_بنات الغجرية _
( بقلم بسمة البياتي)
_البارت الاربعون _
اصال.. دايسة على اعصابي اريد الوقت يمشي وتخلص الزفة اخذوا صور بالأستوديو ورجعنا البيت باهر وجنة
نزلنا من السيارات دخلنا للبيت كعدت جنة بالاستقبال والنسوان بدن يهوسن ويركص
ام رضا جانت جاية مخلية مريم بصفها وكل شوية تبوسها لو تلزم ايدها ويتهامسن ويكركرن اعرف بيهن يريدن يحركن گلبي
جنة من بعيد تباوع عليه بقلق الخاطرها سويت نفسي عادي ممهتمة واضحك واني داخلي يصرخ من الوجع
بنين... كومي نركص اذا بعرس جنتج متركصين جااا شوكت تركصين
.... لا ما اريد خليني كاعدة
همست باذني كومي ولاتصيرين عوبة وتشمتيهن بيج ترى واضح متقصدات يضوجنج
جرتني من ايدي كمت ركصت حاولت اشمر كولشي ورا ظهري واتجاهل وجودهن
جنة... بدن النسوان يروحن اجتني بيداء كالت امشي الغرفتج راح يزفون باهر
الفرح البداخلي تحول خوف كمت اطكطك عبالك اول مرة ازوج
خالة والبنات سلمن عليه وراحن ويا بنين.
اصال اجت حضنتني سودة عليه ادري بيها ضايجة
همست باذنها اصال الربيتها ادري بيها قوية وماكو شي يهزها اياج تضعفين ترى انتي الربحانة مو هما
.... انصدمت من كلامها هي اصلا متعرف مريم ولا شايفتها كتلها شلون عرفتي
... شكلج معجبني سألت بنين كالت مرت رضا اهنا
... لزمت وجها بيدي لاتشغلين بالج
هذا اليوم بالذات خلي تفكيرج كله الباهر وبحياتج الجديدة ومثل مكلتي اني قوية لاتخافين عليه
بستها وطلعت رحت البيت بنين
جنة... اختفت الهوسة والبيت فرغ كعدت بالغرفة وحدي متوترة ومرتبكة اريد اكوم انزع البدلة ما اكدر احس متحنطة
دقايق انفتحت باب الغرفة ودخل باهر دكات گلبي زادت بعز الصيف كمت ارجف
باهر... وأخيراً صرنا بوحدنا كلت اليوم مايرحون يبقون على گلبي
.. كلامة زاد توتري ظليت ساكتة
... شبيج حبيبتي ليش ترجفين
.. هاا لا مابية شي
... نورتي حياتي وبيتج بوية
... اريد اعرف شجا لساني انربط ما ادري
اجة كعد بصفي لزم ايدي باسها وباس راسي
باهر... ايدج ثلج اهدي عمري لايصير بيح شي لا تخافين مني ما ادنى عليج اذا انتي مارايدة المهم ترتاحين وتطمئنين
... واخيرا كدرت انطق عفية اريد ابدل
.. تريدين اطلع؟
.. هزيت راسي بمعنى اي
... صار بوية تدللين
.... كام اخذ ملابس وخاولي وطلع
كمت قفلت الباب رحت يم ميز التواليت شلت الطرحة وفتحت التسريحة همزين البدلة معذبتني بسهولة انزعت لبست سيت نوم طويل وفوكاه الروب هم طويل حسيت نفسي محتاجة اسبح
كعدت انتظرت شوية وبعدين فتحت الباب مشيت على كيف مديت راسي للهول شفتة ديصل بسرعة رجعت للغرفة اخذت خاولي وفتت للحمام
سبحت من كملت رجعت لبست السيت
رجعت للغرفة باهر مموجود نشفت شعري ومشطتة
دخل للغرفة كال مادام العشا حار تعالي نتعشى
استحيت من نظراتة كمت استر بروحي كتلة دقيقة واجي
