تحميل رواية «بدلة عرس» PDF

قصة #بدلة_عرس الجزء الاول

للكاتبة لينه سعد ......

التكملة بالتعليقات

بعد ماطلعو النسوان ...

وراحت امي الي التفتت الية  والدمعه بعيونه

نزلت راسي ....كانما اكول الهة

كافي ميفيد بعد اي شي ....لتحاولين تحجين

......

ضليت كاعدة منتظرة الموت يجيني صفنت

على المراية ...

كمت من الجرباية واني شايلة هاي البدلة الثكيلة ...الي جانت مو بدلة جان جف

رحت اريد اشوف نفسي بدلة العرس

اريد اشوف هاي البدلة الي جنت احلم..... بيوم البسة

اريد  اقنع نفسي ....بان هاي حياتي

بس جنت متاكدة مراح اكدر

اتقربت وشفت نفسي .....اشكد حلوة

مكياجي والتسريحة

والبدلة الي محد يكدر يشترية الا الاغنياء

جان ملمسة مثل الحرير والي يدخل بتصميمة الدانتيل

ضليت اتلمس بية .....وغمضت عيني ....

وجنت اتخيلة هو زوجي

وبلحظة........انفتح الباب وسمعت الهوسة .....

التفتت شفت ملامحة

شفت عيونه الي امركزة علية .

شفت هذاك الوجة .......الي مامتقبلتة بحياتي

..............

راح نبدي من البداية واوضحلكم شنو قصتي

وي بدلة العرس

اني اسمي سابين طالبة بالخامس اعدادي

دائما اتخيل نفسي مميزة عن غيري

ودائما اسمع هذا الكلام من امي

يجوز لان اني وحيدتة ....

هذا التميز خلاني ..اشعر بالغرور

خلاني مايعجبني اي احد احجي وياه

مو اي احد اهتملة

بس شخص واحد..هو الي غير حياتي ...

سواهة .....

مرة مثل البستان الي متروس ورد

ومرة مثل الصحراء ...مابية قطرة مي

حبي الة غير هواي صفات ونظف داخلي ...

خلاني احس بكل الناس واترك الانانية

........

سابين ....حتى اسمي مميز ...

جنت اتفاخر بي بابا الي سماه الية ...

ابصراحه مااعرف ليش ...

كل مااريد اعرف يغير الموضوع

....ههههه لحد ماشكيت بالحب ...المهم

اني وحيدة لامي القصد بس بنت ...وياي اخوة ٣ اني الوسطانية

اخوتي الكبار اموت عليهم

اما اخوية الصغير اكرة لان بس يتعارك

ومرات يتشاقه عود.دمة خفيفي ...

وهو لو يسكت هواي افضل

.......

كعدت من النوم واني اركض مثل العادة علمود البس بسرعه واروح للمدرسة

اني صف خامس اعدادي

_هاااا سابين ....بعدج ولج دوامج راح يفوت عليج

_اي ماما .....البس واني مستعجلة

وامي ماتسكت اتضل اتنق على راسي

..لبست ونزلت ركض وبلكوة كمشت الدرج جان وكعت على وجي بس الله ستر

طبعا حجابي بايدي ....افتر بي اخذت لفة واني اركض وجنطتي وحجابي بايدي طلعت من الباب والجو بارد ...

قبل لا اطلع مستحيل ماادخل للحديقة ومارس طقوسي

وكفت كبال الحديقة واخذت نفس عميق ودخلت اباوع على الوردات الي زارعتهم ..

شميت عطرهن ......ياربي اشكد طيبة ريحتهم

شنو هذا الجمال ..

سبحانك ربي ماابدعت وصورت

بست الوردة وطلعت واني البس حجابي بالطريق الف بي .....

فتحت الباب واني مستعجلة اريد الحك واني كاعد الف شالي الي نصة على عيوني اطلع من الباب وانظرب بشي

عدلت حجابي واشوف واحد كدامي لابس مناظر سودة

اني بصراحة شهكت .....لان فزين شي متوقعت اشوف احد كدام باب بيته

زين وشبي هيج لازك يم الباب

طبعا محجيت شي

هو راد يحجي بس عفتة وطلعت

استحيت احجي شي

المهم ....

ظليت امشي وكلت خلي اشوف منو هذا

التفتت بس مشفتة بالباب بس سيارته موجودة كدام بابنة

يجوز صديق اخوية ..

المهم كملت طريقي .....

وصلت للمدرسة واخيرا وية دكة الجرس ....

دخلت للصف ولكيت صديقاتي ...

وطبعا اعز صديقة الية هي زينه

جانت تفهمني بدون مااحجي واني هم كولش احبة لان طيبة

وخدومة ومضحية لخاطر العشرة والصداقه استمرت صداقتنه ٣سنوات

بس احس بية اعرفه من زمان

والاهم من هذا كلة

هي اخت ثائر.....

اي ثائر .....هو احلى شي اتمنى احصل علية

الشي الي اتمنى يحس بية

هو مثل النسمة

ثائر ...كولش حلو ماكو وحدة اتشوفه ماتخلي عينه علية

هو ثالث مرحلة هندسة

عائلتة ....منفتحة ..حيل ناس ماعدهم عيب وميجوز  بس يعرفون الاصول

عكس اهلي الي كلشي لا ....عيب وحرام وخنكة وحبس

جنت  اشوف زينه اشلون يتعاملون وياهه

منطيهة حريته وكلشي مباح عدهة بس باصول

بس رغم هذا هي كلش ملتزمه بحجابة ...واسلوبة الراقي والتواضع الي عدهة  

مع العلم لو همة اهلي اني

يمكن اتصرف براحتي اكثر

....اني اتعلقت بثائر ....من يوم الي اجة ياخذ زينه من المدرسة  ...

صح جنة بنات هواي واكفين بس اني الوحيدة الي مشال عينة من علية

من هذاك اليوم واني ضليت احوس على زينه اريد اعرف هم حجة شي

هم كال هاي صديقنج شنو اسمه

جان الفضول كاتلني ....

لحد ما هي من وحدة كالت

_تدرين سابين اخوية اتعجب باسمج ...

...اني من سمعت اخوهة واسمي

يمكن معت ....

_هاااا ....ياهو اخوج ....

طبعا سويت نفسي مااعرف شي واني لو بودي اخنكة صايرلي خمس ايام افتر علية وهسة يالة حجت الغمه

_لج اخوية ...من اجة اخذني كال هاي البنية الي واكفه يمج منو

_خاف مو علية يقصد

_لا هو عليج ..البيضة

ماكو وحدة بيضة ...مثل بياضج .....وغمزت الية

....طبعا اني طرت من الفرحة ....

اني هواي يمدحون بية وبجمالي ...

بس هسة يالة حبيت نفسي اكثر ...

اوووف ياربي

معقولة يسوية الحظ ....ويخطبي

طلعت من المدرسة واني اضحك واسولف

جنت اتمنى اشوفه

اتمنى يجي اليوم على زينه

....بس شنو الي راح اسوية

مااكدر ابادلة اي شي  غير بس اباوع علية  ...ويجوز حتى مااسويهه مااكدر استحي

صح عندي جرئة بهواي شغلات بس بهاي لا ...

طلعنة طبعا طريقهة يختلف عن طريقي

افترقنه .....وراحت واني كملت مشيتي

وقبل لا ادخل الفرع طلعت السيارة الي شفتة اليوم الصبح

وجان هو نفس الولد ... كاعد يسوق بس بدة يركز  عليةة

اني مهتميت غيرت نظري عنه

وبديت اكمل طريقي

...بس متعجبة لحد هذا الوكت هو يم اهلي ..

شنو شكاعد يسوي

دخلت للبيت .....

شفت ماما كاعد تغسل المواعين

_هااا ماما اشوو متغدين من وكت

_اي والله صديق اخوج اليوم اتغدة

.....

_هاااا من هذاك الوكت لحد هسة يالة طلع

....التفتت الية ماما

_ولج اشمدريج

_غير اني فتحت الباب ولكيتة بكصتي اليوم الصبح .هههههه

_وتالي

_اشبيج يمة ....قابل شصار عفتة ورحت

_ولج ماصحتيلنه ليش

خليتي الولد واكف

_اوووي هو اني متاخرة ...بية حيل ادخل

....عفتة ودخلت ابدل

.............

مرت ايام واسابيع ....واني على وضعي

لحد مافد يوم كالت زينةة باجر اخوية راح ياخذني واني الفرحة مشالتني من الكاع

رجعت للببيت واني هايمة ...

شنو راح البس ..ياحجاب ....مع العلم ممنوع حجاب ملون

بس ردت فدشي يميزني

شي يخلية ميشيل عينة مني

شي يخلي يفكر بية مثل مااني افكر بي

رحت احظر نفسي بليل واني اتخيل اشلون راح اباوع علية واذا هو راح يباوع

اشلون ارد الة النظرة

كاعدة ادرس ....كانما

اوووف شيجيب باجر يربي ....مكدرت انام من الفرحة جنت مصممه اخذ ثائر ....

لان يستحق الوحدة اتعب نفسة علية علمود تاخذة ....

كلشي بي مميز عائلة ..تربية تعليم وجمال

كعدت كالعادة متاخرة من النوم

بس مااكوللكم اشسويت .....

كلة ركض امشي والجنطة تسحل وراية ...

مثل وحدة امطشرة ججهالة وكاعد اتلمهم

_يربي اشبية ماكعدت من وكت اواووووف

كالعادة لبست شالي وافتح الباب

والكة سيارة طبكت يم بيتنة نفس اللون نيلي مارسدس

صفنت بس ممهتمة اريد الحك لان راح يدك الجرس

ولابسه كعب عالي

جنت مستعدة اترزل واتعاقب لخاطر ثائر 

...

شفت نزل ولد من السيارة  نفسة ...

وكانما يريد يسال او يطلب شي

بس اني درت وجي وعبرتة وضليت امشي بسرعه ...

بس مااحس الا اني طايرة ليفووك .....ومركوعه بالكاع

وكعت بس مو وكعة ...لا كانما مشمورة من فوك العمارة

ظليت على وكعتي مااكدر اتحرك

الشارع قاسي كلة حجار ...جانت وكعة مااتمناهة لعدوي

صعبة حييل مااحس الا واحد يمي ويكول

_الله .......خو ماصار بيج شي

_جانت هاي الكلمة هي الي اذتني ....ظلت اعيوني تجري

من الم الي برجلي ...والموقف الي اني بي

ياربي انوبة بس لا هو

.....رفعت راسي لكيتة اي هو

لابس مناظر سودة وعطرة ترس المكان

ولححية خفيفة

مكدرت احجي شي حاولت اكوم ...

من الفشلة مااكدر بس ابجي بصوت ناصي

مد ايدة

_كتلة لا اكدر اكووم

حاولت اكووم بس مكدرت رجلية انفصخت

والالم مو طبيعي ...

_ااااخ .....جانت هاي الكلمة بس الي طلعت مني

_سلامتج خيتي ...خليني اساعدج

بس انسندي علية

...اني ابجي مااكدر يربي ....شسوي

....مد ايدة مرة ثانية وكال

خيتي بس اوصلج لبابكم

....اباووع بابنة بعيد كل هاي المسافه هو اجة الية وكل هاي واني  انسند علية

_لا ...مااريد ...

احجي بالكوة ..والدموع تجري نحن

حجيت كلمة

_بس صيحلي احمد اخوية

...صدك الولد راح ركض .....

مااحس الا احمد جاي علية

_هاااا سابين حبيبتي اشبيج

ضليت ابجي حيل ....وطلع صوتي

اشلون الطفلة الي لكت ابوهة 

اباوع على احمد فتح اعيونه ممصدك اختة بالكاع بالشارع

واباوع على صديقة يمة صافن

شالني واني بحظة ظامة راسي مااريد يشوفني صديقه

رفعت راسي لكيت صديقة ورانة يمشي

وعيونه بعيني صارت

رجعت ضميت راسي .....

طببني بالبيت وخلاني على الجرباية وكال هسة ابدل واخذج للمستشفى يجوز صار عندج فطر او كسر

....فعلا جان الالم مو طبيعي ...

كعدت ماما ...وشافتني كامت تبجي علية وعلى بجيي

اني مااعرف عليمن ابجي على الالم ....لو على ثائر الي مراح اشوفه

لو من فشلة الولد الي شافني واني واكعه

يتبع

#بدلة_عرس الجزء الثاني

اجة خطية اخوية ....الي بيوم اجازتة المفروض يرتاح بيهة اجيت اني كملتة علية

اخذني واني بعدة الالم ساطرني بالكوة امشي ....شالني بس اني مستحية

وصدك ركبني السيارة ....

بعد ماراح صديقه

اجت وياية امي ...وفعلا رحت للمستشفى

اول مادخلت للمستشفى ضربتني ريحة الديتول

افتر راسي

كلبي كام يدك عبالك راح يشرحوني

اكول لامي واني مخروعه

_ماما طلعيني اني زينه

....امي اتباوع علية

_هاااا خفتي بسم الله بعدنة ماطابين

كعدني اخوية واحنى ننتظر ندخل للدكتور

مااطولة عليكم طلع عندي فطر بالكاحل  ..

لازم ابقى اسبوعين مااتحرك

رجعنه للبيت .....

واشوف ابوية  واخوية حمزة منتظرينة لان مرت اخوية احمد خبرتهم بلي صار

بهذا الوكت ابوية جان مسافر للعمارة لان هو جبير اهلة

ودائما افصول ومشاكل ...ودائما عصبي من ورة هاي الشغلة

اما اخوية احمد فمتزوج ابتسام بنت خالي وهي ابنية كولش طيبة وحبابة

وامي لان تعرف بالعوائل شيتصير قررت من اول يوم يتزوج يعزل فوك الة طابق مخصص بس نفس الدرج والباب مشترك

اما اخوية محمد فهو طالب اخر مرحلة من كلية التكنولجيا

بس هادىء وكتوم عكس البلوة اخوية الصغيرحمزة الي كلة شر واذية

المهم

طبينة البيت وشاف احمد شايلني واني شابكة بي مثل بنتة الصغيرة

_هاااا بابا سلامات

احمد جاوبة

_لا بابا سلامات طلع ماكو اي شي بس فطر وشوية اشوية يشفى

خلاني بالهول

اجة حمزة كبالي وهو يهز بايدة

_ههههههههه اني احمد رب العالمين ماجنت بالشارع من انتي وكعتي

شكول للعالم هاي اختي والله فضيحة

ههههه خو الله يساعد احمد ...شيكول لصديقة

هاي اختي ثولة معوقه حتى مشي متعرف تمشي

....

اني جنت افووور وهو يحجي لو بيدي اشيل الكرسي واركعه على راسة علمود تكمل اني رجلية وهو راسة وطافية عينه

....

كتلة ...

_حمزة ....

_هاااا

_انجب

_ههههههه مراح اتعصب لو اجي اكتلج هسة.... لان انتي مثل الدجاجة الغمة اكدر اهلسج بدون ماتسوين شي

....

اجة احمد كفخة وكال

_كافي حمزة زودتة

....

سكت وهو يباوع علية وكال

_عليك الله احمد هسة هذا صديقك يجوز يريد يخطب اختك

...بعد الي شافه مااتصور راح تمشي راح اتعنس واني ابتلي بيهة

....

طبعا الكل بدة يضحك ومتحملو حجايتة

بس اني ضليت فاتحة حلكي ....

يربي مااريد اتذكر الموقف

صدك فشلة ...

متحملت حجايتة  ضليت ابحي ...مثل طفلة صغيرة

اجتي امي شبكتني وكالت

_ولج اشبيج هذا حمزة خبل متعرفينة

مايعرف يحجي

عود انشوفلج غير عريس

...باوعت على امي فاتحة عيوني

_يمةةةةةةة

والكل بدة يضحك من جديد

.....

صح اضوج من ينصبون علية ....

بس ماانكر افرح بداخلي لان يحبوني حييل وهذا هو الي يكفيني

......

