رواية بنات للزمن الفصل السابع والثلاثون 37 - بقلم سارة الشمري

الكاتبة : سارة الشمري 🖤

تعال لخاطر الله وخليني ارتاح
من زمان ما شافتك عيني
ولك هم تشتاقلي بالغربه مرات
لو ناسي الذي بينك وبيني
لو تدري الدمع ما فارق العين
ولا قلبي بغيابك مل ونيني
مشتاق إني إلك...مشتاق إني إلك
ولك قلبي محتام
هاي الأرض ما توسع حنيني

حارث //

ردت اطلع بس رجعت لان نسيت ملف بلبيت واشوف هويدة عالدرج ووجهة احمر ..
باوعتلي بخوف : حارث فدوة اركض شوف ريم .. شو اسمع صوت من فوگ .. ماكدر اصعد والله رجلية احسهة ماتت وبطني وجعتني ..

ركضت عالدرج : اني اشوفهة انزلي انتي لا تصعدين الدرج ..
رحت فتحت باب غرفتهة شفتهة ضلمة ..
دكيت باب الحمام بس ماكو صوت .. فتحتة مموجودة ..

طلعت بسرعة اصيح : رييم .. رييم وينج ..
فتحت الغرف الثانية ماكو ..
وصلت لغرفة المخزن .. ما جنت حاط ابالي افتحهة ..
بس كلت يمكن تكون هنا ..

فتحتة وصارت كدام عيني ريم قريبة عالباب ..
طايحة بالكاع ووجهة احمر وشفايفهة زرگ ..
فتحت عيوني اشوف الكاع كلهة دم من رجليهة داخل بيهة كزاز ..

نزلت بسرعة شلتهة عرفتهة متخربطة من التراب ومختنكة ..
طلعت بيهة واني جسمي كلة يرجف ..
نزلت الدرج وهويدة واكفة ببداية الدرج من شافتني لطمت على خدهة : يممممة بتييي .. شبيهة حارث .. رجليهة كلهة دم ..

باوعتلهة : حجاب .. جيبي حجاب بسرعة خل اوديهة للمستشفى ..
شالت حجابهة وحطتة على راسهة : اوكفلي فدوة خل اجيب عباتي واروح وياك ..

توجهت للباب : ماكو وقت .. اني اطمنج عليهة ..
طلعتهة للسيارة وحطيتهة بالكشن الورة وعدلت حجابهة ورحت للمستشفى .. خابرت ابوي واني بالطريق وهو راد يتخبل ..

وصلتهة للمستشفى ومباشرةً للطوارئ ..
بقيت برة افتر والوب خايف عليهة .. هاي كلشي بدنيتي ..

ورة تقريباً نص ساعة طلع الدكتور كال : حطينالهة اوكسجين وبخاخ .. ورجليهة طلعنة الكزاز منهن واحتاجن خياطة بس لا تخاف ماكو شي يقلق .. انشالله منا لحد ما تكعد تكدرون تطلعونهة ..

هزيت راسي وتشكرت منة ..
ابوي دخل يركض ويلهث : وييينهة .. وين بتي حارث .. شبيهة ..
هزيت راسي : ما بيهة شي يابة .. هسة ياخذونهة لغرفة خاصة وشوفهة ..

كعد عالكرسي وحط ايديناتة على راسة : انة جبتهة لبيتي حتى ترتاح وما تتعب وانتبه الهة .. شلوون هيج صار ..
تنهدت : يابة قدر ومكتوب .. المخزن جان بي تراب ومطبوگ عليهة وداست عالكزاز .. مابيهة شي بسيطة .. الدكتور طمنة عليهة ..

رفعت راسي وشفت رياض جاي ووراه هويدة ووياهم بنية ثانية ماعرفهة مبينة من اهلة ..

حنين //

بعدنة اني وعمو رياض بفرحتنة من بعد ما خابر عمتي هويدة وكاللهة وهي فرحت ..
كلبتهة هلاهل ورگص .. وهو يغني بس صوتة نشاز لان خشن ويحجي بخشمة ..

