_بنات الغجرية _
( بقلم بسمة البياتي)
_البارت الثاني والاربعون _
بهذا اليوم اجروحي الطابن كولهن رجعن انفتحن حالي مثل حال الجابو سجينة حادة وغرسوها بگلبة.
رافت... عرفتيني؟
...للأسف اي
... شلونج بنتي
... بنتك؟ لا غلطان اني مو بنتك اني بنت حرام
باهر.. بوية على كيفج شنو هالكلام
... لاتنصدم هذا كلامة هو مو كلامي واكيد بعده يذكر
رافت... اني ماجاي ادافع عن نفسي ادري غلطي جبير بس على الأقل اسمعيني ادري بيج طيبة وماتحقدين
... لا وربك متعرف شي عني ترى الكدامك مو جنة بنت الست سنوات العفتها تبجي وراك حنة الواكفة كدامك صارت اقسى من الحجر الزمن خوش رباها وعلمها والبركة ببك وبمرجانة
باهر... تعالي كعدي
... وشعندي كاعدة بوسط ناس غربة الزيارة انتهت وياريت هذا الرجال يرجع منين ما اجة
باهر... عيب جنة مهما يكونون يبقون ضيوفنا ودايسين عتبتنا والشباب الويا مو غربة ذولي اخوانج
.... انعصر گلبي حتى اخوان شباب طلع عندي بعد شضامتلي يادنيا جيت كعدت بصف باهر تصنعت القوة وحجيت بحزم يلا احجي العندك اني اسمعك
رافت... بنتي لاتخلين الصوج كله بركبتني وتحمليني الذنب وحدي امج السوتة بيه موقليل ماكو رجال يتحمل التحملتة بعت اهلي وناسي الخاطرها جيت الابعد محافظة وعشت وياها على الحلوة والمرة وشحصلت منها غير السحر والخيانة ونكد وهم
فاض بية وخلصت طاقتي ردت بس انهزم بروحي حتى اخلص منها
... وهذا السويتة انهزمت وعفتنا بعد شكو جاي وشرايد
... خليني اكمل وبعدين شتريدين احجي من طلعت منا جنت تايه وتعبان اكو شي لازمني من ركبتي وخانكني ما اعرف شلون وصلت الاهلي وهناك بالقرآن والرقيات الشرعية يلا شوية ارتاحيت ومن بديت ارجع الطبيعتني اضطريت اترك العراق لان اهل امج ورة كل هالسنين بعدهم مفاكين ياخة مني ويدورولي طلعت من العراق ومن استقريت اتواصلت ويا اهلي وطلبت منهم يجون على امج وياخذوكم منها حتى لو يدفعولها فلوس المهم ماتبقون عدها ومن اجو وسألوا مالكولكم اثر فص ملح وذاب
طلبت من اخوية يروح البيت ام حسن يسالهم لان ام حسن صديقة امج كلت عسى ولعلى تعرف مكانكم
رجع اخوية مرة ثانية واجة البيت ام حسن منطيها جم فلس يلا قابلة تحجي كايلتلة ابن الشيخ ازوج بنتها روحوا سألوا اكيد يعرف عنوانهم
ابن ام حسن ما اخذ اخوية البيت الشيخ وشايفين واحد من ولد الشيخ وسالي عن مرجانة
الولد من سامع باسمها متخبل لازم اخوية من قميصة ومتهدد عليه كايلة ابنة طلك بنتها ومانعرف عنهم شي وبعد ديربالك توصل بابنا هلمرة راح اعوفك تروح بدون ما اسويلك شي مرة الثاني اذا جيت اخلي دمك بطولك
منصف... ومنو من اخواني طالع الاخوك تعرف اسمه؟
رافت.. لا والله ما اعرف واخوية ماسألة عن اسمة
بعد سنوات من صار السقوط رجعت للعراق وجيت بنفسي دورت رحت البيت ام حسن طلعلي ابنها كال امي انطتك عمرها واحنا مانعرف عنهم شي