خابرت زينه ...وكتلة على الي صار بية

_ياااا سلامات حبيتي

_الله يسلمج انتي اشلونج

_اني زينه الحمد لله ....بس ضل بالي يومين ماكو كلت اكيد اكو شي

_الحمد لله على كل حال ....ماما اليوم راحت واخذت اجازة

....طبعا اني احجي وياهه وميتة اريد اعرف ...

ثائر هم سئل علية

بس شكول اله .....

_المهم انتي اشلونج .....هاااا

واليوم الي ماجيت بي اشسويتي

_اوووف شحجيلج ...جان يوم ماينجرع

ضليت صافنة ام التاريخ .......

طبعا ضلت اتسربت بالحجي واني اشتعلت عشيرتي اريدهة توصل للنقطة الي اريد اعرفة

_وبالاخير دك الجرس للبيوت وجان اطلع والكة ثائر خطية منتظرني من الدرس السادس

.....

اي ولج كملي هو هذا الي اريد اعرفة  الحب شنو شعورة واني ماكو ..مو تحجيلي على التاريخ ....جنت احجي وي نفسي واغم بالموبايل

_المهم سابين مااريد احجيلج الموقف

_ياااا ولج شنو

_لج طلعت اريد اركب وتجي بنين كامت تتنعوص ..اتكول اليوم ابو الخط مايجي اذا متصير زحمة وصليني وياج

....اني اتعرفين اخجل

_شنووووووووووو

طبعا صيحيت بدون مااحس على نفسي

_هااا سابين شكو

_هاااا لا ماكو شي ...كملي

طبعا يمكن طك عندي كرن براسي من العصبية

_المهم ركبت وهي اتحوس بالسيارة ..

كل اشوية افتح الراديو ثائر

وثائر يستحي ويفتح

لا غير الموجة ثائر

وثائر يغير

.....لج بنين انعل والديج بس اداوم ...

اني الج يامهتلفة

_اي وتالي زينه شصار

_مصار شي ...وصلناهة ورحنة بس جانت غثيثة

حتى ثائر كال شنو هاي صديقتج غير خفيفية

..كتلة هاي موصديقتي

اني صديقتي بس سابين

كال لعد وينه جان وصلناهة

....

عاااااااا خرب حظي الاغم ...اي والله

هو اني غير فكر لو ما فكر مايصير هيج

كمت اضرب براسي وهي تحجي وياي واعض بادية

_الوووو

الووو وينج سابين

_لا حبيبتي ماكو شي بس تعبت

صدك تعبت لان ادية امعضعضة وشعري كفشتة من ورة حظي

_اوك عمري باجر اجيج العصر اجيبلج شكو مواد فاتتج

_تسلمين عمري مااريد اتعبج

_لا انتي اختي سابين ....حظريلي كيك وببسي ههههه

_ههههه سهلة بس تعالي

.......

اجة العصر واني معدلة نفسي منتظرة زينة صديقت عمري

لان مشتاقتلة هواي ...واريد اتونس وياهة

......

اني محمد اخو سابين اخر مرحلة كلية

فد يوم اندك الباب العصر رحت فتحتة واشوف بنية امرتبة ورزنه كدامي

_السلام عليكم

...ضليت صافن اشوية

_وعليكم السلام

_اني صديقه سابين ....الحمد لله على سلامتة

_الله يسلمج ...

سكتت وهي ضلت واكفة نسيت المفروض ادخلهة

_اهاااا العفو ادخلي

_شكرا

...حجتة بكل هدووء

دخلت فتحت الباب الاستقبال ...

ودخلت لامي ولسابين .

وكتلهم اكو بنية جوة صديقة سابين

امي راحت الة اترحب بيهة وسابين منتظرتة دخل الهة

لان متكدر تمشي

ضليت اترقبة تدخل لغرفتة

دخلت ... واني

...ركزت على طولة ولبسة المحتشم ...

وهدوء مشيهة

....هاي اخر مرة اشوف بية زينه ....

بس مو اخر مرة اتروح من بالي

اني عندي صديقات وياي بالكلية ...

بس مااحب الاختلاط

بس زينة ...ضلت ابالي ....والي اتاثرت بالزايد كلام سابين عنة وعن عائلتة

اشلون منطيهة الحرية بس هي ظلت امحافظة على نفسة ومخانت الثقة ...وملتزمة بالحشمة 

...كولش كبرت بعيني

..........

مر شهرين .....وبدت الامتحانات ...

واني وزينة جنة كولش ملتهين نقرة

وطبعا نفس كل يوم

اتاخر على الدوام واطلع اركض شالي بايدي والجنطة تسحل وراية لحد ما

طلعت واشوف نفس السيارة النيلي

اني اتافافت ...

بدة ينزل من السيارة

واني عاكد اعدل بشالي

بدت تتوضح عندي شوفتة

نزل الولد من السيارة واني مشيت من يمة

بس اني لحد هسة استحي منة

اتمنى انسى الي صار

واني امشي حسيت بكلمة هزتني

وكفتني بمكاني مكدرت اكمل

_عدلي شالج لاتوكعين مرة ثانية

_اني جمدت ابمكاني وفتحت حلكي ....

والتفتت علية واني عاوجة حاجبني

اول مرة اركز على وجة ...

اول مرة انتبة على عيونه ....

لكيت ابتسامة خفيفة مرسومه على وجة

هذا شجاوبة

....كلت لنفسي مااكبر راسة واحجي

وصدك عفتة ومشيت ولا التفتت مرة ثانية

....

بس شنو عود يحجي هيج ..اشايفني مخربطة لو مرعبلة

هو غير حظي الفكر خلالك واكف بهذاك اليوم

عابت للشكول

.............

اني علي ضابط بالجيش درست بالكلية العسكرية ..دخلتة للكلية بارادتي

جان عندي نقص بحياتي وردت اكملة بدخولي للكلية

عندي اخ اكبر مني بسنتين اسمة يوسف

هو كلشي بحياتنة رغم قساوتة ..بس جان هو الوالد الي انحرمت منة من جنت اصغير

وكلبة الحنون الي ماانكر هذا الشي

وعندي ٣خوات ...متزوجات

امي من اهل الله مرة جبيرة بس واعية ودارسة

بس تبقى همة الوحيد ابنة الجبير

ابكلشي تنحاز الة

ظل هذا الشي بكلبي .....اني احبة ليوسف

بس الغيرة منة يمكن هي الي خلتني اريد انافسة

لان هو رائد بالداخلية وجبيرةعائلتنه وكلمتة مسموعه على اكبر واحد

فلذلك قررت اصير مثلة او احسن منة

دخلت الكلية واني ادري بعواقبة من ذل واحتقار للجندي او للمجهول الي راح يوكع بي

بس صممت اكمل والي ساعدني احمد

جان مثل الاخ الية .....

ودائما ينصحني بالشي الغلط والصح استمرت علاقتنة لحد ماتخرجنة سوة من الكلية

بس للاسف صار كل واحد الة مقرة الخاص

كمت انزل من الاجازة وبيوم هو نازل اروح علية او نلاقي بمكان او هو يجيني  ...

وسبحان الله صادف الصبح  جان عندي،شغل بليل مااكدر ااجلة

وثاني يوم التحق لذلك رحت الة الصبح

......انفتح الباب وااحس الا وحدة بنص صدري وكعت  والشال على عيونه وهي كاعد اتعدل بي

شافتني فزت ...

ردت احجي .....بس كلبت وجهة علية وراحت

حتى مكالت النفسة هذا اشعندة يم الباب واكف

ظلت تمشي واني اباوع علية ..لحد مادكيت الباب وانفتح ودخلت للبيت

ظليت ااسولف بهواي شغلات لاحمد مااحس بالوكت

الا وامة داخلى علينة بالصينية مال اكل

....كولش استحيت وردت اطلع بس مقبل احمد كملت الاكل

او طلعت من بيت  احمد ...وركبت السيارة وطلعت واني الوف  الركن

.....ميزتة من بعيد تمشي بوحدة

خففت المشي اريد اركز اكثر بية

لمحتني هي ....وعرفتني بس دارت وجهة وكملت

جان وجهه طماطة صاير

لتكولون اشلون يخون الامانة ويباوع على اخت صديقة

اني مكدرت امنع نفسي .....هذا مو طبعي اباوع على بنات الناس  بس مااعرف ليش هي

اكو شي جذبني الة ...

غرورة .....عدم المبالاه ...مااعرف

بس شي شدني الهة وخاصتا

.....من وكعت

مااعرف اشصار بية ....كانما اختي وكعت ...او لا مو اختي اكثر من هذا الوصف

اتذكر ظليت اباوع علية وعلى طولة وهي لابسة الكعب العالي

وحجابة الملون .....

لحد ماوكعت ....مااحس الا رجلية جابتني الة ركض

شفتة اشلون متاذية

والمستحى كالتلة ...

ردت اساعدة بس مقبلت

من كالت صيح احمد رحت ركض دكيت الباب طلعت امة

وكتلة ....بتكم وكعت ومتاذية اتريد احمد

خطية الام فزت عبالة انسحكت ظلت ادك على وجهة نزل احمد بس طلع من ااباب كال لامة تعاي شوفي هذيج كلشي مبيهة

اتقرب منة احمد شبكتة مثل بنت تشبك ابوهة

وخلت راسة بصدرة

ظليت امشي وراهم .....شفتة رفعت عينة علية

ودنكت

عرفت هي مستحية من الي صار

يتبع

قصة #بدلة_عرس الجزء الثالث

للكاتبة لينه سعد

كل فترة اجي اريد اشوفه بس ماكو هي ...

حتى ظليت اترقب الباب من بعيد اكول يجوز تطلع وماادري

بس لا ....ماكو هي ...

والمصيبة مااكدر اكول لاخوهة اشلونه اختك

...جنت اعرف ميتقبل هذا الشي

خمنت بان هي ماخذة اجازة ماكو غيرة ...

مااعرف ليش هذا اليوم حسيت راح اشوفهة ...

وفعلا طلعت نفس كل مرة

حجابة على النص كاعد اتلف بي ...

نزلت ماادري ليش. حبيت اشاقيهة ....

ماادري اريد اعرف اشلون اتجاوب

حجيت وياهة..وكتلهة

_عود عدلي حجابج لاتوكعين

التفتت الية ..بس مو اي لفتة وباوعتلي  بنضرة

....بس يابوية

اشلون نظرة ...ماتحملتة والله ....

دخلت ابكلبي بعد ...

اشلون قناص وصوبني

عرفت حبيتة

عافتني وراحت

والمصيبة محجت شي عافتني كانما نكرة اني كبالهة متحملت تجاهلة

اوكفيلي سابين وربي الا اخذج

......

وصلت على اخر دقيقة للمدرسة

واخيرا راح نخلص من الامتحانات

اليوم رابع امتحان النة مال اخير السنة

دخلت امتحنت والحمد لله جاوبت

طلعت من القاعة واني تعبانة

انتظرت زينه ...

لمحتة اجتي وهي تعبانة عبالك جانت تخبز

_ها بشري اشلونج

_زفت ...

_طبعا على وجج

_هههههه عابت

_ليش ولج الامتحان سهل والله

_عيني لتحجين سابين انتي مو مثلي انتي مواشوف بالدراسة مو مثلي

_اعوذ بالله من اعيونج ...دمشي خلي نطلع

....وفعلا جاي اطلع والكة الحب واكف

فدوة اشلون وكفة

جان ينتظر زينه

اني انحولت من شفتة صارت رجلية اطير مو تمشي

اوووف يربي هم يجي اليوم والبس البدلة العرس وانتي يمي واكف

......

اتقربت منة وبديت انتبة لمعالمة اكثر

اول مرة اركز بعيونه والي جانت عيونه هم اتركز علية

ردت اتعداه  لان لازم تنتهي هاي اللحظة لهنا

بس مااحس الا صوتة مثل النوتات الموسيقية .والي كال

_ليش مااوصلج بطريقنة

...بدت ترسم على وجي ابتسامة جبيرة

وجاوبتة واني طايرة من الفرحة

_لا بيتنه قريب اكدر اروح

..جاوبتني زينه

حتى لو سابين ...يلة على الواهس

...مكدرت امنع نفسي لو بيدي اركض اجيت بالسيارة ...

هزيت راسي بالموافقة

وصعدت ليورة ....

جان ابد ميباوع علية

جنت متوقعة راح اتضل اعيونه اتابعني ...مثل مااني اتابعه

بس العكس هو الي صار

وصلنة للفرع واني ااشر بايدي واحجي وادلي على فرعنه

....

ماادري حسيت يريد يندل بيتي ...

اوووف شنو هذا الحب ....يخلي الواحد يتخيل بكيفه ويوهم نفسة باشياء  ...

دخلنة للفرع واشوف السيارة النيلي بدت تتحرك من باب بيتنة  اقتربت سيارة ثائر من سيارة علي 

وصار شباك سيارة علي قريب من شباك الصفحة الي راكبة بيهة

دار وجة وكانما متفاجىء ...

بشوفتي

اني درت وجي لان ميعليلي هو

وصلت السيارة يم بابنة ونزلت ...

واتشكرت منهم وراحو

بس قبل لا ادخل التفتت بالاتجاه الثاني

شفت سيارة علي طابكة على صفحة كانما منتظرة شي

درت وجي ودخلت للبيت

جان اخر همي افكر بي

.........

جان يومي عادي ضليت ادرس لحد الليل

ماكو شي جديد

بس الجديد هو الامل الي جان يعتليني يوم بعد يوم واني اتخيل نفسي

ابدلة العرس ..ويمي ثائر ...يجوز اوهام ويجوز حقيقة

بس جنت متاكدة راح يصير هذا الشي

مااعرف ليش

........

كعدت الصبح نفس نظام كل يوم

طلعت برة واني امشي بسرعه ...

وصلت للركن واني امشي مستمرة بس ....

شفت  سيارة نيلي واكفه بعيد

شكيت بي هو ...

بس كلت لا ممعقول اشعندة هنا

بس لا ......اي والله هو ......

طلع من السيارة وضل واكف يم بابة وهو ملتفت علية كاعد ديراقبني

اني ارتبكت اشعدة هناك

وصلت قريب منة بس ابد مباوعت علية

اشو مااحس الا

هو يحجي ويكول

_بلا زحمة بس اشوية

...التفتت علية ...ياااا هذا صدك ميستحي

جاوبتة

_خير

حجيتة واني مخنوكة منة لان تصرفه عيب شنو يعني موكفني بالشارع

_البارحة شفتج صاعدة بسيارة غريبة 

طبعا باوعت علية من فوك ليجوة ...

واني مصدومه من حجايتة

_هاي انت مقتنع من تحجي

انت منو ....وشعليك  ....بس مو صوجك صوج اخوية يلفي لبيتنه هيج ناس

.....

اتقرب علية وهو ملامح وجة اتغيرت 

_لج انتي متعرفين تحجين اني غير اخاف عليج لان اخت صديقي

بس مو صوجج صوجي كاعد احجي وي طفلة ماتعرف تحجي واني اخلي احمد اشلون يضبج

.....طبعا مكدرت احجي لو بيدي ارزلة بس حسبتة خاف صدك يحجي شي

ولو اني ممسوية شي غلط ..بس خفت

كلت خلي اروح اني اتاخرت

وفعلا هزيت ايدي ومشيت واني مو ابالي اسولف وياهه

.......

البارحة من طلعت من بيت احمد واني راكب السيارة

التفتت وشفتة.... كلبي دك بسرعه

معقولة هاي راكبة سيارة

ركنت على صفحة ...وضليت اباوع من المراية الجانبية ...

اريد اعرف منو موصلهه

نزلت ونزلت بنية ...حجت وبعدين ركبت

عرفت هاي صديقتة

والي وصلة ولد شاب

ماادري ليش ضجت ...

رحت واني بس افكر بيهة

ياربي اني شنو الي جرالي

ليش هيج كاعد افكر بية ...

اليل كلة منمت ...وقررت احجي وياهة يمكن غلط تصرفي بس مااكدر عيب تركب وي واحد غريب

......