حبوبتي عاطت بينة : كااافي .. والله راسي انسطر .. صمي حلگج ولج البت بعدهة ما كالت اي ..
تخوصرت : وشحدهة تگول لا .. ترة الي خاطبهة مو حي الله عريس ..

عمي باوعلي : كفوووو .. عفية عفية ..
حنين : لعد شعبالكم .. ترة الي خاطبهة يكون عم حنين فضل بجلالتهة وقدرهة .. شنو تكول لا ..
حسيت بدفعة عمي الي من ورة : دوووخرري .. كال حنين كال ..

دك تليفونة رفعة : هاي ام العروس .. شبسرعة راح يرجعون خبر ..
فتح خط بضحكة : ترة ادري اني ما انرفض .. بس اثگلو مو بسرعة ترجعون خبر ..

فجأة ارتخت ضحكتة وطبگ حواجبة : هويدة شبيج .. على كيفج شنو ريم شبيهة .. خا افتهم ..

: شلوون ما تدريين .. شبيهة يعني شنو تخربطت ..

: دوكفي جاي جاي عليج .. بس على كيفج مو زين عليج البجي .. يلة راح اجي ..
سد التليفون وحبوبتي باوعتلة : شكوو يمة شبيهة ريما ..

وجهة احمر ويفرك بي بتوتر : مادري يمة مادري .. رايح لهويدة اني حتى اخذهة الهة للمستشفى لان ما لحكت تروح وياهم ..

باوعتلة بخوف : عموو اروح وياك خاف عمتي ما تكدر وحدهة ..
رياض : بسرررعة البسي شالج وعباتج وتعاي اني بالسيارة .. عالسريييع ..

ركضت جبت عبايتي وشالي ولبستهن فوك التراك مال البيت ..
طلعت للسيارة وهو گبل حرك ويسوق سريع ..

وصل لبيت عمتي هويدة ونزل بسرعة واني وراه ..
دكينة الباب وهي فتحتة لابسة عبايتهة وشالهة ودموعهة مالية وجهة وفوك هذا كلة لازمة بطنهة تعبانة : رياض اخذني الهة فدوة .. بسرعة ..

فتحلهة الباب وصعدهة واني هم صعدت ..
حرك السيارة وهو يستفسر : شني شبيهة .. ليش تخربطت ..

عمتي بخوف : مادري .. سمعت صوت من فوك .. صعد حارث ومن نزل شايلهة وهي مغمي عليهة ورجليهة تصب دم ..

تنهد بتوتر ويفرك بوجهة : هي شبيهة ؟ عدهة شي يخوف .. ليش هالكد خايفة انتي ..
ضربت على رجلهة : عدهة ربوو قوي .. تختنگ من التراب والدخان والركض الهواي ..

خفت عليهة حيل وعلى توتر عمتي اني توترت ..
وصلنة للمستشفى ونزلنة واني لازمة ايد عمتي اسندهة ..

دخلنة شفنة رجل عمتي ووياه ابنة حارث واكفين ..
من شافونة وكفو ..
حارث سلم على عمي ودار وجهة وراح على جهة .. اكيد لان شافني وميعرفني ..

خالتي حجت بلهفة : وينهة ريم شبيهة ..
حجالهة عمو ضافر على حالة ريم ..
اباوع عمو رياض متوتر ويباوع بقلق واهتمام بس ما يحجي شي ..
للحضة تمنيت اصورة والزمهة علي شلون يباوع .. هالمغرور هذا ..

بعدهم يحجون وجان يطلعون ريم بجرباية يدفعونهة ومحطوطلهة اوكسجين ورجليهة ملفلفة ..
حجابهة ما معدل زين وصالعة من كذلتهة شوية ..

رحنالهة بسرعة ونمشي وياهة ودخلوهة لغرفة خاصة ..
نقلوهة عالجرباية وثبتولهة الاوكسجين وعمو رياض يهمس بأذني : عدلي حجابهة .. ضمي شعرهة ..

ابتسمت وتقربت منهة عدلت حجابهة وضميت كذلتهة ..
عمتي لازمة ايدهة وتقرة عليهة ايات قرءانية ..