طلع وعافني لبست دشداشة فوك السيت ورحت للهول يمه العشا على طبلة كدامة كالي تعالي كعدي اهنا واشري على مكان بصفة جيت كعدت بدينا ناكل واحنا ساكتين نفسي متريد بالجذب مسوي روحي داكل
باهر.. ليش متاكلين لاكل ما عجبج؟
... بالعكس طيب بس موجوعانة اذا كملت اشيل الصينية
... لا عوفيها ثكيلة انه اشيلها
... شالها وراح للمطبخ ههههه ممتعودة على هذا الدلال رحت وراه كتلة اسويلك جاي
. الله ويدج ياريت
. خليت القوري على النار وشلت الاكل الزايدة خليتة بثلاجة صبيتلة الجاي اخذتة اله
رجعت للغرفة اذكرت اني متوضية صليت كملت تمددت بفراشي
دخل باهر واجة تمدد بصفي حبست انفاسي شنو هالخوف والخجل هذا ما ادري
بدون ميحجي شي خلى ايده جوة راسي والايد الثانية سحبني عليه وطوق خصري
... ماسوي شي بس نامي بحضني
.. بقيت بحضنة
.. تدرين بيه اشكد احبج واشكد تمنيتج ومامصدك هسه انتي بحضني
... ليش اختاريتني اني بالذات اكو هواي احسن مني
... لا ماكو احسن منج كلشي بيج مميز حتى هذا خوفج وخجلج عشكتة
.. ابتسمتلة ظل يسولف وياي ويتغزل راح الخوف مني
من شافني هادئة ومرتاحة بدة يتقرب باسني من شفايفي بهدوء وبدة يتعمق بالبوسة لمساتة وبوساتة خلني بعالم ثاني اتقرب مني وصرت مرتة فعليا رجع اخذني الحضنة وكل دقيقة يهمس لوتدرين اشكد احبج
للفجر يلا نمنا نمت بحضنة احلى نومة
الصبح حسيت على انفاسه الدافية تلفح على ركبتي فتحت عيني بكسل شفتة غارس راسة بين ركبتي وشعري يشمشم ويبوس بيه من حس بيه كعدت رفع راسة ابتسملي وباسني من شفايفي
... صباح الخير والهنا حبيبتي
... صباح النور
ساعة اشكد؟
.. ثمانية
... بعد وكت شعندك كاعد من هسه
... مسودن اليعوفج وينام
... بعدني لهسه مستحية منه ردت ارجع انام لان نعسانة مقبل ورجع هم تقرب مني
من ابتعد كال بنين وام وليد راح يجن قبل شوية خابرتني ديحجي واندكت الباب
عزززا وهسه يلا اذكرت اتكولي
... هههههه شسوي من اعاين بعيونج انسى حتى اسمي
... كمنا بسرعة باهر لبس دشداشة وراح يفتحلهم الباب واني كمت لبست دشداشة وغسلت وجهي طلعت عليهن
بنين وخالة من شافني هلهلن
ام وليد.. صباحية مباركة يوم الله يجعلها زواجة العمر وتملين البيت جهال
.... فدورة العمرج خالة بوستها وبوست البنات
اشو اصال مو وياكم
اميرة... التنبل كعدناها مكعدت كالت روحوا انتوا
ام ليد... جينا نسلم عليج ونطلع البغداد باهر ماوصيك مو تكطع جنة منا امانة دوم جيبها
... بدون ماتوصين انتوا اهلها واي وكت تريدون تلكوها يمكم وانتوا هم هذا بيتكم
جنة... خالة ظلت توصي باهر عليه اني وباهر جلبنا بيهم يبقون مقبلوا كالت كامل وحدة مااكدر اعوفة هلكد
ودعتهم بالدموع الله اليعلم بعد شوكت يلا اشوفهم
جانوا جايبين الريوك باهر راح سبح من كمل اني هم سبحت وكعدنا نتريك كملنا ورجعنا نمنا
