تحميل رواية «بدلة عرس» PDF

قصة #بدلة_عرس الجزء الحادي عشر

للكاتبة لينه سعد

بديت اداوم اني وزينه .....

احنى بقينه سوة دخلنة نفس الكلية

بس هي بغير قسم

وعرفت اخوهة اتزوج ....

ابصراحة ابد مفكرت بي ....وشكرت رب العالمين مصار الي بالي

وعوضني بعلي

جانت مواد القسم صعبة حيل ...

واني اصلا اكره اللغه العربية ....بس يمكن عاندت نفسي ودخلت

بدت الامتحانات والكورسات ...والضغوط ..

بس رغم هذا كلة بقيت وي علي على نفس غرامياتي وهوسي وحبي اله

لحد ما اجة اليوم الي قررنة نتزوج بي ورة امتحانات نص السنة

اني وافقت لان ...حسيت تعب هواي

وانتظر اكثر مماراد

والصراحة اني هم مليت .....حبيت استقر

واعيش كل لحظاتي وياه

وطبعا كال راح اطلب  اخذ اجازة  

وقررنه انروح

للسوك ونشتري النيشان والذهب

طبعا علي مو ويانه جان ملتحق

واول مارجع

سوينه حفلة نيشان ضخمة ...

لان اني بتهم الوحيدة ...فاهلي التزمو بكل شي

اكو عوائل ...اهل البنت هي الي تهتم بهاي التفاصيل

واكو عوائل لا....اتكون على اهل الولد

احنى مجان عدنة اي اعتراض لامنهم ولا من عدنا ....

وفعلا رحت للصالون اختاريت البدلة والي جان لونهة فستقي

وحلوة اتخبل ...

اما الصالون عند ارقى صالون بغداد

يعني من باوعت على نفسي ....مو اني ..

شي غريب وحلو

اول مرة احط هيج كمية مكياج او اخط قلم بعيني بهيج مهارة

جنت كاعدة ومنتظرة فارسي....حبيبي ..

احلى شعور جان ينتابني

دخل علي ....مغير تسريحة شعرة ولابس القاط جوزي

جانت دخلتة هيبة ....والكل انعجب بي

اما هو فجان منحرج لان بس ولد بنص نسوان ...

وبدت الهوسة ...والركص والاغاني

بدينة نتعود على الجو ...

وبديت احس باطراف اصابيعه وهي تلامس اطراف اصابيعي

جان شعوري مينوصف ...

وبدة يلبسني الذهب .....اما الحلقة فالرعشة والموقف ...من توكفين كدام الكل ...

وتلبسين احلى شي تتمنين اتلبسينه

وهو ......بدلة عرس.....والحلقة

اما الحلقة ....الي اتربطج بحبيج ...لطول العمر

وتعلن للعالم كلة

اني ارتبطت ...مامن حقك امتلاكي ......

شعار حلو ....اتشعرين انتي ملك لواحد وبس ...

وما من حق

الجميع امتلاكة

......

انتبهت على بتول ماكو

_عللاوي ...اشو بتول ماكو

_مكدرت تجي ...

_ليش ....

_بعدين تعرفين ..

....

جنت حايرة ليش ماكو ...وحتى امه ممتواجدة

خلص النيشان ...

وجانت الدووخة هي بدلة العرس

طبعا رجع علي التحق ...وهذا راح يكون اخر التحاق اله

لان يريد ياخذ اجازة ....

اما اني فضليت حايرة ابدلة العرس

ضليت يومين افتر عليهة ...

مخليت مكان مرحت الة مجان شي عاجبني ...

حتى امي كالت هي كلهة نفس الشي

اما اني فمقتنعه

اريد البدلة الكل تحجي بيهة ....اريد احلى بدلة لان مو كل يوم اتزوج

اريد شي مميز

وصلت المحل واني اكلب بي كل البدلات

لحد ما وكعت عيني على هاي البدلة

_اي ......هي هاي

....جنت ممصدكة ....رووعه مو بدلة جانت تفصالها مشايفه منة

وممتكرر

رحت الهة وكدرتة

جانت كولش غالية الايجار مالتة

امي ضلت اتجادل وياي ابو المحل

اما اني

فجنت بغير عالم .....جنت اتخيل نفسي من لابستة وعلي واكف يمي

واحنى نتصنع احلى الوضعيات علمود الصور الي اتوثق احلى يوم بحياتنه

_امي كالت غالية ....

وكفت كتلهة

_مراح ااجرهه ....

_هاااا سابين لعد منو راح تاخذين

_راح اشتريهة

_يااااا ....ولج غالية

.....باوعت الهة واني جان قراري واحد

_راح اشتريهة ماما

امي شافت الفرحة بعيني وشلون حبيتهة

مكدرت اتعارضني ...قبلت

طبعا طايرة من الفرحة ....اما من طلع الية الطرحة ...ممصدكة

شنو من جمال ...ومسكة الورد الي اخضر وابيض ووردي

رجعت للبيت وهي البدلة على كلبي شايلتة ....

والفرحة بعيوني والدنيا مسايعتني من الفرح

جنة محددين العرس الخميس

جنت امرتبة كل شي

وبليلة ...حلمت

اني دخلت لغرفتي ...ومستعجلة

اريد ابدل بدلة العرس ....لان بدة العرس واني مامستعدة

وحايرة اشلون راح اكمل

دخلت غرفتي الكاهة هوسة

كلشي مطشر .....مااعرف منو دخل وخرب الاشياء مالتي

مهمتميت كلت خلي ابدل ...لان علي هسة منتظرني ...

رحت فتحت الكنتور ....وطلعت البدلة

بس.....

شفت البدلة متكصكصة ...وكل قطعة توكع

انصدمت وضليت اصرخ

لاااااااااااا .......بدلتي .......

اشلون راح اتزوج .....اشلون الحك اشتري وحدة ثانية

كمت الطم على خدي

وفزيت من نومي واني مرعوبة

ودكات كلبي تتسارع

ركضت على كنتوري .....فتحتة واكلب بالبدلة

لكيتة نفس وضعيتة

وكلشي مابيهة

_اعوذ بالله من الشيطان الرجيم

يارب خير

رحت اتوضيت ....وصليت صلاة الفجر

ضليت كاعدة للصبح ...

واني كلبي مقبوض

امي كعدت ...

_هاااا اشو اليوم من الصبح كاعدة

_اي مااعرف اشبية  ...حلمت حلم ومقبوض كلبي

_بسم الله الرحمن الرحيم شنو

....حجيت الهة الحلم

....كالت هاي انتي مرعوبة من العرس لان اقترب ...وهذا الشي عادي

كل ابنية تتحلم ونفسيته تتغير

لان راح تتغير حياته

...مااعرف ...بس جان كلبي يوجعني بس كلت يجوز صح كلام امي

صار الليل واني بغرفتي مااعرف تعبانة

ونفسيتي مااعرف اشبية

حتى اكل مااكل زين ...

سمعت امي صرخت ....طلعت ركض وايدي على كلبي ...

وجنت حاسة علي هاي المرة ....

من وحدهة ادموعي. نزلت

جانت دكات تخفق بسرعه ....

جنت واكفة متسمرة بمكاني واشوف الكل مخبوص

بدون مااعرف اي شي ...

كانما عيوني مستعدة للبجي

ابوية ركض واني بنصهم واكفة ...مااحجي اي شي ...مااريد اكول شي

محمد جان واكف وباوعلي ......

واحمد دخل من الكراج ونظرة عينة تختلف

محجيت شي ...التفتت لامي كاعدة على الميز تبجي وحاكة ايدهة على راسهة  ...

شفتهم انخبصو ....حيل

...مااعرف اسئلهم لو لا ....

زين اسكت علمود ميطلع  الي بالي صحيح

لو احجي واسكت  الفضول ...والحركة الي بكلبي ..

كل هاي وندمي تنزل

مشبت بخطوات مهزوزة .....متحيرة

خايفه

وكفت كبال احمد وسئلتة ...برعشة ولساني ميريد ينطقهة

_احمد علي بي شي

....شفتة غمض عينه .....وجاوب

_ان شاء الله يصير زين ور........

بدون مااسمع اي كلمة ثانية

....صارت الدنية مغوشة  بعيني وبدت الملامح اتروح بالتدريج ....

بس شفت علي وهو لابس احلى ملابس

قاط الاسود ....وعطرة المميز

وهو واكف كدامي ...والابتسامة مرسومة على وجهة ....وكال

_سابيني ......حبيبتي ....

كملي حياتج

اني لكيت غير زوجة

رحت الة .....والدموع بعيوني ...

_ليش علي .....مو اني احبك ...

لا مو بس احبك اني اعشقك ...اني اموت اذا اتعوفني

اشلون اتريد تزوج وحدة

مستخيل اتحبك اكثر مني

او تطلع احلى مني

ليش تتركني واني غيرت كلشي بحاتي علمودك

وانت غيرت هواي صفات بحياتي

ليش قصرت وياك ....حتى جهزت البدلة

وهاي المن البسة

جاوبني والابتسامة على وجة

_حبيبتي ....راح يجيج نصيبج ....لان مو اني نصيبج

ودار وجه ومشة

واني اركض وراه ....

لا علي انت نصيبي ....

علـــــي .....علــــي

لاتعوفني والله مااكدر اكمل بدونك

........

فزيت على صرخات  واني اكووول

علي .....

لكيت نفسي ....معلكيلي مغذي بغرفتي

وامي يمي كاعدة

_شنو الي صار...

...اتقربت امي ....

_ماما والله علي كلشي مابية بس متصوب

....باوعت اله وكتلة ...

لا ماما علي مات ....وانتم متحجون الصحيح

_ولج والله عايش ....بس تعبان

ضربت خدي ...حيل وبجيت

_سودة علية ....علي ....متوجع واني هنا نايمة ومرتاحة

اريد اروحلة

اريد اشوفه والله مااسوي شي بس اشوفه

_ماشي سابين بس صيري زينه وانروح ...

_لا والله هسة اروح ...

بس اشوفه والله كلشي مايصير الية ..اني زينه كلشي مابية

......

مر يومين ....واني على وضعيني ...

وجي اصفر ....

ومااعرف شنو بالمستشفى ....

اشبي ...عايش لو لا

وصلت لابوية جان بغرفتة

جانت حالتي تعبانة

وعيوني مورمه من البجي

وابوية يومين مشايفني ....ميكدر يدخل الية

عرفت الشغلة كولش جبيرة

رحت الة وصرت كبالة ....

_بابا اريد اروح هسة لعلي

...ابوية باوع الية ....وعيونة تتحرك علية

مكدر يحجي اي شي

كال

_بدلي واخذج

بدلت وامي مقبلت عارضت ...بس ابوية كال اريدهة اتشوفه

رحت بس اني وابوية

وصلت للمستشفى

اشكد جنت اكرة ريحة المشفى

الديتول الي يضرب انفاسي ....جنت بالكوة متحملة

كل ذكرياتي

اجتي اول ما دخلت للمشفى

اشلون من وكعت وشفتة كدامي

وهو يمد ايدة علية ويريد يساعدني

بدت ادموعي تنزل

وصلت للطابق الي متواجد بي

بس شفت .....

يوسف

الي اول ماصار كدامي من بعيد ميزتة

جانت ايدة ملفوفة

اول مرة اشوفه من بعد مااتصوب

بديت اتقدم

شفتة لمحني ...بدت تتوضح الية صوروته

ونص وجة الي باين علية الحرك

اتقربت حسيت بنظرته ...كانما يكول اشعندج جاية

دار وجة وابتعد

مكدرت ادخل للغرفة ممنوع الزيارة

بس شفتة من بعيد

ياربي.........لا .......هذا علي

الشظايا تارسة جسمة العاري

وشكلة

مو هو

حطيت ايدي على حلكي

اريد اسكت صرخاتي

رجلية خانتني .....ومكدرت اتشيلني وكعت بالكاع واني ابجي

بس الاكثر الوجع هو بكلبي

ابوية اتقدم الية ...وباوع لعيوني وكال

_سابين ....علي متاذي حييل

واني جبتج علمود اتشوفينه لان مااريدج اتضلين بحسرة

اريدج ترتاحين ...اعرف صعبة عليج شفتي هيج

بس هو سبع وراح يطلع من هاي المحنة

باوعت لعيون ابوية واني اترجاه

_عليك الله ....اشبي هو

_غمض عينة وكال ...كلهة بسيطة

المهم بس يكوم سالم

_يعني شنو....فهمني

_فقد رجلة .....واكو شظية بالكبد

وباجر عملية

اذا سواهه يطلع سالم ان شاء الله

...فتحت عيوني

شنو ...

كصو رجلة .....ظليت ابجي ازيد

وابوية حظني حييل

كتلة

_والله يابابا ...لو رجلة اثنين ماكو ...

قابلة بي ....بس اريدة يمي ...اريده هو يكمل وياي حياتي

يتبع

قصة #بدلة_عرس الجزء الثاني عشر

للكاتبة لينه سعد

فتحت عيوني بكلل الم بكل تعب

متريد جفوني تنفتح بديت  ....

واني الاحظ ريشة البنكة .الي تفتر بكل ملل

وتصدر هاي الاصوات الكئيبة

واحد....اثنين....ثلاثة....

وحدة ورة الثانية ....تفتر مثل الدنية اتفرنة

مرة بالشمال ....ومرة بالجنوب

رفعت ايدي لوجهي ....وابتسمت للحلقة الي امزينه ايدي ...قربتة من شفتي وبستة بكل حنية وعذوبة

اتلمست صدري واحس بكلبة ....يم كلبي

رفعت السلسلة لعيوني واشوف

هذاك القلب الصغير...

اتذكرت كلمتة الي وهو يهمس بكل هدوووء

_سابين هاي مو كلب عادي

هذا كلبي راح اخلي يمج

بدت تنزل الدمعات من عيوني ...

وتوكع وحدة ورة الثانية  على المخدة الي ماجفت من هذاك اليوم ...

شلت راسي من المخدة وهو كانما مخدر

واني اشوف الدنية رمادية ....مابيهة اي لون

مابيهة اي طعم

كمت واني امشي بخطوات غير متوازنة

بخطوات كلهة كئابة

رحت فتحت الكنتور ...وطلعت البدلة

الي باقية نفس مكانة ....مامارست شغلة كبدلة عرس

اتخلي بيهة العروسة بعيون عريسه

اتلمست القماش ...واتلمست الخرز الي ماليتهة

......

سديت الكنتور ورحت للميز

باوعت على وجي اتلمستة .....شفت مو اني سابين اني ووطلع

ثانية مااعرفه

وحدة محطمة ....تعيسة ....مخذولة

جانت اصابيعي تفتر على كل معالم وجي

على شفتي على عيوني

على خدي

اتذكر كل هاي الاماكن جانت تتخلى بشفتة

اخذت شيشة العطر شميتة....لا مو بس شميته

شميتة حييل اريدة تبقى بانفاسي

مااريدة تنتهي ...

جانت القطرات قليلة بيهة

بس ادووم وي انفاسي للابد

رشيت الغرفة

رشيت المخدة ....مااريد انساه

كلشي يذكرني بي

علي .....

