بعد فوات الأوان الفصل الرابع وخمسون 54 - بقلم آنين الليل

جهاد
وصلت للبصره تقريبا الساعه بالتسعه الصبح ما ردت اروح للبيت ولا للمحل بقيت افتر بالسياره الى ان صار
الدنيا الظهر
اتغديت وطلبت چاي ونارگيله تقريبا الساعه ثنتين رجعت للبيت سبحت وصليت ونمت ما گعدت اله الساعه
بالتسعه بالليل صليت وشربت گهوه واكلت فواكه وبقيت للفجر صليت ورجعت نمت تقريبا الساعه
بالعشره وربع الصبح گعدت سبحت وبدلت وركبت سيارتي طلعت ما مريت للمحل رحت اتريگت
وبعدها خابرت چم واحد اطلبهم فلوس بضاعه واعدوني ايسددوني رحت عليهم وحصلت من بعضهم والبعض
الاخر طلب مهله

انا انطيتهم اسبوع للتسديد وقسم اخذت منهم وصل امانه باسم امين مو بااسمي وفهمتهم انو انا بعت المحلات
والبضاعه الامين وهو ما اعرف شلون يتصرف وياهم بالنسبه للدين لذلك همه گلولي باسرع وقت راح يسدوني

وطلعت منهم رحت اتغديت وبعدها قررت اروح البيت حجي عبد حتى اشوفه خصوصا وهو كبر وما صار يطلع
للشغل مثل قبل والحقيقه چنت بحاجه الواحد مثله اسمع منه وينصحني
حجي عبد الي عمري ما راح انسا ولا انسى فضله عليه

وصلت يم بيتهم الي ياما جابني اله وگعدني بين اولاده اكلت وشربت اتحسرت ودگيت الباب طلعلي
ولد يجي عمره عشر سنوات سالته

عمو الحجي موجود
اي جدو موجود بس نايم
مي خالف روح گعده گله جهاد جاي ايشوفك
بس هو نايم
مي خالف روح كله جهاد جاي يشوفك

راح الولد وشويه واجه ابن الحجي شافني سلمت علي كتله //ابو امجد جاي اريد اشوف الحجي
- هلا بيك جهاد بس والله نايم تعرف هو تعبان
هزيت راسي // الله يشافي بس اريد اشوفه واسلم علي لان وراي سفر واريد اتبارى ويا الذمه
هو اتفاجئ // سفر وين ؟

جريت نفس وگتله // الارض الله الواسعه بلا زحمه ابو امجد بلكي اشوفه للحجي
- اتفضل جهاد بيتك

ودخلني للديوانيه وراح بقيت گاعد وانا اباوع الصورة الحجي بقيت گاعد وانا اتذكر من اجيت وهو شافني
وشلون طمني وشغلني ويا اجه الحجي وهو يمشي على عكازه ومبين علي الكبر والتعب لاگيته لزمته من ايده
وگعدته هو باوعلي وحاجاني بعتب //شعجب اتذكرتني
- حقك تعتب حجي بس والله ما ناسيك لكن مشاغل الدنيا

هز راسه // هم صحيح اشلونك بابا
-الحمد لله
باوع الابنه //جيبو غدا الجهاد
- لا حجي الحمد لله متغدي وشارب چاي بس اجيت اشوفك
- روحو جيبولنه چاي

راح ابنه سالته //اشلونك حجي
- الحمد لله بس العمر اله حوبه
- عمرك طويل والله ما يخلينه منك
-انت شلونك
-على الله

باوعلي // - شبيك بابا
- ما بيه شي
-شنو تضم عليه صدك انا كبرت ومو مثل گبل بس اعرفك من تضوج من تنهم ناسي انا الي مربيك
هزيت راسي //لا حجي ما ناسي
- گلي بابا شكو شصاير وياك
بقيت مدنك رجع گلي // طلع جگاره ودخن وسولفلي

طلعت جگاره وگتله / / انا جاي اسلم عليك واريدك تبريني الذمه
- عليكم السلام وانت مبري الذمه انا ما شفت منك اله كل خير بس فهمني شكو
غمضت عيوني واتنفست //حجي اريد اسافر
هو عكف حواجبه // تسافر لو تشيل
ضحكت //وشنو الفرق