اجيت من وكت كلت وانتظرته بعيد

وفعلا اجتي..... نزلت من السيارة واني كاعد ارتب الكلام شراح اكول

شنو الي ابدي

بس .......الي فاجئني تصرفهة

واسلوب حجيهة حيل جرحني

واني ظليت الوم نفسي

خاف اتروح تحجي لاحمد

....

اوووف ياربي اني اشسويت

اشبية ماحسبتة صح ....

..بس متحملت  الي شفتة

وكلت من ارجع من الاجازة الثانية اكول لامي علية تخطبة الي ....وافاتح احمد

....

هذا اليوم اخر يوم من الامتحانات

جنة انسولف ونضخك اني وزينه .....لان بعد مراح اكدر اشوفه

بالاخير قررنة نطلع من المدرسة

بس حجت شي زينة خلتني هايمة

_سابين ....بعد ايام راح اسمعج خبر

_شنو ولج احجي هسة

_لااااا هاي مفاجئة

_امممم عليج

_لا مو علية .....

.......

مادري كلبي كام يدك حييل ...

حسيت بشي بارد كامت تمشي بكل جسمي

معقولة الحظ يسويهة ويطلع الي بالي صح

جاوبته

_اوك لعد انتظر منج خبر وغمزت الة

......

وصلت للركن جنت حاسة راح اشوفه كدام بابنة بس لا ملكيتة

جنت حالفه الا اكول لاحمد عليه من يرجع

بس سابين اتكدرين تحجيهة ....خاف يتهموج غير اتهام

على ان اني هي الي انطيته مجال

اوووف يربي .....

بس اذا زودهة بعد والله الا احجي

دخلت للبيت جان يوم عادي

صارت الساعه السابعه وكاعد انسوي عشة

سمعت عيطة بغرفة بابا

فزيت

كلبي كام يدك حييل رجلية مدشيلني

سمعت ابوية يصيح على امي

ابتسام اتقربت كالت

_شكو

_مااعرف ابتسام

اتقربت شفت امي ادك على راسة وتبجي

وابوية يكول الهة كافي مو كتلج كالو حالتة مستقرة

رحت حظنتة لامي وكلت شكو

جاوبتني وهي الرعشة بحلكهة

_احمد..... اتصوب

اني عطت ....

بس مااحس الا ابتسام الي جانت يمي اتخربطت

ظلينة حايرين بيهة

كعدت وهي تبجي وادك على راسهة

وابوية ملتهي  ....يدك على محمد وحمزة يجون لان جانو طالعين

راحو واحنى حالنة ميسر عدو

منعرف شصار

هو متصوب لو غير شي

الف فكرة صارت ابالنه

ظلينة نتصل بس يقفلونه

متنة هاي الفترة من ٧_١٢ واحنى بس بجي وندعي الله يستر علينة

ااجو واحنة نتوسل بس يحجون الصدك النة

...كالو ماكو شي شظية داخلة برجلة

وثانية شاكة بطنة بس سولة عملية وطلع منة ومابي شي ...

كل هذا واحنى منصدك

بس حلفو وكالو كلشي مبي شي

امي رادت اتروح

كالو باجر الصبح ناخذج

.....

كعدنة الصبح او بالاصح منمنة اليل كلة واحنى مثل المذبوحين

رادو يرحون

ضليت ابجي وكتلهم اذا انتم راح اتشوفونه وترتاحون اني اشلون ارتاح اذا مااشوفه

كتلهم اريد اشوفه ...

كالو صدك ...جذب وين رايحين بابا ممنوع اي زيارة

بس اني ضليت ابجي بابا كال خلي ناخذهم علمود يشوفونه

وصدك رحنة طلعنة محمد وبابا وامي وابتسام واني ..

وصلنة للمستشفى ..

وجان تضربني ريحة الديتوول

اختنكت ردت اوكع بس بالكوة متحملة

كلبي يدك صعدنة المصعد

وصلنة للغرفة دخلو واني وراهم  جنت مرتبكة حيل اشلون راح اشوفه ..

وشكلة ....زين اذا متاذي حيل خاف مااتحمل ..

لكيت اربع اسرة كل واحد على سدية

واهلة يمة

موقف كولش صعب

الله يساعدهم ...ويشفيهم شنو ذنبهم الي تنكص رجلة لو تنكطع ايدة

وشنو هذا الشي الي يخلي يرجع مرة ثانية يخدم بالجيش

شنو الجابرهم يتحملون كل هذا

كل هاي الخواطر جانت ادور ابالي

التفتت شفت احمد نايم

وملفلفه بطنة ورجلة

متحملت منظرة طلعت برة اشهك وابجي

اوووف ياخوية انت يصير بيك هيج

انت الي جنت اتشيلني واني اصغيرة وتلاعبني الاكاك لا حس ولا نفس

ظليت ابجي والدنية افترت بية من الريحة جنت واكفة يم  الباب وساندة جسمي بادية الي كامشة الحايط بيهة

اجة رجال يمي ها اختي باوعت الة بدت اعيوني اتغوش

وكتلة احـ....مد كمشت قميصة او وكعت ....

......

مااحس الا واني ابحظن امي وهي تبجي وتحجي علية

_فتحت اعيوني لكيت نفسي يمهم بالغرفة وكاعدة على الكرسي وامي شابكتني

فتحت اعيوني على صوت احمد

_سابييين ....ترة والله اني زين

بعد كم يوم اجيكم

ابتسمت وكتلة

_صدك والله

ابتسم الية .....وهو بالكوة يحجي

_اي والله كلة اصابة سطحية

جنت اباوع علية وعيوني تجري

التفتت شفت واحد

كانما شايفتة من قبل .... ضخم طويل حيل معالم وجة بادية علية القساوة

يعني الي يشوفه يهابة

كاعد يسولف وي ابوية .....ونظراتة تلتفت الية وترجع اتغير مسارهة

المهم خلصنة الزيارة

وطلعنة ...للبيت بس الطريق كلة امي تحجي علية ...انتي مو مال تشتمين ريحة مستشفى

ليش اجيتي وشهرتينة

طبعا اني مااعرف شنو الي صار

ومهتميت بالي صار ...

بس رجعت للبيت سجدت سجدة الشكر لان احمد طلع ابخير هذا كل الي جنت اسعى اله

.....

يتبع

قصة #بدلة_عرس الجزء الرابع

للكاتبة لينه سعد

........

مر اسبوعين على الحادثة والحمد لله صادفت عطلة

لان مااتخيل اشلون اداوم واحنى بيتنه مخبوص وبيوم

دك التلفون

زينة  جانت رحت شلتة وضلينه انسولف محجيت شي اله

بس....الي صار هو ؟؟

_اكولج سابين مو كتلج راح افاجئج بشي

...اني بدت اعيوني تلمع ....

_كتلة اي شنو هو

_لج ثائر خطبنالة ابنية كولش حلوة ....واخيرا....

بدت تحجي بس

اني بعد كلشي مكدرت اسمع بس بدت اعيوني تجري ....

متحملت اسكت نفسي

_الو  هاي اشبيج سابين كاعدة تبجين

_هاااا .......لا ....بس اكو شي صار عدنة ...

اخوية احمد اتصوب وبالمستشفى

احجي والعبرة خانكتني.

_يااااا سلامته ولا ادري ...وهسة اشلونه

_يلة زينة اعذريني راح اروح

_اوك حبي اخابرج باجر

سديت التلفون ونمت على جربايتي وبديت ابجي بخنكة

ضامة الصوت مااريد واحد يسمع

....يعني هيج انتي غبية سابين ....هيج جنتي متخيلة يباوع عليج

وليش يباوع عندة صديقات وكرايب يعوفهم كولهم علمود باوع لعيونج اتصورتي يحبج  من نظرة عين وراح يخطبج

...

جانت هاي صدمة بالنسبة الية

دخلت امي علية

_اشبيج ماما

_ماكو شي ....بس اشتاقيت لاحمد

_الله كريم هسة يطلع وهو ديتحسن يوم بعد يوم

_ان شاء الله

_يلة حبيبتي كومي خلي انصب غدة

........

مرت ايام واسابيع واني نسيت ثائر ....

مااعرف ليش نسيته بسرعه ...

يجوز اني مجنت احبة ...جنت اتخيل بي الاشياء الي تنقصني واريدة يكملهة الية

المهم بيوم الي طلع اخوية من المستشفى البيت كولة جان مكلوب عزايم ناس طابة طالعه وناس تجي من العمارة وتبات

يعني فندق صرنة وتعبت تعب مو طبيعي

حتى دراسة للصف السادس نسيت ادرس بالعطلة

بيوم ابوية جان موجود بالبيت

بس امي واخوية محمد طالعين زيارة لكربلاء

مخبوصة اني جنت  اسوي غدة اندك الباب وابوية يصلي وحمزة نايم

وصلت يم الباب وكلت

_منو

_بلا زحمة جاين على احمد

.....اني جنت لابسة ربطة

ووكافة اردانات الدشداشة لان جنت اطبخ

فتحت الباب بس المفاجئة الي متصورته اتصير

لكيت الولد الي شفتة بالمستشفى ....والاتعس من هذا علي واكف يمة

هذا علي يطلعلي بالبخت

وجان مبتسم ابتسامة جبيرة

اما الولد الي جانت تعابير وجة ماتنكص قاسية

غضبان ...شديد

ضليت صافنة واني  مشدوهة اشلون اتراهمو اثنيناتهم 

....لحد ماسمعتة يكول

_ابو احمد موجود

_هااااااا اي اتفضلو

...دخل الولد .....او وراه علي الي جانت اللابتسامة ممفاركة وجة

اني اكوللهم اتفضلو دخلو واني وراهم

مااحس الا علي التفت الية وكال

_همزين ماطلعتي والشال على عيونج

اني ظليت صافنة

ودخل للاستقبال بدون اي اضافة ثانية

.....مااعرف ليش ضحكت ...مع العلم اني ضايجة منة

وميجوز يحجي هيج ابيت صديقة

بس ابتسمت

......

ابوية استقبلهم واجاني كال سوي غدة

طبعا كمت احظر الغدة واني

دايخة راح اضل هيج كل يومية واحد لو يتغدة لو يتعشى او  واكعه براسي بس اني

صبيت الغدة وكعدت انتظر امي تجي

لان تعبت اريد انام من السبعه كاعدة واشتغل

.........

بيت علي

نزلت اجازة واتفاجئت من يوسف اخوية كال ان احمد اتصوب

طبعا متت قهر بس الي عرفتة طالع ومابي شي

اشوية ارتاحيت

اني اجازتي اتاخرت يالة نزلت بهذاك اليوم

كتلة ليوسف باجر انروح الهم

او هو وافقني

وفعلا طلعنة خلصنة كم شغلة او وصلنة لبيتهم

اول مادكينة الجرس سمعت صوتة

...ياربي كلبي كام يدك

جنت متلهف على شوفتة ...بس ضايج لان اخوية وياية

فتحت الباب ....بس كانما فتحت كلبي وكعدت بي

اخوية بدة يحجي وياهة واني مبتسم

على شوفتة

وهي مثل المخروعه طالعه النة

من كالت ادخلو

اني خليت يوسف يدخل والتفتت علية وذبيتلهة هاي الحجاية

بس اريد اشاكسة مااعرف ليش

طبيت واني مااعرف اشصار وراية

كعدت سلمت على احمد وابوة

وضلينة انسولف

ابو احمد ماقبل نطلع واني جنت متاكد ميخلينه نطلع

واني مكيف اريد ابقى

لان عرفت من احمد من سائلتة على محمد كال ماخذ الحجية وطالع للزيارة

عرفت هسة القلب مالتي هي الطابخة

بس اخوية مقبل واني لو بايدي اكلة روح واني ابقى

بس بالاخير اقتنع

وفعلا صبولنة الاكل

واني مكيف هذا الاكل من ايدهة

اكل واني احس بنفسة وهي من كاعد اطبخة

اكلت وجان اكلة طيب بس مو مثل اكل امهة

بس فرحان لان عروستي تعرف تطبخ

........

ثاني يوم نزلت لامي وكتلة يوم

_هلا يمه

_كتلة اريد اتزوج

_هي ضحكت وكالت

_اي بيهة الخير ....عندك ابنية لو اتريد اني ادورلك

_لا يوم اني عندي بنية وخوش بنية

_هاااا وين لكيتة ولك

....ضحكت وكتلهة لتخترعين

اخت احمد صديقي

_هاااا ...والله همة خوش عائلة وهو الولد مؤدب مابيهة شي اروح واشوفه اذا ماعجبتني

مااخطبهة

_طبعا يمه..... بس متاكد راح اتعجبج

_ هااااا .....زين انت شايفه

.....باوعت لامي واريد اغير السالفه

_ولك علاوي خاف اتسولف وياهه

_لا لا والله اصلا كولش ثكيلة ومتابعه من زمان وعرفت شنو معدنة

_هااااا ....وضحكت جا خوش لعد انروح وانشوفه هي هم حجة انشوف اخوهة

بس اشلون ويوسف

ولك ازوج الصغير والجبير باقي_يمة ياريت نتزوج سوة ...

دوريلة بنت حلال بدل ما سوالفه التعبانه

_هاااا ولك علاوي لتحجي على اخوك

يمة مااحجي علية اني ....

شوفي اشكبرة وبعدة ممزوج امكضيهة صداقات وي البنات

_عادي يمه ولد ولازم يجرب والله يهدية ويقبل ازوجة

بهاي اللحظة بدت خطوات تنزل الدرج جان جسمة الضخم وثقلة وطولة يخليو الدرج ينهز اول ما ينزل منه 

_هاااا اشو سمعت اسمي

_هلا يمه .....اي والله دنحجي انكول اشوكت يتزوج يوسف

يمة اريد افرح بيك وانت كبرت بعد كافي عزابية

...كمل مشيتة وكعد وكال

_اي ليش لا .... جانت الابتسامه خفيفة  مرسومه على وجه

اني مستعد واكو  بنية ابالي

احنة اتعجببنة من حجة هيج 

امي كيفت

_هاااا اليوم اشجرالكم ....اثنينكم اتريدون تزوجون

..التفت يوسف لعلي

_هااااا اي يالله علمود بلة خساير العرس واحد يصير

صدك يعني قررت

....جاوبة علي

_اي والله يخوية

...الام جاوبت وهي طايرة من الفرحه

_لكالة خوش ابنية اخت احمد صديقة

...التفت يوسف  الة وكال

_هاي الي طلعت النة بالباب

ابتسم الة وكال

_اي هي

...كام يوسف وكال اي على الخير

خوش ناس

امه كالت

_هاااا يوسف اشو كمت .... اشو ماكملت انت ياهي  الي ابالك  مو كلت عندي بنية

ابتسم الة وكال

_معقولة يمه اني اختار وانتي موجودة ....

اني اخليهة وراج انتي اختاريلي

فرحت االام ....

وكامت وكالت

_اي خوش لعد والله من زمان واني على بنت اخوية بتول

خوش بنية وحبابة اتلوك الك

_هاهيه يمة شوفي الي يناسبج

يلة اني طالع

.....

دك الجرس وكت العصرية حمزة راح يفتح واجة

وكال

_هذا علي صديق احمد اجة هو ومرة

...طبعا البيت انكلب

كمنة الم الي امطشر

امي كالت

_ولك حمزة دخلهم بالاستقبال

_اي يمه قابل انتظركم تحجون

رحت سويت صينية ...جاي وكيك

اني جنت مامنة مراح يدخلون راح يدخللهم احمد لان همة جاين علية

بس اتفاجئت سمعت صوت الام دخلت للهول

_هاهي انلاصت لازم اسلم

...عدلت نفسي وسويت صينية ..

ودخلت عليهم

جانت ام علي متوسطة الطول لابسة جبة وربطة يعني مو مثل امي عباية ام راس

ومرتبة ويبين على الوجهة الطيبة

_السلام عليكم

كامت الام والابتسامة على وجهة وهي تتفحصني من فوك ليجوة

_وعليكم السلام

سلمت علية

خليت الصينية كبالة

ورحت  كعدت اشوية وهي عينة علية ردت اكوم

_من رخصتكم

بس لحكت هي وحجت علمود اتبقيني

_بياصف انتي

_صف سادس

_ياااا بكلورية ويرادلج معدل واكيد هسة مخبوصة بالدراسة

...ابتسمت الة

_والله خالة ملحكت ادرس لان الوضع بالبيت تدرين بي احمد اتصوب نسيت كل شي

_يااااا اي والله ......

