_بنات الغجرية _
( بقلم بسمة البياتي)
_البارت التاسع والثلاثون _
جنة... ساكتة وافرك بيدي لو غيري وحدة تكيف بس اني لا ما اكدر افرح صعب اتقبل الموضوع من اذكر اختي والصار بيها بسبب هالعائلة اموت وجملوها بزواجة اصال من رضا
تنهدت عمج على الراس رجال ونعم منه والف وحدة تتمنى
بلغي جنة متفكر بالزواج.
اميرة... اهووو رفضت البومة فهمينا انتي شتريدين هذا لا ذاك لا قسمة زينة جايتج ترفسيها ليش
.... عفية سدو الموضوع شنو اني كاعدة على گلبكم وتريدون تخلصون مني زوووووواج ما اريد وانسد الموضوع
اصال... لا مانسد وهالمرة مو كيفج غصب عنج توافقين الظاهر انتي متجين بعيني واغاتي اني راح ابلغهم موافقتج واخليهم يحددون يم المشية وعود اريد اشوف شلون حتكدرين ترفضين
... يااا لج رعنة هاي من كل عقلج أياج تسويها اصال هذا زواج مولعبة معليج بهالموضوع
... تعبنا اني واميرة من الحجي وياها وهي معاندة
اوك جنة ظلي رافضة ويكون بعلمج اني راح ارجع للبصرة وتحلمين بعد تشوفيني انطيتها ظهري وغمضت
... علمود عمج تبيعين خالتج مستعدة تضحين بيه هو هذا حبج الي وقيمتي عندج
... ضغطت على نفسي حتى ما اجاوبها وامثل دور الزعلانة
الثاني يوم هي قافلة على قرارها اتصل بيه باهر حرت شجاوبة
.. بشري حجيتي وياها
.... هاا لا بعدني
... ليش بوية انه منتظر على نار وانتي بعدج محاجية
... يووو شبيك مستعجل صارلك اسنين مضرب عن الزواج ومتحمل وهسه متكدر تصبر يومين
... لاتلعبين بعصابي روحي احجي وياها اريد الجواب اليوم
... هاي شلك بيها شنو اليوم غير انطيها فرصة تفكر اصبر عباس المستعجل
... منو عباس؟
... واني شمعرفني
.. بوية لاتشلعين گلبي روحي احجي وياها وادري بيج جنية بدقايق تكدرين تاخذين الجواب
... اي مو حبها ولبط
... طاح حظج على هالسوالف منين تجيبيهن
....والله اني هم ما ادري اسمعهن واطبقهن عليكم
... امشي ولي احجي ويا خالتج لسانج بس يمي
.... نهيت المكالمة واني حايرة من صوتة مبين شلون متلهف ومايدري جنة معاندة
احنا بالصالون رجعت كملت شغلي
جنة تباوع عليه واني ادير راسي عود زعلانة منها
من خلصنا وفرغ الصالون كاعدين ننتظر السايق
كلت الأميرة هاي اخر مرة اجي للصالون
اميرة...ليش؟
... اتصلت على بابا كتلة تعال عليه وعكب باجر راح يجي ياخذني
جنة لونها انخطف سودة عليه حجت بخوف
...هاي صدوك سويتها وخابرتي ابوج
... اكيد صدوك قابل جذب
اميرة... جان صبرتي شنو هالتهور
... على شنو اصبر ارجع يم بابا احسن هو اني مصيري ارجعلة
جنة... اختنكت اريد اجاوب ما اكدر بلاعيمي تملخن من الحركة والدموع انجمعن بعيوني مجنت اتصور تعوفني بهالسهولة همست براحتج اخذت جنطتي وطلعت صعدت بالسيارة الطريق كله. ساكتين اليكولي بز ابجي
وصلنا للبيت بسرعة اخذت ملابس ودخلت للحمام اول ما سديت الباب نزلن دموعي بجيت من كل گلبي شلون گلبها انطاها وتريد تعوفني ممتصورتها بهالقساوة مسحت دموعي سبحت وطلعت
اصال.. طلعت جنة من الحمام عيونها حمر سودة بوجهي اكيد جانت تبجي طك گلبي
راحت للمطبخ رحت وراها واكفة يم الثلاجة حضنتها من ظهرها همست شبيهن عيونج