ضرب العصا بالارض // - تسافر يعني تهج بعد محد يشوفك وتشيل يعني تغير مكانك
- حجي راح اسافر
- تحچي صدك وتعوف كل شي
هزيت راسي // اي حجي بعد ما الي مكان اهنا
- ليش بابا ؟

- اريد انتبه الحياتي
-تروح فد نوب ؟
- اذا الله كاتبلي ارجع ارجع
- الله كريم( جر نفس ) رووح بابا رووح وشوف نفسك بس ما گتلي ليش
ابتسمت بحزن // يمكن احصل السراب الي بقيت كل عمري اركض ورا

اتفاجأ من كلامي وما عقب اتقربت يمه گتله //حجي شاهد الله عليه لو ابوي موجود يمكن ما سووا الي سويته الي
مستحييل انسى فضلك عليه علمتني وراقبتني حتى ما انجرف واخذت بايدي وعلمتني صنعه وسويتني ابن سووك
انت قليل امثالك الله يحفظك وينطيك الصحه والعافيه
الحجي اتنفس وگال // ما سويت شي انت خوش ولد وتستاهل كل خير

بسته براسه // - كثر الله خيرك وجزاك الله الف خير واريدك تبريني الذمه
هو دك بالعكازه ع الگاع // مبري الذمه ما مسويلي شي بالعكس انت الي اريدك تبريني الذمه يمكن يوم زمخت
عليك لو صرت عصبي لو عاقبتك لو غثيتك بس والله كله المصلحتك لان انت من اجيت انا شفت بعيونك زلمه
سبع مو جاهل ارعن

اتقربت يمه واخذت ايده بستها هو كلي // چنت اتمنى تحضر اجنازتي وتغسلني ويه ولدي بس ما طوول رايح
حتى تنتبه النفسك والله فرحت الك ولو يعز عليه فراگك
ما صبرت نزلن دموعي وهو حضني وگلي //دير بالك على نفسك وانا موصي ولدي ومذممهم اي شي تحتاجه تجيهم
بسته براسه //ما قصرت حجي مو انت گلت زلمه وسبع وهذا الزلمه الگدامك راح البيت جده واخذ حصة ابو من ورث
جده واخذ حق ابو من امه
باوعلي بتساؤل وانا هزيت راسي هو گلي بفرح //عفيه عليك عفيه

وسولفت اله شلون رحت واخذت حق ابوي سالني //. الي معجبني شلون تفارك امين واخوته
- - هو هذا الشي الي كاسر ظهري بس مضطر
باوعلي واعرف نظرته يعني كاشفني هز راسه وگلي // رووح بابا يمكن تحصل الماي الي يرويك تعبت
وانت تركض ورا السراب رووح الله يفتحها بوجهك

وبعدها حضنته وبسته بخده وبايده وبراسه وسلمت على ابنه وهو دعالي بالتوفيق
ورجعت من بيت حجي عبد للبيت ما مريت بالمحل وامين ابد ما اتصل بقيت بالبيت ما طلعت اله ثاني يووم
رحت للمحل والضحى رحت يم امين سلمت علي وگعدت بالمكتب هو چان يمه زبون من خلص منه واتفقو
اجه يمي گلي // الله بالخير
الله بالخير
امين صاح على العامل // جيب چاي
شفته يحچي ابرود جابو الچاي ردت اكسر الجمود //شلونها سها م

هز راسه وكال // زينه الحمد لله
الحمد لله
حكيت گصتي هو سالني // امس وين رحت
رحت على جماعه الي اطلبهم فلوس
ها وحصلت فلوس لو گلولك انطينه مهله
قسم حصلت وقسم طلبو مهله شكم يووم

وانت شسويت
بشنو
بروحتك البغداد
انا اريد اسالك قبلها ليش ما اتصلت بيه
لان ادري اضايقك
من هيچ حتى من اجيت ما اتصلت
عرفتك تعبان گلت ترتاح