لعد اشلون راح اتاجلين

_لا خالة ....ميحتاج اني شاطرة وان شاء الله ادخل مدرسين بعد اسبوع

_هاااا الله يسهلج

....اترخصت منهم وكمت

وبقت الام تحجي وي امي

............

طلعت امي من بيت احمد وركبت السيارة

واني متشوق اسمع رأيهة

_ها يمة بشري

_ولك ماشاء الله كلش حلوة

_هاااا عجبتج ....الابتسامة مرسومه على وجه

_اي والله حلوة ومرتبة وحتى حجايتة حلوة

_هههههه كل هاي اتفحصتيهة

_اي لعد اشلون غير اسمع حجيهة يجوز ثرمة اتأتأ

_هههههه عفية بامي

وهسة راح اخطبهة

_ولك اشبيك هيج ميت ...اثكل ولك ترة البنت ماتحب الواحد الي يلزك

_اهوووو يمة اشفتي علية غير اريد اتزوج واخلص

_اممممم علية ولك اعليوي

امبين واكع وكعه جبيرة

_ههههههه لا والله بس خوش ابنية وعجبتني واخوهة احمد اني احبة

مااريدهة اتضيع من ايدي

...ابتسمت الام

_لتخاف هاي البنية الك

_صدك والله ....جان علي كامش الستيرن وملتفت على امة

_ولك باوع عدل ....هاي اشبيك انت

لتخاف والله ....سابين الك ومتصير لغيرك

ولو هو اسمة يلعب النفس

_لا يوووم احلى شي بيه اسمهة

.....باوعت ام علي لابنة وشافت اللمعه الي ابعينة والابتسامة المرسومه او وجهة الي زادت حلاته عرفت هو  يحبة ومتعلق بيهة

ابتسمت وسكتت

......

بديت ادخل مدرسين ...وجنت ذابة كل جهدي اطلع معدل

وبيوم واني ادرس ومشغولة حييل

دخلت علية امي بليل

_هاااا سابين تقرين

_اي والله مامة ...

باوعت علية وبحلكهة حجي  ومتعرف اشلون اطلعه...

صفنت عليهة وكتلة

_هاااا ماما خير

_ماما اكو شغلة اريد احجيهة الج .

اكو ولد اتقدم الج ...وهو خوش ولد مرتاح ماديا واهلة خوش عائلة وراح ترتاحين وياهم اذا قبلتي

.....

اني ضليت صافنة هاي امي شدتحجي

_ماما لتحجين اني ماافكر بالزواج لتفتحين وياي بعد هذا الكلام

.ورجعت فتحت الكتاب

_لا سابين ...ميصير الولد حرامات يروح من ايدينه يجوز مايجيج ولد مثلة

اني وابوج واخوج مقتنعين

....التفتت الهة

_هاي كولكم تدرون ....زين منو هذا

_علي صديق احمد

فتحت اعيوني حييل ....ياااا عزا

_ابد مااريدة .....مااقبل عفية ماما كوليلهم اني رافضة

ولتحجين هذا الحجي اني عندي بكلوريا خليني مركزة عليهة

يتبع

قصة #بدلة_عرس الجزء الخامس

للكاتبة لينه سعد

اني احمد ضابط بالجيش متزوج وعندي ابنيه عمره ٣ سنوات

اتزوجت بنت خالي ابتسام عن حب

والحمد لله هي ابنية كولش طيبة وخلوقه وياي وي اهلي

وعندي صديق كولش مقرب وهو علي

انسان خلوق بس اتفاجئت بيوم اجاني وكال

_احمد تدري بية اشكد احبك واعزك

وانت بالنسبة الية مثل يوسف واكثر

....اجيت  طالب منك طلب

_والله ياعلي وانت بالمثل هم ...كول واطلب واني سداد الك اعيوني انطيهة الك

_سالمه اعيونك اخوية الورد

اريد اتقدم لرضيعتك .....امي شافتة وانعجبت بية وكالت هاي اتفيدك

واني قبل مدة ادور على بنية ...فمراح الكة ناس مثلكم

...اني صفنت وكتلة

_والله ياعلي اني اكيف ....لان مراح الكة زوج لاختي احسن منك

بس اني مااكدر احكم الحجي كلة للحجي وللبنية

_اي هو اني انتظر ردك ...

....

وفعلا دخلت لامي كتلة

امي كيفت ....وراحت كالت لابوية

ابوية كال اصغيرة بعدة بس امي كالت لا اصلا اني بكدهة واتزوجت

المهم الحجي قبل

بس الي اتفاجئت بي

كعدت العصر من النوم وامي اخذتني للاستقبال نحجي

وكالت

_سابين رافضة تتزوج

اني اتعجبت

_ليش

_اتكول مااريدة ...واريد اكمل

_يمة غير اتقنعية هي هاي اشفهمه

_ابني والله حجيت الهة ....كالت عندي سادس لتخلوني ادوخ بهاي السوالف

_والله حرامات خوش ولد

_ابني هي قسمة ونصيب هاي الاشياء وان شاء الله يعوضة بالاحسن

....

طلعت واني ضايج لان مستحي شكلة

وهو صديق عمري وخوش ولد ...والله لو عندي ابنية انطيهة اله

......

نرجع السابين اول ماطلعت امهة منه

من بعد ماامي طلعت سديت الكتاب وصفنت

معقولة هيج عجبتة واتقدم الية

ضليت اتذكر ملامحة

هو حلو ....جسم مرتب وشخصية حلوة وضابط

ليش مااوافق

بس لا .....مااريد اغلط الغلطة الي قبلة اتصورت اني احب ثائر وطلع كلة خرافات اني اوهمت نفسي بيه

اهم شي هسة دراستي .....

وثانيا مااتزوج اذا مااحب اذا مااقتنع

وهاي المرة مستحيل اغلط

.......

احمد

بعد يومين صارت مناسبة عند احد اصدقائنه الضباط الحنه مالتة

وهنا واشوف علي

اول ماشافني ابتسم ابتسامه جبيرة وتقدم الية

واني حاير شكلة ....مستحي منه

المهم ضلينه انسولف

_ها ابو رهف ....مارديتلي خبر

...باوعت الة واني مستحي

_والله ياعلي ...انت غالي علية واحبك والله لو عندي بنية انطيهة الك بدون مااتردد

بس الشغلة هي قسمه ونصيب والظاهر ماكو نصيب

....شفت علي سكت كانما متفاجىء

ممتصور راح يسمع هذا الحجي

_ليش احمد ....منو الرافض

_البنية اتكول اريد اكمل دراستي وماافكر بالزواج

_بس احمد اني ماعندي اعتراض على الدراسة وانتظرهة لحد ماتخلص ...

واذا اتريد بيت مستعد هم مستعد احنى عدنة خير من الله

...انحرجت حيل من علي بعد جوابة هذا

سكتت وهو هم سكت وكال

_يلة اترخص وليضل بالك ترة هي قسمة ونصيب

_ابو حسين حبيبي ربي يرزقك ابنت الحلال الي اتسرك

.......

علي

....جاوبة علي بداخلة

...بس اني مااريد بس سابين

طلعت واني مخنوك ....يعني صدك هي رافضتني اشلون

هي امخلية عينه على احد اكيد

ضلت هواي امور تجي على بالي بس متحملت رجعت للبيت والدنية سودة بعيني  فتحت الباب جانت امي كاعدة هي ويوسف بالهول

سلمت وصعدت لغرفتي

_يااااا هذا اشبي هيج جاي

_والله يايمه ماعرف ...خلي هسة ينزل

_لا اكو شي صاير خلي اصعدلة

....صعدت الام

فتحت الباب لكتة نايم بهدومه

اتقربت منه واني اباوع علية مكسور حيل مو علي الي اعرفة

رحت كعدت يمة على الجرباية وخليت ايدي على راسة

_يمة اسم الله عليك اشبيك

التفت الية

_لا يوم ماكو شي بس دايخ

_لا والله يمه ....سالفتك مو مال دوخة اكو شي

سامع شي

لتخليني اكل بنفسي

_لا والله ماكو شي ....بس تعبان

...صفنت اريد اعرف شنو الي يخلي ينقهر هيج ...

_اكلك علاوي اهل البنية ردولك خبر

صفنت وتذكرت معقولة مراح اتصير الية

بس اريد اعرف ليش مرادتني

لو اكدر احجي وياهه ..لو بس اكدر اشوفه ....بس شلون

انوبة حتى دوام ماكو علمود انتظرهه

_هاااا يمة اشو صفنت

مقابلين

_اي يمه البنية اتكول اريد اكمل ماافكر بالزواج

_هااااا هاي هي الي رفضت لو امة لو ابوهه

_لا يمه هي  احمد يكول الكل   مرحبين

_باوع وليدي ...انت هاويهة للبنية

جاوبني بصراحة

....باوعت لوجهة

_اي يمه احبة ...مااعرف اشلون حبيتة

بس كلشي قسمة ونصيب وهذا قدري

_لا يمه ماكو هيج شي .وربي ومااعبد

اذا مااخلي السايبة هاي الك

_ههههههههههههههه والله صحكتيني يايمه السايبة شنو

_هي هاي الاسمة  .... اشمدريني

المهم معليك اني ازوجهة الك ..ولك اكو وحدة عدهة عقل ترفض علاوي

لعد اشكد ماتفتهم

معليك يمة هاي بعدهة طفلة اذا هي صدك الرافضة

اني اعرف اشلون احجي وياهه

_لا يمة كافي عوفي مااريدج تتنازلين وتروحين

_لايمة مابيه تنازل لازم واحد يحجي والثاني يسمع علمود تتوضح الامور والله عندي اخساس هي الك

_الله يسمع منج يمة

_ماطول هيج نشنشت على سالفه السايبة

امشي تعال امسويتلك عشة

_ماشي يمه

...كمت بست راسة وطبيت للحمامنزلت جوة واني افكر اشلون اخليهم يقتنعون باي شي اطبلهم

ماطول رايدهة ....مااكدر مااسوي شي

واذا مقبلو بعد هاي هية

....كعدت يم يوسف

_هااا يمة اشو نزلتي حايرة اشبيج

_لا ماكو شي ...بس خطية  لكيتة ميت قهر  لان البنية رافضة الزواج

...ضل ساكت يوسف محجة شي

_بس اني مو باجر عكبة اروحلهم

فز يوسف ...

_هااااا .......هاي صدك تحجين المن

_لعد اشلون اخلي هيج . .اروح افهمهم واريد اعرف السبب ليش رافضة

_يمة ماطول ماقابلين طبهم طوب ...شنو من قلة البنات

_لايمة مو هو عاشكهة ....لو تشوفه اشلون وجة صاير

_هههعع والله عيب ..بس لا بجة

_هاااا يوسف ...لاتحجي على اخوك هيج ..

حقة يحبة للبنية ...واني كلت هاي متصير الا اله

......عاف يوسف امة وكام  لان مامقتنع بحجيهة

......

احمد

دخلت للبيت واني ضايج شفتهم كاعد يسون عشة صعدت فوك محجيت شي

دخلت الغرفة

وجان تدخل وراية ابتسام

_هاااا احمد اشبيك ...اشو مو طبيعي

...كعدت واني مقهور

وحجيتلة الي صار

_والله حرامات امبين خوش ولد

_اي والله ...

اكولج ابتسام ليش ماتحجين وياهة يجوز تقتنع

_ليش لا هسة انزل جوة واحجي وياهه

_اي والله ...لان حرامات علاوي خوش ولد وهو مستعد ينتظرهة

نزلت ابتساك بعد ماكملو عشة والكل راد ينام

دخلت لغرفة سابين

_اشلونج سبووون

_اممممم ماطول اكو سبون يعني اتريدين اكمش بنتج

وهسة لو تطلعلج كرون مااكمشة

_هههههه لا ولج والله ماعندي اي غاية ضايجة وكلت اسولف وياج

_اي شكو بيهة سولفي ....

_بس اريد اسئلج سؤال

ليش رافضة علي

_اهوووو يمعودة والله خرعتيني عبالي اكو شي ثاني

_لا سابين والله اشلون ولد هو واخوة وردة مال الله ..يعني هنيالهة الي اتصير منهم

...صفنت علية وكتلة ياهو اخوه

...باوعت علية ...وجان تضحك

يعني صدك متدرين منو اخو

_لا والله ....ولج منو

الي  وكعتي بحظنة بالمستشفى

_شنووووو .....يااااا هاي شدتحجين ولج

طبعا كمزت من حجت هيج

اشوكت وكعت ....اشو ولا اتذكر

_ولج من رحنة للمستشفى ...اهووو هاي انتي مطفية كولش ومتدرين  اشصار بيج

اني اذكرج

من دخلنة على احمد بالغرفة ....باوعت خالتي ماكو انتي

طلعنة اني وياهة وجان نلكاج مغمى عليج وانتي كامشة قميص يوسف من ردانة او واكعة بالكاع

وهو خطية مايعرف يتصرف

واصلا ميعرف انتي بتنه

واسمة يوسف هو اخو علي

...

طبعا تحجي ابتسام واني صرت حمرة وصفرة والحرارة دااحسة باذاني صارت فووول

هسة عرفت ليش اكول هذا شايفتة

طلع اخو علي الي هواي شبه منه

بس والله فشلة

_يا والحظ من حظي مرة يم علي اوكع والثانية يم اخوة

اني خايفة لا مرة ثانية اوكع يم ابوهم

_هههههه لا لتخافين ابوهم متوفي

سابين اني والله لو مااحبج ماانصحج

الولد كايل لاحمد اني مستعد اتانيهة لحد متخلص دراسة

واذا حابة تعزل ماعندي مانع

ولج وين اكو ولد بهيج مواصفات ....

باعي لتردين خبر هسة ...

فكري زين واخذي يوم ويومين وانطيني خبر

...صدكيني لو عندي اخت اخذة لاختي

يلة حبيبتي تصبحين على خير

.....

طلعت ابتسام ....وضليت صافنة

ليش مااقبل بي كل المميزات بي ...

ظليت اتخيل وجة واباسامته .....

وجرائته

اوووف مااعرف ياربي والله حايرة

رحت اتوضيت وصليت صلاة استخارة

اريد ربي يهديني للي يريح كلبي

ويهيئلي الشي المانسب الي

......

وبيوم واني جنت عند المدرس

رجعت للبيت وكت عصرية واشوف السيارة اتريد تتحرك من باب بيتنه

ماعرف ليش دك كلبي

حسيت الحرارة بدت تتحرك وتتجمع بوجي

مااعرف شسوي اريد اختل

اريد اطير اختفي

مااكدر اباوع ابوجة ...

ماادري ليش استحيت دنكت راسي  وضليت امشي

اتقدمت السيارة مني رفعت راسي لكيتة مدايرلي بال

ولا كانما موجودة

معقولة معرفني

ماادري ليش حسيت اني غلطت لان رفضت

لو انطيت وقت لنفسي افكر ....يجوز احسم الامر بدون هاي الوساوس الي تجيني

دخلت واني مقبوض كلبي

ضايجة حيل ..حسيت صدك استعجلت

فتحت باب المطبخ

والكة ابتسام فاتحة حلكة

_ولج تعالييييي خرب حظج سابين

هنيالج ولج ام علي جوة

...هااااا

اتفاجئت ....شنو ام علي وشتريد

ماادري اتخربطت اموري

حسيت كانما محكوم علية وكاعدين يستجوبوني

يربي شكاعد يصير بية

_ولج جاية عليج اتريد تعرف ليش رافضة

هههههه ولج ياوووول الولد ميت عليج

يامحظوظة

_ياااا خرب ...

