رواية بكَ اكتمل الفصل السابع 7 - بقلم Nada hs

#بك_اكتمل

الجزء السابع

Nada Hs

بأيام رمضان ماكو كلمن وحدها..نجتمع كلنا ع سفرة وحده.. هيچ متعودين من چنا يم عيالي.. سحور وفطور سويه.. چنت اكمل السحور مالتنه فوگ بعدين اخذه وانزل جوه .. طبعا امال متحچيني ابد ولاتباوع بوجهي ولاتعتبرني موجوده..
من اكمل كل شي اگعد محمد لان هو ينام يمنه..
وهمين كل جمعه برمضان لازم يجتمعون يم عيالي..محمد چان ياخذ امال ويرحون بس اني مااگدر ادخل لذاك البيت ومحمد متفهم هل شي..بكل مره يرحون بيها يوصلني لأهلي افطر يمهم.
صارت هوايه مواقف برمضان اكتشفت بيه حب محمد اليه..
مره گاعدين نتسحر وعيونه مفارگتني..حتى مااهتم لوجود امال اني كلش استحيت منه ومن امال.. مياخذ الشي من ايد امال اله مني وميقبل ياكل من سحور امال اله من الي اني اسوي..
وره الفطور محمد ميبقى بالبيت..لو يروح لاهله لو للمعرض لو ياخذ الاطفال ويا يونسهم ويشتريلهم ويرجعهم.. بس بيوم كملنا فطور جوه اخذت المواعين مالتنه وصعدت داغسلهم.. بلشت اغسل واحس احد واگف اباب المطبخ بس ملتفتت..گلت اتوهم يعني منو؟ اطفال امال متخليهم يصعدون بالليل يمي ومحمد اكيد طالع.. كملت المواعين وانداريت شفت محمد حاضن ادي لصدره ومرتكي ع الباب ويباوعلي..  متت بدمي من شفته..
چنت مفكرته مثلي مانسه جواد ومايگدر يوصلني..
اني محچيت ونظراته وحدها تخوف.. ردت اطلع مخلاني افوت.. من ياجهه ادير هو يدير ويايه..
خنزرت علي وگلت:ممكن طريق اريد افوت!
محمد:اي شردي مو راح اكلج اني!
خنزرت اكثر وتنرفزت منه:شنو هل حچي ابو غيث!
بخطفه منه لزمني من ذراعني اثنينهن ودفعني ع الباب.. انحصرت بينه وبين الباب ورايه مطبوگ ع الحايط.. بقه يباوع بعيوني واني احس الهوى انگطع عني..
محمد جر الحجاب مني وذباه:انتي مرتي..واحبچ ..ومحبيت احد مثل محبيتچ.. مرتي وحلالي وحبيبتي! ..
بقه يباوع ع صدري الي صار يصعد وينزل النفس بيه بسرعه..
اني صبت دموعي وگلتله:انته مثل اخويه..مااريدك اكثر من هيچ.
هو سد عيونه حيل ودنگ.. بقه مدنگ وصافن ع الگاع..حسيت ضميره أنبه.. خله وراح.. من راح الخجل والقلق والحيره عفسني عفس.. حتى مادريت بنفسي وين اروح وين اجي.. دخلت يم نور بالغرفه واحاول اكون طبيعيه بس مگدرت.. بالنهايه اتذكرت جواد ودگيت بچي حتى نور اخترعت مني وگامت تبچي ويايه..
بيومها منمت جريتها للسحور.. ومحمد مااجه يمنه بيومها.. اعتقد راح لامال..حتى من گعدنه ع السحور ميباوع بوجهي مثل كل يوم ولا اكل من الي سويته.. يعني لبسني لبسه تمام..
ظلينه هيچ ايام هوايه..وتقريبا راد يخلص رمضان واحنه منحجي سوه.. بينا بس سلام...حتى المسواك هو يجيب من كيفه..ونور اذا رادها يدز اطفاله عليها.. اني هم كيفت گلت هم رجع لامال وهم خلصت من نومته يمنا..
