_بنات الغجرية _
( بقلم بسمة البياتي)
_البارت الثالث والاربعون _
أصال... اليوم جدو رافت واخوانة اثنين وولدهم أجوي للبصرة بالبداية عبالنا زيارة عادية
جنة صح تقوم بالواجب وتضيفهم احسن ضيافة لكن ويا ابوها كلمة متحجي وبكل مرة يحاول يتقرب منها ويكسر الحواجز البينهم تصدة ويرجع مكسور الخاطر
جدو طلب من باهر ياخذهم البيت بابا
اتصلوا عليه وراحولهم استغربنا من طلبهم
جنة... شيريدون من ابوج ليش راحولة؟
... واني شمعرفني قابل عايشة وياهم يمكن عمامج يريدون يتعرفون عليه
.... معقولة انتي متعرفين لو ما صايرة دهن ودبس وياهم وليل ونهار التلفون بيدج تخابريهم
... ههههه اشم ريحة غيرة ترى هما يعتبرون اهلي خوالي وجدي شكو بيها اذا اتواصل وياهم
... عوجت حلكي عشتو على شنو اغار الله يثخن لبنكم بس هم ممرتاحة احس جيتهم مو خالية يلا ننتظر ونشوف قابل شكو ورانا يا خبر هسه بفلوس بعدين يصير ابلاش
.... واتكولين عليه فضولية دشوفي نفسج شلون تحوصين حتى تعرفين
.... اكرميني بسكوتج ترى واصلة الخشمي
هذا رافت لزك سوة الطريق بينا وبينهم خطوتين ظل رايح جاي ولاعبالك هما شمال واحنا جنوب
.... شوكت الله يهديج عليه ترى خطية الرجال تعبان ومريض ورغم السفر موزين عليه يتعنى ويجي يشوفج ويريد رضاج لايصير گلبج اسود ممتعودة على هذا برودج وقساوتج شوكت ترضين عليه
.... لو اموووووت ما ارضى سمعتي اشكلت لو امووووووت
...ترى مو طرشة سمعت شكو تصيحين اوك براحتج ظلي هيج بس مو من يموت لا سامح الله تظلين تبجين وتأكلين رأسي وتعالي اصال واسي وصبري
... الله لايثرد الاحد بماعونج اكلتبني حاصل فاصل اكوم اجيب التلفون واتصل على باهر واشوف شصار احسن من الكعدة كبالج
... ترى انتي جيتي كعدتي اني مصحتج
خزرتني وراحت هههههه
ورة خمس دقايق اجتني عيونها بكصتها من العصبية جرتني من عكس ايدي قوي وعاطت بوجهي
... لج ررررررعنة جنتي تعرفين جايج خطابة
... فتحت عيني بصدمة شنو منو يا خطابة شبيج
.... لاتسوين نفسج متدرين ممعقولة يجون مناك لهنا بدون ميسألوج وياخذون موافقتج احجي لا أبتلي بيج
... جنة تحجي بحركة وعصبية بحياتها ممتعصبة عليه بهاي الطريقة اريدها بس تهدء كتلها وروح ماما وغلاتج عندي ما اعرف عن شنو تحجين ومحد كايلي شي
جنة.... عفت ايدها وكعدت على القنفة لأزمة راسي اني من البداية مرتاحيت الهاي جيتهم حسيت وراها شي اتصلت على باهر اكثر من مرة يلا جاوب كالي ما اكدر احجي وياج هسه
كتلة اطلع برة ما اطول دقيقة واسده من طلع سألتة بفضول. رافت وجماعتة شيريدون من منصف
جان جوابة مثل الصاعقة الوكعت فوك رأسي كال جايين خطابة على اصال لأبن عمج ابراهيم من ارجع احجيلج
اصال... من كالت رايديج لبراهيم منطيت اي ردة فعل
.... هسه ارتاحيتي شفتي شقاج الماصخ وين وصلج
... يا شقى شبيج جنة وشكو هلكد متعصبة عليه قابل اني كتلهم تعالوا خطبوني
... اكيد من سمعوج اتكولين الضياء حرامات ماعندك ولد جببر جان خطبتة عبالهم ميتة على الزواج وادورين رجال
.... يااااا هاي عود صدوك تحجين ترى كلامي جان مبين شقى وهي مرة وحدة هيجي حجيت لاتفسرين الأمور على مزاجج