كانما كل الحروف تتجسد بنطقك ..

علي كانما جميع الارقام بيك ....

اشوكت اشوفك ....تعبت واني بهاي حالتي

رحت ككعدت على الجرباية ...

واني اتذكر كل تفصيلة من جسمه المتروس شظايا

كل نفس جان يطلع منك

جنت مستعدة اتقبلك نفس ماانت ....بس متعوفني وتروح

علي ....انت من رحت خليتني جسد بلاروح

خليتني هيكل بدون غرف

بديت اتنفس العطر الي ترس الغرفة غمضت عيني

وبديت ابتسم

بعدك موجود .....بعدني احس بيك

مستحيل شي يخليني انساك

بديت اتذكر المأساة ....

اول ماسمعنه باستشهادة .....

جان يوم مو عادي .....

جان نفس اليوم الي ناوين نتزوج بي .....يوم الخميس ...

مااتذكر بعد اي شي

كل مااحاول  اتذكر شنو الي صار ....

مااتذكر ....

ليش ...

مااعرف ..

وهاي ست اشهر مرت ...

واني بهاي حالتي ....

اسمع ضحكات اهلي .....

اسمع سوالفهم ....

اسمع مناقشاتهم ....

اباوع ...اشلون يكدرون يضحكون ....

اشلون يكدرون ياكلون

اشلون ينسونه ....اشو اني من هذاك اليوم لحد هذا اليوم واني مامتخيلتة مات

ليش مو مثلهم اني ....كانما طيف  مو بتهم وكاعدة يمهم

عزلت نفسي منهم ...كرهتهم

او بالاحرى كرهت الدنيا ومابيها

......

دخلت امي ....وهي اتباوع علية نفس نظراته المملة ...

نظرات عتاب ...نظرات كلهة قسوة

اي قسوة ....لان اتريد انسى وارجع عادي سابين القديمة

ارجع امارس حياتي كانما ماكو شي صار

كانما لعبة ولعبتة وطلعت خسرانه

متعرف اني انتهيت من بعدة

متعرف اني اليل ماانامة

اني احس بي موحود يمي ويباوع علية

اتريد مني اكمل كلية

بديت اضحك.....اكمل الكلية الي مراغبتة ...

والي غيرت حياتي علمودة

دخلتة لخاطرة

مشت  وهي شايلة الصينية وتقربت مني

_سابين اتريكي حبيبتي

باوعت الة وجاوبته

_اي راح اتريك .....وراح اشرب وراح امارس حياتي ...

صدكيني ماامووت

...بدت دمعات امي تنزل ...

مهتميت اله

_سابين ...وتاليهة وياج ....والله حرام

حتى هو ميرتاح بكبرة

_لا مرتاح ....اني متاكدة ...

بديت اصرخ بدون وعي .....مرتاح

بس اني بعدني

مااحس الا واحد كومني من الجرباية بسرعه

جرني من ايدي

اباوع ....ابوية

وعيونه الي متروسة غضب

مااحس الا يصرخ بوجي ....

_لج وتاليهة

يعني يموت هو و احنى نبتلي

اني اضل هيج وياج ....

كل يوم هاي القوانة الجديدة ....

لج سابين وربي ومااعبد ....اذا مارجعتي زين تحجين

اني اخنكج بايدي

باوعت علية ....بس مهزتني اي احجاية منه

وكتلة

_اذا خنكتني اموت؟؟؟ ....

ضل صافن علية ....مرتبك ...ميعرف يجاوبني

دفعني حيل على الجرباية

وطلع

امي طلعت وراه واني اسمعهم يكولون

تحتاج دكتور...منكدر نتركهة هيج

رجعت للجرباية ونمت ....قربت رجلي لصدي وكانما متقوقهة  على العالم الخاص بية

_دكتور ....شراح يسويلي ...

كلشي انتهى وراح

جانت هاي حياتي بعد ما راح علي

ظليت بالغرفة لمدة سنة

جان ابوية ...يجرني ويجبرني اشتغل بالبيت

امسح واكنس ...وارتب

وغسل

متوقع كل هذا ينسيني ....

واذا شاف شي معاجبة يرزل بية

لحد مااتعودت علية

ضلت علاقتي بابوية موزينه ....كلهة اشواك كل مايريد يتقدم الية

اني اصده ....اتصدكون يمكن كرهتة

بس جنت استغفر ربي واكول حرام مهما كان هو يخاف علية وكل هاي لمصلحتي

جان يكعدني بالستة ......كانما معسكر اداوم

جنت اعرف هاي ضغوط علمود ارجع للكلية

بس مهتميت وبصراحة اني ارتاحيت

على قسوته

كانما جنت. محتاجة للتعذيب ....

محتاجة اجلد نفسي لاحس اني عايشة .وهذا مهما الي صار ...

مراح يرجع اي شي

اما ام يوسف مااعرف عنها اي شي

مافديوم خابرت ولا اني خابرته

حتى لو خابرته شكول الهة

اذا هي شوفتهة اتذكرني بي

لذلك مافديوم اجه على بالي اتصل بيه

طبعا رحت لدكتور ...وانطاني ادوية ومهدئات ... جنت مقررة مااطلع

الة بس ابوية وعصبة المستمر ولان اني تعبت

كمت انفذ بدون مااحجي

وهو هذا الي جان يوترة اتجاهي

بالكوة طلعت

بس جنت اطلع لمكان واحد ....

المكان  الي اشوف نفسي بي .....

كل همي ينجلي يمة ....

كانما يسمعني ....ويجاوبني ...

محد يكدر يفهمني بس هو

جانت زيارتي للامام الكاظم (ع) مستمرة

وهي منفذي الوحيد للتنفيس

جان احمد مايقصر كل ماينزل ...ياخذني ومرات مااقبل

بس يجبرني ...

جنت ادخل لحظرتة ...واشوف هذاك الضريح الي كل الناس تتلمس منه الشفاء وطلب المراد

جنت اوكف من بعيد والدموع تنسال على خدي واكله

_ياسيدي مولاي ....شكول الك

اني حايرة ....معقولة اترجعه الية ؟

زين معقولة اتسارع بموتي؟

اني تعبانة ...حيل

مااعرف شريد ....اريد بس ارتاح

اريد انساه وماانساه

تكدر يامولاي اتريحني

وبدت دموعي تنزل واني احس بان هو سمعني .......

وبيوم مو يوم عادي

اجتني امي ....وهي مرتبكة

كانما اكو حجي بلسانة وثكيل علية تحجية

مفهمتة

حاولت اركز علية بس مدااافهم

_سابين حبيبتي اريد احجي وياج بهدوء وبدون تعصب ونرفزة

وكلة هذا الحجي والقرار  راجع الج بالنهاية

ضليت اباوع علية ....محجيت اي كلمة

_اتقدملج واحد ....

بعدهة ممكملة الكلمة فزيت من مكاني

وبدت انفاسي تصعد وتنزل بسرعه

_شنووووو...صدك تحجين

لا والله تشاقين .....اعرف بس ماما مو خوش شقه ..

_بنتي بس اسمعي الولد خوش ولد ومن عشيرتنه

....ضليت سادة اذاني بايدي

مااريد اسمع اي شي.....ورحت على مخدتي وخليت الغطى على وجي ...

بس دموعي تجري

ليش ياربي مايحسون بية

ليش محد يفهمني

ليش يتصورون اكدر انساه

اكدر انسة عيونه .....

انسة ابتسامته ....

انسة صوتة ....

والله العظيم .....محد ياخذ مكانك علي

محد يلمس شعرة ...ماطول بية النفس يصعد وينزل ...

طبعا امي طلعت

جانت متقعة مني هذا الشي

يتبع

قصة #بدلة_عرس الجزء الثالث عشر

للكاتبة لينه سعد

اسمي انور

من نفس عشيرة الحجي ابو احمد

بس من غير بيت

طبعا ابوية جان جبير عمامة ....

اتوفة واني بعدني صغير

جنت خايف اشلون ادير واكعد بالدواوين والناس لازم تسمع حجايتي

الى ان شفت ابو احمد ....وهو جبيرنه

هو عايش بغداد

يختلف عنة بالحجاية والكلمة

بس كلمتة مسموعه ...وانسان محترم والكل اتهابة ...

هو الي جان اله الفضل الجبير بان اعرف واتعلم

لان اني مجنت اطلع وي ابوية للفواتح والدواوين والفصول

بس على اخر ايامه يالة كمت اعرف

من بعد ما مات حسيت بالعيون كلهة اتجهت الية ولازم اصير مثل ابوية

شخصية وكلمة ....

اني متزوج قبل سنتين

اتزوجت بنت خالي .....ماجنت احبة زواج عن طريق امي

واني جنت بس اريد اتزوج

اتزوجت وبقت وياي سنتين متحملتة

ماتعرف بس اتعاند واني دمي حار مااحب المرة الي اتعاند

مردت اطلكهة بس اهلهة وسوالفهم

خلوني اطلكه ...مع العلم عندي ولد منه

بقيتة يمهة لان مااريد اخرمة من حنان امة

وبيوم واني نازل لبغداد ...علمود فصل صاير

لازم احضرة

خابرت الحجي ابو احمد ..وكتلة اني جاي لبغداد

عاد هو وصفلي وين اروح

وبيوم الي نزلت شفت بيتهم مرتب من برة ..

يعني ناس مقتدرين

دكيت الباب ....وانتظرت

لحد مااجاني صوت....انثوي ...هادىء

دنكت راسي وحجيت وياهه

انفتحت البوابة

جانت عيوني الة فضول اتريد اتشوف منو صاحب هذا الصوت

مكدرت ماارفع عيني وبلحظة ..

وي رفعة عيني مكدرت اباوع اكثر

نزلتة

بس بديت احس بشعور غيريب ...

ارتبكت .....اي ارتبكت ممتعود على الارتباك ...

بس مااعرف ليش صار بية هيج

كالتلي اتفضل ادخل

مشيت واني مااكدر ارفع عيني

جنت استحي من ابو احمد ....داخل بيتة واباوع على عرضة

من هذاك اليوم واني افكر بيهة

اني ادور على مرة .....وبيوم ابو احمد اجة للعمارة ...

طبعا عزمتة لبيتي .....وجان الي نية استفسر اكثر البنية متزوجة

بنتة لو جنتهم مااعرف منو الي طلعت الية

بعد ما تغدينة ....سألتة

_حجي انت اشكد عندك وليدات

_والله ياانور عندي ثلاثة ولد وبنية

ونعمة من الله

....يعني عندة بنية .....حجيتة بنفسي

ظليت احجي اني وياهه

وفتهمت منة

بنتة مخطوبة .....ايست بعد ...

بس بقيت افكر بيهة وكلت اشوفلي غير بنت دورت هل المرة ردت اني اختار

وبيوم الي ابو احمد يمنة ....نزلنة سوة لبغداد

اول مادخلت الفرع شفتهة تمشي بالطريق

عرفت هي نفس الطول

وطالبه هي هاي

وصلت يم الباب اتقدمت هي واني اباوع علية

اشلون تحجي وتسلم

ظليت اتفحصهة ...

مااعرف ليش مع العلم اني متاكد راح تتزوج واصلا مخطوبة

حتى لو..... مااخذهة لان انخطبت

اني اريد المرة ماشافهة رجال ماحجت وياه مالمسهة

وهاي البنت صعبة بعد ....

.......

وبيوم سمعت اكو فاتحة خابروني لبغداد نسيب ابو احمد استشهد

والله كلبي وجعني ...

شنو ذنب هاي البنية تتارمل وهي بعدهة مشايفة العرس

مشايفه الفرحة بعيونه

اتاذيت علية حييل ......ماادري ليش

نزلت لبغداد ....شفت ابو احمد تنزل دمعاتة

واسيتة

بس شفتة اشكد لعد جان يحبة

حتى ولدة

شفت الكسرة بوجوهم ...

عرفت هذا الولد الله يرحمة خوش زلمة ...

من بعد سنة مرت ...واني ابد مشايلة من بالي .

اريد انساهة

مااكدر.....اني من زمان جنت اكول البنت الي تنخطب وتفسخ مااكدر اتزوجة

لان خطيبة لمسهة اتقرب الهة ...

وبحالة سابين اصعب ...جانت عاقدة وعقد محكمة ....

يعني كولش صعبة

ظليت على هاي حالتي اريدهه ومااريده

رحت كعدت يم امي اخذ مشورتة

_يووم اني اريد اتزوج

_اي يومه يالله بس كول بناتنه حاضرات

_لا يمه ...اني ابالي وحدة ومن زمان عيني علية

_يااااا ولك لعد ليش مكلتلي

كمت واني اصفن .....

_جانت مخطوبة ....وعقدت محكمة بس اسشهد

_ياااا ولك هاي غريبة .؟؟؟

_لا يمه بنت ابو احمد

_ياااااا خطية سابين .....هااااا

لايمه متفيدنة ....هاي غير عاداتنه وماترهم ويانه

_يمه يجوز همة ميقبلون بينه لتخافين

_هاااا انوبة ....ولك مصايب ولك هي منو ماترضة بيك وانت الشمس

....اببتسمت الهة ورحت بست راسهة

_لايوم اريد اعرف انتي عندج اعتراض اذا اتقدمت اله ..

ضلت اتصفن .....وهي ممقتنه

اني جنت بس اريد واحد يكول رووح ...

لان ادري اني ردته ...وحتى لو هي متزوجة من صدك يمكن راح اتقدم الة

جاوبتني

_براحتك وليدي ....مااكدر اعارضك اني استنكيت الك وحدة ومافادت  وشوفتنه الويل

جرب انت اختار

كمت واني مرتاح

اي راح اتوكل على الله واطلبة

وكون ....مايرفضون

رحت لبغداد ....شفتة لابو احمد باحد الفصول

وحجيت الة

شفت لونه اتغير ....مافسرته معرفت لاهو قابل ولاهو مقابل

_والله ياانور انت خوش ولد ....بس اني بنتي بعدهة مانسية ...

مااعرف تقبل او لا ....اريد منك تصبر علية اذا ناوي تاخذهة

واذا اتكول لا والله ...فبكيفك

_لا حجي ....ابقى لحد ماانت اتكول ماتفيدك

_هاهي لعد

دخلت للبيت شفت ام احمد بالمطبخ اشرت الهة للغرفة

اجتي وراية

وحجيتلهة على كل شي

_شوفي ام احمد ....سابين ماتطلع من هاي حالتة اذا ماتتزوج

_ياااااا ابو احمد هاي شتدحجي

اني ازوجة وادزهة للعمارة ....اشبينه اتخبلنة

_وشبيهة لعمارة ...ليش اني لعد منين

_لا ...مو قصدي بس صعبة اخليهة تبتعد عنة مااعرف علية اي شي ...

وثانيا الولد متزوج ومطلك

_وبنتج ارملة

_بس بنية بعدهة ....والف واحد يريدهة

بس .....

_شنو البس

_حتى لو اني موافقة ومقتتعه بي

تتصور هي تقبل ...

انت ماتعرف سابين ....

