رواية بنات للزمن الفصل الرابع والثلاثون 34 - بقلم سارة الشمري

الي استفرغتة مريم مو طبيعي ..
تذب من حلكهة شي اسود ومو شوية ..
جسمي كلة كام يرجف وهي لازمة بلعومهة جنهة مختنگة وتكع ومستمرة تذب الي بمعدتهة ..

اخر شي شهكت ووكفت ..
لزمت بطنهة .. ووجهة كلب احمر ..
بسمة فتحت المي وتغسل بوجهة ولازمتهة لا تطيح ..

دخلت ديلارا تركض شهكت من شافت المنضر : شنووو هذا ..
بسمة : تعاي طلعيهة ويانة عوفي السوالف .. اكيد ماكلة شي لهالسبب هذا لونة ..
هزيت راسي : لا هي اليوم ما حطت شي بحلگهة ..

اخذناهة طلعناهة برة ..
ديلارا لازمتهة من اكتافهة ..
باوعتلهة : خابرتي راسم ..
ديلارا : اي كال جايين شوية عن البيت ..

طلعناهة من الغرفة حتى بس يجون ياخذونهة للمستشفى ..
وصلناهة يم الدرج .. وهي ترجف من راسهة لرجليهة .. جسمهة صار ثلج .. وتتنفس بسرعة ولازمة بطنهة ..

شفت امي تصعد الدرج عالسريع وخايفة ..
لزمتهة ودموعهة طاحت وحجت بخوف ورجفة : شبيهة .. ليش ترجف ..
مريم رفعت عيونهة الهة ..

امي لزمت وجهة وتمسح بدموعهة وشفايفه ترجف بخوف : شبيج ماما .. شيوجعج حبيبتي ..
مريم باوعتلهة وشهكت ببجي وحجت بألم : بطنني تأذيني .. ماما احس راح اموت ..

حضنتهة امي لصدرهة وتمسح على شعرهة : ششش .. ما يصير بيج شي .. هسة ياخذونج للطبيب وميبقى شي بيج .. ما اخليج تعوفيني والله اموت وراج ..

اباوعلهن ودموعي تنزل ..
امي منهارة بس خايفة على مريم لان جاي ترجف ..
كعدت مريم بالكاع وامي حاضنتهة ومريم ترجف وانفاسهة عالية ..

سمعت صوت راسم من برة ..
دخل يركض مثل المجنون ويلهث ويصيح وينهة ..
باوعت لمريم وفتحت عيوني واني اشوف صوت انفاسهة العالي يقل ..

ايدهة الحاضنة امي ارتخت ووكعت بالكاع ..
غمضت عيونهة وثقل جسمهة وامي عاطت : مريييم .. ماما فتحي عيونج ..

راسم سمع صوت امي واجة يركض سوة الدرج ٣ خطوات ..
كعد بالكاع ويلهث وسحب مريم لحضنة ويضرب على خدهة بخوف : مريومة حبيبي فتحي عيونج .. مريومتي حاجيني ..

امي عاطت بي : شمنتضر كوم وديهة للمستشفى ..
رفع راسة الهة وارتخت حواجبة وشالهة بين ايدي : ما يحتاج مستشفى .. اني هنا ..

صعدهة للطابق الفوك مالتهم واحنة وراه ..
امي تبجي واني امشي وراه واحجي : راسم ترة استفرغت شي اسود ومو شوية وحيل تأذت .. لازم تاخذهة للمستشفى خاف متسممة .. راسم اوگف ..

احجي وياه وهو ولا عبالك يسمعني ..
دخلهة للغرفة وحطهة عالجرباية ..
امي اجت يمهة من الجهة الثانية وراسم باوعلنة : جيبن مي ..

رحت جبت مي واجيت ركض ..
فتحت البطل وذبيت منة على ايدة مثل ما كال ..
رشة بخفة على وجهة وغسلة وهي شهكت وفتحت عيونهة عالنص ورجعت تتنفس بسرعة وترجف ..