... سمعيني لج من يجون يسألج ترفضين فاهمة والله على جنازتي اخليج تصيرين الهم كطنة وشيلها من اذانج
... اريد اقترب منها اخاف دترجف من العصبية اول مرة اخاف منها ومن ردت فعلها
حجيت بهدوء اروحلج فدوة اهدي لايصير بيج شي ومنو يكولج اني جنت راح اوافق شلون تتوقعين اعوفج واروح غير محافظة وتدرين بيه صارت عندي عقدة من الزواج من ورة الميتسمى اكيد تخبلت اذا ارجع اكرر نفس التجربة
... هديت شوية وارتاحيت جوابها مي بارد ونزل على گلبي كتلها اصال اني مو انانية وجاي اوكف بوجه قسمتج بس صدكيني هذولة الناس ميفيدوج لا عبالج ما اريد انطيج حتى انتقم من رافت لا وداعت بنتي مو هذا السبب اني خايفة عليج
هاي العائلة متتامن خايفة يصير بيج مثل ماصار بينا اني وعطر ياخذوج يذلج ومن بمل منج يعوفج اكيد هسه بداخلج اتكولين هو مو رافت واني مو مرجانة
واني راح اكولج شمدريج ميطل مثلة شاف بنية حلوة دخلت مزاجة قرر ياخذها وراها يبدي يطلع عيوب الدنيا بيج هاي حفيدت مرجانة واكيد مثلها ويشمرج مثل ما رافت شمرنا
وانتي عندج تجربة فاشلة والله هالمرة اذا لا سامح الله فشلتي والكعبة محد يرحمج واولهم اهل ابوج امثال زهراء وام رضا ورحيم ومرتة
.... هذا هو جنة لاتبررين ميحتاج بس يجون ويسالوني ارفض اني اصلاً ما افكر ازوج ابد ابقى هيجي احسن
المغرب رجعوا وبابا وياهم الخطار كعدوا بالأستقبال اجة بابا للمطبخ كالي تعالي الغرفتج اريد احجي وياج دخلنا للغرفة جنة اجت ويانة
منصف.. اكيد عرفتي ابن اخو جدج رايدج وجاببن يخطبوج شنو رايج
جنة... متوقعت تجي تسالها عبالي من يمك راح ترفض شلون تصخي تشمر بنتك هالشمرة
منصف... اهدي خوية ليش هالعصبية اني جيت اسمع راي اصال
... فرضا موافقة راح تنطيها؟
كعد على الجرباية وخلى ايده على راسة كال تردين الصدك اتمنى ترفض وبنفس الوكت ما اريد ادخل بخطيتها للمرة الثانية
اول مرة انطيتها بدون موافقتها وشفتي بعينج شصار بيها هالمرة القرار بيدها
.... تريد تخبلني يعني ابن عمها الي كدام عينك مصانها تريد الي من طرف رافت وعايش بعيد عنك يصونها هذولة نفس الملة وأكيد طالع على عمة
.منصف...بوية اصال جاوبي وريحيني وريحي خالتج
.... لا بابا ما اريدة بلغهم اصال مموافقة ومتفكر بالزواج
... احسن قرار بوية هسه ارتاحيت لوما حالف ما اجبرج على شي
جان نفس الدقيقة بلغتهم رفضي هو انتي بيت عمج وانه بالي يمج مو عاد ادزج المحافظتهم
.... ابتسمتلة لاتخاف حبيبي اني باقية على گلبكم انت وجنة
اباوع عليهم شلون ارتاحوا
بابا كاللهم اصال مموافقة
باليل ضياء وجدو حجوا وياي حاولوا يقنعوني وظلوا يمدحون بي من شافوني قافلة عافوني برآحتي رجعوا المحافظتهم وانسد الموضوع
ورة يومين الصبح باهر مموجود. وجنة بالحمام تسبح رقية
اندكت الباب رحت فتحتها رضا صار كبالي ردت اسده بوجها دفعة وفات للحوش
هيوووو وين فايت باهر مموجود اذا رايده من يجي تعال
... شنوو هيو عدلي الفاظج لا اكص لسانج
.... وانت منو تكص لساني دمد ايدك وشوف شلون اكصها الك
اقترب مني واني الجبانة لو ماشوية اطكها بركضة من الخوف بس استحيت اسويها ظليت صامدة واني بداخلي ارجف.