ولج ابتسام عفية شسوي

ترة خايفة

_لتخافين اني اعلمج شتكولين اذا اطبين

بس الي اكولة نفذي ياخبلة

ولج الله يحبج وامج داعيتلج

يتبع

قصة #بدلة_عرس الجزء السادس

للكاتبة لينه سعد

.....

طلعت امي من غرفة الاستقبال

شافتني وكالت تعالي جوة

ام يوسف اتريد اسلم عليج

....باوعت على ابتسام وكلبي كامت دكاتة تتسارع  والخوف والخجل بين علية

مااعرف شسوي

ابتسام باوعت علية والفرحه بعيونه وهمست الية

_كولي ياالله ودخلي

وصلت يم الباب وكلبي كام يدك بسرعه

_بسم الله الرحمن الرحيم ...

ودخلت

...اول ماشافتني

_اللهم صل على محمد وال محمد

...اتقربت منهه

_اشلونج خالة

_ابخير ياروح خالتج ....

اشلونج احوالج

الابتسامه على وجهه

_الحمد لله

...جانت تحجي ومااكدر اركز بوجهه

رحت كعدت وسكتت

انتظرتة تحجي

ظلت اتباوع علية وكالت

_سابين .....اني ماعندي بهل الدنية غير يوسف وعلي

همة روحي من الدنيا

عندي استعداد اسوي المستحيل علمودهم

واني كرست حياتي كلهة الهم من بعد المرحوم

يجوز انتم متعرفونه زين .... اريد اكوللكم شنو هو علي

علي الي ماينام الليل اذا واحد زعلان علية

علي ماينزل اجازة اذا نليفتر على خواته ويتفقدهن

علي ابد ولافديوم رفع صوته علية

ولا سمع اخو الجبير كلمة اتضايقه

هو الطيبة ...هو النسمة الهوة الحلوة

الي بالبيت

مااطلب من رب العالمين غير شي

يحفظة الية ...ويزوجة البنت الي اتصونه وتستاهل هاي الصفات الحلوة

بس والله وكلام الله

هذا الي احجي الكم مو لان ابني لا

لان اعرف شنو ربيت اني

....جاوبتة امي الي جانت صافنة ومترقبة مني الحجاية

_الله يطول بعمرج وينطيج الصحة والعافية ونعم التربية احنى نعرفكم من احمد

وشكد يمدح بي وباخلاقة

_الله يخليج ام احمد .....

بس الي اريد اكولة من هذا ونصيحة هاي

البنية من يتقدم الة ولد بهيج مواصفات وترفضة علمود اي ان كان

يجوز متحصل غيرة لان الفرصة تجي مرة وحدة بس ..

اني ليش متمسكة بيكم لان كاعد ادور على بنات من زمان بس من صارت سابين كدامي شفت هي هاي الي اتوالمني وتوالم علي ...

سابين مااريد اضغط عليج ....بس اريد اعرف ليش مقبلتي ...

...اني باوعت لامي وكانما اريد واحد يخلصني من هذا الاحراج

التفتت الة

_خالة ....والنعم منكم ....واني متاكدة علي انسان واعي واي البنية تتمناه

..بس اني سادس وكل تفكيري دراسة

...جاوبتة ام يوسف

_وهذا ميمنع الي انريدة ....بالعكس راح انصير وياج

وصلا ماكو زواج الا يمن اتخلصين وانتي الي اتكولين اني هسة مستعدة

....بلعت ريكي

واني مخبوصة بداخلي عندي شي قوي يكلي اقبلي ...بس مااعرف ليش خايفه

سكتت مكدرت اجاوب

_سابين ابنيتي ....

اني اليوم مااطلع منكم اذا مااسمع الموافقة

...امي ضحكت

ولكيت نفسي ابتسم ...

كالت امي

_ههههه خوش حرية .....لا ام يوسف خليهة اتفكر

_لا ام احمد اريد اسمع علمود اطلع

هاااا ام احمد عندج اعتراض خيتي

_لا والله ماعندي

التفتو اثنيهم الية

....منتظرين الاجابة

جنت فرحانة كولش ماادري ليش يجوز .....حسيت راح اصلح الغلط  الي اتصرفتة

سكتت وابتسمت ونزلت راسي

_هاااا ....لعد اليوم راح ابات

....اني ضحكت كتلة ...

_ياريت والله

_ههههه اي صح وهم حجة اجرب النومة يمج ...وغمزت

...اني انحرجت وسكتت

_كالت يعني السكوت علامه الرضى

سكتت وابتسامتي...

صارت اكبر واحس الحرارة بدت اتنط بوجي

_ياالله ....الف الحمد لله والشكر

مبروك حبيبتي .....والله مراح اتشوفين غير الفرح

وكامت وباستني من راسي وكالت خلي

اخابر على علاوي يجي ياخذني

رفعت راسي وكام يدك كلبي من جابت اسمه

وهي غمزت الية

وفعلا بدو  يحجون واتفقو باجر يجون يحددون امور الخطبة والحاظر والغايب

......

اني طلعت من الاستقبال ولكيت ابتسام ففرحانه واجتي شبكتني وكالت

_الف مبروك ....يااحلى عروسة

_ههههه اشوكت اتبطلين هاي العادة مال ورة الباب

_هههه ولج لعد اموت اذا مااعرف شيصير

.....

اني صعدت فوك بغرفة حمزة

لان الشباك مالتة على الشارع

اريد اشوفه من يجي ...مااعرف ليش اريد اركز بس اكثر

وفعلا وصلت السيارة بس منزل بقى بالسيارة وامة دخلت وسلمو على امي وراحت

.........

علي

اول ماوصلت اني ودخلت ...

جنت اتمنى هي تفتح الباب ...اريد اشوف عيونه اريده اتحس بان هي غلطت برفضهة

يمكن اروح اكمشة واكللة ليش ...

ترة متلكين احد يحبج بكدي

بس مو هي الي طلعت

جنت مختنك ....حييل

شغلت السيارة والمح ......اي هي نفس الطول نفس المشية

كلبي راد يكمز من مكانه

اني مو طبيعي .....شسوي انزللهة

اجرهة واركبة بالسيارة واخذة لمكان علمود افهمة اني اشكد احبة

اوووف

اول ماوصلت يمهة وهي منزلة راسة

مكدرت كلشي اسوي

بعدت نظري منه ....وكلت هاي قسمة لو مهما صار هي اذا الي تجيني

واذا لا مستحيل اكدر اخذة

بالكوة وخرت عيني وجنت حاس هاي اخر مرة اشوفه

.....

ضليت طول الساعتين اني افتر بالسيارة

وكلبي مشتعل نار

مااعرف يربي ...راح اضل هيج اذا مصارت

اوووف يربي

اريد الحل منك يصبر كلبي

لحد ما خابرت علية امي

_الو ها يمة

_هااا حبيبي يلة تعال اخذني

_هااا بشري

_اني انتظرك

...وسدت التلفون

خرب بالحظ .....عرفت والله ...

انعل اليوم الي شفتج بي ....لج انتي هيج اتسوين بية سابين

ادز امي ومتقدريهة ...

بسيطة ...

طبج طووب ....

جنت اشتعل بنار واحجي واسولف مثل المخبل ...بالسيارة

وصلت للبيت

دكيت عليهة

طلعت هي وام احمد ...سلمت علية

ركبت امي ...واني اعرف النتيجة

_يوووم ...احجي شصار

_يااااا هاي اشبيك هيج عصبي ...علكيفك وليدي بعدك شاب او وراك زواج

....

صفنت علية .... او وكفت السيارة

_ شنو

_هههههههه مو كتلك الك ومتصير الغيرك

_لا يمه عليج الله صدك تحجين

_ههههه لك هاي اشبيك علاوي ....ولك هيج انت ميت علية

_لا والله مو ميت بس مااعرف كلت ممعقولة راح اتجيبين الموافقة منهم اليوم

_لتخاف علية ....

عرفت اشلون احجي وياهه

البنية اصغيرة وتفكيرة محدود ...متعرف مصلحتة لذلك عرفتة اني ...وغمزت

....جانت الابتسامة المرسومه على وجه علي اتعبر وتفضح الي بداخلة

...كمش ايد امة وباسة

_الله يخليج يايمة .....ويارب يخليج خيمة على راسي

باوعت ام علي لابنة وهي شايفه الفرحة الي متنوصف

_يايمة اشعندي غيرك انت واخوك ....

_هسة اتفقتو ....لو لا

_لا بعدنة .....باجر نجيهم الصبح ونتفق

_واني ...اجي

_ههههههه ابكيفك

....معقولة ياربي صارت صدك ....ولا اصدك

يعني باجر اشوفه واكعد وياهه عادي

الحمد لله والشكر من الله سهلهة الية

.......

سابين

بعد ما اجتي ام يوسف وراحت

اجة بابا ودخل لغرفتة

ماما راحت وراه وضلو يحجون

اجتي امي وهي ضايجة كالت ابوج يريدج

سديت كتابي ورحت دخلت الغرفه

باووع علية وكال وهو متوتر

_انتي من رادو ردج علمود الولد مقبلتي

واليوم اجتي المرة ....غيرتي رايج

اني مااعرف شنو الي حجتة ...او الي صار وخلة قرارج يتغير

بس اريد اعرف انتي موافقة على الولد

لو لا

واذا حسيتي بشوية ماعندج ميول للزواج

يجوز لان انحرجتي او مااخذتي راحتج ...فاني هسة اكلج

انسي كل شي ولتهتمين وابقي مصرة على رايج لان محد راح يتزوج غيرج

.....

افتهمت على ابوية ...حسيت بي خايف علية

بس اني هسة مقتنعه بعلي

واني قابلة بي واريدة مااعرف ليش اتغيرت بس الي اعرفة

اني معجبة بي

جاوبت

_صدكني بابا ماكو اي ضغط او انحراج

اني فكرت ورة ماانطيت القرار حسيت نفسي يجوز اتسرعه

كلت لو امفكرة زين يكون افضل

والقرار طبعا الك ...انت الي اتكولة اني امشي بي

_لا سابين مو الية القرار

الولد خوش ولد ....بس مااريدج ممقتنعه وتجيني وتكولين بيوم انتم ضغطتو علية

...هزيت راسي ...ورحت بست راسة

_اني اعرف خوفك علية ...بس اني فكرت وشفت الكل تمدح بي

اني قراري اول مرة متزعزع جان بسبب الدراسة والضغط ...بس من ركزت شفت مابيهة شي من اقبل بعلي بعد ما الكل مدحت بي

_ها هي لعد سابين ....

والف مبروك

......

طلعت من الغرفه واني افكر واكول صح الخطوة الي سويته ؟؟؟

رحت سديت الضوة وبديت اتخيل شكلة

ملامحة الحنطاوية ولحيتة الخفيفة وتسريحة شعرة الي متروس جل ويلمع

جانت اكو فرحة بكلبي ....بس ليش مااعرف

وكل تفكيري باجر اشلون راح اكعد كبالة

.........

صار الصبح وكعدت من النوم ....او بالاحرى بالكوة كدرت انام

جنت متوترة

ابتسام اجتي وكالت

_يلة دخلي سبحي وارتاحي ...وراح اسويلج ريوك

...كمت سمعت كلامه

مااعرف ليش اني صايرة مطيعه واسمع الحجاية كانما شخصيتي اتغيرت

فعلا دخلت سبحت وطلعت اتريكت

البيت سنطة

احمد ....ملتحق ومحمد يشتغل ....وحمزة نايم

طلعت للكنتور حرت شلبس

بس بالاخير كلت البس تنورة وقميص

وعدلت نفسي نظفت بشرتي وخليت مكياج خفيف

اندك الباب

بس مو دكة باب ...لا جانت دكات كلبي هي الاقوى والاسرع

ضليت اقرة ايات ...ومتوترة حيل

امي طلعت الهم

وابتسام اتحضر الصينية

واني مثل الخشبة صرت

دخلت ابتسام علية

_ولج هاااا اشو كاعدة ولج اجوي ....

وفدوة طالع يخبل ...وكامت تغمز هههههه

_لج ابتسام ..لتتصرفين هيج ترة والله ماادخل

_ههههه بطلت والله بس كومي حظري نفسج

واني كاعد احجي امي صاحت علية

...يمكن انشليت ....رجلية متكدر توكف

_لج ابتسام .....خايفة مرعوبة

_سابين والله كلنه هيج ....بعدين اتكومين تنتظرين جيتة وتحسبين الساعات

_اووووف ....اريد ابجي ....اني وين احجي وهي وين ....مااكدر

_دكوومي اني اساعدج

وفعلا كومتني رتبت شالي واخذت الصينية بايدي واني ادية ترجف

فتحت الباب واني مدنكة

_السلام عليكم

_وعليكم السلام ....حسيت الكل حجة

مشيت وبالكوة اشوف

امدنكة راسي

_اللهم صل على محمد وال محمد

...حجتة ام يوسف

اتقدمت الهة وشفت وجهة الي مليان فرح

ورحت اتقدمت يم علي

رفعت عيني .....واشوف اعيونه الي امركزة بية ..

وماكو اي ابتسامة

بس نظرته خلتني مااحس باي شي بعد

نظرة ماافهم معناهة

بس حسيت كانما البرودة والحرارة ....بدت تمشي بكل جسمي

خليت الصينية كبالة ورحت كعدت يم امي

مرفعت راسي بعد

بس جنت حاسة بنظراته بعدهة مستمرة

لان القشعريرة

بعدهة بجسمي مراحت ...

بهاي اللحظة ...

ام يوسف كالت....يلة ام احمد خلينه نكعد بمكان ثاني نتفق ونخليهم

على راحتهم

يتبع

قصة #بدلة_عرس الجزء السابع

للكاتبة لينه سعد.....

رفعت راسي واشوف ام يوسف فرحانه ...وهي تحجي

امي كالت

تعاي انروح للهول وانخليهم بوحدهن اذا عدهم شي يححون بي او يتفقون على اشياء

_اي والله ام احمد ....

...اني كامشة دشاشة امي ....واهز بيهة

وهي تضحك ..

واخنزر علية

بس ولا كانما ....طلعو واني عيني عليهم

انسد الباب بلعت ريكي

كانما تركوني  كاعدة يم وحش ...يم اسد ....

ظليت دايرة وجي للباب

....لحد ماسمعتة

_هاااا سابين راح اتضلين اتباوعين على الباب هواي ...

التفتت الة ...واشوف الابتسامه مرسومه

نزلت عيني ...وكلبي يدك حييل بحيث مااكدر اسمع اي شي

.....غير دكاته

كال

_تعاي اكعدي يمي

...فتحت حلكي .....ياااا شيكول هذا

جاوبته واني اباوع علية

_لا مرتاحة هنا

_اهاااا زين لعد راح اطبق المثل الي يكوول الي مايجيك روحلة ...

......وكام

انتبهت على طولة....وجسمة المرتب وتسريحة شعرة

وملابسة الانيقه...

ظليت اتفحص كل شي بي ...لاول مرة انشد الة

اتقدم بخطواتة البطيئة ...كانما يكوول ظلي تابعي بهاي نظراتج الي مستمتع بيهة

وهو كل نظراته علية ......اتقرب اكثر وكعد يمي

ضل يباوع علية هواي نزلت راسي ....

_شنو حلمج اتصيرين

باوعت علية ....وجاوبته اجابة عادية ...

_احب القاجاوبني_هاااا شي حلو....

بس تعب

_واني كدة ....

...ابتسم الية

_والنعم ....كده

ليش منزله راسج ....باوعي علية يجوز مااعجبج

باوعت علية ....وكتلة

_اني ميهمني الشكل ...يهمني المضمون ..الي داخل الانسان

......الابتسامه جانت مرسومه على وجه

كال ركزي على عيوني

...رفعت عيني عليهن ....لاول مرة اشوف لونه عسلي

واللمعه الي بيهن واضحة ....

كانما تحجي هواي حجي ...بس مااعرف تفسيرهة ...

دنكت راسي وضحكت

_ليش ضحكتي

._لان مااكدر اركز هواي بوجة الناس

_بس اني مو ناس ....

