رواية بنات للزمن الفصل الثالث والخمسون 53 - بقلم سارة الشمري

الكاتبة : سارة الشمري🕊

اني الي تمنيت ابوسك
واني الي تمنيت اشمك
واني الي تمنيت احط راسي على صدرك
بلكي خدي يزيح همك
ناري ماتطفى ولا نارك طفت
وعيني كبلك تبجي اذا عينك بجت
اليمته ياحبيب تضل من ايدي تطشر واللمك
كون يمك......كون يمك

(حبايبي علقو عالفقرات وصوتو وانطونو رأيكم .. احببكم)

بليل تقريباً الساعة ١٢ .. نزلت للمطبخ اجيب مي ..
شفت الضوة مفتوح استغربت ..

دخلت شفت حارث .. فاك المسند وحتى اللفاف ..
كتفة مكان الجرح كلة دم والقطن الگدامة هم كلة دم ..

اخترعت من المنضر ودخلت اركض ..: حااارث شنو هاي شبييك ..
شال القطن وحطة عالجرح وضغط علي : ما بية شي شبيج .. شلت المسند حتى اذبة وانفك الجرح .. وهسة جاي احاول اشدة ..

جريت القطن وحطيت معقم وقربتة من الجرح : ولليييش تشيل المسند .. مو الدكتور گالك شهر يلة تذبة ..
ابتسم : باجر اعقد .. شلون البس القاط بلة وهذا بيدي .. يخرب الكشخة كلهة ..

تنهدت : هسة هذا هم حجي بالله .. سلامتك اهم من الكشخة ..
بديت الف الشاش على زندة ..
حارث : ميخالف .. عالاقل بس باجر .. واخلي راسم يشوفلياهة ..

هزيت راسي : ماشي .. بس لا تحركهة هواي .. لا تضغط عليهة .. لا تنزف ..
حارث : ماشي هايهية .. مشكورة ريمي ..

خلصت لف ايدة وهو صعد لغرفتة ينام ..
مسحت الدم ولميت الغراض وصعدت لغرفتي ..

جيلان //

گعدت من النوم اول وحدة .. رغم نومتي جانت قلقة كلساع اگعد ..
الساعة ٧ .. گمت دخلت للحمام سبحت ..

طلعت شسورت شعري مجرد تجفيف ..
لبست دشداشة ونزلت جوة ..
لگيت بس بيبي گاعدة لان هي تنام من وقت وتگعد وية الصلاة ..

ابتسمت من شافتني : صباح العافية على هالوجه ..
ابتسمت : صباح النور بيبي .. اسويلج ريوگ ..
هزت راسهة : الله ويدج .. سويلي حليب ووياه خبز سمسم ..

هزيت راسي ورحت طلعت حليب من الثلاجة وحميتة وسويتلهة الخبز وسويت جاي وبيض ورحت گعدت يمهة وبدينة نتريگ اني وياهة ..

گعدت توصي بية واتگلي احجي وياج رغم متطمنة لان يم هويدة .. خوش مرة وحبابة ..
الحماس واللهفة والفرحة الي ابداخلي ماگدر اوصفهة لشخص .. لساني يعجز عن الوصف ..

بعدنة نتريگ ودخل علينة بابا ..
استغرب من شافني وباوع لساعتة : يومية للضهر يلة تگعدين .. اليوم من غبشة گاعدة ..

ابتسمت ورفعت اكتافي : بقيت اتگلب .. وهسة گمت ..
هز راسة بتوعد : اويلي منج .. على اساس ما اعرف ليش گاعدة ..

ضحكت ...
هو ابتسم وياي : يلة الله يهنيكم ..
نزلت وراه ماما هم استغربت من شافتني ..
سوت ريوگ لبابا وهو كلساع يگللهة على كيفج ولا تتحركين هواي ..

صعدت فوگ دخلت لغرفة ديلارا شغلت الضوة وطفيت السبلت : دلووو گومي يلة .. اليوم خطوبتي وانتي نايمة ..