سابين تغيرت مو هي

_انعل ابوهة لابو الخلفة ......مو بكيفهة والله اموته واخلص منة

_على كيفك ...اني اسئلهة واشوف والله يهديهة

اني جنت ممقتنعه بانور ...هو خوش ولد بس مو منه ومو طبايعنة

وتختلف امورة عن اهل بغداد ....

بس اني اريد بنتي ترجع مثل قبل ....مستعدة اي واحد يجيهة بس كون تطلع من شي اسمة علي

البارحة من طلعت من غرفتة ...واني متاكدة هذا جوابهة راح يكوون ...وحايرة شكول للحجي

هو عصبي ...اشكد جان يحبة ويحن علية هسة اتغير علية

واني اعرف علمودة يريد يطلعه من الحزن الي بي ...

بس طريقتة غلط اشكد حجينة وياه

حتى الولد رادو يغير معاملتة وياهه

بس مقتنع ....

طبيت اله...وحجيت كل شي صار

_باعي باجر اترجعين علية ...اذا مقبلت اني ازوجهة غصب علية

_استهدي بالله ...ابو احمد الامور ماتجي هيج ..

كل شي بالمسايسة ينحل

_يلة خليت الج المسايسة ...وانتي حليهة

ثاني يوم الصبح ....شفتة كاعدة تغسل الهدووم ...

اجيت يمة وبستة من راسهة

_سابين ماما .....اني ماعندي غيرج

اذا يصير علية شي منو يشلني غيرج

_اسم الله عليج ماما .....شنو الي اتريدينة

_الولد خوش ولد واريد ..انهي رسالتي بالدنية ازوجج وارتاح

...باوعت الهة

_وعلي.....؟؟

_علي الله يرحمة ...محد يموت ورة واحد كلنة انكمل مسيرتنه بالحياة

_ماما ليش اتذيني .....اني مااتزوج

شتريدون مني حاضرة بس زواج لا

_خووش ..وكلية ....

صفنت علية .....ياكلية هاي الي اروحلة

عفت كلشي ونزلت جوة لغرفتي دخلت وسديت الباب

بدت دموعي تنزل .....وحدة ورة الثانية

وكلبي بدة يضعف دااحس بالوجع

ونفسي بدة يضيك

رحت فتحت الكنتور .....طلعت البدلة

اباوع علية ...واحجي وياهه تعبانة علي ......تعبانة حيل

انت دتشوفني لو لا

دتحس بية لو مرتاح هناك

يريدون ....البس هاي البدلة لغيرك

يريدون اتمكيج واسرح شعري لغيرك

يرون امارس حقوق كزوجة ....لغيرك

شبكت البدلة حييل ..واتنفسهة ....بكل قوة

مااحس الة الباب اتفتح بكل قوة

دخل ابوية يباوع علية ...بنظراتة الي كلهة قسوة وظلم واجبار

جنت اعرف ابوية اذا يغضب من جف ايدة

يسدهة ويقبظ علية بكل قوة

بس مجنت خايفة منه ....

اتقدم الية وكال

_هي هاي الي كادرة علية .....اتكمشين البدلة وتسولفين ويااهة

اتقدم اكثر وكفت الة والبدلة خليتة ورة ظهري

جنت اقرة افكارة وهو يتقدم

اتقدم بكل جبروتة

بكل ظلمة الية

وراد ياخذ البدلة مني ...

وكفت بنص وجة وتحديتة ......

شاف عيوني

وشفت عيونة ....

دفعني بكل قوة واخذهة

وكال راح احركة ...واخلص من هاي العقدة

ظليت ابجي واني اجر بيهة ....

لا .......لاتحركهة الله يخليك

جنت اباوع على حمزة الي واكف ميكدر يدخل  وابتسام وهي تبجي وامي

الي كاعدة ومخلية ايدهة على راسهة

اتقدمت الة وكفت اكبالة

كمت اجر بيهة

_مااخليك تاخذهة

_ولج والله احركة

وازوجج سابين واخلص منج

عفت البدلة ....او وكفت متسمرة بمكاني

وحجيت بكل هدووء

_اذا حركتة .....راح احرك نفسي

اتقدم مني وشاف اعيوني لاول مرة تتحدة عيونة ..

وكال

اول مرة واحد من اولادي يتحداني ....

ومحد سواهة بس بنتي

رفع ايدة وظربني

وكعت بالكاع .....غمضت عيني ورحت لغرفتي ....وسديت الباب

جانت اول مرة ابوية يضربني بيهة

اول مرة احس بالم يصيب خدي

مجنت اعرف شنو الجف من يجي على الخد

شنو من شعور صار بكلبي

فتخت باب الغرفة وصعدت لغرفة حمزة اتقربت من الشباك ....

واني اشوفة يذب عليهة النفط ...

ويشعل النار بيهة

مااعرف شنو شعوري ....شي مااكدر اوث

صفة ....بدت انفاسي اتضيق ..

بديت بدكات كلبي تضعف

بديت احس بالحقد .....احس لازم احرك كلبة مثل ماحرك كلبي

جنت انتبة على النار الي تاكل البدلة ...انتبهت على الدخان الي ترس الحديقة

_صدكني بابا ....انت هيج سويت بيهة هسة

نزلت جوة واني جنت مخططة لكل شي ...

كعدت

انتظرتهم يدخل كل واحد لغرفتة

ورحت اخذت الجلكان ...والشخاطة وصعدت للسطح

جانت دكات كلبي مو منتظمة

اني خايفة ....مترددة ....بس حاقدة ..اريد ااذي

فتحت الباب ....مشيت بخطوات مرتبكة

مهزوزة ....اشتميت الهوة

يارب سامحني.....جنت اعرف الي اسوي حرام

حطيت الجلكان بالكاع

وكعدت يمة

واعيوني تجري .... مااريد اخسر الاخرة

اني خسرت دنيتي

بس ياربي شنو الحل ....اريد ارتاح

احس واحد وراية ...وكال

_صدكي اذا تموتين مراح اتشوفينه

التفتت

_ابتسام ......

شفت ادموعه الي تنزل ...

_سابين غلط وحرام الي اتسوينة

كمت وكفت .....وجاوبتة

_وانتم الي اتسونه بية حلال

_كلشي ينحل ....صدكيني .. مااخليهم يزوجج غصب

يتبع

قصة #بدلة_عرس الجزء الرابع عشر

للكاتبة لينه سعد

..........

اتقدمت مني ابتسام ....

وهي فاتحة ايدهة ...وكالت

_لتخلين الشيطان يلعب بعقلج

....كعدت بالكاع منهارة واني ابجي ....ابجي على ضعفي ..هزيمتي ...اشلون ردت اسوي هيج

شكول لربي

استغفر الله ربي واتوب اليك

بدت دموع تنزل مثل شلال ...

حضنتي ابتسام ...وكالت

_ابجي ....طلعي شكو جواج ....لتضمينه

ابجي اشكد متكدرين

ضليت ابجي حسيت نفضت كل همومي.

حسيت نفسي خفيفية

غفيت بحضنة ...

وهي تلعب بشعري ...وتقرة على راسي ايات ...

وتحجي وتنصحني

بس اني مرتاحة

مرتاحة وخفيفة

نزلت طبيت للحمام ...سبحت وتوضيت

ورحت لربي اطلب منة السماح

اطلب منة المغفرة ...العفو ....اطلب منه يريح بالي ويسهل امري

صارت الدنيا ليل ...ماطلعت ابد من بعد الي صار  ....

مطفية الضوة ...وباقية استرجع كل ذكرياتي

هاي هي ايامي الي بدت بعد ما انتهت وياه

بس ذكريات بقت ....جنت دايرة وجي للحايط ونايمة واعد الدقايق والثواني علمود يزورني النوم ...

حسيت الباب انفتح ...

غمضت عيني ...وكانما نايمة

بدت خطواتة تتقرب مني ....

وبدت انفاسة الي اسمعه قريبة من اذني...

وباحظة وبديت احس باطراف اصابيعة ...تتلمس شعري

حسيت بي هو.... وعرفتة من خطواتة ....جنت حايرة ...

جانت النار تاكل بكلبي

مااعرف التفت اله واعاتبة

لو ابقى على وضعيتي ..واتصنع النومة

بدت ادموعي تنزل ...واتلامس اصابيعه ..

حس بية كاعدة

كعد على الجرباية بعد ما بعد ايدة عن وجي

وبدت كلماتة تنطلق من شفايفة الي متروسة ضعف وحزن

اول مرة اسمع كلماتة متروسه حزن

اول مرة اسمع نبره صوته بهيج طريقه

_تدرين من جنتي تتمرضين اني الليل ماانامة

اما اذا احد من اخوانج يتمرض مااهتم

انتي الله خله حبج بنص كلبي

سابين....اشلون اتريدين اتحركين كلبي ...مو اني ابوج

اني الي ماانام اذا مااسئل عليج كل يوم

اني بكل صلاة ادعيلج

اني كل همي بحياتي اشوفج مستورة بيت زوجج ومرتاحة وي الشخص الي يصونج

اخاف عليج من الهوى الطاير

اخاف لااموت ...قبل لااشوفج مرتاحة

.....بدت ادموعي تنغص وتنختنك

التفتت الة

واشوف وجة الي انكسار الضوء الخفيف على ملامح وجة

وعيونه الذبلانه

خانتني مشاعري يمة

رحت شبكتة ....وحضني بكل قوة

سابين ياروحي انتي .....لاتعبيني اترجاج ....

اذا زواج مرايدة ..

مراح اجبرج ...بس اريدج اترجعين مثل قبل

وياريت اكو الي نص المحبة الي حابتة لعلي

ياريت تحبني بكدة

...فتحت عيوني ...وكتلة

_محد يجي مكانك لا علي ولا الف منه ...

بس اني تعبانه ...وانتم ضغطتو علية هواي ...

ماانطيتوني فرصة

_صايرلج سنة ....وكل هاي وماكو فرصة

سابين مستحيل اتخيل افقدج بيوم ....هو انتي وحيدتي ...وردتي الي اتونس بيهة من ادخل للبيت ..

اني الي سويته لخاطر اطلعج من هذا كلة

....بست ايدة وكتلة

_راح اسوي الي اتريدة بس زواج لا مااكدر

لاتضغط علية

جانت اعيوني الي تحاجي عيونه كفيلة بان يفهمني من بعد عذاب سنة وياه

باس راسي

وهو مبتسم ....ماشي ولا تهتمين

نومني على المخدة وغطاني وباسني من كصتي وكال

_اريد باجر اشوف سابين القديمة

ابتسمت الة

وهزيت راسي

شفتة طلع ....ومشيتة الي بينت هو اشكد كبر بهاي الايام

اخذت نفس عميق ....

الله كريم

..................

كعدت من الصبح ....واني نشطة

اريد غير خياتي ....اريد استعيد الخسرته ..

بدو يكعدون واحد ورة الثاني

ويشوفوني كاعدة ومحظرة الريوك ومنتظرتهم

الكل اتعجب.....امي اجتي شبكتني وباستني ..وكالت

_راية الله بيضة .....من شفتج اليوم وانتي مثل قبل

_باوعت لمحمد وكتلة من باجر اريد اداوم كلية

ابتسم وكال

_ياالله ....تدللين حبيبتي

اليوم رايح اشوف الوضع واسئل بالاجرائات.

..........

مرت الايام والاشهر واني اداوم كلية

بس مو نفس قبل ...

اكو شي متغير بية مااكدر اعيدة بعدة

كمت اتابع البنات الي وياي اشلون ديحبون

اشلون الشباب يغازلوهم

باوعت الهم والابتسامه على وجي ....محد عاش الحب مثلي

محد جربة ...محد حب وعشق مثل علي

اما زينة ...فمتركتني ابد وضلت دوم تتصل بية وتحاول اتواسيني

نجحت مرحلة ثانية

اما اني فبقيت مرحلة اولى ....بس مهتميت للدراسة بس اطلع واطب واقرة الي على كد الفهم ....

عدت السنة وعبرت للمرحلة الثانية

اما ابوية مكدر يسكت ودائما يحاجي امي علمود الزواج

اني اتعلمت بعد ...عليه

عرفت يريدني استقر

ودائما جوابي "لا"

وعرفت هو انور الي اتقدم ...والي ياذيني اكثر هو متزوج ومطلك

مجنت افهم همة شنو الي شافو علية علمود بس يريدون يزوجوني ....بس لاني ارملة

وهمهم الوحيد خاف يكولون لا

ميلكون احد ياخذني

ههههه شر البلية مايضحك

كمت مااهتم ....اشكد يحجي ويحاول يبزني بالحجي ...بس مااهتم

كل همي ؟؟؟؟؟....... اتصدكون ماعندي هدف اوصل الة ...شنو الي اصبح علية او شنو الهدف الي انتظر احققة

مااعرف

بس جنت اتنمى يملون ويتركوني

وبيوم من الايام ....

كاعدة بالغرفة .....امثل على نفسي الدراسة

مااحس الا اندكت الباب

ودخلت امي والابتسامه على وجهة وكالت

_ام يوسف برة

ضليت صافنة ....مااعرف كم عدة من الوكت ....

بس الي حسيتة

اتذكرت كلشي من هذاك الوكت

كل حلو ومرة

كل الذكريات الي نسيتة والي اتذكرهة

كمت واني على صفنتي اتقدم الهة ...

واذني ممصدكة الي حجته

_انتي شكلتي

_اشبيج سابين .....ام يوسف ...برة كالت جانت عندي شغلة وحبيت ازوركم

....ام يوسف

بدت شفايف امي تنطق بكلمات واني مااعرفهة ....وبدت تتكلم بس اذني اتوقفت عن السمع

جنت مااحس باي شي

عفتة ورحت  للمراية

باوعت على زاوية الميز الي تحتل مكان شيشة العطر الي خلصت من زمان ....

بس بعدهه الريحة موجودة

شميتهة اتذكرت ريحة الغالي ....

مااعرف شعوري هسة

اريد اشوفهة علمود  اتذكرة .....ولو اني مناسيتة

ومااريدهة .....لان راح اتعيد تفتح كلشي حاولت اسدة

باوعت  لايدي وشفت الحلقة على وضعهة من هذاك اليوم

والسلسلة الي اتزين رقبتي

اتنفست بعمق

وبديت امشط شعري .....واغير ملابسي

واني اعيد التفكير اكثر من مرة

شنو راح يكون شعوري من اشوفهة

جنت اتمنى ماتخوني اعيوني وتنزل دمعاتي ...

رحت بخطواتي الي تتسارع ...وتتباطىء مرة

فتحت الباب

وشفتة لابسة الاسود وبين الكبر على ملامحهة ....

اتقربت منة كامت وشفت عيونة بيهة حجي هواي

بدون مااحجي اي شي ...رحت شبكتة وشميتة

جانت بيهة ريحتة

اما هي فبدت شهكاتهة تطلع

وخلت اعيوني متسيطر على شلال الدموع الي بدة يتدفق

بعد كعدة طويلة وهي اتسولفلي اشلون خلصت المدة بفراكه ...

