_بنات الغجرية _
( بقلم بسمة البياتي)
_البارت السابع والعشرون _
جنة... عطت بي انت شششششجاي تسسوي وشمفكر نفسك لك والخلقك اگلب الدنيا على راسك اذا انطيتها
منصف.. خوية ترى البية مكفيني لاتزيديها عليه
...جم شهر مكدرت تتحملها وتريد تشمرها على غيرك اذا مو كد المسؤولية ليش اخذتها مني ليششش
... فهمي السالفة وبعدين احجي لاتحكمين عليه بدون ماتسمعيني
... الخاطر ربك ششششفهم بعده عمرها مصاير 17 سنة وتريد تزوجها واني الثولة جنت مصدكتك واكول مبين صدوك يحبها وراح يعوضها عن غيابة عنها لعد اشكد جنت غبية ومخدوعة بيك
... اذا ماتسمعيني راح اسده انه مو ناقص عتب ولوم
... وششتريد تكولي حججك واعذارك بعد متفيد ولاتشفعلك
نقطة برأس سطر على جنازتي اخليك تنطيها بهذا العمر انعل ابو هيجي عادت وتقاليد ابن العم لازم ياخذ بنت عمه حتى لو غصب عنها
.. جنة كافييييييييي ومنو يكلج انه راضي الصار انجبرت عليه حالي من حالها بطلي صياح وسمعيني
... بالكوة هدءت روحي وظليت اسمعة اشكد جنت مسيطرة بس من حجالي خوفني المسائلة اكبر من ماتصورت
... فهميني انه بهاي الحالة شسوي الحجي صار بديوان اخوية وكدام عمامي صح هما ماقبلوا على كلام رحيم بس ايدوا بسالفة الزواج واذا ما انطيها راح يطلع اشكال الحجي عليها الزلم اذا سكتوا النسوان مايسكتن
... كمت ابجي واصال شنو ذنبها بنتي ماكو اشرف منها ليش تظلموها وتخشون بخطيتها هاي يتيمة حرام عليكم وهذا اخوك مفكر بحوبة اليتيم شنو ممكن تسوي بي
صوت منصف اختنك يمكن بجى سد الخط
اميرة... شراح تسوين؟
... ما اعرف. راح اموت شوريني انطيني حل شلون اعوفها تتزوج بهاي الطريقة ليش بس احنا الله كاتب علينا نزوج غصب
لزمت التلفون رجعت اتصلت باصال جاوبتني وهي بعدها تبجي
ارتاحيتي هسه الف مرة وصيتج ديرين بالج ومتسوين شي غلط هذولة مو مثلنا وطبعهم يختلف عنه ليش مسمعتي كلامي
.... واني شسسسويت هو بس ردت اجي يمج خوما كفرت
.. لا مكفرتي بس هاي نتيجتها
.. انتي منو حجالج
... اتصلت على ابوج وفهمني الموضوع
.. وهسه شنو معناها حيزوجوني؟
... ما ادري كولشي ما ادري
... جنة فدوة تعالي اخذيني وخلي
ننهزم اني وياج لاتعوفيني يمهم
... اششش لاتعيدين هالكلام محد طيح حظنا
غير هالسالفة
اميرة اخذت مني التلفون تحجي وياها تهديها واني بقيت الوب ما اعرف شسوي وشلون الكي حل الهاي المصيبة الله لايوفقج مرجانة شيصير بينا انتي سببه
للصبح مانايمة حتى للصالون مرحت
كعدت ويا خالة وحجيتلها. بلكي تلكيلي حل وتساعدني