شوية وطلعو عمو رياض وعمو ضافر وحارث ..
ريم فتحت عيونهة .. وخرت الاوكسجين عن وجهة ..
عمتي حجت بلهفة : يمة كعدتي بنيتي .. شتحسين خو ما متألمة ..

غورگت عيون ريم : لحگتو بية .. ما متت ..
هزت راسهة عمتي وكامت تبجي : اسم الله عليج ماما .. مابيج شي .. سلامة گلبج ..
ريم طبگت حواجبهة : رجلية توجعني ؟؟

عمتي : مو انتي من اختنگتي دستي عالكزاز .. ورجليج تجرحت وطلعو الكزاز من رجليج وخيطوهن لا تخافين ماما .. جم يوم وتطيبين ..

هزت راسهة ..
ابتسمت : خلصتن رومنسية ودراما .. سلامتج عمة ما عندج غير العافية ..
ابتسمت : الله يسلمج حنونة .. بس شنو عمة ؟؟

عمتي هويدة خزرتني : خل تولي معليج بي ..
عوجت حلگي : اول وتالي تدري .. يعني الا انتو تنطون الخبر ؟؟
ريم : ياخبر ؟ بشنو ادري ؟

عمتي : خل تولي ماما لا تحطين ابالج .. ما تدرين بحنين يعني دومهة سوالفهة تمسلت ..
صغرت عيوني وباوعت لعمتي : اييي بعييني ..

اندك الباب وبعدين انفتح ودخل عمو ضافر : ها ريمي بابا .. شلون صرتي ..
دنك حبهة براسهة وبعدين كال : ولد عمج هنا جايين يتطمنون عليج ..

هزت راسهة : هلا بيهم ..
هو باوعلي : خاف حنين تستحي منهم ..
باوعت اكو ستارة تفصل بين جرباية ريم والجرباية الثانية : لا عمو اني راح اجر البردة واكعد هنا .. خل يدخلون ..

كمت اني وسحبت البردة وكعدت عالجرباية الثانية ..
شوية وسمعتهم دخلو سلمو على ريم وعلى عمتي ..

اصواتهم متفرقة ماكدر اركز بولا واحد بيهم ..
سمعت واحد منهم كال : وج ريمي شبقى بيج يومية طايحة .. بعد منو الياخذج .. هذا يا مگرود ..

ضحكت بصمت وكلت بگلبي : عمي رياض بالخدمة .. صدك جذب ..
واحد ثاني رد علي بهدوء : اصلاً خل يحمد ربة اذا انطيناه ريمي .. وين يلگة مثلهة .. والله امة داعيتلة الياخذهة .. هاي اميرتنة ووردة العائلة ..

غميت روحي وحجيت بگلبي : جا شمالهم اخوتي ما يگلولي انتي اميرتنة لو وردتنة .. مخلصينهة علية لگيناج بالزبالة واخذناج وربيناج تصدقنة عليهة وكلنة خطية ..

كتلني الفضول اريد اشوف اشكالهم ..
باوعت البردة بيهة زرف زغيرون ..
مديت عيني بس ماكدر اشوف زين ..

طلعت تليفوني ودخلت عالكاميرا ..
حطيت الكاميرا عالزرف وكمت اباوع بالتليفون بوضوح ..
فتحت عيوني وگمت اقرب عليهم واحد واحد ..

يمممة شهالجمال ..
حارث بلة شايفتة ودوم احجي واطرئ بجمالة ..
وجبران شفتة بعرسة ذاك اليوم بالصور ..
وراسم شوفتنياه ريم من سألتهة اذا جان زوج مريم حلو يخبل مثلهة .. وهي طلعتلي صورتة وشفتة ..

بس هذا واحد منطيني ضهرة ما اشوفة ..
عضيت شفتي وهزيت راسي : يلعن ام الهيبة اذا من ورة وهيج هيبة وحلو لعد خلقتك شلونهة ؟؟

لابس بنطرون نيلي وفوگاه جاكيت شتوي طويل اسود يوصل لنص الفخذ ..
رافع شوية من ردانة وطالعة الساعة مالتة ذهبية والقميص مبين من الردان لونة نيلي ..

