلون الامها شي لان ظغطها مرتفع ويجوز تنتكس لازم تتقبلون او بالاخص
انو زوجتك من الصعوبه بعد تحمل او خلي نگول شبه المستحييل

هزيت راسي واتنفست :: يصير خير الحمد لله على كل حال
طلعت من يم الطبيبه وانا استغفر ربي وصلت للغرفه وبعدها جابو الطفله انا اخذتها واشوفها چانت ضعيفه
هزيله تعبانه مغمضه عيونها باوعت الها وانا اهز راسي واكول الحمد لله والشكر الحمد لله والشكر

اذنت باذنها وخليتها بالسرير مالتها وطلعت بدون ما احچي اي شي رحت على بسام الي واگف هو والبنيه
من شافني اجاني انا طلعت فلوس وگتله ::...هذني خليهن يمك يجوز تحتاجوهن
بسام // يوسف شكو وين رايح
:: بسام هذني الفلوس تصرف بيهن واي شي تحتاجونه خابرني
اي غير تفهمني شكو

هزيت راسي :: ماكو شي بسام
رحت للبيت ولاگتني منال // الله يساعدك
:: هلا الله يساعدج
- -:ها يوسف اشو مو على بعضك
:: ما بيه شي اريد اروح ارتاح ممكن

هزت راسها وكعدت بالصاله لان تعرف من اكون ضايج احب ابقى ابحدي دخلت للغرفه وسديت الباب كعدت
بالكاع ودنگت واديه على راسي وافكر ::ياترى هذا الي صار شنو
بقى عقلي فارغ وانا بين القهر وبين اشياء اخرى افكار مخربطه بقيت بالغرفه ما طلعت الصبح شفت تفسي نايم
ابملابسي الي اجيت بيهن من المستشفى

اتعجبت من نفسي هلكد نمت ما صحيت اله الساعه بالاربعه ونص طلعت شفت منال نايمه ع القنفه بالصاله
وصلت يمها ندهتها

:: منال منال اكعدي كومي نامي بالغرفه
هي فتحت عيونها سالتها :: ليش نمتي اهنا
ردت وهي تتثاوب - مو اعرف من تريد تبقى ابحدك ما تحب تشوف احد
::اي بس مو معناتها اهنا تنامين تعاي نامي بالغرفه

هي دارت وجهه وبقت نايمه ع القنفه بدون ما ترد عليه عرفتها ماخذه ع خاطرها مني
رجعت للغرفه بقيت للصبح
متمدد ومنال اجت طلعت ملابس وراحت للحمام وسوت الريوك وطلعنه للدوام اثنينه سوا واحنا ساكتين
وصلنه للدائره وانا ما الي خلك الاي شي اتصلت اب بسام وسالته :: اشلونه الطفله
رد عليه //زينه
:: رضعت من امها

لحد هسه ما رضعت والطبيبه گالت اذا ما ترضع ضروري اتجيبولها الحليب الي سجلته
:: خلص جيبه
اي هسه اروح اجيبه يوسف
:: ها
ليش ما تجي تشوف ضحى
:: بسام سد الموضوع بالوقت الحاضر
بكيفك يوسف مثل ما تريد

رجعنا للبيت ومنال ما حاولت تسالني على شي انا بهاي الايام حتى ما طلعت بس عرفت انو ضحى طالعه وره يومين
بعدها باسبوع اتصل عليه بسام جاوبته :: الو
رد عليه صوت امي وهي تكول // يوسف تعال شوف مرتك وبتك
:: ليش شنو صاير
- - ما صاير شي بس اخذنا البنيه للتلقيح والطبيبه گالت راجعو طبيب مختص واليوم رحنه اخذناها
:: اي وشتبين
—— يمه تعال مثل ما هاي اليمك مرتك ضحى هم مرتك
:: جاي تدللين

بدلت ومنال تباوعلي وبعيونها تساؤل گعدت گبال الميز وصرت امشط حسيت بادين من وراي حضنتني
وهي تكلي // شبي حبيبي صافن
لزمت ايدها وجريت نفس وجاوبتها:: ترحين وياي
هزت راسها وابتسمت رديت عليها :: حتى ما سالتيني وين نروح
ابتسمت // وياك وين ما تروح دقايق ابدل واجي

ركبنا بالسياره وصرت اسوق وادخن منال ساكته وصلنه ونزلنه فتحت الباب بالمفتاح ودخلنا للبيت
شفت امي كاعده بالصاله وصلنه يمها منال سلمت ودنكت تبوسها وتگلها
اشلونج خاله
امي باوعت وردت // هلا خاله
انا وگفت يمها سالتها بدون ما اسلم وانا اهز راسي بتساؤل :: وينها
امي بعتب //بالغرفه بس بالاول سلم كول عدي ام

نفخت رحت للغرفه وكفت بالباب وامي لحكتني اما منال بقت گاعده بالصاله دگيت الباب شفت ضحى
متمدده والطفله بالسرير مالتها وصلت يمها بدون ما اسلم ضحى گعدت وشفتها تعبانه وحزينه امي گالت
شكينه بالبنيه نايمه. وما ترضع اله امها تگعدها ورضاعتها قليله عاد راجعنه بيها طبيب وهو
انا قاطعت امي :: گال منغوليه مو
ضحى باوعت مستغربه وامي سالتني //. منو گلك
ورثت جگاره :: ادري بيوم الي صارت الطبيبه گالتلي

هنه اتفاجأن گعدت صرت اسحب بالجكاره وانفخ الدخان بره بعدها گلت وانا اباوع الضحى
:: ها ضحى شفتي شفتي اكو ناس بسرعه تبين حوبتها واكو ناس الله يمتحن صبرهم ومروه منهم اثنينهم
::انتي بالبدايه اتشفيتي بيها كل شي سويتي انتي وخالتج خليتوني ما اشوفها كله ضرب واهانه وكأنها حيوانه
او هي الي كتلت ازهار

جريت نفس ورفعت راسي ليفوك :: اتذكر يوم وهي حامل انا لزمتها كفرت بيها ومن رجعت انگلبت بيه السياره
لان اتجنيت عليها ولان ما شاء الله انتي وامي ما خليتن ستر امغطى عليها على ابو ابن عمها وخاطبها تلث سنين
شنو شلون متحمل ما مسوي وياها شي وهو يمها ليل ونهار