ام وليد... خلي تزوجة
... شلون تزوجة وهي متريده
... انتي مو تكولين الولد ابن شيخ وبعده شاب ومثقف ماتلكي احسن من هيجي قسمة وهو ابن عمها اكيد راح يراعي الله بيها ويحافظ عليها هي مصيرها تتزوج اذا مو هسه بعدين
... عمتها بنين الصبح حجت وياي ومدحت بالولد
... احجي وياها وحاولي تقنعيها
... ثلاث ايام واني مسكومة لا ليلي ليل ولا نهاري نهار كل شوية اتصل بيها وكلما اسمع صوت بجيها وشهكاتها اتملخ من القهر
عمتها كالت بعد يومين المشية والعقد تخبلت شبيهم هذولة هلكد مستعجلين على الأقل انتظروا الحد ماتقنع وترضى بقسمتها
كالت الشيخ حاجي بالديوان كايل بعد يومين. اخذكم ونروح البيت اخوي نطلب بنتة الأبني والزلم كلهم صار عدهم علم بالموضوع مانكدر نغير الموعد
قررت اروح للبصرة ما اعوفها وحدها
خالة هذيج المرة هواي تعبت من اجت وياي هالمرة مكدرت اكولها تعالي استحيت منها
فاحئتني اميرة كالت اني اجي وياج
... والصالون شلون تعوفي
... عادي العاملات موجودات وامي تروح يمهن
ثاني يوم من الفجر طلعنا كامل اجة ويانه حتى كرايب بيت خالة لايحجون على اميرة ويكولون تطلع واطب بكيفها
اخوها شاب ويانه محد يكدر يحجي
وصلنا للبصرة هالمرة مخابرتهم اخذتا سيارة ورحنا المنطقتهم قبل لا نوصل البيت منصف خابرت بنين حتى تجي علينا ومن وصلنا لكيناها بالباب ويا منصف
ضايجة من منصف بالكوة سلمت عليه
كامل راح ويا واني واميرة صعدنا الغرفة اصال
لان من يوم السالفة حابسة روحها بالغرفة
فتحت الباب ودخلت جانت متمدده
سودة عليه وجها ذبلان وعيونها مورمة
من شافتني طفرت من مكانها اخذتها الحضني
اصال... اكثر بشر احتاج اشوفة بهذا وضعي واشكيلة همومي هي جنة من شفتها مصدكت
عيني من حضنتها يلا صدكت
كمت ابجي شفتي شجاي يسوون بيه عبالك اني حيوان مو بشر
اميرة... اذا بقيتي متجاهلتني ومجلبة بحضن جنة صدوك اعتبرج حيوان وعديمة احساس
.... اشكد مقهورة بس ضحكت هههههه رحت حضنتها
... اي ضحكي مو ناصبة عزا بدون ميت
... منو يكولج ماكو ميت اني ميتة
جنة... اسم الله اروحلج فدوة لاتحجين هيجي
... رجعت حضنتها وابجي ما اريد ازوج شبيهم ميفهمون الكلام
اميرة.... ترى تعبانين وانتي استقبلتينا بالدموع حتى مكلتي كعدوا
.... ومتكعدين شنو محتاجة عزيمة لو حضرتج صايرة تخجلين
.... ياااا شوفوا المصخمة ليش احد كايلج اني ما اخجل
.... منيلج خجل هسه قابل اني ما اعرفج وجاي تبيعيهن براسي
... هاي عود مقهورة وضايجة
... وين ليوثي جبتي وياج لو لا؟
.... اي جوا يم كامل
.
