_بنات الغجرية _
( بقلم بسمة البياتي)
_البارت الثامن والعشرون _
وكفت كدام المرآيا اتأمل شكلي واني بالبدلة البيضة
بساطة التسريحة ويا فخامة البدلة والتاج والمكياج الهادئ حسسني اني ملكة من ملكات القصص الخيالية
البنات داير مدايري بنعكاس المرآيا عيني راحت على جنتي واكفة تتأملني وكلما تنزل منها دمعة تحاول تمسحها بسرعة
غمضت عيني بقهر اااه يا جنة جنت اتمنى انتي التلبسين البدلة البيضة قبلي واشوف السعادة بعيونج فنيتي عمرج علمودي شوكت ترتاحين وتستقرين
رفعت راسي ليفوك وهمست ربي اطعم جنتي هاي الفرحة ولاتحرمها منها يارب ارزقها على كد نيتها وطيبة گلبها
ام وليد... اللهم صل على محمد وآل محمد هاي شطالعة ربي يكفيج شر العين
... ابتسمتلها شلت اطراف البدلة ورحت وكفت كبالها بستها من راسها وحضنتها الله لايحرمني منج ومن البنات
دعاء... عفية ادعيلي وتعالي خلي اكرصج بلكي الحكج بسرعة
... هههههه بوستهن كلهن واخير شي توجهت النور عيوني جنة
لزمتها من ايدها وبوستهن اخذتني الحضنها وكامت تشهك
.... عطر بنتج اليوم عروس اتمنى اكون حافظت على امانتج خيتي
...رجعت حضنتها بقوى وحجت بصوت عالي واني متروسة فخر من هالأنسانة الي شما اكول عنها ما اوفيها حقها كفيتي وفيتي يا تاج رأسي لو اظل طول عمري خدامة جواه رجلج مراح اكدر انطيج حقج
... حقي اشوفج فرحانة ومرتاحة ودوم تذكريني وماتنسيني
... معاش الينساج ياعمري انتي
بنين... يااا فدوة العينكم كافي بجيتونا وياكم هاج هذا القرآن خلي بيدج
... اخذتة منها
... منصف يريد يسلم عليج قبل لاتنزلين
... خالة والبنات طلعن دخل منصف للغرفة عينه دمعت من شافني
... شنو هالحسن بوية طالعة فلعة گمر
.. يعني بس هسه اني حلوة
اجة تقدم عليه وباسني من راسي كال
هو وين اكو بحلاتج
...ابتسمتلة فتح علبة جبيرة وطلع منها حزام ذهب
فتحت عيني من شفتة فخم وثكيل ومبين صياغة خاصة لان مشايفة مثلة يمكن سعره بهذاك الوكت فوك العشرة مليون لف ايده على خصري ولبسنيا
كتلة هذا ثكيل ومبين غالي
... ماكو شي يغلى عليج انه اختاريتلج احزام حتى كلما تلبسي تذكرين ابوج احزام ظهرج وشوكت تحتاجيني تلكيني يمج
حضني وهمس انه من هسه. ضمنت حقوقج اذا الله اخذ امانتة اريد اموت وانه مرتاح
تركتج قبل للضيم ما اريد اكرر نفس الغلط
....كمت ابجي بصوت عالي عفية لاتحجي بالموت الله ينطيك الصحة والعافية اذا تريد تعوضني عوضني بحبك وحنانك مو بفلوسك
...لاتبجين بوية ترى اطخ براسي اخرب العرس واعوف اهلي وناسي واخذج واهج
....ههههههه مسحت دموعي جاااا من كتلك ما اريد ازوج ليش ما اخذتني وهجيت
..... هههه اروحن فدوة للتكول الجااا
بنين... الزفة راح تجي يلا نزلي
... ونزلوني جواه كعدوني بالديوانية
النسوان الموجودات من شافن الأحزام عيونهن نطت عليه