باوعتلي بأنزعاج من الضوة وفاتحة عين وسادة عين : جلاتينة حبابة اطلعي .. الساعة ب ٨ والبنية تجي ب٩ ونص .. خل انام شوية ..

فتحت التلفزيون وعليت الصوت وهي گامت مجبرة ومعصبة مني ..

الساعة ب٩ اجت البنية .. صديقة ريم هي جانت وياهة بالجامعة .. واتفقت وياهة تجيني للبيت تمكيجني وتسويلي تسريحة لان هي تشتغل بصالون ..

سوتلي مكياج كولش حلو برز عيوني الناعسات ..
وحطتلي كحلة سودة داخل عيني ..
شعري رفعتة بتسريحة حلوة وبسيطة ونزلتلي كذلة ..

عجبتني النتيجة النهائية وفعلاً حبيت شكلي ..
خلصت تقريباً الساعة ١١ ..
اجن البنات وگعدن يتجهزن يمي .. مريم وبسمة وديلارا ..

صارت الساعة ١ ونص .. گمت لبست فستاني طويل وشوي بي نفش .. سمائي فاتح لونة وبي لمعة وعاري الاكتاف ومفتوح من گدام ..

لبست الكعب وحطيت عطر ونزلت والبنات وياي ..
الصالة ما جان بيهة هواي ناس ..
گعدت عالكوشة والبنات شغلن الديجي ويرگصن ..
وحبوبتي اجت حطت تمن بيدي ووكلساع تحط هيل بحلگي .. ومنطيتني القرءان بيدي ومطلعتلي سورة الفتح ..

صارت الساعة ب٢ ونص تقريباً اجو بيت بيت عمي ضافر واهل خالة هويدة هم بس حنين ما اجت لان گالو ميصير لان البارحة عاقدة هي ..

ريم حبيبتي فرحانة وكاعدة يمي ما عافتني ..
ورة شوية اجتني ماما گالت تعاي راح يعقدولكم ..
رجف جسمي برهبة .. وگمت ووياي البنات وامي وهويدة ..

گعدوني يم باب الديوانية وورة شوية گام يحجي الشيخ ويردد بالايات .. لحد ما سألني وجاوبت
: نعم وانت وكيلي ..

قشعر جسمي بفرحة والهلاهل علت ..
ماما دنگت باستني بگصتي .. وخالة هويدة باركتلي هم وباستني ..
رجعت گعدت عالكوشة ..

البنات ياخذن وياي صور ..
تليفوني جنت لازمتة واخذ بي صورة الي ..

اجاني اشعار رسالة من رقم قريب ..
دخلت عالرسالة قريتة وغورگت عيوني ..
(ما اجمل الانتضار حين تكون نهايته انتِ)...

تنهدت بفرحة واني احاول ما ابجي حتى لا اخرب مكياجي ..
بداخلي احمد الله لان انطاني هالفرحة .. وصرت حلال الشخص الي حبيتة وما حبيت غيرة ..

ورة شوية دخل حارث .. باوعتلة لطولة ذاب المسند من ايدة .. حيييل شگد مشتاقتلة ..
ما جان مستحي مثلهم .. لا جان رافع راسة بشموخ وكأنة ايگول شوفو اخذتهة ..

گمت وگفت وصار مقابيلي ..
رفعت عيوني لعيونة .. تنهد بتعب ..
قرب باسني واني غمضت عيوني من حسيت بشفتة على جبهتي .. طول بوستة وهو يجر نفس طويل كأنة يملي ريتة بي ..

وخر راسة وگعدني وگعد بصفي ..
خالة هويدة جابت الذهب وتنطي وهو يلبسني ..
لحضات اني جنت احس نفسي بحلم وطايرة ومو على ارض الواقع .. ممصدگة حارث صار الي وحلالي ..

تقرب يلبسني الترجية ..
همس بأذني : احبج مشمشتي ..
ابتسمت باسني برقة بصف اذني ..

