رواية بنات للزمن الفصل الرابع والخمسون 54 - بقلم سارة الشمري

بنات للزمن ..
البارت الثاني والخمسون ...

الكاتبة : سارة الشمري🕊

تدري أنت شكثر بيك أنّي محظوظ
وأحسّ بختي كعد لمن لكيتك
وإذا فكّرت أعوفك وأنسى ذكراك
ياخذني الكلب كوّة على بيتك
كالو صعب دربه يتعبك هواي
ورغم هذا التّعب كله اعتنيتك

(صوتو وعلقو عالفقرات حبايبي احبببكم )

حارث))
طبگت حواجبهة منزعجة .. رجعت مررت اصابعي على رگبتهة وهي فتحت عيونهة بالگوة ..
باوعتلي بعيون منعسة .. بستهة بخدهة حيل : صباحية مباركة مشمشتي ..

ابتسمت بنعاس : صباح الخير ..
مديت ايدي بخصلات شعرهة : اكو احلا من هالخير .. واحد يصبح بهالمنضر ويبدي يومة بي ..

رفعت راسهة جرت الروب الاحمر ولبستة فوگ السيت ..
باوعتلي بخجل : ابيش الساعة ؟؟
ابتسمت ب١٠ ونص ..
شهگت : جذذذب .. ليش ما گعدتني ؟

رفعت حاجبي : تعبانين .. ولو ما مخابرني هادي وگال تحضرو خاف نطلع حتى ترجعون للبيت .. گتلة انتو روحو احنة شوية ونروح ..
همة نشطين ماشالله كعدو من الصبح .. اني الليل كلة ما نمت .. وين انام وهالزبد هذا كدامي ..

جيلان))
خجلت من كلامة وگمت سويت نفسي عصبية : كلة من وراك ما شفت دلو قبل لا تروح .. هسة شيصير لو مگعدني ..

رفع حاجب : ما شبعتي من دلو .. اني الصار ٤ اشهر ما سامعة صوتي حتى وما مهتمة .. وتهمين بدلو هسة ..
ابتسمت وتقربت منة : لا حبيبي .. انت الروح والنفس البية .. شلون ما اهتم ..

بستة بخدة بسرعة ووخرت اروح للحمام : راح اسبح بين ما تدز على ريوك ترة ميتة من الجوع ..
دخلت وقفلت الباب واسمعة يصيح : انة هم ميت من الجوع ..

سبحت وطلعت بالبرنص ..
هو باوعلي وحك راسة : ما تخلينة اليوم هم نبقى بالفندق .. شعدنة مستعجلين عالازعاج ..
طبگت حواجبي : لا عيب من العالم يشگولون .. اكيد يجون يباركون النة ..

تنهد : ديلة يلة تريگي حتى نطلع .. امج حرگت التليفون علية .. اتگول هذولة اجو من ٩ وانتو بعدكم خاف بيهة شي ..
ابتسمت وگعدت اتريگ وهو وياي ..

هو نزل يخلص اوراق الفتدق حتى نطلع ..
من خلصت .. شسورت شعري بدلت ملابسي وطلعت القفطان الي حاطتة الي ماما لونة ابيض حتى من اروح لبيت جدو اكون لابستة ..

حطيت مكياج خفيف وسحبت ايلاينر وحطيت حمرة بلون احمر ..
رشيت عطر (sweet) .. ولبست ذهبي ..

دخل حارث من شافني ابتسم ..: اقري المعوذات بوية لا تنحسدين من اول يوم ..
ضحكت ولفيت شالي ..
رحت لبست العباية وطلعت الجنطة مالتي وهو نزلهة ..

نزلنة سوة ورجعنة للبيت وهو بالطريق مشغل (شمسين)
يغني وياهة ولازم ايدي ..

لا تسولف علينة من يسألووون ..
عيون الناس لا تحسد عشگناا ..
واذا طلعت شمس فوت انت للبيت ..
لان شمسين معناها احترگنا ..

من احضنك احضن الدنيا بيديا ..
حبيبي وغالية عيونك علية ..
بسرعة الوكت صاير يخلص وياك ..
هوى انت واذا رحت اختنگنا ..