جنة وخالة ظلن يقرن المعوذات الأحزام لفت نظرهن اكثر من شكلي هههههه جابولي الكبوس لبستة لان الزفة حتوصل
من كالوا اجتي وسمعت السيارات بطني مغصتني
دخل رضا لابس زي رسمي مو عربي لايكلة يمشي برزانة اجة كعد يمي
خواتة وكرايبهم حركن الجو بالردح والهلاهل والكولات
كالوا يلا خلي نطلع البنات نزلن الكبوس على وجهي لزمني من ايدي وطلعنا
صعدت ويا بسيارتة جنت اتمنى جنة تجي وياي بس كالوا ميصير
ساق السيارة ومشينا ساكت كولشي محجة واني هم مرتبكة وخايفة حتى رأسي مرفعتة
انتبهت الفونة مخلي بصفة كل شوية تضوي الشاشة
فترينا شوية وكفنا يم مصور اجة اخو كال المصورة مموجودة بس رجال
رضا... موكتلكم ما أريد صور عود ناخذ بالموبايل يلا خلي نرجع ماظل وكت
.... ضجت لو بيدي اعيط بي هذا شبي حتى صور ميريد نأخذ دلغمت وهو اصلا ممعبرني
رجعنا البيتهم حتى فندق ماكو دخلوني جوا كعدت والبنات شالن الكبوس من راسي
جنة... شبيج ليش ضايجة؟
... بله بربج هذا هم عرس لاصور لا.حفلة حتى فندق هم ماكو
... اشش نصي صوتج هاي عاداتهم شسوين
.... يا عادات واني الي جنت احلم اسوي عرسي بارقى قاعة وادخل مثل الاميرة واركص سلو واقطع الكيك تالي حتى صور محصلت
... متت قهر عليها بس شسوي الأزم اصبرها ماأريدها تنقهر
سودة عليه لاتضوجين ترى الحفلة والصور مو شي مهم المهم هو خوش ولد وقسمة زينة وتعيشين ويا مرتاحة
.... مجاوبتها لان ضايجة
أميرة..شبيها مبوزة
... لان ما اخذولها صورة
... حقها لعد شكو لبست البدلة والمكياج غير تاخذ بيهن صور يبقن ذكرى وتشوفهن الجهالها اذا الله راد
... اسكتي يمعودة لاتسمعج وتسويلنا سالفة الله وكيلج بالكوة سكتت
... صبوا العشا النسوان كعدن يتعشن
ام رضا كالت صعدوها الغرفتها لان بعد شوية يزفون العريس
من سمعت بطاري الزفة الزعل والضوجة تحولن قلق وخوف
اخذوني البنات للغرفة اني الغرفة شفتها مرة وحدة من اجيت بيوم العقد حتى ملابسي مرحت اني رتبتهن دزيت البنات يرتبوهن
رغم حرارة الجو جنت ارجف
أميرة... يااا شجاج ترجفين لعد وين راح لسانج ووكاحتج
... بهالوقت بالذات ما أريد مداهر وتصنيف
.. شمعنى هالوقت بالذات وغمزتلها
... اهووو فدوة سكتوها
جنة.. حبيبتي اهدي ولاتخافين كل بنية تمر بهذا الموقف وتعدي والحمدلله وتصير أحلى ذكرى بحياتها
... اجت امال اخت رضا كالت يلا نزلن راح يزفون العريس
لزمت ايد جنة ما اريدها تروح عفية وين رايحين وعايفيني على الأقل ساعدوني انزع البدلة وين حدبرها بوحدي
اميرة... هههههه هاي الشغلة على العريس مو علينا
... انتي اسكتي كلما تحجين توتريني اكثر
امال... حبيبة مظل وكت لأزم ننزل وهذا الحمام يمج بالغرفة ابوية كبر الغرفة وبناءه مخصوص الج حتى تأخذين راحتج
... اجوي البنات بوسني جنة همست اريدج تصيرين سباعية وتبيضين وجهي
نزلن وعافني
هي مال سباعية بهالزلك هو اني شوية ويغمى عليه كعدت على الجرباية وافرك ايد بايد