طويل حيل مثل عمو رياض واكتافة عريضة .. ياخي هيبة طاغية والله ..
شعرة حيل ثخين وناعم ونازل اطرافة على رگبتة ولمعتة تجذب ..
تنهدت بقهر .. هذا العندك شعر والعندي شعر .. اووف ربي ..

ادور رفع ايدة ام الساعة ومدهة بشعرة ورجعة ليورة ..
اني معععت ..
هذا كلة واني اراقبة من ورة .. واكبر بالكاميرا وادقق بالتفاصيل ..

ريم باوعتلة : هادي مبين جاي من بغداد لهنا مباشرةً لان ما مبدل ملابسك ..
حجة بصوت عرفتة نفسة الكال اميرتنة : شلون ما اجي وكالولي ريمي تعبانة بالمستشفى .. يا تبديل هذا ..

افتر من الجهة الثانية ودنگ عليهة وباسهة براسهة : جم ريمي عدنة .. هي وحدة ..
فتحت عيوني وفهيت : يمة شنو هالسكر .. لالا حلاوة .. لالا كراميل .. اي كراميل والله ..

العيون مسحوبات وعبالك مكحلات من كثر ما رموشة ثخان ..
حواجبة مشمورات جنهن سيوف يخبلن ..
والخشم جنة قلم .. حلكة مغطى نصة بالشوارب ..
يا ماما وجهة يفتح النفس والله ..

تنهدت يمممة هذا ابن نعمة هاي الجنهة ثور ..
حتى الله ما يرضاهة تطلع منهة هيج خلفة تخبل ..
ادور حنون يربيييي ..

شوية وطلعو واني فتحت البردة حيل : ريييييييم ..
هي باوعتلي بخرعة : يممممة .. شبيييج ؟؟
باوعتلهة بعصبية : لج انتو عائلة لو مصنع مال كيك .. واحدكم احلا من الثاني ..

طبگت حواجبهة : حنونة شبيج ؟؟
تحولت عصبيتي لذوبان حطيت ايدي على گلبي : ااااه لا تگليلي حنونة .. ماكو حنية من بعدة .. لج يگلج اميرتنة ووردتنة ويدلعج ريمي .. يا ماما ..

ضحكت ريم : قصدج هادي ؟؟
غمضت عيوني : دخيلك يالهادي شكد حاط بي هيبة وجمال .. لج بس لا خاطب ؟؟

هزت راسهة بضحكة : لا ابشرج لا خاطب ولا متزوج ؟؟
سويت نفسي مستحية ورمشت بعيوني : هاا .. اوك ..
ضحكت ريم : كدامج اخذي .. بالعرضة ..
حنين : احمم مو عيب عليج اشايفتني ..

طلعت عمتي من الحمام وتباوعلنة : شعدجن شتسولفن ..
هزيت راسي بسرعة : هيج ماكو شي ..

اندك الباب وراحت عمتي فتحتة ..
دخل وراهة عمو رياض ..
ريم عدلت كعدتهة ورجعت ضهرهة ..
هو دخل مبتسم بهدوء : الحمدالله عالسلامة ريم ..

ريم بضيق مبين عليهة : الله يسلمك ..
رياض : بعدج زعلانة من ذاك اليوم ..
دنگت راسهة وتلعب بأصابعهة ما حجت ..
عمو رياض : يابة ما جان فصدي بس من عصبيتي ماكدرت اسكت ..

ريم : اذا انت تعصب اني شعلية تصيح علية .. حتى مادري انت على شنو تعصبت ..
هز راسة هو يريد يغير الموضوع : المهم هسة .. بما ان تطمنة عليج .. احنة نترخص .. يلة حنين ..

كمت اني سلمت على ريم وعلى عمتي وطلعت وية عمو رياض ..
طلعنة واشوفهم واكفين على جهة ويسولفون ..
طاحن عيني على هادي ..
تنهدت بگلبي يمة شحلاتة ..

رفع راسة هو جان يضحك ويسولف ..
اجت عينة بعيني ارتخت ضحكتة وتحولت لابتسامة وطابك حواجبة مستغرب جاي اباوعلة .. مدري لان كال هاي وين جانت شو من دخلت ما شفتهة .. احلل من كيفي .. 
درت وجهي بسرعة من شفتة يباوعلي وطابگ حواجبة .. عزززةة ..