اصال... من خلصت الزفة ورحنا البيت بنين
جنت مختنكة بنين واميرة حجن وياي كالن على شنو غاثة روحج هما متونسين وانتي تحمسين بنفسج طنشيهم وطز بيهم
الكلام سهل محد يحس بالبداخلي باليل من خليت راسي على المخدة شبعت بجي طلعت كل قهر گلبي الوجه الصبح يلا نمت كعدوني حتى نروح الجنة مكمت من الفراش اذا شافت وجهي متاكدة راح تعرف بيه باجية كلت اروحلها غير يوم
الظهر كعدت تغديت ورجعت البيت ابوية ظهرية الكل نايمين اني هم صعدت الغرفتي نمت للعصر يلا كعدت نزلت جوة زهراء استغربت من شافتني معبالها اني اهنا
صبيتلي جاي وكعدت اشرب زهراء واختها اجن يمي
ام هبة... اكيد فرحانة لان خالتج صارت يمج وبعد ماتفاركيها
... اي اكيد فرحت
... هااا انتي راح تكعدين يمها لو هنا
... رفعت حاجبي بستغراب عرفت هاي سوالف زهراء هي معلمتها تسالني هذا السؤال
كتلها بيت ابوية اولى بيه عرسان شعندي اكتم على انفاسهم
... يعني تبقين مدة وبعدين ترحين
.... خالة شبيج وين اروح شعندي باقية اهناك من اشتاق الجنة اي وقت يعجبني اروحلها اما وين اعيش اكيد بهذا البيت
زهراء متحملت تبقى ساكتة كالت
... جااا مو جنتي خابصة الدنيا بخالتج وماتردين تفاركيها شنو التغير هسه وماتردين تعيشين وياها
... اني من كاعي روحي طافرة وهذن ديلحن عليه نتر واني وين عايفة جنة كتلج اروحلها بالوقت اليعجبني وبيتها بيتي بس ارجع واكولج اني مكاني بهذا البيت ولاتحلمين اعوفة
....وهذا البيت بيتي واي شي تردي لازم تسالني بالأول مو تظلين تتصرفين بكيفج وخطارج البغداديات بعد ما اقبل يجن اهنا
.... بالقرآن انتي فلا تصيرلج جارة تعلمتي على الاهانة والطردة خلي يجي بابا واني الج
رجعت للغرفة مختنكة شحيخلص هالعمر ويا هالنماذج
قبل العشا بابا اجة الغرفتي
منصف.. بوية اريد اسألج وتجاوبيني بصراحة وادري بيج صريحة وماتجذبين
... عرفت صاير شي كتلة اي وشنو هو السؤال
... انتي صدك طاردة ام هبة ومعايرتها بعازتها وفقرها
... شهكت من الصدمة عيوني انترسن دموع همست وانت صدكت اني هيجي حاجية وجيت تسألني
... مثل ماسمعت منهن اريد اسمع منج
.... حجيتلة كل الكلام جنت بداخلي حيل مقهورة خايفة يصدكهن وانذل كدامهن
منصف..الجهال جانوا موجودين لو لا
... يمكن بس حمودي
... خوش مسحي دموع بوية انه ماعندي شك بيج ولو زهراء هي الحاجية هالحجي وعلي اجنزها المشكلة اختها اجتني وحجت والمرة اكبر مني ماكدرت ارد عليها بدون ما سالج ترى ابوج مو خرگة وبكلمة يندفع عليج
... بابا نزل ظليت انتظر شراح يصير ورة نص ساعة كبت العيطة نزلت اركض لكيتة لازم احزام ويضرب زهراء واختها مجلبة بيده متت خوف المنظر مرعب
.... بنت الكلب مسوية عصابة ويا اختج وانتي عود مرة جبيرة ومحترمج وفاتحلج بيتي هاي تاليها تريدن تهججن بنتي