مبتسمة واحس الدنيا كلهة فرحانة وياي مو بس اني وهو ..
وصلنة للبيت .. دخلنة وحبوبتي استقبلتنا بالهلاهل والهوسات ..

هو شابك اصابعة بأصابعي .. سلم على حبوبتي وامي وخالتي هويدة والبنات وبعدين طلع ..
دخلت للصالة لگيت حنين وديلارا موجودات .. ونسوان هم جايات يتباركن ..
استحيت لان احنة اجينة متأخرين ..

سلمت وگعدت يم البنات من بعد ما ذبيت شالي وعدلت شعري ..
اجن ريم وبسمة گعدن يمي لزك وحدة يمنة ووحدة يسرة ويبسبسن : شعدكم تأخرتو .. شو ذولة اجو قبلكم ..

جيلان : مو راحت علينة نومة ..
بسمة ضربتني بعكسهة : ليش لازم الليل كلة سهرانين ..
ريم سدت اذاناتهة : بعدني ما متزوجة لا تزفتن اخلاقي ..
ضحكت : اسبوع وتتزوجين .. عادي مو هواي ..

گامت نعمة وام راسم سوة ..
نعمة لبست حنين گلادة حلوة نازگة وشوي زغيرة على شكل فراشة : بالعافية حبيبتي عمة .. هاي صباحيتج ..

ام راسم هم طلعت گلادة تقريباً نفس حجم كلادة حنين .. بس شكلهة نجمتين ملتصقات هم حلوة ..
لبستهة لديلارا وباستهة بگصتها : تتهنون حبيبتي ..

ابتسمت بهدوء .. باوعت لريم عيونهة مغورگة وشفتهة تهتز ..
لزمت ايدهة وضغطت عليهة وهي باوعتلي ونزلت دمعة من عينهة ..

رادت تگوم بس گامت خالة هويدة وبيدهة صندوگ زغير ..
حجت بأبتسامة وحبوبتي مبتسمة تباوعلهة : هذا الصندوگ بي هدية من ام حارث الله يرحمهة .. ووصت عمتي الحجية ان تكون لزوجة حارث .. وبما ان اني اعتبر نفسي مثل ام لحارث .. ف هاي مهمتي بعد ..

فتحت الصندوگ وطلعت منة گلادة قليل ما يقال عنهة تخبل .. اني ما احب الذهب الكبار .. بس هاي الگلادة جبيرة وبنفس الوقت نازكة وحلوة .. شذرتهة الزرگة التلمع وقاعدتهة ذهبية ..

ابتسمتلهة ودنگت لبستهة الي .. باستني براسي ورجعت گعدت ..
ريم همستلي : جيلان هاي گلادة ماما .. بيبي جابتهة الهة من ولدت حارث .. وهي ضمتهة وبقت محتفضة بيهة لمرت حارث .. وهسة صارت من نصيبج ..

هزيت راسي بأبتسامة ..

بسمة ))
گمت من يمهن ودخلت للمطبخ ..
دگ تليفوني رقم جبران ..
رديت علي وهو حجة : حبيبي تعاي للبيت اريد احاجيج ..

بسمة : تمام جاية ..
سديت التليفون وحطيت شال على راسي ورحت لبيتنة ..
صعدت فوگ ودخلت للغرفة شفتة واگف يم المراية ..
فكيت شالي : ها عيني .. رايد شي ؟

ابتسم واجة علية سحبني من ايدية ووگفني گدامة ..
ابتسمتلة واباوعلة بتساؤل ..
سحب ضرف ابيض من المراية ومدة الي ..
طبگت حواجبي : شنو هاي ؟؟

فتحتهة وطلعت الورقة الي بنصهة واني اباوعلهة : هاي شنو .. تحاليل مال شنو ..
ابتسم وعيونة لمعت : قبل يومين سويت تحليل حتى اشوف شگد النسبة الباقية بجسمي من الكحول والكوكائين ..