.... هذا لسانج بعدين احاسبج عليه من تصيرين يمي لان هسه مو وكتها
سمعيتي زين اهل خالتج بعد اذا اجوي احرك عشيرتج اذا طلعتيلهم وبطلي خفة افتهمتي
... احترم نفسك هاي منو الخفيفة اني اشرف من امثالك الخفة مو الي لليمتعشكون وكاضينها دياحة وختلات وبعدين صاروا برأسي بس هما وبس
.... كليلي انتي ناوية على موتج ما اعيد كلامي مرة ثانية اهل خالتج كطعي علاقتج بيهم واذا بعد سمعت جاين يردوج ما اخليهم يطلعون من البصرة سالمين اسويها دم
سمعنا صوت جنة رضا كال انه رايح وكلامي تنفذي ورجلج فوك راسج
راح واني رجعت فتت جوة تعبت هلكد ما اشتكي منه الظاهر كولشي ميفيد ويا سكتت ومحجيت الاحد جنة من سالتني منو بالباب كتلها ابن جيرانة الطوبة مالتة وكعت بالحديقة وانطيتهيا
اليوم كاعدين العصرية بنين يمنا. سألتني بنين بيت جدج هم بعد فتحوا موضوع الخطوبة وياج
جنة جاوبتها بدالي
... وداعتج بعدهم لهسه يحومون عليها ويحاولون يقنعوها وهي الرعنة مجلبة بيهم متقبل تخفف علاقتها وياهم
اصال... عفية ترى والنبي ضجت اليسمعج هيجي تحجين يكول اني الي كتلهم تعالوا خطبوني الولد رادني وموافقت خلص سدي الموضوع ترى گلبي خلص
... يااا وشكو انحمقتي لان جبت طاريهم جتفج دخن عليهم اي صارو هما الكل بالكل
بنين... ياااا صلوا على النبي شجاكم عين وصابتكم معقولة انتن تتعاركن واحنا نضرب مثل بعلاقتج وحبجن
جنة... اني خايفة يضحكون عليها ويقنعوها ادري بيها عقلها صغيرة وبسرعة تتقشمر
بنين.. اذا خوش زلمة شكو بيها ليش توكفين بقسمتها
... شوف هاي بعدها اتكول خوش قسمة يابة ليش متفكرون بعقل اليجي من طرف رافت معقولة خوش وازيدج من الشعر بيت الولد مطلق بعده عريس مصارلة ثلاث اشهر من مزوج ومطلق مرتة والله اليعلم ليش هجت منه البنية
.... لا هاي مو خوش سالفة وانتي ما عرفتي ليش مطلك
... ضياء حجالي بس مقتنعت يكول اختة الجبيرة مزوجة ابن جيرانهم بس دوم مشاكل بينها وبين زوجها لان يغار عليها رغم هما موصغار وبنتهم الجبيرة عمرها 15 سنة
دوم اختة تجي زعلانة الاهلها وبعدين ترجع
ابراهيم خاطبيلة اخت نسيبهم ومزوجين صايرة مشكلة بين اختة وزوجها وجاية زعلانة وهالمرة قافلة على الطلاق لان كاتلها مشبعها كتل
زوجها من سامع تريد تطلك منه جاي البيتهم وماخذ اختة كايل لبراهيم مالك مرة عدنا اذا ما اختك ترجع
محاولين اكثر من مرة يرجعوها اخوها مقابل ويم نفس القاضي المطلك اختة الجبيرة هذاك هم مخلي ابراهيم يطلك مرتة
وراها بمدة اختة كايمة تحوص تريد ترجع الزوجها اهلها ميرفضولها طلب لان هاي بنتهم الوحيده
ابراهيم معترض ابوها وامها كايليلة انت معليك اختك عدها جهال شنو ذنبهم يربون بعيد عن ابوهم ومرجعيها الزوجها
ومن راجعة العلاقات بينهم رايدين يرجعون مرت ابراهيم بس هو مقابل كايل اني مولعبة بيدكم تاخذوها شوكت ميعجبكم وبعدين ترجعوها وهي ماطول طاوعت اخوها وراحت ويا بعد من سابع المستحيلات تصيرلي مرة وما الفيها بيتي شنو تريدون اظل عمري كله كلما تزعل اختي هي هم لازم تزعل
... ياااا حقة ميريدها هذا الزواج اكبر غلط كومة بيوت انهجمت من ورة زواج الآخوة
... بس ترى هما مو كصة بكصة اخوها مالة حق ياخذها من بيتها وهي شلون قبلت اشو مداقتنع بالموضوع