هزيت راسي ودخنت جگاره ثانيه هو سالني// ما گتلي شسويت
هواي اشياء كملتها وخلص
بيها الخير وشقررت
قررت اسافر بعد ما الي گعده اهنا

امين من سمع عبالك چان نايم وانشمر علي سطل ماي بااارد وگف وگلي وهو متوتر //شنو جهاد
مثل ما سمعت بعد ما الي مكان بالعراق
تحچي صدك
هزيت راسي بدون ما اجاوب
وليش كل هذا جهاد تره مو عجبه حبيت والله ما قسملك
لا امين لا تفهم الموضوع غلط انا حتى نفسي كرهتها

جهاد شنو هالحچي كل شي قسمه نسيت من خطبت بت خالي ورفضوني لان ما عندي شهاده تصير ياخي لا تتعجب
دخنت ونفخت الدخان //. اعرف تصير بس انا من رفضوني حسيت بنفسي زغير
امين وگف على حيله //وداعتك جهاد انت چبير غصبن ع اليرضى والما يرضى وسالفة السفر عوفها
هزيت راسي // ما اكدر امين صعبه اهل البنيه من رفضوني فتحو عيوني على اشياء چانت غايبه عني وفتحولي
جروح هواي

- يمعود جهاد اترك كل شي وانسى وعيش حياتك
- ما اكدر امين احس بنفسي انسان ناقص
- هاي شنو منك جهاد لا تحچي هالشكل گلتها واگولها من باچر ازفلك اختي زينب اذا چان هذا الشي يرضيك تره
انت احسن الناس تتمنى تناسبك والما يعرفك ما يثمنك
- مشكور امين بس زينب ما اشوفها اله مثل اختي الزغيره
- جاي اگلك انت اي واحد يتشرف ايناسبك

- بس انا اريد ...(وسكتت )
- جهاد شتريد
- امين انا بعمري ما حبيت ولا احب بس هاي البنيه لكن مع الاسف هي خذلتني
وگفت وهزيت راسي وگتله //اخوك ياامين اخوك انخذل وانذبح
امين حرك ايده // انت شتحچي انا اروح واخذ عمامي واخطبها وشگد يردون اشمرهن بوجههم
- لا بعد ما يفيد ياصاحبي انا الي ما اريد كل الاريده اشرد منا اطلع اروح
- واحنه جهاد احنه نهون عليك

لزمت چتفه وگتله // لا ما تهون بس بعد ما اگدر اذا ابقى اموت
- لا اسم الله عليك بس فكر فكر بينه احنه اهلك وناسك
- كل حي مصيره للفراق وهاي حال الدنيا
ربت على چتفي // مي خالف هم فكر ما يمنع شي
جريت نفس // ما اچذب عليك قررت اسافر وبعد ما ارجع وبهالايام السفر

طلعت من يم امين وانا مثقل بالحزن والقهر وصلت للمحل ودخلت للمكتب گعدت ومديت رجلي على الكرسي
الثاني وگلت //مجرد ما امين قبل ينطيني زينب يعني من اوصل لهناك الامر يصير هين عليه

بقيت اراجع السجلات والبيع والشرا والدين الورا الظهر اجه العامل وجابلي غدا گلي امين دزا الك
عرفت انو امين ماخذ بخاطره ومقهور اتغديت وشربت چاي واجاني زبون دائما يتعامل وياي بالجمله
وطلب بضاعه وچيكناها انا ويا بعدها اتفقنا على السعر وانو يدفع النص والباقي بعد التصريف واخذت وصل امانه
باسم امين وفهمتها يجيب الفلوس اله العصر گعدت اراجع الدفاتر ورن موبايلي شفته ايوب الي گلي

اتحضر للسفر بعد اسبوع ولازم من هسه افيز للسفر وراح ايلاگيني هناك باحد الفنادق وخصم عمولته وياي
انا بين الفرح وبين الحزن ارتبكت اخذت نفس يمكن خايف من الخطوه الي راح اخطيها ويمكن هاي اخر امل اليه
وبعد ما فات الاوان للتراجع گعدت ع الكرسي وجريت نفس وكلت