.. عااا كمولي هم جاي
... اي هو جابنة
... جنة وأميرة راحن سبحن لان بداية صيف والجو. حار
بنين اجت كالت نزلوا اتغدوا
جنة... ليش كلفتوا نفسكم أكلنا بالطريق
بنين... ياااا مو عيب هالحجي هو احنا شمسوين حتى كلفنا نفسنا
امشن نزلن حتى لو ماكلين اكعدوا ويانة على الواهس
اصال... نزلت ويا جنة واميرة البيت مابي احد هدوء
ومبين الأكل كله جايبي من برا مشاوي وسمج مسكوف
كعدت وياهن نفسي متريد الخاطرهن أكلت اجة ليوثي خليتة بحضني وابوس بي وهو حبيبي حاضني مبين مشتاقلي
سألتهم شخبار بيت خالة ام سرمد لان اعرف بيهم سافروا
هما من بداية السقوط قدموا على لجوا ولان عمو ابو سرمد مريض طلع اسمهم
اميرة...الحمدلله وضعهم زين ومستقرين
... والله مشتاقتلهم ربي يوفقهم ان شاء الله
كملنا الغدا ورا شوية اجتي بيبتي وبيداء وبنات عمهن ظلن كاعدات يم جنة واميرة
بيداء... مبين عليجن تعبانات من الطريق روحن ارتاحن لاتتقيدن بينا
.... اخذتهن وصعدنا الغرفتي ومن صرنا وحدنا ظلن يقنعن بيه واني كاضيتها بس بجي
اميرة... دخيل الله اشكد صايرة تبجين
... صيري بمكاني وشوفي حتبجين لو لا
...شفايتلي لو بمكانج واخذلي ابن شيخ غير اسوي حنتي سبع ايام واشبع ركص بيهن
..... اذا عاجبج اخذي بدالي تسوين فضل
... اي مو هو طوبة وحدة تشمرة على الثانية
... جنتي ليش ساكتة عفية رجعي احجي ويا منصف وقنعي
.... اصال عگب باجر خطوبتج بعد ميفيد الحجي بداعتي ارضي بقسمتج وكافي تبجين جاي تحركين روحي بهاي دموعج
... حضنتها وكمت اشهك هاهيه ما ابجي بعد لاتنقهرين
ورا العشا بنين كالت رضا راح يجي حتى تشوفي وتحجين ويا
....هسه يلا اذكرتوا لازم اشوفة ليش مكلفين نفسكم جان بقيتوها للعرس والله يا الله على اساس اذا شفتة او مشفتة راح يتغير شي اني صاعدا ولحد يجي يكولي نزلي
اجة رضا
وبنين جنة اميرة توسلن بيه انزل واني معانده اخير شي عافني ونزلن
اقل من ساعة صعدن
اميرة... امداج يالعوبة ليش منزلتي ولج والكعبة حلو وشخصية حتى كلامة بثكل ورزانه
.. اي وتالي يطلع يشبه عليوي ابن رحيم لا خلقة ولا اخلاق
جنة... اشش عيب شنو هالكلام
. لا مو عيب هما السبب بهذا وضعي
جنة... لج والله مبين خوش ولد ومتاكدة لو تشوفي يعجبج
اميرة... رعنة هذا المعاجبج طالب صيدلة السنة التجي مرحلة رابعة والاهم من هذا كليتة ابغداد
اذا اخذتي شوكت يعجبج يجيبج النه
.... شعجب يداوم ابغداد
... شمعرفني هو كلية اهليه
.... راح لو بعده؟
.. هااا لازم عجبج وتريدين تنزلين تشوفي وغمزتلها
... لا طبعاً اريد انزل اشوف كمولي مشتاقتلة
... كاعد جوا ويا ابوج وعمج
.... ماشي رايحة اشوفة
نزلت جوا صارلي كم يوم مشايفة لا باهر ولا منصف
دخلت للديوانية الكل رفعوا راسهم
باهر... هلا بهالطول
.... مجاوبتة انداريت على كامل كتلة شلونك كامل
... الحمدلله انتي شلونج
... اني زفت والحمد لله هاي شنو شبسرعة هلكد كبرت
... اعتقد الناس بمرور الأيام يكبرون ميصغرون
