#بك_اكتمل
الجزء السادس
Nada Hs
صعدت ولازمه بطني من الضربه..عبالك مضروبه بحديده.. حتى لعبت نفسي من الوجع الصار بيه.. فتحت باب الغرفه وشفت محمد بيها.. باوعلي بنظره متتفسر..جامدة كلش مابيها اي تعبير.. اني هم سكتت وبديت اكمل التنطيف العفته..
محمد:اني اسف..ضربتج بدون قصدي..
-ماتخيلتك هيج قاسي..
محمد:متدرين شنو حچت وخلتني افقد اعصابي..راح تجلطني هل كلبه..
-مو هيج..مهما حچت..المره متنضرب هيج..
محمد:هي هيج متعوده..مترتاح اله تنضرب..
كملت تنظيف وفرشتله بالگاع..
محمد:اروح ادخل حمام..ياريت لو تجيبيلي ملابسي من جوه.. ولو ازحمج ويايه.
-لا هسه اجيبلك..
نزلت دگيت الباب وطلعلي غيث...
-حبيبي..بابا يريد ملابس ..
رگع الباب بوجهي شويه وجاب الملابس شمرها عليه ورجع رگع الباب.. رجعت صعدت وانتظرته يكمل اناوشه الملابس..
محمد:ميعاد؟
-هاا..هنا اني .. ذولي الملابس..
مديت ايدي انطيته الملابس وانطخت ايدي بيده.. كلش خجلت منه وگلت هسه يگول متقصده..ركضت للغرفه وسويت نفسي نايمه..
دخل هو وراح تمدد بالگاع مااعرف شوكت بعد نام..
گعدت الصبح ملگيت محمد..تريگنا ومااسمع بس الهوسه گبت جوه.. واسمع اسمي انجاب بالهوسه..
لبست شالي ونزلت..شفت ام امال منتظره بتها باب المطبخ الجوه وتدعي .. شافتني گبل گبت..
ام امال:الله لايوفقج لا دنيا ولااخره..هاي تاليهه تخربين عيال شكبره !
-خاله ..
گبل قاطعتني:اششش ماظل عليه بس الگحاب.. يله امال..يله ولك غيوث صيح امك..
شويه مااشوف بس اخو امال دخل.. اني گبل شردت ردت افوت جوه چان يصيح كل صوته:اوكفييي! تعاااي..
يمه جمدت بمكاني مگدرت اتحرك من صاح.. التفتت علي..
عزام:هو انتي سبب هاي المشاكل مو؟ ولج اذا ماعفتي البيت قسما بالله ادزلج شلون جماعه عدي..سكاره وعفطيه ينفعوج.. من ملتج يعني.. واخليهم يسوولج الي يعجبج انتي!
اني عطت بي:احترم نفسك! اذا بيك خير احچي گدام محمد هيج..
چان يضرب الباب بيده كل قوته وصاح:ولج خره عليج وع محمد انتي منو وتهددين! اصبريلي..شوفي اختج شراح يصير بيها..
يمه متت من خوفي من جاب طاري وفاق اختي.. اخته كملت وطلعت واني بقيت اتراجف وابچي.. كلش خطرت ابالي اعوف البيت واطلب الطلاگ.. ماطاوعت نفسي...بعد ساعه من التفكير والقلق خابرت محمد..
محمد:الو..ميعاد؟
-عفيه تعال للبيت بسرعه..
محمد:شكو شصاير؟
-تعال واحچيلك..
محمد:جاي..
دقايق واجه محمد.. خطيه لونه مخطوف وخايف..
محمد:لج شكو؟
دموعي تصب واحچيله كل شي صار.. هو صار عبالك عاصفه.. گام ميعرف شيحچي.. خاصه من حچيتله ع تهديد عزام بأختي.
فلش الدنيا..ماخله لا كراسي ماشمرها لا عارضه ما ضربها بيده وخربت لا باب مادفره.. دخل الغرفه وطلع بيده المسدس يريد يطلع... من شفته ماادري شصار بيه..
نوب هو بس يسب ويغلط..
صرت گدامه:الله يخليك لتتهور..محمد لتطلع دخيل الله..
هو تجاهلني وراد يفوت گبل لزمته من ذراعه ودموعي تصب: لخاطري لتروح...لخاطر نور..نور منو الها من بعدك..
باوع بوجهي واني دموعي تارسه وجهي.. هو گبل شمر السلاح من ايده.. اني من هول الصدمه والخوفه بقيت اصرخ بصوت وشهگاتي اله شويه گطعت نفسي.. هو صار گبالي وحضني كل قوته..
محمد:كافي تبچين..مراح اسوي شي لخاطرج..
-ليش تريد تقتل..ليش تلوث ايدك بالدم..
محمد:ولج كافي دتگطعين گلبي عليچ.. هاي باقي هنا اني مراح اطلع ولا راح اسوي شي..