.... نفس الشي ماكو فرق صح مازوجوا سوة بس هم ينحسبون مثل الكصة. بكصة وليش مامقتنعة هواي سامعة مطلكين من ورة هالسبب واحد مايتوالم ويا مرتة يطلكها وللثاني من يسمع اختة اطلكت يطلك مرتة
... معلينا بيهم الله يهديم
اصال... نفسيتي زفت جنة هواي دتقسي عليه مرات اطخ براسي الم ملابسي وارجع اعيش ابيت بابا محاربتني حرب اعصاب خصوصا اذا تشوفني احجي ويا احد من طرف جدي هما يتصلون واني استحي ما اجاوب
واني علاقتي بس بضياء وايمن واختهم ملاك وزجة ضياء
حيل اختنكت كمت من يم بنين وجنة دخلت الغرفتي
ظليت بغرفتي وهي ابد مجتني وقت العشا صاحوني رحت كعدت وياهم اكل بهدوء باهر حس اكو شي
باهر... منين اجاج هالهدوء يومية صوتج يوصل السابع جار
... شنو تريدني اكوم اهوس مدتشوفني داكل
... وعلي اكو شي وجوهجن متبشر بخير
جنة... كولشي ماكو شنو شايفنا متكافشات
اصال.. تنهدت وحجيت بهدوء باجر ارجع البيت بابا
جنة وباهر عافوا الأكل وصفنوا عليه
باهر.. مو انه من البداية كلت اكو شي احجوا شصاير وانتي وين تردين تولين انجبي وكعدي
... لا مصاير شي اني اريد ارجع بابا خطية دوم يريدني ارجع
جنة... يعني لان احجي المصلحتج تريدين تعوفينا وتروحين لج اني لو ماخايفة عليج ما اقسي وياج بالكلام هلكد
باهر...شنو طرطور كدامجن فهمني شكو
اصال.... متحملت كمت ابجي بشهكة من البداية رفضت وانتهى الموضوع شكو كل شوية تحجين وترزليني صرت اخاف احجي شي لو اتصرف تصرف بدون قصد ويضوجج حتى تلفوني من يدك تبقى عينج عليه تراقبني وتخزرين بيه
واني اظل محتارة اجاوب لو لا واذا مجاوبت هم تستلميني ليش مجاوبتي ومن شنو خفني حياتي بهالبيت صارت جحيم اروح يم بابا احسن كمت وعفتهم
سمعت صوت باهر يحجي عليها وهي تبجي
جنة... اعرف جاي ااذيها وضابة الحبل عليها والله موبيدي روحي محتركة ادري بيهم مديجوزون منها الله بلانا بيهم بلوة
باهر... جنة ترى طوختيها شبيج شادة وياها مو هاي اصال عزيزة گلبج شلون تتحملين تنزلين دموعها بروح اختج عوفيها
... كمت ابجي ليش اني هين عليه اقهرها وابجيها والله من خوفي عليها ما اريدها تروح يمهم گلبي ممرتاحلهم مو كافي السواه ابن اخوك بيها تريدون نرجع انشمرها بالنار يم رافت وجماعتة
باهر... مامعقولة انتي نفسها جنة ام گلب الطيب منين جايبة كل هذا الحقد بوية ترى مو كلهم مثل رافت دشوفي اخوتج الله يحفظهم الشبابهم يتخلون على الجرح يطيب وحتى ابراهيم مبين نفس شخصيتهم ولد محترم اخلاق ورجولة
وهو الموضوع انسد وراح شكو لازكة بي
... مجاوبتة شحجي وشكول كلامة صج وبنفس الوقت محد يحس بالبداخلي خوفي عليها عاميني كمت رحت يمها لكيتها بعدها تبجي كعدت يمها لزمتها من ايدها وجريتها الحضني
تريدين تعوفيني ولج وترحين البيت ابوج
... اي احسن انتي متغيرة عليه
...ليش ولج بشنو متغيرة تعتبرين خوفي وحرصي تغير عليج
.... واني ممسوية شي غلط حتى تخافين
... هاهية بعد معليه بيج بس المهم لاتبجين وتنقهرين وانسي سالفة روحتج البيت ابوج شحدج توصلين للباب أكسر رجليج
.... ابتسمت صايرة تخوفين
...فدوة اروح الضحكتج ولج والله عيد عندي اشوفج مستقرة ومرتاحة بس هذولة الناس خايفة منهم بالكعبة خايفة منهم
... هذا هو سدي الموضوع واني ما راح اسوي شي يغثج
باستني وطلعت
جنة بدت تفك وتتصرف وياي بشكل طبيعي