... طاح حظك مو جاي امدحك
.... هو وينه المدح
... منصف وباهر صافنين علينا
اي كمولي شخبارك اكيد ضايج بدوني لان بعد ماكو احد يفتن عليك ويحرك فلمك يم خالة
....وجه البومة من وراج كمت اني افتن على روحي من اسويلي مصيبة اظل احوص تالي اكابل امي واحجيلها صار جلدي يحكني
ما احس يومي حلو بدون رزالة من امي
.... هههههه شفت اشكد جنت فايدتك ومخلية حياتك كلها اكشن ومغامرات
جنة...من نزلت اصال مرتاحيت اعرف بينها وبين كامل ميانة قوية وشقى لان هو نفس طبعها لسانه فالت
كلت الاميرة امشي ننزل يمهم هذولة وجودهم سوا خطر
بنين واختها جانن بالمطبخ راحنا يمهم وبعدين دخلنا كلنا للديوانية ومثل متوقعت اصال وكامل نازلين دوسة ونص وابوها واخو صافنين عليهم
كعدت يم اصال وهمست كافي شقى وتالي وياج
.. اووي قابل شمسوية ترى اختنكت كولشي اهنا عيب وممنوع
... هذا الموجود اتحملي وسكتي
باهر...شببج گالبة خلقتج عليه وماتحجين وياي
.... اي بعد ما احجي وياك انت هم طلعت مثلهم
... ههههههه انه شعليه شو شمرتيها براسي
... درت راسي منه ظلينا كاعدين شوية وبعدين رحنا نمنا
ثاني يوم اجتي اخت رضا كالت خلي تبدل
نروح. ناخذ الذهب
واني كالعادة عاندت ما اروح
اميرة. بالعباس مصختيها كافي عناد
.... ما اروح خلي هما يجيبوا مو هما اختارولي العريس خلي هما هم يختارون الذهب
بنين... والحلقة شلون وين يعرفون قياس اصبعج
جنة.. اميرة فدوة انتي وبنين روحن ويا اختة واختارولها واخذي محبسها جيبوا الحلقة نفس قياسة
... راحن اميرة وبنين للمغرب يلا رجعوا مختاريلي طقم وحلقة وحتى فستان مشتريلي
اليوم موعد الخطوبة والمشية من كعدت من النوم واني ابجي
جنة تبجي وياي البيت انترس نسوان بيهن
ما اعرفهن ولاشايفتهن
كعدت اميرة تمكيجني عيوني مورمة من البجي ودموعي متقبل توكف
عاطت بية وتالي وياج لج مرمرتيني كل شوية مخربة المكياج
جنة فدوة احجي وياها
جنة.. حالتي مو احسن من حالها دموعي تنزل ويا دموعها وكفت يمها من شافتني حضنتني تشهك وتبجي
اصال.. جنة فدوة ما اريده وما اريد ابقة اهنا خلصيني منهم حموت
... اسم الله عليج ياروح جنة وعمرها ولج شبيدي عليج الله لاينطي الجان السبب
الله ينتقم منج مرجانة
حبيبتي الخاطري بطلي بجي الولد دره ما الله صدكي حيعجبج
.. استلمت مسحت دموعي اميرة عدلت مكياجي
اجت بنين كالت يلا نزلوها وخلوا شي على راسها حتى الشيخ يعقدلهم
لبسوني جادر فوك البدلة ونزلوني جوا وكفوني يم باب الاستقبال
بدا الشيخ بالعقد وسالني مجاوبتة
جنة همست جاوبي حبيبتي
النسوان يكولن ولج جاوبي واني صافنة بوجهن مااريد اكولها
جنة...خفت لا تروح تعاند وترفض وهذولة عشاير وشيوخ اذا كالت لا يأذوها
همست بغلات جنة عندج جاوبي
اصال... وكعن دموعي جاوبت بشهكة نعم انت وكيلي
تم العقد اخذوني للديوانية مسويلي كوشة رحت كعدت بدت مراسيم الحفلة جنة واميرة كاعدات قريب مني وادري بيهن مقهورات عليه