صار صوتهم قريب دكات گلبي زادن الخوف. سيطر عليه تماما
انفتحت الباب ودخل رضا
دنكت راسي مستحية هو ولاعبرني عبالك مموجودة راح يم الكنتور اخذ ملابس ومشى بتجاه الحمام قبل لايدخل كال راح اسبح وانتي نزعي بدلتج شمنتظره
عقدت حواجبي هذا شبي
كمت من مكاني وكفت يم المرآيا هسه اني شلون اكدر افتح القيطان كمت ادردم
كتلهم ساعدوني عاندو شون بلوة يربي
حاولت افتحة مكدرت جريت وعتيت وماكو فايدة
عفتة وشلت الطرحة وكعدت افتح التسريحة جانت بسيطة مبيها ماشات وسبري هواي بسرعة انفتحت
طلع الافندي سابح لابس بجامة وفانيلة والمنشفة بيده ينشف شعره
شافني بعدني ممبدلة رفع حاجبة
... مو كتلج بدلي شنو سالفتج
.... مكدرت ايدي متلوح القيطان وهو مشدود قوي شسوي يعني
... اشو تعاي
... وكفت يمه وانطيتة ظهري ارتبكت من قربة اوويلي معت من المستحة
فتحة الي بطارف اصابيعة حتى مطخني عبالك بيه مرض معدي بديت اشك بامرة
.... يلا بدلي وتعالي
... وين اجي
.... نفتر بالمول الخاطر الكعبة لاتسوين نفسج غشيمة
...اختنكت من اسلوبة الجاف الدموع لمعن بعيوني
البنات محظريلي سيت نوم اخذتة ودخلت للحمام
كمت اتنفس بعمق اريد اهدء روحي
اهدي اصال اكيد هو هم مرتبك مثلج لهذا هيجي حجة ملأزم احكم عليه من اول يوم بدلت وتلفلفت بالروب وطلعت
رضا متمدد على الجرباية وبيده الفون مشيت من كدامة رحت للطرف الثاني وكعدت بحافة الجرباية
اكثر من خمس دقايق اني بمكاني وهو بمكانة نتر بيه وتالي راح اظلين كاعدة هيج
انداريت عليه همست لعد وين اروح
.. تعالي يمي اريد افض السالفة وانزل
.... متت خوف متحركت من مكاني
رضا تافاف بضجر واجة سحبني من ايدي محسيت بنفسي غير اني بوسط الجرباية
يتعامل وياي برود قاتل
من خوفي وارتباكي حاولت ابعده مني
... اشكد تتحركين شلون ورطة هاي
.... خفت منه من شكله مبين متعصب ظليت جامدة بعد متحركت
حاول ياخذني مكدر ابتعد وهو موجر نار
ظل يفتر بالغرفة ويفرك بوجها
لملمت روحي وسترت نفسي كمت ابجي خايفة منه لان شكلة ميتفسر
راح فتح الشباك ووكف يمه ظل يتنفس سريع
وراه خمس دقايق سد الشباك ورجع يمي وهم حاول يتقرب ونفس الحالة مكدر
ذب حرگتة بيه يعيط عليه
... مو اكلج لاتتحركين شنو بيج صرع انعل هيج قسمة خرب بالزواج والي يزوج
... كمت اشهك اني ششعليه شبيك تعيط عليه
... رحمه الأهلج لاتعوين ترى روحي وصلت لهنا ويأشر على خشمة
... دخلت جوا الديباج وغطيت راسي دخيل الله اني شجابني على هذا الخبل
سكت وبس اسمع صوت انفاسة الغاضبة
مرت نص ساعة واحنا على حطتنا اني خاتلة جوا الغطى وهو كاعد وساكت هم زين الغرفة باردة جان انصمط ابو ابوية بهالحر
صوتة كام من مكانة كشفت راسي شوية باوعتلة راح طفى الضواه وتوجه للبردا سدها كلها الغرفة صارت ظلمة هندس
