رواية بحر الانتقام الفصل الثاني عشر 12 - بقلم Lamiaa Ahmed

كان جسد حمزه المسطح فوق السرير النقال يجري مسرعا في ممر المشفي والجميع ينظر باستغراب وحزن عليه فهو من يعطي المشفي روح بمرحه المعتاد وضحكته الرنانه بين الإرجاء ....

محمد يمسك بالسرير ويجري مسرعا ليدخل الي غرفه العمليات ليتم اسعافه جيدا ....

وضع محمد له اسلاك الاجهزه بجسده ليستشعر نبضه الضعيف ... واخذ يقيس له الضغط والحراره
محمد بغضب وخوف _______ هاتي حقنه **** بسرعه

بعد ساعه تقريبا .. كان حمزه يتسطح بسكون في غرفه عاديه و مغذي موصل بيده وجواره محمد يضع بعض الحقن داخل المحلول ...

رن هاتفه للمره التي لا يعلم عددها ولكنه خمن أنها المئه

محمد _______ الو

محمود _______ انت مبتردش عليا ليه وفي اي خرجت تجري ليه كدا

محمد _______ اسف يا بابا .. حمزه كان تعبان

محمود _______ تعبان ازاي

خديجه _______ كان هنا العصر

محمد _______ انا اتصلت بيه لقيته تعبان روحتله لقيت حرارته مرتفعه جدا والضغط ارتفع بدرجه كبير لدرجه النزيف من الانف لحقته بصعوبه وحاليا في المستشفي وخايف الضغط يعلي تاني او النبض يضعف تاني

خديجه شاهقه  فقد كانت تستمع الي المكالمه عن طريق مكبر الصوت______ حمزه

محمود _______ احنا جايين حالا ازاي متبلغناش كل دا

محمد _______ يا بابا انا مكنتش فايق انا كل همي أنقذه الحمد لله الوضع مستقر دلوقتي بس واخد مهدئ لما يفوق تعالو

خديجه بدموع ______لا انا لازم اشوفه دا ابني التاني

محمد ________ يا ماما هتاجي تعملي اي انا جنبه

خديجه _______ لازم يفوق اكون جنبه علشان ميحسش أنه وحيد

محمد متنهدا _______ ماشي يا امي مستنيكم

محمود ________ في المستشفي عندنا يا محمد

محمد ________ ايوه يا بابا

محمود _______ تمام سلام .

🥀🥀

عليا _______ جاسر

التفت لها قبل أن يغادر ______ خير

عليا _______ خطيبي هيوصل من المطار هنا بكرا ياريت تبلغهم يجهزو اوضه ليه

جاسر باستهزاء_________ عايزه اي قولي كدا تاني

عليا _______ انت سمعتني كويس

جاسر _______ والله حاجه غريبه اول مره اشوف خطيب جاي يقعد في بيت خطيبته انتي اكيد اتجننتي أو العيشه بره نسيتك انتي فين

عليا ________ والله هو جاي يقعد في ملكي مش قاعد عندك

جاسر ________ ملك مين يا ام ملك انتي عايزه تدخلي راجل غريب علي امي ومراتي انتي عبيطه

عليا _______ انا مش باخد ازنك انا ببلغك وقولتله وهو خلاص عرف انت حر بقي مع امك ومراتك ..وبعدين عادي يعني فين المشكله متبقاش رجعي

جاسر بغضب ________ انت عايزه تتربي لأن انتي متربتيش اصلا

عليا بغضب _______  معلش ملقتش حد يربيني امي ماتت وهي بتولدني وابويا كان قاعد جنبك انت وامك يراضي فيكم

جاسر بغضب ________ اخرصي وخطيبك اي اللي بتقوليها دي انتي ناسيه أن انا بس اللي احدد تتخطبي ولا لا .. الموضوع دا تنسيه خالص فاهمه

عليا _______ لا مش فاهمه هتعمل اي يعني

جاسر امسكها من شعرها _______ ورحمه ابويا وابوك أن ما اتلميتي لوريك وش عمرك ما شوفتيه انا بالنسبه الواد ال ***** اللي ماشيه معاه أن لمحته قدامي في بيتي هتعرفي هعمل اي لما اشوفه فاهمه ولا لا