خلص تلبس الذهب واخذنة كم صورة وبعدين طلع ..
تنهدت بأاااه طالعة من گلبي ..
لحد الساعة ٦ يلة مشت الناس ..
رحت اني بدلت. ملابسي ونزعت الذهب ..

اجو الولد باركولي .. وبابا جابلي گلادة ذهب ..
لليل صارت الساعة ب١١ .. اني مگابلة التليفون ..
يا هسة يتصل .. هسة يدز رسالة .. وكلشي ماكو ..

لحد ما تعبت وغفيت لان گاعدة من الصبح ..

مر  اسبوع وحارث ابد ما اتصل ولا دز رسالة ..
اني كاتلني القهر وضجت حيل .. ليش هيج يسوي ..
من اتصل على ريم اسألهة علي بطريقة عادية اتگلي كاعد بالصالة يلاعب بسيف اخوي .. اني اعصب بالزايد يعني كلشي ما عندة ..

رغم هالشي ما كلت لاحد ميخابرني ..
حتى ديلارا من تسألني اگللهة نتخابر بليل ..
واسمعهة هي بليل تسولف وية رضوان ..
ومرتين اجاهة للبيت حتى يشوفهة ..

واني البارحة حتى بجيت من الضوجة ..
شنو بس اني مشتاقتلة وهو ولا على بالك ..
مبارك بس دزلي وسالة بالعقد كم كلمة وهايهية بعد ..

ريم من اخابرهة تگعد تسولفلي .. جايب عمال يعدلون بالجناح مالتة .. وحتى غرفة جايب وگالت ميحتاج اصورهة الج اكيد انتو اختاريتوهة سوة وهو صورهة الج .. كتلهة اي ميحتاج شايفتهة ..

صدگ ضجت بيومهة وتعصبت .. شنو معناهة تصرفاتة هاي .. لا يكون يعاقبني على تصرف ابوي ..
وما اگدر اتصل علي لان لازم هو الي يتصل مو اني ..
شعندة وما يتصل علية ..

نزلت جوة ضايجة .. وكمل علية الضوجة ابوي من سألني : اكيد حاجين انتي وحارث على موعد العرس .. هو گال ماريدهة تطول بهالفترة .. ما گالج شوكت ما اتفق وياج .. شوكت يناسبج ..

بلعت ريگي .. هو شوكت محاجيني حتى يتفق وياي ..
ما عرفت شنو اجاوبة .. شأحجي شأگول ..: ها مادري بابا ..
بابا طبگ حواجبة : شبيج بابا ؟ شلون ما تدرين ؟

حبوبتي حجت ونقذتني : انتم عليمن ذابين يومية فلوس .. وهالمصاريف المالهة داعي .. خوب زوجوهم بيوم واحد .. حارث ورضوان وهادي .. مو هو عرس رضوان بعد اسبوعين .. وهو من زمان محضر كلشي ..

وهادي ما يرادلة بس غرفة وهم ما تاخذ وكت بنفس اليوم يشدونهة ..
وحويرث مكمل وضعة .. بعد شني ؟

ابوي باوعلهة بتفكير : والله مادري يمة .. اشوف ضافر ورضوان واحاجيهم واشوف شلون تصير بعد ..
ترخصت منهم وگمت وعيوني مغورگة .. عالموقف الي حطني بي ..

ورة يومين سمعتهن يسولفن ان العرس تحدد سوة وية هادي ورضوان واني ساكتة مسوية نفسي ادري ..
دز الفلوس المهر بيد هادي ..

ورحنة عقدنة عقد محكمة وهم ما حجة وياي غير كلمات الموافقة كدام القاضي .. حتى بالرجعة رجع بسيارتة وحدة ..

بدينة نطلع نتسوگ اني وديلارا ..
ومرة اتفقنا احنة والبنات كلنة وية حنين ان نطلع نتسوك سوة ..
اكثر من طلعة طلعنة .. اني ما خليت شي بنفسي ما اشتريتة ..