بيوم دز ع نور اخذها وطلعو كلهم..بس اني بقيت بالبيت.. رجعولي نور مشتريلها 2نافنيف وتراكات وبنطرونات وبديات.. حتى العاب.. من چنت دااگلب بملابسها لگيت مخلي 200 الف اليه.. عود حاسب العيد جاي ولازم يفرحني.. ياعيد من بعد جواد يمر عليه وافرح.. خليت الفلوس ع صفحه ونور فرحانه بملابسها والعابها..
خلص رمضان وبليلة العيد نظفنه اني وامال البيت كله..مخلينه شي..هي سوت كليچة وچانت فرحانه منا محمد مرضيها ومنا عيد ومشتريلها الي تريده.. هي عبالها اضوج اذا شفته طلع وياهه لو اشترالهه..بالعكس اني اتمناه يقرب منها وينساني..
اجه بليلتها متأخر كلش..وومخلي شي مجايبه..چكليت حلويات ومسواگ مقسمه بيني وبين امال..
محمد:باچر نروح اني وامي وابويه للمقبره..
من سمعت طاري المقبره گلبي فز:ابو غيث..اريد اطلب منك طلب بس لاتردني..
محمد ميباوع بوجهي:گولي؟
-اريد اروح وياكم..مااگدر ابقه وانتم ترحون..
شفت وجه محمد انطعن احمر وشرايين رگبته بينت..
امال:اي خليها تروح.. وخلي نور تشوف ابوها..
محمد:يله ميخالف..ب4 نطلع..
-ان شاء الله..
رحت لغرفتي ونومت نور..ليلي كله منمته..هذا حال الي يريد يروح يلاگي احبابه..وياريتهم يتلگونه..لحد ماصارت 3ونص بليل گمت من فراشي ولبست نور واني هم لبست عباتي ونزلت..
لگيت محمد يشرب چاي وحده بالمطبخ الجوه..
-صباح الخير..
محمد:صباح النور.. اخذ نور مني وعايدها وهي نايمه..
محمد:يله جاهزه؟ نروح؟
-اي ماعندي شي..
صعدنه السياره وبعدها الدنيا مظلمه.. رحنه ع بيت عمي وبس وصلنا لگيناهم منتظرينا.. متفاجئو من وجودي ويمكن محمد حاچيلهم..
عمتي بس صعدت خلت نور بحضنها والطريق كله بقت بحضنها
ماطولنه بالطريق لان سيارة محمد سريعه وهو يتازرك بين السيارات .. شسولف عن حالي من وصلت هناك..حضنت القبر واصيح اگله حبيبي اگعد كافي نوم..بنتك دتكبر وانته مويمها.. دگيت ولطمت وعمتي هم نفس الحال وعمي ينحب.. محمد لمحته دموعه تصب سكته وهو شايل نور.. خليت نور يم القبر وگلتلها بابا هنا نايم..هذا بابا.. هي ظلت تدفع بيه وتأشر ع محمد تگلي لا ذاك بابا.. من شفتها هيچ فقدت..ظليت اصرخ واحس راسي راد ينفجر من گد ماعيطت.. غسلت القبر وبوست اسمه وظليت احچي ويا كل الي خاطري بي.. خليت راسي عليه وغمضت عيني وتخيلته هو گبالي.. ماادري شگد بقينه هناك بس مثل كل مرة اروح بيها جروني جر..
صعدت السياره واني نفسي لعبانه وروحي تريد تطلع.. تمنيت ابقى اكثر يم جواد.. حتى عمتي احسن مني وبقت طول الطريق حايره بيه وتنطيني مي بس اني حتى المي مگدرت اشربه.. لنص الطريق گلتلهم نزلوني بعد مااگدر.. بقيت بالشارع استفرغ واني مماكله شي .. كلهم حارو بيه خطيه ..خاصه محمد.. من جهه ميگدر يباوع بوجهي ومن جهه لخ خايف عليه..
