رواية بنات للزمن الفصل الحادي والأربعون 41 - بقلم سارة الشمري

الكاتبة : سارة الشمري🖤

أحبك و اخافك واحترس من هذا الحب، كيف لك ان تجرفني معك وانا التي تمشي حذرة بجانب الجدران
أثير عبدالله النشمي,

نزلت جوة وسلمت على بابا وكعدت عالقنفة ..

هو باوعلي مبتسم واشرلي : تعاي بابا اگعدي يمي ..
رحت گعدت بصفة بأبتسامة ..
حط ايدة على خدي بخفة : ريمي الزغيرونة كبرت وصارت عروس .. وكامت تجيهة خطابة ..

فتحت عيوني : شنووو ؟؟
ضحك هو : شبيج متفاجأة .. عبالج راح تبقين طول العمر يمي .. لا بابا اكيد راح يجي واحد وياخذج مني ويدللج ويحبج ..

دنگت راسي بأرتباك ..
هو ابتسم : بنيتي هي هاي الحياة .. وانتي كبرتي وصرتي مستحقة الزواج .. واليوم خطبوج مني وخوش رجال ما ينرد ..

هو يحجي واني مر ابالي رياض ..
بلعت ريگي وهزيت راسي انسي رياض ريم هو معتبرج بنت اختة .. شيلي من راسج .. ماكو رياض ..

ابوي حجة : سيد رياض اخو خالتج ..
فتحت عيوني وباوعتلة .. شنو سمعني معقولة حجيت بصوت عالي .. بس اني افكر بيني وبين نفسي ..

حجيت بتوتر : شبييي ؟؟
ابوي : شبيج بابا يعني شبي .. هو الخطبج مني ..
تفاجأت وباوعتلة بصدمة ..

رياض خطبني .. ليش همة مو معتبريني بنت اختهم .. ويعتبرونة هو خالي ..
اي بس بالتالي هو مو خالي ..

بلعت ريگي : بابا ..
رفع ايدة : كلشي لا تگولين .. فكري زين بالموضوع وبعدين رجعيلي خبر ..

هزيت راسي وافكر بكلامة ومر ابالي كل لحضة شفت بيهة رياض .. كل مرة جان عصبي ..
عضيت شفتي بتوتر : بس بابا هو عصبي كلش .. يعني على اقل شي يعصب .. واني تدري بية اخاف ..

هز راسة : بابا ماكو رجال مو عصبي .. وخاصاً هو سيد ومعروفين السادة دمهم حار وعصبيتهم سريعة .. بس هو نعم الرجال وماكو منة .. يحترم الجبير ويقدر الزغير .. وشهم ويخاف الله ويصلي ويصوم .. وانتي جم مرة رحتي هناك شفتي علي شي مو زين .. غير العصبية ..

هزيت راسي بلا ..
ابتسم : اي بعد شنو .. والمرة الزينة تعرف شلون ترضي رجلهة وما تخلي يتعصب .. تعرف هو شيحب وشيكره .. وانتي اذا ما سويتي شي يعصبة ما راح يعصب عليج .. واكيد هو ما يعصب على اشياء تافهة .. لازم عندة اسباب قوية ..

نزلت راسي وگمت استأذنت وطلعت ..
صعدت لغرفتي وسديت الباب ..
كعدت عالجرباية واتذكر كل موقف جمعنة سوة ..
يعني شنو هو هم يحبني .. لعد ليش جم مرة عاملني بطريقة مستفزة وصيح علية ..

تنهدت ورجعت ضهري عالجرباية وغمضت عيوني ..
اتذكر شكلة .. وسامتة .. شكلة .. عيونة .. شواربة .. طولة .. هيبتة بالزي العسكري .. ابتسمت واتذكر شكلة من يرفع طرف شاربة بأصبعة وايگول بغرور : الملازم سيد رياض عجاج ..

تسريع للأحداث ..
بعد شهر ..

مريم وراسم ما تغير شي بحياتهم ..
مريم حامل وملتهية بحملهة وراسم مهتم بيهة وممنقص عليهة شي ..

ريم من بعد اسبوع من التفكير رجعت خبر لابوهة بالموافقة .. وبعد يومنين العقد مالتهة ..

عباس وليلى عقدو وابتدت الحياة تحلى بالنسبة الهم ..

حارث ماكو شي جديد غير ان يوم عن يوم يتعذب اكثر من اشتياقة لجيلان .. ومحتار بين شوگة وحبة الهة وبين كرامتة الي اهانهة عمة وكسرهة .. ومن يومهة هو بعد ما وصل لبيت جدة ابداً ..