وبدت تحجي عن اشياء مااعرفة ولا اتذكرهة صارت بيوم الفاتحة

اخر شي بعد ماطلعت امي ...اتقربت الية

وهي تكمش ايدي وكانما وتحاول ادليني للطريق الصحيح مثل طفلة متعرف وين هو الطريق

_سابين حبيبتي ...كل شي انتهى بعد

وانتي بعدج شابة

وماعاشتري علي لمدة طويلة علمود اتسوين هيج شي بنفسج

وحابسة نفسج ورافضة اي واحد يتقدم الج

انتي لو بنتي مااقبل

ولان انتي من ريحة الغالي

مااريد اذيتج

اقبلي بالشخص الي يفيدج ويسعدج

الدنيا متوكف على احد

جنت اتابع شفايفة وهي تنطق بكل كلمة ......اني ممقتنعه بيهة

ومتاكدة حتى هي ممقتنعه

اباوع على عيونهة ...تشبة عيونه

وحتى نبرة الكلام

بيهة شبهة منة

بدت اعيوني ادور على اشياء تشبهة ...

بديت احس بالمملل منه

لان هي اقرب وحدة اله ...واجتي وتحاجيني بهاي الطريقة

لعد الغريب عنة شيكول الية

بعد ماكملت كالت_

_هسة اريدج اتفرحيني وتزوجين وتعيشين حياتج.وترة ابوج يريد مصلحتج

كمت واني ابتسم وكتلة ....

_ام يوسف ...عندي دراسة هواي

كرري زيارتج ياااا ام عللللي

وطلعت

بس متضايقة منه ....جنت متاكدة من اهلي ورة كل هذا

بس مااكدر احجي

راح اجبر نفسي على السكوت لان مااريد مشاكل

.....

اتعجبت من تصرف سابين

معقولة ....يعني ام احمد الي حجتة صدك

مجنت متوقعه هيج هي

حتى الحلقة لابستة

والسلسلة بركبته ...

مستحيل ...تنسة نفسهه علمود واحد مات وشبع موت

رجعت للبيت واني مصدومة

شفت يوسف وهو كاعد على القنفه رحت كعدت يمة ...

وكتلة ....اليوم رحت لسابين

......

التفتت اله واني متعجب من حجايتة

_شنو ؟؟؟

جاوبتني

_سابين خطيبة علي

.......كلشي اتوقف لحد هنا عندي من نطقت اسمهة ...

بديت استرجع كلشي

سابين ....

اتذكرت واني طالع من الردهة الي جنت اتبرع دم لاحمد

جنت امشي بس تعبان

واشوف كبالي بنت شابة صغيرة

حاطة ايدهة على حلكهة ومخنوكة من البجي

مااعرف جنت متوقع اتريد تتقيىء او مخنوكة

اتقربت منهة واني اكول الهة

_خير محتاجة شي

...التفتت الية بعيونه الي متروسة ادموع والي ذبلانه

او وجهة المائل على صفار ...كمشت ردني حيل وهي تنطق كلمه

احـمـ...د

وتوكع مااحس الا اني اتلكيتة بذراعي وبلحظة احس  راسه على صدري صار

من بعدهة طلعت امهة ودخلو جوة ...عرفت هي اخت احمد

دخلت جوة واني اتابعه وهي بحظن امهة

مثل الطفلة الصغيرة

بديت اسلم على الكل ...

وظليت احجي وي ابو احمد

لحد ماحسيت هي كعدت ...بديت اراقبه كل اشوية اخطف الانظار الهة

من هذاك اليوم اكو شي اتغير بداخلي

بديت افكر بنفسي

اني جبير بالعمر ولحد هسة مامرتبط

وعندي علاقات وي بنات هواي

مخليت شي بنفسي مسويتة

الا ان اجت هي

يتبع

قصة #بدلة_عرس الجزء الخامس عشر

للكاتبة لينه سعد

..........

اللحظة الي دكيت بيهة الباب وانفتح

جنت اركز بيهة وهي مثل الي مرتبكة

ميزت كلشي بيهة

بس نظراتة الي جانت على علي مجنت اعرف هي تعرفة

ومجنت مهتم بنظراتة ...اتوقعت استغربت لتواجدة ...

من رجعت لبيتنا واني الليل كلة افكر

اني ليش مااتزوج

ليش مااخدهة ...بنت صغيرة واهلهة معروفين والاكثر من هذا كلهة

اعرف اخوتة

وبنبة صغيرة اربيهة على ايدي

بدل مااضيع وقت تلفونات وبنات وطلعات

بس اليوم الي  عرفت علي يعرفه قبلي ..

انسحبت بهدوء

اني صح عجبتني ....والعجبني اكثر عائلته

كلت بنفسي وعسى ان تحبو شيئا وهو شر لكم

ابصراحة مهتميت

بس الصدفة هي الي ضوجتني

اطلع اني واخوية عينة على بنت ...هذا اكثر شي ضوجني

وجنت اتمنى مياخذهه

ويوم الي عرفت بي هي رافضة علي

مااعرف ليش فرحت

حسيت متفيدنة هاي البنت بعد

بس الي التمستة ....حب علي الهة

الشي الي غير كل توقاعتي

اني شفت حياتي وي اختيار بنت خالي ...

شفت كل البنات نفس الشي ...يعني ممهتم المهم اتزوج واستقر

جنت الاحظ علي من يرجع من يم خطيبتة فرحان والابتسامة على وجهة

عكس الي جان ينتابني من اروح لبتول

اكو شي ناقصني بس مااعرف شنو هو ...

شي مااعرف اميزة

ويوم الي اجتنة بي سابين ....اهنا اختلفت اموري

شفت عيونهم الي مليانه شي ماعندي ولا عند بتول ...

شي ممجربة بعدني

اتحركت مشاعر جنت متصور اكدر اسيطر عليهة

ببقيت الاحظ حركاتهم

وغزلهم الواحد للثاني ...جنت اتكطع ....ليش  ...ليش هذا يصير بية

اني مااحبة .. بس ليش اغار

واغار من منو ....من اخوية ...على مرتة ...

شي كلش جبير وعيب

جنت اكره نفسي

اما من صعدو فوك ....جنت اتكطع النار تشعل بية ...

جنت امشي وافتر بالهول

واشرب جكاير ...واتلفت اكول يجوز نزلو

بس اتاخرو

متحملت ابقى .....كلت لامي صبي غدة جعت راح اصيح علي

صعدت فوك واني النيران تحركني

اعرف الغلط بية ...

اعرف الي اسوي ميفيدني ...وهذا اخوية

بس الي بصدري جان اقوى

الفضول الي كتلني

دخلت واني اشوفهم ...ملتصقين ببعضهم

شي اكبر من تخيلي ....شفتهة شلون منسجمة وياه ...

وبدة يقترب منة اكثر واكثر

متحملت اشوف المنظر ....

كل هذا ابالي ومناسي .....

كل شي بكلبي ومحد يدري بي ...لان هو اخوية واقرب شي لنفسي

نزلت جوة واني منهار

باوعت لبتول عرفت اني غلطت من خطبتة

اني مااحبة ...

وقررت يوم الي علي يتزوج اني اطلع من البيت مااريد اي شي يذكرني

اني متاكد مااحبة .....بس يمكن شعوري بان اني ردت امتلكهة هو هذا الي اثر علية

ورافض احد يمتلكهة من مقربيني

من هذاك اليوم واني قررت ابتعد عن المكان الي يتواجدون بي ...

لحد مااتزوج واخلص ....

الي سهل امري برغم النفسية التعبانة الي انتابتني يوم الي احتركت واتشوه نص وجي

ساعدني اترك بتول

وابراداتة ...هي متقبلت وجي ومتقبلت  تغير حالتي النفسية

انفصلنة بهدوء.....

الشي الي ريحني اكثر ....رغم التشوه البسيط على وجي

بس جنت ارفض احد يباوع علية

لذلك كمت مااطلع هواي ....

وتركت كلشي عادة موزينه قبل اسوية

بدت الايام وتعودت على اقتراب عرس علي

بدت عندي عادي

بس الي يوم اجة وكالو اتصوب ....

مااعرف شلون اوصف الشعور ...

بيومه الي رحت للمستشفى .....واني مخلص كل ايامي هناك

من بعد ما بترو رجلة ...

اتمنيت اني ابمكانة ....شنو الي شافة من حياتة ويصير بي هيج

جنت متوقع مو بس يخسر رجلة

راح يخسر حبيبتة

جنت خايف من اللحظة الي تجي سابين بيهة للمشفى

وفعلا اجت ...ارتبكت ....ليش؟؟؟

معقولة خايف لاتشوفني واني هيج شكلي

لو خايف تنصدم من شوفه علي

مكدرت اتواجد ابتعدت عن الغرفة

وضليت اراقبة وهي منهارة

من بعد هذا كلة

كلت اسوي اي شي بس يطيب اسفرة برة واعالجة وحتى قدم صناعي اخلي الة

بس كون عايش ويتنفس

بس كل هذا مصار ....

من بعد ماطلع من العملية ....زادت عندة مضاعفات  صار نزيف داخلي ...

متلاحكو عليه ... واستشهد

هاي اللحظة حسيت بكسرة ظهري

حسيت اني فقدت كلشي بحياتي

امي وابوية واخوية

ظليت لا سند ....بلا عضيد

طبعا مااريد احجي الي صار بامي وبينة وبخواتي

جنة متنين انزفة ....زفيناه بس لكبرة

عرفت سابين مااجتي لان خلصت ايامه بالمشف  والبيت وهي بحالة اغماء

كلت شيفيد ....هسة تنسى وتروح تتزوج

مااعرف ليش كرهتة ...

شنو السبب الي ولد هذا الشي بداهلي مااعرف

فتحت اعيوني بعد مااسترجعت كل شي

وامي كبالي

_اشبيك يوسف اشو صفنت

_لا يوم بس اتذكرت شي ..بس اتتي اشعجب اتذكرتيهة

_والله يايمة ...ماتذكرتة بس امهة خابرتني تسال علية

ورادت مني شي

_شنو الشي ...؟؟

_مااعرف شكول ....البنيه صغيرة وبنت عائلة واكيد يجوهة ناس

.....ضليت صافن علية عرفت الي اتريد اتكولة

_اي واحنى شعلية ماتتزوج

عود شنو اتريد موافقتنه

_على كيفك يوسف ...اشو كبيت

لا بالعكس ....

البنت رافضة الزواج من اي احد وامة طلبت مني اجي اني اقنعه

بس الي شفتة اليوم

اتاكدت هي اشكد وفية لعلي

اشكد محبة اله

اشلون ما احجي مراح اتصدكني

_وانتي شعليج ....

فزيت من مكاني وصعدت فوك لغرفتي ....

جان اكو صراع بداخلي

مل مااريد انساهه

تجي مقابيلي وترجع كل شي ...

هي اول وتالي تتزوج وهاي .....بداية ههههه

صدكي ياسابين راح تتزوجين وتنسين علي.

...............

بعد ماصعد يوسف ...والافكار تجي وتروح

اريد احسبة زين

صار الصبح ...واحنى نتريك ...واني اباوع علية اشلون ياكل

بس اعرل تفكيرة مشغول

سئلتة

_يوسف ليش ماافرح بيك يمه

.باوع علية بكل برود

_الله كريم ....ورجع ياكل

_اي ونعم بالله ......مو اخوك هل لفه الموت وراح ...واني مضامنه عمري

اطلع من الدنية لاشايفه فرحتك ولا فرحة اخوك

وتالي يعني شوف اشكبرك صرت

بدة يتوتر ....وحجاهه باستهزاء

_يلة دوريلي ...مثل مااخذتيلي بنت اخوج

والنعم منه ماقصرت باول شدة الية عافتني

_اوووف يووم هاي غلطة

لتحاسبني علية وهي الخسرانه بالاخير

ومو كل البنات سوة

لو تشوف سابــ.....

كام من الصينية وهو عصبي

_يوووم مااريد اسمع اي شي سدي الموضوع

...باوعت ليوسف وصرخت بوجة

_انت كافي ....ولك البنية خوش بنية ليش اتروح من عدنة

فتحت عيوني حييل .....شنوووو

يابنية يمة ...انتي على منو تحجين

....كامت وكعدتني وكمشت ايدي وكالت

_سابين ....بس خليني اكمل كلامي

البنت ليش تتزوج وتروح اني احبة والبنت اصيلة

البارحة الليل كلة منايمة بس افكر

انت بعدك ....وهي انكسر بختة

وابوهة ناوي علية الا تزوج

ليش ماناخذهة احنه  اولى بيهة

....جريت ايدي واني مصدوم من الي اسمعه ...وكتلهة بخنكة

_وعلي .....مفكرتي اشلون اخذ الي راد يتزوجة

الي جان يحلم يوم ورة يوم بيهة

...بدت الدموع تنزل من امي ....وحطت ايدهة على راسة

وتشهك بالبجي

_يمه راح بعد ....

وانت اولى من الي راح

واني وياك اذا ماتريدهه.... ماشي ادورلك على غيرة المهم اريد ازوجك

...عفتة وطلعت ...واني الدنية تفتر براسي

ركبت السيارة

واني امشي بيهة مااعرف وين رايح

بس الي عرفتة

اني جنت منتظرهة دتخل للكلية

وكفت من بعيد اريد المحة .....معقولة اتصير زوجة وحبيبة الية

معقولة اني بالاخير اخذهة

شفتة من تنزل من الخط ....

وبدت تمشي بكل هدوء ....

وكانما بس هي الوحيدة الي بالشارع

حركت السيارة وطلعت

....................

بعد ماطلعت ام يوسف من عدنة

دخلت علية امي .....

باوعت الة

_مو كافي يووم .....مو كافي ..مو حتى فضحتيني ..وتايلته وياكم

مو كتلج عوفوني مااتزوج

_ولج الولد صايرلة سنة منتظرج

_اني مجابرتة ينتظر .....كتلكم مااريدة تالي عمري اتزوج واحد مطلك

اعرفكم بس المهم اتخلصون مني ...

بس امني بربج هذا اخر شي يصير بحياتي

.........

وبيومه بليل نمت واني محتصرة حييل

حلمت نفس الحلم

العرس صاير واني بعدني مامستعدة ولا مسوية اي شي وخايفة لا

علي يضوج لان نسيت اليوم عرس

رحت اركض ...واني اجمع حاجياتي

بس ....التفتت للكنتور .....اتقدمت منة

جنت خايفة لا اشوف البدلة ماكو

جان خفقان القلب يزداد ....

اتذكرت ابوية حركهة ....ظلت ادموعي تنزل

واني احس اتاخرت على العرس

رحت فتحتة .....

بس.......الي شفتة جانت موجودة ....وحلوة وكلشي مابيهة

اتقربت منهة

اخذتهة من التعلاكة واني مبتسمة وفرحانة

اكلب بيهة

كلشي مابيهة ....جديدة

حضنتهة وحمدت ربي .....لكيتة واخيرا راح البسة

رحت لبستة

واني اباوع على نفسي كولش حلوة بيهة

نزلت البركع على وجي

بدت دموعي تنزل ...ممصدكة لبستة

شلت اطرافة واني مستعدة انزف

مستعدة اكون اله زوجة .....