عليا بوجع ______ اااه انت مين انت علشان تتحكم فيا اوعي سيبني

حوريه _______ جاسر في اي .. ماسكها ليه كدا

جاسر ________ انا هعرفك انا مين

حوريه وهي تحاول ازاحه جاسر _____ في اي بس  اهدي وصلي على النبي

جاسر  بغضب________ امي متدخليش دي واحده قليله الادب متربتش

حوريه _______ حقك عليا انا سيبها علشان خاطري

تركها جاسر بغضب وعصبيه _____ غوري علي اوضتك

تحركت عليا مسرعه الي غرفتها ...

حوريه ______ في اي مالك بس كنا كويسين جوه

جاسر _______ الهانم عايزه تجيب راجل معرفش عنه حاجه وتقولي خطيبي عايزاه ياجي يقعد هنا

حوريه _______ مش يمكن ضيف يا ابني يومين ويمشي

جاسر _______ انتي بتقولي اي يعني اي ياجي يقعد يومين صاحب الهانم اللي دايره معاه في امريكا

عليا بغضب _______ مسمحلكش دا خطيبي

جاسر بغضب ________ شايفه البجاحه سبيني دي عايزه تتظبط

حوريه وهي تمسك به أكثر _____ لا علشان خاطري دي اختك عيب هتضربها

جاسر ________ مااااشي يا عليااا ماشي كلامي ميتنفذش وشوفي هعمل فيك اي

تركهم وغادر خارج القصر الي وجهته ...

حوريه ________ وانتي اي يا شيخه خلي عندك احترام ل اخوك الكبير

عليا بغضب ________ ملكيش دعوه بيا

حوريه _______ اولعي انا غلطانه كنت سيبته فشفشلك دماغك

وتركتها ودخلت الي جناح جاسر مره اخري .. لتجد وتين تتململ بتكاسل .. وتفتح عينيها ببطئ

حوريه _______ وتين

وتين ______ اممم حصل اي

حوريه _________ حمدالله على سلامتك

اعتدلت وتين جالسه _______ هو اي اللي حصل انا كنت هناك وجيت هنا ازاي

حوريه ________ جاسر اللي جابك مالك انتي تايه ليه كدا

وتين ________ مش عارفه حاسه كنت في متاهه كبيره

حوريه _______ ههههه لا كنتي نايمه المهم بقي عارفه احنا عرفنا اي انا وجاسر قبلك

وتين بابتسامه لرؤيتها سعيده هكذا ______ اي خير

حوريه بفرحه________ احلي خير يا وش السعد
وضعت يدها برفق فوق بطنها ...هنا في بيبي صغير بيكبر واحده واحده

وتين باستغراب تنظر إلي موضع يدها _____ عندي انا

حوريه ________ اه

وتين بغباء ______ واشمعنا انا ياجي عندي

حوريه لم تستطع تمالك نفسها لتضحك بصوت مرتفع رنان هههههههههههههه يا بنتي حرام عليك .هههههههه

وتين بغباء ________ ليه

حوريه وهي تمسح دموعها من كثره الضحك______ مش انتي مرات جاسر وانتي الي حامل يبقي البيبي هيكون عند مين

وتين وأدركت غباءها ______ هو انا حامل بجد

حوريه _______ ايوه

وتين بسعاده _______ الله يعني أنا هيبقي عندي بيبي وانا مامته

حوريه ________ واحلي مامي يلا تاخدي الادويه دي وانا هنزل اشوف الغدا لازم تأكلي كويس

وتين ______ امال انا مش حاسه ليه

حوريه ______ علشان لسه في الشهر الاول

وتين ______ماشي هغير هدومي وانزل

حوريه _______ ماشي

،،،،،،،

وصل جاسر الي الشركه وترجل بغضب ...