هزيت راسي بسرعة : ايي شنو ..
تنهد : بسومتي جسمي سليم من الكحول هسة .. مابية شي .. مو مدمن بعد اني .. حتى صرت ماريدة ..

نزلت دموعي واباوع بعيونة ..
حضنتة حيل واردد : الحمدالله ياربي .. الف الحمدالله ..
حاطني بايديناتة ونزلت دمعة من عينة : كلة بفضلج من بعد الله .. انتي لو ماباقية وياي جا ما عفتة لو اموت ..

مسح دموعي بأصابعة وباس گصتي ..
گمزت من حسيت بحركة ببطني ..
باوعلي بقلق : شبيج ..
ابتسمت : جاي يتحرك .. شوف تحرك مرة ثانية ..

باوعلي بلهفة : وين ؟
ثنى على ركبة يم بطني .. حطيت ايدة على جهة بطني صفح : هنا شوف هسة يتحرك ..
من تحرك هو فتح عيونة وباوعلي : تحرك والله شفتتيي ..

هزيت راسي وعيوني مدمعة : ايي حبيبي احس بي ..
باس بطني ورجع وگف حاوط وجهي بإيديناتة : الله لا يحرمني منج ولا من شوفتج .. انتي شمعة ونورت دنيتي بوجودهة .. بدونج مادري شلون جانت راح تصير حياتي ..

حطيت راسي على صدرة وغمضت عيوني : ولا يحرمني منك يا روحي انت ..

ديلارا))
من اجينة لبيت جدو ولگينة گدامنة عمتي ام راسي ..
استقبلتنة بفرحة وابتسامة وباستني وتدعيلي واني مصدووووومة ..

بقينة ابيت جدو وتعشينة هنا وبعدين دز علينة رضوان ..
اخذني لبيتهم الي اول مرة راح ادخلة ..
من وصلنة .. البيت جان حلو ونازك ومو كلش جبير ..

نزلت اني وعمتي ورضوان نزل الجنطة مالتي ..
دخلت جوة البيت مرتب ونضيف ..
عمتي دخلت گدامنة ..

نصة همسلي : نورتي بيتج مثل ما نورتي گلبي ..
ابتسمت وباوعتلة : منور بوجودك حبيبي ..
دخلت كدامة .. رحنة للصالة لگيت عمتي ذابة عبايتهة وگاعدة ..

رضوان باوع للساعة : يمة الساعة ب١٠ وهيج وكت انتي تنامين .. وهم تعبتي اليوم ..
هزت راسهة : اي يمة روح انت لغرفتك .. عندي سوالف وية جنتي وبعدين تلحگگ ..

باوعتلهة مرتبكة ..
رضوان اشتدت ملامحة : يمة بعدين عود .. ولا اگلج احجي گدامي ..
ام راسم : شبيك يمة ما راح اكل مرتك .. سوالف نسوان عيب يلة روح ..

باوعتلة : ماشي انت اسبقني واني شوية واجي وراك ..
تنهد وهز راسة وصعد فوگ ..
رحت اني گعدت بصف عالقنفة القريبة يم عمتي ..
اشرتلي اگعد بصفهة : تعاي يمي يمة ..

رحت گعدت بصفهة : تفضلي عمة .. بشنو رايدتني ؟
باوعتلي ثواني وحجت : ادري بيج مستغربة مني .. شفت بعيونج التساؤل من بعد ما جان خوف ..
هزيت راسي بهدوء .. فعلاً اريد اعرف الجواب ..

حجت بتنهيدة : يمة گبل مدة اجتني نعمة هنا لبيتي .. والله بجيت على حالهة .. من درت بجبران مريض وهي ما تلوم غير بروحهة .. واتگول هاي حوبة مريم طلعت بأبني .. الله عاقبني عالسويتة بزمن ومريم بجبران ..

سكتت شوية وباوعتلي بحزن وكملت : حجت على سالفة گبل بيوم الراحت امج .. گالت السالفة مال العلاقة بين رجلج وزمن هاي جذب الله شاهد وانة لفقتهة حتى اخلص من زمن واطردهة من بيتي ..
وگالت ضليت احجي براسج وحتى مريم خليتج كرهتينة ..