... كمت ابجي بشهكة والله موبيدي هاي بنتي هاي روحي من الدنيا اندريت حضنتها احجي وابجي ليش ولج شلون گلبح انطاج تفرطين بيه وبهالسهولة معقولة جنة رخصت عندج وصار سهل فراگها
.... برطمت ودموعي نزلن ومنو يكولج سهل عندي
كل كلمة احجيها وادري بيها تضوجج مثل السجينة تنبت بگلبي اني لو سهل عليه فراكج مجان ضغطت عليج جنة السنوات دتركض ركض واني مباقيلي وياج غير ثلاث سنوات وارجع للبصرة وهم افاركج واتلوع ابعدح عني
امنيتي من الدنيا اشوفج مستقرة ومرتاحة باهر لو مو خوش والله اني بنفسي اكولج رفضي انتي تعبتي بحياتج هواي ومن حقج ترتاحين
... لزمت وجها بيدي اذا جان زواجي من عمج يخليج تبقين يمي وكدامي اني موافقة
... رجعت حضنتها بفرح فدوة اروحلج والله مراح تتندمين وحظلين طول عمرج تدعيلي على هاي الزواجة
... اني لو انشمر بالنار هم ابقى ادعيلج
... لزمتها من ايدها اخذتها للهول
...وين جايبتني خلي اسوي عشا
... مو وكتها كعدي اهنا
كعدت بصفها كتلها يلا احجيلي شنو جان سبب رفضج الباهر
... هسه مو وافقت بعد شكو
... لا اريد تحجيلي اريد اعرف من شنو خايفة وممرتاحة
.... خليت ايدي على وجهي همست ما اكدر انسى الصار بعطر سنة كاملة تبجي على ابوج
كدامي جانت تذبل وتنتهي شلون انسى اليوم الأجة عمج رحيم ويا مرتة وعماتة الشقتنة ولزموا عطر ومرجانة شبعوهن ضرب مامقهورة لان ضربوا مرجانة جانت تستاهل بس عطر شنو ذنبها لج معافوها الحد ماوكعت تخربطت وهي جانت حمل بيج ومتدري
الحد هسه نار اختي مشتعلة بصدري وماتنطفي لو موافقين ابنهم ياخذها مجان ماتت ولا تاذت
وبعدها صرتي انتي الضحية الثانية ودمروج ترى ادري بيج الحد هسه بعدج تفكرين بي ومجروحة بسببه
... ياعمري كل هذا شايلتة بگلبج حقج بكل كلمة حجيتها بس لا تاخذين ناس بذنب ناس ثانية
باهر شعلية بسواية اهله
وانتي مو مثل ماما الله يرحمها جنة قوية محد يكدر ياذيها ونفسهم هذولة الناس الرفضوا اختج راح يتعنون من البصرة لهنا علمودج راح تكعدين مثل الاميرة وطلباتج كلها تتنفذ
.. والصالون شلون اعوفة تعودت على شغلي بي
... جنونة اني وياج بدون شي سمعة مرجانة مجلبة بينا ولان احنا وحدنا ونطب ونطلع الف عين علينا والميحجي كدامنا يحجي ورانا نترك الشغل احسن
حصتج بيعيها وهذا البيت اجري لاتبيعي يبقى الج ضمان
... اوووف منج مخططة الكولشي
.. هههههه اي لعد شعبالج
خالة واميرة من عرفوا فرحوا خالة كالت كولي العمامج يجون يطلبونها مني ومن اخواني
.... ثاني يوم اتصلت على باهر خبلتة يلا انطيتة الموافقة ههههه
حددو بعد اسبوع المشية والمهر
جنة... داخلي مخبوص ما اعرف شريد مرة اكول باهر خوش رجال واني هم من حقي استقر ويصيرلي طف
ل ارجع اجاوب نفسي واكول لا هاي خطوة غلط اني مو بحاجة رجال الحمدلله حياتي مستقرة ليش اجيب الدوخة الراسي
طلعت ويا اميرة والبنات اخذت فستان للمهر واخذنة باقي مستلزمات المهر
اصال.. بابا اتصل عليه كال راح اجي قبلهم اريد اكون من طرف العروس مو العريس جنة اختي وانه بظهرها ما اريدها بيوم اتكول ماعندي احد
طرت من الفرح وحسيت بالفخر
جنة من عرفت هم فرحت