اتقربت يمها وهمست :: وبعدها هددتي لو تاخذين محمد لوتفضحيني عاد سبحان الله هي طلعت تعرف دواهي اكثر
باالف مره من الي انتي تعرفينه هي ما هددت ولا فضحت لا انسحبت بكل هدوء تدرين ليش لان رادت تحافظ
على ابنها وما رادت بيوم واحد يحچي ويا ويگله عمتك چانت هيچ وبسرعه الله طلع حوبتها بينه

صرت اعد على اصابعي :: انا بعيد عن ابني ومستحييل بعد اشوفه واذا شفته هو اكيد ما راح يعرفني او ما
يريد يعرفني

باوعت الامي وصرت احچي بصوت عالي :: تتذكرين يمه تتذكرين لمن توها والده واروح واكتلها تتذكرين
لمن ما فديوم اخذتي ابني بحظنج وبستي ولا كانه ابن ابنج هسه اتخابريني تعال وترديني اوصل البت اختج
وادير بالي عليها وانتي عذبتيني بمروه

وجهت كلامي الضحى :: وانتي هاي الطفله بعد معاناة حصلتي عليها معاناة انا ادري بيها
فااصبري واتحملي مو ردتي اتصيرين ام الابن ما جبتي وتربينه وتصرفين علي
الله خلاج اتصيرين ام الطفل من لحمج ودمج ربيها وديري بالج عليها

ضحى بقهر // هي هم بتك
:: ما ناكرها ولا انكرها بتي لكن هي بمسؤوليتج لان انا هاجرج

امي قاطعتني // شنو هالكلام على كيفك شنو هاجرها
هزيت راسي :: اي هاجرها والكل يعرف فاسمعيني كلش زين اذا ما ترديها عوفيها وانتي ترحين البيت اخوج
وتحلمين اتشوفيها وراح اخلي هاي مرتي الي گدامج اتربيها وانتي اكيد تعرفين شلون مرت الاب تربي الطفل
خصوصا وهي مو بحاجة طفل لان حامل
امي // يوسف هذا شلون حچي شنو انت ما تخاف من الله تحرم ام من بزرها

::: ههههه شوف منو يحچي ويسولف بمخافة الله وانتي وهي ما خفتن من الله لمن ردتن تاخذن ولد من امه وتحرمنها
منه هسه جايه تدورين وياي مخافة الله
:: ليش انتي ما خفتي من الله لمن ما بسببچ انتي وبت اختج انحرمت من ابني ومرتي هسه جاي تگليلي خاف من الله
امي // يمه يوسف الصار صار وهاي البنيه بنتك مثل ما محمد ابنك

جريت نفس وعضيت شفتي :: محمد محمد ما اشوفه لحد ما اموت ولا راح يعرفني والسبب انتي يمه وهاي بت اختج
امي // ما طول هيچ تحبها ليش عفتها واتزوجت
:: اي اتزوجت ومنال تعرف كلش زين انا احبها مو احبها اموت عليها وما راح انساها ولا اسامحچن

طلعت وگعدت على حيلي بالگاع وانا ارجف ودموعي على خدي اجت يمي منال وكالت
- - - گوم يوسف گوم على حيلك مو انت الي توگعك مره
جريت نفس وعضيت على شفتي وحجيت ويه امي الي طلعت وراي وضحى واكفه اباب الغرفه
:: انا هذا العندي يعجبها بت اختج تبقى تربي بتها وكل المصاريف عليه ما يعجبها تتطلك وتعوف البنيه انا اتكفل بيها
اتقربت يم ضحى :: تردين تبقيين على بتچ ابقي ما تردين عوفيها

جاوبتني بعتب // جاي اتعاقبني
:: مو انا ( هزيت راسي ) مو انا
- - بس
:: بلا بس انتي الچ مطلق الحريه

ضحى بحزن // انا ما اعوف بتي
:: خلص ليش دزيتي عليه
امي // انا دزيت اريد اگلك تجي المرتك وبتك وتشوفهن بس ما ادري بيك گلبك صاير صخر
:: انتي وبت اختج خليتنه صخر انا راح اروح اسمعيني ضحى اذا بيوم مديتي ايدچ عليها صدگي يكون اخر
يوم بعمرج ما اكلچ اموتچ لكن احرمچ منها العمر كله
شفت ضحى بچت اتقربت يمها هي گلتلي // حكمك ظالم بيه

هزيت راسي :: لا مو ظالم اتقي الله بهاي البنيه
اشرت المنال ورحنه نمشي بعدين درت وجهي وسالت :: شسميتيها
هي بلعت ريگها وگالت // فرح
هزيت راسي ورجعت على الطفله وبستها ما اعرف ليش رجف گلبي عليها وكابرت حتى ما ابچي حاچيت ضحى
:: اتقي الله بيها

هي باوعتلي وعيونها كلها دموع وكالت // يمكن مروه اتعذبت او احنه عذبناها لكن عذابها ما يجي الحظة ندم هسه
انا جاي اعيشها رووح يوسف عيش حياتك وابدي من جديد وحتى لو تگلي انا اريدچ وانسى كل الي صار انا اكلك
لا ما اريدك تدري ليش لان انت عمرك ما حبيتني ولا راح تحبني رووح يوسف الله وياك ويمكن فرح راح تكون
ثواب وعقاب الي بنفس الوكت

طلعت وسديت الباب بدون ما اباوع وراي وانا اسمع شهگتها طلعت واسمع امي تبچي بصوت مسموع ركبت بالسياره
وياي منال الي بقت ساكته اما انا فاسوق ودموعي ما بطلن ما رحت للبيت اخذت منال وطلعنه الكربلاء واحنه طول الطريق
ساكتين الى ان وصلنه وهناك رحنا نزور الامام الحسين عليه السلام وبعدها زرنا ابو الفضل العباس
من كملنه واتلاگينه انا ومنال گعدنا بالاستراحه ما بين الحرمين واحنه ساكتين منال سالتني

- - اشلونك يوسف
جريت نفس وجاوبتها :: منال اعذريني عن كل الكلام الي گلته
- - ما كلت شي مو صحيح
باوعتلها هي هزت. راسها // ادري يوسف ادري بيك شگد محبط ومقهور على ابنك بس اعرف انت مقهور ومحترك
گلبك على مروه