شويه ارتاحيت ورحنا زرنا الامام ومحمد اصر اله ونتغده ونور هم جاعت..طلبو اكل ومگدرت اكل بس مي شربت.. رجعنا وطول الطريق نور نايمه واني دايخه واحس الدنيا تفتر بيه..
وصل عمي وعمتي لبيتهم وراد ياخذني ويا للبيت بس مقبلت گلتله يوصلني يم اهلي..
محمد بعيون خايفه:ديري بالج ع نفسج وارتاحي.. ونور هم خطيه تعبت..
-اي..
محمد:اخذج للطبيب؟ يوجعج شي؟ شكلج كلش تعبان..
-لا ميحتاج..هسه ادخل حمام وانام ارتاح..
محمد:نونو!  ..حبيبتي !..ترحين ويايه؟
نور:ايييي بابا اروح ويا!
-لا عفيه خليها يمي مااگدر ع فراگها..
باوعلي بنظره شفقه:ماشي..شوكت اجيكم؟
-بكيفك..
وصلت لهلي گوه واكفه ع حيلي .. دخلنه وامي من شافتني وعرفت بيه چنت بالمقبره بچت ع حالي.. دخلت حمام ووفاق ويايه ليفت ظهري وغسلت شعري.. واني سارحه والحسره بگلبي..
كملت وطلعت لگيت امي مسويه العشا بس مگدرت اكل.. گبل خليت راسي ونمت..
گعدت الصبح لگيت سعاد وزوجها وخالاتي اثنين جايات يعايدن امي.. كلهم من شافوني تعجبو عليه.. لان وجهي متغير والضعف صايره عودات واكثر ظي حچن علي لان بعدني بالاسود وحتى الحلقه مال جواد منازعتها.. سعاد حاولت تغطي عليه حتى لاانكشف.. والحمد لله منكشفت..تغدن خالاتي يم امي وراحن وسعاد بقت يمنه.. هم رجعت فتحت نفس الموضوع مال محمد اني ظليت ساكته واسمعها لان مالي خلگ ارد والبارحه شفت عزيز گلبي نايم بگبره.. حتى محچيتلها عن محمد وموقفه وياي.
للعصر اتصل بيه محمد وگال راح اجيكم.. امي هم حضرت الچاي والكليچة ..اجه وعايد امي وابويه.. شويه وگال يله نروح.
رجعنه ع البيت وامال ماكو يمكن رايحه لاهلها ..
شويه واجوي حمويني اسعد وفقار وجايبين فطومه وياهم.. كلش فرحت بجيتهم.. فطومه فدوه لگلبها هي صغيره وعقلها عبالك مره چبيره.. بقو يمنه شويه وراحو.. بس فطم مخليتها تروح .. واخوها محمد مگال شي..
فاطمة:والله مشتاقه لنور.. ولج لتكولين فطم گولي عمه! عمه!
محمد:فطومة.. لتضوجيها هي منا مزعوجه ع ضي..
فاطمة:اصيرلج ضي.. ميعاد ليش متگصين شعرها يلوگلها القصير..
محمد:لا.. شنو تگصه.. كل هذا الشعر الحلو والاشگر مو بعينج ترديها تگصه!
-محد يقبل اگصه واله هو كلش مضوجها ومتقبل اسوي ستوتات
فاطمة:يمه منكم يمه!
محمد:اي .. شنسوي .. هذي بنتي وبكيفي اگص شعرها لولا!
الحچايه زرفت گلبي زرف..معرفت شنو قصده منها..
رديت علي:بس هي هم الها ام وهم الها حق بيها تگص شعرها لولا..!!!
من سالفه صغيره صارت مشاحنات بيني وبين محمد.. حتى فاطمه انتبهت.. رحت اني للمطبخ وچان يلحگني محمد.. اني دايره وجهي ع الكاونتر چنت امسح بي وهو مد راسه وخله حلگه قريب من اذني:نور بنتي اني ومالچ حق بيها منا لهنا..اذا ميعجبج عوفيها وروحي..
انداريت علي اريد احچي بس مطلع مني حرف..وهو خله ورجع لمكانه..