ام هبة...مامرجية منك ابو سيف انه بهذا عمري اطلعني جذابة وتصدك بكلام طفل
... هذا الطفل شمعرفة بالجذب والالاعيب ولو رايد يجذب جان وكف وياكم انتن امه وخالتة
اخذي اختج وطلعي منا وما اري اشوف وجوهجن بعد
زهراء... صخام الصخمني وين اولي كل يوم والثاني طاردني علمود بنتك الناس شراكح تكول
... طبج مرض انتي واليكول مرة مثلج مالها مكان بيتي الله بلاني بيج بلوة تنكطين سم
... رجعت الغرفتي وعفت الهوسة جوة الحمدلله ابنها فضحها خرب يومها ولاتوب
الثاني يوم بقت الهوسة الشيخ ورحيم ادخلوا وبالكوة قنعوا بابا يرجعها للبيت
صح رجعت بس بابا ميحجي وياها وينام بغرفة سيف
جنة.. سعادتي ويا باهر متنوصف تعلقت بي مثل الطفلة التتعلق بأبوها اذا يطلع من البيت شوية اشتاقلة
مر على زواجي شهر
الي نكد عليه وكسر فرحتي قرار اصال متقبل تجي يمنا تخبلت بجيت وتوسلت حتى باهر حجة وياها وهي قافلة اتكول ابقى بيت ابوية ويومية اجيج
كمت اكل بروحي والوسواس دمرني كلت هاي بس لا عبالها باهر صار كولشي بحياتي وحبي واهتمامي صار بس اله وهي حنساها
باهر كال عوفيها هسه وعد اني اخليها تجي يمج
اصال بدا دوام الجامعات انقلت الجامعة البصرة
بابا لزملي خط يوديني ويرجعني
تعودت على مكاني الجديد وتعرفت على بنات القسم وصارت صداقات عادية بينا
اليوم باليل كاعدة اتعش ويا جنة وباهر
باهر... شوكت تبقين اهنا مامليتي من كعدتج ويا زهراء
جنة... عوفها تسوي اليعجبها اني غسلت ايدي منها صارت بنت ابوها
اصال... هسه اني مو يومية يمكم بعد شكو اشو بس وقت النومة اروح اهناك
... لج اني انطيتج مجال هواي من اليوم بعد ماكو روحة
... وبابا شحيقنعى
باهر... معليج بابوج انه احجي ويا
... اوك راح ابقى انتوا مو مال زينية عود كلت اخليكم براحتكم بس شسويلكم تحبون اليكتم على انفاسكم
باهر...عدنا غرفة مامتوازين نسوي شي كدامج
جنة... ياااا هاي عود انت عمها وهذا حجيك كدامها اكول ليش صايرة رعنة وادبسز طلعت انت تشجعها
باهر... بوية لاتبليني بنتج من يوم يومها لسان نسيتي اول مرة جيناكم شسوت بينا انه ومنصف
.. لاتذكرني ترى اگلب عليك
اخذ ايدي باسها همس كلشي ولاتكلبين وين انطي وجهي بهاليل
اصال... تهي بهي جنت مراعية مشاعرهم عبالي يستحون مني اشو هذولة طلعوا باعين ومخلصين
باهر...على كولت جنة رعنة متصيرلج جارة
جنة... وأخيراً العوبة قبلت تبقى يمنا هسه يلا حسيت حياني كملت ومناقصها شي
نايمة بحضن باهر كال كون هسه ارتاحيتي لان عزيزتج يمج
... اي والله حبيبي هسه يلا ارتاحيت بالي طول الوقت يمها اخاف عليها من زهراء لاتروح تسويلها شي
... شحدها خلي تفكر تاذيها وعلي ادفنها وهي عدلة
... بستة من حنكة همست الله لايحرمنة منك حبيبي
.. هاي النواشف متفيدني اريد دسومات
... هههههه ولاتشبع اخذني ويا العالم كله حب ورومانسية خلال فترة بسيطة خلاني اتعلق بي وكمت اعشقة مو بس احبه