ظليت دوم اجي اسال ولد ام حسن وهم ماكو خبر ومن دخلن الموبايلات للعراق انتطيت رقمي الحسن كتلة اذا عرفت عنهم شي خابرني سنين انتظر وماكو اي خبر حتى بغداد دورت
قبل سنة اتصل حسن كال بنتك جنة بالبصرة صارلها فترة اهنا ومزوجة ابن الشيخ
بهذاك الوكت ماكدرت احي لان عندي سفر اروح اسوي عملية قسطرة للقلب واحتاج وقت يلا اتشافى
... كملت لو بعد عندك كلام
... جنة وكتاب الله دورتلكم وماكو يوم انتوا مو على بالي
... عفت بنات يم وحدة كاولية الشرف اخر هما وراها جاي ادور عليهن يعني مفكرت بينك وبين نفسك مكلت هسه بناتي وين وشيسون ومرجانة شلون ربتهن وشعلمتهن ووين صفى بيهن الدهر بيت مشبوه لو بملهى لو كاوليات مثلها
دنك راسة ومجاوبني
عطت احجي ليش سكتت هم فكرت اني واختي شلون ربينا وشنو العيشة العشناها
هم فكرت شنو الصار بينا
هسه جاي بكل بساطة اتكولي دورت عليكم تدري ليش انت جاي لان تمرضت تعرف بنفسك راح تموت جيت تريد ابريك الذمة حتى ترتاح مو هذا تفكيرك لو اني غلطانة
احجيي لاتسكت (جنت اصرخ من كل گلبي وهما ساكتين) والله ما اسامحك لو يبقة اخر يوم بعمري ما ابريك الذمة والي وكفة وياك انت ومرجانة يم المنتقم الجبار راح احجيلة شسويتوا بينا وشلون ضلمتونا
باهر.. بوية اهدي صوتج راح
.... ما اهدء خلي. يسمعني الجاي ورة 29 سنة عليه خلي يسمعوني اخواني الشباب الي حتى ما اعرف بوجودهم خلي يعرفون شلون عشنا اني واختي وشصار بينا
اختي ماتت من وراك ومن ورة مرجانة خطيتها بركبتكم اليوم الدين
رافت فز وكام وكف لحيلة كال اوكفي شنو ماتت عطر وين؟
عطت عطر ماتت من وراكم عمرها 15 سنة صارت جوة التراب تريد تعرف ليش ماتت لان امي باعتها طفلة خلتها تتزوج ومن راح حبيبها تخبلت وانتحرت وين تروح من خطيتها دمها بركبتك
تريد تعرف اني شصار بيه عشت عمري كله احارب علمود احافظ على شرفي شفت اشكال العذاب وتحملت عمري 11 سنة اشتغلت خدامة حتى اكدر اعيش بشرف والكي لكمة اكلها
لاتفتحون عيونكم هيج اي اشتغلت خدامة وحتى بهاي شغلتي مكدرت ارتاح ابو البيت طمع بيه لان بنت مرجانة
بيومها الله حماني منه وكدرت اطلع سالمة ومحافظة على شرفي
رحت اشتغلت بمعمل اطلع من الصبح ارجع المغرب التعب اخذ حيلي وما اشتكيت الغربة جانوا يستخطوني ويحنون عليه اكثر منكم
رفعت رداناتي ومديت ايدي صحت شايف هاي الحروق من لجعات الشيرة الحارة مال الحلويات دتشوف هاي الاثار اكو اكبر منهن بگلبي
صحت بصوت عالي اصال تعالي
اصال.. جنت واكفة ورة الباب اسمع جنة وابجي على بجيها من صاحتني فزيت مسحت دموعي ودخلت جرتني من ايدي ووكفتني كدامها
.... شايف هاي البنية اكيد متعرفها ركز بملامحها هاي ضحية ثالثة من ضحاياكم انت ومرجانة
اصال.. الرجال الجبير باوع عليه جانن دموعة يجرن همس بصوت مخنوك تشبه عطر
جنة... هم زين بعدك تذكر شكل عطر تدري ليش هاي تشبها لان بنتها هاي امانة اختي
