رواية بنات للزمن الفصل الخامس والثلاثون 35 - بقلم سارة الشمري

الكاتبة : سارة الشمري🖤

إنّ شمساً تشرق وتغرب دون أن تريني إياها، هي ليست شمساً.. وإنّ قمراً يسهر في كبد السماء دون أن يعكس صورتها.. هو ليس قمراً
وإنّ يوماً يمر.. دون أن أطمئن عليها.. هو ليس محسوباً من أيام حياتي..
منى المرشود,

براء //

من بعد ما كلت لحبوبتي وامي وعجبتهن الفكرة ..
وراهة بيومين صادف جمعة ..
حبوبتي كالت خابري ريم وكليلهة هالمرة اذا ما اجت ازعل عليهة صدك ..

خابرت ريم وكتلهة على كلام حبوبتي وهي اقتنعت ..
للساعة ٤ تقريباً اجت ريم وخالتي هويدة ..

حبوبتي اخذتهة بالاحضان وتبوس بيهة وتعتب عليهة ..
اباوع عماتي هويدة وام عامر هم يدرن بالسالفة ومتفقات ..

البنات كاعدات ويباوعن مستغربات ..
حبوبتي لازمة ريم ومكعدتهة يمهة ..
حنين : حبوبة افتهمنة انتي مشتاقة لريم .. بس عوفيهة تتنفس شوية ..

حبوبتي خزرتهة : مالج شغل انتي .. محد كالج احجي ..
حنين : يااا حبوبة شبيج .. يعني حتى البنية تريد تكعد ويانة .. شعدهة بكعدة العجايز ..

ريم فتحت عيونهة : حنيييين شنو هالكلام هذا ..
كامت حنين سحبت ريم من ايدهة : من رخصتج حبوبة بس سمعت ان ريم تسوي كهوة طيبة واريدهة تسويلي ..

سحبتهة وراحن للمطبخ ..
ورى دقايق دخل عمو رياض .. : السلام عليكم .. حي الله خواتي ..
كامن سلمن علي وهو كعد بصف حبوبتي ..

ابتسمن هنة ووحدة باوعت بوجه الثانية ..
باوعت لليلى صافنة صارلهة جم يوم على هالحال وكوة تطلع منهة الحجاية ..

عمو رياض باوعلهن : خير شعدجن توزعن ابتسامات .. اكو شي ؟
هويدة : لا ماكو شي .. يعني ما يصير نبتسم ..
هز راسة : عمي ابتسمو وانشالله دوم ..

دخلت حنين بيدهة صينية الفناجين : واجت الكهوة ..
رياض : اووو والله بوكتهة .. تعاي جيبي ..
مدت الصينية وهو اخذ كوب ..

قدمت للباقين ..
عمو رياض اول ما شربهة طبگ حواجبة ..
رجع شرب مرة ثانية ..
باوع لعمتي هويدة وحجة بأستغراب : ريم هنا ؟؟

فتحت عيوني : شمدرييييك ؟؟
رفع الكوب : كهوتهة مميزة .. بيها طعم خاص .. ولا يمكن انساه .. لان بعمري ما شربت هيج كهوة طيبة ..

ابتسمت وباوعت لحبوبتي ..
عمتي ام عامر : اي فديتهة شاطرة .. الله يحميهة من العين ..
باوعلنة وحجة وهو يشرب من الكهوة : احم .. هي وينهة ؟ شو ما شفتهة ..

حنين : سمعت بيك هنا وكالت البس حجابي واجي وراج ..
ثواني دخلت ريم ..
هو ابتسم من شافهة ..

ريم بأرتباك : احمم .. شلونك خالو ..
رياض : حي الله ريم .. اني بخير اذا انتي بخير .. عاشت ايدج عالكهوة ..
ريم تهرب نضراتهة : الف عافية ..

كعدت ريم بصف عمتي هويدة ..
بقو يسولفون واشوف عمو رياض كلساع يسترق النضر الهة ..
ريم ما باوعتلة حتى لان تسولف هي وحنين ..