عمو رياض باوعلي : شبيج مفهية امشيي بسرعة ..
هزيت راسي واني امشي وراه ..
مر من يمهم سلم عليهم من بعيد وترخص عالسريع وهمة ردو السلام ..
اني مدنگة راسي ومشيت ليگدام ..

اجة عمو رياض ومشة كدامي : يلة امشي ..
مشيت وراه .. بس رجعت التفتت شفتة يباوع ومبتسم رافع تك حاجب ..
نزلت عيني ومشيت سريع وجان انلطخ بضهر عمو رياض .. فركت خشمي وصحت : يبووو ..

عمو باوعلي طابگ حواجبة : عمى حتى عمى .. شبيج مثولة اليوم ..
سمعت صوتة من ورة بضحكة : سلامات سيدنة .. خو ماكو شي ..
عمي رفع ايدة : سلامتك حجي ماكو شي  ..

يبوو ردت ابجي من الفشلة والله .. حتى ما التفتت عليهم ..
عمو رياض رص على سنونة : امشي لا اجيبج براشدي كدام العالم ..

مشيت بسرعة وطلعت من المستشفى وعمو كدامي ..
صعدت بالسيارة واني مبرطمة ..
غطيت وجهي بالعباية وعضيت ايدي بفشلة اهمدااني هسة الا اباوع ..

نزلت عبايتي واباوع عمو رياض يباوعلي طابگ حواجبة : شبيج .. تعورتي شني .. خشمج صار احمر ..
فركت خشمي : لا هسة يروح ما بية شي ..
حجيت بگلبي استااااهل .. المن باوعت المن .. هسة ايكول هاي ملطلطة وما شايفة حلوين ..

زمن //

كاعدة بالصالة ..
عمتي صارلهة جم يوم وجهة ثكيل علية ماعرف ليش ؟؟
البيت هادئ وطبيعي الا جيلان كامت ما تطلع من غرفتهة ومخلصتهة نوم ومن احاول اكعدهة اتكلي ماما نومتي اختربت واضل كاعدة الليل كلة اتفرج افلام وانام الصبح ..

باوعت لعمتي استكانهة مخلص : عمة اصبلج جاي بعد ..
هزت راسهة : ماريد ..
شلت الاستكان وحطيتة بالصينية وباوعتلهة : عمة انتي ضايجة مني ؟؟ اشو صار جم يوم مو على بعضج ..

هزت راسهة : وشلون ما تردين اضوج وانتي حارمة ابني حگة ..
فتحت عيوني : شنووو ؟

عدلت كعدتهة : لا تسوين روحج فقيرة .. هذا كلة حرام عليج .. هذا شرع الله وحگة وانتي حارمتة منة .. الله وملائكتة تضل تلعب بيج شما سويتي ..
موش كافي سنين حارمتة .. وهسة انتي مدامة وما يكضج .. عبالج الله راضي عليج ؟؟

بلعت ريگي : عمة شنو هو شاكيلج لو كايلج شي ؟؟ طلب منج هالشي ..
نترت : لاء ما فك حلگة وحجة .. بس اشوف عيونة تلاحگج ويتحسر عليج .. ولج حتى شوفة عيونج حارمتة منهة .. كل ما شفتي طب للبيت تخلين وتكومين .. هذا كلة الله ما يرضى علي ..

هدئت نبرة صوتهة : وج يمة هذا رجلج وابو بنياتج .. الصار راح وخلص وية وكتة ..
خلي بگلبج رحمة اذا الله يسامح ويغفر انتي ياهو وما تغفرين ..

افرك بيدية وادري كلامهة صح هذا حرام علية ..
بس كلبي بعدة يأذيني .. واتذكر كلامة وضربة الي .. ما يرحن من بالي ..

عمتي : وادري بيج ترة بعدة گلبج يرفرف علي ..
رفعت راسي عليهة بسرعة : هااا ؟؟
عمتي : وجعاا شنهي الهاا .. حسبالج ما اعرف .. هم حبينا وانحبينا من گبل ..