ظل گلبي يلعب وخايفه من كلامه..مادري ليش هيچ تخبل عليه بذاك اليوم.. نامت فاطمه يمنه وهو بقه جوه.. الصبح من گعدنا ملگينا.. كملت شغلي عادي مثل كل يوم وللعصر راحت فطوم..
اجاهه فقار اخذها.. بعدين كملت يومي عادي ومحمد مشفته ومادريت شوكت رجع ..
مرت ايام ومحمد يوم عن يوم يشد ويايه ويسمعني كلام ويذبلي حچي انه نور بتهم واني مالي علاقه بيها..حتى نور..صارت كل وقتهه يمه..وهو مدللها ومخبلها بالدلال الزايد.. كلش كرهت روحي بذيچ الفتره.. وكرهته هو همين.. شذنبي الوكت خلاني بيد من لايرحم.. حتى امال..صارت تخلي نور يمها واطمعها باطفالها وهي نور متقصر لو تبقى شهر متذكرني يمكن..
كل الساعات الي فارگتني بيها نور ابقى مقرفصه بغرفتي وابچي.. عرفت يردون يعودون نور عليهم ويجوز يطردوني واصلا ماكو شي يربطنه اني ومحمد غير عقد الشيخ..يعني لاعقد محكمه ولاشي..
ظليت حايرة بزماني شلون اتصرف بهيچ حاله..صرت احچي ويه نور وافهمها تبقى يمي ومتنزل واني امهه واحبهه والطفل بغير ام ميعيش بس هي عنوديه كلش والاعصاب الي عدها ازيد من عمها..ابوها چان هادئ ودمه بارد ميعصب بسرعه بس هذي طلعتلي ع عمها.. شگد احاول اقربها اليه بس احسها متحبني ولاتهتم اذا اني موجوده واذا لا..
صرت وحيده اكثر بغياب نور واكثر وقتها جوه لى طالعه ويه عمها.. هو جهاله ميطلعهم ونور نص النهار تخلصه ويا..
صرت انزل جوه هوايه واتحمل مهاين امال بس من الوحده والهدوء القاتل فوگ.. من ترجع نور من بره كبل ياخذوهه يلعبوهه وينسوها وجودي ..كل مااصيحهه ماما تعالي خل ننام لو ناكل سوه متقبل.. وامال ترد من يمها(عوفيها تلعب)
بكل مرة اصعد خايبه وبنتي مو يمي ابقه ابچي لحد ماانام..
مره من المرات رجع محمد ونور مو ويا.. امال مكيفه وتضحك يا يمكن بتج انخطفت..
-بيش طالبتني!عايزه اني ! محمد وين نور؟
مجاوبني..طفرت دموعي من عيني ومحد بيهم گلي وينها.. ركضت لغرفتي اريد البس ردائي واطلع ادورها.. چنت دالبس ودخل محمد بغير ميدك الباب..
-شكو؟ شتريد مني بعد؟ تاخذ روحي؟ اخذها وريحني! گلي نور بيها شي!
سد الباب وتقدم عليه:نور مبيها شي لتخافين..
صرخت:لعد وينها؟ وين وديتها؟!
محمد صاح بصوت اعلى مني:كافي تعيطين اني ابوها وهم اخاف عليها واعرف مصلحتها وين!
انهاريت بالبچي ووكعت بالگاع واضرب ع رجليه:لعد وينها!وينها بنتي وينها!
محمد نصه يمي..وگال بصوت هادئ:يم امي..امي رادت تشوفها ودزيتها الها..كافي لتبچين..
-ليش هي تسوي بيه! نور بنتي اني..مو بنت احد!
محمد حوطني بأدي اثنيهن وگال:كافي ياروحي والله دموچ غاليه عندي..كافي اني اسف عذبتچ بيها بس اريدچ تحسين بيه شويه
دفعته عني وصحت بي:كافي تغازلني! انته مثل اخويه انته اخو جواد شلون هيج تفكر بيه!!!

يتبع...