مرجانة جانت يومية تهدد تاخذها تبيعها هددتني بيها وجبرتني ازوج بعقد سيد من رجال اكبر منك يضرب ويهين واني ساكتة ومتحملة لان معندي احد يدافعلي
ومن طلكني مرجانة رجعت ادلل ببه ويومية جايبتلي واحد تريد تبيعني اله
والله هم مانساني ورحم بحالي وكدرت احافظ على نفسي وعلى اصال تحملنا جوع وعازة ومشتكينا وبعد كل هذا المرينا بي جاي بكل صلافة اتكولي دورت عليكم شيصير لو ماخذنا وياك مو جان هسه اختي بعدها عايشة
من عفتنا اشهر ابجي عليك لان متعلقة بيك ويومبة اكعد بالباب انتظرك اكول بابا مراح يعوفني وهسه يجي وانت ماكو
رووح منين ما جيت وبيني وبينكم الله اريد حقنا منه
اصال... صوت جنة نبح من الصراخ فرفحت اني وباهر طلعناها من الاستقال اخذناها للغرفة ركضت جبتلها مي شربتها
باهر.... بعد بيتي راح يصير بيج شي خلي يولون لاتقهرين الفات مات انه ابوج واخوج وعشيرتج انتي مو بعازتهم
ماترديهم عادي براحتج بعد ما اخليهم يجون المهم لاتنقهرين
... شلون ما انقهر واني بس شفتة جروحي كلهن صحن ورجعن ينزفن باهر امي وابوية اذوني اشكد احجي والله ماراح تحسون بالصار بية وشلون الدنيا داستني
... بروح ابوية حاس بيج والوجع البگلبج بگلبي كل دمعة تنزل من عيونج وكل غصة يهدن حيلي
... حضنتة وابجي اريد احس بالامان ليش كلما انسى. واعيش حياتي لازم تصير سالفة اذكرني بضيمي
اصال... رقية بجت اخذتها اسويلها حليب جنة منهارة وشايطة موزين ترضعها كاعدة بالمطبخ وبحضني رقوشة تشرب من الممة اجة باهر من شكلة مبين محتار
كتلة شبيك ليش عايف خطارك روح يمهم ولاتخاف على جنة ترى شافت الأسوء من هذا ومنكسرت
... محتار الدنيا مغرب وعيب اذا طلعوا من بيتي بهيجي وكت وهما جايين من مكان بعيد واذا بقوا خايف على جنة يصير بيها شي
.. امشي حسب الاصول اكرام الضيف واجب كتلك لاتخاف على جنة اني احجي وياها راح اتصل على بنين تحظر. وياي العشا وانت هم جيب اكل من برة مراح انلحك نطبخ اهواي
... راح اتصل على عباس يجيب اكل وانتي خابري بنين
.. اتصلت على بنين كالت هسه اجي
دخلت للغرفة نومت رقية بكاروكها جيت يم جنة لزمت ايدها جانت صافنة وبعدهن عيونها يجرن
... راحوا لو بعدهم
.. جنونة حتى لو مطيقهم استحمليهم بس اليوم الخاطر باهر مو حلوة بحقة اذا طلعوا من بيتة هيجي وقت وهما غربة معدهم احد اهنا
... تنفست قوي ومسحت دموعي ردت اكوم من مكاني اصال جلبت بية كالت وين رايحة يمعودة عزززا بس لا حطرديهم
لاتخافين هاي مو اخلاقي الخاطر باهر معلبه بيهم واكوم اسوي العشا
.... دكعدي هو انتي بيج حيل توكفين اني وبنين نسوي
خليتها تتمدد ورحت للمطبخ اجتي بنين وبلشنة اني وياها اجة عباس جايب مشاوي ومقبلات وفواكه
بنين سوت تبسي دجاج بالفرن وتمن احمر اني بس سويت الزلاطة هههه
بنين..شوكت تتعلمين تطبخين مثل الاوادم