طلعت من الباب واسمع الهلاهل والكولات

بدو يصفكون ويهلهلون

واني فرحانة

شفتة من بعيد داير وجهة

بديت اتقرب اله واني احس بكلبي يريد يكمز من مكانة

نفس الطول ..

نفس القاط.....اتقربت الة وهو على وضعة داير وجه ومديت ايدي

وكتلة اجيت

التفت الية ........بس الصدمة

مو هو ......مو هو ...بدت اعيوني تنصدم

هذا يوسف

....فزيت من النوم ...واني كلبي يدك بكل سرعه .....

اعوذ بالله من الشيطاان...

دخيلك ربي

كمت واني مخنوكة من الحلم ...

رحت للمطبخ اشرب مي ....كعدت على الميز واني مخضوضه ...

.....من بعد هذا الحلم واني مالي خلك لاي شي ....

سمعت انور خطب

وابوية الي خطبلة ....

بس جانت نظراتة الية دائما عتاب ...

اني جنت احاول مااتواجه وياه

لان مليت .....وهو مامل

مر شهرين من اجتي ام يوسف ....ويوم الي جنت كاعدة بالحديقة ...جانت عطلة نص السنه

مرتاحة خلصت من هواي امور مضايقتني هذيج الفترة

اندكت الباب ...رحت فزيت افتح بس قبل لاافتح اسئل منو

وسمعت صوت مرة .....

_اني ام يوسف

_ادي ضلت ترجف ....اشلون اطب جوة

لا عيب سمعت صوتي ...

رحت فتحت واشوف ...هذاك الوجه المبتسم

وهي اترد علية السلام

...سلمت علية بكل ارتباك .....بس مو هي الي اربكتني لا.....

جانت العيون الي اتباوع عليه  من السيارة

هي الي خلتني ارتبك وانعل الساعه الي فتحت الباب

ابتعدت عن وجه الباب

ودخلت جوة

_وكتل اتفضلي خالة

_زاد فضلج بنيتي ....سديت الباب واني جسمي كلة ينتفض ليش خفت ...

وليش هيج مقبوض كلبي

يتبع

قصة #بدلة_عرس الجزء السادس عشر

للكاتبة لينه سعد

.........

انفتح الباب حيل كانما اعصار قوي

هب ويريد ياخذ كلشي بطريقة

شفت عيونه الي مليانه غضب ...

دخلت بانفاسهة الي تلهث

وحجت بكل عصبية و قوة ...وبكل احباط

_انتي صدك ماتستحين

اشلون اتجاوبين هيج المرة .....يعني مفكرتي محسبتيهة بعقلج قبل لا تنطقين الحجي

....كعدت على الجرباية ....واحس اني مخذولة من الكل

محد يوكف بصفي ...محد يسندني

خليت ايدي على راسي ....وبدت ادموعي تجري ...اوووف ياعيني اشكد بجيتي ...اشكد حملتي دمع وطرحتي ...

وحجيت بكل تعب ...لان ماعندي اي قابلية بعد على الحجي...وكلت

_يووووم ...يوسف......يوسف اتريدين ارتبط بي

يوسف اخو علي ؟؟

ولكم بس اريد اعرف شي واحد ...اني الغلط لو الدنية خربت

باوعت علية واتقدمت مني وهزتني من جتفي بكل قوة

اول مرة اشوف هيج امي تتصرف وياي

امي الي جانت نبع الحنية والطيبة والعطف

اول مرة احس اني وحيدة

والكل ضدي صارو

كالت بكل قسوة

_ولج بعد منو يجيج .....اشو هذاك ورفضتي

وهذا مايصير

منو يدك بابنة بعد منو يكلبج

جريت ايدي بكل قوة من ايدهة وباوعت الة بكل تحدي

_نهاية الحجي ومااريد الكلام ينعاد .....لو اتحركوني مااخذة اخر واحد افكر بي

اني اتعجب على امة .....ياربي شنو اشصار بالدنية

تاخذني لابنهة الثاني

هسة لو عندي طفل كلت يجوز علمود الطفل

بس اني مامتزوجة علي

ليش هيج اتصرفت

_اتتي ثولة ........متفهمين ولا راح اتعرفين

واني هل المرة الي اوكف بوجج مو ابوج

وصدكي سابين ...راح تاخذينة

_هههههه شوفوني اشلون اتزوجة بله ..

طلعت وسدت الباب

.....كعدت على الجرباية واني جسمي ينتفض

احس هل المرة تعبت حييل

ماعندي قدرة اواجه واتحدة

كمت فتحت الشباك بديت اتنفس الهوى واني مغمضة عيني

بديت اسمع ضحكتة .....همساتة ....حتى لمساتة الحنينة

....فتحت عيني

_محد يكدر ياخذ مكانك علي ...

لو يجي شبيهك مراح يكون نفسك ....

..............

ركبت ام يوسف السيارة وهي ضايجة من تصرف سابين

محجت اي شي ...وحتى يوسف محجة شي

وصلو للبيت

كعد.يوسف بالهول منتظر امة تجي وتحجيلة الي صار

اتقدمت امة وهي متضايقة حيل ....

_اي يوووم اسمعج

_ماكو شي ينحجي امبين ...

متصورتة هيج تحجي وياي ...

ابتسم يوسف بكل برودة اعصاب .

وخلى رجل على رجل ورخة جسمة على القنفة

وكال

_احجيلي كلشي كالتة

_ولك يوسف ....مو سابين بركان وكب علية حتى انحرجت شحجي وشكول

اول مادخلت طبينة جوة....

بالبداية كلشي عادي ...

ام احمد كاعدة يمي وانسولف

لحد ما كلت الهم

_ اني اول ماشفت سابين اتمنيته جنتي اتصير ...

بس سبحانه وتعالى ماسمح لهل شي يصير ....

بس هسة ان شاء الله يصير

ام احمد جاوبتني

يعني شنو ام يوسف كتلهة

_اني ناوية اخذ سابين ليوسف

.....ولك يوسف اني حجيت هل الحجاية ومااشوف الا هي كامت وكالت

_خالة ام علي ....ماكو عدنة بنات للزواج

الله وياج

وطلعت

ولك حتى معرفت اجاوب انوبة مسمتني ام يوسف

ام علي

عود اتذكرني بعلي

امهة كامت اتمتمت ....يعني لا اكلك ولا تكلي اتفشلت

....بدة يوسف يضحك بكل قوة ....

وامة اتباوع علية ...

بدت صحكاتة تتزايد والدموع تنزل من عينة

....امة متعحبة على ضحكتة

_يااااا هاي اشبيك

_هههههه والله يمة جنت متوقع بس كلت خلي اتجرب

_ياااا ولك شجرب ...لعبت نفسي منه مااريدهه

شسوي بية

....سكت يوسف وهو يمسح الدموع الي نزلت بسبب كثرة الضحك

وعدل لحيتة ....وكف وكال

_يوم اني اخذهة .....لتخافين

مراح اتصير لغيري

.... بدت الام متعجبة من اسلوب يوسف الي اتغير بسرعه

مع العلم هو جان رافض بس

بسبب ملحت امة قبل

....جنت متاكد من تصرف سابين ...

بس ردت اعرف تقبل لو لا ....ومن رفضت كبرت بعيني

وعاهدت نفسي الا اخذهة ...

......

مرت سنتين من تقدم يوسف ....

وبقت ام يوسف تجينة على طول السنتين الي راحن

جنت مااطلع الهة ...

بس انجبر اسلم علية مرات وارجع ادخل لغرفتي

بقت هاي حالتي لمدة سنين لحد يوم التخرج...

جنت اكول هسة يمل ويروح يتزوج مثل انور

بس لا ظل ولا كانما ....

ماكو اي احساس

واني ابد مشايفتة ....مرت مدة طويلة على اخر شوفه الة

اما بخصوص زينة صديقتي ...فهاي قصتة اغرب ...اكتشفت اله علاقة باخوية محمد

وحبيات بيناتهم

طبعا اني مااعرف اي شي لحد ما اكتشفت بالصدفة

بان هو جاي علية وياخدهة ويطلع

لحد ما اعترف بعد تخرج زينه بان يريد يخطبهة ...

البيت كلة فرح

واني هم لان زينه انسانه خلوقة لابعد الحدود وتستاهل كل خير

وبيوم الي اتغيرت حياتي بي

اتخربط ابوية بالبيت وكع من طولة

كلنة ركضنة بي للمشفى

ظليت ابجي بغرفتي بحركة

اعرف اني اذيتة هواي ... اعرف عاندتة

اتوسلت لربي يرجع سالم

وفعلا بيومه بليل رجع للبيت بس تعبان جان

دخل لغرفتة

اني رحت سويت الة عصير برتقال

ودخلت الة للغرفه

باوع الية بعيون تعبانة ....

وكال للكل الي موجودين اطلعو اشوية اريد سابين ...

الكل طلع ...اتقربت منه وبست راسة وكتلة

_الحمد لله على السلامه

...باوع الية ....واني احس بي كبر اكبر من الازم

دااحس بي عندة هم جبير شايلة على صدرة

كمش ايدي وكال

_اني هذا مرضي من وراج سابين

...اني فزيت من حجة هل الحجاية

وبدت ادموعي تجري ....

_ليش بابا....شنو الي سويته اني وهيج تتهمني اتهام

_انتي صرتي حمل جبير ...مااكدر علية بعد

....اتقربت من ايدة واني ابوسهة واشهك من البجي وكتلة

_شتريد اني حاضرة ....بس لاتحجي هيجي

_اريدج سعيدة ...اريد اشوفج عروس بيت زوجج اريد اشوف اولادج ...

سابين ...ماتعرفين ولا تحسين الي بكلبي والي بكلب امج

الا من يصير عندج اطفال

وتكبريهم وتعرفين شنو شعورنه

سابين اني مااريد اضغط عليج ...بس لو اعرف اذيتج بالزواج اني امنعه منج

بس يوسف خوش ولد

ولحد هسة مامل من انتظارج وانتي بكل جحود وجفاء اتقابلين امة

....سابين كافي ...تعبت ..وانتي ماتعبتي

وكفت وكتلة

_بابا اذا هذا يريحك اني موافقة

دنكت علية وبست راسة

وطلعت من الباب

واني اشوف الدنية سودة بوجي

دخلت لغرفتي ابجي بحركة

اشلون ياربي

اشلون ادخل هذاك البيت ...اشلون اصعد للطابق الفوك

اشلون اذا اشوف الغرفة الي جنت مستعدة ادخلهة واني عروسته

اشلون اخذ اخوة .....شنو احس من اتقرب منه من المسة

شنو شعوري وياه ....اتذكر علي لو انساه

بجيت هاي الليلة بكل عمق بكل الم

بكل حزن احد مانمت

كعدت الصبح .....وامي مبتسمة بوجي وكالت

_صدك سابين قبلتي بيوسف

...باوعت الة ....

مااعرف شجاوب ...

رحت الة وعيوني تتوسل بيهة

_ماما الله يخليج مااريدة هو ...

اي واحد ثاني بس هو لا

_ولج طماطة عندي .....على عينج محد دك بابنة بعد ...ولج سابين الولد خوش ولد

لاترفضينه

انطي فرصة

اكعدي وياه واذا معجبج كولي ميفيدني

صفنت لحجايتة

...عجبتني الحجاية  ....

واجتني فكرة ....اني ليش مفكرت بيهة من زمان

اخلي هو يبطل مني مو اني ابطل

باوعت لامي وكتلة

_اني موافقة علية .....

امي طارت من الفرحة حتى متعرف شسوي ...

حتى نست البيض بالطاوة

وراح اتخابر

اما اني منتظرة جيتة بفارغ الصبر

جنت اتمنة هسة يجي ....علمود اعرف اتصرف وياه

....

مر يومين من بعد ماامي بلغتهم ....

وبهذا اليوم جانت دكات كلب ادك بكل قوة

كانما طبول الحرب

ضليت مترددة وخايفة

بس جان عندي هدف اسوي ...

اني لازم اواجهة ...الظاهر ميعوفني

صارت الساعه ٤ وسمعت صوت الجرس اندك ...

جنت كاعدة على الجرباية لابسة ملابسي ...

ومتحظرة

فتح باب الغرفة واباوع ابتسام

ابتسمت الية وكالت

كولي يالله وتوكلي على الله الولد ميتفوت سابين

محجيت اي حجاية بس مجرد ابتسامه خفيفة

كمت واني احس الثقل باطراف رجلية

واحس ايدي الي اتجمدت من البرد ....

جنت احس بالخوف .....ماانكر هذا الشي ..

اني من زمان اخاف منه

اشلون راح اواجهة واحجي وياه

بديت اتقدم

واني اشوف المطبخ مكلوب ...محظرين الكيك والعصير

جانو متفقين اشيل الصينية

بس مسويته فتحت الباب بكل هدوء

واني احس الكل بدة يسمع هاي الدكات الي بين ضلاعي

جنت خايفة لاعيوني تفضحني ويعرف شكو بيهة

اول مافتحت الباب ركزت علية

جان جسمة الضخم ....وتسريحة شعرة العادية ....

واهتمامة الزايد بحذائة ..

جانت اعيوني تنظر لعيونه ....

جنت متقصدة اركز بيهة

جنت اريد يحس بان اني موضعيفه ...ميكدر علية ...

سلمت بكل هدوء واني عيوني جانت علية

مهتميت منو اجة وياه 

شفت الابتسامة الي رسمه على وجة

كفيلة بان تضربني

بان اتكول ....اني مستمتع بنظراتك

زيدي ياعزيزتي

دنك راسة

وبدت اصابيعه تلامس لحيتة الغامقة

الكثيفة

ورفع راسة وعيونة بينت اكثر وضوح

اكثر قسوة ....بدة حاجبة الكثيف بالعلو...

كانما يكول الية

اني مستمتع بالتحدي

جنت منهارة ....خايفة ...ضعيفة ....احس بالانكسار

مجنت احس باي احد يمي رفعت عيوني اشوف الغرفه فارغه

بس اني وياه ....

خفت ....حيييل.....

ردت اطلع بس ...كلت لازم اخلص الي بديته

ظليت كاعدة منتظرة يحجي

بس محجة اي شي

شفتة رفع رجلة وخلاهه على الرجل الثاني ورخة جسمة ورجعه للخلف

وبدت الابتسامه ترسم على وجة ....

هذا الشي وترني

حييل ...

بدت الكلمة تطلع من بين شفايفة

بكل قوة وضخامة

_سنتين سابين .......سنتين يالة وافقتي

جانت كلماتة تطلع مع ابتسامة

_وانت شنو الجابرك تنتظر

_عاجبني ....ومستعد انتظرج بعد سنتين

.....جانت كلمتة اقوة من الرصاصة الي تنطلق

_انت شتريد مني

.....ضحك بكل برودة اعصاب ...بكل هدوء

جانت برودة اعصابة تكتلني ...تذبحني

بعد ماكمل ضحكتة كال

_انتي شنو الي اتريدينة ....هو اني جاي نتفق على المهر ...