هزيت راسي : عمة ماكو هيج .. مرت سنوات طويلة .. حبة انمسح من گلبي ..
عمتي : دفوتي فوتي .. حسبالج ما شفتج هذاك اليوم من ضغطة صاعد ومتخربط .. تفترين جنج سمجة مزوهرة .. وج يمة لا تقسين گلبج هيج .. صيري احسن منة وسامحي ..

هو عذبج وضربج وحرمج من بتج سنين ..
وانتي رديتيهة الة ازيد وحرمتي من ثنين بناتة مو وحدة ..
اخذتي بثارج .. ليش بعد شايلة بگلبج لهسة ..

كمت بهدوء : عمة اعذريني .. اني اترخص ..
هزت راسهة : روحي يمة روحي وفكري بكلامي زين .. ترة هوة الصح ..
طلعت من الصالة ورحت للمطبخ ..
كعدت عالكرسي واهز برجلي ..

من كلام عمتي هيجت ذكريات ابالي احاول انساهة ..
لزمت راسي واتذكر كلامة وياي وحنيتة ولمساتة ..
هزيت راسي بسرعة اطرد افكاري .. لا كلة هذا بقى بالماضي .. هو تغير نعمة سيطرت علي .. عمتي تتوهم هو ميحبني مثل قبل مستحيل هالشي ..

مرت ابالي اخر ذكرى الي قبل سنين ..
ضرباتة وكلامة الي مثل السم ..
اني اتوسل بي وهو ما يسمعني ..
بجي مريم وصراخهة من منضر ابوهة وهو يضرب بأمها لهسة ابالي ..

حطيت ايدي على اذني ودموعي كامت تنزل ..
لا هو كتل حبي بكلبة من ذاك اليوم ..
الي يحب ميسوي هيج ..
هو سمع كلام نعمة وما صدگني ..

فتحت عيني على لزمة بأيدي ..
رفعت راسي ووخرت ايدية شفتة كاعدة على ركبة كدامي ويباوعلي بقلق ولهفة خوف : شبيج ؟؟ ليش تبجين .. متأذية من شي .. ليش لازمة راسج ؟؟

اباع بعيونة ..
حجيت برجفة : نفسهة ما تغيرت .. طول هالسنين نفسهة ..
عاصم : شني هية ؟
دموعي نزلت بالزايد : نضرتك هاي عاصم .. ما تغيرت نفسهة .. هيج جنت تباوعلي ؟؟

ارتخت ملامحة وبلع ريگ ورجع باوعلي : ليش عبالج راح تتغير ؟؟ انتي عبالج السنين تنسي الي بالگلب .. لا غلطانة ..
انتي بگلبي لهسة مثل جنتي ..

غطيت عيوني وكمت ابجي ..
وخر ايدي عن عيوني وحجة : لا تضمين عيونج .. خليني اشبع منهن .. هذني بحري وسماي (سماء) ..

رجع كمل كلامة : عبالج بالبعد راح انساج وابطل ما احبج ؟؟
حتى وانتي بعيدة وطول ٢٢ سنة .. كل ما اكبر يوم انتي حبج بگلبي يكبر سنييييين .. وليومج هذا ..

ما انكر واكلج ما زعلت .. والله شلت بگلبي حيل ..
ضميتي علية بناتي .. وجذبتو علية بسالفة زواجج ..
بس كلبي بعدة يريدج ..

اسمعة يحجي واني اتألم بالزايد ..
هزيت راسي : اذيتني حيل وكسرت گلبي .. شلون انطاك گلبك تسوي بية هيج ..
دنك راسة : ادري غلطان .. والله ادري .. بس ادري بگلبج احسن من گلبي وما ينطيج تعذبيني اكثر من هيج ..

درت وجهي للجهة الثانية ..
حجة بترجي ورجفة : لا تديرين وجهج عني .. انة ما صدگت تباوعين بعيوني .. انتي ما تدرين شصار بية من رحتي .. والله عيونج اتحلم بيهن الليل كلة .. كل ما اشوف مريم تجين ابالي .. كلشي بيهة يشبهج وتصرفاتهة وحجيهة .. عيشني بضيم وعذاب طول السنين الفاتت ..