ومن مات ابني ضياء گالت لگيتهة من الله وگتلج هاي نحس ومن وراهة مات ابنج ..
وبعد من تزوجهة راسم هم ضليت احجي براسج واگلج هسة هم تفگر ابنج وتموتة ..

غورگت عيوني واباوعلهة : بس هذا قضاء الله ومنگدر نلوم احد علي .. مريم شعليهة ..
هزتراسهة وكملت : هي من هاي اجتني .. جنت انة بعدني ماراضية لان رضوان خطبج .. ومن اجت حجت هيج ..

گالت لا تضلمينهن مثل ما انة ضلمت وطلعت الحوبة بأبني گالت ابريني الذمة عالسويتة .. وگالت هسة حتى ما الي عين اروح اطلب السماح من مريم ..

رفعت طرف شالهة ومسحت دموعهة : يمة وانة من يومهة وگلبي يرجف .. اگول خاف ابني مات لان طلعت تهمة على امج گبل وخربت بيتهة ... وما خليت مريم تتهنى بولا مرة من اجتني ..

گامت تبجي : خفت يصير شي بويلادي الباقين .. يمة والله گلبي يموت بعد اذا واحد بيهم صار علي شي ..

تقربت ودنگت بستهة براسهة : لا تبجين عمة .. گتلج كلة قضاء الله وقدرة .. لا مريم ولا حتى انتي الكم ايد بموضوع موتة .. الله راد هالشي .. لا تبجين ..

حطت ايدهة على كتفي : يمة شتردين اصيرلج .. ام .. عمة .. خالة .. بس المهم ديري بالج على ابني .. والله گمت اشوف النور بعيونة من يباوعلج .. حتى راسم والله .. ردت روحة بأخيتج ..

ابتسمت : بعيوني اخلي والله .. انتي مادام رضيتي وگلبج صفى من ناحيتي .. هاهية لعد اتطمني ..
باستني بگصتي ..

بعدين صعدت فوك .. الطابق الفوگ كلة النة ..
باوعت تصميمة يخبل كلة مغربي ..
فتحت باب الغرفة ودخلت ..
انبهت من جمالهة .. شگد ضالمتهة الصور ..

الغرفة بيضة وصبغ الحياطين سمائي فاتح ..
التبلامات مضويات والغرفة تشع بضوة قوي ..
اغراضي مرتبة عالمراية .. قبل الحنة بيوم اجت ريم وعهد ورتبن اغراضي الي اشتريتهن وملابسي كلهة ..

ذبيت شالي عالكرسي .. وعبايتي بالتعلاگة ..
انفتح باب الحمام وطلع رضوان ينشف بشعرة هستوة سبحان ..
باوعلي ابتسمتلة : نعيماً حبيبي ..

ذب الخاولي وباوعلي : شحجيتن .. عصبت وصيحت مو .. ذبت كم كلمة ضوجتج صح ..
ميلت راسي بأبتسامة : انت شتشوف ؟ ضايجة لو لا ..

طبگ حواجبة : يعني شنو .. ما صارت مشادة كلامية ؟
هزيت راسي : لاء .. تفاهمنا اصلاً وماكو شي بعد الحمدالله ..

كتف ايديناتة : شحجيتن ؟ احجيلي ..
ابتسمت رحت للكنتور اطلع ملابسي : سوالف نسوان .. عيييب ..
فتح عيونة : انووووب .. شبسرعة طبگتن سوة وصارت بيناتجن سوالف ..

رفعت اكتافي : اليوم ..
رفع اكتافة : اكيد ؟؟؟
هزيت راسي بتأييد : اكيييدييين ..

جيلان)))
واگفين اني وريم گدام الكنتور مالتي من بعد ما اجينة ..
حارث گاعد جوة بالديوانية يمة صديقة زوج ليلى يتباركولة ..

ريم سحبت واحد من مجموعة سيتات النوم : البسي هذا ..
جريتة من ايدهة : لااا قصيير هذا ..