جاسر ______ مراد تعالي مكتبي حالا

مراد _______ ايوه في اي

جاسر _______ ملف صفقه الاسبوع الجاي

مراد _______ مالها الصفقه ممتازه جدا والأرباح تلات أضعاف كمان احنا واضعين ميزانيه كبيره فيها

جاسر ________ في نسخه تانيه منها

مراد ________ ايوه بس سلمناه مفيش غير النسخه اللي معاك انت بلغتني الموافقه بليل وانا بعت الملف صباحا

جاسر _______ خلاص تمام ...صحيح مراتك عامله اي

مراد _______ الحمد لله في احسن حال

جاسر _______ ماشي .. السكرتير اللي بره دا اسمه اي والملف بتاعه عايزه

مراد ________ زعلك في حاجه

جاسر _______لا ابدا شغله كويس جدا

... خرج مراد وبقي جاسر يفكر بتركيز وشرود معني أن الملف اختفي أن هناك خاين ... لكن اللي سرق الملف ليه مسرقش الملف اللي كان تحته واهم من الملف دا ..

ترك أفكاره جانبا ... وبدأ يكمل عمله ..

،،،،،،

وتين وهي تاكل باستمتاع______ حلو اوي دا اسمه اي

حوريه بابتسامه _______ كرز

وتين ______ طعمه حلو اوي عايزه تاني

حوريه _______ كلي براحتك خلصي طبق الفاكهه دا كله

وتين ______ لا انا هاكل كرز بس

حوريه _______ والباقي كله واسمعي الكلام

وتين _______ حاضر ....ماما حوريه هو جاسر فين

حوريه _______ في شغله

وتين ______ هو عرف أن انا حامل

حوريه _______ وتين انتي مالك من وقت ما صحيتي قالبه غباء ليه ..جاسر هو اللي قالي مش انتي أغمي عليك وكشفتو وطلعتي حامل

وتين ________ ايوه صح هههههههه والله معارفه مالي

حوريه ________ ربنا يهديك يا وتين انتي وجاسر ابني يا رب

🥀🥀🥀

خديجه _______ هيفوق امتي

محمد _______ شويه كدا

خديجه ________ ماشي ... طب هو كويس صح

محمد _______ الحمد لله كنا فين وبقينا فين

خديجه ______ كان كويس وخرجتو انت وهو اي اللي حصل

محمد ______ مش عارف

..
بدأ حمزه في الاستيقاظ ... ببطئ  .

محمد ______ حمزه سامعني

حمزه ______ اممم

خديجه_______ اصحي يا حبيبي انا جنبك يا ابني

حمزه بتعب  _______اي اللي حصل

محمد _______ الحمدلله كدا يا حمزه تخضنا عليك

خديجه بدموع ______ انت حاسس باي اي اللي حصلك بس انت اتحسدت والله اتحسدت

ابتسم حمزه رغم تعبه _______ شويه برد بس حسد اي

محمد _______ نشوف الضغط كام دلوقتي

حمزه _______ انتي تعبني نفسك وجيتي ليه بس يا ماما خديجه

خديجه _______مجيش ازاي امال اجي لمين ..اسمع بقي وبدون نقاش فاهم ولا لا

حمزه _______ طب اسمع الاول وارجع افهم

خديجه ________ هتاجي تعيش معايا اوضتك زيي ما هي لما تتجوز تبقي تستقل ومش هقبل اعتراض

حمزه ______' بس

خديجه _______ مبسش انا سيبتك سنه براحتك لكن صحتك مش عجباني

حمزه باستسلام _______ حاضر 

محمود ________ حمدالله على السلامه يا عم حمزه المستشفي كلها زعلانه عليك

حمزه بابتسامه________ الله يسلمك ..

...
بعد مرور يومين خرج حمزه من المستشفي بصحه جيده بعد أن انخفضت حرارته واعتدل ضغطه ..

خديجه ______ مش هتقولي بقي اي اللي حصل

حمزه وهو يضع رأسه فوق قدمها ______ خدعتني وخانتني انتي عارفه لو قالتلي في حد تاني في حياتها اهون من اللي عملتو دي جرحتني بسكينه في قلبي وكرامتي...رجعتني لنقطه الصفر من تاني .. ولتاني مره انتم اللي تنقذو حياتي ..

خديجه بدموع _______ عملت اي

حكي لها حمزه ما فعلته لينا ..