ماجاوبتها هي استردفت وگالت // لو اي وحده غيري يمكن سوت مشكله او زعلت او طلبت الطلاق لكن انت ضميت
عني شي اتذكر من حچيت وياي طلبت مني ان احتويك اساعدك وانا سويت كل شي اگدر علي يمكن ما نجحت ان انسيك
مروه ومحمد لكن انا لازلت احاول الله كريم
:: تدرين ليش اجينه لهنا

ابتسمت // انزور غير
هزيت راسي :: اي نزور تباعيين القدسيه الي بهذا المكان
ابتسمت // اي والله الواحد ينسى همومه
:: صحيح وبعد اكو شي شفتي الايثار اخ ايضحي باخوته وبعدين يقدم نفسه قبل اخو الي هو من ابو
هزت راسها // اي مستحييل اكو ايثار مثل ايثار ابو الفضل
:: لذلك يامنال انا اامنج على فرح لاتقسين گلب خوانها او اخواتها عليها تره خطيه ( اختنك الكلام بصدري والعبره خنگتني )
منال ابتسمت ودمعتها وگعت وهي تطبطب على چتفي وتگلي

- - - يوسف انا مو سيئه حتى اقسي گلب اولادي اذا صارو على طفله ضعيفه بعدين الله يطول بعمرك ويخليك ويخلي امها
باوعت وابتسمت باستهزاء ::امها امها هي الي حطمتني
- - يوسف تره ضحى خطيه ضحى هسه انسانه مهزومه ومخذوله ضحى يايوسف تحبك ولان تدري بيك
ما تحبها حاولت تسوي كل شي بس حتى تحافظ عليك لكن يمكن سوء حظها يمكن عدم فهم منها صارت
الظروف عكسها
:: سوء حظها ؟

حركت راسها // اي يوسف ياما نساء سوون اكثر بهواي من ضحى. وظلمن وحقدن ولازالن طاغيات
انت ما شفتها شلون مكسور خاطرها على البنيه لاتصير انت والزمن عليها
اتنفست :: يمكن لو حامل بيها قبل شهر ما صار الي صار
منال دنكت وعرفتها ضايجه من كلامي ومن تصرفي واي وحده بمكانها چان سوت اكثر لزمت ايدها وگتلها
::منال المشكله بيه انا ما اگدر انسى مروه جاي اتعذب لان عفتها او ما ...

——- او شنو يوسف
::منال ارجو ان تتحمليني
- - يوسف سبق وكتلك انا راح اتحملك بس اريدك تفهم شي واحد مروه خلص لازم تحذفها من حياتك لان راحت
وما ترجع وحتى لو فرضنا رجعت فاابد لا تفكرانها تسامحك او تقبل ترجع الك
- - يوسف لازم تنتبه النفسك انت مو عايش ابحدك انت عندك مسؤوليات كافي يوسف لازم تفهم مروه راحت
هي وابنك خلص وبعد مستحيل ترجع انساها وعيش الواقع عندك بنت مريضه وعندك زوجه حامل فلازم تفكر بينه
احنه احنه الي موجودين وياك بواقعك ويمك

ما عقبت على كلام منال الي كله صحيح وعرفت انو فعلا مروه ما راح ترجع واذا رجعت ما تتقبلني وانا مو بس
خسرت مروه لا خسرت ابني والي شايلته ابطنها ولازم اتناسى لان مستحيل انساها وهذا هو عذابي
ما اكدر انسى مروه ولا اگدر انسى الي سويته بيها والندم جاي ياكلني لكن الندم اجه متأخر واجه بعد فوات الاوان

رجعت وعشت حياتي بوجهين دائما طيف مروه ما يفاركني ورغم صار عندي من منال اثنين اولاد مو توأم
لا واحد وره الثاني لكن كل هذا الشي ما ريحني
ولا لملم كسرتي على ابني وعلى مروه الي حبيتها ولا يمكن انساها
صرت اروح كل عشر تيام او اسبوعين اروح اشوف فرح اگعد اشيلها والعبها وبعدها اطلع بدون ما احچي ولا كلمه
لا ويه امي ولا ويه ضحى

تقريبا ابتعدت عن الكل اما فلوس الفصل فرحت على ناس شيوخ يعرفون بامور العشائر (فريضه) ومن سمعوا الي صار
واني طلگت الفصليه وانطيتها ابني فصار فلوس الفصل من حقي عن (ردسة البيت ) اي التطاول على حرمة البيت
وصدكوني كل الفلوس مو بعيني لكن انا هم ما ردت افضح نفسي وصرنا متعادلين انا ومروه

هي اتطلكت واخذت ابني وانا سجلت بيت باسمها
واتمنى اشوفها واگللها انا احبها ولا يمكن انساها لكن هذا الشي اجه بعد فوات الاوان

///////////////////////////////////////

جهاد
وصلت العنوان مروه بعد جهد وتعب وسؤال واجراءات وصلت وانا متلهف اشوف مروه مروه الي كانت بالنسبه الي
حلم صعب ومستحييل انوله بيوم من الايام لكن سويت الشي الي لازم اسوي رغم امين يوميه يتصل بيه اذا مو
مرتين او تلاثه باليوم ويسالني وانا اكله بعدني بالاردن اخر شي غيرت الرقم قبل شهر ونص لان بصراحه لازم
اعرف رد مروه فلازم اشوفها بطريقه قانونيه ورحت الى مكتب السفاره بالبلد الي هي بي

استدعوها بعد ان طلبت التقي بيها واجت ما اوصف الكم شعوري من شفتها گدامي

ما اگلكم باوعت البسها او حجابها او حتى مكياجها لا شفتها بين الخوف والارتباك ومن شافتني المفاجأه الي ما
چانت متوقعتها شفتها رجفت وحسيت بيها تعبت ونفسها صار قوي ردت اروح احضنها واطمنها

انو انا لا يمكن اتخلى عنها واجيتها او. وصلت الها بعد معاناة صدگوني بيني وبين نفسي ما متخيل
انو انا واگف گبالها اتمنى احد يضربني حتى اعرف انا بحلم او بعلم

شفتها حامل ومتعبه من الحمل وهي لابسه قميص طويل وعريض وبنطلون وحجاب وبنفس الوقت كانت مستغربه
حالتي چنت انا الخايف والمرتبك طلبت من الموظف ان ينطيني بعض الوكت حتى احچي وياها وفعلا الرجل
طلع بقيت ابمكاني وسالتها //شلونج مروه
بقت فتره حتى استوعبت الي شافته ما جاوبتني رحعت گتلها // مثل ما وعدتج انا اجيت
هي باوعتلي وردت = وليش اجيت
ابقى يمچ
= ليش
ما تعرفين ليش اجي...