.. ترى اعرف اطك بيض واكلي طماطة وبتيتة وبيتنجان واسوي زلاطة وحتى تمن تعلمت اسوي
... كرت عين جنة عليج مكلفة نفسج انتي ثولة دوم انه وجنة نعلمج وكلشي ماكو ما ادري عقلج وين
... والله انتوا لو معلميني بذمة وضمير اكيد اتعلم بس شسويلكم من ورة خشمكم تعلموني
هسه عوفج من هالسالفة اريدج تتصلين على عمو فاضل وتنطيني احجي ويا
... يالمصخمة شرايدة منه
... اهوو اتصلي ومعليج
بنين اتصلت حجت ويا وكالتلة اصال تريد تحجي وياك
اخذت التلفون منها سلمت عليه حسيتة مستغرب
كال بس لا رضا مسويلة مكسورة ومضوجج
... لا لا الموضوع ميخص رضا عمو عندي سؤال بداية زواج ماما وبابا ومن تمرض واجة عدكم. وراها بفترة اكو رجال جاي سال على مرجانة انت طلعتلة لو عمو رحيم؟
.... والله يا بنيتي صح ذاكرتي ضعيفة بس متاكد محد جايني وسالني عليكم خير شصاير
... اهااا لا ماكو شي بس فضول وحبيت اعرف سلمت عليه وسديتة
بنين... راح تفهميني شكو لو اظل مثل الاطرش بالزفة
... شفتي سواية اخوج رحيم الميستحي
... شبي؟
... اخو رافت جاي سألة. على مرجانة وبناتها والحقير ممدلي شبي هلكد حاقد
شيصير لو منطي العنوان مجان تاذينا ولا جنة هلكد تعذبت على الاقل جان عاشت يم ابوها معززة مكرمة
.... اووف منك رحيم فلا تصيرلك جارة
... بروح بيبي متعرفين ليش هيجي ديسوي؟
... انه وامي ومرتة الوحيدات نعرف
... اي ليش الله عليج احجيلي وريحي فضولي
....بس اذا طلعت السالفة منج ازعل ولساني ميطخ لسانج
... والله ما اكول يلا احجي
... انه جنت صغيرة وكاعدة بغرفة ام دخلت ليلي مرت رحيم ادك وتلطم اتكول الامي رحيم متسودن وعقلة مو براسة مخلي عينة على بنت مرجانة الزعطوطة وبمكن يريد يزوجها
... امي بالكوة قنعت ليلي تسكت
ثاني يوم طلبت من مرجانة بعد ماتجيب عطر وياها وبعدها بفترة اختفت مرجانة
ورحيم تسودن من اختفن
تالي طلع ابوج مزوجها
... عززا بعينة ميستحي على روحة يحب وحدة بكد بنتة واكول شبي هلكد يضوج مني ومن جنة
... سدي السالفة ما اريد ابوج يعرف وتصير مشكلة
.... مجبورة اسكت هو هذا شي ينحجي
سمعنا صوتهم طلعوا للحوش كلت البنين ذولة يمكن حيروحون
مديت راسي من الباب شفت الشباب الويا ابو جنة لأزمي من ايدة واخذوة للسيارة وبابا وعباس رجلج بنين راحوا وياهم
بنين.. شكو شصاير وين راحوا
... والله مدري يمكن ابو جنة متخربط
اجة باهر للمطيخ كال اجلوا العشا لاتصبون الحجي تخربط واخذوا للمستشفى
كتلة ليش شبي معقولة عنده احساس، وضاج
... عيب بوية هذا جدج ميصير تحجين عليه الرجال مريض بي ضغط وسكر وگلبة ضعيف
... عزززا بس لا يموت اهنا ونبتلي بي
... وتالي وياج اروح اشوف جنة احسنلي
.. اوكف منو بقى اهنا
... اخو جنة الجبير
... هلو هلو طلع رافت افندي مزوج قبل مرجانة اليوم يوم المفاجأة العالمي
كلت البنين شفتيهم اشكد حلوين طلع عندي خوال صاكين واني ما ادري هسه لو ما مزوجة عبوسي الاجلح جان زوجتج واحد منهم