رضوان يحاول يقنع امة تخطبلة ديلارا وهي ما تقبل وقافلة على كلمة (فگر) ..
بس هو مصر وحاطهة ابالة ياخذهة يعني ياخذهة ..

بسمة وجبران ..
جبران تغير تماماً والكل لاحض هالشي ..
صار ميگعد بالبيت الا نادراً .. ومن يگعد بالبيت محد ياكلهة غير بسمة ..

الي كوة متحملتة ومتحملة تصرفاتة ..
والسبب هو ان تخاف ترجع لبيت اهلهة وامهة اذا شافت حالتهة تموت لان اتگللهة جبران ماكو منة .. وصعبة عليهة تخيب امالهة بي .. وبنفس الوقت تحبة ومتگدر تبعد عنة .. هاي المشكلة .. متگدر تنسا بيوم حبت هالشخص وگلبهة دگ الة وشافت الدنيا بعيونة .. عندهة امل ان يتغير .. ويرجع مثل قبل ..

الكل جاي يلاحظ تغيرة التدريجي ..
عصبيتة الزايدة .. وما ينشاف .. ما يكعد بالبيت وما يضحك ويسولف مثل قبل .. ولما يسألونة ما ياخذون منة اي جواب منطقي ..

بسمة //

جنت كاعدة يم خالتي بالصالة ..
ودخل عمي ..
من يوم الي عرف ان خالتي مسوية السحر وهو ما يحاجيهة وحتى ما ينام هنا .. يم زمن ..
وخالتي بعد ما وصلت لبيت جدو ..

سلمت علي وگمت حطيتلة الغدة وكعد ياكل بهدوء ..
خالتي ولا تحركت من مكانهة مثل العادة .. وهو اصلاً ولا عبالك موجودة .. محد معبر الثاني ..

شوية واجة هادي وكعد وية عمي يسولفون ..
سألة على جبران : اخوك وين صارلة فترة ما عاجبني ويرادلة جرة اذن .. شو حتى ما يگعد بالبيت ..

هادي : يابة يمر عالمعمل شوية ويطلع .. قبل شوية خابرتة بس ما يجاوب .. اكيد عندة شي شاغلة .. هو مو زغير ..

تنهدت بداخلي شنو هالشي بس لو اعرف .. مسود عيشتي ..
عمي قطع تفكيري : وانتي بوية شني ما تحاجينة ما تعرفين وين يروح ..

هزيت : لا عمو ايكول صديقة مريض صارلة فترة وهو ملتهي وياه ويساعدة ..
جذبة طلعتهة من يمي حتى لا عمي يشك بشي لان حضرتة مهددني ما احجي شيصير بيناتنة ..

خالتي باوعتلي برفعة حاجب وهي بعدهة لهسة شاكة هو يضربني .. ذاك اليوم من شافتني وطلعت هي رايحة متعاركة وية جبران وهو گاللهة اتشاقة وياهة وهي بسرعة تزعل ووكالي انتي گليلهة نفس الشي .. واني هم كتلهة يتشاقة وياي ورجع راضاني .. ومادري شنو تاليهة وياه ..

بعدني افكر بي جان هو استغربت جاي الضهر اليوم ..
عمي باوعلة : وين جنت ؟
جبران : جنت يم صاحبي ..
عمي ما حجة شي لان نفس كلامي ..

هو صعد فوك واني بقيت گاعدة ..
عمي باوعلي : كومي بابا شوفي رجلج خاف يريد شي ..
ما ردت اگوم بس استحيت من عمي ..
هزيت راسي وگمت : انشالله عمو ..

صعدت فوك ودخلت ذبيت حجابي ..
هو جان كاعد عالجرباية وانصدمت من شفتة يدخن ..
فتحت عيوني : جبران تدخن ؟؟ من شوكت ..
باوعلي ببرود : معليج انتي ..

تنهدت : ليش تعاملني بهالطريقة ؟ شسويتلك اني ..
نفخ الدخان من حلگة : لانج تستاهلين .. كتلج لا تتدخلين بشي ما يخصج .. وانتي ما تسمعين الكلام ..

تقربت منة كعدت على حافة الجرباية وحجيت بنبرة ترجي : بس انت تخصني .. انت الي احبة .. وبقيت سنين اتمناه .. انت حلم طفولتي ومراهقتي .. انت زوجي وحبيبي .. شلون متخصني .. شلون متريد اسأل عليك ..