وصلت يمي وهي خاله اصبعها على شفايفها وتكلي بخوف = لا تكمل جهاد انا لحد الان بالعده لاتحچي
اتفاجآت من ردة فعلها واصبعها يرجف شفايفها يبسن //انا اآسف على كيفج
بقت ساكته وصارت تجر نفس وهي دايره وجهها عني بعدين دارت عليه وگلتلي
= شتتصور ممكن اوافق عليك انا انهزمت من يوسف وهو ابوهم لان شفت ظلمه الي تريدني اوافق على واحد
ما اعرفه اقبل اتزوجه ويأذي جهالي اطلع من ظلم وادخل نفسي بظلم باديه مستحييل

رغم شفت ذهولها من شافتني لكن من كلامها انذهلت اكثر وانطعنت بگلبي وانا اگول
معقوله هيچ تظن بيه ما رديت عليها اتجهت للباب وقبل ما اوصل درت عليها وجاوبتها

- - - الي عاف كل شي وباع ناسه واهله وخلاهم ورا وعبر نص الكره الارضيه بس حتى يلگاج وصلج حتى
ايأذي جهالج لعد شگد حقير ومنحط الي جاي اياذي اطفال ما الهم لا حول ولا قوه من ردتج ياست مروه لان شفت بيج
نقاء وحنان جنه اختي الي فقدتها وحسبت لگيتها بيچ لكن مع الاسف طلعت غلطان
وجنه يمكن ماكو وحده تشبه طيبتها وحتى عذابها وضيمها

حسيت بالعبره بگلبي الي طعنته مروه طلعت ما ردت اسمع ردها شفت الموظف كاعد بالاستقبال
وكف انا جاوبته // شكرا الك استاذ بالحقيقه ننتظر ان تولد ونسوي الاجراءات
هز. راسه جاوبته // شكرا لتفهمكم

طلعت واستذكر كل شي صار وياي من انا زغير الى ان كبرت وعرفت نفسي انا غبي وفعلا مثل ما گال حجي
عبد جاي اركض ورا سراب والماي يمي
رجعت للسكن مالتي وانا مهزوم بقايا انسان صرت اسأل نفسي //معقوله هاي مروه معقوله هيچ ردة فعلها اتجاهي
- -انا الي صرت خاين بنظر نفسي قبل الناس
- - الي ضحيت بكل شي
- - الي صرت مثل حرامي البيت ياكل ويصبح بايگ
- - هذا جزائي انا الي وعدتها وسويت المستحييل حتى اوصل الها هيچ تجازيني

بقيت گاعد بالارض وخال راسي بين اديه وبين القهر والمرار والخذلان صرت اتنفس قوي ما اعرف شگد مرمن
وقت بعدها جريت نفس ورفعت راسي وكلت
- - لا مروه مو جهاد الي يتنازل عن شي راده مو جهاد

طلعت اتمشى من حصلت على سكن اتعرفت بواحد عراقي ساكن يمي اسمه سامر هذا صار اكثر من عشر سنوات
هو اهنا لذلك تقريبا يعرف كل شي عن المنطقه وطلبت منه ان يعرفني ابابو عبدالله وفعلا وره يومين سوالي
موعد واتعارفنا وبعدها طلبت من ابو عبد الله ان نكعد ابحدنا وسولفتله كل الي صار وانو انا اجيت مو للتجاره
ولا للجنسيه انا اجيت اريد مروه اريد حلم حياتي

ابو عبدالله كان انسان متفهم وعرف انو انا احب مروه گلي
جهاد حبك اسطوري بوقتنا هذا قليل تلگى مثله
بقيت ساكت رجع سألني // جهاد اذا ما حصلت فلوس هم چنت تفكر تجي
جاوبته بدون تفكير // لو اعرف اجي سباحه ما اعوفها
—— زين ليش ما حاولت وهي بالعراق
—- لان چانت على ذمة رجال
ابو عبدالله // تدري جهاد انت كبرت بعيني وانا راح اساعدك وراح اسولف الزوجتي واكيد نلكى حل

وقرر ايساعدني ناهيك عن كلامه عن مروه واعجابه هو وزوجته باخلاقها وانو الغربه ما غيرت بيها شي وانا بيني
وبين نفسي فرحت فصار ايوافيني باخبارها عن طريق زوجته وصرت احاول اشوفها من غير هي ما تحس بيه
وبعد شهر صار موعد ولادتها ومن عرفت خفت عليها وراحت ام عبدالله وياها وانا وزوجها بقينه ننتظر

وهناك ما نعرف شنو صار الى ان طلعت ام عبدالله وبلغتنه بان جابت طبيعي وهي دخلت وياها الغرفة الولاده
جابت ابنيه ورحت شفتها لان اول تلث ساعات ياخذون الطفل بعيد عن امه يجروله فحوصات كامله وشفتها
ما اعرف ليش بچييت واتذكرت اختي جنه

////////////////////////////////

مروه
من دخلت المكتب القنصليه چنت خايفه وعبالي جاي ايسفروني صارت گدام عيني هواي امور صار يوسف گدام
وجهي وامين وصادق وحتى ابوي صرت ارجف وما كدرت اسيطر على نفسي من شفت جهاد
مو بس اتفاجأت لا اتعجبت معقوله هذا شنو مخبل لو عاقل

مرات يمر على بالي من اتذكر الي مريت بي وهو الانسان الوحيد الي وگف وياي وساعدني لكن انا رفضت عرضه
وعلى اثرها هو حضرني من جميع البرامج واتعايشت بواقعي وغربتي وانا مخليه ابالي انو مستحييل اقبل
اجيب زوج ام الاطفالي صرت ارجف وانا اسمع سؤاله