-لا ولك جهاد شنو تريد تتراجع عن السفر والي صار والي سويته
-الي سويته اخذت حقي وما ضريت احد
-انت اذا ما تسافر راح تضر نفسك وتعيش طوول عمرك متندم
-خايف مو
-اي خايف افقد كل شي
-واذا ما تسافر راح تفقد نفسك قرر جهاد

غمضت واتنفست //راح اسافر مو حجي عبد گلي سافر راح تلگى الماي الي تركض ورا طوول عمرك
اي راح اسافر وما اتراجع

ثاني يوم الصبح طلعت للجوازات ومناك رحت فيزت والسفر عن طريق مطار بغداد يصادف يوم اربعاء
من رجعت رحت للبيت ما مريت بالمحل اتصلت علي المحامي.
الو هلا علي
هلا بيك جهاد خيير
عگب باچر رايدك تجي
خير شكو

كل الخير بس عگب باچر ضروري
ان شاالله تدلل
صدگ علي باچر روح فيز على يوم الاربعاء نسافر
تحچي صدك
اي علي ايوب خابرني وگال كملت كل شي وراح ايلاگينه هناك
هذا هو اعتبره صار

ثاني يوم طلعت للمحل وچيكت على البضاعه الي بي بقيت للعصر طلعت ركبت سيارتي ورحت افتر وصرت
افتر بشوارع البصره وكل شويه انزل واصور بالموبايل يمكن جاي اودع سنين عمري ويمكن اتشكر كل شارع
ومنطقه مريت بيهن رحت للورشه القديمه وگفت يمها ومر بيه شريط الذكريات عبالك امس شلون من اجيت خايف
وارجف وانا اقرا رايدين عامل للمحل وشافني الحجي وهو بعده بحيله

سالني وين بيتنا وابن منو ومن بچيت وسولفتله انو انا يتيم وما عندي احد شغلني وصرت ابات اهنا ومن عرف
قصتي وطمني انو امي ما ميته ومن اجه امين ومن شفته وهو خايف ويبچي ومن شفت مروه اااخ منج مروه
صدگي لو اعرف هيچ انتي قويه چان ما خليتچ تتزوجين يوسف لو ادري انطي عمري اااخ منچ شسويتي بيه
وما اعرف بعد شراح تسوين

كل شي مر بسرعه رحت اتعشيت لان معدتي فارغه ورجعت للبيت فايت وكت بس حتى ما اشوف امين
وصلت للبيت وحاولت انام لان اريد بس الصبح يطلع كعدت الفجر صليت وغليت ماي سويت چاي شربت
وبعدها بدلت وطلعت للمحل وانا گاعد مترقب جية علي الي تقريبا الساعه بالتسعه وصل لان طالع الفجر
وصيتله على ريوك هو ماقبل گلي متريك بالطريق وصيت على چاي بعد ان جابو سديت المكتب سألته
فيزت

اي على يوم الاربعاء مثل ما گتلي
تمام
ها جهاد اني اجيت خيير صاير شي
كل الخيير بس رايدك بشغله
شنو
اريدك تنقل ملكية المحلات والمخزن باسم امين

انت شتحچي ليش
لان اريد اسافر
اي وتسافر خليهن باسمك
هزيت راسي // لا ما اريد ابقي شي باسمي اريد كل شي يصير باسم امين

هو استعدل بگعدته // اسمعني جهاد انت تسوي وكاله عامه باسم امين اله حق البيع والشرا بس هنه باسمك
يمته ما تريد تسحب الوكاله
- وليش كل هذا
- شوف جهاد انت امنتني على روحك من انطيتني سرك وثقت بيه ولازم اكون گد هاي الثقه لذلك انا انصحك الدنيا
طويله وانت رايح المكان مجهول يجوز تقرر ترجع
هزيت راسي // لا علي انا ما ارجع انا مسافر نهائي ما افكر برجعه
- مي خالف نگول فرضا فبالوقت الحاضر اسوي وكاله ومن تستقر هناك انا اسوي مبايعه ويصير كل شي باسم امين