عدل كعدتة وقرب وجهة مني ونفخ الدخان بوجهي گمت اگح ..
حجة بنبرة جافة وكلهة برود : مرتي حبيبتي .. الي احبهة واموت عليهة .. بس مشكلتهة ما تسمع الحجي .. وتسألني ليش تتصرف وياي بهالطريقة ..

تنهدت : جبران فهمني شبيك .. ليش فجأة تغيرت .. جم مرة سألتك .. فهمني يمكن اكدر اساعدك ..
شهكت من حسيت بدفرة على كتفي طيحتني بالكاع : وانة جم مرة كتلج معللليييج وانتي ما تفتهمين ..

رفعت عيوني الة وعطت بي : انت مخبببل والله .. عقلك بي شي .. مو صاحي .. روح شوف دكتور .. روح تعالج .. ولا اگلك الاحسن روح للعباس دخيلة وارگع راسك بشباجة .. بلكت ينطيك العقل .. مخبببل شنو هالتصرفات هاي ..

هو اني حجيت هيج لو هو وگف متخبل ..
راح قفل الباب واجة جرني من شعري واني اعيط ..
: ولج انة تگليلي مو صاحي .. هسة اشوفج الخبال شلونة ..

سحل بية الغرفة سحل وكطعني بالكتل ..
واني اتألم بصياح ..
ملخ شعري تملخ .. وراشديات على وجهي وخشمي گام ينزف وحلگي ..

كمت اعيط حتى يسمعوني ويجون يخلصوني منة ..
وفعلاً گامو يدگون بالباب وصياح عمي وخالتي وهادي : جبرااان افتح الباب ..

همة يصيحون وهو ولا عبالك ..
اني لامة رجلية لصدري وضامة راسي وهو يضرب بية بخبال ..
واسمع صياح خالتي : جبرررااان افتح الباب ..
وعمي يصيح : جبران منعول الوالدين افتح الباب لا اكسرة واكسر راسك وياه ..

كمت اعيط : فدوووة ساعدوني .. خالة تعالو وخرو عني ..
الضرب عالباب صار اقوى وصوت هادي يصيح : لك افتح الباب حيييوووااان مستقوي على مرة .. جبررران ..

جبران بصياح وسحب شعري : لحد يتدخل .. مالكم شغل .. مرتي وأدبهة بكيفي انتو معليكم ..
الباب گام يندفر قوي .. اكثر من مرة ..
لحد ما انكسر القفل ودخل هادي ووراه خالتي وعمي ..

هادي سحلة من ضهرة ووخرة عني وضربة بوكس بنص وجهة طيحة بالكاع ..
خالتي حضنتني وتمسح بالدم عن وجهي واني زدت بالبجي : مو گتلكم هذا مستجلب ويمد ايدة عليهة وانتو تگولون هو مو هيج ..

هو كام من ضربة هادي ولازم خشمة الي نزف دم ..
لزمة هادي من ياختة وعاط بي : انت هم حاسب روحك عالزلم .. تمد ايدك على مرة .. يا حيف هالشوارب البوجهك .. حاطهن بس شكل ..

رجع ضربة مرة ثانية وطاح كدام عمي ..
هو حاط ايدة على خشمة وحلگة الي كامن ينزفن من قوة ضربات هادي ..
رفع راسة لهادي وحجة بسخرية : والله طلعت عصبي حجي هادي ..

عمي دفرة بخاصرتة نومة بالكاع : حسسك ما اسمعة ابن الـ### .. ولك سودت وجهي .. شسوتلك وهيج تسودنت عليهة ..

جبران باوع بعصبية وعيونة تخزرني : وگفتو ضدي هسة مو .. هالحيوانة اتگلي مسودن وروح تعالج ..
انتي عطت : لانك فعلاً هيج .. انت متشوف نفسك شدتسوي بية .. تعاملني جني حيوان هنا .. هو اني بس سألتك شبيك رفستني بضهري ..

اجة يريد يهجم علية ..
بس هادي سحلة وطلعة برة : امشي ابن ال#### ..
عدلت گعدتي اني واباوع لخالتي صافنة وتبجي ..
اني ابجي لزمت ايدهة : خالة شبيج ؟

هي انتبهت الي وهزت راسهة : ما بية شي ..
گومي غسلي وجهج ..
گمت وگفت على طولي بس حسيت عبالك سجينة ودخلت بضهري : اااااااااه ..