شنو الي اتحبينة

صفنت علية  ....ياربي مااكدر بعد هذا ميحس

جاوبتة

_مااحتاج نيشان ....

لان نيشان علي بعدة

...شفتة اختلفت ملامح وجه ....وسكت ودنك راسة ورفعة

كام من مكانة .....واتقرب الية

وكعد قريب مني ..

يتبع

قصة #بدلة_عرس الجزء السابع عشر

للكاتبة لينه سعد

.........

بدت تتوضح ملامح وجة

بديت اشوف الحرق الي على الجانب الايمن من خدة ...بديت اميز لون عيونه من بين موجات الغضب الي انتابتة قبل دقايق

بديت احس بالخوف ...بدة صدري يرتفع ويهبط بقوة ...

بديت احس بان الغرفة حصرتني بي

قربتني اكثر من الازم

بدت دفعات الغضب تنطلق من بين شافيفة ...وهو يكول

_هاي اخر مرة اتجيبين اسمة على السانج

...جنت مااعرف شنو يقصد ....اني مااجيب طاري علي على لساني

لعد اجيب طاري منو ...

متحملت قربة مني ....متحملت كلمتة القوية الي كلهة نار وهو يلقيهة علية

حاولت اجاوبة بس جان الخوف الي مسيطر علية اقوى من اواجهة

كمت من مكاني بسرعه..... بس

جان هو اسرع ...اسرع بالقبضة القوية الي مليانة جمر بداخل كفهة

حسيت بالالم بذراعي  ....سحبني وكعدني مرة ثاني ...

جنت خايفة حييل

والخوف الاكثر هو من دموعي ....

وفعلا بدت تنزل وحدة ورة ثانية

واني اميل براسي بغير اتجاهه

مااريدهه اتبين الة

بدة جف ايدة يخف من قبضتة ....باوع على وجي ....

حسيت باطراف اصابيعة اتلامس وجي ...

وتحاول اتغير اتجاهه لتقابل وجه

باوعت علية واني اتمنة اذوب او اختفي او اتبخر

مد اطراف اصابيعه لناحية عيوني وبدة يمسحهة

وكال

_مااحب اشوف الدموع بعيونج

...جاوبتة

_متكدر تمنعهة ....

_جربيني سابين ....صدكيني زواجي منج يمنع نزول دموعج بعد...... وراح انسية الج

_متكدر ...

_انتي متعرفين يوسف

....بديت اركز بعيونه الحادة ..وكتله

_ليش اتريدني

.....

بس قبل لايجاوب انفتح الباب ودخلو ..اهلي ...

اما اني فانتهزمت منه طلعت من الغرفه

رحت لغرفتي

واني جسمي كلة يرجف ....

وكلبي دكاتة تتسارع ....مااعرف ليش

.....

مرت الساعات واجتي وامي وابتسام والفضول كاتلهم يريدون يعرفون شصار وشحجينة .

....

ميعرفون هو اني مااعرف هناك شصار

لحد ماملو مني وطلعو وهمة يحجون علية وعلى فهاوتي

اما اني ليش كلماتة اترن باذني ....

ليش صورتة ركزت بمخيلتي ....

......

مر اسبوع ...وبدت الاحداث تتسارع مثل شريط فيديو واحد يسرع الاحداث

بديت مااحس بشي كدامي ....استسلمت

اي بديت استسلم

لان تعبت ...والتعب هاي المرةةقوي فوك مااتحملة ...

بدت الخطوبة ...وعقدنة سيد

اما النيشان الذهب ....فهمة جابو ...

واني اصلا ممهتمة ...

وبيوم النيشان مسويت حفلة مثل باقي البنات الي فرحانة

لا اكتفيت بلس ملابس طلعه عادية

اما شعري فبقيتة بالحجاب ....

والي يكتلني هو ابد ميعارض ولا يجي هواي ..

جان مبتعد ميحاول يتقرب

او يكثر الجيات

واني جنت مرتاحة لهذا الوضع ....

وبيوم النيشان ....دخلت واني الاحظهم منتضرني .....منتظرين الاقرار بهذا الزواج

منتظريني انفذ باقي الوعد ...

اتقربت وكعدت يمة

اما كلبي ...الي متروس حصرة ...وخنكة ...

وبدت تتوضح العلبة الي طلعهة

من الغلاف

عرفت هي هاي علبة الذهب

وراد يلبسني الحلقة ....اتفاجىء بوجود الحلقة

سحب ايدي بكل هدوء

وبديت احس ...

كانما محد متواجد ويانه بالغرفة

جانت عيونة تختلف عن عيونه ....

بديت ادور على اشياء مشتركة بينهم

صح الوجة بي شبة قليل

بس اختلاف بينهم  ككبر السماء  من كل النواحي

لمس ايدي ورفعة لشفايفة

وحسيت بشفاه وهي تلامس ظاهر ايدي

بديت احس بهذا الشارب الكثيف وهو يلامس جلد بشرتي

من بعد ما بعدهة وهو يباوع علية بنظرة اول مرة اشوفه على عيونه

بدة ينزع الحلقة القديمة ...ويكول

_انتهى دور هاي الحلقة ....متحتاجيهة بعد

وبده يدخل الحلقة الخاصة بي ...

بديت احس كانما اقتلعني من جذوري

بدت قطرة من دموعي تنهال على خدي ...

ورفع ايدي وقبلهة بكل حنية

التفتت على امي وام يوسف .....كانما يشاهدون فلم حزين

بحيث سمعت شهكاتهم ...

....................................

فتحت عيوني .....

مفزوعه .....محبطة .....متوجعه

...اني شسويت .....اني غلطت

لااااا

مااكدر .....كمت على حيلي ....كلت يجوز هذا حلم ...

باوعت على الحلقة ....مو حلقتي القديمة

اي مو حلم هذا

هاي  حقيقة ....واليوم العرس

بدت انفاسي تختنك

اتضيق .....وصدري يرتفع ويهبط ....

رحت فتحت الشباك ...اريد اشم الهوة ....

مكتفيت حسيت نفسي محتاجة الهوة كلة

رحت ركض فتحت باب المطبخ وطلعت

رحت للحديقة

رحت على ورداتي الي ذبلن ومحد داراهن من بعدي ....

غمضت عيني ....وبديت اشم الهوة ..ادريد اجرة كلة

اريد يبقى اكبر مدة ممكنة

كعدت على العشب واني اتلمس الندى الي بي ..

جان الجو بارد ...

وبديت اسمع الصوت العصافير الي تبني اعشاشه

جنت اتمنى بهاي اللحظة طير .ويفرد جناحة ويطير لابعد مكان ممكن

...بديت اسمع صوت امي وراية

اجت يمي وحضنتني ....

_باردة سابين طبي جوة

باوعت لعيونه ...الي متروسة حزن ...

_يوووم مااريدة .....وبدت ادموعي  تنزل ...

_اووووف سابين ...كافي ولج بالكوة متحملة اليوم اني

لتعبيني الله يرضى عليج ...

بنتي هاي حياتج بعد متكدرين لا انتي ولا اني اغيرة

هذا نصيبج ...

كمت واني ...جنت متاكدة مراح اكدر اسوي شي ....

رحت سبحت ....وطلعنة  للصالون ...

احلى شي بالصالون اسلمهم نفسي ...

وبديت اغمض عيني ...ومااسمع اي شي اريد ابتعد عن الواقع باي ثمن

بس لكل شي نهاية .....

طلعت من الصالون ..وحتى مباوعت على بدلتي ولا مكياجي

حتى بنات الصالون متفاجئات من تصرفي ...لان ماكو وحدة بيومه المميز متهتم بكل تفاصيل

العرس والتجهيز

كعدت واني انتظره .... انتظرة علمود يذبحني الليلة ...

رفعت راسي واسمع

_اللهم صل على محمد وال محمد

شفت ابوية ...وهو يتقدم الية ...

يبوسني من راسي ....ويدعي ربي

ان اتكون حياتي سعيدة

اليوم وعدت نفسي مراح تنزل دموعي ابد ...

ظليت ساكتة ....ومحجيت اي شي

واني اسمع الدك والركص

واشوف البناات اشلون فرحانات وهنة مسوين احلى التسريحات

ولابسين احلى لبس ....

كانما يومهم المميز

بدت دكات الكلب تخفق بقوة وتعلن انتهاء المدة بهذا البيت

البيت الي خلصت احلى ايامي بي

وبدت الكولات والتصفيق والهلاهل اتزيد

وبدت تتوضح صورتة ....

وهو يدخل من الباب الرئيسي

بدة طولة الفارع .....وبدلتة الجميلة والمميزة

والابتسامه على وجة

بدة يتقدم مني

واني احترك اكثر واكثر .....اني دااحس بالخوف ...دااحس بالموت

كعد بصفي .....واقتب من اذني وهو يهمس بكل هدوء

_اريد اشوف وجج

...مكدرت احجي بس ....شفت وقاحتة ...والجسارة الي عندة رفع الطرحة الي جانت على وجي ...

رفعت عيني بعينة

ابتسم الية .....وكال

_ماشاء الله ...

ورجع الطرحة .....اما اني جنت اتمنى هذاك الي بين اضلاعي يتوقف عن الضربات القوية ..

لان بدت اتوجع من كثرة الدك

كومونة ..واحس رفع ايدي وحضنة بين ذراعه

اول مرة اكون بهيج قرب منه وبدة يجرني لسيارته ...

ركبت السيارة واني التفت على بيتنه

على حديقتي

على كل ركن منه ...

كانما هاي اخر يوم اشوفه

جان كاعد بالقرب مني بس نظراتة الي ماقلت ...

اما الكلمات مااتصور حجة اي كلمة

..........

جنت متحمس اصعد فوك واشوفه كبالي ....

جنت اتمنى الايام تجي بسرعه وافرغ اللهفة الي بيه.جنت انهيلهة دائما وهي بغرفتي وتهتم بيه

بدت الزفة اتصير وبديت اصعد الدرج واني دكات كلبي اتزيد

فتحت الباب .....

واشوفة واكفة .... مثل ملاك نازل من السماء وبدة طولة يتوضح ...ومعالم وجة الجميلة

جانت واكفة كدام المراية

كانما منتظرة دخولي علية .....

دخلت واني منتظر هذا اليوم من زمان ...

بديت اتقدم واشوف معالم وجهة الحلوة

وتسريحة شعرهة المميزة

اقتربت منه اكثر رفعت ايدي ولمست خدة

ومشيت اصابيعي على شفايفة

الي جان مخطوط بلون الاحمر ...والي ثار غرائزي الرجولية  ...

كمشتهة من خصرهة وقربتة مني اكثر

بس ...حسيت بالرعشة الي بدت تهتز مثل شجرة  واقترب الاعصار منه

.....حسيت بالرعشة بشفايفة وبدت اتكول وتنطق

_مااكدر.....؟؟؟

جانت عيونه الحزينه ...واني اعرف ليش الحزن بيهة ...بس واعدت نفسي انسي اله

التفتت الهة واني انفاسي تتسارع ...

كانما اركض من فترة طويلة

_ليش ...سابين ...مراح ااذيج ..اني زوجج.

حاولت تتملص من بين قبضة ذراعي الي جانت محاوطتهة

وكالت بكل قسوه

_مراح تكدر تاخذ مكانة ....

....بديت احس بالغيرة ....بديت احس اني مااكدر اتحمله ...جنت مستعد اضربهة

بس كلت لا ....راح انطيهة مجال

اقتربت منة واني عاقد الحاجب ورفعت السبابة واني احذرهة

_سابين .....من الايام الجاية ممنوع اتذكرين اسمة ...

صدكيني راح اتشوفين غير اسلوب

اما اليوم ...فمااريدج اني ...

مشة من كدامي ....

والتفت الية بكل عصبية

ووجهة الي اتحول للون غامق

بس خلي ابالج

اني صبري اله حدود......فلتحاولين تختبريني

......

شفت عيونه الي مليانه غضب ...

وبدت تقسى ....اني اعرف تصرفي غلط

بس متحملت قربة مني

وانفاسة القوية الي تظرب كل تفاصيل وجي والي اتريد تنهشني ...

شفتة راح من يمي بعد ماهددني ....

بديت ارتاح واستعيد نفسي .....وشفتة دخل للحمام ....

اما اني رجعت كعدت على الجرباية ومااعرف شنو اتصرف

شفتة طلع وهو لاف المنشف على حصرة

وجسمة عاري

وهو كاعد ينشف شعرة بمنشفة ثانية

انتبهت على الحروق الي تارسة

كل صدرة

مااعرف انقهرت علية ......ونزلت نظري

بدة ينشف ومن خلص التفت

الية وكال

_راح انام برة......اخذي راحتج ....

اتعجبت من تصرفة

معقولة .....

طلع وسد الباب....

اما اني ممتصورة هيج راح يكون ردة

ضليت كاعدة فترة من الوكت

واني اعاتب نفسي .....واكول شنو ذنبة

وشنو ذنبي اني هم

اعيش على ذكرى راحت وانتهت ....

....

طلعت نمت برة وصورتة مراحت من بالي ...

واحساسة وهي بين ذراعي

وانفاسهة الخايفة ....

جنت متوقع ردت فعلة ...بس اني ضامن راح اغيرة ....

بس محتاج منة تنطيني بس مجال

بس تنطيني طريق ....

غمضت عيوني واني هايم بيهة ...

وانتظر اللحظة الي اتصير بحظني وتحس بية

سابين .....تعبتيني يابنية

يتبع

قصة #بدلة_عرس الجزء الثامن عشر

للكاتبة لينه سعد

...............

فتحت عيوني بكسل ...

على دكات باب متتالية ..

اتذكرت اني نايم بالهول ...وجان جسمي متكسر من الوضعية

او بالاحرى تعبان من تفكير بليلة البارحه

الي سهرني واني دااحسب وافكر اشلون اخليهة تنسى وتندمج وياي وتعتبرني زوجهة وحبيبة وصديقة وكلشي بحياته

كمت واني افرك براسي رحت فتحت باب الغرفة

واشوفة

نايمة على الجرباية

اتقربت واني انفاسي تتضارب....

شفت رشاقتة ....وبرائة وجهه ...

وشعرهة الي منساب على المخدة مثل ليل طويل يتمنى شروق شمس من جديد

بديت الاحظ سيقانها الي مكشوفة من الشرشف .....

يبين بياضها مثل جليد بارد ...

واني مثل لهب النار الي تشتعل ...

بهاي الاثناء ....

جنت ابلع ريكي بكل صعوبة ...

جنت اتمنى المسة ...اقربة مني

جنت اتمنى تحس بمشاعري اتجاهه

درت وجي ورحت واني اتنفس بصعوبة ...

وكلت بصوت قوي اجش ....بصوت يشبه الرعد

_سابيييين......يلة اكعدي

......

حسيت بصوت قوي ...وهو يضرب مسامعي ...

فتحت اعيوني واشوف يوسف واكف بعيد وداير وجة ...

وهو يكول يلة كعدي

شفت نفسي مكشفة ...

رحت غطيت نفسي .....وكتلة

_صباح الخير

...التفتت الية ....بلا مبالاه وكال

_يلة الباب اندك راح افتحة ....