شوية وكامت حنين : احنة نستأذن منهكم .. راح نكعد عالمرجوحة بالحديقة ..
سحبت ليلى وياهة : وانتي كومي لا ادوس ابطنج .. سويتيلي علة ..

طلعن البنات كلهن ..
اني بقيت كاعدة ..
حبوبتي باوعت لعمتي ام عامر : اي نجوى ما كتيلي شصار بسالفة ابنج ..

ام عامر : اي يمة حاطتهة ابالي .. واخلي كدام الامر الواقع .. كافي صار شكبرة لشوكت يضل اعزب ..

عمو رياض : اوكفي اوكفي شني السالفة .. شنو كدام الامر الواقع .. فهموني شنو الموضوع .. عامر كايلج اريد اتزوج ..

ام عامر : لا ما كال .. بس لشوكت يضل هيج .. اني قررت اخطبلة واخلي غصباً علي يوافق .. ابني الوحيد اريد افرح بي ..

باوعلهة بعصبية : شني هالسوالف هاي .. عامر مو زغير حتى تجبرينة .. صار رجال شكبرة .. هو من يريد يتزوج يجي يگلج اخطبيلي .. لا تحاجينة بالموضوع وتفتحين علي جروحة ..

حبوبتي نترت : خل يوولي انعل ابو لابو جروحة .. صارلة سنين ما نساهة لهالعلة هاي .. هاي انت حجيتهة صار رجال شكبرة .. شمتاني بعد ما يعرس .. راح اخطبلة واريدن اشوف شلون يمنعني ..

تنفس بصبر وعصبية وبيدة الكوب مال الكهوة : يمممة عامر يحب وحدة .. واذا هسة زوجتي وحدة ثانية معناها راح تضلمينهة وياه ..
هو ما يشوف وحدة غيرهة .. مادام يحبهة ما تحلى بعينة اي وحدة ..

ام عامر : والله لو عشرة من هاي ما يلحكن ريم .. وين يلكى احسن من ريما جمال واخلاق وادب ومتعلمة وتنسي عشيرة هاي ..

عمتي تحجي واني عيوني مركزة على عمو رياض ..
اتبع كل تفاصيلة ..
مقرب الكوب من حلكة يريد يشرب منة ..

بس كالت ريم وگفت ايدة وفتح عيونة الزرگ على وسعهن ..
مصدوم عبالك يريد يستوعب ..

رگع الكوب عالطاولة ووكف بعصبية : منو منو .. تخطبيلة منو ..
حبوبتي رفعت راسهة بقوة مبتسمة : جم ريمة نعرف .. هاي ريم ..

اشر على عمتي هويدة وحجة بعصبية : بتتتهة ؟؟
كلنة حجينة بصوت واحد : اييي ..
فرك وجهة بعصبية : يممة ما اريد ارفع صوتي بوجودج .. هاي السالفة شيليهة من راسج ..

التفت على عماتي : سمعتوووني .. ما اخليكم تزوجون عامر لريم وهو ما يريدهة ..
سكت شوية وبعدين حجة بنبرة عناد وباوع لعمتي هويدة : وما اخلي ريم تتزوج عامر لو تنطبگ السبع سماوات عالارض ..

عمتي ام عامر : شنو هالحجي هذا .. انت ما تقبل نزوج لعامر .. لو ما تقبل نزوج ريم ..

زمخ بعلو صوتة : ثنيييينهن .. ثنينهن انسوووهن ..
اذا ما سمعت عامر بأذني يگول اخطبولي ما اخليكم تزوجونة .. واذا كال اي بذاك الوقت اخطبولة من الشرق من الغرب .. عسى ما من المريخ .. بس ريم لا .. سمعتووني ريم لا ..

عمتي هويدة : وليش فهمني .. رياض انت متكدر تتدخل بهالموضوع .. اذا ريم وافقت انت بعد متكدر تحجي .. واني اليوم احاجيهة بالموضوع ..

ضرب رجلة بالكاع وباوعلهة بعناد وتحدي وعصبية : جربببي بعد اخوج .. جربي تفكرون تزوجون ريم .. والله اكلب عاليهة واطيهة وفنة اليوگف بوجهي ..