صافنة هذا اشديسوي اجة تمدد بصفي وتغطى وياي رجع يحاول يتقرب بس هالمرة بهدوء عبالك بدلوا ولانفسه القبل شوية گلب الدنيا على راسي
ظل يتلمس بجسمي ويبوس بيه اني منطيت اي ردت فعل خايفة منة
همس قريب من اذني حضنيني بوسيني اتفاعلي وياي لاتظلين جامدة
شيكولي انفذ بس أريد هالليلة تعدي على خير لان هالمرة اذا هم مكدر يسوي شي يمكن يخلي قهره بيه ويخنكني
اشكد تأذيت ظليت كاتمة وجعي
اخذني وصرت مرتة
ابتعد لبس ملابسة راح شغل الضواه اخذ دشداشتة ودخل للحمام
كمت بسرعة طلعتلي دشداشة لبستها وكفت كدام المرآيا انصدمت من شكلي صاير فلم
مسحت المكياج الباقي بوجهي
طلع من الحمام لابس دشداشة بيضة
رغم السوا بيه مدري ليش من اشوفة گلبي يرجف عليه وكولشي بي يعجبني
رضا... انه نازل جواه من يصعدنلج النسوان اياج تحجين شي عن الصار بالبداية مفهوم
... هزيتلة راسي بمعنى اي طلع من الغرفة رجعت كعدت واني متوترة ومستحية
سمعت صوت الهلاهل جواه اووف ياربي شهالفضايح
دخلن عليه امه وخواتة وجنة واميرة وهم استلمني هلاهل عبالك محررين القدس وديحتفلون
اميرة... شسويتي بالولد عبالنة اليوم مراح ينزل ههههه
امال... حقه شاف هالجمال وتسودن
.. حجيت بگلبي والله هذن بطرانات مايدرن سوا الغرفة هندس حتى لايشوف وجهي
جنة.. مبروك حبيبتي همست خوما متأذية
... لا عمري مبيه شي
ام رضا... جبنالكم العشا حتى تتعشون
يلا بنات امشونا ننزل
.. رجعن نزلن وعافني ورا شوية رجع رضا
. تعشيتي لو بعدج
... لا بعدني
... كومي اكلي انه موجوعان لاتنتظريني
.. مناقشتة كمت جبت الصينية اكلت شوية وشلتها
اخذت ملابس دخلت سبحت
من طلعت رضا بيده التلفون ومن شكلة مبين مهموم
نشفت شعري ورجعت لفراشي لا اني احجي ويا. ولا هو يحجي وياي
غمضت عيني ولان تعبانة بسرعة اخذتني النومة
جنت كلما افز اشوفه بعده كاعد وبيده الفون
والأن كابس عليه النعاس بسرعة ارجع انام
... نص الليل فزيت وهذا على نفس كعدتة الغرفة ظلمة وبس ضوا الفون بوجها ظليت صافنة عليه
هو ولا حس بيه عبالك مموجودة الشك ترس گلبي
حتى النومة طارت هذا ابد وضعة مو طبيعي وسالفتة مو خالية
ظليت اراقبة جنت مخليه ايدي على كصتي حتى لايعرف اني كاعدة
ركزت بملامحة مرة يعقد حاجبة مرة يتافاف مرة يتحسر
راد يكوم من الفراش باوع عليه
بسرعة غمضت حتى لايعرف بيه كاعدة سمعت صوت خطواتة فتح عيني شفتة توجه للحمام والفون بيده
مكدرت ابقة بمكاني الفضول يقرأ الف شعنده ياخذ التلفون ويا للحمام
كمت من مكاني بهدوء بدون صوت مشيت على اطراف أصابيعي وكفت يم الباب
گلبي يدك سريع اخاف يطلع ويشوفني بس ما اكدر ارجع المكاني لازم ارضي فضولي
سمعتة يحجي بهدوء الشك صار يقين ركزت بكلامة
رضا... بعد روحي لاتبجين بالعباس دموعج ذبحني
دشوفيني سهران وياج وعايفها
تدرين بيه اشكد احبج. وعيني ماتشوف غيرج