خديجه ________ مفهمتش منها ليه هي عملت كدا ليه

حمزه باستهزاء_______ هيكون ليه يعني ..مش متخيل يا امي مش متخيل أنها من اول معرفت فضلت تجاريني لغايه ما عرفت الحكايه كلها ... طب ودموعها لما كنت بتكلم كل دا كان خداع

خديجه ______ كفايه يا حمزه كفايه علشان متتعبش هي متستاهلكش انت طيب قلبك ابيض تستاهل واحده نقيه

حمزه ________ حبيتها بجد والله حبيتها

خديجه ________ يعني لو جت شرحتلك من اول يوم أنها هتاخد حكايتك في رسالتها كنت وافقت

حمزه _______ لا .. حكايتي في منها الف حكايه وحكايه لو دورتي في الملاجئ والشوارع هتلاقي كتير شافو العذاب في حياتهم

خديجه ________ خلاص انسي زفته واللي عملته و تعالي عملالك مكرونه بالبشاميل جميله

حمزه ______ مش هنستني محمد

محمد ________ تستنوني ليه

حمزه ________ هناكل مكرونه بالبشاميل

محمد ______ ايوه طبعا كنتم عايزين تغدروا بيا وتاكلو من غيري

حمزه _______ محصلش يا باشا احنا نقدر

خديجه _______ مش قولت هتتغدي انت ونهي

محمد ________ لا مش فاضيه بتشتري الحجات الناقصه الفرح قرب

حمزه ________ لولولولي وعندنا عريس لولولولي

محمد _________هتجوز هتجوز

حمزه وهو يطبل بأحد الاطباق ______ خلاص هتجوز وأبطل ابص علي البنات

محمد ويشاركه ________ وهظبط نفسي وأبطل اقضيها اشتغلات

حمزه بسعاده ومازال يطبل _______ ايوه رقصني علي الواحده

محمد وهو يرقص معه________ مش همشي ورا واحده

حمزه ______ ايوه ههههههههههههههه

محمد ________ ههههههههههه

خديجه صارخه بهم  _______ هات طبقي انت وهو بنات مين اللي هتبطلوها تعالولي

حمزه ________ دي اغنيه استغفر الله احنا كدا برضو يا ديجا دا احنا تربيتك يا عسل انت

خديجه _______ ايوه كل بعقلي حلاوه يا واد

محمد _______ طب بزمتك يا ديجا انا ولا حمزه نعمل كدا

خديجه _______ بصراحه لا 

محمد بمزاح _______ والله شكلك بتنسينا المكرونه وشكلها اتحرقت كدا ولا اي يا حمزه

حمزه _______ ايوه وانا شامم الريحه اتحرقت انت شامم

محمد ________ ايوه شامم الحقي

خديجه _______ لا والله وهتتحرق ازاي وانا طافيه عنها وبردت يا نصابين طب يلا بقي من هنا مفيش مكرونه

محمد _______ واهون عليك اهي اهي

حمزه ________ تعالي يا قلب اخوك تعالي نمشي اهي اهي نجيبك منين يا حنيه ونشتريك اهي اهي

محمد ويشاركه _______ اريد كعكا وحنان

حمزه  ________ يا ضنايا يا ابني

خديجه وهي تجري خلفهم بأحد ادوات المطبخ .....تعالولي وانا اوريكم الحنيه يا شويه جزم

حمزه وهو يجري وخلفه محمد ........ خلاص خلاص يا لهوي اجري يلاااا

محمد _______ الجري نص الجدعنه

دخل محمود من باب المنزل ______ في اي يتجروا زيي التيران ليه كدا

خديجه _______ امسك معايا يا محمود العيال دي عايزين يتربو من تاني

محمود ________ ههههههههه اهدي بس يا جميل وتعالي نشوف عامله اي علي الغدا

خديجه بابتسامه بشوشه ______ عملالك شويه مكرونه بالبشاميل وشويه بانيه تاكل صوابعك وراهم

محمود _______ يلا بسرعه جعان اوي

خديجه وهي تتجه الي المطبخ _______ ثواني والأكل يكون جاهز

تحرك محمود خلفها بعد أن غمز ل محمد وحمزه  بمشاكسه الذي يتابعون باندهاش

حمزه بدهشه _______ شوفت ياض التثبيت

محمد بدهشه هو الآخر _______ شوفت اي دا

حمزه ________ اتعلم بقي

محمد ________ هههههههه تعالي نتعلم منهم جوه

حمزه غامزا  ______ههههههههههه قصدك نقطع عليهم

محمد _______ هههههههه احبك وانت فاهمني

حمزه _______ ههههههههههههه

🥀🥀
أما علي جانب آخر ..