سالته // انت تشوف هالشكل صحيح
هز راسه // اي صحيح خصوصا البني ادم كل شويه بحال
- هذا هو ياالله امشينه نكمل الاوراق لان انا اسافر وياك البغداد
ماشي ياالله
ورحنه انا وعلي الامين الي من شاف علي وگف واتصافح ويا رغم ما يعرفه گعدنا امين گال
الله بالخير
ردينا الله بالخير

طلب چايات وبعدها انا عرفت امين على علي المحامي امين رحب بي وبعيونه تساؤل علي گله
- - - اخ امين انا بالحقيقه صديق جهاد يعني اعرفه من زمان وهو هواي مسولفلي عنك ويعتبر نفسه اخوك الچبير
وشاهد الله يمكن جهاد لو عنده اخ ما راح يحبه بگد ما يحبك
امين رد // والله استاذ حتى انا اعتبر جهاد اخوي الچبير شنو اخوي اخونه ملنه انا وصادق وعلي والبنات ويمون علينه
بكل شي
علي // اي والله سولفلي - لذلك ما اعرف هو كلك جاي ايصفي اموره ويريد ايسافر

امين باوعلي بعتب وهو يگول// يسافر الله ويا بس ماكو داعي يجيب محامي ابيناتنا استاذ هاي احچيها گدامك
والله وانت شاهد وهسه لو تريد اصيح للعمال هذا جهاد شيريد ياخذ ولو يريد كل شي هم ياخذه لان جهاد
هو ابو الشغل وهو الي ياما وگف وياي واول ما بديت اشتغل راس المال منه وهواي هواي جهاد صرف
استاذ شيريد ياخذ بدون لامحامي ولا محكمه بس البيت الي كاعدين بي ما انطي لا هذا من شغلي
ومن ورث امي الله يرحمها والباقي كل شي الجهاد

بهاي اللحظه فعلا امين ذبحني وانا اشوف بعيونه دموع لان ما يريدني اسافر ولان عباله جايب المحامي حتى نتفاصل
الشركه الي بيناتنا
المحامي گال // اخ امين انا سويت مكاتبه بناءا على طلب جهاد بان كل شي يملكه جهاد راح
تكون انت المسؤول عنه
امين ما استوعب الي سمعه من المحامي بقى صافن والمحامي گله
- يعني الي اقصده جهاد سووالك وكاله عامه عن جميع ممتلكاته

امين باوع متفاجأ جاوب المحامي وهو يباوعلي // استاذ انت شتگول
- - هذا الي سمعته جهاد سوالك وكاله عامه الك حق التصرف بكل ما يملك تبيع تشتري بكيفك
اجه يمي وكلي // ليش جهاد ليش سويت هالشكل
جريت نفس وصرت اخذ شهيق وزفير جاوبته // لان ما الگى احد بامانتك انت امين واسمك عليك واذا باچر
ارجع والبيبان كلها مسدوده بوجهي اكيد انت راح تفتحلي بابك
امين باستعطاف //. انت شتحجي سافرلك شهرين تلاثه وارجع بعد وين رايح وناقل كل شي تملكه الي

المحامي // حتى لو امين يجوز من يروح ايعجبه يبقى عاد بدل ما يبيع املاكه هوه كانما امامنهن عندم

باوعلي // بس هذا هواي الي تسوي الي
هزيت راسي // لا مو هواي انت اخوي وصادق وعلي اخوتي اشتغل بالمحلات انت والولد واذا ما يعجبك
بيعهن اجرهن الك مطلق الحريه
امين // وليش كل هذا انت ابقى اهنا ويانه احنه اهلك وناسك والي تريده بس اشر علي وانا اسوي وانا الممنون
باوعتله // لاتكلي ابقى امين انا قررت واتوكلت وخلص

المحامي وگف على حيله //وهسه ياجماعه لازم نروح للمحكمه شغلة ساعه اجراء بسيط
امين ما قبل بس علي قنعه وكله // امشي امين رووح ويانه وخلي الوكاله تره جهاد باچر مسافر خليهن عندك
امانه يجوز يرجع لاتصير انت والوكت ضده