كمزت خالتي : شبيج ؟ شجاج اسم الله ..
لزمت بطني وغمضت عيوني : بطننني .. اااه ..
راحت هي للباب تصيح : ولك هادي حضر السيارة خل اوديهة للمستشفى البنية مدري شبيهة ..

لبست عبايتي والالم يزيد علية ..
كمت ابجي بالزايد فوگ قهري الم بطني ..
خالتي تصيح وتسندني : دهر دهرني بس لا صار بيهة شي من وراك جبيير .. والله احرگ عشيرتك ..

نزلتني جوة ..
وهو واگف بالباب من شافني اجة علية بخوف : شبيج .. متأذية .. شيوجعج ..
اجة يلزم خدي وخالتي دفعت ايدة : دووووخر هسة صرت حنين .. هو كلة من وراك الصار بيهة ..

عمي سحبة ودفعة : دير بالك تقرب منهة بعد سمعت لو لا .. والله اموتك بيدي ..
طلعت وهادي فتحلنة الباب وخالتي وياي ..
حرك السيارة هادي واني الطريق كلة ابجي من الالم ..

اخذت بطل مي من هادي وغسلت وجهي وحطيت كلينس على خشمي لان ينزف دم ..
وصلنة للمستشفى ودخلنة للطوارئ ..
من كلتلهم بطني كالو روحي لدكتورة نسائية ..

هي دكتورة وحدة جانت موجودة نفسهة دكتورة مريم الي اجت عليهة ذاك اليوم من حللت عالحمل واني اجيت وياهة ..

اعتبروني حالة طوارئ ومباشرةً دخلوني عليهة ..
هي سوتلي سونار وتباوع بوجهي وعالاثار مال الضرب الطابعة بوجهي ..

هزت راسهة بعدم رضا : طفلج نازل ومهدد بالاسقاط .. ومبينة متعرضة للضرب والتعنيف ..
فتحت عيوني : شنو طفلج .. لا دكتورة اكيد انتي غلطانة .. اني قبل اسبوع الشهرية ..

قاطعتني : اعرف شتردين اتگولين .. اني ما غلطانة .. انتي مو اجيتيني قبل فترة وية زوجة الدكتور راسم ..
هزيت راسي ..: اي وبوقتهة هي گالت افحصي بلكي حامل .. وانتي من فحصتيني كلتي عندج كيس عالمبايض ..

هزت راسهة : بالضبط .. هالحجي قبل شهر تقريباً .. والكيس الي جان عالمبيض مالتج رقيق وما يمنع الحمل واني گتلج هالشي بيومهة ..
واانتي متوقعة قبل اسبوع الشهرية اجتج .. هذا الكيس وگع وانتي عبالج شهرية .. وشي طبيعي ..

خالتي تباوعلي وعاضة شفتهة بقهر ..
حجت بهمس : كسر بيدك جبران ..
الدكتورة سمعتهة : انتي امهة ..
خالتي : لا انة خالتهة وام رجلهة ..

الدكتورة : يعني الي ضاربهة ابنج ..
خالتي فتحت عيونهة : ها ..
الدكتورة : عيني ما يرادلهة احد يفهمهة مبينة رجلهة ضاربهة .. وهالشي ممكن يخليني اجيب الامن واكتب تقرير اعتداء عن طريق هالاثار .. والقانون ميقبل بهالشي ..

هزيت راسي : لا دكتورة الله يخليج .. خليني اروح .. والله تعبانة .. واصلاً ما ارجعلة بعد .. ما اريد مشاكل اكثر ..
تنهدت وما عاجبهة كلامي : براحتج .. عالعموم راح اكتبلج مثبتات .. ممنوع تتحركين .. الاكل لازم كلة فيتامينات وفواكه كثري منهة .. ممنوع يقترب منج زوجج .. فهمتي علية ..

هزيت راسي : ماشي .. شكراً دكتورة تعبناج ..
الدكتورة : واجبي هذا حبيبتي .. وديري بالج مثل ما گتلج الحركة ممنوع حتى من تمشين هسة امشي على كيفج .. حدج للحمام وبس .. بعد شهر وارجعي علية اشوف وضعج .. واذا صارلتج اي مضاعفات لا تسكتين وتعاي ..

هزيت راسي وطلعنة اني وخالتي وهي معصبة من جبران وساندتني ..
اجة هادي وسأل : ها يمة شنو المشكلة شبيهة ..
خالتي : يمة البنية حامل .. واخوج گاضي بيهة التربة .. وانت تصور شيصير بيهة .. والطفل مهدد بالاسقاط ..