كانت لينا حبيسه لغرفتها تبكي بحزن علي ما اقترفته في حق حمزه .. تعض أصابعها ندما وحزنا علي ما فعلت ..

ناهد ______ هتفضلي حابسه نفسك كدا لغايه امتي فهميني اي حصل معاكي حد اتعرضلك حد عملك حاجه

اومئت بالنفي ومازالت تبكي

ناهد ____"' اتكلمي حصل اي بقالك اربع ايام علي الحال دا

لينا _______ انا غلطت غلط كبير

ناهد بخوف امومي _______ عملتي اي انطقي

لينا بدموع _______ حمزه حكالي عن حياته وانا روحت عملت رساله ماجستير عنها

ناهد _______ وهو كان موافق يعني ولا اي حكايته اصلا

بدأت تقص علي والدتها كل شي ..... دون أن تنسي اي كلمه ....

ناهد ______ أخص عليك يا لينا ليه تعملي كدا ليه انا ربيتك علي كدا .. ظروفه كان ممكن تكوني انتي بداله وحبك ووثق فيك تعملي العمله المهببه بستين نيله علي دماغك دي ..

لينا ________غصب عني والله انا كان قصدي أن لازم الناس تعرف هو كافح ازاي ووصل للي هو فيه وتحدي كل العقبات اللي قابلته

ناهد صارخه بها ______ بإرادته هو مش من نفسك تعملي كدا انتي باللي عملتيه دا كسرتي قلبه حسستيه أنه مجرد حاله من اللي كنتي رايحه المستشفي تشوفيها ...حسستيه أنه يتيم ووحيد .. وصلتيله انك شفقانه عليه

لينا صارخه ببكاء ______ اعمل اي انا غلطت قوليلي اعمل اي

ناهد ______ العمل عمل ربنا

لينا _______ هروحله بكرا المستشفي واحاول أفهمه انا كان قصدي اي

ناهد _______ لما ابقي يرضي يسمعلك ..قومي اغسلي وشك وتعالي كلي

🥀🥀
حوريه _______ تاجي معايا يا وتين رايحه اخر متابعه مع الدكتور أن شاء الله

وتين _______ مش عارفه هقول لجاسر الاول

حوريه _______ جاسر مسافر وبعدين هيمنعك يعني ؟

وتين _______ لا مش القصد بس اعرفه بس

حوريه _______ ماشي اتصلي بيه

وتين _______ مش معايا تلفون

حوريه _______ بجد ازاي مقولتيش حاجه زيي دي

وتين _______ لما جاسر باجي هقوله يجيبلي

حوريه ______ ماشي يا حبيبتي التلفون الارضي اتصلي منه هيرد علي طول

وتين ______ ماشي

.....

الو جاسر انا وتين

جاسر ______ ايوه يا وتين في حاجه ولا اي انتو كويسين

وتين ______ لا مفيش حاجه احنا كويسين الحمدلله انا كنت متصله بيك علشان اقولك أن ماما حوريه هتروح اخر متابعه مع الدكتور وعايزاني اروح معاها

جاسر ________ ماشي روحي ومتتاخروش والسواق والحرس يكون معاكم

وتين بفرحه _______ حاضر .... انت هتاجي امتي

جاسر ببسمه بسيطه ______ يومين او لما اخلص هاجي

وتين ______ ماشي تاجي بالسلامه

جاسر _______ يلا عايزه حاجه

وتين _______ لا

جاسر _______ انتي كويسه و البيبي كويس

وتين_______ الحمد لله انا كويسه بس مش حاسه بحاجه خالص اني حامل او اي اعراض

جاسر ________ مش عارف اسالي ماما وانتم جايين عدو علي الدكتوره

وتين _______ ماشي .لا اله الا الله

جاسر_______ محمد رسول الله

.....