رجعت اخذت واحد ثاني : هذا حلوو .. ماروني يخبل ..
هزيت راسي : لا لا رجعي .. اخوج يتحوش ..
ضحكت هي : شلون بلة تخلينة جوعان ..

رجعتة للكنتور : لا غير واحد ..
طلعت واحد نفس اللون .. شورت قصير ووياه كيمونة حرير ناعم ومن الضهر مشبك بس .. وينلبس فوگاهن روب ..

فتحت عيوني : لالا استحي .. غير واحد ..
تخوصرت هي : شنو حبيبتي .. فرتنة بالسوگ واختاريناهن واحد واحد حتى حضرتج تجيبيهن وتدفين بيهن الكنتور شنو .. البسي هذا لا اطيح حضج ..

بهاللحضة دخل حارث ..
سحبتة من ايدهة ضميتة ورة ضهري ..
باوعلنة مستغرب .. : شعدجن ؟؟
ريم طبگت باب الكنتور بسرعة : ماكو شي جنت اشوف ملابسهة .. يلة تصبحون على خير ..

طلعت ريم بسرعة واني دخلت للحمام بسرعة ..
سبحت وطلعت بالبرنص ..
هو واگف يم المراية واني يم الكنتور ..
باوعت لأيدة لازم گلادة امة الي لبستنياهة هويدة ..
يباوعلهة مبتسم ..

رحت يمة لان هو يم المراية .. رجعهة عالمراية وبقى واگف يباوعلهة .. سحبت الخاولي من شعري حتى امشط ..

بدون ميباوعلي .. غمض عيونة وجر نفس قوي لداخلة وتنهد : وججج ريحة الشامبووو تسططر ..

ابتسمت وسحبت المشط وصرت امشط بشعري ..
ادري نضراتة علية واني احرك بشعري هاي عادتي اضل انفش بي حتى ينشف بسرعة .. اخاف لا يحترگ من الشسوار ..

باوعتلة : حارث لا تباوع والله ماعرف اسوي شي ..
ابتسم وجرني لحضنة : شتسوين يعني؟ عوفي خل اباوعلة ..
حط خشمة بشعري : خل اشم هذا العطر السطرتيني سطر بي ..

حنين ))) بعد يومين

فزيت على طبة قوية والدنيا انگلبت بية .. تربعت مخترعة اريد افتهم شكو ..
اتلفت مثل المخبلة ..

هادي حجة بسرعة : الله الله .. خو ما تعورتي ..
انتبهت لنفسي طايحة من الجرباية للگاع واني نايمة ..
من الفشلة سويت نفسي متألمة مع ان كلشي مابية .. لزمت راسي : اااااه .. رجلي انضربت ..

گام اجة علية وحابس ضحكتة : رجلج توجعج ؟ شو لازمة راسج .. ما افتهمت ..
باوعتلة ونزلت ايدي : ليش تضحك .. هاي بدال ما تسمي علية وتقرة ايات يمي خاف حلمانة لو شي ..

ضحك ولزم ايدي وگومني : لا ما حلمانة هو انتي الليل كلة تحوسين ..

طبگت حواجبي : اي غير انت ماخذ نص الجرباية .. الله على ايام العزوبية جنت اخذ الجرباية طول بعرض ومحد يشاركني بلحافي .. تورطت ..

فتح عيونة : بيمن تورطتي ؟؟
حنين : بالزواج .. هسة شيصير لو تحطلي جرباية وحدي ..
ابتسم : حنونة انتي صاحية لو مخبلة .. ديري بالج تحجينهة كدام احد هاي السالفة ترة يضحكون عليج ..

ابتسمت : هايهية اجذب عليك ..
رجعت تمددت بمكاني وتلفلفت بالحاف كلة ..
هو تمدد بصفي ويسحب باللحاف مني : وج هدي .. ادري شنو تگمطتي بي ..

سحبة قوي وتغطى وياي ..
باوعتلة وصغرت عيوني : وتلومني من اگلك تورطت ..
جرني لحضنة بضحكة : تعاي شو اني هم تورطت بيج ..