طلع من البيت .. واني طلعت وراه لان راح للحديقة ..
راد يطلع گبل بس من شاف البنات كاعدات راح عليهن ..

اختفت ضحكتهن من شافن وجهة ..
صار كدام ريم ورفع اصبعة بوجهة وحجة بغضب وراص سنونة : شايفة اذا فكرتي توافقين .. احش رجليج حش واكلب الدنيا والله .. سمعتيني ..

ريم تباوعلة مصدومة هي والبنات ..
حجت بتفاجئ : شنو .. خالو شكو ؟
نتر بوجهة : بلا خالو بلا بطيخ .. منين اجيتج خالج ..

فتحت عيوني وباوعتلة : عمووو ..
دار وجهة ومشى بعصبية طلع من البيت ..
البنات يباوعن بصدمة ..
ريم عيونهة مغورگة ..

حنين : هذا شمالة متسودن ..
ضربتهة على كتفهة : هوووب .. عمج هذا .. لساانج ..
حنين : اووهوو جا واذا عمي .. يجي يرزل ويطلع ..

ريم باوعتلنة : شمسوية اني .. ليش هيج معصب مني .. وعلى شنو اوافق .. خاف الكهوة بيهة شي ..
حنين : لا حبيبتي شفط نص الكوب وهو متلذذ .. الكهوة معليهة .. اكو شي گلبة لهالمزاجي الوحش العصبي ..

ليلى : ام الغيرة لسانج فالت زيادة اليوم .. لا يسمعج ..
حنين : وخل يسمع .. شنو يجي يرزل ريم ويطلع .. عبالكم اسكتلة ..

شهد رفعت حاجبهة : بيج خير جان حجيتيهة بوجهة ..
حنين : لا تدققين انتي الثانية ..
باوعتلي : وبعدين تعاي انتي مو جنتي موجودة .. شصار ليش هيج عصب ..

رفعت اكتافي بكذب : اني جنت فوك ما سمعت شي .. هسة يلة نزلت ..
عفتهن ودخلت للبيت ..
حبوبتي من شافتني فتحت ايديهة : تعاي لية .. تعاي احبج على هالعقل البراسج .. انة من زمان اكول هاي البت ذكيرة وترفع الراس ..

ابتسمت وكعدت يمهة وهي حضنتني وباستني ..
تنهدت بقهر : بس عمو رياض من طلع صيح على ريم وكاللهة كلام مو حلو .. خطية انقهرت هي ..

عمتي هويدة عدلت كعدتهة بقلق : شحجة وياهة .. خاف ضاجت لو زعلت ..
هزيت راسي : المشكلة فشلهة .. يكللهة منين اجيتج خالج .. والله عيب من البنية ..

عمتي ضربت على رجلهة : اوووف منك رياض .. دائماً هيج من يعصب ما يعرف شيگول .. امشي صيحيهة خل اشوف اذا ضايجة حتى نرجع للبيت ..

حبوبتي عصبت : سوود الله وجهك رويض .. شلون حاجي وية البت هيج ..

رياض //

طلعت من البيت فاقد اعصابي ..
شنو يخطبون ريم ..
وتروح من ايدي .. وتصير لغيري .. ولمنو ؟ لابن اختي ؟؟ والله اگلب الدنيا ..

احبهة اي والله احبهة ..
اريد اخطبهة بس مأجل الموضوع ..
بس لا هسة حجيهن صحاني .. ما اخليهة تروح من ايدي ..

توجهت للمعمل ..
ورحت لمكتب عامر ..
ردت ادخل وصار بوجهي واحد : ويين اخونا .. ترة هذا مكتب المدير .. خل اخذ اذنة ..

دفعتة ودخلت : اي مو داخل للبيت الابيض .. دووخر ..
باوعلي عامر : على كيفك عمي الباب مال العالم ..
اشر للرجال : روح ابو زيد هذا عمي رياض ..

طلع الرجال وسد الباب واني كعدت عالكرسي ..
هو يباوعلي : خير عمي بيك شي ؟
باوعتلة بعصبية : مابية شي .. لا تلح ..
طبگ حواجبة وحجة بهدوء : يمتة لحيت ؟؟

ما رديت علي وهو هز راسة : افتهمت .. معناهة اسكت .. وشوكت ما تريد انت تحجي ..
رجع لاوراقة يكمل شغلة ..