شلونچ مروه
لملمت اعصابي وقررت اقطع كل امل ويا وما اخلي لو بلحظه يفكر انو انا ممكن ان اقبل بي
بصراحه چنت قاسيه ويا وسمعته كلام لازم ما اسمعه اله لكن اتفاجأت من ردة فعله
ما رد عليه طلع وبعدها گلي جمله وحده
انو الي ترك كل شي ورا وباع ناسه وعبر نص الكره الارضيه جاي بس حتى ايأذي جهالج يعني هذا شگد
انسان حقير ومنحط

طلع بدون ان يسمع جوابي وانا بصراحه خجلت من نفسي بقيت واكفه بالغرفه الي سرعان ما دخل الموظف بدون
ان اكلمه طلعت وصرت امشي والوم بنفسي = ليش هيچ حچيت ويا ليش
= مو لو ما هو چان هسه انتي وابنچ شنو مصيركم
= بس هو هم غلطان وهم متهور شيسوي اجه وراي وانا طلبت منه ان ينسى كل شي

= مو هو حضرني هاي اكثر من اربع تشهر شذكره بيه وليش شيريد مني
= مروه معقوله تضحكين على نفسج مو يوميه تتذكرين من ركض وره القارب وگلج مروه انتظريني راح اجي
مو يوميه تتذكرين نظراته واعترافه الج بآخر لحظه قبل ما تسافرين
= مروه جهاد ما يستاهل منج الكلام القاسي وهاي التصرفات الغير مسؤوله

شفت حديقه اتمشيت الها وكعدت ع المصطبه حكيت خدي = اخاف
= من شنو تخافيين
= منه يوسف ابو لمحمد وراد يحرمني منه بس حتى يداري فضيحة اخته
= مروه هذا جهاد مو يوسف
= ولو نفس الشي

= مروه جهاد يحبچ ولا يمكن ايذيچ او اياذي جهالج
= بس انا مرتاحه احسن الي ابقى ما ارتبط
= متأكده

رحت امشي بعدها اخذت تكسي ورجعت للبيت وصلت لاكتني ام عبد الله چانت منتظرتني وهي تكول
- مروه ابو عبد الله كال اذا تتاخرين بعد ساعه انلحگج شكو شصاير
= ما صاير شي رادو يتاكدون من بعض البيانات
- - تمام محتاجه شي
= لا شكرا بس حمودي
- - يم البنات هسه اجيبه

غابت دقايق واجت لازمه محمد وتمشي اخذته منها وانا ابتسم هي گلتلي
- مروه من اتحسين تردين تحچين الشخص مقرب الج راح تلگيني اسمعج لا تضمين بگلبج لان كل مشكله والها حل

هزيت راسي هي راحت وانا اخذت حمودي وفتحتله التلفزيون وانا ما اعرف ما مستقره اتمنيت اسولف
لام عبداالله وبذيج اللحظه اتذكرت ام بشير واتذكرت شگد چانت طيبه وياي رقمها مو عندي حبيت اسمع صوتها
اتصلت بعمتي امل الي من قبل ما اسافر ما خابرتها واكيد ما تعرف بسفري بس اتذكر من اجتني للمستشفى
اخذت رقم ام بشير خابرتها لان حافظه رقمها خابرتها بالبدايه ما جاوبتني ولان رقم دولي كتبت الها مسج

= عمه ردي انا مروه

هي ردت بمجرد ما اتصلت وسالتني بخوف // مروه شنو هذا الرقم الي تتصلين منه
= عمه رقمي هذا اگلج اريد رقم ام بشير
- - غير اتفهميني انتي وين
= عمه انا موجوده بس رايده رقم ام بشير لان بطلو من عدنا
- - فهميني مروه
= بعدين افهمج الله يخليچ محتاجه رقم ام بشير
- زين هسه ارسله الج برساله

وسديته من عمتي الي اعرف راح تتصل على ما تعرف الي صار اتصلت بام بشير وسمعت صوتها وغورگت
عيوني بدموعي وهي اتگلي //الو
جاوبتها //اشلونج خاله
نشغت وگالت //ه هلا خاله مروه اشلونج
= الحمد لله زينه
- - منين حصلتي رقمي
= من عمتي امل
- - بعد روحي اشلونج ياعيني حمودي اشلونه
= انا زينه ومشتاقتلچ

حسست بيها بچت // وانا اكثر شنسوي رجلج باع الحقل واحنه شلنه
= وهسه انتي وين گاعده
- - انا گاعده ويه بشير وسجاد ويانه بالطابق الثاني
= وشنو يشتغل بشير
- - نعمه يبيع ويشتري بالحلال والحمد لله دارجه العيشه وانتي شلونه وياج ال...

= ليش سكتي كملي
- - والله ياخاله لو ما اخاف الخبز والملح ايعثرني چان غلطت علي
= ام بشير انا اتطلگت من يوسف
هي جاوبتني // لا عليچ الله
= اي وداعتج اتطلگت واخذت ابني وهاجرت بس بداعتي ولا چنچ تدرين ابيناتنه
- - هجيتي منه مو
= لا ما هجيت انا وي... هي قاطعتني
- - انا شفتج من طلعتي الفجر وردت الحگج بس سجاد ما خلاني

= يعني تدرين بيه
- - - اي ادري واگول حگج
= ام بشير انا خوش ابنيه بس سويت هالشكل وانهزمت لان يوسف راد ياخذ مني محمد ويسجله باسم
ضحى ويطلگني
- - تحچيين صدك
= اي ام بشير الله ساعدني وكشفته وانتي فضلج كل عمري ما انسا

صارت تبچي // ياخاله يافضل هذا شسويتلج
= مو شفتيني وما حچيتي
- - اي وچنت كل هاي المده وانا خايفه عليچ انوب هو باع الحقل ولا گال انتي شردتي گال انا وام محمد رجعنا للولايه
= لا ام بشير خليته امام الامر الواقع وطلگني
- - وهسه انتي وين
= بدوله اجنبيه والحمد لله عايشه