ورحنه انا وامين بعدها عزمتهم ع الغدا وبيومها ما رجعنا للمحلات بقينه انا وامين وعلي گاعدين ونسولف
وامين يتوسلي ما اسافر لكن هو ما يعرف انو انا مسافر حتى الگى نفسي الي ضيعتها
رجعنا انا وعلي للبيت بعد ان امين كال امشو باتو يمي بس علي ما قبل وانا گتله اريد احضر ملابسي
وفعلا حضرت ملابسي واخذت اوراقي الثبوتيه وجوازي بذيج الليله ما نمت وانا استذكر كل شي مر بيه ويه مروه

الصبح الساعه بثمانيه اندك الجرس واجه واحد من العمال جايب صينيه بيها گيمر وبيض وقوري چاي وخبز وگال
امين دزا ريوك
خابرته فتح الخط انا گتله يجي يتريك بس هو ما جاوبني عرفته هو مقهور وما مستوعب سفري اتريگنا
وبعدها غسلنه وطلعت انا وعلي عرفت امين بالبيت لان سالت العامل رحنا دگيت الباب طلع علي سلمت
وسالته وهو فتح باب الديوان بعدها اجاني امين وصادق وعلي سلمو على المحامي صادق كلي
—— شنو جهاد صدك الي سمعته تريد تسافر

هزيت راسي وانا اباوع الامين لام اديناته ومدنك طلعت من جيبي مفاتيح وخليتهن گدامه هو باوعلي
شنو ذن
مفاتيح البيت والسياره والمحلات
خليهن عندك لو شوف واحد غيري
علي // ما يشوف اي احد خلص الوكاله باسمك
وانا ما اريد
جاوبته // امين لا تقهرني خليني اسافر وانا شويه مرتاح

هو جاوبني والعبره بصدره اتذكرت امين الزغير// اي انت تسافر وترتاح وانا اهنا اشبع قهر عليك
ابتسمت // لا امين ليش القهر اتمنالي التوفيق

حاجاني بقهر //الله يوفقك بس انت ناسي انا هاي اكثر من خمسطعش سنه يوميه الصبح انا وياك عشت اكثر
عمري وياك اروح بس سواد الليل بالبيت ومرات نبات بالورشه اكلنه وشربنا حر الصيف وبرد الشتا شگد شفنا
ناس ومرت علينه مآسي
( اهنا امين بچى ) ولمن كبرنا وجمال سوا الي سووا محد وگف وياي بس انت انت الي تعبت
ورحت واجيت وانطيت من جييك انت الي عاركت على مودي وعلمتني وكبرتني وسويتني رجال هسه تتخلى عني

حضنته وجاوبته // انت رجال وما ينخاف عليك انت من شفتك لمن اجيت للورشه وانت سبع واخو اخيتك ما اتخلى
عنك بس انا اريد الگى نفسي اريد اسافر وانسى كل شي سامحني امين والله مو بايدي اكو شي اقوى مني
انا هم ما اتحملت صرت ابچي اجه صادق وگال // صدك اتچذبون كافي امين اول وتالي جهاد يرجع ما تعرفه
مثل السمج بس يطلع من الماي يموت
امين سالني //يمته السفر

الاربعاء بس اليوم اروح اضبط اموري
باوعلي بعتب // ها يعني انت مقرر ومكمل كل شي وكت السفر ياالله كلت
هزيت راسي // اي لان اعرف انت ما تقبل وراح تسوي المستحييل حتى ما تخليني اسافر
—— وليش كل هذا ليش مو احنه اهلك مو انا اخوك الي ما اخلفلك كلمه

هزيت راسي // وراح تبقى اخوي بس انا الي احس بروحي ضايع واريد الگى نفسي
امين // الله يوفقك
ويوفقك وتملون البيت جهال يسموني عمو
- وين راح ايشوفونك