مريم ))

حاط راسة على رجلية والعب بشعرة : مريومتي ..
مريم : هممم ..
جر ايدي من شعرة وحطهة على شفتة وباسهة : تدرين شگد احبج ..

هزيت راسي : اي .. بس احب اسمع ..
لزم اصابعي وگام يعد بيهن : بگد عدد دگات گلبي بهال٣٤ سنة ..
وبگد عدد رمشات عيونج ..
بگد جرات النفس الماخذهن بكل عمري ..

ابتسمت دنگت بستة بخدة .. حضن ايدي وحطهة جوة راسة وغمض عيونة ..
شوية وانتضم نفسة وغفى ..
مبتسمة واتأمل ملامحة واردد الحمدالله يارب من عوضتني بي .. الله لا يحرمني منك ..

بقى غافي على فخذي ..
شوية گام يتحرك وقرب راسة من بطني ..
حسيتة ضغط على بطني ..
رجعت ضهري ليورة : راسم ..

بدون ميفتح عيونة : هممم ..
مريم : حبيبي شوي راسك دتضغط على بطني مو زين عالطفل ..
فتح عيونة بأنزعاج : هاي شلون شغلة .. من هسة يريد يشاركني بيج ..

تمددت عالجرباية وهو بصفي ..
اخذني بحضنة ومباشرةً غفى ..

بعد اسبوع //

ريم))
ايدية كلهة ترجف واسمع صوت الهلاهل قريبة عالباب ..
لزمتني خالة هويدة وتقرة علية وتنشر ..
فرحانة وبنفس الوقت متوترة ..

گمت اسمع صوتة بالغرفة ..
تمنيت امي وياي بهاليوم .. وبهاللحضة حتى توصي بية ..
سمعت خالتي هويدة تحاجي وتوصي علية ودير بالك عليهة وحطهة بعيونة واذا تأذيهة ترة اني اخذ حگهة ..

ورة ما طلعت خالتي واني توترت بالزايد ..
مدنگة راسي والطرحة مغطية وجهي ..
بس رجلينة اشوفهن واگف گدامي ..

رفع الطرحة اني رفعت عيوني وياهة وباوعتلة ..
عيوني جانت كلهة خوف وتوتر ..
ابتسم وتقرب باسني بگصتي بهدوء ..
غمضت عيوني وجريت تنهيدة متقطعة من الرجفة ..

باوعلي وارتخت ملامحة : ريمي .. شبيج حبيبي ليش ترجفين ..
بلعت ريگ : ما بية شي ..
حاوط وجهي بيديناتة الي اكبر من وجهي : شلون ما بيج شي .. بردانة لو خايفة ..

سكتت ماحجيت ..
حط ايدة گصتي ويمررهة على خدودي ويردد ايات قرءانية بصوت خفيف ..
صدك حسيت نفسي هدئت شوية ومغمضة واستمعلة ..

رفع ايدي لشفتة وباسهة ..
تقرب حط گصتة على گصتي : ريمي صرتي الي .. وحدج يمي .. بعد ماكو تفزين واتگولين لا يجي ابوي لو اخوي ..

ارتبكت من كلامة ..
جرني بلهفة وهمس بأذني : احبج .. وروح ابوي احبج ..
ما لحگت احجي الا سكتني بشفتة على شفتي ..

سحبني الة بدون ميفصل بوستة ..
اشتدت جرأتة .. حسيت بحاجتي للهوى دفعتة وهو مغمض ..
اتنفس بسرعة وارجف : عفية على كيفك ترة عندي ربو واختنگ ..

جرني مرة ثانية : اخاف عليج اكثر من روحي ..
رجع اخذ شفتي شوية وينطيني مجال اتنفس ويرجع يعيدهة ..
سحبني لعالمة وحنانة ..
جان خايف علية اكثر ما يكون مستمتع ..

بعد مرور سنة ونصف /////

زمن)))

كاعدة عالجرباية وابدل لبنتي الرابعة (ضي) ..
عمرهة ٩ اشهر .. لبستهة بدلة وردية بحمالات خفيفة ومتغطي ايديناتهة ..وهي مدبدبة ..