خلصن الاسبوعين واحنة على فرد ركضة ..
حجز وصالون وتنضيف بشرة وجسم وهالسوالف ..

سوينة حنة اني وديلارا ..
لبسنة اني وياهة نفس الشي وطلبنة نفس التسريحة بس المكياج لا لان ملامحنة مو نفسهة ..
ماما كلساع تجي وتنشر علينة وتقرة المعوذات ..

ريم طلبت من رياض تأجل عرسهة لان على اساس قبل اسبوع بس خلتة ورة عرسنة بأسبوع .. وهم گوة قبل .. رادت تحضر عرس اخوهة براحتهة وابيتهة ..

خلصت الحنة .. اني وديلارا نمنة بغرفة وحدة وسوة ..
گعدنة نسولف ونضحك .. اخر شي تگابلنة وگمنة نبجي .. لاول مرة راح نفترق ..

ديلارا نصفي الثاني .. توأمي وروحي .. بكل مراحل حياتي هي جانت وياي ومشاركتني بيهة ..
والله قدرلنة نتزوج بنفس اليوم ..

اليوم الثاني الزفة ..
عفت كل مشاعر الزعل على جهة ..
الارتباك والتوتر احتل گلبي .. ديلارا جانت مو اقل مني ..
والي صدمني وصدمهة هي ام رضوان بيوم الحنة اجتهة وباستهة وباركتلهة وبأسلوب حلو واعتذرت من امي هم على الي سوتة هذيج المرة ..

وحتى مريم مصدومة اتگول اسلوبهة اختلف وقبل يومين عزمتني عالغدا يمهم اني وراسم ورضا وطول روحتي هي بس مبتسمة وتسولف وتضحك ..

الساعة ٢ الضهر // واگفة گدام المراية ..
اتأمل شكلي بالبدلة البيضة من بعد ما خلصت مكياج وتسريحة ..
تسريحتي جانت مفتوحة واطرافة ملفلفة مبرومة بطريقة نازكة .. وباف من گدام وحاطة تاج شوي جبير ويلمع ..

والطرحة مثبتة بماشات .. فد شي بسيط وراقي ..
بدلتي جانت منفوشة واطرافهة تور فضي لامع ..
الكعب مالتي ابيض جنة بي طرحة من ورة ..

فتحت الباب الي جان يندك والبنات برة منتضريني اخلص تبديل والبس البدلة ..

ماما مباشرةً نزلت دموعهة ..
ومريم حضنتني ..
شلت باقة الورد ..

ديلارا تسريحتهة جانت مرفوعة وبدلتهة هم نفش وهم طالعة حلوة تخبل .. وخاصاً البدلة تخبل عليهة لان جسمهة تارس ..

نزلنة گعدنة بالكوشة ..
حبوبتي اجت قرت المعوذات علينة ..
والبيت مگلوب بالهوسات والهلاهل ..

راحت الزفة يجيبون حنين لهنا .. وبليل يزفونة تلاثتنة للفندق ..
اجت الزفة ودخلو حنين ووياهة اهلهة ..

ماشالله هي اصلاً حلوة وطالعة بعد احلا بالبدلة البيضة الي جانت طويلة من ورة شوي .. تسريحتهة هم مرفوعة .. طبعاً شعرهة سوتلة كيرياتين من بعد الحاح من البنات لان متقبل اتگول احب شعري ملفلف ..

الديجي ما سكت ولا شوية ويرگصن وطبعاً ريم ماخذة الساحة لان مريم وبسمة حوامل ..
اجتنة نعمة سلمت علينة واني اباوعلهة من ورة خشمي : مبروك حبيبة تتهنون انشالله ..

لبستني اسوار ذهب واني اباوعلهة مستغربة ..
راحت لديلارا وسوت نفس الشي ..
اني وياهة وحدة باوعت بوجه الثانية مستغربين .. منهة ومن ام راسم ..