.. خليت ايدي على حلكي اريد. استوعب الداسمعة لعد اذا مرايدني وهلكد يحبها ليش اخذني
كمل كلامة يكولها وداعتج مالي نفس بيها بالكوة كدرت اتقرب منها حتى رجولتي ماتنثار اتجاها
بالظلمة يلا كدرت اخذها ولوما حجي اهلي والناس ماجان وصلتلها
اصال....الله ياخذك لو بيدي ادخل املخة الحقير
.. وعد بعد ما ادنالها
ومن اهلج يوافقون على زواجنا اطلكها وشيصير خلي يصير حتى لو تتبرى العشيرة مني طز بيهم المهم انتي تصيرين الي
...متحملت ابقة واكفة لان دخت ورجلي بالكوة شايلتني رجعت لفراشي واني مذبوحة ومكسورة هي هاي ليلة العمر الحجولي عنها هو هذا ابن العم الي راح يحافظ عليه ويصوني
بجيت الحد ماتعبت وهو بعده بالحمام يحجي وياها حتى ماهمه اذا اكعد واكبسه
لوجه الصبح يلا اجة نام
اني عيوني كامن يحركني من البجي حايرة شسوي اكول الجنة عليه لو انجب واسكت
ساعة سبعة الصبح رن فوني رقم جنة جاوبتها
من كالت الو
لوبيدي اصرخ واحجيلها على قهر گلبي
... اصولة شبيج ليش ساكتة
. مابية شي عمري بعدني ممصحصة
.. ردت اسلم عليج قبل لا ارجع البغداد
... ششنو وين ترجعين لا عفية جنة ابقي لاتروحين
... حبيبتي والله بعد ما اكدر ماترهم بقيتي وانتي هسه ازوجتي لأزم تتعودين على حياتج الجديدة
.... سكتت وكمت ابجي لو بيدي اكولها اخذيني وياج ولاتعوفيني
.... ليش دتبجين بيج شي
... انتي هم دتبجين مو بس اني جنونة تعالي اشوفج قبل لاتروحين
... ماشي حبيبتي راح نجي
.... سديتة منها. رحت للحمام غسلت
شفت عيوني حمر ووجهي تعبان عدلت شكلي ما أريدها تحس بيه وتضوج لبست الشال وكعدت انتظرها
رضا بسابع نومه هه حقة هو قبل ساعة يلا نام
اندكت باب الغرفة كمت فتحتها
ربى اخت رضا... گرايبج جوا يردنج
... نزلت وياها اول مشفت جنة حضنتها وغصيت بالبجي
ام وليد...شبيج بنيتي ليش كل هالبجي
.... ما اريد جنة تروح
اميرة... لج بابا انتي بعد أزوجتي شسوين بيها
ام رضا... رضا وينه ليش مانزل
... بعده نايم
امال. ههههه من شكلج مبين سهرتكم صباحية
... هه اليدري يدري والميدري يحجي بكيفة حجيت بگلبي اي صباحية بس مو وياي ويا غيري
سلموا عليه وراحو جنة من راحت اخذت روحي وياها
ام منصف... تعالي يمه تريكي ويانه
امال... يااا غير تتريك ويا رجلها
.... رحت كعدت يم بيبي هدية حطت ايدها على كتفي كالت لاتضوجين بنيتي شوكت ماتردين خلي رضا ياخذج الها
ام رضا. شنو رضا ماعنده شغل وعمل يظل ماخذها وجايبها
.. باوعتلها بستغراب هاي شبيها فجأة انگلبت
هدية.. هو مو يداوم اهناك من يروح ياخذها ويا
.... جااااا تردينا يعوف الدوام ويظل يفتر بيها
..... اني مطالبة منه ياخذني ماكو داعي الهذا الكلام
ام رضا خزرتني رادت تحجي امال بسرعة غيرت الموضوع صبتلي الجاي وانطتني كالت تريكي ولاتستحين
اكلت شوية ورجعت صعدت العاشق اللولهان بعده نايم