ورة كم يوم باليل قبل لا انام رن فوني رقم غريب سويتة صامت ومجاوبت اكيد رضا ماكو غيرة خلصت المكالمة رجع اتصل مرة للخ هم مجاوبت ثالث مرة صرت اعصاب
فتحت الخط خليت الفون على اذني اريده يحجي شو هذا ساكت
حجيت من بين اسناني
ترى تعبت منك انعل الساعة السودة الجمعتني بيك لك بس فهمني وييين كرامتك وين رجولتك ولو اني كايلتها من زمان حرامات انت محسوب على الزلم اشكد اتحب الأهانة والرزالة الظاهر جلدك ادبغ تف عليك وعلى شخصيتك
احجي بنفعال وعصبية طلعت كل البگلبي لان مسيطرة هو مو كدامي فااحجي براحتي بس الغريب اشو هذا ساكت مسحت بي الكاع وهو منطق ولا حرف
سكتت جيت اسده وجان ينطق
... منو هذا المضوجج هلكد؟
...والنبي من سمعت الصوت ردت ابجي لطمت على خدي قوي سديت الخط وطبيت جوة البطانية ارجف عززززا بعيني صخام الصخمني هذا منو الرزلتة وجمالة ماخذة راحتي بالغلط بطني مغصتني الفون رجع يرن كمت ابجي شنو هالورطة يربي وصل مسج فتحة وايدي ترجف
مكتوب اصال جاوبي اريد احجي وياج
طفرت من مكاني هذا يعرف اسمي يعني يعرفني لا يربي مسحت دموعي كلت شكو هلكد خايفة قابل شمسوية خلي اجاوب
فتحت خط وسكتت
... الووو شو سكتي وين راح لسانج اليسمع هدوئج هسه ميكول هاي نفسها القبل شوية جانت تقسم براحتها
... انت منو ومنين تعرفني وشرايد
.... اني ابراهيم ومنين اعرفج اعتقد احنا كرايب وشرايد منج عندي موضوع وياج
... خوفي تحول عصبية عقدت حواجبي نترت وشكو متصل مو عيب عليك داك عليه بهيجي وقت
... على كيفج ترى مجاي اتحارش بيج واعاكسج كتلج عندي سؤال واريد جواب وراها امسح رقمج وبعد ما اتصل
... ايباه مو قصده يتحرش هاي السوالف صارن قديمات والقهر باهر وخوالي يمدحون بيك
... ادري شنو انتي الخاطر، ربج لسان لو مدفع رشاش
... منين جبت رقمي؟
... اليوم سمعت ايمن يحجي وياج اخذت الرقم
... اياا ناقص شلون ينطيك الرقم
... منو ناقص؟
... محد اني مخبلة وداحجي ويا روحي
... ترى ايمن منطانيا اني اخذتة من تلفونة
.. بارك الله بيك ونعم الأخلاق
... هواي اجاوزتي عيب بابا انتي بنية مصير هاي طولت لسانج
من اقلل ادب واجاوز حدودي وياج هذاك الوقت الج حق شسوين سوي ومحد يلومج
.... اللهم طولج ياروح فضني شرايد وليش متصل
... ليش رفضتيني؟
... بكيفي اني ما افكر بالزواج
... متفكرين بالزواج لو متريدني اني بالذات
...وشعندي وياك حتى ما اريدك انت بالذات اني ما اريد ازواج بشكل نهائي
... اها زين ممكن سؤال ثاني
.. شحيفضها اليوم تفضل اسأل
...هههه أستغفر الله يعني متكدرين اتجاوبين بدون هالعصبية
... لا ميصير يلا حتسال لو لا اريد اسده
...اول متصلت ونزلتي دوسة ونص على منو؟
... اعتقد هالسؤال ميخصك وممجبورة اجاوب عليه
.... اعرف ممجبورة بس يهمني اعرف ياريت اجاوبين قصدتي طليقج لو غيره؟
... حيل ضجت منه هو شعليه بيه وشكو يسالني اضطريت اجاوب ما اريده ياخذ نظرة عني اني صاحبة علاقات واحجي ويا شباب
اي هو وهسه ح سد الخط وياريت تمسح رقمي اذكر اني محسوبة عليكم موحلوة تخابرني بنصاص الليالي
... ميحتاج تحجين هيج بدون متكولين راح امسحة ترى اني من اتصلت موجاي ادور علاقة وياج كتلج عندي سؤال جنت اريد اعرف سبب رفضج لا اكثر ولا اقل تصبحين على خير والله وياج