صبو العشا والنسوان گعدن ياكلن واحنة كاعدين ..
ريم تسويلنة لفات زغار وتحط بحلگنة ..
بس وين كوة اكلت لگمتين من التوتر والخوف ..

اجت امي گالت راح ياخذون العرايس للفندق ..
البنات تجهزن واحنة لبسنة البرنص ..
حتى وجهي غطو ..

طلعنة للحوش .. اول وحدة اخذوهة حنين للسيارة ..
هادي لزم ايدهة وصعدهة ..
الي خلا عيوني تغورگ ان ما صعد بالسيارة وية حنين ..

اجة علينة ولزم ايدي : اسلمجن بيدي الهم .. شعندي قابل ١٠ خوات ..

ودخل حارث واني كلشي ما اشوف منة من ورة الطرحة ... بس اسمع صوتة ..
هادي يوصي بية وهو يگلة بعيوني وبگلبي ..

سلم ايدي بيدة .. ايدة دافية بعكس ايدي الباردة مثل الثلج .. صعدني بالسيارة ..
افتر هو صعد بمكان السايق واني ليگدام وشغل السيارة ..

مشينة من بعد ما صعدو ديلارا وية رضوان ..
سوو الطريق شطولة بالاغاني .. واصدقائة يرگصون ..
اني ساكتة طول الطريق .. التوتر مسيطر علية ..

لمن وصلنة للفندق ..
نزل هو واجة نزلني ..
لازم ايدي .. وصعدنة للغرفة وهمة الباقين كل واحد راح لغرفة ..

امي اجت وراي واسمعهة توصي بي هم وهو نفس كلامة يردد ..
دخلت للغرفة .. امي مشت يم ديلارا ..

شفت الجوگة يم الباب جبران ومريم وريم يردون يدخلون .. شكلة هو اول واحد من العرسان صعد والباقين بعدهم جوة ..

رادو يدخلون اني رفعت طرف الطرحة اباوعلة ..
ساد الباب ومطلع نص جسمة عليهم مانعهم من الدخلة : خييييير .. انت وياهة وياهة .. خلص شغلكم يلة .. انزلو دبجو جوة .. راح يبدي الشغل مالتي ..

فتحت عيوني على وسعهن ..
سمعت ريم كالت : عزززة بعينك ..
حارث : برررد شرج .. وبعدين يلة مناا .. صارلي كومة انتضر هاليوم اريد اطلع حرگة گلبي .. يلة في امان الله ..

حجاهة واني جسمي كلة گام يرجف ..
فكيت البرنص وذبيتة عالقنفة الزغيرة ..
رفعت راسي باوعتلة طبگ الباب ..

رجع جسمة وضهرة وراسة عالباب ويباوعلي بنضرات عجزت افهمهة ..
وخر من الباب وتقدم علية وفتح الدگمة مال السترة السودة وذبهة عالقنفة ..

باوعت بعيونة شفت نضراتة خوفتني ..
جر نفس لداخلة وعيونة تمشي على لكل جسمي وعيوني ..
من شفت نضراتة هيج اجيت اتخبل ..

حجيت بتوتر : حـ..حارث .. بس دقيقة ..
رفع اصبعة حطة على شفتة بمعنى اسكتي ..
فك اليلگ الي فوگ القميص مالتة وهم ذبة عالقنفة .. فتحت عيوني على وسعهن : شبيك حارث لا تخوفني ..

ما كملت كلمتي الا ايديناتة حاوطهن لخصري واخذني بحضنة قوية رفعني عن الگاع سانتيمات رغم بدلتي ثگيلة ..
شهگت بصدمة ..

بقيت ثابتة بحضنة وهو متمسك بخصري واسمع صوت افناسة القوي وهو يتنفس من رگبتي ..
تنهدت بتعب .. رفعت ايدية وحضنت رگبتة حيل ..