جر نفس بعصبية : هالقليل الغيرة والله الا ادبة ..
حجتلة خالتي على توصيات الدكتورة هو اخذ الراجيتة مال العلاج وراح اشتراه من الصيدلية ..
طلعنة للسيارة وهو راح جاب عصاير برتقال وفواكه ..

كال تردين ترحين لاهلج ترتاحين كتلة لا امي اذا شافت حالتي يصير بيهة شي وهي اصلاً مريضة ..
وخالتي ايدت هالشي ..

كتلة بس هم ما ارجع للبيت وجبران موجود ..
كال اوديج لبيت مريم وخابرهة بدون ما يگللهة شي بس گاللهة رتبي فراش لبسمة راح تجي ضيفة يمج هي فرحت وقلقت بنفس الوقت ..

خالتي ساكتة ولا حجت ..
من وصلنة اني نزلت ..
هادي باوعلهة : يمة ما تنزلين وياهة ..
هزت راسهة : لا انة وديني للبيت احط جم غرض الهة بجنطة حتى تجيبهن الهة .. خاف تحتاجهن هنا ..

نزلت للبيت ومريم فتحت الباب ..
استقبلتني بقلق : شبيج بسومة والله خفت عليج من گال حضريلهة فراش .. صاير شي ؟؟

دخلت للبيت وحجيتلهة كلشي وهي عصبت وكامت تصيح وتغلط على جبران وخاصاً من شافت الاثار بجسمي ..
خلتني اتمدد من كتلهة على كلام الدكتورة ..
راحت سوتلي عصير برتقالة وانطتنياه ..

شوية ودخلن ديلارا وجيلان وبيدهن جنطة عرفتهة جنطتي ..

هادي //

وصلت بسمة لبيت راسم ورجعت امي للبيت ..
من دخلت هي التفتت علية بهدوء : اگلك عود روح لخواتك التوم اخذهن لبيت راسم ..
طبگت حواجبي : ليش ؟؟ شيسون ؟

نترت : هو شني الليش ؟ جا نسيت مريم هم حامل .. هي تريدلهة واحد يداريهة .. مو ادور هي تداري مرت اخوك .. روح اخذ اخواتك يرحن يمهن ويعاوننهن .. يلة لا تكثر حجي ..
بين ما تروحلهن انة احضر جنطة لمرت اخوك ..
من تروح مر اخذهة وياك ..

فعلاً كلامهة صحيح ..
رحت لبيت جدي ودخلت لاگاني ابوي هستوة يريد يطلع ..
سألني على بسمة واني كتلة الي صار ..
هز راسة بعصبية : والله لو صاير بالبت شي من وراه .. الا اجنزة ..

حجيتلة على قرار امي وگال : اي روح اخذ ديلارا الهن تساعد مريم ..
طبگت حواجبي : وجلاتينة ؟ هم تساعدهن خطية ..

عاصم : جلاتينة لا تهش ولا تنش .. كلشي ما تعرف تسوي .. المن ماخذهة .. عوفهة هنا احسن ..
هادي : يابة خطية تبقى بالبيت وحدهة شني .. وعالاقل تونسهن بسوالفهة الحلوة .. وتطلع بسمة من جوهة .. انت تعرف نفسيتهة شلونهة هسة ..

باوعلي بتفكير : اي ديلة يلة اخذهن وامشي .. لا تطول السالفة ..
ابتسمت ودخلت للبيت ..

سلمت على حبوبتي وعلى عمتي زمن ..
عمتي زمن كلش احترمهة واحبهة .. لان بصراحة اشوف بعيوني امي شگد ضلمتهة وضلمت مريم رغم ما شفنة منهة شي غير الخير .. حتى من زمان اتذكرهة قبل لا تروح .. لان جنت مو زغير وافتهم الزين وياي من المو زين ..

باوعتلهم وسألت بهدوء : وين البنات ؟ ديلارا وجيلان ..
حبوبتي : والله جويلة اليوم شايفتك وما شايفتهة .. ودلوو توهة جانت هنا .. مدري وين راحت .. اكيد بغرفتهة ..

هزيت راسي وطلبت الاذن من عمتي زمن ومن حبوبتي اخذهن وعمتي كيفت كالت خل تطلع جيلان تغير جو لان محبوسة مدري شبيهة ما تقبل تطلع من البيت ..

صعدت فوگ ..
اول غرفة كدامي غرفة جيلان ..
دگيت الباب بهدوء ..
اجة صوتهة : منو هالمؤدب هذا .. شهالازعاج ..