اني خطيبج ....وراح اكون زوجج بيوم ...

والاهم من هذا ...اكون حبيبج

جان يحجي ....وبدت رعشة بجسمي ...اما كلبي ودكاتة مااكدر اوصفهة الكم

......حبيبي .....

ظليت صافنة بوجة ...جنت مرتاحة

وكانما ماكو احد ...واكدر اخذ حريتي بالشوف

اما هو منطق اي شي

كانما اثنيه مستمتعين بهاي اللحظة

اللحظة الي مااكدر انكر ...هي اسعد لحظة بحياتي

...

وبلحظة انفتحت الباب ..ودخلو اهلنة

بس بقت نظراتنه مستمرة

مااعرف ...ياعلي ....غيرت بيهة هواي شغلات بهاي الثواني الي كعدتة وياك

مااعرف شنو انت ....

طيف ...لو حقيقة .....

حسيت بان اني وانت صرنه رووح وحدة

......

صاريوم الخطوبة ....واني فرحانه

حسيت بان هو هذا الشخص الي اتمناه

بدت كرايبنه تجي

جهزت نفسي ....مكياج خفيف بالبيت سويته

وتسريحةة بسيطة

اما الملابس فجانت عبارة عن فستان بردن

جنت مقتنعة بي هواي

لاول مرة اقتنع ابسرعه ...سبحان الله الله سهلهة الية بدون تعب

ضلت النسوان كاعدة يمي والكل اتسولف

اما اني فجنت بغير عالم ....

جنت انتظر دخولة علية ......جنت متحمسة اشوفه شنو لابس ...شنو تسريحة شعرة

فزيت من احلامي على صوت  الهلاهل

كالو راح يدخل السيد يعقد

دخلت للغرفة وجانت امي ...وعمتي وياية

جنت مدنكة راسي

....بدة صوته يتوضح ....ودكات الكلب تتسارع

حسيت بالحرارة بوجي

اقترب وكال

_السلام عليكم

...رفعت راسي ....وشفتة ..باحلى ملابس

وشعره الي يلمع و متروس جل

وسمارة الي يشبة لون الغروب

وعطرة الي ترس الغرفة

....جاوبتة واني اسحب انفاسي

_وعليكم السلام

جاوبني بهمس وهو يغمز

_طالعه اتخبلين

......الابتسامة رادت تطفر على وجي ..بس بالكوة كامشة روحي

نزلت راسي

واسمع صوت ثاني وهو يسلم .....جان الصوت قاسي غليض يعبر عن شخصيته وقوتة

ارفع عيني

واشوف ...هو نفسة ...الي شفتة بالمستشفى

طولة الضخم  واكتافه العريضة كانما يلعب اثقال او يمارس

احد الرياضات الثانية الي تبني الاجسام

....يوسف....

هو اخو علي الي اتعجبت من هاي المعلومه

عكس علي الا بشي واحد وهو يشبهة هواي

....دخل يشهد على العقد

ودخل وياه السيد

السيد كعد بالنص واني على يمينه وعلي على يسارة

وبدة يترتل بكلمات الطيبة والايات المباركة

ليبارك هاي الزيجة

كلشي مااحس بالدنيا ....رفعت عيني واشوف نفس العيون الي جنت متاكدة ...كاعد تتفحص وجي

التفت واشوف العيون الثانية

الي مهتمة بهاي الخطبة

شفت الاهتمام من الكل وكانما احنى احد الممثلين او السياسين الي الكل مهتمين بيهم

حسيت بالاحراج

خلص السيد العقد وطلع وطلعنة وراه بدت الناس المتواجدة بالغرفه تطلع

واني بقيت واكفه جوة اما علي

فهو جان واكف يمي ....

_مبروك

...باوعت اله

_الله يبارك بيك

استحيت ابقى يمة ردت اطلع

بس هو كمش ايدي وكال وين .....

انتي هسة مرتي

....ياربي موقف استحيت منه ....

الناس برة ينتظرونه نطلع

وهو كامش ايدي

....جاوبتة بصوت ناصي

_علي ....ترة الناس طلعت عيب نبقة هنا

_هو  شنو عيب ....يحجي وهو يعض بشفتة

...

لحد ما امة دخلت

_يلة علاوي ....اطلع النسوان اتريد اتبارك الكم

ولك هسة وكته

_اي يوم طالع

وضل كامش ايدي ....

وحسيت بالعرق والحرارة  الي بيهة ....وكال

_باجر العصر اجيج ...وغمز الية وطلع

وبديت اسمعت الكولات والهلاهل

جنت واكفة بمكاني لحد مااجتي ابتسام وطلعتني من الغرفة

وبدت تعلى  الهلاهل ...واسمع احلى الكولات الي لحد هسة اني مااعرفهن

بهاي اللحظة جانت اعيوني ادور علية انتبهت علية دخل للاستقبال واختفى

ظلت النسوان تتبارك الية وتبوسني ...

واني بعدة فكري ...مشوهة او بالاحرى

مندمج بهذيج اللحظة الي جنت بيهة وياه

.........

بعد مانتهى البارحة ...

واني لحد اليوم افكر بي ..مراح من تفكيري

رحت عدلت نفسي واني مستعدة للعصر

الي راح اشوفه بي

اريد اطلع حلوة ....اريد استعرض انوثتي كدامة

مااعرف ليش هذا الشعور اجاني

بس جنت مستمتعه واني اكلب الكنتور علمود اطلع باحلى شي

وبالاخير ....بعد مااجة الوكت الي اني منتظرتة

طلعت قميص وردي من الجرجيت والدانتيل ...جان خفيف

لبست قطعه داخلية جواهه

ولبست تنورة قصيرة ....كصيفه لونها نيلي ...

طبعا اشترتهة وجنت البسهة بس بالبيت لان مااكدر البسة برة

خليت شال على شعري بس ماحكمت لفتة خليته سايب

وي مكياج خفيف ضبطتة اني

كل هاي التعديلات .....ليش مهتمة بيهة

وكل غايتي اريد اطلع باحلى صورة

جنت مستعدة ادخل للاستقبال

بعد ماكالو اجة

وجانت امي واخوية جوة

كتلهم ماادخل اي صينية اني

لان يمكن اوكعهة من ايدي .....ورغم التوتر الي بعده لحد هسة مستمر وياي بس جنت مستمتعه وحابة ادخل واشوفه

.....

دخلت سلمت ولمحتة بطرف عيني مكدرت اركز بي اكثر

شفت الية مكان مناسب بحيث ابعد انظارة عني

بس متاكدة

بان نظراتة راح اتابعيني وين مااروح

ضل اخوية يسولف وياهه عن مكان تواجدة بالجيش ..

وامي اتزيد بالكلمات ....بكل لحظة اتشاركهم

اما اني فجنت ملتزمة الهدوء

وملتزمة بالنظرات الي اتخاطفهة

علمود اشوفه

بعد ربع ساعه تقريبا امي طلعت ...

او وراهه اخوية

بدت الطبول ادك ....وبدت الاصوات الي بداخلي تتفاقم

وسمعت اولى كلماتة الي جان موجهة الية مثل المدفع

_اي سابين ....اشلونج

...باوعت علية وابتسامه خفيفة رسمته على وجهي

_الحمد لله زينه .....وانت

_هسة صرت زين ......

هااا راح تبقين بعيدة لو اطبق المثل

_ههههههه .....لا راح اجي

ضحكت متحملت حجايتة وكمت وعيونه تصعد وتنزل من علية

كعدت يمة بمسافه بعيدة

_ها شنو سابين ....مااشوفج منا ادني اكثر

....ابتسمت

_شنو هاي علي .....معقولة عندك نقص نظر

_ولج وربج كلشي يمج يصير بي نقص

جان من يحجي . .احس كلماتة تطلع من كلبة

اتقرب مني

وبديت اشم العطر مالتة .....

_وتاليهة سابين راح تبقين هيج مستحية

ولج ماعندي مجال ....اريدج تتعودين علية

_علي اشوية اشوية ...لتنسة انت غريب وماعرفك ...

_لا موغريب بس اتكدرين اصير قريب منج ...بس اريدج اتحسين بية

بدة يمكش اديه ....

ماعارضت

لان متاكدة اني مااسوي شي غلط ...

وهو بعتبار زوجي صار

باووع علية بنظره حب

_انتي من يوم الي وكعتي بصدري ...وانتي خربطتي كياني سابين

واتذكر من وكعتي اتمنيت اشيلج اني مو اخوج

.....جانت كلماتة حيل هادئة الية كانما من يحجي اعرفه من سنين

ظلينه انسولف بهواي امور ...وطبيعتة بالبيت وحبة الاهم والاكبر

لامه والاخوه

_سابين اريد رقمج علمود اخابرج

لان باجر التحق

_صار ....

من عرفت راح يلتحق ...مادري انقبض كلبي ...

معقولة هيج كمت اخاف علية ...

وبديت احبة

شنو هذا الشي الي خلاني من شي ماطيقه الى لحظة اصير احبة واخاف علية

......

بدت علاقتي بي تتطور ....وحبي اله يكبر

اما هو فجنت احس بحبة الية

جان دائما يريدني اطلع وياه بس كتلة مااكدر عندي دراسة

وفعلا بعد مابدت المدارس ....صار عندي ضغط

الدروس ...وعلي

مااكدر امنعه مايجي لان هو متلهف علية

بس احاول اكلهة باوقات فراغي

......

اما اخوة يوسف فبعد خطوبتة باسبوع

خطب بنت خالة

علي رادني اجي بس مكدرت ...

لان مااعرفهم ومااريد اتصير بيناتنه مقارنه

لذلك خابرت خالتي ام يوسف واتباركت اله

وبعد مدة خلصت امتحانات نص السنه

بس تعبت حييل وحتى ضعفت

اجتنة ام يوسف وكالت

_ولج سابين حارمة ابني منج ليش .....

اشوكت اتريحينه

...الكل بدة يضحك امي وابتسام

اما اني صرت حمرة ....يعني شسوي

_ليش خالة ....بالعكس احنى متوالمين

_يامتوالمين ....

الولد يلووب من يرجع يريد يشبع منج وانتي لو اتمنعينه لان امتحاناتج لو عندج دراسة

وخطية هو يضل حاط ايدة على خدة منتظر رحمه الله

_هههههه لا خالة مبقى شي هسة تخلص

...ضلينه انسولف بهواي امور عن الغرفة ...وامور الطابق الي راح اكعد بي

لان اني راح اعزل بطابق فوك

كالت ام يوسف

_ام احمد اني امسوية عزيمة باجر

اريد سابين تجي راح اخلي علاوي يجيبة

وحتى بتول راح تجي اريهن يتعرفن على بعض ...

_اي شكو بيهة بس اكول لابوهة ...

_اي ماشي انتظر منكم الرد ....

من سمعت عزيمة وبتول ويوسف ...مارتاحيت ماادري ليش

لو بودي مااروح

يتبع

قصة #بدلة_عرس الجزء الثامن

للكاتبة لينه سعد

.........

بعد ماطلعت ام يوسف

رحت لامي وكتلة مااريد اروح

مااعرف ليش

.....امي باوعت الية وابتسمت

_ليش اتخافين لاتطلع احلى منج

_هااااي شتكولين يووم ....

اني ماافكر هيج بس ....مااريد اتقارن وي احد

_سابين علي يحبج ...

لو مامقتنع بيج مياخذج وينزل نفسة ويدز امه مرة ثانية علمود تخطبج

اتذكري هذا زين

واني اشووف لو اتروحين تتعرفين عليهم ...

اتشوفين البنية ...

لان مهما كان لازم يجي يوم وتلتقون وتعيشون ابيت واحد

....ضليت صافنة على كلام امي ....منطقي

معقولة اني اغار ....

بس اني مقتنعه بنفسي حلوة

بس لا مو هذا السبب

مااعرف ليش اخاف اشوفه .....

اي يمكن كل هذا الي بية ...لان مااريد اشوفه غامض ويخوف ...

ونظراتة كلهة غرور ..كانما ممقتنع بية

.....كل هاي الخواطر بنفسي ....

الله يساعد بتول ...الي راح تتعايش وياه

.......

خابرني علي بليل ضلينه نسولف لمدة طويلة

سوالفه حلوة متنشبع منه

واني انسى نفسي من يحجي ....

_اي علي باجر اتفقنا اهلي قبلو اجي

_اووووف انوبة اخذ الموافقة من اهلج علمود اشوفج ...

اشوكت اخذ راحتي وياج وتنورين غرفتي

_ههههه يااا غير اهلي ....

واصلا مستحيل اتسوي شي اذا مايوافقون

_هاااا خوش والله ....اريد اشوف باجر اشلون راح اخذ موافقتهم

_ياااا شنو قصدك

_شنو قصدي يعني ....باجر انتي ملكي ....هههههه

_لا علي عفية لاتحرجني هناك ...والله استحي ترة مااجي

_سابيني حبيبتي ...لتصدكين اسوي شي يضوجج او ماراغبة بي

ترة اخاف عليج اكثر من ابوج والله

_اعرف هذا علي واني احس بالامان يمك

احس كانما بجزيرة والهوى مالتة يختلف عن اي هوى ...

احس مثل البنية الصغير الي مليانة فرح و تنتظر فرحة العيد علمود تلبس ملابسة الجديدة

علي اني وياك

انسى كل همي ...مااعرف ليش هذا كلة صار

_اوووف يابة  ....ولج سمعيلي بعد اووف سابين

لج اموت عليج بس اريد سبب الي خلاج  تتغيرين هيج

_تعرف علي بالبداية ماحبيتك لان جنت جسر بتصرفك ...ومراعيت حرمة صديقك ..

كلت هذا يلعب

بس من اتقدمت انصدمت وماردتك بدون ماافكر ....

بس بعد ما حجو عليك بالزين واخلاقك ...كلت يجوز فاهمتك غلط اني

ومن انخطبنة ....عرفتك اكثر

عرفت معدنك ....حسيت بيك حسيت بان مستعد اتسويلي اي شي بمقابل اكون مرتاحة وياك

وصدكني هذا الي كبرك بعيني

حسيت بحبك الية

ولهفتك الي مانقصت بيوم

هو هذا الي جنت اتمناه

_سابين صح كلامج بان اني مراعين صديقي بتصرفي ...بس صدكي لا اراديا بدر مني هذا ...وحسيت اني رايدج وكلت ليش انتظر اكثر خلي اخذهه ....

سابين ....انتي من احس بيج فرحانه كانما اني فرحت .....اووووف  لج اشوكت تخلص البلوة واخذج ...

تعبت والله

_مضل شي حبيبي ...هانت

.........

صار الصبح

واني جنت امحظرة نفسي

لبست بنطرون وياهة تشيرت طويل لحد الركبة ...

وشال ملون يناسب الي لابستة

رشيت العطر الي اشتراه الية علي ....وكمت مااستعمل الا هو

وانتظرت لحد ما اجة ....

نزل من السيارة ودخل جوة .....

دخلت الة بعد ما اهلي سلمو علية

ضلو يسولفون تقريبا ١٠ دقائق ....

وبالاخير كال

_يلة سابين اذا جاهزة انروح

_جاهزة .....بابتسامه

...

رحت ركبت السيارة التفت الية

_اشطالعه ولج اوووف يابة ....

...كمت اضحك على سوالفه ..احب من يتغزل هيج غزل ...

كمش ايدي وصعدهة على شفتة وباسهة

حسيت بملمس شفايفة وقساوة شاربة ...

..جنت مرتاحة وياهه حييل

احس مالكة الدنية

ماكو شي ينقصني بعد ....

بديت احدد خارطة حياتي ....بديت اعرف شنو الي اريدة

والاهم من هذا .....هو الي اريدة

هو الي احب اكمل حياتي وياه

علي .....اسم متكون من ثلاثة حروف

بس يمتلك الحروف كلهة بلهحتة

مااكدر اوصفلكم شعوري واني وياهه

وصلنة للبيت

اول مرة اشوفه ....بيت فخم مساحتة حلوة

حديقة جنة مو حديقة

معتنين بيهة حيل

دخلنة للكراج الي جان طوويل وبينت باخر المطاف سيارة ثانية

عرفت بان هاي سيارة يوسف

انفتحت باب الاستقبال ...ولاحظت يوسف الي فتح الباب ورحب بية بكل ادب

ودخلنة...