راسم //

جنت بالعيادة وطالعة روحي ..
مريم صارلهة اسبوع ما ترضى تشوفني ..
شلون مديت ايدي عليهة .. اذيتهة وطلع دم من حلكهة .. كل ما اتذكر احس روحي تريد تطلع ..

گمت بسرعة وسحبت الجاكيت مالتي ..
ماكدر بعد ما بيهة مجال لازم اعتذر منهة وهي تسمعني ..
الليل ما انامة وهي مو يمي .. تعودت على عطرهة وحضنهة ..

رجعت للبيت ..
اول ما دخلت من الباب شفت عمال يشتغلون ..
واحد منهم من شافني اجة علية : شلونك دكتور ..
سلمت علي ورجع مدلي علاگة ..
طبگت حواجبي : شنو هاي ؟

العامل : واحنة جاي نشتغل بالحديقة .. ابو هادي كال غيرو اغلفية البلوعات الموصلة بالصحيات ..
واكو وحدة صايرة ورة البيت مبينة قديمة صارلهة اسنين .. ومنتهية بحيث بس حركناهة انكسر الغطا مالتهة بالنص ..

ردنا انضفهة ومن فتحناهة لگينة هاي العلاگة بيهة .. مشدودة بوصلة (قماش) ومعلگة بنص البلوعة ..

ف گلت انطيهة لواحد منكم وانتو اعلم بعد ..

كلبتهة بطرف اصابعي جانت ريحتهة كريهة ..
باوعتلة : ذبوهة بالزبالة اكيد وصخ ..
سكت ورجع حجة : دكتور والله اني اگول تفتحونهة وتعرفون شبيهة .. اني ماريد اسويلكم مشاكل بس اني سامع بهواي هيج شغلات تصير ..

طبگت حواجبي : شغلات شنو .. ما افتهمت ..
العامل : قصدي سحر .. يعني المكان الجانت موجودة بي والطريقة المشدودة بيهة تدل على هالشي ..

ما فتحتهة والله خفت .. كلت انتو افتحوهة .. ويمكن اذا فتحتوهة ينفك السحر .. بعد بكيفك دكتور .. اني اترخص ..

تشكرت منة وهو راح ..
باوعت للعلاگة طابگ حواجبي .. معقولة كلامة صحيح .. شلون اتأكد ..

سمعت صوت حارث طلع من المطبخ : ها دكتورنا .. شعندك واگف هنا ..
رفعت العلاگة الزغيرة السودة الملفوفة لف ..
هو سد خشمة بأصابعة : ييووبووي شني هالريحة .. وخرهة من يم خشمي جنهة فطيسة ميتة ..

رفعت حواجبي : راسم تعرف واحد سيد او شيخ يفك سحر وهالسوالف ..
فتح عيونة وباوع للعلاگة : تقصد هذا البيدك سحر ؟؟ ذبة ذبة راسم لا يگلب عليك ..

تأففت : حااارث هو شنو جني ويگلب علية .. وحتى يمكن مو سحر .. العامل لگاهة بالبلوعة واكو بيهة شي وكال خاف سحر لان شايف هيج شغلات .. هسة ما تعرفلك واحد يفهم بهالسوالف ..

حك راسة بتفكير : ماكو غير رياض يحلهة .. هو عمامة كلهم سادة وواحد منهم يعالج بالقرءان اكيد يفهم ..
طلع تليفونة وخابرة كالة مر علية للمركز واخذكم نروحلة سوة ..

صعدت سيارتي ولفيت هاي العلاكة بعلاكة ثانية ..
حارث حاط الكلنس على خشمة ..
وصلنة للمركز الي يشتغل بي رياض ..
هو طلع علينة وصعد بسيارتة واحنة وراه ..