ماادري شنو صار بجسمي من حضني..كل جسمي كزبر وبردت وحريت بنفس الوقت.. ماردت ابعده عني..والصدگ تخيلته جواد ..چنت مشتاقه لحضنه جواد..بچيت ع صدره لزمته حيل من قميصه..تمنيت من ارفع راسي اشوف جواد مو اشوف محمد
ظليت بحضنه لحد ماسمعت صوت نور تبچي فوگ ركضت الها
وما التفتت ورايه حتى مااشوف وجه محمد..
حضنت نور والدمعه مانشفت من عيني ..بقينه اني وياهه نبچي خايفه ومهمومه واحس مالي احد بالدنيا..
شويه وصعد محمد..كلش خجلت منه من شفت وجهه..
محمد:انطيني نور وكملي شغلج..
بقيتهه يمه وكملت شغل الطابق الفوگ وسويت غدا.. ردت انزل انظف الجوه مقبل گال عوفي لتنظفي..
كملت الغده وگعدنه اكلنا .. بس شنو محمد نار بعده.. هذا محمد من يعصب ينسه نفسه..
-اذا تحب روح لبيت عمو اليوم واني اروح لاهلي..
محمد:لا خليكم يمي..بس راح اخابر ابويه واگله لان راح اطلگها لهاي الكلبه..
-لاتستعجل وبينكم تلث اطفال.. كل شي ينحل بالتفاهم مو بالعياط..
محمد صفن بوجهي وگال:ياريتها مثلچ تسمع من احچي وياهه لوتفهم شنو اطلب منها..
اني دنگت وسكتت..
محمد:تدرين البارحة اني جاي تعبان وردت بس امدد وارتاح وهي استلمتني تگلي چنتو سوه انته وميعاد وتهددني بأخوتها..
-منين جابت هل حچي..
محمد:اهلها..اذا تبقى تسمع حچيهم اني اطلگها..
-اني اسفه لان كل الي ديصير بسببي..
محمد:لا..انتي تعرفيها من قبل واكيد سامعه بمشاكلنا.. اني كلش مليت..بس لسانها شطوله وتعاند..وتدرين؟ حتى النومه اذا تقربتلها تسويها سم عليه وتبقى اطلع شغلات من جوه الگاع ها اهلك ها اخوانك ها امك.. نوب هسه خوش لگت سالفه بيچ..
اني كلش فشلت من جاب طاري نومتهم..حسيته يمتنى اتقرب منه.. ردت الوقت يخلص بسرعه حتى تنتهي السوالف وميحچي بعد..
محمد:ميعاد..تره انتي هم زوجتي..يعني عادي اذا اشكيلج واحچيلج حياتي الخاصه..
صفنت بوجهه وكلمة زوجتي منبلعت عندي..
محمد:شبيچ؟
-ها لامبيه شي..
محمد:ضجتي مني؟
-لا..مضجت.. نور شبعت ..خل اغسل الها..
گمت غسلت لنور ودخلت الغرفه بعد مطلعت... للعصر سمعت صوت عمي جوه ويصيح.. نور هم گامت تبچي تريد تطلع..
نزلت لگيت عمي هم صاير اعصاب حتى من سلمت علي مرد عليه.. چان الحچي كله ع امال واهلها.. عمي گال راح يدز ناس ع اهلها ..بقه شويه وراد يروح..محمد مخلاه گله اني اوصلك
قبل ليطلعون صحت..
-محمد..
محمد:ها؟
-وصلني وياك لاهلي..
محمد:يله تحضري..
ع السريع لبست ردائي واخذت تبديله لنور لان اكيد منبات..
گعدو عمي ومحمد بالسياره طول الطريق يحشون بامال..
وصلنا ع بيت عمي ومن شفته انهد حيلي..رجعت تذكرت اول يوم دخلت بي هذا البيت لحد ما طلعت منه بطرگ بنتي.. عمي مم نزل راد انزل ويا..مقبلت ومالي عين ادخل واشوفه.. احس روح جواد باقيه بي.. بقيت صافنه ع البيت لحد ما حركت السياره..
وصلت بيت اهلي ..استغربو من جيتي..بس اني گلبي مفرفح ع وفاق..ردت اشوفها وانصحها ماتقرب جنس ادم ولا تنطي مجال لاي احد .. وفاق خامس اعدادي واحسها بعدها طفله بعيني..
ماحچيت الها عن تهديد عزام..بس نصحتها وهي بقت مستغربه مني وتگلي شنو مواثقه بيه..گلت الها واثقه بيج بس ولد الحرام هوايه..كل كلامي ويه وفاق بعيد عن امي ووصيتها متجيب طاري لاهلي..خطيه ماعوزهم قلق..