.... عززا العزاج يالماتستحين وشبي عبوسي فدوة رحتلة وين اكو منه يعني هسه صارو زلم البصرة جلحين
... لحظة لحظة شو كمتي تخبطين اني قصدت عبوسي معممت اصلا اكو شباب وياي بالكلية عبالك اجانب ولاتنسين اني هم بصراوية بس هو رجلج خوما كوة
... اروحن يم جنة اذا اظل واكفة وياج الحك جدج وانشمر مستشفى ويا
.... هههههه اوكفي اجي وياج
رحنا يم جنة الي فاصلة عن الدنيا وبس صافنة نحجي وياها بس تهز براسها اخير شي نطقت
.. صبيتولهم عشا
... لا بعد
ابوج تخربط واخذوا للمستشفى
تعمدت اكولها اريد اشوف ردت فعلها اشكد تحاول تبين قوية ملامحها فضحتها ادري بجنة گلبها ماكو اطيب منه
حجت بهدوء ليش شبي
... ضغط وسكر وقلب جاينة استكراب
مجاوبتني ظلت ساكتة
باهر صاحني طلعتلة واكف يم باب الغرفة ويحوص
شكو شبيك
... اخو جنة يريد يحجي وياها وانه استحيت اكله عوفها هسه
.... اي عادي فوت كوللها
... خايف تزعل وشيخلصني من زعلها ادري راح تجمعهن الي وبعدين اطلعهن مني
... ههههههه خرب هاي شمسوية بيك خالتي روح اني اجيبها واجي
... رجعت الجنة وبدون مقدمات كتلها اخوج الجبير يريد يحجي وياج
... شنو اخوج الجبير
.. وداعتج ابوج عنده ولد اكبر منج معناها مزوج قبل مرجانة امشي شوفي شيريد
... ما اريد اشوف احد بيهم ترى گلبي راح يطك عوفيني
... الولد شعلية بالسوة ابوج
حتى رافت مو صوجة الصوج بمرجانة الدمرتة وبرحيم العار الي مدلة عمج على مكانكم
... شلون عرفتي رحيم الحجة ويا اخو وطردة
... بلي عرفت حجيت ويا عمو فاضل وسالتة كال مو اني وباهر جان صغير ويدرس ماكو غير رحيم
يلا كومي اخذتها من ايدها ورحنا للأستقبال
اخوها من شافها كام وكف جنة كعدت مسافة عنه كالت تفضل شرايد
... اسمي ضياء اكيد متعرفيني ولا سامعة بيه
اني اكبر منج ومن اختج.
عمري سبع سنوات من ابوية طلك امي الي هي بنت خالتة وازوج امج عافنة اني وامي عد خوالي ونسوانهم
امي مرة فقيرة نسوان خوالي سوها خذامة الهم ابوية دينار ميصرف عليه صرت مكفخة الاهل امي وولدهم
كلما اكبر حقدي على امج يزيد بسببها انذلينا تركت دراستي علمود اطلع اشتغل واصرف على امي
ورة سنوات رجع ابوية مريض وتعبان ومن صار زين اهلة وخوالي قنعوا يرجع امي سافرنا وحتى بوجودة بحياتنا مرتاحينا ظل على نفس طبعة شرب ونسوان واني مجبور اشتغل واعيش امي زاد الحمل عليه من صار اخوية ايمن مبقيت شغلة مشتغلتها وهو اهله يدزولة فلوس يصرفهن على نفسه وونستة
من عرفنا طريقكم جنت معترض ما اريذ اجي اشوفكم وكفت بوجها كتلة انت عفت بنات صغار يم مرة أستغفر الله هسه اكيد تلكيهن مثلها ومن جيت وشفتج وسمعت الصاير بيج لوبيدي اكوم ابوس اطراف ثوبج الي عنده اخت مثلج لازم يفتخر بيها ويرفع راسه
ولو جنتوا رابيات ويانة وغلات امي اخليكم على راسي سامحيني لان سئت الظن بيج