اني اهز برجلي واحوس ..
باوعتلة متردد بس لازم احجي : عامر انت بعدك قافل على موضوع الزواج ..

ذب اوراقة من ايدة وباوعلي : شنو سبب هذا السؤال ؟؟
هزيت راسي : لا يعني اسأل .. اكول شوكت الله ينطيك العقل وتفكر بأمك وتفرحنة بيك .. بس هيج يعني ..

ابتسم : والله فكرت بهالموضوع قبل فترة .. وكلت لازم اشوف حياتي بعد .. ليش انتضر اكثر من هيج .. كلت احاجي الوالدة تدورلي وحدة من يمهة .. بس ما صحت الفرصة .. اتزوج واصير عاقل على گولتك ..

فتحت عيوني ونترت : ترةة ابدد مو وكتك هسة تصير عاقل .. ابدددد .. توقيتك زفففت ..
طبگ حواجبة مستغرب : ليش ؟؟ صاير شي ؟

تأففت واهز برجلي بعصبية ..
باوعلي بقلق وحذر : ريااااض فهمني شنو الموضوع .. مو انت تلح علية حتى اتزوج .. شصار هسة ؟

نترت بعصبية : امك وحبوبتك يردن يخطبلك ريم ..
طبگ حواجبة مستغرب : ريم منو ؟؟
تأففت : لا تصير غبي .. ريم اخت حارث .. بت هويدة الجديدة ..

عامر : واني شمعرفني بريم مدري منو .. شايفني اسأل على اسامي بنات العالم .. وبعدين منو گاللهم اني اريد اخت حارث ..

ضربت على رجلي بعصبية : مخططات الهوانم .. امك تريد تحطك كدام الامر الواقع وتخطبهة الك .. وهويدة صافة وياهن ..

سكت شوية مبتسم وبعدين حجة : وانت شبيك عصبي .. اخسسس لا يكون حضرة الملازم واكع بالحب .. لالا يا حب .. الي يشوف شكلك ايگول هذا قيس مجنون ليلى .. داخل تدافع بالرجال ..

باوعتلة بخزرة : وكت ضحكك هسة ..
عامر بضحك : جا شسوي ؟ يعني انت جاي تگلي لا تتزوجهة لو شنو ..

اذا فعلاً جاي على هالشي ف معناهة مو انت رياض الي اعرفة الي ما يخاف من شي وياخذ الي يريدة غصباً عن كل احد .. شلون اذا جان يحبهة ..

رفعت راسي : ومنو كال جاي اخذ رأيك بالموضوع .. اجيت انطيك خبر عن الموضوع بس واكلك ريم الي ..

ضحك وطگ اصبع وكام يغني : وشايف خير ومهنة ويل كلهن تمننة وشايف خير ومهنة .. واخييراً راح تتزوج سيدنة ..

ابتسمت : بلة انت تفهمت .. بس حمام النسوان الي بالبيت شيقنعهن .. الله وكيلك مسويات اجتماع عبالك يردن يختارن رئيس الجمهورية ..

عامر ضحك : يختارن رئيس جمهورية بدون علم الشعب .. هذا ما نقبل بي ..
ابتسمت واني افكر لازم احاجي امي ..

رضوان //

كاعد ابيتنة .. راسي مسطور ..
منا امي تلح علية يمتة تتزوج بت خالك ..
ومنا تفكيري بديلارا الي حتى حارمتني شوفتهة ..

امي اجت يمي بعصبية : ليمتة تضل هيج ما تگلي ..
والله جاي اتفشل من خالك .. يومية يگلي عيب من الناس حاجين بيهة ولهسة ما اخذهة ..

نترت : جان لازم يفكر بهالشي قبل لا يفرضهة علية كدام العالم .. شلون تفكير هذا .. يدري بية مستحيل افكر اخذ بتة لهالسبب فشلني كدام العالم .. ولو بوكتهة مفشلة اني كدامهم ورافض بتة هواي اشرفلي .. بس كلت عيب هذا خالي ..