- اقلها من اموت يقرولي الفاتحه ( حچيتها بعبره ودموعي وگعن )
هزيت راسي وحضنته وهو حضني وكلي // الله وياك ويمته ما ترجع گلوبنا گبل بيوتنا مفتوحه الك
باوعتله // امين بس اريد اامنك امانه
- گوول

—— الله عليك من تروح تزور خالتي بالنجف مر على ابوي وعلى جنه
-بدون ما توصي
—— وكل شهر ثوب الهم انت مخول تنطي بثوابهم
-ان شالله
وصلت يم صادق// ياالله شد حيلك واتزوج ودير بالك على اخوانك
هز راسه رغم مقهور بس يبتسم // ان شالله

- وانت علي ادرس وحصل شهاده وارفع راس امين
هز راسه ما رد عليه بعدين گتلهم// تره امين تعب عليكم واتحمل اهواي والهسه يستاهل تديرون بالكم علي
وتسمعون كلامه

طلعت وانا ما اباوع وراي وامين لازم بايدي الى ان ركبت بالسياره انا وعلي امين حاچاني // راح اتصل بيك مو ما تشيله
ابتسمت // اتصل براحتك وانا بس اوصل اتصل عليك
ان شاالله ترجع باقرب وقت

سلمت وطلعنه انا وعلي البغداد وبهاي اليومين گضيتها اتصالات ويه ايوب وطلعت زرت الامام الكاظم عليه السلام
واشتريت ملابس وعلي اخذني على ناس عدهم مكاتب سفر وهواي اتعلمت منهم يوم الثلاثاء بالليل اتصل بيه امين سالني
- يمته تسافر ؟
باچر الساعه بالوحده الظهر الطياره
- الله وياك دير بالك وخابرني

الصبح الساعه بالسبعه گعدت واخذت حمام واتاكدت من اوراقي وجنطة ملابسي شربت كوب جاي واكلت شويه
صمونه بس حتى ادخن وبقيت منتظر علي الي گلي البارحه اجيب تكسي ونروح الساعه بثمانيه وثلث اتصل عليه
علي وكلي هو واكف اباب الفندق منتظرني نزلت وانطيت المفتاح وحاسبتهم طلعت شفت علي واگف ويا امين
استغربت وانا اشوف امين ايباوعلي ويلملم بحلگه اتقربت منه سالته // شجابك ؟
رد عليه وهو مداري دمعته // اشلون تسافر وما اكون بوداعك

- انت ما تصيرلك چاره شتسوي اجيت
علي // خابرني البارحه وگلي انا ابغداد وانطيته عنواني
اخذت منه السويچ وهو ركب بالصدر صرت اسوق وعيوني مغوشات وامين صار يحچي
- - ليش جهاد ليش هنه عليك نسيت ايامنا والله انت مو غريب انت اخوي الي ربيتني عبالي تغير رايك وتكول
خطيه امين ما اقهره ما عرفت هلگد گلبك قاسي عاد مو الخاطري الخاطر امي بكبرها مو وصتك عليه

ركنت السياره او وگفت باوعتله / / امين اتمنالي التوفيق صحيح انا راح امسافر بس مو عبالك انساكم لا وداعتك
انت اخوي وصادق وعلاوي ما انساكم بس هيج اريح الي انا كبرت وتعبت وآن الاوان ارتاح وانت امين اليوم
عندك زوجتك وبنتك وباجر يصيرون عندك ولد وبنات وتلتهي بيهم وصادق وعلاوي اكيد كل واحد يلتهي ابيته
وشغله ومشاكل الدنيا لذلك ياخوي اتمنالي التوفيق وادعيلي امين ادعيلي الله يريح بالي

امين // والله ادعيلك انت مو بس صاحبي لا انت ابوي الي رباني وتعب عليه بس الله عليك من تصيرلك رجعه ارجع
هزيت راسي // ان شالله
علي // ياجماعه ياالله لو نمشي لو نرجع راح نتاخر
امين بترجي // علوا ترجعون
جريت نفس وجاوبته // الله كريم