بيوم المشية الظهر احة بابا وسيوفي جانوا اخوان خالة موجودين كعد وياهم
جنة لبست فستان بسيط لون زيتوني اللون گلب على عيونها الزمرديات خلاهن يشعن ومكياج هادئ ما اعرف شلون اوصف جمالها فعلاً باهر محظوظ بيها
جنة...الخوف مسيطر عليه گلبي يريد يطلع من صدري من سرعة دكاتة زواجي من اكرم وخطوبتي من كرار مديروحن من بالي اعرف بنفسي معندي حظ وخايفة ارجع افشل للمرة الثالثة
جيت منصف ووكفتة وياي مو ويا اخوة هواي كبرتة بعيني واحمد الله واشكرة لان كومة ناس طيبين الله وكفهم بحياتي وخلاهم بدربي
ورا صلاة العصر كالوا اجوي كمت افرك ايد بيد من التوتر دخلن نسوان للهول من توتري حتى منتبهت منو جاي
اصال.. جنة مبينا خايفة ومرتبكة دخلن النسوان كمت سلمت عليهن جانن جايات عمة بيداء، وبنين وعمات باهر وخلاتة بيبي مجاية لان مرة جبيرة متتحمل طريق
الحياية مرت الشيخ ومرت رحيم وزهراء مجايات خفتا وراحة
النسوان من شافن جنة ظلن يصلن على النبي ويتهامسن مشالن عينهن منها
بيداء... اللهم صل على محمد خايبة شنو هالجمال حقة اخوي تسودن عليج
جنة.. اني بس ابتسم من الخجل حلكي مربوط
اصال... رحت يم عمه بيداء وبنين سالتهن منو من الزلم جايين
بنين. اخواني كلهم حتى رحيم وولدهم وعمامي وخوالي واصدقاء باهر وكومة من ولد عمومتنا
... فرحت هم زين جايب مشية ترفع الراس الزلم ظلوا كاعدين واتفقوا على كولشي وراها صاحولها توكف يم الباب حتى يعقدون
جنة.. تم العقد واني حايرة بنفسي ماكو فرح بگلبي شبيه ما اعرف
بيداء.. هذن فلوس الذهب والملابس باهر كال خلي هي تاخذ الذهب على ذوقها
اصال... خلصت الكعدة والحد هسه باهر مشاف عروستة
اكول بنون شعجب باهر مدخل يشوف جنة
... يستحي من النسوان من يروحون الزلم اخذيها البيتها حتى يشوفها
... انتوا وين راح تبقون اليوم
.. هااا ما ادري
ياااا وشبيج كمتي تمتمتين احجي وين
...فلك صايج ادري بيج ماتفكين ياخة مني اذا متعرفين يمكن بيت رضا وجماعة باهر يرحون فندق
... مممم ماشي
ام وليد... اليوم ماكو روحة تباتون اهنا اخواني هسه يروحون وكامل يروح وياهم البيت مابي بس نسوان حتى تاخذون راحتكم
.. عماتي استحن رادن يروحن بس خالة جلبت بيهن وحلفت يبقون
الزلم راحوا البيت رضا والنسوان بقن
بنين.. جنة كومي نروح البيتج باهر يريد يشوفج
جنة. عززا شنو يشوفني
بيداء... هههههه يااا وشبيج كمزتي ترى باهر صار رجلج واليوم عقدكم من حقة يشوفج ويحجي وياج خايبة ارحمي بحالة ولاتحرمي من شوفة هالحسن
جنة... يبووو منين طلعولي بهالسالفة اني ماصدكت خلصت الكعدة لبسوني صاية فوك الفستان وشال على راسي كمت وياهن رحت البيتي
اصال... يلا نزعي الصاية وذبي هذا الشال
... مرتاحة هيجي
... اووي جنة عبالك طفلة جريت الصاية منها بالكوة
بنين... هذا باهر اجة واكف بالباب
جنة.. بالكعبة من الخجل شوية وافقد الوعي شلون راح يشوفني هيج ما ادري صح فستاني مستور بس لاطش على جسمي وهاي اول مرة راح يشوفني بدون حجاب
اصال... يلا بنونة امشي
.. هووب وين رايحين وعايفيني وحدي
... انروح نساعد خالة والبنات بالطبخ ميصير نعوفهن وحدهن..