... على شنو اسامحك انت مسويت شي ولو اي واحد بمكانك هم يفكر نفس تفكيرك اني جبت عمري كلة اتعير بامي والناس بسببها يباوعولي بستصغار اطمئن محاقدة عليك ولا على اهلك انتوا مالكم ذنب بالصار
اما رافت هذا بحياتي ما اسامحة لا هو ولا مرجانة
... جنة تقبلين اتواصل وياج واعرفج على امي واختي
... عندك اخت
... اي ملاك اصغر وحدة بينا
... الله يحفظكم بيتي مفتوح شوكت تحبون تجون هلا بيكم
اصال... كامت جنة رجعت للغرفة جيت يمها بعدها تبجي
... تدرين اصال هو السماني جنة جنت احبه اكثر من مرجانة ما اكعد غير بحضنة متعلقة بي الدرجة متتصوريها ومن راح غابت ابتسامتي وفرحتي
يكول دورتلكم وهو عايش حياتة وعنده اطفال غيرنا شيريد جاي مو جنت ناسيتة ومرتاحة
... اروحلج فدوة كافي
اجة باهر عليها عفتهم وطلعت
رجع ابو جنة من المستشفى من ارتاحوا وغسلوا صبينالهم عشا ورة العشا قدمنالهم جاي وفواكه اني وبنين صرنا فرارة من التعب نروح منا ونجي منا
كلمنا كل الشغل ورحنا يم جنة
بنين.. عباس طابتلة الكعدة ما ادري شوكت يحس ويكوم حتى نروح
اصال.. شكو رايحين بعد وكت
... خايبة نعست يومية اكعد من الصبح وانعس من وكت
جنة... عذريني حبيبتي تعبتج وياي المفروض اني اهتم بالخطار
.. ليش ماتسكتين قابل شمسوية شايلتهم على راسي وافتر ببهم هو الاكل اكثرة من برة
راح امدد اهنا
اصال... شلون اثنين وحدة مطفية والثانية كالبة خلقتها اخذ رقوشة واروح اكابل الكيك احسن من الكعدة وياكم
جنة... ترى مالي خلكج كعدي راحة
... اوووي واني شسويت
اخذت رقوشة ورحت للمطبخ سويتلها ممه خطية جوعانة جنة اليوم هاملتها
باهر... انطيني رقية وسويلنا جاي جديد
... اشكد تشربون هاي ثالث مرة
... خالد ورضا اجوي كاعدين ويانة يلا سوي بدون لغوة زايدة
... لا هلا هذا شجابة اشو من شفتة وشافني اهنا بالبصرة ليش ميولي يم مرتة مو بيتا ابغداد
...وانه شدراني تردين اروح احاسبة اكله ليش ماتروح يم مرتك
... صبيت الجاي عدلت حجابي شلت الصينية واخذتها الهم قدمتلهم ومن وصلت يم رضا جنت قرفانة منه همس بصوت بالكوة ينسمع يلا طلعي وبعد لاتجيبين شي
صرت اعصاب.والله يا الله هو منو وديحاسبني هم شايف نفسه شوفة عناد بي رحت كعدت بصف باهر واخذت منه رقية
باهر.. هاا شو كعدتي اهنا
.. اي اريد اتعرف على حجي رافت وخوالي يصير لووميصير
حجيت بصوت عالي حجي رافت شفت حفيدتك الثانية هاي رقية بنت جنة اشرلي اخذها اله شالها باسها كامت تبجي اخذتها منه ورجعت كعدت
رضا لوبيده يملخني كاعد بس يخزر عششتو
لكزت باهر وهمست اكولك هذولة بيا لهجة يحجون
.. جدج تركماني وهاي لهجتهم
... اي صح مرة جنة كالتلي جنت ناسية
دشوفهم شلون حلوين ينكرطون كرط واني عديمة الذوق جنت اكول على. رضا حلو من امداية
... اخذي رقية وكومي منا اشو اخذج الواهس
... قابل شحجيت ممتغزلة باحد غريب بخوالي وجدي صدقة الربهم جنهم العافية اكولك هذا للولد الثالث منو ضياء مو كال هما بس اثنين