... خليت راسي على المخدة هفف والله جنة اذا عرفت ابراهيم اتصل عليه. تكسر الفون على راسي اغلس وما اكوللها احسنلي
مر على مكالمتي ويا ابراهيم شهر خلال هاي الفترة ابد مرجع اتصل والوضع طبيعي
باليل باهر كال الجنة باجر اهلج يجون شوفي شمحتاجة كتبيهن الي حتى من الصبح اجيبهن احسبن حسابجن تسون غدا
... جنة باوعت عليه ورفعت حاجبها كتلها شكو هيجي تباوعيلي ترى والنبي ما ادري بجيتهم حالي من حالج
.... هسه اني حاجية فاتحة حلكي
اكولك حبيبي شعجب يجون من وكت
....يمكن يجون بطيارة
... اهاا خوش
من الصبح كعدت باهر راح تسوك اجني بيداء وبنين وياي يساعدني واصال الخاتون لهسه نايمة
الظهر وصل رافت وضياء وايمن والعلة ابراهيم واخوانة اثنين اكبر منه وعمهم الاصغر من رافت
من شفت لمتهم گلبي لعب
كلت البيداء بس لا هم راح يرجعون يطلبون اصال
بيداء...خايبة ليش ماتنطوها اذا.صدك هالمرة هم جايين عليها معناها شاريها ومتمسكين بيها
...لويجون بدال المرة الف ما اوافق ومستحيل اقتنع بيهم
يلا خلي نصب غدا
اصال.. جنة متوترة وتتصرف بعصبية واقل شي تشمر حركتها بيه والزاد الطين بلى من رجعوا طلبوني من بابا للعصر هما يتناقشون كالوا هالمرة خلي تفكر مانريد تنطي جوابها بسرعة
بابا استحى كال هي براحتها
العصر عباس زوج بنين واخو وولد عمة بيداء اخذوا الشباب وطلعوا رادوا يفترون شوية بالبصرة
بقى جدو واخو مطلعوا وياهم
بابا اخذهم وراحوا الديوان عمو فاضل
من فرغ البيت جنة هجمت عليه لوما عماتي وباهر موجودين يمكن تضربني من صدوك لعبت نفسي من الوضعية جنة بصفحة وهذولة بصفحة من غير تهديد رضا
من كثرة الضغوطات العلية لوبيد اموت نفسي واخلص بس خوفي من الله مانعني
للمغرب اجة اتصال الباهر اشو هذا طلع يركض بدون ميكوللنة شصاير
ظلينا وحدة صافنة بوجه اللخ ماندري شكو اكثر شي اجة على بالنة جدو رافت بس لا متخربط
جنة... بنين اتصلي بعباس بلكي يعرف ليش باهر طلع يركض حتى على تلفونة ميجاوب
... يااا هذا هم ميجاوب شنو السالفة
... عمة بيداء اتصلت على ابنها جاوبها كلمتين هسه مشغول بعدين اخابرج
.... ظلمت الدنيا واحنا نلوب وأخيراً رجعوا ودخلوا للاستقبال صوت هوستهم وحجيهم مانفهم منهم شي
اجة باهر جلبنا بي شكو يمعود وشصاير
... الولد من طالعين مفترين شوية وبعدين داخلين كوفي قريب منا
رضا العار موجود يم اهله ما اعرف منين سامع بيهم اهناك ماخذ اصدقائة وهاد عليهم ولد المنطقة كلهم جماعة رضا فازعيلة ومتولين الشباب مضارب
جنة... لطمت على خدي وتالي الولد خوما بيهم شي
.... هم زين عباس وياهم من شايف ولد المنطقة كلهم ويا رضا كايللهم ذولة كرابتنا وبالكوة فاضة العركة فاضل من سمع بسواية رضا راد يوكع من طولة
واخوانة لآزمي مزوعي العافية من الكتل وهسه الشيخ جوة اجة يعتذر منهم
اصال... الدرج قريب كعدت على اول باية دموعي نزلن همست هاي العركة بسببي مو
اجت بنين حضنتني كالت وانتي شعليج رضا الله مسودنة
بابا اجة يمنا جرني من ايدي كومني وحضني
منصف.. ليش تبجين انتي شعليج بالصار
.... ادري بسببي تعاركوا كولي شوكت الله يخلصني من رضا ترى والله تعبت منه ومن مشاكلة
باوعت بعين بابا كتلة اذا ابراهيم بعده يريدني اني موافقة عليه... ...
يتبع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!