بنين.. اي يلا مشينا
جنة.. والله متتحركن منا ما ابقة ويا وحدي مستحيل
اصال.. ترى هو زوجج على سنة الله ورسولة ولاتخافين مراح ياكلج ادري بعمي فقيرة واذا توازة وسوة شي رمشيلي اجيج ركض هاي اذا كدرتي تلزمين التلفون
... فتحت عيني من كلامها خلتني انلصم ما اعرف شجاوبها
بنين...خايبة لاتخوفيها متشوفيها شلون تتراجف بس لو انه زلمة وبمكان اخوي اخذها واشرد
جنة... انتي جاي اطمنيني لو شنو على هذا كلامكم اريد وحدة تتحرك منا
اصال.... هسه ما اريد ولاتعوفوني وتالي من اول بوسة وحضنة تاخذي وتروحين للغرفة بس الله عليج لاتسوون شي على فراشي لان استحرم ههههههه
.. يا طايحت الحظ يا ادبسز لج اصاااااال كافي
.... خربانة من الضحك عليها اخذت بنين وطلعت اركض وجنة تكمز ورانه من سمعت صوت باهر طبت تركض
باهر.... صارلجن ساعة جوة وانه مشتول بالباب
بنين... فوت خوية وديربالك على اليت لان خايفة ماوصيك صير عاقل هههههه
... ولن من كبالي
جنة... اروح منا واجي منا دخلت للغرفة ردت اسد الباب خرب اني شجاي اسوي هسه اذا شافني خاتلة شراح يكول عليه اشو كمت اتصرف مثل الزعاطيط
تنفست بعمق رجعت للهول كعدت دخل باهر كال سلام عليكم دنكت راسي وجاوبتة وعليكم السلام
اجة اتقدم يريد يكعد يمي كمت وكفت
... ههههه شبيج بوية كعدي لاتخافين راح اكعد بعيد وما ادنى عليج
.. رجعت كعدت وبعدها عيني بالكاع صار هدوء كلمة بعد محجة هذا شبي رفعت راسي شفتة صافن عليه
... بروح اعزازج ظلي عايني عليه لادنكين خلي اتمتع بشوفة هالعيون
... اويلي هذا اشديحجي
... ليش هلكد خجلانة مني انه صرت رجلج وستر وغطا عليج استحي من الدنيا كلها ومني لا
... ترى مصارلنة ساعة من عقدنا يعني تريدني بهالسرعة اتعود عليك
.... هم حقج بس اذا تظلين خجلانة بحياتج مراح تتعودين ارجعي اعتبريني عم اصال مو خطيبج واحجي وياي مثل قبل
....ترى قبل جنت اكولك اخي يعني تريد ارجع لكول اخي
.... ههههههه لا مو خوش سالفة هاي ابقي خجلانة ولاتكوليها
.. ابتسمت على ضحكتة
... جنة تدرين انتي حلم بالنسبة الي ومامصدك هسه انتي مرتي
... ليش؟
.....جنت مامخلي الزواج على بالي وراضي بقسمتي وتصورت بحياتي ما ازوج وبيوم الجينا انه ومنصف ناخذ اصال انصدمت بيج شفت ام محروك گلبها شلون ادافع على بنتها شفت شابة صغيرة متحملة مسؤولية بنية مراهقة ومربيتها احسن تربية رغم امها....
.