حوريه ______ها رد

وتين _______ ايوه رد وكلمته وقالي خدو الحرس والسواق ومنتاخرش

حوريه ________ ماشي اطلعي البسي

وتين ________ حاضر

،،،،،
عليا _______ شكله مفيش حد هنا

جون ______ احسن برضو انتي عارفه انا سكت علشانك ونزلت في فندق

عليا _______ سوري بيبي خليك يومين هنا ولا تزعل

جون _______ علشانك بس يا قلبي

......

مساءا ...

حوريه _______ اهلا وسهلا مش تعرفينا

عليا _______ جون خطيبي وهيقعد يومين هنا في القصر

حوريه _______ انتي ناسيه تحذيرات جاسر

عليا ببرود _______ ميهمنيش

وتين بتعب _______ ماما حوريه انا هطلع محتاجه حاجه

حوريه _______ لا يا حبيبتي اطلعي ارتاحي

...
صعدت وتين الي جناحها تحت أنظار الخبيثه...
اخذت شاور دافئ وارتدت ملابس مريحه ..تسطحت فوق الفراش براحه اخذت الغطاء فوقها كانت تستعد النوم ولكن استمعت لرنين الهاتف الارضي الخاص بجناحهم

كانت تظن أنه موصل بالمطبخ لطلب الاشياء لذلك خمنت أن يكون أحد من الاسفل ..

سحبت السماعه بنعاس ______ الو

جاسر ________ رجعتو يا وتين

وتين بغباء _______ جاسر انت في المطبخ ازاي

جاسر باستغراب _______ مطبخ اي

وتين _________ الله امال انت بتتصل في التلفون ازاي

جاسر ________ طلبت الرقم واتصلت هيكون ازاي

وتين _______ طب ثواني بس افهم مش هو التلفون دا متوصل تحت بالمطبخ

جاسر ________ دا لما تدوسي رقم واحد لكن هو تلفون ارضي عادي

وتين _______ حاق يعني أنا عادي اتصل بيك من هنا

جاسر _______ ايوه

وتين ________ طب اقفل كدا اجرب

جاسر _______ تجربي اي اي الغباء دا يا وتين انتي بتعملي اي

وتين _______ كنت هنام

جاسر _______ روحي نامي روحي نامي علشان الغباء يقل شويه

وتين _______ الله وانا عملت حاجه مش بسال

جاسر. ________ اسالي ..انا نسيت كنت متصل ليه

وتين ______ طب خليك لما انام علشان بقيت بخاف انام وحدي

جاسر بهدوء ________ حاضر ... روحتي للدكتوره

وتين والنعاس يداعب جفونها _______ ايوه قالت كل تمام ماشيين مظبوط وقالت إن انا في نص الشهر التاني

جاسر _______ ماشي ..والدكتور قال اي لماما

وتين _______ قال خلاص بقت كويسه وتمنع العلاج الطبيعي والادويه وعطالها اسفنجه زيي الكره تقوي الأعصاب

جاسر _______ ماشي الحمد لله

استمع الي صمتها وانفاسها الخافته ليغلق الهاتف ..وذهب ليستريح قليلا ..

🥀🥀
كان يتسطح بسكون فوق فراشه ويستمع أحدي الموسيقي الخافته التي تصدر من هاتفه ....
راي العديد من الاتصالات منها من أصدقائه والعاملين بالمشفي ولكنه لا يريد التحدث مع أحد ..هو يتظاهر بأنه بخير ولكن من داخله ليس بخير .... لاحظ اتصالاتها أيضا ولكن ابتسم باستهزاء عليها.... بل أغلق هاتفه نهائيا... 