وصلنة لبيت ابن عم رياض .. نفسة الي كال علي حارث ..
نزل رياض كدامنة ودك الباب ..
طلعلنة رجال جبير بالعمر نوعاً ما ..

بس شاف رياض سلم علي ..
رياض دنك باس ايدة : شلونك ابو داوود ..
ابو داوود ابتسم وسحب ايدة : والله نعمة من الله ..
باوعلنة : ما عرفتنة عالسباع ..

رياض : هذولة ربعي واخوتي دكتور راسم .. وحارث ابن نسيبنة .. وجايين عليك بشغلة ..
فتحلنة الباب : حي الله الشباب .. تفضلو تفضلوا نحجي جوة .. الجو بارد ..

سلمنة علي ودخلنة للبيت والعلاگة بيدي ..
من بعد السلام ..
باوعلنة : امروني بوية ابيش اخدمكم ..

مديت العلاكة : خادم ربك عمي .. هاي العلاكة السودة لگوهة العمال معلگة بالبلوعة الخارجية مال البيت صارلهة سنين ما مفتوحة .. احنة ما فتحناهة وشاكين تكون شي مو زين ..

اخذهة من ايدي : قصدك سحر .. هسة افتحهة واشوف ..
حطهة عالطبلة .. وفتح العلاكة ..
تقربنة تلاثتنة نباوع بأهتمام وترقب ..

جاب علاگة ولف بيهة ايدة حتى ما يلزمة بيدة ..
اسمعة يصلي عالنبي ويقرة ايات قرءانية بصوت مسموع ..
فتح العلاكة وطلع الي بيهة ..

فتحت عيوني من الشكل ..
خيوط مشددة على ورقة مبينة قديمة من اوراق قبل لونهة بيجي ..
طبگ حواجبة : هذا سحر .. ومبين سحر قوي .. ولاكثر من شخص لان اكثر من خيط ..

باوعت علي واني كلي صدمة ..
ابتسملي يطمني : بس لا تخاف بأيات الله وكلامة كلشي ينفك ..
كاف يقرة ايات قرءانية ويفك بالخيوط الي عالورقة واحد ورة الثاني ..

فتحهن بدون ما يكطع ولا واحد بيهن ..
الوانهن سود ومهتريات ..
فتح الورقة وطبگ حواجبة ..: مكتوب اسامي بيهة .. هذولة الاشخاص الي مسوالهم السحر ..

رياض وكف : اني انتضركم برة .. اخذو راحتكم ..
ابتسمت على تفهمة وهزيت راسي ..
طلع رياض واني التفتت عالسيد : شنو الاسماء ..

قربهن من وجهة : الاسامي تقريباً ممسوحة بس مبينات شوية ..

حط الورقة عالطاولة واباوعلهة اسهم واحد عكس اتجاه الثاني مثل المتنافرات .. وكلمات ممفهومة لان نصة ممسوح لان قديم ..

دار الورقة علية : حاول تقرة هذا الاسم يمكن تعرفة ..
قربت من الورقة وصغرت عيوني احاول اوضح الكتابة .. فتحت عيوني : عاصم ابن شهلة ..

حارث دنك بسرعة يقراهة وياي ..
السيد فر الورقة عالاتجاه المعاكس : وهذا الاسم الثاني ..
حارث قرا الاسم : زمن بنت نوال ..

تنهدت وفركت وجهي .. يعني منو ممكن يسوي غيرهة ..
السيد : هذا اخر اسم .. مبين هذا اكثر واحد بيهن ..
حارث قرا وباوعلي : مريم بنت زمن ..

فتحت عيوني وسحبت الورقة واقرا الاسم ..
فعلاً جان اسمهة مكتوب عالسهم ..
تلث اسهم متنافرات وكل واحد رايح بأتجاه ومكتوب يمهن كلمات ممفهومة ..

السيد : لا تخاف بوية .. شوف هذني تلاث خيوط جانت مشدودة .. وفكيتهن هسة .. انشالله انفك وكلشي ما بقى .. بس اقرو ايات قرءانية وشغلو قرءان بالبيت .. وانشالله ما ضل شي ..