.. ابن عمهم ابراهيم
... خرب حتى هو حلو اللهم اجعلة في عيني ثور مجنح
.. ليش مجنح؟
.. شوف اذا بس ثور اخاف يبقى كبالي وارجع اتغزل بي اما اذا ثور مجنح حتى يطير وميلزك براسي
... تكومين منا لا بالعباس اكول الأبوج عينج فدمرة طالعة
... عليت صوتي بابا شوف اني كاعدة كبالك واخوك يهددني
منصف... شبي وياج
باهر... وعلي فلاتصيرلها جارة
اصال... والله يا بابا تدري بيه اشكد عاقلة وفقيرة متطلع مني العيبة بكل برائة عبرت عن اعجابي بجحي رافت وخوالي اشو اخوك هددني هسه قابل هما غربة
خوالي ظلو يضحكون بصوت عالي
منصف. مو كايلك معليك بيها انه راضي انت شكو ضايج التهي بنتك وعوفها براحتها ههههههه
باهر. .. هو محد مطلع عينها غيرك
رافت... اصال تعالي يمي
.... بالبداية ترددت اروح بعدين كلت هو ممسويلي شي شكو اعاملة بطريقة محلوة كمت كعدت بصفة
... تدرين انتي تشبهن امج
... اي كالولي
... بس عطر فقيرة وماتحجي هواي
... اي هم كالولي
... انتي هم ضايجة مني
... لا اني شعليه
.. ابوج وعمج كالوا اصال اقرب وحدة الجنة احجي وياها بلكي تقبل وتحجي وياي
... هسه عوفها جنة مجروحة منك بلكي بمرور الايام تكدر تنسى وتتقبلك
غيرت الموضوع كتلة مرجانة تعرف تختار اذا انت لهسه بعدك حلو لعد بشبابك شلون جنت ولو للأمانة مرجانة صاحبة ذوق رفيع حتى زيودي حلو هههه
... منو زيودي
... زوجها
... مرجانة ازوجت
... هي يومية عروس بس انت وزيودي ازواجها الرسميين
كملت كلامي بابا خزرني الظاهر جفصت بسرعة سكتت
ضياء... هههههه دمج عسل ولو انتي كلج على بعضج عسل
... هههه خجلتني انت مزوج
... اي
... عندك اطفال
... اي عندي اثنين ولد وبنية
... كبار لو صغار
.... اكبر واحد بيهم عمرة عشر سنوات والثاني سبعة والبنية سنتين
...الله يحفظهم حرامات مو كبار جان خطبت واحد منهم
..... ههههههه ياريت واحنا الممنونين
.... اكولك اشو اخوك ابد ميحجي شبي
... اي خجول هذا انطي بس دراسة طالب طب اسنان مرحلة اخيرة
انتي شمخلصة
... طالبة علوم فيزياء هاي اخر سنة الي
ايمن... مالكيتي غير هذا الفسم ليش مرحتي تحليلات مرضية
.... وأخيراً حجيت شهالصوت الحلو
اني هم ماحبيتة بس معدلي المصخم شمرني عليه
ظليت كاعدة اسولف واشاقة وياهم عبالك اعرفهم صارلي اسنين رضا شوية ويطك
الوقت تاخر بنين وعباس ورضا وخالد راحوا
وديت فراش للهول فرشتلهم ناموا وثاني يوم راحوا
مرت ايام رافت بين فترة وفترة يجي يريد جنة تحجي ويا وهي قافلة بس تحجي ويا ضياء وايمن
كمت اتواصل وياهم حيل حبيتهم تعرفت على اختهم ملاك وعلى مرت ضياء
تخرجت وبالعطلة تفاجئت بالخطابة الحاييني......
يتبع
حبايبي ممكن متابعة ودعم للمبدعة شهودة خواطرها تجنن متخسرون اذا قريتوهن ❤️
shahad_Hesham
الغلاف الجديد تصميم المبدعة عبير
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!