- - - الله يوفقچ ياخاله الي شفتي واتحملتي ماكو بت مره تتحمله
= الحمد لله
- - ديري بالچ على نفسچ ولو انتي ما يراد اوصيچ اعرفچ سباعيه ومحد يندگ بيچ
= هنا كلمن علي بنفسه والقانون هو السائد
- - - عليچ بالعافيه
= ام بشير مو تگلين البشير ومن تشوفين يوسف ولا چنج تدرين بشي حتى اسالي عليه وگليله سلملي عليها

- - اي ما طول ابو الانا ما حچى انوب بس نگول يحقنا ويكول انتم شردتوها
= اي صدك ياالله خاله انا كل فتره اخابرج مع السلامه
- - - الله يسلمج وديري بالج على نفسج وحبيلي حمودي
= ان شاالله

سديته من ام بشير چنت حابه اسولف الها على جهاد لكن ما گدرت خفت لا يتأول الي صار
وعمتي امل ما بطلت اتصال وانا ما جاوبتها چان كل همي بجهاد وين راح معقوله من سمع ردي رجع للعراق

ثاني يوم اتصلت ابامين وصرت اساله عن صحته وهو يجاوبني بكل برود ويطلب مني ارجع لكن انا ما
اجاوبه واسمعه شلون يحچي وياي بعصبيه ودائما يسالني // انتي شضامه علينه لان عندي احساس
انو يوسف مو هو الي سافر وياچ
رديت علي = لا امين انت متوهم واذا چان يوسف حاچيلك غير هالكلام فهو چذاب

ومثل كل مره اهدأه واطمنه وانو بمجرد ما احصل الجنسيه ارجع لان اخاف من يوسف ياخذ جهالي
بعدها اتصلت بسماح ووالي جاوبتني بنفس البرود وما عرفت منها شي وطلبت منها رقم علي اخوي لان
ما عندي واتصلت بعلي الي جان نفس طبيعته هادئ اتمنيت اسولفله لكن ما اعرف شنو ردة فعله
وطلبت منه يوصلني الزينب وهناك زينب مجرد ما سمعت
صوتي صارت تبچي وتتكلم بفطرتها

- - مروه عفيه ارجعي والله ما اخلي امين يرجعج اليوسف
جاوبتها = اي انا اكيد راح ارجع بس اريدچ تشدين حيلج وتصيرين طبيبه او مهندسه وترفعين راسنا
- - ان شاالله
سالتها = شلون شغل امين وصادق ايساعده
- - اي مروه الحمد لله شغل امين زين وصادق استلم محل جهاد بعد ان سافر

= جهاد سافر يمته وليش
- - ما اعرف بس هو فجأه قرر يسافر ما اعرف يهاجر وعاف محلاته وحتى سيارته الامين ولو
تشوفين امين صفنه تاخذه وصفنه تجيبه ومن نحاچي ايگب بوجهنه
= ليش زنوبه
- - على جهاد ناسيه هو شنو بالنسبه النه كلنه لو ناسيه وگفاته ويانه

عرفت انو جهاد ترك كل شي بس حتى يلحگني بقيت محتاره وحتى خجلانه من نفسي ليش انا هيج اتصرفت ويا
خلال هاي الايام صارت ام عبدالله تزورني دائما ومرات تطلب مني ان نتمشى تكلي زين المشي عليج واطلع وياها
لكن احس بعيون تراقبني انا متأكده منه هو جهاد لكن ما اشوفه بس مجرد احساس

وفد يوم گاعده انا وياها هي سالتني // مروه انتي شنو قصتچ
باوعت الها باستغراب هي هزت راسها // اريد اعرف انتي ليش اجيتي لهنا ليش ما رجعتي الاهلج

بيومها چنت ضايجه ومقهوره وما اعرف السبب چنت بحاجه انو احچي واريد احد يسمعني حچييت الها كل
شي من اول ما جمال حاول يتحرش بيه الى ان وصلت لهنا
بعدها سولفت الها على استدعاء السفاره الي ما اعرف ليش وعلى وجود جهاد وردة فعلي اتجاهه
هي باوعتلي وگالت // شتتصورين ليش جهاد سووا هذا الشي
رفعت اچتافاتي بمعنى ما اعرف ام عبد الله ابتسمت وگالت

- - لامروه انتي تعرفين وتعرفين كلش زين جهاد يحبج وما يريد يضيعج من ايده
رديت = بس انا ما احبه
- - يجوز لكن مو هذا السبب
جريت نفس وجاوبتها // اخاف اخاف يقسى على جهالي وبعدين اتندم
ضحكت وردت // هههههه تحچيين صدك الي سووا كل هذا الشي على مودج عرض حياته للخطر
وباع العنده والماعنده ولحگج تخافين يقسى على جهالج وخلي نفرض قسى على جهالج افتهمي مروه انتي
مو بالعراق انتي اهنا واهنا القانون هو السائد لا عشائر ولا واسطات

باوعتلها هي ابتسمت // يعني باللحظه الي تشوفينه قسى ولو انا اشك بجهاد يسوي شي تگدرين تشتكين علي
ويسجنونه وانتي تتطلگين وجهالج عندج افتهمي مروه جهالج بس يبلغون ما راح يبقون يمج واذا بقو انتي
بحاجه الرجل يساعدج بتربيتهم وانتي يامروه كلش زين تعرفين انو الي سوا جهاد اكبر واحد ما يسوي
الي سووا على مودج لان يحبج ويحبج بدون ما ينتظر منج شي

=شلون يعني ؟
- - يعني جهاد حتى لو ما اتزوجتو راح يبقى يحبج لان بصراحه حبه نقي

ما اعرف من كلامها حسيت بيها تعرف جهاد لكن منين تعرفه وهو وين هسه رجعنا وصرنا يوميه نطلع نتمشى
وعندي احساس انو جهاد يشوفني لكن مجرد ما ادور وجهي كل شي ما اشوف واضوج وسرعان ما اساءل نفسي
انتي مو رفضتي شكو تضوجين من ما تشوفينه

فد يوم طلعنا كالعاده ويانه محمد وصرنا نمشي وبعدها اتعشينه بره ورجعنا تقريبا الساعه بالعشره بالليل حسيت
باالم فظيع گمت ما گدرت امشي اتصلت باام عبدالله الي اجتني تركض وخابرت الاسعاف وهي راحت وياي