اصال... المغرب كاعدة ادرس باهر كالي كومي نروح البيت ابوج خابرني يريد يحجي وياج
كتلة بخصوص شنو يحجي وياي
... انه هم ما ادري اليوم ماشايفة ولا حاجي ويا
... لبست الصاية ورحت البيت بابا لكينا رحيم وابنه علي اهناك عقجت وجهي الله يستر وجود رحيم لازم ورة كارثة
منصف.. تعالي حبيبتي كعدي يمي
.. رحت كعدت يمه باهر سالهم بشك خير شصاير وليش ردت اصال
منصف.. عمها رحيم طلبها الابنة علي وانه ردت كدامهم اسالها توافق على ابن عمها لو لا
اصال.. اوووف يا الله وتالي ويا رحيم وابنه اشكد ميستحون
باهر... هاي من كل عقلك منصف جايبها وتسالها علي اكبر منها بهواي ومزوج وعنده كومة جهال
رحيم.. وشبي علي شو ما عاجبك خوية اذا ماعندك سالفة براسها حظ اسكت احسن انه طلبتها من ابوها مو منك
منصف... بوية اصال تردين اين عمج لو لا
.. طبعاً لا
رحيم نتر مو انتي بكيفج وترفضين الظاهر عاجبتج طبتج وطلعتج وتفترج بالكلية ماتردين رجال يحكمج
منصف.. اني من الأول كتلك سد السالفة لا انه ولا بنتي راح نوافق لحيت عليه وكلت اسال البت بالأول وهاي سالتها ورفضت
خوية انت اكبر مني وتاج راسي بس مال تهين بنتي كدامي لا ما اقبل
... انت عاجبك كعدتها بدون زواج وهي مطلكة تريد الوادم يحجون عليها
اصال... ابنك شلون يقبل ياخذني واني جنت زوجة ابن عمة شنو هالنفسيات
رحيم.. سكتي لا الصمج على حلكج
منصف.. من اموت عود مد ايدك عليها
... رحيم وابنة طلعوا زعلانين رجعنا اني وباهر للبيت جنة من عرفت تخبلت
جنة... فهمني اخوك شبي وياها ليش هلكد يكرها مو بناتة هم طالبات ويطبن ويطلعن يمكن بناتة فوك راسهن ريشة شحدة اليجيب طاريهن
بس اصال الملطشة مالتة واذا طلعت وطبت راح تسوي شي موزين
باهر... شجاج يابة طلبها وماوافقت هذا هو انسدت السالفة واذا طلعت وطبت بعلم ابوها محد يكدر يمنعها
بوية اصال جيبي الجنة ماي شوفي وجها شلون صار احمر
... رحت جبتلها من دخلت لكيتة حاضنها ويبوس بيها اي استاذ باهر خو كول دخلي الغرفتج مو طلعتلي بدرب المي حتى يخلالك الجو
....الماي انتي شربي انه اعرف شنو اليهدي خالتج
... اروح الغرفتي وكملوا رومانسية
جنة... اني العايفتكم وكايمة شلون اثنين العم اضرب من بنت اخو
اصال... هذا خوش درب كولي اريد اروج للغرفة حتى يلحكج
باهر... اول مرة تحجين شي براسة حظ
.جنة... وين اولي منكم شششلون اثنين
... عفتها تتناكر ويا وفتت الغرفتي هههههه
. خلصت هاي السنة وصرت مرحلة ثالثة بهاي الفترة هواي تقدمولي اقارب بابا واني ارفض انكسرت عيني من الزواج
بالكلية اكثر من واحد دز علية بنات يحجون وياي وهم جنت ارفض
رضا بعده لهسه مجايز مني من يشوفني يعيدلي نفس الاسطوانة المشروخة احبج واريدج وارجعيلي مرتة وين عنه ما ادري