تعشينا يم اهلي وگعدنا نتفرج تلفزيون..شويه واتصل محمد..
-الو..
محمد:ها ميعاد..راح اجيكم تحضرو..
-ماشي.
امي سألتني شراد گلتلها راح يجينا..شفت الفرحة بعيون امي.. عبالها يمكن نسيت جواد لو عبالها عايشه حياتي من صدگ..
اجه محمد ودخل سلم ع ابويه وگعدو شويه ورحنه.. من دخلت ملگيت الهوسه والتفليش الصار بلبيت من عصبيه محمد..
گلي هو نظف البيت..مادري ليش استخطيته..يمكن هذا حظه بلاه بامال وفوگ الهم اني كملتها علي..حتى من مرات الگي گاعد وحده..بس يدخن واحس الهم والحمل العلي ماكل گلبه..
تمنيت لو بيدي انسحب من حياتهم واخذ بنتي واعيش بعيده عنهم..بس منو يقبل..عمي لو عمتي لو اهلي... صعدت لغرفتنه ونيمت نور..اني دخلت حمام يله نمت.. محمد بقه بيومها بالطابق الجوه.. من نزلت الصبح لگيته نايم ع التخم بالصاله..مخلي ايده ع عيونه والايد الثانيه واگعه بالگاع.. وبصفه نفاظه الجگاير متروسه گطوف..رجعت صعدت وسويت ريوگ ..
انتظرت محمد يصعد حتى يتريگ ماكو..عبالي بعده نايم..نزلت اصحي لگيته ماكو..نظفت البيت الجوه وغسلت ملابس محمد الي بالحمام وسويت غده ونور طبعا مانست جهال عمها..بس تبچي وماادري شلون كملت شغلي ..
للظهر ومحمد ماكو..خفت بالبيت وحدي من الصبح..وعزام ميروح من بالي..استحيت اتصل بمحمد واشوفه وين.. نور نامت وصارت سنطه اكثر والشارع فرغ من الماره والسيارات..
ظليت افتر بالبيت والهي نفسي بأي شغله..ومااسمع بس صوت الباب انفتح..شفت محمد دخل يله ارتاحيت..
محمد:سلام..
-هلا..وين تأخرت متت من خوفي..
باوع بوجهي وگال:بالمعرض.ومريت لاهلي مناك..ليش تخافين.. چان اتصلتي بيه..
-تتغده؟
محمد:لا اكلت يم امي.. تسلم عليچ..
-الله يسلمها.. ترددت اسأل عن امال بعدين سألته..وامال؟
محمد:ابويه وعمي راحولهم وحجو عن تهديد عزام ودخلته لبيتي وهو يعرف انتي موجوده..
-ها؟وشگالو؟
محمد:شيگولون وكل الصوچ منهم ومن بتهم الي ماربوها..
-شوكت ترجع ؟
محمد:ياريتها مترجع..
-الله يهديكم..يله اني اروح لنور وحدها فوگ..
محمد:اني راح انام..اذا احتاجيتي شي گولي..
-عساك سالم..
محمد:الله يسلمچ..
صعدت للغرفه وخليت راسي حتى انام شويه مگدرت..تمنيت امال ترجع لان كلش مستصعبتها وحدي بالبيت..نوب حتى اهل محمد گطعو الرجل طول فترة زعله امال..
مر شهر واكثر وامال بعدها زعلانه مرجعت ومحمد معند ميجيبها وطول هل شهر اني وحدي ..اخلص الصبح تنظيف وتعزيل واسوي غده ..طبعا بس اني ونور ..لان محمد ياكل يم اهله.. بس العشا ياكل ويانه ..طبعا مااحجي عن الوحشه والضوجه والوحده طول النهار وحدي..قبل اطفال امال صوتهم كافي بالبيت.. هسه بس اني والقلق ماكل گلبي ع اختي..يوميه اخابرها واطلب من تحچيلي تفاصيل يومها والحمد لله ماكو شي بس هم ابقى خايفه عليها وهذا عزام مسقط كلش وماعنده لا خوف ولاعيب ولاحرام..
بيها قرب رمضان وبده محمد يسوگ اله ولاهله وامال مامنها خبر.. قبل الشهر الفضيل بيوم اجت امال وحدها! من غير مااحد يروحلها ولا يخابرها.. من اجت متحچي ابد وحتى سلام متسلم وحدها بالحچي بس ويه اطفالها.. اني هم عزلت نفسي منها كلش وماعدت انزل ابد اله للضروره.. طبعا محمد ما راضاها وبقو متزاعلين وطول ماهو زعلان وياهه يجي ينام يمنه .. هو بالارض واني ونور ع الچربايه.. اعرف بي هيچ يسوي بس حتى يحرگ گلب امال واله هو عادي عنده اذا ينام بالصاله او الخطار او حتى عند اهله....
يتبع...
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!