والطلق حمى عليه وصلت للمستشفى كان كل ظني انو اولد بعمليه لكن همه ما قبلوا ودخلت وياي ام عبدالله
واطباء وطبيبات وهمه يساعدوني ان اولد بعد ان انطوني ابره ولدت بنيه نزلت مني وجابوها خلوها قريب الوجهي
صرت ابوسها اجتني الممرضه واخذتها مني واتقربت مني ام عبدالله وباستني بخدي وانا دموعي يجرن وهي تگلي

- - - لا تبچيين الحمد لله على سلامتج جبتي بنيه تستاهل كل التعب الي مريتي بي
رغم ادري بيها ابنيه بس ما اعرف ليش اخذوها سالت ام عيد الله الي جاوبتني
— همه هيج كل ما يصير طفل ياخذونه يسووله تحاليل وفحوصات هسه ساعتين تلاثه ويجيبوها الج

وفعلا ساعتين وجابوها وام عبد الله سالتني شنسميها
جاوبتها بلا تردد = جنه

///////////////////////////////////

جهاد
من صار عد مروه الطلق خابرني ابو عبدالله وانا اجيت بسياره تكسي ورحت ويه ابو عبدالله للمستشفى
چنت خايف عليها ومرتبك صرت واكف وانا عيوني ع الباب الي دخلت منه والي منعونه نوصله بعدها بساعه
اجت ام عبد الله وهي لابسه ملابس خاصه
اجت وهي تضحك وگالت // جابت ابنيه
ورحنه انشوفها بعد ان ابو عبد الله وضح للطبيب عن صلة القرابه الي تربطني بالطفله

شفتها سبحان الخالق حلوه تشبه امها بعدها طلعنه وخابرت ام عبدالله زوجها وصار يحچي
وياها ويضحك بعدين گلي// سمتها جنه
ما اتمالكت نفسي صرت ابچي وانا اتذكر اختي الي كل شي ما شافت ولا فرحت ولا اتهنت
ابو عبدالله حاچاني // انا اسف جهاد ما اعرف هلگد راح تتاثر
جريت نفس // ولا يهمك
رجعنا وصلني للسكن ومن نزلت كلي// لازم تفكر بالخطوه الثانيه وتاخذ قرار

هزيت راسي ودخلت للسكن وهناك رجعت كل ذكريات حياتي الي عشتها وساءلت نفسي ليش هلكد متمسك بمروه
ما لگيت اجابه وصرت فعلا لازم اتحرك للخطوه القادمه
ثاني يوم طلعت مروه من المستشفى چنت اتمنى اكون بقربها واساعدها لكن مو كل شي البشر يتمناه يحصله
رغم جرحي الچبير وخيبة الامل الي عشتها والصدمه من تصرف مروه لكن انا اتعايشت ويه وضعي
لان لازم اعيش بعد ان استثمرت قسم من الفلوس بمشروع سوبر ماركت بسيط والقسم الاخر خليته بالبنك
وطبعا اول ما وصلت سجلت معهد لتعليم اللغه هذا شي الكل لازم ايسوي

وبديت بترتيب حياتي بهذا البلد الي اكثر شي حبيته بسفري النظام الي بهاي البلاد والي يفرض نفسه على الكل
والي يخليك غصبن ما عليك تتقبل الوضع اشوف اكثر العراقيين هناك يمتازون بالهدوء بكلامهم وبتصرفاتهم
صرت التقي باابو عبدالله وعرفت منه بان مروه رجعت للعمل بعد اسبوع من الولاده والطفله ومحمد بالحضانه

لذلك قررت ابلش بآخر خطوه ويه مروه وبعدها رحت الى السجل المدني بالمنطقه الي موجوده بيها
واستدعوها وحضرت
هناك التقت بمحاميه ولان تعرف تتكلم الانگليزيه بطلاقه اتكلمت وياها وبعدها طلعت ودخلت انا شفتها گاعده
على كرسي انا گعدت مقابيلها من شافتني دنگت وكان ردها

=انت ما تعبت
هزيت راسي // لا ليش اتعب
= وكل هذا الي سويته على مودي
- - ردت افهمج انا احبج واطفالج احبهم مرتين لان همه اطفال ما الهم لا حول ولا قوه ولان همه قطعه منج فااحبهم

= تكوم تسجل هذا المبلغ بااسمي
هزيت راسي // اي ولو تردين اسجل كل شي املكه حتى تعرفين انو الامر بايدج ويمته ما تحبين اتركيني
= معقوله هلگد اتحبني
- - واكثر مما تتصورين بس انا غبي وضيعتج وهسه لو اعرف اموت ما اضيعج
= واهلي

باوعتلها وسالتها // يعني انتي موافقه
= افرض موافقه
- - اهلج عليه صدگيني مروه انتي ومحمد وجنه بوسط گلبي وبين عيوني

هي ما جاوبت وطلعنه لكن هي ما قبلت نعقد القران اله بموافقة امين وصادق وفعلا خابرت امين وفهمته انا استقريت
بهاي الدوله وهو اتفاجأ وگلي نفس الدوله الي بيها مروه
بعدها سالته باي منطقه هي ولازم اروح واطمن عليها
وهوانطاني اسم المنطقه بصراحه وانا اساله احتقرت نفسي واتمنيت اصارحه بكل شي لكن ما ردت اخسر امين
بعدها بشهر خابرته وانا خايف من هاي الخطوه

- - الو
امين // هلا جهاد اشلونك
- - الحمد لله انت اشلونك
- - والله ياجهاد تعبان
- - خيرك امين
- - ابوي
- - شبي بعده عدل ما مات

اتحسر // رجع
— ! رجع
—- اي ابحده
- - شلون
- - مرت جمال اخذت فلوسه وطلبت الطلاك

- - وهسه
— هسه رجع بالملابس الي علي اتصور اجرة تذكرة الطياره مداينها من واحد اجه ويا وانا دفعتها اله
— الهلدرجه
- - اي والناس من سمعت هوه راجع اجو هدو علينه يردون فلوسهم
- - وانت شسويت
- - ما اعرف محتار

جاوبته // شنو ما تعرف انت مو تشتغل محلاتي مو يشتغلن مو عندي دين عد الناس
- - اي شنو يعني
- - يعني لو تبيع البيت مالتي لو تجمع الفلوس الي بذمة الناس وتسد دينك
- - - وانت شنو ذنبك
- - ليش نسيت انا اخوك