جنة... الخوف بدة يسيطر عليه بسبب موضوع الحمل راح يصير سنة مزوجة والحد هسه ماكو شي باهر ممهتم يكولي كلشي بيد الله لاتستعجلين رحت ويا بنين على اكثر من دكتورة بالبداية جان عندي التهابات بسيطة وبالعلاج راح وهم مصار عندي
اصال.. بدت السنة الثالثة اكو طالب من غير قسم دوم اشوفة كبالي واني اطنشة
من شاف مابية مجال علاقة وحب دز امة تخطبني الولد خوش ولد ومن عائلة محترمة بابا كال اذا توافقين انه معندي اعتراض
وقبل لانرجعلهم الجواب رضا جاي للكلية متعارك ويا كايلة اصال مرتي صار خلاف بينا وانفصلنا وراح ارجعها اياك بعد توصل يمها
امه اجتي على جنة وعتبت عليها كالت اذا تريد ترجع الزوجها ليش ماحجيتوا مو احسن من هالفضايح واننكم رايح مهدد ابني
بابا وعمامي من عرفوا تعاركوا ويا وصارت مشكلة شكبرها وشكدها ورضا بكل صلافة وكف كدامهم يكول اي. اريدها وشحدها تاخذ غيري
ابو طردة كالة حتى للبصرة ما اريدك تجي انت ابن عاق من دون اخونك تعبتني
تعبت من رضا وتصرفاتة ما ادري شيريد مني
جنة... صارلي جم يوم تعبانة شاكة بنفسي حامل بس اخاف اروح احلل ويطلع ماكو شي
اصال.. جنة يلا بدلي بنين راح تاخذج تحللين
... لج والله خايفة يطلع ماكو شي واتفشل
... عادي واذا ماكو من شنو تتفشلين كومي ولاتعبيني
.جنة.. اتصلت على باهر كتلة رايحة ويا بنين للسوك محبيت اكولة ويتامل وتالي يطلع ماكو شي
وصلنا للمختبر سويت التحليل كعدت انتظر النتيجة على نار
بنين... خايبة شكلج يضحك على كيفج ويا نفسج اذا ماطلعتي عاتبيني
... اوووف الله يسمع منج
...طلعت النتيجة ومن كالت حامل راد يغمى عليه من الفرحة حضنت بنين وابجي
لزمت الفون اتصل على باهر، من سمعني ابجي خاف عبالة بيه شي
.. عمري بيج شي ليش تبجين
... اني حامل كمت ابجي بشهكة وهو ساكت الووو وينك
.. انتي وين
...راح ارجع للبيت
... نص ساعة وانه يمج
... رجعت بشرت اصال دموعها نزلن ويا دموعي
باهر اول مفات للبيت حضني ويردد الحمدلله يمكن لو ما شوية دموعة تنزل نذر ذبيحة الوجه الله
باليل رحنا بشرنا الحجية رغم مرضها وتعبها فرحت من كل گلبها
بس للاسف فرحتنا مكملت الحجية ورة فترة سلمت امانتها باهر وولدها وبناتها تخبلو لان جانت الله يرحمها ماكو بحنانها عليهم وهي روحهم من الدنيا
سوولها فاتحة جبيرة وناس رايحة جاية الكل يحبها لان مرة طيبة وفقيرة معدها اذية على احد راحت الحجية قبل لاتشوف طفل باهر....
يتبع
مساء العافية حبايبي
من بداية رمضان اعرف بنفسي قصرت وياكم وداتاخر عليكم وانتوا مثل متدرون صيام وتعب وواجبات النهار مدنفهم منه شي
وهواي بيكم بدوا يضوجون ويحجون واني ما احب احد يزعل مني
لهذا راح اوقف القصة البعد الشهر الفضيل حتى من ابدي انشر التزم وياكم
تحياتي للجميع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!