خرج الي الشرفه شاردا ليستمع الي هذا اللحن الصادر من أحد الشرف المجاوره أعجبته كثيرا فهي أكثر ما تعبر عنه

تبدأ حكايتي لما كنت بشوف عنيكي
يخلص كلامي لما ايدي بتلمس ايدكي

بسرح بفكر ازاي هوفي وعودي ليكي
تبقي انتي ليا انا بكل غالي مشتريكي

انا كنت راسم صورة لينا احلي كتير
احلي كتير
في دنيا تانيه كنتي ملكة وانا الامير

فستان وبدله بلون كسوفك فرحانين
بالنسبة ليا اليوم دا كان حلم السنين
حلم السنين
وبقينا فين
وبقينا فين

انسي خلاص كل الي كان
ضاع حبي ليكي مافيش مكان
انسي خلاص كل الي كان
ضاع حبي ليكي مافيش مكان

راح فين كلامك الي كنتي بتقوليه
دا انا ابيع الدنيا عشانك انت واشتريك
بعدك اكيد علمني ازاي بعدك هعيش

اصل انتي حبك كانت حاجه ماتتنسيش
حضني اللي كان دايما زمات تتحامي فيه
تتحامي فيه
دلوقتي خلاص ان الاوان تبكي عليه
تبكي عليه

راح فين كلامك الي كنتي بتقوليه
دا انا ابيع الدنيا عشانك انت واشتريك
بعدك اكيد علمني ازاي انسي هعيش

اصل انتي حبك كانت حاجه ماتتنسيش

تنهد بصمت زفر الهواء ودخل الي الشرفه والكلمات تدور في عقله ...انسي خلاص كل اللي كان .... اغلق الشرفه وارتمي فوق فراشه ليذهب في نوم عميق ....

🥀🥀

مضي يوما كاملا .. حوريه ووتين متضايقين من وجود جون كثيرا بأفعاله المخجله ..

وتين بتافف_______ هو جاسر مش هياجي

حوريه _______ اصبري لما ياجي انا هخليه يتصرف مع الاشكال دي

وتين ______ انا هطلع انام شويه مش عارفه بنام كتير ليه

حوريه ________ الحامل كدا يا حبيبتي اطلعي

وصلت وتين الي السلم ولكن هناك شخص أمسك بيدها .

وتين _____اوعي سيب ايدي انت اتجننت

جون _____ ليه بس يا جميل

وتين _______ سيب ايدي اوعي بقولك

جون _______ ما تيجي شويه برضاك ومحدش هيعرف

وتين _______ اخرص سيب ايدي قولت
قالتها مع صفعه بيدها الأخري ...

جون بغضب _______ مكنش برضاك يبقي غصب عنك بقي

وتين صارخه _______ يا مااامااا ماما حوريه

جاءت حوريه مسرعه لسماعها صوت وتين الصارخ تصنمت عندما وجدته يسحبها بعنوه ...

حوريه بغضب ______ اقف مكانك انت ازاي جالك الجرئه تقرب منها

جون ______ اقعدي يا ست انتي علي جنب

حوريه بغضب ذهبت كالاعصار نحوه وقامت بصفعه بكل ما تملك وانتشلت وتين خلفها ______ اتكلم بأدب ...وتين

وتين بخوف ______ نعم

حوريه _______ نادي الحرس من بره يرمو الزباله دي بره بيتي

تحركت وتين مسرعه للخارج لتصتدم يجسد كادت تقع أرضا من شده هرولتها ولكن امسكها جيدا ....

وتين بفرحه وخوف ودموع ______ جاسر الحمدلله انك جيت الحقنا

جاسر بخوف من مظهرها ______ في اي مالك

وتين وهي تسحبه خلفها _______ مفيش وقت للشرح

كانت تمسك بيده وتسير مسرعه أما هو فكان يجاريها والخوف يتسلل لقلبه أن حدث مكروه لوالدته ....

دخلت مره اخري لتشهق وعينيها فتحتها علي وسعها ..وتصاعد الغضب إلي جاسر حتي أن عروقه برزت

جاسر بصوت جهوري غاضب ______ اي اللي بيحصل هنا بالظبط

🔥🔥🔥

خلص الفصل 🔥
اي رئيكم في الأحداث ؟؟

اتأخرت عليكم عارفه بس مكنتش في البيت اليوم كله ..لما رجعت قولت اكبر الفصل شويه تعويض ليكم ☺️

متنسوش التصويت ⭐⭐ مش هياخد منكم  اقل من ثانيه ☺️☺️

بقلمي ❤️ لمياء احمد ❤️