تمددت بعيده عنه الف سالفة براسي من التفكير والقهر حسيت راسي حيطك
مدري شلون اخذتني النومة
صارلي اسبوع مزوجة حياتي ويا رضا من سيئ للأسوء النهار كله. التلفون بيده وكلامة وياي على كد السؤال والجواب
باليل للفجر يسهر ويا حبيبتة يطلع برا يحجي وياها ومن يرجع للغرفة يظل يراسلها للصبح
امه طلعت احقر من مرة رحيم تباوع عليه بالعين الصغيرة تحسسني اني جاية من الشارع
كدام الشيخ وباهر تمثل دور العمة الحنونة ومن يروحون تستلمني اهانات وكلام جارح
خلال هذا الأسبوع انكسرت اصال القوية ومبقة منها غير اسمها
يطخ براسي اعوف الاول وتالي وانهزم منهم وبعدين اتعوذ من الشيطان واتراجع عن تفكيري
باليل كالعادة رضا طلع يخابر
اختنكت اريد احجي البگلبي لزمت التلفون واتصلت على دعاء
سلمت عليها وسولفنا شوية
دعاء... شبيج اصولة شو مو على بعضج معقولة الزواج غيرج وخلى دمج يصير، ثكيل
... متحملت بجيت كتلها البيه ضيم وقهر اني جاي اموت ومحد حاسس بيه.
... اسم الله ليش هيجي تحجين شصاير لحظة خلي ادخل ثناء ويانة للمكالمة لان كاعدة بصفي
.... حجيتلهن ضيمي وكسرة گلبي
ثناء... لعد ليش قبل يزوجج اذا يحب غيرج شنو بنات الناس لعبة
.... انصحوني شسوي گلبي حيطك
دعاء.. عوفي انعل ابو لابو شرفة شنو انتي نايهتلة احجي الابوج خلي يطيح حظه
ثناء... لحظة دعاء ترى الموضوع جبير مو مال عصبية وتهور
...الديسووا بيها لا يرضي الله ولا عباده شنو هي لعبة ويلعب بيها ومن يمل يعوفها
ثناء... اصال سمعيني ومعليج بكلام دعاء انتي بعدج عروس اذا زعلتي ورجعتي البيت ابوج الناس مراح يرحموج لاتنسين انتي ازوجتي بسبب اتهامات عمج ومرتة من تزعلين
الكل راح يحجون عليج ويكولون هذا عافها لان شاف عليها شي
.... فوك سوايتة يحجون عليه شنو هالظلم هذا
.... للآسف احنا عايشين بمجتمع ذكوري دوم حق المرأة ضايع شيسوي الرجال يكولون عادي من حقة واقل تصرف من المرة تقوم القيامة وبحالتج انتي الحق راح يصير ويا رضا والكل يوكفون ضدج ويشوهون سمعتج
وابوج اذا دافعلج راح تصير عداوة بينا وبين اخو ويتقاطعون وبهذاك الوكت الناس راح يكولون بسببها طلق زوجتة وهسه تخارب ويا اخو واللوم كله يصير عليج
.... وبهاي الحالة شسوي اني؟
.... اسكتي هسه وفوضي امرج لله حاولي تكسبي بلكي الله يهدي ويعرف قيمتج واذا ظل على نفس وضعة انتظري مدة وبعدها فكري بالأنفصال ويجوز هو بنفسه يطلب منج تنفصلون وبهالحالة الحق كله حيصير وياج انتي
دعاء... اول مرة تحجين شي برأسة خير
.... كلام ثناء صح هسه اذا حجيت اطلع اني الموزينة والكل يلومني خصوصاً اني حفيدة مرجانة محد راح يصدكني
قررت اسكت واتحملة ومثل مكالت ثناء احاول اكسبة لأن للأسف گلبي الأرعن وكع بحبه.......
يتبع
ممكن متابعة للآخ المبدع الكاتب علي الفتلاوي aliAbas036
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!