اسمعة يردد ربي اذا حلم لا تگعدني منة ..
نزلني عن حضنة .. اني وخرت وغورگت عيوني ..
باوعتلة بعتب وزعل ..
حاوط ايديناتة على خدودي : ليش ليش هالدموع ..

وخرت ايدة عن خدي : والك عين تسأل ؟ ٣ اسابيع عاقدين .. ولا مرة اتصلت او اجيت علية .. وهسة مسوي نفسك مشتاقلي .. تدري شصار بية .. شنو المواقف الانحطيت بيهة ..

مد ايدة يفك بماشات التاج ويوخرة : حقج .. مشمشتي اني ٤ اشهر محروم من شوفتج .. تدرين شگد مشتاگلج .. ما ردت اوصل شوگي بمخابرة لو رسالة ..

وخر التاج والطرحة حطهن على الميز اليمة ..
قرب راسة من وجهي : اني اربع اشهر ابوج حارمني من شوفتج .. تحملت ٣ اسابيع ثانيات .. حتى من اشوفج اطلع شوگي كلة ..

شايفة اني .. صمت صمت عنج طول هالفترة حتى افطر بيج براحتي .. ما اطلع شوگي بحجي وسوالف بالتليفون نص الليل ..

جرني الة ووخر شعري ورى كتفي وحط شفايفة على رگبتي يمشيهن ويحجي : اطلع شوگي بـ بوسة .. بحضنة .. بـ شمة ..

رفع راسة يباوعلي بنضرات جريئة مبتسمة وجززز على سنونة وكمل : بـ عضة ..
هو يحجي واني احس نفسي بغير عالم ..
من حجة اخر شي اني استوعبت وفتحت عيوني ..

وخرت ليورة : اروح ابدل ..
جرني مرة ثانية : اي مو زوج اني واهدج ..
جيلان : حارث فدوة .. بس انطيني مجال ..
هو هز راسة : صايم بوية صايم .. اهد فطوري اشوون ..

قرب راسي منة واخذ شفتي بشفتة ..
باسني برقة بس كلهة جرأة وتفنن بيهة ..
طلع ضيم گلبة مثل ميگولون ..
معدتي تقلصت من التوتر وجسمي كلة يرجف ..

بوساتة راحت لاذني ورگبتي واكتافي ..
ايديناتة انحدرت للسحاب مال البدلة واني احس نفسي مو اني انسانة ثانية ماكدر امنعة او ادفعة ..

يردد بكلمات الحب ويسحبني وياه للفراش ..
ايدة فكت سحاب البدلة ..

ووووووو مثل العادة معليكم بالباقي ..

ديلارا //

طلعت من الحمام بعد ما ذبيت بدلتي ولبست سيت نوم ماروني .. فكيت تسريحتي وخففت مكياجي ..

طلعت لگيتة مبدل ملابسة لابس تراك سود لونة نيلي ..
ابتسم من شافني ..
گام وگف واجة علية لزم ايدي : تعاي حبيبي تعشي .. اكيد مماكلة شي ..

ابتسمت بخجل من لبسي لان قصير : تمام ..
گعدني عالقنفة يمة واني گوة اكل اللگمة وانزل بأطراف الروب ..
هو گام يسوي لفات ويحط بحلگي ..

خلص وشال المواعين ورجعهن للعربانة ..
اجة گعد يمي لزم ايدية ورفعهن باسهن ..
حجة وعيونة بعيوني : تدرين من اول ما شفتج وانتي سكنتي بگلبي .. الله يشهد هاي اللحضات تمنيتهة وياج وبس ومو وية غيرج ..

ابتسمت : حتى انت .. اول شخص يدگ گلبي الة .. عيوني احسهة تفتحت عالدنيا من حبيتك .. مليت گلبي وروحي وحياتي ..

قرب راسي الة وباس گصتي بدفو ..
غمضت عيوني بأبتسامة ..
باسني بخدي .. اني ارتبكت ..