ارتخى صوتة اكثر : لا تحرميني منج اكثر من هيج .. كلبي خلص من الفراگ والله ..
ضعفت انفاسي وكلبي رجف من حسيت بشفايفة على ايدي .. طول ببوستة على ايدي ..

حسيت بشي حار حار نزل على ايدي ..
باوعتلة بسرعة رفعت راسة شفت دمعة نازلة من عينة ..
گام وگف على طولة ..
رجع ليورة خطوتين يريد يطلع ..

كمت اني ورجعت تقدمت منة ذني الخطوتين بسرعة وحضنتة ..
حطيت راسي على صدرة وكمت ابجي : لا تروح فدوة لا تروح .. اي اني گلبي مو مثل گلبك ما ينطيني اشوفك هيج ضعيف .. ماكدر اعوفك هيج ..

جر حسرة ممصدك : يعني رديتيلي .. سامحتيني ؟؟
هزيت راسي : سامحتك .. بس لا تعوفني مرة ثانية ..
حضني لصدرة اكثر : بوية مسودن واعوفج مرة ثانية .. انة على هاي ومتندم بكد شعر راسي ..

وخرت منة وامسح بدموعي ..
فجأة انتبهت : ونعمة ؟؟
عاصم : والله لانعل ابو نعمة لابو الخلفهة .. ترضى ما ترضى يطبهة طوب .. ان جان ما رضت بيت اهلهة موجود وتروح وتفكني منهة .. وان رضت بيتهة موجود وهم تكعد وتنجب ..

وهسة انتي شذكرج بنعمة لخاطر الله .. والله طاكة روحي منهة .. شو تعاي اشمج ..
سحبني لحضنة مرة ثانية ..
ردت ابتعد لا يجي احد ..

بس قبل لا يحجي وانفتح الباب بسرعة مال المطبخ الي من جهة الحوش ..
شفت راسم هستوة دخل ويباوعلنة بصدمة : عمي عاصم ..

عاصم باوعلة بغيض : مووو وككتتتتك .. ما تعرف تنتضر شوية ..
فتح حلكة وباوعلي وباوع لعاصم ..
رفع ايديناتة وضحك متفاجئ : اسف عمي .. بس مكانكم غلط .. يعني قصدي شسمة .. ااء عن اذنكم ..

دخل بسرعة ودخل للبيت من باب المطبخ الداخلي ..
باوعت لعاصم : فششلة .. اني اروح ..
سحبني من ايدي : وييين ؟؟
جريت ايدي : وين يعني ؟ تريد الحجية تكبس علينة ترتاح ..

عفتة ودخلت جوة واني متفشلة شكد عيب من راسم ..
بس الاهم من هذا كلة .. عاصم ..
ضحكت حسيت نفسي رجعت من احبة اول جديد ..
مع ان حبة بعدة بكلبي وما تغير .. بس احس هسة رجعتلي روحي ..

مريم //

باوعت لديلارا اشرتلهة : واحد ثنين تلاثة ..
فتحت الباب بسرعة ودخلنة نصيح : جوووجووو ..
جيلان فزت مخترعة : يمممممة .. شكوو شبيجن ؟؟

ديلارا طبگت الباب ..
كعدت اني بصفهة وديلارا من الجهة الثانية ..
لزمت خدهة : ليش هيج الخدود الحلوات ذبلانات ..
ديلارا : والعيون الناعسات مورمات وكلهن دموع ..

نزلت راسهة ونزلت دمعة من عينهة ..
رفعت راسهة من حنجهة ومسحت دمعتهة واقلد طريقة كلامهة من تجي تتغزل بية وتريد مني شي : اختي الحلوة ام شعر حلو مثل شعر ريبانزل ..

باوعتلي وابتسمت : انتي شعر ريبانزل مو اني ..
ديلارا : يلة عاد كوومي جلاتينة .. منو يسويلي دايت ويخليني التزم بي غصباً علية .. ترة زدت كيلوين ..