بس رغم هذا ....ماارتاح يمه احس كانما مدير مدرسة

شديد ...قوي الشخصية ...

اتبين هاي المعالم من حركات جسمة وطولة

بهاي اللحظة كمشت ايد علي

مااعرف ليش كانما اريد حمايتة

وهو طبعا اشوية وتطلع الة جناحات ويطير

التفت الية وهو مبتسم

انتبهت من دخلنة

اكو بنية متوسطة الطول حنطاوية ...ملامح وجهة حلوة ...ونازكة

اتقدمت الهة بعد ماعلي عرفني عليهة

وسلمت

وجانت كولش حبابة وطيبة كعدت يمهة وعلي دخل هو يوسف جوة

.....

بعد دقائق ....

طلعت النة مرة اصغر من ام يوسف ...

مرتبة

بعد ماعرفوني علية عرفت هي ام بتول ....

جانت جاية

اتساعد ام يوسف بالطبخ

كعدت اكبالي بس هي ممرتاحة ....

حسيت بيهة

لان تتفحصني من فوك ليجوة ...

وابد ماحجت ولا كلمة ...عكس بتول الي جانت متحمسة الية

لمحت علي  من بعيد وهو يشمرلي بوسات هوائية ...

بس اني درت وجي وصرت كانما نار بوجي

عرفت اليوم مراح يتركني

راح يستعمل هذا الاسلوب ....

عود اني فهمتة ...لايحرجني

بس هي امبينة ....اليوم فضيحه

طبعا احاول اخنزر علية بس هو يضحك

ويسوي حراكات بشفايفه...وغمز الية ...

طبعا بالكوة كامشة نفسي من الضحك ..

اباوع على الموجودات بتول اتابع تلفزيون وامهة اتخابر

رجعت التفت علية ......بس

لمحت يوسف من وراه هو يمشي و انتبة النه

صارت عيوني بعيونه

جانت نظراتة حادة .... جافه ...كانما يكول موعيب ...

شنو هاي الحركات

دنكت راسي ...مكدرت  ارفع راسي بعد

درت وجي على التلفزيون الهي نفسي بي واني

محرجة حييل ...

اجة علي كعد يمي وبعدهة دخلت ام يوسف

وهي اترحب بية احلى ترحيب

وكالت شنو هاي

ليش كاعدة

كومي شوفي بيتج ....يلة علاوي فررهة بالبيت ترة انتي مو غريبة صرتي منا

كام علي ....وهو يغمز الية ويكلي يلة

مااحس الا يوسف كال

_اخذو بتول هم تتفرج وياكم

جاوبة علي

_اي شكو بيهة ...بس مو انت خطيبة يلة فررهة

...جانت حجاية علي ثكيلة حسيتة ...

كانما حرجة ...

بس هو كال اي شكو بيهة يلة بتول

بس بتول كالت

_لا يوسف اني افتريت وصعدت وشفت الطابق وكلش حلو ....عاشت ايدك

يعني ميحتاج اصعد .بعد

_اهااا على راحتج

...عاد علي كمش ايدي وكال تعالي ....

دخلت جوة

اول شي افتريت بالهول ...

والمطبخ

جان نظامهم وترتيبهم امبين

متعوب علية ....نزافه ونزامة ...حسيت بان ام يوسف مو عادية ....لا الي شفتةومن ترتيب البيت يوحي ان هي كامشة البيت بقبضو من حديد

اما الغرفة الي جوة فكال علي هاي لامي

...بس متحب احد يدخل بيهة

جر ايدي وصعدنة فوك ...

جان الطابق الي فوك مقسوم نصين ...جهة اليمين ليوسف ..وجهة اليسار لعلي

كال علي

_ادخلين لطابق يوسف

_لا لا لا ......ميحتاج

.....هو اني هيج ومجارعتة انوبة ادخل غرفتة

عاد كال لعد تعالي.... حجيتهه بنفسي

فتح الملحق الي عبارة عن هوول صغير وصحيات ومطبخ وغرفتين نوم ..

جان كولش حلو ...

حتى التخم القنفات شي بديع ...

كال علي

_تعبت لحد مااقتنعت بي

_باوعت لعلي ...بس يستحق التعب

دخلت للغرفه النوم من الباب بس مدخلت جوة شفتة كولش حلوة

جان عاجبني ادخل بس مستحية ماعرف

شفتهة واكفه ادخل بسةاني وياهه

عاد علي جر ايدي حييل ودخلني للغرفة ومن الجرة صرت بحضنة وكال

_تذكرين سابين اول مرة من صرتي بصدري

وهاي المرة الثانية بس برغبتي

وابتسم

جانت عيونه فرحانه .....

ومعالم وجهة حلوة ...

جانت دكات كلبي حيل ادك ....

دنكت راسي

اتقرب من اذني وهمس ً...

_احبج ....

جانت هاي الكلمة خلت الرعشة تجري بكل جسمي كانما زلزال ..وهزني

قربني اكثر لصدرة وهو قابض باطراف اصابيعه على خصري حسيت اني بغير عالم مااحس باي شي ...

رفع راسي وقرب وجه من وجي وشمني

_اووووف ياريحتج ....

باسني من كصتي

ونزل بكل هدوء ورمانسية على خدي الايمن .....وبعدين

الايسر

جنت ساكتة مااكدر امنعه ....لان اني مستمتعه بكل شي وياهه

جانت انفاسة الي تضرب وجي ...وعطرة الي ترس ملابسي

كفيلة بان اتخليني استسلم الة

جنت مغمضة عيني

وهايمة اني وياه .....لابعد امد يمكن نوصل الة

جانت هاي اللحظة الي هو منتظرهة من زمان ....

وحتى  اني الي جنت احلم بيهة ....

بدت انفاسة تتسارع ....ورفع ايدي

او وصلهة لكلبة وكال 

_اسمعي .....مافديوم سمعتة يدك هيج دكة

الا واني من التحق بالجيش

بس الفرق ...هناك خوف ...

وهنا حب

اقترب اكثر مني بحيث حسيت اني ويا جسد واحد

اقترب من شفايفي.....؟؟؟بـــس

كل هذا اختفى وي صوت

رعد .....صوت انذار ..يخليك تطلع من اي احساس انت بي

_احم ...احم

التفتت اشوف هاي اللعيون الي متقصدتني ...

الي متقصدة اتاذيني بنظراته

يوووسف .....

التفتت واني مخترعه ومنحرجة

يربي اشكد عيب ....شنو هاي

شفت علي ابتسم وراح اله

اما اني فدرت وجي ورحت يم الشباك

فتحت البردة وفتحت الشباك اريد اشم الهوة

لان انحرجت حييل

شي صعب وعيب موقفنه مو حلو جان

..عاد اقترب علي

_يلة سابين خلي نرجع ...مثل دقايق

باوعت علية بحدية

وضربتة على صدرة

_ولك والله فضحتني

_هههههه ليش حبيبي ...ترة انتي زوجتي باجر انروح نعقد شنو بعد

_كل هاي وعندك عادي ....

هسة شيكول علينة

_ههههه ميكول هو ....هم خاطب والي سويته وياج يسوي وي بتول واكثر ....وغمز الية

_ياااا ....هاي انت مامنحرج ولا مستحي خرب والله راح اموت اشلون راح انزل بعد

وهو شراد ...منك

_كال تعالو  صبينه غدة ...

كتلة روح جيب جاي ام حسن ....واحنى ننزل

_ههههههه متجوز من سوالفك علي

_هههههه يلة حبي خلي ننزل لان اذا ابقى

انفذ الي بالي

يتبع

قصة #بدلة_عرس الحزء التاسع

للكاتبة لينه سعد

.........

نزلنة من الدرج واني كامشة ايدة ...

وانزل بكل هدوء ...

جنت احس الكل يدري شنو جنة انسوي فوك ..

او لا يمكن اتصورو غير شي

اوووف ياربي ....اشوكت اطلع والله راح اموت

جنت انزل ومدنكة راسي

وكامشة ايد علي.

وصلت للهول لكيتهم فارشين السفرة وصابين الاكل ...

رحت كعدت يم ام يوسف لان مااريد اصير مقابيل يوسف ...

وصار علي مقابيلي

يعني اني وام يوسف ويوسف على جهة ..

وام بتول وبتول وعلي على جهة ...

ردنه نبدي ناكل ....بس شفت علي يخزر علية ....

وهو ياشر بعينة كانما ويكول

تعاي اكعدي يمي ....

بس طبعا اني غلست علية ...

وسويت نفسي مااسمعه ...

بس مااحس الا يعلي صوته ويكول

_سابين تعاي كعدي يمي ...هنا ماعونج

...

ام يوسف التفتت علية وكالت يااااا اي صدك

اشو كاعدة يمي روحي يم خطيبج ...

اني صرت بنص هدوومي

ميتة .....ياربي هذا تاليتي اكتلة ...راح يموتني بتصرفاته

...عاد كمت وكعدت

وكالت ام يوسف ...

_يلة بتول انتي هم يم يوسف

طبعا هي انحرجت وراحت يمه .....

وكل هاي المصايب من علاوي

من كعدت خليت مجال بيناتنه ...بس هو ادنة الية وكمش ايدي وشاورني

_اوكلج لو تاكلين

التفتت الة وكتلة

_لادخيلك والله راح اكل ...

رفعت عيني على يوسف ...

شفتة ملتهي وي بتول ....اشويه ارتاحيت ...

طبعا خلص الغدة ورحنة غسلنة المواعين اني وبتول ...

والبنية كولش متواضعه وحبابة ...

وبعد مكملنة شربنه جاي ...

وضلينة انسولف سوة.....بس اني جنت بس اسمع ...

اشلون يتشاقون .ويضحكون ...

همة جانو كرايب ....

بس اني الغريبة بينهم

بس برغم هذا احس اعرفهم ...ماحسيت بالغربة عكس الي اتصورته

بعد هذا كلة .....شاورت علي وكتلة ترة اتاخرنه ...

عاد هو وكف وكال احنى نترخص لان لازم اوصل سابين

وفعلا كمنة وسلمت عليهم وطلعنة

بس مرحت للبيت اخذني وفررني ورحنى اكلنه موطا ...

وبعدهة رحت للبيت ...بس جان احلى يوم بحياتي مستحيل اكدر انساهه

...............

ثاني يوم جان موعد انروح نعقد بالمحكة ...او وراهه راح يلتحق

طبعا بابا جان معترض على المحكمة ....هسة

جان غايتة قبل لانتزوج باسبوع يالة نعقد

بس علي كال لا من هسة احسن ..

علمود اخذ راحتي اكثر وياج...

بس بالاخير احمد قنعه وكال احسن يعقدون او وافق رحت اني وامي

وعلي وام يوسف

والحمد لله عقدنة على خير ....وبدت الهلاهل بالمحكمة وطشو علينة الجكليت

التفتت لعلي ...وشفت الفرحة الي بعيونه

جانت نظراته كلهة حنية وحب

محد عشق وحب مثل علي

اتقرب اليه

وطلع علبة من جيبة ...

اني جنت متفاجئة شنو هاي

فتحة ...والكة بيهة كلادة ذهب

عبارة عن قلب صغير ...

ولبسة الية ..وكال بهمس باذني

_هاي سابين مو كلادة

هذا كلبي ......اتذكري كل ما متشوفيني راح يبقى كلبي يمج

حسيت بحرارة بعيوني ...

بدت تنسال على خدي دمعات ...واحس بشفايفي ترجف

والقشعريرة بدت تتصاعد بكل مكان من جسمي

جانت كلمتة ...قاسية حييل

كمت اخاف علية اكثر من مااخاف على ابوية او احمد

بديت مااتخيل نفسي بدونه

.....جان دعائي الة اكثر مما ادعي للموفقية الية بالسادس

جان همي الوحيد يرجع الية سالم

مااريد اي شي ثاني غيرة

لو خيروني بين مستقبلي وعلي

راح اختارة هو بدون مايرمش الية جفن

.........

بدت المدارس وكمت اتعب على نفسي اريد اخلص بسرعه

اريد اشوف الفرحة على عيونه

وبيوم جمعه

اندك الباب ....جانت امي بالسوك ...احنى متعودين اذا يندك الباب

لو امي لو حمزة يطلع

بس شفتهم محد موجود ...فرحت للباب طبعا لابسة حجابي قبل لا افتحة ...سئلت

_منو

_اني انور بيت حمدان

...من سمعت بيت حمدان عرفت صايرة طلابة

لان مايجون الا بمصيبة

...فتحت الباب ...جنت منتظرة اشوف رجال جبير معكل ...بس الي فاجئني

شاب طويل اسمراني حيل ملامحة حادة

يمتاز تفاصيل وجة بانف طويل محدب

ولحية شكرة خفية

اما عيونه فجانت اخضر مائل للصفار

يعني ملامحة حلوة

ضليت صافنة علية ....حتى ملابس دشداشة لابس بنطرون وقميص

كانما من اهل بغداد

اول ماشافني ركز بعيني وبعدين نزل راسة وكال

_بلا زحمة الحجي موجود

_اي موجود اتفضل

_زاد فضلج خيتي

....دخل وهو بعدة مدنك راسة فتحت الة الاستقبال ...

طبعا لو مايحجي جان كلت علية من اهل بغداد بس لهجتة بينت هو من العمارة

ورحت لابوية كتلة اجتك اطلابة

بضحك

هو عاد كال منو

_اسمه انور بيت حمدان

_هاااا انور اي خوش .....

وراح وسد الباب

صارت امتحانات اخر السنة ...

وطبعا منعت علي ..يجيني ...

وحتى تلفون ماارد

كل تفكير صبيته على الدراسة ....

وحتى خطار مااطلع كمت ....كلة كاعدة بغرفتي .....مشت هاي الايام

بسرعه

وخلصت ....وبديت اتنفس ...وخطية جان علي كل ماينزل اجازة

ميخلي مكان ...مايوديني الة

وبيوم كال لازم نتزوج بعد ...مابية حيل انتظر واصبر ...

اني معارضتة ...لان اني تعبته

احس امقصرة وياه هواية...وهو ابد مايردلي طلب

جان كولش طيب وياي

كلش متساهل باصعب الامور ...

حتى اهلي يكولون ...والله متساهل وياج

فاني مااحب اكلة انتظر لحد ماتطلع النتائج

وبيوم الي انريد انحدد العرس

جنة كاعدين بالهول نتعشة

دك الموبايل على محمد ....فز محمد من مكانة

عرفت اكو شي ....التفتت لامي امي صارت صفرة ...

كالت بس لا احمد بي شي

كمنة وراه

شفت محمد كاعد يحجي ويكول اي ماشي هسة اجي

امي....

_هاااا محمد ...ولك شكو ...حجتة وهي خترعه وجهة صار اصفر

_لايوم والله ماكو شي ...طالع هسة عند صديقي

اني انوبة كمت ارجف.....

_لاعفية محمد لاتحجيه

عندي احساس علي بي شي

_لا والله ...انتم اشبيكم اتفاولون على الناس ....صار عصبي

وعافنة وطلع

اني كلبي كام يوجعني ....يربي شسوي ...محمد مايتعصب بسرعه

وعلي ملتحق

مااكدر اخابر

لان اذا خابرت ومرد ...يعني هو

ضليت ابجي .....بالغرفه ....

مااعرف شسوي .....امي خابرت على احمد وسمعت صوتة

بس اني ...كمت الووب ...

رحت صليت لوجه الله ودعيت مابي شي

اجتي امي كالت

_يمة ليش ماتخابرين على علي اتشوفينه

...صفنت بوجهة ...

وظليت ابجي ....بحركة

اجتي شبكتني وكالت ولج اشبيج ....

_يووم خايفة .....خاف ميجاوب ويطلع هو بي شي ..