.. النسوان كامن يهوسن بالكولات والهوسات الجنوبية والبصراوية بعدها شغلن الديجي وكامن يركصن
ام العريس كالت راح يدخل رضا
من سمعت اسمة بطني مغصتني
همست الاميرة هذا شجابة ليش يدخل ما اريد اشوفة
... ولج عوبة الولد صار رجلج غير تشوفي وتتعرفين عليه صارلج سبوع معاندة هسه ماكو مهرب ارضي بالامر الواقع
.. درت راسي قحط ما اريد اشوفة خوما كوة
النسوان كامن يهلهلن مبين دخل اني مرفعت راسي بعدين كلت بگلبي دخلي اشوفة هو انحسب علية رجال بعد
رفعت راسي ظليت باهتة عززززا شنو هذا شهالطول شهالأناقة شهالشكل
هو مدنك مبين خجلان اجة كعد بصفي بدون ميحجي
لكزت اميرة وهمست اكولج هو هذا رضا
.. اي هو
... هو هذا الصارلي اكثر من اسبوع ابجي لان ما أريدة وكاطعة الأكل والشرب
... اي نعم هو بشحمة ولحمة
...غميني الله عليج غميني
... يااا البنية تخبلت
... طيح الله حظي اكو واحد يبجي من نعمة الله دباعي شلون شخصية
... عزززا بعينج لج ثكلي والله اذا جنة تسمعج تنجلط
... خايبة شثكل وجينات مرجانة يمشن ويا دمي
... لا عاد بهاي حجيتي الحق
... امه وخواتة كالن يلا لبسها الذهب اخذ الحلقة واندار عليه عينة اجت بعيني يفدوة شلون عيون دنك بسرعة لبسني الحلقة
واني اخذت حلقتة لبستهيا
انطوا السوار كالولة لبسها همس بصوت رجولي هاي سوالف نسوان انتن كملن اني طالع
بنين.. خايب بوسها صارت مرتك من شنو مستحي
... باسني براسي وطلع واني لهسه مسطورة من بوستة وعطرة
رجعن البنات يركصن
لكزت اميرة اكولج اريد اركص صارت عندي طاقة للركص
.. وتالي يربي شحيفضها اليوم عليج العباس اتحملي وكعدي عاقل الحد متخلص الحفلة
.. يااا شبيج هي مو خطوبتي غير اكوم اركص
... هو انتي لو تركصين مثل البنات العاديات جان بيها مجال الله وكيلج اذا دخلتي بنصهن هسه عبالهن جايبين راقصة من غنوة حتى تحيي الحفلة واني وجنة انظل كل شوية نسحلج تكعدين وانتي تغافلينة وتكومين تهزين تصيرين مثل عبود خطبولة مرة ههههههه
... منو هذا عبود؟
... واحد يحب الركص مثلج ههههه
بداعت مرجانة العلمتج هالسالفة الطايح حظها كعدي عاقل اني ادري اليوم جنة تنشمر مستشفى بسببج
... لا يمه اسم الله عليها هياتني كعدت عاقل
ورا شوية اجتي اخت العريس كومتني اركص كمت واني خربانة ضحك
حركت حواجبي الاميرة هي وجنة وجهن صوفر ههههههههه
من شفت العين عليه وجنة شلون تباوعلي بقلق كلت خلي اركص بادب مال وحدة مستحية ظليت اتمايل على كيفي
بديت احمه كلت ارجع المكاني واستر على اذا ابقة شوية يمكن اكوم اردح هههههه
جنة.... صافنة على اصال عبالك بدلوها همست الاميرة
شنو الفلم لعد وين راحت الدراما التركيا
.... هههههه وداعتج الدراما تحولت هندية بنت اختج عجبها العريس
... صدوك تحجبن لو تشاقين
... وربي صدوك لج كامت تتغزل بيه
... اووف هسه خفت بالزايد
.... يااا ليش لازم تفرحين لان الحمدلله كدرت تتقبلة ويعجبها
... اميرة اصال بعدها مراهقة ومتعرف شتريد والدليل صارلها اسبوع تبجي متريده ومن شافتة كيفت عليه وعجبها هذا حب مراهقة الله يستر منه