گمت وگفت : اني حروح ا..
ما لحگت احجي الا وگف وشالني بثنين ايديناتة : خليج بس الي اليوم عوفي كلشي ..
ابتسمت ومن داخل متوترة : اليوم وباجر وعگبة وكل يوم ..

تنهد بأبتسامة على اجابتي ..
قرب مني وباسني بهدوء كلة حنان ورقة ..
سحب كل توتري وخوفي بكلماتة وحنانة ..

هادي //

اباوعلهة واگفة بالبدلة جنهة لعابة .. طالعة تخبل ..
عيونهة تتلفت بالغرفة وعوزهة شوية وتبجي : اريد ارجع للبيت ..

طبگت حواجبي : ليش ؟؟
بوزت : اخاف .. رجعني يم امي .. 
هادي : من منو تخافين ..

جاوبت بسرعة : منك غير .. لعد من منو مثلاً ..
ابتسمت : هسة اني شمسويلج .. حتى ما لازمج ..

سكتت ما حجت شي ..
هادي : دروحي بدلي ملابسج وارتاحي وتعاي نسولف لا تفكرين بشي ثاني ..
هزت راسهة بسرعة : اي اي رايحة ..

شالت بدلتهة ادور شطولهة من ورة .. تريد تدخل بيهة للحمام : اوگفي اوگفي وين ..
باوعتلي : ابدل غير ..

اشرت على بدلتهة : وتدخلين بهاي للحمام ..
نزلت بدلتهة : لعد شلون .. زين انت اطلع برة بين ما ابدل ..
حكيت راسي من ورة : زحمة اطلع برة الغرفة حتى مرتي تبدل .. شيگولون ؟

هي باوعت للحمام : زين انت ادخل للحمام وخل ابدل اني ..
تنهدت : يابة صار ..
رحت اريد ادخل للحمام وهي گالت : الحمام ما بي مفتاح .. انطينياه ..

فتحت عيوني على وسعهن : تقفلين علية الباب تردين ؟؟..
حنين : ها.. لا يعني مو هيج .. بس اشلون خاف تطلع ..

هادي : ماكو ثقة شنو ؟؟
شفتهة ساكتة .. ابتسمت : على كل حال .. الباب ينقفل بس من الداخل ..

دخلت للحمام وسديت الباب .. ابتسمت على تصرفاتهة .. بس ما اريد اخوفهة ..

ورة ١٠ دقايق .. فتحت الباب وطلعت ..
لگيتهة مبدلة بملابس النوم وواگفة گدام المراية تفك بتسريحتهة ..
من شافتني التفتت بسرعة : ها شو طلعت ..

رفعت حاجبي : لعد شلون انام بالحمام برأيج ..
هزت راسهة بلا ..
اتصلت وجابو العشا .. گعدنة ناكل وهي خايفة اكثر ما تكون مستحية .. واني اجيب سوالف مدري منين حتى اخليهة تهدئ ..

راحت تمددت عالجرباية واني وخرت الاكل ..
اجيت تمددت بصفهة وهي تباوعلي مرتبكة ..
گمت اسولف وياهة وعن اول مرة شفتهة وهي بدت تنطلق بالحجي ..

صفنت على ملامحهة .. مليانة برائة ..
مديت ايدي لخصلات شعرهة وهي سكتت وباوعتلي ..
قربت وجهي من وجهة : كملي ليش سكتي ..
بلعت ريگهة : ها ..

تنهدت واني دايخ بيهة : هسة اني احجي .. 
قربت بستهة وشادة عالبدي مالتي من يم صدري ..
شوي شوي بلشت تبادلي بس متعرف شلون ..

يلة عيني تفضلو بعد معليكم ..

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

تصميمي☝🏻☝🏻

الكاتبة : سارة الشمري🕊

صباح الخير ان كان صباحاً .. ومساء الخير ان كان مساءً ..
اتمنى حبيتووو البارت .. انطوني رأيكم ..

لا تنسون صوتو وعلقو وكلشي ينداس دوسو ..

احبكككككم كووومة 🕊