.. كمل لا تكطع كلامك رغم امها مرجانة الغجرية
....راح احجي بصراحة بيوم الجيناكم ماتوقعت انتي واصال راح تكونن مختلافات عنها كلت بگلبي التربيها مرجانة اكيد تطلع مثلها
ومن شفناكم شفنا بنات مثل الماس جمال واخلاق ودين
ايام وانه اكل بروحي واستغفر ربي لان سئت الضن بيجن
وبعدها من تقربت من اصال جانت دوم اسمج مايفارك لسانها حجتلي عن حياتكم وعن كل المريتوا بيه لكيت نفسي غصب عني انعجب بيج وبشخصيتج
اطلع جذاب اذا اكول ما حببت شكلج انه بشر مو ملاك وحالي حال كل رجال بس يشهد الله قوتج وشخصيتج عجبني اكثر
ماكو مرة تتحمل التحملتي طفلة ربت طفلة صارتلها ام وسند
لو اظل عمري كله ادور ما الكي مثلج
.. دموعي نزلن ماكدرت احبسهن
... ليش تبجين ما اريد اشوف دموعج اريد اعوضج عن ضيمج اريد اسندج اريد اصير اهلج وناس
مراح اوعد واكلج اسويلج فلان شي واجيبلج فلان شي لان الكلام سهل والوعود هم سهلة
الزلمة الصدك مو قول يصير فعل وانه ان شاء الله اكون كد افعالي واكدر اعوضج عن عمرج. الفات
..... كمت ابجي بالزايد حجيت بقهر اني خايفة ومتعقدة اخاف اتعلق بيك وتخذلني ومن اوكع واريدك ما الكيك يمي
مخلية عليك العباس ابو فاضل اذا ناوي تاذيني وتجرحني من البداية عوفني ترى هالمرة اذا انطعنت اموت لان ماعندي گلب يتحمل ضيم جديد
تقرب مني وحضني جنت واعدة نفسي ما اخلي يلمس شعرة مني قبل يوم العرس بس هسه مدري شصار بيه ماكدرت اوخرة دفو حضنة وحنانة خلاني احس بالامان والطمئنينة
باهر... وتراب ابوي رايدج ام بيتي ونصي الثاني تكمليني واكملج مو رجال اليطعن مرة ضعيفة وبعون الله الايام تثبتلح باهر منو
.. هديت ووخرت منه مسحت دموعي كتلة اكو شغلة ضرورية لازم نحجي بيها
.. احجي بوية
... اصال اريدها يمي وتعيش وياي
... بدون ماتكولين ناوي اجيبها يمنا ترى اصال مو بس عزيزة عليج صح ماربت كدامي ومصارلي سنوات من عرفتها وعلي اموت عليها بيوم الماسمع صوتها احس مضيع شي
.... ابتسمت هو منو الميحبها
كتلة يلا كوم روح كافي
... بسرعة مليتي مني
... ههههه لا بس مظل وكت
.. حظري نفسج العرس قريب واريد قبل العرس تجين للبصرة تأثثين بيتج براحتج
... لا شيجيبني انت اختار
... ماشي راح ادزلج صور وانتي اختاري اليعجبج وعقد المحكمة بهالاسبوع ماشي
... هزيت راسي بالموافقة سلم عليه وطلع اشكد جنت ضايجة وخايفة سبحان الله من كعدة وحدة ويا ارتاحيت وطمئنيت
شخصيتة حلوة يارب ميخيب ضني بي
.راح باهر على السريع كمت بدلت ملابسي وغسلت وجهي رجعت البيت خالة البنات استلمني من الباب
دعاء.. ماتفوتين جوة اذا متحجيلنا شسويتو وشحجيتوا بالتفصيل
... حجة كلام عادي وراح
اصال.. خلي يولن صارلكم ساعة وحدكم معقولة كعدتوا عاقل
... بالكعبة انتي بالذات اذا متسكتين ابتلي بيج سوالفج صايرة اكبر من راسج
.. هما كالوها ابوية ميكدر غير على امي
اميرة.. صارلها اسبوع وجها يلطم وهسة رجعتلنا الخدود موردات والأبتسامة من الاذن للاذن
... اووو اروح يم خالة احسن الله لايوكع بشر بحلوكم عفتهن وانهزمت هههههه
