رواية بدون سابق معرفه الفصل الأول 1 - بقلم دانيا

رواية بدون سابق معرفه

الفصل الاول1

بقلم دانيا

قمت من النوم على صوت امي بتنادي ،، ريان ياريان اصحي انتي يابتي مالك كسلانه كدا قومي الدنيا جمعه اتلقي م صليتي الصبح صاح ،، انا بصوت ناعس ياامي خليني انوم حبه انتي براكي قلتيها الليله يوم الجمعه....يابت قومي ول اوري ليك ابوكي هسي انا عاوزاكي تساعديني في شغل البيت عشان نسيتي الليله في شنو؟.

من قالت كدا النعاس طار من عيوني وقمت نشيطه مشيت دخلت الحمام اتسوكت واستحميت ،، اتوضيت صليت الصبح وجيت شلت تلفوني وطلعت مشيت المطبخ ، امي من شافتني روان بتي يا حليلها لو م عيانه كان بتساعدني في شغل البيت كله لكن انتي تقول مادنك جائزه في النوم دا ،، ربنا يستر بعدين م تجينا راجعه....طوالي قلت ليها بعدين متين ياامي وانا قاعده بطبز في تلفوني ، قالت لي انسي تعالي ودي الشاي دا لناس ابوكي .

صلحت طرحتي وشلت الصينيه ومشيت الصالون ،، عمي الصغير اخو ابوي كان قاعد معانا قال لي ليه معزبه نفسك كان تناديني انا بجي اشيل الشاي قلت ليهو مافي عذاب ولا شيء ،، ابوي قال لي صحي اخوكي عزام معاكي قلت ليهو سمح وطلعت ، ماشه وبتكلم قلت امي دي معليش اولادها كلهم ينومو عادي إلا انا .

جيت دقيت ليهو الباب م رد لي الباب كان متاكا ،، فتحت الباب عاينت جوا م لقيتو نايم دخلت وبقيت انادي ليهو عزام يا عزام ابوي قال لي تعال انت في الحمام؟ مافي رد واصلاً سريرو كان مرتب قلت لو عزام كان نايم في السرير دا كان جات ، طوالي طلعت مشيت لأبوي قلت ليهو شكله عزام م بايت في البيت ،، طلعت خليت ابوي هايج وكان داير يضرب ليهو.

ماشه على المطبخ الباب دق مشيت فتحتو ، لقيت بت واقفه قلت ليها اتفضلي قالت لي مش دا بيت محمد سعد ؟ قلت ليها ايوه اتفضلي قالت لي انا جيت بدال ساره البت الشغاله....وقفت عاينت ليها من فوق لتحت م بعرف قلبي ليه م ارتاح ليها ، وكمان م باين عليها شغِله ابداً وم بتشبه ساره اثناء ما انا واقفه وبعاين فيها امي نادتني قالت لي تعالي ودي الشاي ل روان .

ابوي طلع قال لي واقفه مع منو يابت قلت ليهو البت دي جات بدال ساره قالت ،، طوالي جاء عليها وانا مشيت المطبخ ، ابوي برضو بقى يعاين ليها مستغرب قال ليها وين ساره لمن رسلتك انتي؟ قالت ليهو ساره سافرت البلد امها عيانه ، قال ليها تمام تفضلي امشي دقري بتلقي ست البيت في المطبخ على يدك اليمين.