...بدال التشائم تفائلي اعتبري حب من اول نظره ترى هي مو صغيرة بعد شهرين تدخل 17 سنة
... ان شاء الله يطلع زين وتكدر تحبه وتعيش مرتاحه
... امين يارب
.. اصال خلصت الحفلة وسبحان الله مزاجي تبدل هههههه
العرس اتحدد خلال اسبوعين ما اعرف على شنو هلكد مستعجلين
جنة... كلت البنين اريد احجي ويا منصف تعالي وياي كعدنا سوا
... التريدواصار بس بقت شغلة وحده محد جاب طاريها
منصف.. شنو هي؟
... دراسة اصال انت وعدتني تخليها تكمل وهسه راح تتزوج دراستها شلون؟
... لاتخافين انه شرطت عليهم تكمل دراسة وهما قبلوا اطمئني خوية ترى احنا بناتنة التريد تدرس محد. يمنعها
... الحمدلله هسه ارتاحيت لان اصال شاطرة ما اريد يضيع مستقبلها
... خوية اريدج تحجين وياها وتلينين گلبها عليه من يوم السالفة ولاتباوع بوجهي
... الله كريم اليوم احجي وياها لان باجر راجعين البغداد
بنين.. ليش ماتبقين يمها مابقة شي للعرس لاتعوفيها
... ما اكدر محلوة بقيتي اسبوعين اهنا
.... خوية اذا عليه انه اروح ابقة بيت اخوي وانتي اخذي راحتج اهنا
لاتعوفيها بهيج ايام وحدها كل بنية تحتاج امها يمها وانتي امها
... نزلن دموعي خوية والله على عمه يعني داروح بس صدكوني مترهم الناس شراح اتكول عني مرتة مموجودة وهي باقية بالبيت
بنين... انتي واصال تعالوا يمي ورجلي يجي اهنا حتى انه وياج نطلع سوا انجهزها
ها شكلتي
... ماشي ان شاء الله
اصال من عرفت راح ابقة كيفت اميرة متكدر تبقة ثاني يوم هي وكامل رجعوا
اني واصال رحنا البيت بنين
وكمنا يومية نطلع انجهزها ابوها والشيخ مقصروا وياها بشي
قبل العرس عقدوا محكمة وعزمونا عدهم ناس طيبين مشفت منهم شي محلو بالعكس شالونه بالصلوات
اصال.. اني ورضا الكلام بينا قليل اني اخجل وهو مثل مكالوا رزن مو ملطلط
هواي حبيت شخصيتة عقدنا محكمة
جان كولشي سريع سريع لان مظل شي على موعد العرس
جنة... من نطلع للسوك اخو منصف هو يودينا ويرجعنا صح محترم ومشفت منه شي موزين بس مرات اشوفة يباوعلي ومن يشوفني شفتة بسرعة يدور راسة
لهذا قررت اتعامل ويا برسمية اكثر ومن احجي ويا بكل جملة اكولة اخي
اليوم كعدت احجي ويا اصال علمود ابوها
اصولة شوكت تحنين على ابوج ترى خطية لاتظلين متجاهلتة
.. ومنو يكولج ما احن عليه بس مدري شبيه كلما اريد اكسر الحاجز البينه ما اكدر
... ممممم يعني بديتي تتعلقين بي اتصرفي ويا على طبيعتج وبمرور الأيام مراح تبقة اي حواجز بينكم
.... ماشي راح احاول
اليوم حنتي رجعنا البيت منصف
الظهر تفاجئنا اني وجنة بدخلت خالة والبنات كلهن ركضت ابوس بيهن وحدة وحدة
خالة.. والله كبرتي اصولة وراح اشوفج عروس
دعاء... اي كبرت والاكبر منها محمضات على گلب امهن
.. ياااا ولج ادورين زواج
...يوووم مو وكت ترزليني ترى احنا جايين خطار عيب
اصال. ياالله متتصورون اشكد فرحانة بجيتكم
... شلون نعوفج بهيجي يوم انتي حالج من حال بناتي
.. اووي فدوة العينج خالة رجعت حضنتها