تناغي وحاطة اصابعهة بحلگة .. تشبهني وتشبه مريم ..
عاصم يموت عليهة ومن يشوفهة متطيح من حضنة ويضل يبوس بيهة ..

بالبداية جنت رافضة لان جبيرة وحملت بهيج عمر .. بس هسة روحي بيهة واخاف عليهة من كلشي لان ماشالله اكو متوحشين برة ..

خلصت تبديلهة وشلتهة وطلعت ..
صوت البجي والصياح مالي الصالة ..
دخلت عالهوسة ملتمين يحضرون بالنفاخات لعيد ميلاد (زيد) ابن جبران صار عمرة سنة ..

دخلت للصالة واسمع صياح حنين : حبوووبة شعندي عشر ايدين .. هاج الزمي بتي واني عود اگوم انفخ بالنفاخ ..
حبوبتي : ماريدهة بتج نحسة عليج .. تضل تحوس وتعيط ..

شالت النفاخات وحطتهن بحضن عمتي : جا هاج لعد انتي انفخي وخل انوم النحسة على گولتج ..
شمرتهن عليهة : دهههااج هاج .. انة انفخ انوب .. حتة ضروسي يطيحن من اول نفخة ..

شالت بتهة (بنين) وحطتهة بحضن عمتي : هاج حبوبة حتلو نحسة .. بعد حفيدتج ومجبورة بيهة ..
شمرتهة عليهة وطلعت بسرعة بدون ما تسمع كلامهة ..

عمتي عضت ايدهة : ربببي .. انة طول عمري ادعي كون الله يطي نعمة جنة صلفة وتدولبهة بزمانهة مثل ما دولبتني .. بس ربي ما گتلك جيبلهة جنة مسودنة والله هواي عليهة مگرودة ..

حطيت بنتي بصف عمتي بالگاع وعفتهة يمهة وهي بس تگلب ..
رحت للمطبخ لگيت حنين وبسمة ومريم يحضرن بالكيك والعصاير ..

زيد ابن جبران استقبل السنة مالتة يمشي ماشالله عودة قوي مثل حافظ ابن مريم ..
البيت صار عبارة عن جهال بأي وقت نسمع صوتهم ..
يعني ملو البيت علينة من بعد جان خالي ..

ريم صار عدهة ولد ورياض سماه (بدر) على اسم جدة .. عمره ٤ اشهر بگد بنت هادي بيناتهم اسبوعين ..

ديلارا حملت ورة عرسهة بشهرين .. صار عندهة بنية (شمس) عمرهة ٧ اشهر حيل تشبه امها .. والحمدالله تحسنت علاقتهة حيل وية ام راسم وخاصاً من بعد ما جابت صارت تموت على شمس وديلارا ..

وجيلان مصار عدهة اطفال وراحت تراجع دكتورة ..
رغم حارث ما قبل وگال مو هسة تراجعين لان بعد وقت .. بس رغبة جيلان القوية وهي تشوف كل وحدة ملتهية بأبنهة ورادت تعيش التجربة ..

وفعلاً راجعت الدكتورة واخذت علاجات وحالياً هي حامل الهة شهرين وحارث حاير شيسويلهة ونقل اغراضة وگعد بالغرفة الجوة حتى لا تصعد وتنزل ..

قطع علية صوت صيحة عمتي : خااييببة زمممن الحگي لبتج ..
رحت اركض وعرفت وحوش ال خضر هاجمين عليهة ..

وفعلاً لگيت حافظ جارهة من شعرهة وزيد يسحل بالقراصة مال اللهاية الي مشكلة بصدرهة يريد يحطة بحلگة وهي تبجي ومفرفحة ..

قبل لا اشيلهة دخلو عاصم ووياه الولد ..
عاصم بسرعة شال ضي ويسكت بيهة ويبوسهة ويصيح عالجهال : احترگت ابهاتكم واحد واحد .. شلون بينة ابتلييينة .. ما ترحون تسوون اعيادكم ببيوتكم ..

راسم شال حافظ ويضحك : حقك علينة عميي واسفين بس ضيوو تسوي واهس .. خدودهة جنهن نفاخات وشعرهة ثخين .. وابني لازم يمد ايدة ..