فتحت الباب وعيونهة مغمضة مبينة نايمة والتراك مالتهة مخربط ومعفس وشعرهة مگلوب مو نضامي ابد ..

فتحت تك عين مبين الضوة زاعجهة لان غرفتهة ضلمة ..
شافت وجهي : اوووو .. حجي هادي اليوم جاي لغرفتي .. امرني اغاتي .. رايد شي ..

فتحت عيوني جريتهة من فانيلتهة وهزيتهة وعدلتهة حتى تصحصح : هوووب .. صحصحي بابا جلاتينة .. شنو هالسوالف هاي .. اغاتي شنو .. تعدلي بابا شنو سوالف الولد هاي .. شبيج جنج وحدة سكرانة ..

هي صحصحت من هزيت راسهة وفتحت عيونهة : هادي شتريد ليش مگعدني من النوم ..
ابتسمت : بدلي ملابسج وتجهزي راح اخذج انتي وديلارا يم مريم تبقن جم يوم علمود بسمة ..

فركت عيونة وباوعتلي بتركيز : ليش شبيهة بسمة ؟
تنهدت : سوء تفاهم بينهة وبين جبران وتعاركو .. وهي حامل وما ردنة نوديهة لامهة لان تعبانة ما تكدر تدير بالهة عليهة .. ووديتهة يم مريم .. وهسة اريدج انتي وديلارا ترحن وتديرن بالجن على بسمة ومريم .. وصلت الفكرة ..

باوعتلي ثواني وهزت راسهة : انسسسى .. ماروح .. بابا ميقبل ..
رفعت اكتافي : ليش ميقبل ؟ هسة گتلة وگال اخذهن وروح ..
طبگت حواجبهة : كال جيلان تروح ؟
هزيت راسي : اي خصص ..

ابتسمت وهزت راسهة : اوكي .. ربع ساعة احضر روحي واغراضي واجي .. وانت روح سوي ازعاج على دلو ..
دخلت وطبگت الباب بوجهي ..
لا خوش احترامات .. هاي عود انة الجبير ..

رحت لغرفة ديلارا ودگيت الباب ..
هي فتحتة بأبتسامة : هادي .. هلا بيك حبيبي .. رايد شي ..
ابتسمت : تروحلج فدوة جلاتينة .. شلون ملگة .. مو ذيج اليگول داخل حارة سكارة ..

ضحكت هي : اعذرهة ترة من تنعس تگوم كلشي تحجي ..
حجيتلهة الموضوع وهي وافقت كالت ابدل واجي ..

نزلت انتضرهن جوة ..
ورة ربع ساعة نزلن ..
وديتهن لبيت راسم مشي ..

شوية وخابرت ريم وتخبلت من كتلهة مجتمعات ابيت راسم ..
گالت هسة تجيني .. شنو يبقن سوة واني هنا ..

رحت لبيتهم ومريت عليهة وجبتهة ..
وهي الطريق كلة تسوي الخاينات مجتمعات بدوني ..

باوعتلهة : ريمي حبيبتي ترة مو مجتمعات يتونسن .. التوم جبتهن يخدمن الحوامل .. يعني انتي حالج حالهن .. وبعدين مالازم تشتغلين .. نسيتي انتي بعد يومين للعقد ..

ابتسمت بقصد : حرم السيد والملازم رياض عجاج الــ....
وجهة صار احمر وابتسمت بخجل ..: يووو كافي اني صوجي احجي وياك .. تگلب السالفة گبل جنك حارث ..

ابتسمت ومادري ليش اجت ابالي ذيج البنية الي شفتهة بالمستشفى ..
كل ما اريد اسأل ريم ويروح من بالي ..
باوعتلهة : اگول ريمي ؟؟

هي مدنگة مدري شتدور بجنطتهة وما مركزة وياي ..
حجيت بدون مقدمات : بنات اخو هويدة حلوات لو لا ..

رفعت راسهة علية طابگة حواجبهة : نعععمممم ؟؟؟

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

الكاتبة : سارة الشمري🖤

مرحبا للكل .. شلونكم .. طمنوني عنكم وية هالاوضاع شلونكم ..
واسفة عالتأخير .. الواتباد مدري شبي وصارلي ساعة كل ما اريد انشر البارت يطلع وحدة من البرنامج .. مسحتة ورجعت دخلتة يلة ..

اتمنى حبيتو البارت .. لا تنسون صوتو وعلقو وكلشي ينداس دوسو ..