تباوعلي بعصبية : والله بعد صارت .. تاخذهة يعني تاخذهة .. ادري بيك حاط عينك على بت زمن .. بس ما اخليك تاخذهة .. سممعتتتني رضوان ما تاخذهة ..

رضوان : يممممة ليش كل همج بت اخوج واخوج .. واني شنييي .. والله اني ابنج مو هنة ترة خاف ما تدرين .. احبهة يمة افتهميهة عاد .. ماكدر اخذ غيرهة ..

ام راسم : وانة احجي لانك ابني واريدلك الزين .. هاي البت ما تفيدك .. نحححس هي واخواتهة على امهن طالعات .. فگكككككر يمة فگر .. ولدي ذولاك راحو مني من ورة بتهة .. وهسة تريد اخليك تاخذ بتهة الثانية ..

نترت بعصبية : يممممة هاي الخرافات شيليهة من راسج رحمة للعباس .. ادري ماكو غير نعمة تسولفهن عليج وانتي مصدگتهن ..

ضياء مات وهذا يومة الي مكتوبلة يموت بي من يوم الي انولد للدنيا .. ان جان تزوج مريم او لا .. وراسم شبي .. الله وكيلج بعمري ما شايفة مرتاح من قبل كد ما هسة اشوفة مرتاح ووجهة فرحان .. شتردين منهم بعد .. خليني اني هم ارتاح ..

باوعتلي بعناد : راحتك يم هيام .. ما تلگى مثلهة .. والله تشيلك بالصلوات .. شبيهة وما تريدهة ..
ضربت رجلي بالكاع بعصبية : يمممة افتهميييني ماااحبهة .. هم حاسبتهة مرة علية .. زعطووط حتى سوالفهة طايشة وما تعرف شتحجي ..

هزت راسهة : تاخذهة يعني تاخذهة .. اني اريد التشيلني بكبرتي وماكو احن من بت اخوي علية .. هاي لان فقيرة ما تريدهة .. تريد هذيج المفصخة الطويلة .. امهااات السحوورة ..

ردت احجي بس اباوعلهة لزمت راسهة وطاحت بالكاع ..
ركضتلهة احاجيهة ما ترد بس تون ..
رحت بسرعة جبت عبايتهة ..
سندتهة وطلعتهة للسيارة ..

اخذتهة للمستشفى وگبل للطوارئ ..
طلع ضغطهة مرتفع وشوية عن الجلطة ..
انطوهة ادوية وهي ما تباوعلي حتى وضايجة مني ..

وصلنة للبيت وهي كالت : خابرلي على مرت خالك خليهة توديلي البنات يساعدني انة ماكدر اسوي شي ..
تنهدت : يممة اني موجود عليمن تودين عالعالم ..

خزرتني : ماريد منك شي .. العالم ارحم علية منك .. خابر يلة ..
طلعت تليفوني واتصلت على مرت خالي وكتلهة الوالدة ضغطهة مرتفع وتعبانة بلكت تودين البنات يساعدنهة ..

شو هاي بس كتلهة هيج كالت يمة سودة علية صدك جذب كلنة جايين يمهة ..
تأفف بكلبي ساعة السودة ..

كتلهة يمة راح يجون .. انتضر لحد ما يجن حتى اطلع ..
خابرت راسم وكتلة .. كال هسة جاي اتطمن عليهة ..

ورة شوية سمعت صوت الباب رحت فتحتة طلعت مرت خالي وبناتهة ٣ ومن ضمنهن هيام ..
سلمن ودخلن ..

ورة شوية اجة راسم كال اريد اشوفهة ..
من دخل وامي تعتب علي وليش ما تمر علية وهو اصلاً كل يومين يجي يشوفهة ..

ورة ساعة تقريباً مشى راسم ..
اني صعدت لغرفتي اريد ابدل حتى اطلع ..

دخلت واشوف هيام واكفة يم راس الجرباية ..
من شافتني گمزت ..
طبگت حواجبي : شتسوين هنا ؟؟
احوالهة انخبصت خوف وارتباك وترجف : ها .. خالتي كالت روحي نضفي غرفتة ..