ثاني يوم راحوا الخطار واني التهيت بالتجهيز اميرة خطية وياي معافتني جانت ادز دعاء، بمكانها للصالون
الصالون بعت حصتي الامبرة وكتلها سددي الفلوس براحتج لاتضايقين نفسج اثاث بيتي كلت الخالة شوفيلج ناس عدهم يتامى ومحتاجين انطيهن الهم
عقدنا محكمة وكملت جهازي
باهر خلال هالأيام قوت علاقتي بي اتصال مستمر بينا حتى بتجهيز البيت يدزلي صور الأثاث واني اختار
بنين اتصلت كالت تعالي للبصرة اهناك نسوي الزفة منكدر من بغداد للبصرة طريق طويل وتعب
خالة والبنات كالعادة معافوني كالوا نجي وياج
قبل العرس بيوم سافرنا واول موصلنا رحنا البيت بنين
منصف راد نروح البيته استحيت اني ماينة على بنين اكثر
ام باهر جانت اهناك من شافتني حضنتني وتبجي
... حسبالي اموت وما اشوف باهر معرس هسه اذا الله اخذ امانتة اموت وانه مرتاحة
... اسم الله عليج حجية عمرج طويل ان شاء الله
... كولي يمه انتي صرتي وحدة من بنياتي
... صار يمه تدللين بستها من ايدها وظليت كاعدة يمها وهي كل شوية تبوسني من خدي
اصال. جنونة اني رايحة باليل عود اجي
... وين موليه كعدي وسكتي
.... اروح اسلم على بابا وانكد على زهيرة صارلي هواي ممضوجتها اشتاقيتلها ههههه
.. لج كعدي راحة وتالي وياج طلعتي انتي تتحارشين بالمرة
... سودة عليه زهيرة اشكد فقيرة واني اتحارش بيها اكوم اروح احسن
وصلت للبيت سلمت على بابا زهراء اعصاب ومتتحاجة كلت بگلبي يااا وجنة اتكول انتي تتحارشين بيها
اخذتلها صورة بدون متدري ودزيتها الجنة كتلها شوفي الفقيرة العاقلة الحبابة الي اني اتحارش بيها
جاوبتني بسم الله شوكت وصلتي وشوكت لحكتي تتعاركين
... خررب هاي بعدج ظالمتني الله وكيلج اول مدخلت هذا شكلها
... عوفيها معليج بيها تعالي رجعي اهنا
... باليل اجي
صعدت الغرفتي اجاني سيوفي يضحك بوسني كتلة شو تضحك ولك
سيف.. من شفت امي متتحاجة عرفت انتي اهنا ههههههه
.... خرب وفرحان عابتلك
.... وعلي انتي وياها الضراير، ميلحكنجن
.... وداعتك هي امك مدري شبيها وياي عبالك ماكلة عشاها
...سوالف النسوان معليه بيهن صدك ابوي كالج لو لا
... شنو شيكول؟
... زفة خالتج تطلع منا
حتى كال العمي باهر جنة تطلع من بيت اخوها
... اوووي فديت بابا حبيبي هههههههه هسه عرفت امك شبيها
نزلت جوة بابا طالع وزهيرة بغرفتها سيف دخل كال فوتي جوة ولد عمامي راح يجيبون المسواك وسيتات المي والببسي والكيك
دخلت كعدت بالديوانية التهيت اتصفح بالفون
رضا... شلونج اصال
..... فزيت ورفعت راسي نترت اهووو هم انت شجابك اهنا
... هذا بيت عمي مو غريب
.... سودة عليه اشكد تحترم عمة وتقدرة
.... مشتاقلج حبيبي
... حبتك حية كمت اريد اطلع لزمني من ايدي
هد ايدي قبل لا اصرخ
... سمعيني ياروح رضا باجر عرس خالتج والوراه عرسنا ماظل شي وارجعج الحضني
... سحبت ايدي قوي رفعت اصبعي بوجها بتهديد هاي باحلامك لوتموووت سمعت شكلت لو تموووت ما ارجعلك روح المريمتك
.... وانه رايدج انتي مو مريم هذا الگلب تسجل بسمج وحدج جنت غبي من فرطت بيج وراح اسوي المستحبل حتى اردج الي