ارتاحن البنات واستلمني حفافة وصبغ اني مردت ميش وشقارات لان متعودة يا عروس جانت تجي للصالون شعرها اصفر ههههه
ردت تغيير صبغتة اسود فاحم
لاكلي لان اني بيضة وبرز لون عيوني اكثر
لبست بدلة مارونية تجنن ومكياج اميرة ضربتلي
من نزلت جوا النسوان ظلن يصلن على النبي
بدت الحفلة تونست بيها لان جنة والبنات يمي ركصت براحتي هههههه
الليل يلا خلصت جنت تعبانة سبحت وتمددت
بنين... اصالة ابوج يريدج
... عفية والله تعبانة شينزلني
دعاء... حقج اتعبين لعبتي جولة
.... ترى جنت اركص بأدب لان عيب من النسوان
بنين.. فلك طرج هو وينه الادب
... حتى انتي صرتي مثلهن اكوم انزل احسن
دخلت للأستقبال منصف كاعد واكيد باهر ويا ههههه ابد ميفاركة
منصف... تعالي كعدي يمي لو هم ماتريدين
... بدون ما احجي رحت كعدت بصفة
... اريد فرصة اصال لاتظلين دايرة وجهج عني
.. اني مدايرتة بالعكس داتصرف عادي
... وينه العادي وانتي حتى حجي ماتحجين وياي ادري ظلمتج بدال المرة مرتين مرة من ماصدكت مرجانة من كالت عندك بينة والمرة الثانية انطيتج وانتي ماراضية وراح ارجع انحرم منج
...لاتهتم اني مزعلانة ولا ضايجة منك
باهر.... مادامج مو ضايجة شراح تسمي ؟
... شنو هذا السؤال
... اخذيني على كد عقلي وجاوبي
.... هو غير اسمه منصف
... منصف بدون بابا
منصف... عوفها اتكول اليعجبها شينطق لسانها راضي بي
.. سمعت شكال ياريت اتبطل اتصير محامي اهنا احنا مو بالمحكمة
..... الله يساعد ابن اخوية الراح يبتلي بيج
.... شوف اخوك شيكول يعني اني بلوة
منصف.... هو رضا وين يلكي منج لويدور البصرة كلها لازم يشكر الله لان صرتي اله
..... ممممم اي هذا الحجي الحلو
منصف... هذا بيتج وبيت ابوج مفتوحلج بكل وكت واشوكت ماتحتاجيني تلكيني يمج اليغثج بكلمة ارده ابطن امه
جنت اتمنى ابقيج يمي واصبح وامسي بهالوجه بس الله مكتب هالشي مكتوبلي ارجع انحرم منج
.....خوية مو جنك زودتها قابل وين رايحة هو بيت اخوك يم بيتك
.... ليش ماتطلع وتعوفي وياها وحدنا ماتنلام بيك من اتكول صاير محامي براسنا
.... ههههههه كمل خوية كمل بلكي ابجيلي جم دمعة وياكم على الواهس
اصال... ولاتخلي الواحد يتاثر ويعيش اللحظة
...انتي ليش اكو شي ياثر بيج
.. خزرتة وانداريت على منصف كتلة لاتظن اني اكرهك لا والله ابد كل مافي الموضوع اني ممتعودة عليك اني مصارلي فترة طويلة من عرفتك
.... ادري بوية وانه عاذرج وكل الرايده منج لاتنسيني وتعالي زوريني
ولو انه يومية راح تلكيني يمج
...ابتسملة احسه بسيط حتى بكلامة لا إرادياً حضنته
العبرة خنكتني نزلن دموعي وهو هم بجة
باهر ..اكوم اطلع لا اروح ابجي وياكم وتدرون بيه گلبي رجيج بسرعة يتاثر
... وخرت من حضنة ومسحت دموعي اكولك شنو يعني رجيج
منصف.... يعني ضعيف
.... وميكول ضعيف شكو يصعبها عليه
ظلوا يضحكون عفتهم وصعدت نمت
واجة يوم عرسي.......
يتبع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!