لان يريدون يتباركون على زواجنة ...

...حجاهة وهو الابتسامة الساخرة على وجه

راد يطلع ....وقبل لايطلع ...

التفت الي وكال

مااريد احد يعرف بان اني ممتقربلج

لازم انبين الهم احنى منسجمين وتمثلين كدامهم هذا الشي ......

هزيت راسي ....بالموافقة

وطلع وسد الباب ...

واني متعجبة من تصرفة ..

.....

رحت فتحت باب الملحق ...واشوف امي شايلة الصينية مال ريوك

وبدت اتهلهل

وتبوس بية ....

_صبحكم الله بالخير ياعريس

...اخذت الصينية من ايدهة

واني مبتسم اله ...

_صباح الخيرات حجية ربي مايحرمني منج ياغالية

_وانت ياعيوني هم

بهاي اللحظة

طلعت سابين من الغرفة وهي لابسة دشداشة قصيرة

وفوكاهة روب نوم ...

ابتسمت للامي ورحبت بيه .....

..اما امي المسكينة متصورة غير شي

ضحكت بكلبي وابتسمت

راحت باوست سابين ...وكالت

_يارب ااشوفكم متهناين ....واشوف جهالكم واشيلهم بايدي 

التففت الية سابين وهي منحرجة

اما اني فرفعت حاجبي الة

كانما اكول اله

بس فهميني اشلون انخلف

جاوبيهة اذا كدرين......

حسيت بية انحرجت ونزلت راسة وكالت

_الله كريم

_جبتلكم احلى ريوك من كلشي خاف ميعجب سابين شي

اكو انواع من جبن كيمر بيض

_لا خالة تسلمين كلشي منج يامحلاه

...يلة حبايبي ....

اروح اني اخذو راحتكم ....وغمزت ليوسف

بديت اضحك على سوالف امي ...

وهي لو تدري بية وبضيمي يمكن تحركنة

.....

صفنت على ضحكة يوسف ....اول مرة اسمع ضحكتة ...مجنت متصورة يضحك او يبتسم

ردت اطب بالغرفة ...بس هو صالحي

_سابين وين

_بالغرفة ...

_تعالي اتريكي البارحة متعشيتي

_مااكدر شبعانه ....

...باوع علية بخزرة .....

_لا ...تجين تتريكين يمي ....يلة مامتعود اكل بوحدي ...

مكدرت اعارضة ....

رحت كعدت بالكاع واني الملم الروب على جسمي ...

وبديت اغمس واكل ....

....جنت اباوع عليهة وهي مدنكة راسة وتاكل مثل العصفور ...كل قطعه اصغر من الي قبلة

ظليت صافن عليه على كل تفاصيل جسمهة ....

على كل حركة من ايدهة

جنت اكل ومااحس باي طعم ...

جنت اتمتع واني اباوع علية .....

باوعت على الصينية الي متروسة عسل ...ودبس ....وبقلاوة ..

ابتسمت وضحكت واني اتمتم بين نفسي

_اوووف يايمة ....كل هذا اكلة وشيصير بية ...

اذا القاضي رافض .

....بدت سابين اتباوع علية وهي ممفتهمة  الي يقصدة ....

شفتة غص ...

كمت اتقربت منه  انطيتة المي ... ....

وكمت ادك على ظهرة

_احم احم .....

...سكت من الكحة والتفت الية ....

....جانت قريبة مني ....شميت العطر الي بشعرة الي الخصل اتناثرت على وجي

صارت اعيوني قريبة من عينهة

بديت مااحس بكل شي ...جنت اتمنى هاي اللحظة ماتنكطع

اريده بهاي الوضعية  لطول العمر

بديت اركز على شفايفة الي مثل حبات الكرز

اقتربت متحملت اسيطر على  نفسي

بديت التهمة واني متعطش اله من زمان

كاني رحالة بصحراء ....واخيرا لكيت واحة ارتوي منه

بدت دكات كلبي تتسارع واني اختنك من حبس انفاسي.... ماحسيت الا

اندفعت...بكل قوة  وبدت تركض كدامي ...

وراحت للغرفة

الي جنت اتمنى ماكو مكان ثاني غير هاي الغرفه علمود متبتعد مني

.........

دخلت للغرفة واني مختنكة .....

ادية ارجف ....وكلبي يدك بكل قوة ....

رحت للمراية واني اتفحص وجي ....الي نخطف لونه

وشفايفي الي حسيت باحمرارهة

جنت مصومة ...اشلون استسلمت اله ...

اشلون قبلت يقترب مني ...

احس هناك احساس صار غريب بداخلي ...

بس لا ....لا ..

هو غافلني .....وانتهز قربي منه

واني مثل الغبية .....مركزت على وضعيتي ....يمه...

رحت ركضت للحمام مااريد اشوفه

حسيت بي دخل للغرفة ....

بقة بيهة دقائق وطلع ....

فتحت الباب وطلعت عرفت بان هو بدل ملابسة ونزل

جنت تعبانة ...ومحتارة ...اشلون راح اخلص باقي ايامي يمة .....

.......................

اجوي اهلي يتباركونه ...نزلت جوة

واني على بايات الدرج

بدت تتوضح صورتة كبالي

بديت انزل على كيف ....

جان باب الاستقبال مقابل الدرج

حسيت نفس الاحساس الصبح  ....

بديت انزل الدرجات

شفتة اشلون مسترخي ...

ويضحك وي اخوتي

لابس الدشداشة البيضة ...ينطي انطباع على ان هو مستمتع البارحة بالزواج

جان يمثل بكل براعه

اتقربت سلمت على الكل وتباركولي ...

رحت كعدت واني اتخاطف الانظار الة

وهو لا كانما ....

مااعرف ليش مهتمة ....

ضجت من نفسي ...جنت اتمنى اكوم بس مااكدر ....

وبلحظة اجتي ام يوسف دخلت اتسلم .

فاني جنت يم امي والاماكن تقريبا الكل كاعدين علية

فكمت لان مااكدر ابقيهة واكفة

كتلة

_خالة تعاي كعدي هنا

...وفعلا اجتي كعدت اما اني ملكيت مكان وكلت همزين اصعد بس

سمعت صوتة مثل موجات تهز بدني و الي ينشف كل الدم بجسمي ...

_سابين تعالي جيبلي بطل مي ...

اتحركت اجيبلة المي

اتقربت منة

وهو بحركة خفيفة

كمش ايدي وسحبني قريب لوجهي وكال

تعاي اكعدي يمي ميجوز اتركين اهلج وتصعدين

ظليت اركز على عيونه ....والاشياء الغريبة الي بيهن ...

مااعرف شنو الاحساس من اباوع لهاي العيون

احس بالخوف ....

احس بالقوة ....

احس بالطاقة....

...بدون مااحجي اي كلمة ...

رحت كعدت يمة .....

وجنت احس الحرارة المنبعثة منه ...

الي بدت تحركني بقربة مني

اكو شي غريب بي ...مااعرف اوصفه....

يمكن السبب بعدم معرفتي بي

هو لان اتزوجتة بسرعه ..

...بدو يسولفون ...بسوالف

_فمحمد حجة وكال ....

راح الحك يوسف بعد كم اسبوع

فجاوبة يوسف ....

_يعني راح تدخل السجن برجليك ولك محمد افلت من هسة ...

....بدت ضحكاتهم تملي الغرفة اما اني جنت بعالمي ...الي حايرة افك بي الشفرات المعقدة

الي مااعرف احلة

جاوبة محمد ...

_يعني هسة انت بالسجن ابو يعگوب

...التفت وابتسم الي ومد ذراعه وخلاهة علة جتفي وقربني منه اكثر

وكال

وهو يباوع على عيوني

_واحلى سجن......

جنت متفاجئة من حركتة ......ضليت مااعرف شنو الي اتصرفه..

بس الي اعرفة

واني يمة ماعندي مقدرة اواجهة

مثل الاستاذ وطالبتة ....مثل الاب وبنتة

جانت اكو حدود اخاف اتعداهة يمة ....

.........

صار الليل ....واني جنت متاكدة بان هو راح ينام برة ...

بس الي اريد اعرف ...هاي الحالة راح تستمر لو تخلص بيوم من الايام

جنت اخاف اثيرة باشياء

جنت مستعدة ابذل كل شي ...بمقابيل مايقترب مني ...

سمعت صوت الباب انفتح ظليت واكفة بمكاني ...واني انتظر دخولة ...

انفتح الباب ...

باوع علية

ورجع سد الباب .....ودخل للحمام ..

سمعت الدوش انفتح

رحت كعدت على الجرباية

حسيت بدة يصيح علية من الحمام

فزيت ....

اقتربت منة

_نعم....بهدوء حجيتة

جاوبني

_جيبيلي الخاولي والتشيرت والبرمودة

رحت طلعت الة الي يريدة

ورجعت كعدت

اما هو طلع وبدة ينشف شعرة ويقترب من المراية وبدة يحط العطر

ويمشط شعرة

واني اتابعه مثل طفل صغير يراقب والدة ويحب يقلدة من يكبر

اتقدم من الجرباية وكعد ....

اما اني ففتحت عيوني

....يعني شنو راح ينام هنا ...

مكدرت احجي ...بس بهدوء اخذت المخدة وردت اطلع برة

فسمعت صوتة المرعب مثل صاعقة

_وين رايحة

...حجيت بتلعثم .....

_هااا .....راح انام برة خاف اضايقك

_لا متضايقيني .....تعالي نامي هنا

لان الكرويتة البرة اتوجع الظهر

_شنوو وووووو

_لتفتحين حلكج ...تعاي نامي ...مالي خلكج لو اقترب منج ...اني مالي واهس بيج بعد

....جنت احجيهة بس كل الي كلتة مو صحيح ....بس مالي غير حل لازم اخليهة تتعود علية

...اقتربت منه وطفيت الضوة

واقتربت من الجرباية ....واني مترددة

الي راح اسوي صح لو غلط

واخيرا

خليت راسي على المخدة ....بس مكدرت انام

لحد ماسمعت انفاسة تتحرك

يعلن لمسامعي بان هو نام

.......

جنت منايم .....بس حبيت اخليهة تامن ....

لحد مالتفتت وشفتة نايمة

فتحت التايبل لامب ...

بدت تتوضح صورتة .....اقتربت منة  

واني اتمناهه بحضني ...

جانت غريزتي تدفعني الهة

بس كلبي يمنعني .......جنت اخاف لا تكرهني زايد ...

بدت الثورات الي بداخلي بين مايدني وبين رافض ...

كمت واني اثور .....واتنفس بعمق قوي ...

حسيت بالحرارة القوية الي بداخلي ...

نزعت التيشيرت

واني الاحظ الحروق القوية الي ناهشة كل صدري...

رجعت انام بس هاي المرة ...

حضنتة بكل هدوء وقربتة لكلبي ....

اريدهة اتحس ...بناري ...بحبي ...شوقي الة ...

جنت اشتمهة

واحية على شمتهة

ودعيت ربي ...ان تكون الي بيوم وبرضاتهة ...

حسيت بالراحة ...

حسيت بان اني مالك كلشي ....

بدت جفوني تنغلق ...وتعلن النوم على احضان الحبيب

يتبع

الجزء الي قبل الاخير 💖💜

قصة #بدلة_عرس الجزء التاسع عشر ...والاخير

للكاتبة لينه سعد

.............

مديت ايدي بكل لهفه. ...على المخدة المجاورةةالية ..

لكيتهة باردة ....باهتة من اي ملامح

صلبة من قلة النوم علية ....

مديت ايدي على باقي المكان

وجانت النتيجة نفس الشي

جانت هاي الجرباية ....تعلن قبل مدة دفو المكان الي جان ينشعل بالنيران دواخلنة المبهمة المتحيرة ....

رفعت راسي ....واني احس. ايامي كلهة نفس الشي ...

كلهة نفس الطعم ...

بدت دموعي تنزل ...واني انعل الحظ

واندب نفسي على القسوة الي جنت امتلكهة

_اني ضيعتة من ايدي

اني خليتة يهجرني

كانما مكتوب علية ان مااحب بيوم ولا اسعد وي الشخص الي يحبني

....

كمت من الجرباية ...ورحت للشباك ...واني اباوع على الاشجار الي ذبلت من شدة البرد وشدة قساوة الشتاء .....

جنت  انتظرة يحن ويرجع ....

ويرجع هذيج الايم الي بديت اشتاقلهة

التفتت على الجرباية

واتذكرت..هذاك اليوم .....

...اليوم الي حسيت بخدي يلامس شي حار ...

وانفاس تظرب بوجي ...بكل قوة ..

فتحت عيني على شعيرات قليلة متفرقة بكل مكان ...

وجسد عاري ...وتموجات من الجلد المحروق ...فتحت عيني بكل قوتة ...

اشوف نفسي مغمورة بحضنة ....

او لا ...اكثر جنت كولي محصورة بين ذراعه وبين صدرة العاري

كمت على كيف ....

مجنت اعرف اشلون وصلت الة ....

معقولة اني اتقربت منه ..لو هو الي اقترب مني ...

بديت الاحظ الحروق الي بصدرة

والي جان مشوة جزء جبير من منطقه صدرة

جان شكلة يقهر

واني اكول اشلون اتحمل هذا الشي

بديت اركز على تقاسيم وجة ....والحرك الموجود بخدة الايمن

جانت نومتة هادئة كانما صايرلة مدة منايم

جان الفضول يكتلني .....بديت اقرب اصابيعي بكل هدوء على صدرة اريد اتلمس هذا التشوه

وبديت اتلمسه وبدت اصابيعي تتحرك بدون مااوعى على نفسي

بديت اشعر بلمساتة الخشنة ...

بده عندي شعور مااعرفه يوصل الية

...لحد ماسمعت صوتة الخشن ....وهو يكول

_ترة هذا تحرش...

....اما اني سحبت ايدي بسرعه ....واستحيت متصورت راح يحس ....

كمت من الجرباية ...

وكتلة صباح الخير....ردت اغير الموضوع ...

_صباح النور .....هاي شنو منو نزعلي التشيرت ....

....ضليت فاتحة حلكي

_والله مو اني .....

رفع حاجبة ....والابتسامة الساخرة على وجه ..

_اممممم ماادري بعد ...

على العموم اني جنت مرتاح بهاي النومة ...

يلة خلي ننزل نتريك

.....وفعلا نزلنه  وبدة يومنه عادي

بديت اتعلم على البيت ...وعلى طبعه وحبة للاشياء وكرة لغيرهة ...

اما بليل فجانت حكايتنه حكاية ...

ارجع انام بالجرباية ...واكعد الكة نفسي بحظنة .......

ظلينه على هاي حالتنه لمدة شهر

واني بديت اتعلم واستمتع ....بدة شعور غريب ينتابني واني يمة بديت ارتاحلة بديت مااخاف منه

جنت اتعمد ماانام بليل ...

اتعمد ابقي نفسي نايمة ...واوهمة بالنوم ..

وبديت اعرف هو شنو الي يسوي

عرفت لمساتة الدافئه والمتعمدة الية ....

بديت احس بشفايفة الرقيقة وهي تلمس اكتافي ...