مريم : ورضا يسأل عليج .. ايگول عمة جلاتينة كامت ما تحبني ليش ما جاي تلعب وياي مثل كل يوم ..
باوعتلي وغورگت عيونهة ..
حضنتني وكامت تبجي ..

حضنتهة اني وديلارا ..
ديلارا : جلاتينة حبيبي يلة عاد والله متلوگلج الدموع ..
كملت كلامهة وهي تقلد طريقتهة بالحجي : كوومي انتي بس گليلي منو عاركج .. الي يرشج بماي ارشة بنفط واحرگة .. انتي بس گولي ..

باوعتلنة ومسحت دموعهة : مابية شي .. تعبانة اريد انام .. بلا نفط بلا هالسوالف .. حبابات عوفوني لوحدي ..

سكتت شوية ورجعت حجيت : ريم تريد تحجي وياج .. رادت تجي عليج .. بس تخربطت واخذوهة للمستشفى ..

فتحت عيونهة وباوعتلنة بخوف : ريما شبيهة .. ليش مستشفى .. ليش محد گلي ؟؟

ديلارا : لا تخافين ؟؟ هي هسة بالمستشفى بعد شوي يطلعونهة .. هادي كال لا تگولون لحبوبتي خاف تنهبط .. بس ما بيهة شي تعرفين ربو وهم رجليهة متعورة بگزاز ..

ماما گالت بليل نروحلهة من تطلع من المستشفى ونزورهة بالبيت ..
رجعت بجت : يعني اكيد ما بيهة شي .. عليجن الله ..

ديلارا هزت راسهة : والله ما بيهة شي .. حتى هسة راح اتصل عليهة وانتي احجي وياهة .. هي رادت تحجي وياج ..

عفتهة تحجي وية ريم وطلعت ..
صعدت لغرفتي واشوف راسم يفتر رايح راجع ..
طبگت حواجبي : راسم ؟؟ شبيك ؟

هز راسة : لا لا لا لا .. يعني اني صرت مثل جيلان ؟؟
استغربت : شنوو ؟ شبيهة جيلان ؟
ضرب على گصتة : يعني عمي عاصم هسة يريد يكضني يكطعني ويعلگني بالبنكة ..

فتحت عيني : شنوو ؟ ليش شبي ابوي .. راسم ليش يعلگگ بالبنكة ..
راسم : لان اني هيج احس من تدخل علينة جيلان تخرب علية لحضاتي الرومنسية .. احس اريد اعلگة بالبنكة واكطعهة تكطع .. يعني هسة عمي يحس بية نفس هالاحساس ..

حصرت ضحكتي : ليش خربت لحضات ابوي ونعمة .. شوداك الهم ؟؟
باوعلي : يعني انتي من كل عقلج متخيلة اكو لحضات رومنسية بين ابوج ونعمة .. شوف التفكير ؟؟

استغربت : اذا مو نعمة .. منوو ؟
رفع حاجبة : منو يعني ؟ امج وابوج .. لگيتهم متحاضنين واني دخلت مثل الثور المستعجل .. مثل دخلات جيلان الكلهة همجية ..

فتحت عيوني بصدمة : امي ؟؟ وابوي ؟؟ متحاضنين ؟؟
هز راسة : ايي .. والله شفتهم بعيوني .. بس ترة مو مشكلتي من دخلت عليهم لان همة جانو بالمطبخ يعني مكانهم غلط .. اني معلية ..

طبگت حواجبي مستغربة ..
شلون همة مو ميتحاجون ؟؟ .. شلون متحاضنين ؟؟
يعني تراضو لو شنو ؟؟

ما لحگت افكر الا واسمع صوت صياح ..
وهالصوت اعرفة اكثر من اسمي ..
ياما كعدني وخرعني من نومتي وصيح علية وبجاني ..

صوت نعمة تصيح وتعيط : ولللللللللج بوااااكة الزلمممم ..

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

الكاتبة سارة الشمري🖤

مرحبا للكل .. اسفة عالتأخير ..
اتمنى عجبكم البارت وحبيتو ..
لا تنسون صوتو وعلقوا وكلشي ينداس دوسو ..
احببببكم