....سمع صوت سيف يدور عليه عافني وطلع صعدت بسرعة الغرفتي شمرت نفسي على الجرباية وكمت ابجي شنو الديصير، ياربي مو راح امووت يحبني وباعني يريدني واخذ غيري احتاريت ويا هذا البشششر
باليل رجعت يم جنة وجانوا مبلغيها الزفة تطلع مناك جنة مرادت حنة لان جاين تعبانين
قبل لا انام سالتني شبيج اصال شو من رجعتي من بيت ابوج مو على بعضج
خوما تعاركتي ويا زهراء
.... مابيه شي اصلاً عادي اني وياها دوم نتعارك
يلا نامي شنو منعستي
ثاني يوم بعدالريوك رحنا البيت ابوية
زهراء ماكو بعدها بغرفتها جنة والبنات صعدن الغرفتي حتى يجهزنها بدلتها جبناها من بغداد واميرة راح تمكيجها
وراه نص ساعة نزلت جوة سمعت صوت زهيرة تصيح على بنات اختها دخلت للمطبخ
من شافتني ضربت باب الكاونتر
جيت وكفت كدامها كتلها بطلي هاي سوالفج البيت بي خطار اذا سمعوا راح ياخذون على نفسهم
.... انتي جاية تعلميني العيب والاصول بيتي وحرة بي اسوي اليعجبني
... والنبي اذا خالة والبنات انغثن بسببج اسوي بيج سواية لا صايرة ولا دايرة احذري مني اللعب وياي تاليتة مؤذية
.... جاي تهدديني هسه اخابر ابوح واكلة الظاهر انتي صايرة فدمرة محد يكدرلج لاتحترمين صغير ولا جبيرر
.... الله ويدح بلا خابري واني واكفة اهنا مراح اتحرك نترت يلا شمنتظرة خابري
رجعت ضربت باب الكاونتر عافتني ودخلت الغرفتها هزيت ايدي وصعدت
جنة... لبست البدلة البيضة الي هي حلم كل بنية
احساسي مينوصف فرحانة الدرجة خايفة لايصير شي يخمد هاي الفرحة
اصال... ياعمري فدوة اشكد حلوة طالعة
اميرة.. اشكد جنت اتمنى تتزوجين بس والله فراكج صعب يا احلى واغلى اخت
... دموعي نزلن حضنت البنات وحدة وحدة كلت الاميرة والله العظيم اني هم ما ادري شلون راح اكدر بلياكم
... مو وكت بجي يمعودات يلا ننزلن دينتظرونا جوة
جنة... نزلنا حوة خالة من شافتني هلهلت وتصلي على النبي رحت بستها من ايدها وراسها
كتلها ما اعرف شلون اجازيج صرتيلي ام بالوكت الامي حارت شسوت بيه فتحتيلي بيتج بوكت الدنيا كلها سدت بابها بوجهي صرتولي اهل وماتخليتوا عني الله يفرح گلبج ويرضى عنج
خالة تبجي وتمسح دموعها بشيلتها
ام وليد.. انتي جنة اسم الله مسمى ربي يسعدج ويريح بالج ويرزقج الذرية الصالحة بجاه الحبيب محمد
اصال..كعدت جنة واني بصفها وراه شوية كالوا اجوي دخل باهر ويا اخوانة وخواتة
جنة...اجة كعد بصفي جنت ملفلفة كولشي ميبين مني همس مبروك ياعوض سنين باهر المضت ويا احلى ايامي راح تجي لان انتي يمي
يبووو شلون كلام ولا اعرف اجاوبة اخو كال يلا خلي نطلع اخذ ايدي بين ايدة وطلعنا
اصال... اليوم الفرحة مواسعتني لو بيدي اكوم اردح هههههه طلعنا دنصعد بالسيارات قبل لا اصعد عيني اجت على وحدة لو ميتة ولا شايفتها بهاليوم مريم واكفة يم رضا وايدها بيده يتهامسون ويضحكون
جيت اصرخ بقهر من منظرهم هي من شافتني رفعتلي حاجبها الظاهر تعرفني
بسرعة صعدت للسيارة گلبي يبجي من القهر البارحة يكولي بس انتي وبس وهسه ايده بيدها اشششكد جذاب ومعنده كلمة.......
يتبع
ممكن متابعة للبنوتات
rashaali22
HamedMoslh
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!