كام وجاب جداحة ..
حط الورقة والخيوط وحركهن : السحر لو اي شي بس تجيسة النار يبطل مفعولة ..
باوعتلة بقلق : زين دكتور ماكو خطر عليهم هسة ..

تنهد : شوف بوية .. هواي عالم اجتني هم مثلك وخايفين ..
السحر يسوونة بهواي طرق .. اكو عن طريق قطعة من ملابس الشخص .. واكو عن طريق واكو بيهم يحطونة وية الاكل لو يتشرب للشخص ..

السحر الي يتشرب للشخص هذا ممكن يأذي ..
يعني هسة احنة فكينة السحر .. بس شلون نتأكد .. تشوف هذا الشخص راح يبدي يطلع من جسمة السحر واكيد يتأذة ..

الافضل تكونون بجانبة هسة .. بس لا تخافون ماكو شي يدعي للقلق .. مجرد يطلع من جسمة هالشي معناه السحر بطل وانتهى ..
كمت بسرعة سلمت عالسيد واستأذنت منة وتشكرتة ..

طلعت بسرعة وصعدت بسيارتي وسيد رياض رجع لشغلة ..
اسوق مثل المخبل ..
حارث : بس على كيفك راسم .. كالك يمكن تكون شاربتة يعني مو اكيد ..

ضربت عالستيرن : ماكو غييرهة .. نعمة هي المسويتة .. والله اذا صار بمريم شي احرك البيت عليهة ..
دك تليفوني رفعتة : الو ..

ديلارا : راسم فدوة الحك لمريم .. بطنهة توجعهة وتبجي مادري شبيهة .. تعال وديهة للمستشفى فدوة بسرعة ..

زودت سرعتي : جايين جايين .. وصلنة قريب البيت ..
سديت التليفون وباوعت لحارث : شفففت ..
حارث : يابة على كيفك .. شبيك ما سمعت السيد كال لا تقلق .. اكيد هذا السحر جاي يطلع من جسمهة ..

وصلنة للبيت ونزلت بسرعة واركض ..
بس دخلت واسمع صوت زمن عاطت : مريييم ..
تخبلت بالزايد ورحت اركض ..

شلتهة واخذتهة للغرفة اريدهة تكعد ماكو ..
لمن غسلت وجهة يلة فتحت عيونهة ..
تشهك وجسمهة يجرف كلة ..
اتنفس وياهة شهيق وزفير حتى تهدئ : على كيفج على كيفج .. تنفسي بهدوء ..

اخر شي كامت تبجي وامهة لازمتهة من الجهة الثانية وتبجي وياهة ..
تباوعلي بنضرات خوف وما تحجي بس تبجي ..
فهمت نضرتهة وجاوبتهة : ما بيج شي يروحي والله ما بيج شي .. هسة ترتاحين ..

حطيت ايدي على كصتهة وخدودهة حرارتهة مرتفعة ..
اشرت لجيلان : جيبي كلاص مي وحباية بندول ..
راحت تركض جابتهن واجت ..
شربتهن الهة وهي وخرت راسهة من حضني وحطتة عالمخدة ..

زمن تمسح على شعرهة وتباوعلهة بقلق ..
هي رفعتلهة عيونهة ورجعن غورگن ..
اباوعلهة شفايفهة تقوست وارتجفت : ماما ..

حضنتهة زمن وكامت تبجي : يا عمري لا تبجين .. مابيج شي ..
تمسكت بيهة مريم وحضنتهة : ابقي يمي ..
زمن حاضنتهة وتشم بيهة : يمج اني حبيبتي لا تخافين ..

تنهدت وگمت بهدوء ..
شأكول عليج نعمة ..
طلعت من الغرفة ونزلت جوة واني ناوي اهد عليهة ..