وداخل اذني

جان يحاول ميزعجني او انتبه

بدت الابتسامة ترسم على وجي ...

واني اشوفة ....اشلون يتعامل وياية ...

جان هذا الاحساس خارج عن ارادتي

خارج عن سيطرتي

مااكدر اوقفة ......حاولت واني ابتعد عنة

بس جان يجرني الة بكل قوة ..بكل سلاستة بالتعامل ...

صح اتغيرت وياه ....بس ابد محاول يكشفلي هويته ...او يصارحني بمشاعرة

محاول يتعب نفسة بهاي اللامور

.....الا ان اجة هذاك اليوم ..

يوم زواج اخوية محمد من زينه ...

اتذكر كلش زين هذاك اليوم

...كمت واني اعدل نفسي بالمراية والبس احد الفساتين الي رحنة اني وخالتي ام يوسف نشتريهة علمود زواج محمد

واشتريت فستان بدون ردان ....وفتحة من ورة طويلة

الي اتبين سيقاني

اما فتحة الصدر فكانت لابأس  بيهة

سويت المكياج السموكي وتسريحة شعر عادية ......

اما لون الفستان فجان ذهبي ...مع حذاء ذهبي

ورشيت العطر

وظليت اباوع على نفسي واني مرتاحة من مظهري ..

بديت انزل الدرج ...

باية بايه

ولكيت يوسف الي جان منتظرنه على نار

لان اتاخرنه ...

بديت انزل الدرج

شفت انظارة الي بدت تتحول علية ...

حسيت بي كام من مكانة وعيونه الي بدت تتسع ..

نزلت واني الابتسامة على وجي

اقترب مني وظل يباوع على عيوني ...

جنت احس بي ...جنت احس بكلشي يدور بداخلة ....

اتقرب من اذني وبدة يهمس

_متروحين بهذا ....

....اتعجبت من حجايتة

رجعت اباوع لعيونه الي بدت تقسة

_ليش

_شنو اليش ....شوفي صدرج ...شوفي جسمج المقسم ...

شنو وين رايحين

_يوسف اني مراح اطلع هيج ...راح البس فوكاهه عباية اسلامية

واصلا بس بلبيت احنة وبس نسوان

_حتى لو ....ميصير...

_كتلة ماعندي بعد شي ثاني البسة

وهذا اختيار خالتي يعني هي مقتنعه

بدة يقترب اكثر من وجي وبدة الحرارة الي تطلع من بين تقاسيم الوجة

وانفاسة الحارة تظرب وجي بكل قوة

_حتى لو اني اهنا الي اكول ...واذا منفذتي الي اطلبة راح اتشوفين شي مشايفتة

..بهاي الاثناء دخلت خالتي

وكالت عليمن اتصيح ...

...مابيهة شي يوسف ...يلة امشونه ..كافي اتاخرنة هسة اتروح تنزع وتلبس خلينة

خلينه انروح بسرعه

بدت خالتي تسحبني

واني اباوع على نياران الغضب الي بوجة ووو

وهو يتوعدلي بهز راسة

ابتسمت الة

شفت عيونة الي ذبلت والي اتغيرت

وكانما يحاول يمنعني من الروحة

والي يطلب مني ابقى بقربة ...

....ركبنة السيارة واني طبعا وره وامة ليكدام ....

جنت اباوع لعيونة الي مركزة على عيوني

جانت دكات كلبي تتضارب

واحس الدم اتجمع كلة بخدودي

جنت سعيدة وهو ينظر الي هاي النظرات

ليش اتغيرت احاسيسي اتجاهه

ليش يعجبني اشوف الرغبة بعيونه

كانما سحر واطعمني اياه

وحول حياتي لرغبة صارمه لشوفتة

نزلنة للبيت ....ودخلنة وبدت اجواء العرس مثل كل بيت من اتصاحبة الفرح...

بديت اشوف كرايبي ..وبدو يسالوني اذا صار عدنة طفل وجنت انحرج من هذا السؤال

جنت اكول اشلون هو اذا سألو هاي الاسئلة

شنو موقفة وشنو جوابة

جنت العرس كلة واني اتذكرة ...

بس جنت خايفة منه ...لان عيونه حجت غير حجي ...

كملت الزفه وبدت الناس تروح كل واحد لبيتة

حاولت ابقى ..وكلت لام يوسف بس كالت

خلي اتشوف يوسف

....بس اجاني الرد بالرفض ..

جنت حيل متخوفه .....جان كلبي يدك بقوة

جنت اتمنى لو سامعه حجايتة ومبدلة الي طلبة

................

اول منزلت سابين من الدرج ...بديت احس بمفاتنه الي حارمتني منه ...

جنت اتمنى مااخلية اليوم اتروح

جنت اتمنى انقضي هاي الليلة سوة

جنت اتمنى محد يشوفه بس اني

مدااتخيل اشلون تطلع والكل يباوع علية ....حتى وان كان بس نسوان ..

جنت اموت بهاي اللحظة

وهي مبتسمة كانما ممسوية شي

واني النيران تحترك بصدري

احترك للشوك ....للحنية الي مفتقدة منه

من كتلة بدلي وهي رفضت . 

وطلعت والتفتت الي والابتسامه على وجهة

ردت انهار كدامة

ردت اخطفة واصعدهة فوك واسوي الي بنفسي بيهة من زمان

حسيت بعد مااكدر اتحمل

فقدت السيطرة على كل غرائزي الرجولية

....وقررت اليوم انهي هذا العذاب الي طول اكثر من شهر

......صعدو بالسيارة وبديت اسوق واني النار بكلبي بعدهة

نار الشوك..... نار الحب.... نار الهيام

.....

صعدت فوك واني متخوفة منة

جنت حاسة بان راح يسوي شي

جانت نظرتة الحادة

والي بيهة اكثر من حجي ...كافيه بان ترعبني

بس قررت اواجهة واكلة مسويت شي غلط

امك هي الي جبرتني علية ...

....شفتة فتح ااباب وبدت نظرات عيونه الي تتغزل بعيوني ...

دخل بكل هدوء وقفل الباب ...

اتقدم مني ....واني ارجع ليورة

بدة ينزع قميصة ...ويظهر جسمة العاري .

وظخامة اكتافه

جانت الطبول تقرع ....والاصوات الي بداخلي تهتف ...جان صراعات داخلية مااعرف لغتة

بس الي اعرفة ان هناك خطر لازم اتجاوزة

بديت احجي بكل تلكىء ....

_اشبيك يوسف

شتريد ......؟؟؟؟؟

_مو كتلج ...اليوم راح اعلمج الدرس ...

ماكو احد ماسمع حجايتي ...

بدة يتقرب وكمشني من اكتافي وقربني لصدرة بكل قوة

بديت احس بالنار الي بداخلة

احس بالحروق وتشوهاتة

بدت انافسة تقترب من انفاسي ...وبدا يلتهم شفايفي بكل قوة وقسوة

بديت احس بالاختناق ...بعدتة بس هو

بقى على وضعيتة ...

كانما جوعان ويحاول يكمل كل الاكل ...

بديت ادفع بي بقوة

....ابتعدت عنة واني اصرخ علية ....

_يووسف ....شتسوي

....جاوبني وهو يتلاقف انفاسة ...بكل صعوبة ...

_كافي سابين .....مااتحمل بعد ...

مااكدر ....ارحميني ...

تعبت وانتي ماتعبتي .....ماتحسين بية ...

بدة يقترب وبدة صوتة الي يخشن ...

سحبني لصدرة ...

_اني احبج ....احبج ولج والله احبج ...

ليش متحسين بية ...

ليس ماتنطيني فرصة ....

.....جانت هاي الكلمة الي اريد اسمعه منة ...

جنت اريد اعرف هو ليش اازوجني

ليش من بين كل البنات اخذني

جان عندي الفضول اعرفة

بس من حجاهة ....اتمنيت لو محاجيهة ..اتمنيت ابقى على ماضيي..

باوعت لعيونه وكتلة ...

_مااكدر يوسف ....مااعرف اشبية

_ليش متكدرين ....بس سلميلي نفسج . ..

_وعلي.....؟؟؟

جانت هاي الكلمة الفاصلة ...بكل حديث بيني وبينه ....

بديت اشوف نظرتة الي مثل وحش مثل شخص مرعب ...

ولونه الي زاد غمقه ...

_الف مرة ...كتلج لتجيبين اسمة .... واني حذرتج ....بس متسمعين الحجاية

...بديت اخاف منة .....رجعت ليورة وهو يتقدم

...شفت نفسي واني مرفوعه من الكاع ...

وبين ذراعة ...وهو شايلني وموديني للجرباية ....

واني اصرخ ...

_لا ....يوسف الله يخليك ....يوووووسف

بس مجرد كلمات بالهواء

خلاني بكل قوة بالجرباية

وبدة يتهجم علية .....

وبدت ملامحة الي مثل الوحش ....وبدت شفايفة الي تتجول بحرية على كل مكان من جسمي

جنت احس القشعريرة ....والخوف

واني اصرخ واكول

لا....

بس الي سكتني كلمتة ...بعد ما كام من عندي ...

وهو يكول

_ليش لا....ليش  متريديني اكمشج .....انتي مو بنية ؟؟؟

انتي نايمة يمة

جانت كلمتة قاسية ...

كلمة مثل الجمر الي شمرهة على مسامعي

متحملت ..حجايتة

وكمت وكتلة

_اشلون تحجيهة....اشلون نطقتة ...وهسة يالة جاي اتحاسبني ليش مفكرت بلبداية

اتقرب مني وهو مثل البركان الي راح ينفجر باي لحظة

هسة راح اشوف

...فتحت عيوني بكل قوة

_شنووو؟؟؟

......................................

اتذكرت كل هذيج الليلة .....

اتذكرت كل تفاصيلة اللممله

رحت كعدت واني ابجي بحركة .....

اتذكرت اشلون من كام ...وهو ماخذ كل الي يريدة مني ....

جاوبتة ...بكل قسوة

_مستحيل اتصير مثلة ....مستحيل تجي لطيفه

...باوع علية .....وكال اني مو علي

ولا تحلمين بيوم  اصير هو

اني يوسف .....وابقى يوسف

واني متاكد من انج ابنية ....بس جرحتيني بكلمتج

...بس من هاي اللحظة ....اني مااريدج بعد

جنت اتصور بيج امل ..اصلح العقدة البيج

بس الظاهر ماكو اي نتيجة ...

....طلع وسد ااباب بعد مالبس هدومة ...

.........اتذكر كل هاي الحادثة ...

اتذكر ورة ساعه

صعدت ام يوسف وهي مخترعه ...

من المنظر الي بي

وكالت.....

_شكوو سابين...شنو الي صار

.....جانت ادموعي اتصب ...واني اللملم الغطى الي لافتة على جسمي العاري

...بديت ابجي ...اتقربت مني ....

وهي اتباوع علية ....وكالت

_يوسف يكول لمي هدومي اريد اسافر ...

..باوعت عليهة ....

_شنووو

_اي ولج كلبي مقبوض ..يكول الدولة دزتني لشغل برة

...محجيت اي شي ....بديت ابجي بحظنة ...

كمت بدلت لنفسي وبديت احظر الجنطة ...

كلت يجوز احسن الية من يبتعد

نزلت الجنطة اني جوة ....

وجنت اشوفة وهو محظر نفسة ...

بس ابد مباوع لوجي او ودعني بس كال لامي

_سابين اذا حابة اتروح لهلهة اتبات ماعندي اعتراض

وشنو تحتاج انطيهة ...اني راح اغيب مدة

...باس امة من راسهة وطلع

اما اني ...اني جنت محطمة ...واكفة ...مااعرف شنو شعوري بهاي اللحظة

مرتاحة .....حزينة ....فرحانة  .  مهمومة

شي مااعرف اوصفة

شي اكبر من اي مشاعر انتابتني

.....................

رحت فتحت الكنتور واني اعدل ملابسة كل يومية ...

مرت ٣اشهر من سافر....

جات يتصل على امه ...واني ابد محجة وياي

جنت اسمعه من يسال علية

اني دااحس ضيعتة من ايدي

حسيت من غاب ....حسيت اكو شي بكلبي اتغير

رحت وكفت على المراية

واباوع وجي الذبلان من بعد طلعتة بهذاك اليوم

بديت....

اباوع على القلب الصغير ...الي

جان  محتل هذا المكان لاكثر من ٤ سنين

نزعت السلسلة

وبستة ....

وكلت

_سامحني علي ....لهنا وتنتهي وياي لازم اكمل حياتي

لازم ارمم القلب الي كسرتة

رحت ضميتة بالكنتور

بهاي اللحظة انفتح الباب ...  

بس......متفاجئة ...مذهولة

معقولة ...

معقولة ...هو ...

بديت اباوع على الطول .....على تسريحة الشعر العادية

بديت المح معلام الوجة ...

بديت المح العيون الحادة الي اشتاقيت اله

بدة عطرة يترس الغرفة

وكعت الملابس من ايدي ....

ظليت صافنة ....ومااحس الا دمعات بدت تنزل

بديت اتقرب منة ...

بديت اشوفة اكثر

_ليش....هيج يوسف

....ابتسم الية وكال

_مشتاقلج هواي ....سابيني

اتذكرت كلمة سابيني جان ينطقه علي ...

بس هلمرة

انطقت من شخص ارغب لوجودة ارغب لحضنة

_كسرت كلبي ...ورحت

_واني ابعدج جنت اختنك

...رحت ركض لهذاك الحضن .....رحت ارتمي وارتوي من بعد غياب ٣ اشهر مااسمع شي عنة

لكيتة يحضني بقوة ويرفعني اله ...

وهو بوس كل شي بوجي

بديت اشوف خدة الايمن ....الي مابي اي اثر

فتحت عيوني ....واني اريد احجي

بس قاطعني وكال

_سويت عملية ....تجميلية ...وجانت الابتسامة على وجة

مااريدج اتحسين بية نقص....

...باوعت الة وكلت ...

انت مابيك اي نقص ....لان انت اروع شي بيك كلبك الطيب

رجعت الحظنة واني ....

واعدة نفسي انسى كلشي وابدي وياه حياتي الجديدة

من بعد عذاب طويل بين طيات الماضي

.......................

بدت حياتي بحب يوسف الية ...

تدرون الي غير حياتي حبة وتمسكة بية  ....هو الي غير هواي اشياء ...

وجدد بداخلي الحب من جديد بعد متجنت اتصور بيوم اكدر احب ...

واكيد السؤال الي حابين اتسئلونه الية ...

انتي نسسيتي علي

والجواب هو

اني حبيت يوسف .....بس مكدرت انسى علي

بس ابد مااجيب طارية لاي احد

......انتهت......

صدكوني ....من بعد انتهاء القصة

حسيت بالحنين واني اكتبة لان راح اشتاق لتعليقاتكم ...واتمنيت ان لاتنتهي 💜

اتمنى اعجبتكم القصة .....

احب اسمع ارائكم السلبية والايجابية

ويارب نلتقي على قصة جديدة

دمتم سالمين🍃💚✳💌💜

#لينه_سعد