التفت على حافظ : ليش بابا مو عيب خالتك هاي ..
حافظ يباوعلة ببرائة ولازم بيدة وحدة من ستوتات ضي ..

جبران شايل زيد الي مجلب برگبة ابو : اني ماگدر اصيح على ابني اليوم عيد ميلادة .. وبعدين هو وعمتة اني شعلية ..
عاصم يباوعلهم ما عاجبة ..

هادي : عمي هسة انتو جهالكم توصل بنتي .. دشوف الهدوء نايمة ولا يمهة ..
باوعت لبنين .. عمتي حاطتهة بحضنهة وهي غافية فاتحة حلگهة بكل براءة..

دخلت جيلان مبتسمة وسلمت على ابوهة وگعدت على حسب توصيات حارث ممنوع تتحرك ..
وراهة دخلت ريم وشايلة ابنهة بدر الي جان اسم على مسمى .. احلا الجهال كلهم هو وضي .. عيونة ازرگ فاتح وشعرة اصفر .. حتى الولد يغارون منة يسمونة الاصفر ..

ديلارا شايلة بتهة الي نايمة على كتفهة وتحجي بهدوء خاف تگعد بتهة ..

ابتدت الحفلة وشغلو الشموع ..
بدو يصفگون ويضحكون وحنين لازمة التليفون وتصور ..

مريم وراسم الحب القوي والابدي الي انرسم من طفولة وامتزج بمعاناة وحرمان وبالتالي تكلل بالسعادة ..

جيلان وحارث .. عيونة تحجي لهفة وخوف عليهة بس بالتالي نضرات العشق هي الي تغلب على كل شي ..

ديلارا ورضوان .. انتضار وخوف من المستقبل من حبهم .. والحمدالله حبهم گدر يتخطى هالخوف ويمحي الانتضار ..

بسمة وجبران .. ملت علي حياتة وصحح غلطة من بعد ما تشافة بدلالة الهة وحبة الهة ولا مرة خجل ان يضهرة كدام احد ..

حنين وهادي .. كتلة اللطافة بسوالفهة وضحكهة وعفويتهة خلتة يحبهة ويعشقهة اكثر ومتونس بيهة واحنة متونسين بيهم ..

ريم ورياض .. المغرور حضرة الملازم رياض الي يضعف گدام حب ريم ودلالهة وينسى كلشي .. صبر طول هالسنين بدون زواج وبالتالي الله عوضة بجوهرة مثل ريم ..

اني علاقتي بعاصم رجعت لايام حبنا .. تصرفاتنة احياناً تخجلني لان ميبالي بوجود البنات ويبقى يتغزل .. واحياناً تدب بداخلي الفرحة واحمد الله الي رجعلياهة ..

نعمة كافيتني شرهة الحمدالله .. وايگولون متغيرة ..
ماحاجية وياهة اني بس على گد السلام وهايهية ..

قطع صفتي عاصم الي گعد بصفي لزگ وحط ضي بحضني ..
باوعتلة وهو تقرب باسني بخدي ..

حومرت من الخجل وهمة كلهم بصوت واحد : اوووووو ..

.......🕊الـــــــنـــــهــــــايــــــــــة 🕊.......

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

وهاي قصة زمن وهاي قصة بناتهة .. عشتوها وياهم ودخلتو بأجوائهم بحلوها وبمرهة ..
بعضكم حبها وبعضكم انتقدها ..
اني عن نفسي حبيتكم ولكلامكم الجميل الي يترك اثر جميل بداخلي .. احبببكم واحب تعليقاتكم الحلوة ..

سامحوني اذا بدر مني اي خطأ عن غير قصد ..
سامحوني على كل فترات غيابي .. بس كل انسان والة ضروفة ..

مراح اگول وداعا .. راح اگول الى اللقاء 👋🏻
احببكم للمرة الالف ..

مراح اختمها مثل كل يوم بكلمة (الكاتبة) لا ..
راح اگول اختكم وصديقتكم الممنونة : سارة الشمري🕊