- - ونعم الاخ بس الي تسوي هواي
- - لا مو هواي
- - المشكله الولد صادق وعلي ما يردونه يگعد ويانه بالبيت
- - خلص خلي يگعد ابيتي امين مهما يصير يبقى ابوك خلي يگعد ابيتي وانت انطي مصرف وانا باقرب فرصه
ادزلك مبلغ
- - لا يمعود عندي خير

- - الله يزيد ويبارك ومثل ما گتلك سد الناس ما اريدهم يوميه يجون ويفشلونك تره اسمك يهتز بالسوك
- - ادري لذلك اخذت منهم مهله
- - اي امين اجمع الدين وسد بي واذا ما كفت الفلوس بيع واحد من المحلات
- - لا تكفي ان شالله

جريت نفس // امين
- - كول جهاد
- - عندي موضوع بس ما اريدك تفهمني غلط
- - خيير جهاد
- - كل الخير تعرف انا اهنا غريب واختك الله يحفظها موجوده

- - شبيها مروه تدري الهسه ما كايل الابوي عليها ولا حتى العمامي بس هي مخابره عمتي امل تدري ابوي من
يسمع شيسوي راح يگلب الدنيا وياخذها حجه علينه وشيخلصني من طلايبه هو وصادق
اتشجعت وحاچيته // امين انا اريد اكلك اذا تقبل اتزوج اختك
- - مروه ؟
- - اي امين مروه

بقى ساكت وحمحم // احم شنو انت فاتحتها
- - لا لا امين شنو فاتحتها بس تعرفني انا اريدها بالاصول لذلك
اريد اسمع ردك حتى انت تخابرها واذا موافقه حتى نتوكل على الله ونتزوج

امين // شعجب جهاد مو گلت انت بعد ما تفكر بالزواج
- - - الغربه امين الغربه تخلي الواحد يفكر بهواي امور
- - هاا
— امين اذا ما موافق بكيفك اعتبرني ما حچيت ولا فتحت موضوع بس انت قبل شويه گلت ابوك
اذا يسمع يگلب الدنيا بس اذا يعرف هي اتزوجت وسافرت ما يحچي وسبحان الله سفرتي وصولي الهذا البلد من دون
كل البلدان وتطلع مروه موجوده اهنا اكيد بي صالح النه كلنه وارجع واگلك اذا ما موافق انسى ولا كانه سمعت مني شي

- - ان شالله انطيني مهله افكر واشاور صادق بالموضوع وهم اخذ رايها
- - اي ليش لا فيمان الله
- - الله وياك

وبمجرد ما نهيت المكالمه هو خابر مروه واخذ رايها وهيه وافقت وما اوصف الكم حالي الى ان خابرني امين وگلي موافقه
وانو هو وصادق موافقين صدكو كنت اتمنى انام اباب الشقه مالتها اخاف عليها او اخاف تضيع مني
وراها باايام تم العقد كان ابالي اسويلها حفل زفاف لكن هي ما قبلت واخذتها واتعشينه ورجعنا البيتها

بهاي اللحظه صليت ركعتين حمد وشكر وبجيت لان كل هذا الي صار وياي كانو حلم
بقيت كاعد بالصاله وهي كاعده يمي لازم ايدها ما اريد افاركها اباوع الها عبالك اول مره اشوفها وبصراحه ما اعرف
شسوي مو اجهل باامور الزواج لا اكو اشياء ثمينه ما نريد حتى انغمض خاف تفوتنا لحظه

بادلتها مشاعر احتياج وحب واحلام وعمر
خلي اكلكم شي بااول ايام زواجنا ما كنت انام بس اباوع الها كاانما اول مره اشوفها وحتى واحنه كاعدين سوا
ولحد هذا اليوم وهي گاعده يمي وعايشه وياي ما مصدك نفسي
معقوله مروه بعد كل هذا العذاب صارت من نصيبي تدرون انا رجع عمري عشرين سنه وانا اشوف
مروه بضحكتها وبخجلها ومحمد وجنه ويانه وابد ما افرق بينهم وبين الطفل الي جاي بالطريق

مروه مو بس زوجتي مروه حبيبتي وابنيتي مروه كلشي الي بالحياة روحي وانا عايش من اجلها
وحتى هي اتبينت اتحبني واتحبني هواي
عاهدتها ما اسمعها بيوم كلمه تزعلها وهي ابد ما تزعلني
احمد الله واشكره استقريت زوجه واطفال وعمل وابد ما عفت امين ويا لحظه بلحظه

وما اخفيكم انا لحد هاي اللحظه خجلان منه واحس بي هو يعرف بيه انا هاجرت الخاطر مروه
وفعلا انا مستعد انطي عمري الخاطرها

لان بمقدار الظلم الي عانيته انا واختي والي عانته مروه من وره تصرف حقير واحمق من ابن عمها
اهواي عانن مثل مروه واكثر

واكو امهات يشبهن امي وبنات يشبهن جنه بحاجة حنان لكن بسبب انانية الام او الاب ممكن ان يضيعن
اتمنى تكون هاي القصه نالت رضاكم او وصلت الكم عبره
البنت مفتاح الجنه الاهلها فلا يظلموها
احيانا الدلال الزايد ظلم للبنيه
واحيانا تدخل الاقارب والعادات والتقاليد يشكل اكبر ظلم

يمكن مروه عدها شويه حظ وذكاء ساعدها ان تتخطى ماساتها لكن صدگوني موجوده الالاف من النساء في بلادي
لا هنه فصليات ولاهنه جاهلات لكن ايعانن من ظلم الاهل
اتمنى من كل اب وام ان يرجعو الى الله بتربية اولادهم وبناتهم لان ابشع شي بهاي الحياة هو انانية الاباء
يارب السعاده للكل
واسفه اطلت عليكم هالمره وشكرا لان اتحملتوني 🥰

انتظروني بقصه جديده اسمها (عقارب ذوي القربى ) وهاي بصراحه مآساة موجوده في مجتمعنا مع الاسف 😱😱
تحياتي الكم يارب صحه وسلامه وستر 🤲🤲
احبكم 😘😘
آنيين الليل #