باوعت للغرفة : وشبيهة الغرفة وتنضفينهة .. ما يحتاج تنضيف .. روحي .. وبعد ممنوع توصلين لغرفتي .. ماحب احد يدخل لغرفتي ويلزم اغراضي ..

هزت راسهة وطلعت تركض من الغرفة ..
رحت لمكان ما هي جانت واكفة واباوع ..
شعدهة جاية هنا .. امي تدري بية ماحب احد يدخل لغرفتي ما معقولة هي كالتلهة روحي نضفيهة ..

دخلت للحمام سبحت وطلعت بدلت ملابسي ..
نزلت جوة ..
صارت بوجهي بت خالي اخت هيام اكبر منهة ومخطوبة لابن عمهة ..

زينب : رضوان اريد احجي وياك بموضوع ..
طبگت حواجبي : زينب مو هسة .. مشغول .. غير مرة .. ولا اكلج من ارجع انشالله ..
زينب هزت راسهة بهدوء : ماشي بس الموضوع مهم ..

طلعت من البيت واني ما اطيق اشوفهن ..
شلون حالة هاي يربي ..
رحت للمعمل لگيت حارث موجود كعدت يمة ..

شوية ودخل عباس ..
كمت سلمت علي : اووو وينك يااخي من عرس جبران بعد ما شفناك .. شهالغيبة هاي ..

هز راسة : انشغلت خوية .. اعذرني مو بيدي ..
كعد يمنة وحارث يباوعلة طابگ حواجبة معصب : مشغول وحتى عالتليفون ما تجاوب ..

عباس تنهد بقلة صبر : حااارث والله كتلك مشغول .. شبيك مطنگر علية ..
حارث : ولك اسبوع اخابر عليك ما تجاوب .. مرة وحدة جاوبتني وحتى دقايق ما طولت تكلي بعدين احاجيك .. ما تكلي شجاك ..

عباس فرك وجهة : حارث لا تخليني اتندم على جيتي .. انة صوجي كلت مشتاگلة واروحن اشوفة ..

اندك الباب ودخل عامر بأبتسامة : السلام عليكم .. اوو عباس هنا .. يالبذات وينك مشتاقيلك ..
عباس كام سلم علي واباوعلة متوتر ..
حارث جاوبة : عوفة عوفة صاير مدري شلونة .. حتى عالتليفون ما يرد .. گالب علينة وهسة يصيح ..

تنهد عباس ووگف : انة اترخص .. اجيت اشوفكم وامشي ..
طلع من الغرفة وحارث طلع وراه يركض ..
علاقة حارث وعباس اكثر من صداقة .. وهسة من صيح علي لان مشتاقلة ومعصب منة ..

رجعت للبيت من صارت الساعة ٧ ..
دخلت وردت اصعد مباشرةً لغرفتي ..
بس تراجعت ورحت لغرفة امي ..
همزين ماشين بيت خالي ..

دخلت كعدت يمهة .. : شلون صرتي يمة ..
باوعتلي بطرف عينهة : مالك شغل ..
كمت عدلت المخاد ورة ضهرهة : شلون مالي شغل .. غير انتي امي شعندي غيرج .. اريدج مرتاحة ..

عوجت حلكهة : اني راحتي تعرفهة زين .. ما ارتاح الا تجيب هيام عروس لهذا البيت ..
تأففت بگلبي : يمة ارتاحي هسة انتي .. الله كريم ..

كمت اريد اطلع بس رجعت التفتت عليهة : صدك يمة انتي مو تدرين بية ما احب احد يدخل لغرفتي ويلعب بأغراضي ويلمسهن ..

باوعتلي : وياهو الطاب غرفتك ؟
رضوان : هيام .. اليوم دخلت لغرفتي لكيتهة يم فراشي .. وسألتهة شعندج هنا كالت عمتي كالت روحي نضفيهة ..

الكاتبة : سارة الشمري🖤
مرحبا للكل .. اتمنى حبيتو البارت .. ولا تركزون عالاخطاء لان والله كتبتة بسرعة ..

احبكمم .. ولا تنسون صوتو وعلقو وكلشي ينداس دوسو ..