وصلنه للمطار وهناك اتوادعنه انا وامين ما اوصفلكم وداعنه عبالك اب مفارك ابنه هو گلي الله وياك محروس
حضنته وجاوبته // ارجوك ابريني الذمه
نزل على ايدي يريد ايبوسها وانا سحبتها منه وگتله // استغفر الله والله ما استاهل كل هذا الي تسوي
امين // لا انت الي تستاهل انت اخوي واكثر من اخوي فضلك ما راح انسا

- الفضل ال الله وما اريدك تزعل مني
علي // ياالله جهاد لازم نروح
- بس اوصل اخابرك ومن ترجع دير بالك امين مو تخليني مشغول عليك سوق على كيفك وانتبه
هز راسه وحضني وانا دخلت وبقيت التفت اله واشوفه واكف رفعت ايدي وانا اكله// فيمان الله ياخوي

بصراحه بجيت وصارت حياتي الماضيه كتاب مر عليه بلحظه. ما اعرف اوصفلكم حالتي لان فعلا ما تنوصف
جريت نفس وگعدت بصالة الانتظار وبعدها كملنه الاجراءات وركبت الطياره انا وعلي وصلنه عمان بساعتين
وهناك خابرت ايوب من تلفون ارضي وانطانه اسم الفندق وگال راح ايوافينه هناك
اخذنا غرفتين الي والعلي بعدها اكلنه وبالليل اجو جماعه عرفنا عليهم ايوب همه الي ايسهلولي السفر

واتفقنا على مبلغ معين من راحو سالت علي // مو سفري اصولي ذوله شنو وجودهم بالموضوع
علي // ذوله تگدر تگول دلالين يعني سماسره يسهلون سفرك خلال هالشهر شهر ونص بالميت اما اذا تبقى
ع الاجراءات والظوابط فتاخذ سنه او اكثر
- يعني تشوف شغلتهم اصوليه
- اي اصوليه وما يتركوك الى ان تركب الطياره
- دام هالشكل مي خالف

بقينه انا وعلي اكثر من اسبوع ويوميه اتصل اب امين وهو يسالني عن احوالي وانا اطمنه
وهو يتوسلي ارجع
علي سوالي بطاقة ائتمان وهواي امور وبعد عشر تيام من وصولنه العمان حان وكت سفري
وهناك سلمت على علي وعلى ايوب وكلمن اخذ حقه بصراحه علي رفض يتقاضى مني اي مبلغ وگلي
كسبت صديق واخ
لكن انا ما قبلت وامنته دائما يتصل اب امين ويدير باله وانا مجرد ما اوصل راح اخابره
اما ايوب فتشكرت منه لان هواي ساعدني ولو هو هذا شغله لكن الرجل ساعدني

وركبت الطياره وبعد ساعات طويله وصلت للبلد الي اخذت مني روحي والي اجيت حتى اعيدها الجسدي
الي هو بالاساس خاوي
هاي الروح الي هامت بحبها والخاطرها تركت هواي امور تركت اسم وصيت واعزاز يمكن لو ادور الدنيا
ما الگى مثلهم
وصلت وهناك لازم ابدي مشوار ثاني لتاكيد وجودي ولتامين اموالي

صدكوني كل هاي الامور مو مهمه اريدها بسرعه تنتهي حتى اروح اشوفها اخذت مني المعامله ما يقارب الشهر
وانا اتصالي بعلي
اما امين فما اتصلت بي وما بلغته انا هاجرت ردت بس اوصل واشوف ردة فعلها وبعدها اخبر امين

ما اگللگم مقدار الخوف وانا راكب بالسياره اريد بس اوصل واشوفها هي نفسها لو اتبدلت اطباعها واخلاقها
من بقت ابحدها هم جرفتها المدنيه ونستها عاداتنا وتقاليدنا واهم من كل هذا دينه
صرت اسابق الزمن اريد اشوف ردة فعلها شنو

وصلت للمنطقه الي هي بيها ورحت حتى اشوفها ومن شافتني اتفاجأت بيه صرت احس نفسها قوي وخايفه وما
مصدگه عيونها وانا اگللها
شلونچ مروه
////////////////////////////يتبع
البارت القادم هو الاخير ان شاء الله محتاجه دعمكم