_لا يوم اسم الله ...هسة اخابرة

_لا يمة ....كمت اصيح لا لتخابرينه ...مااريد اسمع اي الشي

مكدرت امي اتخابرة ....وضلت كاعدة يمي واني بحظنة

ادموعي تجري ....

وادعي ربي مووهو الي علية الحجي....

ضليت انتظر محمد واجة الساعه ١١

...رحت الة ركض واني عيوني حمر ....

_بداعت ابوك محمد ......منو الي متصوب

....التفتت الية وهو وجة مامرتاح

_يوسف متصوب

_شنوووووو.......

...معقولة ...يوسف .اشلون وليش

حسيت كلبي برد .....بس مهما كان هذا حماية ...وحسيت بتول شنو شعورهة هسة

_اشبي محمد شنو الي صار

_اهوووو والله كلبي خلصان ....

الله يساعدة

_شنو محمد ....والله خرعتني

يعني حالتة خطرة

_اي والله خطرة .....محترك ...خطية

وبجوز متشوه وجة

_يااااااا عزا......خطية ...اويلي عليك علي اشلون راح يتحمل

اوووف وخالتي اشلون بيهة

_ام يوسف متدري .....ابن خالة خابر علية وكال ...

.....اشكد انقهرت من سمعت بي ...

هو حلووو حرامات هيج صار بي

_بس فهمني ..اشلون احترك

عبوة انفجرت بالهمر ....وبالكوة طلع منهة

بس والله سبع ...طلع نفسة من الموت

بس ان شاء الله يتعالج ويرجع

_امين يارب ....ويصبر امة وخطيبتة

رجعت لغرفتي ...واني تعبانه من القلق الي صار بية

وبجيت حيييل ......بجيت بحركة

كلت اشلون بية ......اني احبة حييل .زين اذا صار علية شي

اني شيصير بية

هسة هذا اخوة وهيج صار بية ...

لعد هو اشلون

بس ياربي .....الك حكمة بكل شي ...يارب اخذ من عمري بس يبقة سالم الية

بس اريدة .ومااريد غيرة

.......

طبعا العرس التاجل ....ويوسف صار زين

بس علي تعب حييل

جان وجه اصفر

بس اني صرت وياه ...معفتة ابد بهاي المحنة

حتى ام يوسف معفتة

بس علي مقهور حييل جنت دووم اصبر بي

واكلة اشكر رب العالمين طلعه الك سالم ومابي شي اما اذا

حرك بوجة يتعالج ويصير بخير واحسن

جانت هاي دائما كلماتي اله

بس هو يكول ....

_يوسف اتغير حييل صار عصبي وميتفاهم وكاره الكل

حتى خطيبتة يكول مااريدهه تجي للمستشفى

حتى وي امي ميسمع ححيهة

وميريدهه تجي

_اكولك علي ليش هو وجه متاثر هواي

_لا والله مو هواي بس خدة ويتعالج ويرجع احسن

بس هو نفسيتة تعبت

الحروق اكثر شي بجسمة ...

والالم مو طبيعي

_اووووف ياربي الله يصبرة وينطي الصحة والصبر

_امين يارب

سابين حبي ...راح ااجل الزواج هسة

_لا علاوي حبيبي ....عادي مااريد شي بس ترجعلي سالم واهم شي اكل مرتاحين

......طبعا طلعت النتائج ...

وطلعت معدل ٩٢ وجنت طايرة من الفرحة

وحتى علي فرح حييل

من شاف معدلي هيج

وجابلي هدية ......احدث موبايل

طبعا فرحتي شفتة بعينه

ويوم الي اجة بي الية .....جنت متحظرة نطلع كعدنة انسولف ونتشاقة

وكتلة راح ادخل قانون

اشو هو دنك راسة ...وسكت ....

اني ضليت متحيرة....

_اشبيك علاوي ...اشو سكتت

_لا ماكو شي

_لا اكووو ....شنو متريدني اكمل كلية

_لا بالعكس ....بس مااريدج ادخلين قانون

طبعا انصدمت هذا حلمي اشلون ماادخل الة

ضجت حيل من حجايتة

_ليش علي مو كلت اتي وياج ومستعد اسوي الشي الي اتريدين

....التفت الية بنظرتة مو هذيج النظرة الي دووم احس بحنيتة وكال

_ولحد هسة سابين .....واتصور مافديوم قصرت وياج ...انتي فرحتي

بس مااكدر ...مااتخيلج يم ولد اداومين صعبة علية ماتتحمل احد يباوع عليج وخاصتا

هسة راح اتروحين كلية ...

مااعرف اشلون راح اتحمل

يتبع

قصة #بدلة_عرس الجزء العاشر

للكاتبة لينه سعد

...........

مفهمت شنو ولد

ليش هو مواثق بية ...

زين لو احول على غير كلية مو اكو ولد

جاوبته بكل عصبية لان متحملت ...ماتصور هيج تفكيرة

_بس فهمني لو احول على غير كلية يعني ماكو ولد؟؟

شنو الي ابالك فهمني

...

_سابين مو القصد الكلية ....

سكت وضل صافن ويهز برجلة

اولةمرة اشوفه هيج وجاوب بكل هدوء

_شلون زوجتي تشتغل بمحكمة وتدخل مركز شرطه

ويجوز هواي شغلات اني مااعرفه

_لا علاوي مو شرط اصير امارس المحاماة بالمحكمة  يجوز اتعين بدائرة ..بالقسم القانوني

باوع الية .....وكام وكال ....

_سابين ....اني مامقتنع اصلا بالتعين هو هذا كل قصدي

فتحت حلكي ....يعني هاي الهوسة علمود التعين ...كلت خلي ابرد كلبة

كمت الة وتقربت منة وكتلة علاوي

ولمست خدة وباوعت لعيونه

_هسة انت حاسبتني على التعين واني بعدني مداخلة كلية

شفتة كانما ارتاح من حجيت وياه....

_صدكني مااتعين بس اريد ادخل الكلية

...رفع ايدي بشفتة وباسة وكال

_لخاطري سابين ...ادخلي غير كلية ....

ادخلي تربية ...وحتى لو تتعينين اقبل

لان المدرسة هي هاي وضيفتة

جريت ايدي ودرت وجي بحركة ....وقهر ...

وتنفست

_لا علي مااريد اني مقررة على القانون ومااكدر اغير حياتي

جنت دايرة وجي واحجي وياه

_لعد ماشي سابين .....ابراحتج

التفتت اله .....

يعني شنو براحتج ...

لكيته فتح الباب وطلع

اريد اركض وراه اريد .....الحك بي

شفتة بسرعه طلع

حتى ملحكت احجي ......

رجعت واني مصدومه من موقفة ....

هذا صدك ديحجي .....عود شنو قصدة

دخلت للاستقبال واني مااعرف افكر ....شنو يعني

طلعت من الغرفة

الكل انصدم من شافني طبيت

لان متوقعين نطلع

الكل يحجي وياي واني مااسمعهم

دخلت لغرفتي وكعدت على جرباتي

مداافهم ....معقولة يعوفني

مااحس الا عيوني بدت تجري

وكلبي وجعني حييل

دخلت علية امي ....وشافتني

_يااااا اسم الله الرحمن .....اشبيج سابين

مسحت دموعي وسكتت

رحت ابدل ملابسي

وهي مكابلتني وصافنة

_يااااا مو احجي وياج ....ولج شكو

اتعاركتو

كعددت بالكاع ابجي وخالة ايدي على حلكي

مااريد احد يسمع.....

اجتني حضنتني ....وكالت كومي بدلي وغسلي وجج وتعالي احجي

ترة عادي اذا اتناكرتو ....كل اثنين مهما كان الحب بيناتهم

لازم يتعاركون او اتصير نفسياتهم ضيكة

وعلي يحبج وانتي اتحبينة ...ساعه شيطان ...يلة حبيبتي

....ارتاحيت من سمعت حجاية امي

رحت غسرت وجي

مسحت المكياج الي جنت تارسة وجي بي

رحت كعدت بالغرفة ...

اجتي امي وكالت يلة احجيلي

...حجيتلة كلشي صار

طبعا احجي وابجي من كل كلبي

امي ساكتة وتباوع

كالت

_كملتي

_شنو يعني ماما  .....يعني بيهة غلط

_لا سابين مابيج اي غلط ....

وحتى هو مااعندة غلط

...باوعت لامي .....شتكول ياااا

_شلون مابي غلط ...لعد اذا ماكو غلط

ماكو مشكلة واني علويش ابجي

_وهو هذا الصحيح ...ماكو مشكلة

الولد ميريدج ادخلين قانون ....يجوز عندة شغلة ابالة يخاف منه

يجوز مايريدج اتكملين ..يريدج بس الة ولبيتج

_ماما شتحجين انتي كل هذا التعب والركض والسهر بالاخير مايريدتي اكمل

_داافرض اني مكتلج اكيد...بس هو اقترح عليج اتكملين تربية ...يعني قابل على الدراسة

وشبيهة التربية حلوة ....ومناسبة للبنت

....ضليت فاتحة حلكي .....

هاي امي شتحجي اشو صافة  وياه ...

_يعني انتي قابلة اغير حلمي وتعبي ...لكلية ماارغبهة

_اني معلية ......سابين راح اعلمج شغلة انتي متعرفية ......لان بعدج اصغيرة

الرجال اتشوفينه يحبج ويسوي الي اتريدينه ويشعلج العشرة شمع

بس من يصمم على شي

او يحس كلمتة تنكسر

يدوس على كلبة ....ويسوي الي يريدة

فانتي اذا شاطرة قنعي

او اذا اتشوفينه مصمم ومعاند سوي الي يريده وبالخير انتي بالحالتين مخسرانه

لان راح يقدر انتي ضحيتي باعز شي علمودة

وصدكي مراح ينساهه

ترة وعلي مو ولد عادي وتخسرينه

علي مستحيل اتحصلين مثلة

ففكري زين وقرري ....وهذا الشي راح يتحدد مصيرج

......

عافتني وطلعت .....

وضليت حايرة ...شفت اقرب شخص الي والي هي امي

ماانطتني الشي الي يريحني

يعني بس اريد اعرف .....اذا ماوافقت يتركني ويروح ...

لعد هو ميحبني

ظليت الليل كلة افكر .....بس منهارة

مو لاجل الكلية

لا بس متصورت يضحي بية علمود هيج شي

اتذكرت اليوم الي سمعت بيوسف اتصوب

واتخيلت علي هو الي بي هيج

جنت ادعي من ربي ياخذ عمري لعمرة

يعني اني اريد اضحي بعمري لخاطرة

زين ليش هسة مااسمع حجايتة

وهو ابد ماغثني بكلمة

ولا زعلني بيوم

نمت واني التفكير .....مستهلك كل طاقتي

مر اربع ايام ....واني مشايفتة

جنت تعبانة متصورت بعدة عني وزعلة علية هيج يأثر بية ...

جنت نايمة ....اجتي امي وكالت علي اجة

فزيت من نومتي والابتسامة على وجي ...

_صدك

_ههههه اي والله دروحي عدلي نفسج ومشطي كفشتج لايشرد الزلمه

......

امي طلعت ....حسيت بدموعي نزلت ....

_مااكدر ياربي احبة ....

جان كلبي يدك بسرعه ....

وادية ترجف ...كانما اول مرة راح ادخل الة

رحت غسلت وجي

ولبست احلى لبس عندي

تشيرت ربع ردن ......وبنطرون

وسشورت شعري

وحطيت مكياج بسيط

وكعدت على الجرباية

....زين اشلون من ادخل ....راح يعرف بتعبي من وراه؟؟

راح يحس بية من عافني ومااتصل ابد

وشنو الليل الي عدة علية ؟؟؟

كمت واني اسمع كولش زين دكات كلبي الي كل مااتقدم من الباب اتزيد اكثر

باوعت لامي بالمطبخ

وابتسمت الية واشرت بايدهة روحي ....

ابتسمت الهة وفتحت الباب ....

شفتة ......

شفت هذاك القميص الماروني ....

والبنطرون الاسود

شفت عيونه الي بدت تنظر الية و تلمع ....وشعرة الي متروس جل واللمعه ماخذة شمرة

جرت المشط علية

وبدت انفاسي تنترس  بعطره

اليي بديت اتخيل نفسي واني بهذاك المشهد

بين صدرة........... جوة تفاحة ادم واني احاول اقتطفه 

واني مستسلمة الة وابرادتي

اتقدمت الة ....وكف الية .....وبدون اي كلمة

نزلت دموعي

وركضت لحظنة .....

حظنة الي مستحيل اكدر ابتعد عنه ....

هو الوطن

هو الامان

شميت عطرة ....وسمعت دكات كلبة

عرفت اني عندي استعداد اخسر اي شي ...

بس مااكدر اخسرة

سمعتة يحجي وهو حاضني ....

ويشم شعري  ...والرجفه بحجايتة

_سابين .....ياحياتي كله ...ياالواني الي لونت الي لوحة حياتي

لتبجين ياعمري ....مااكدر اتحمل والله

رفعت راسي......واني اباوع لعيونه

وهي ذبلانه ..

لج مااكدر ازاعلج لو ابتعد عندج ..

انتي اذيتيني ....

مو علي اني سابين .....مو علي اني

_جاوبتة والرعشة بشفتي ....

_علي انت اذيني من يوم الي طلعت

نوم ماانام ...

اكل مااكل

راسي يوجعني من التفكير ....ليش هيج

علي اني احبك

من حجيت هاي الحجاية شبكني حيل

وغمر راسة بين طيات شعري

وهو يتنفسني

رفع راسة

وباس راسي ...

وبدت انفاسة الي تطلع من شفاه

تنطبع على كل معالم وجي

حسيت بان اني طايرة ...وكل هذا البجي اتحول فرح ...

والله عوضني سهر الليلي

بهاي اللحظة

بهاي اللحظة كتلة

_علي ...قدمت للكلية ...

هو كال الي يريحج سوي ....

ابتسمت وكتلة ...

_مليت الاستمارة ...لكلية التربية

شفتة الابتسامة ملت وجه ...

_صدك تحجين ....

_وداعتك انت.....يااعز شي عندي ...

كعدت وي نفسي وقررت

منو اختار ...شفت لو خيروني بين حياتي وانت

صدكني راح اختارك

..........

من بعد هذا الموقف .....

اتوضحت هواي امور النه

مو كلشي نتعصب علية وانكول انتهت حياتنه لحد هنا

الواحد ينطي فرصة ....يجوز الي انريدة هو شر النه ...واحنى منعرف

ومن هاي اللحظة عرفت علي شنو ....وهو عرفني ...

بديت اداوم الكلية

والحمد لله رغم اني مااحب قسمي الي هو اللغه العربية

بس حاولت اندمج وياه واحبة غصبا عني

وبيوم الي لازم الخط يجيني يرجعني للبيت ...

خابرت علية كال مااكدر اجي لان عندي تصليح

اضطريت اركب عبرية

مع العلم اني اول مرة اركب مامتعودة

بس اني احب اعود نفسي دائما على الاشياء الي ممسويته

لان منعرف الوكت اشضام النه

لذلك ركبت العبرية وذبتنه بالشارع العام

ورجعت مشي

دخلت لفرعنة ...وامشي واحس سيارة اجتي ومشت من يمي او وكفت يم بابنة

اتقربت اشوف رجال معكل نزل .

ونزل شخص معكل ثاني ...ويحجي وياه

اتقربت شفت اكثر .

هذا ابوية اجة من العمارة

لعد الي وياه منو ...

يااااا......

اي هو .......هذا انور ...بس لابس عكال

جان شكلة حلو

وغريب

اول مرة اشوف شاب لابس عكال .

مع العلم اني مااحب العكل ....بس ابوية احبة هههههه

اتقربت اكثر وصلت يمهم

_السلام عليكم

اشلونك بابا

التفتو الية

جاوب بابا

_وعليكم السلام هلا والله

طبعا...مكدرت احجي وي الولد لان مااعرفة بس دخلت بسرعه

بس الي لاحظتة

هاي المرة ركز بية اكثر الوقت ..... الي وكفت يمهم

يتبع