رواية بنات للزمن الفصل الثامن والثلاثون 38 - بقلم سارة الشمري

الكاتبة : سارة الشمري🖤

الحزن ان أغمض عيني فاراك،، وان اخلو بنفسي فاراك،،، وان أقف امام المرآة فاراك،، وان المح هداياي فاراك،،،وان اقرأ رسائلك فاراك،،، وعندما أعود لواقعي لا أراك

نزلت اركض وراسم كدامي ..
اسمع صوت صياح نعمة وبعلو صوتهة بنص الصالة ..

نعمة : ولج بواگة الزلم من لا رديتي .. تحومين علي من اجيتي لهسة .. الفككككررررية ..
حبوبتي وكفت وصاحت بوجهة : خايييبة وسسسم .. شني ولج شو مستهترة .. ما تحشمين جبير بهالبيت طابة علينة جنج ثور هايج .. شني مالج رداد ..

اباوع تباوعلهة وطابگة حواجبهة بعصبية ..
راسم : يابة استهدوا بالرحمن .. شنو الموضوع ..
نعمة بشبه عياط : لحد يگلي اسكتي .. ولج ما صدگت خلصت منج .. رديتي علية هسة يريد يرجعج .. والله اگلب الدنيا على راسج ..

امي باوعتلهة بعصبية : نعمة احترمي نفسج .. وخليني محترمة وجود عمتي وماريد ارفع صوتي عليج .. ماعندي كلام احجي وياج لان مالج كل حق تجين تصيحين ..

نعمة تقدمت تريد تهجم عليهة بس راسم صار بالنص : نععمممة .. لا تسوين مشاكل وروحي لبيتج ..
نعمة تحاول تدفع بي : دوووخخخر .. هاي الـ*** طولان السانهة وترد بوجهي .. فوگ شينهة گواة عينهة ..

حبوبتي شالت عصتهة وضربتهة على ضهرهة : محد شينة غيرج .. ولج انتي شني من بشر .. عقل هذا لو مطي .. هذا حگهة وحگ ابني .. انتي المالج حگ ..

اباوع نعمة وجهة گلب احمر وتباوع لامي : اشوفج الضيم والله .. مو كافي سنين ماخذتة مني .. بس والله ماداخليج تتهنين بي ..

راسم زمخ بيهة بعلو صوتة : كاااافي .. امشي اطلعييي برررة يللة .. خليني ساكت لان اذا حجيت انتي تشوفين الضيم ..

باوعتلة هي بعصبية : خااابب دروووح .. انوب رويسم علية .. عبالك صرت دكتور تشيخ علية شني .. دير بالك .. اني ما اتهدد .. ما تگدرلي .. شتريد تحجي احجي ..

راسم برفعة حاجب : رويسم ها ؟؟ اي احجي ليش لا .. احجي عالسحر المسويتة وحاطتة بالبلوعة الخلفية مال البيت .. مسويتة لمريم وعمي عاصم وزمن .. مخليتهم واحد ما يريد الثاني ولا محنة بيناتهم ..

فتحت عيوني بصدمة : شنووو ؟؟ سحر ..
راسم : اي سحر .. شايفة الي طلعتي من بطنج ذاك اليوم .. هو هذا السحر صارلة سنين ابطنج وكل ما ضجتي معدتج تكوم توجعج وما تكدرين تستفرغين ..

اباوع لنعمة وعيوني غوركت ..
هي وجهة كلب الوان وكامت ما تعرف وين تباوع ومصدومة ..
هزت راسهة بتوتر : لا انت جذاب .. اني ما مسوية سحر .. 

راسم : لعد منو الة مصلحة يبعد هذولة التلاثة عن بعضهم ويخليهم واحدهم يكره الثاني ..
حبوبتي عاطت : دههههر دهرررج .. مسوية سحر لابني .. تردين تموتينة .. يبوووي بعد شتسوين ولج وما سويتي .. تهجمين بيوت يمفلوكة ..

نعمة عاطت ودموعهة نزلت : اييي سويتة .. اني سويت السحر .. انتو ما تعرفون شني الشفتة انة ..
يومية اشوف عاصم الليل كلة يتحلم بيهة ويكول اسمهة بنومة .. ومن سوء حضي بتهة طلعت نسخة منهة ..
انتبهلة شلون يتصفن عليهة ويتنهد بحسرات ..

ولا مرة باوعلي مثل ما يباوعلهة ..
مو مرتة انة .. اشفت منة بس العرايك والصياح ..
ما حسيني بيوم انة مرتة .. لا حجالي حجاية حلوة ..
ولا عاملني مثلهة .. شبية انة ليش يكرهني ؟

حبوبتي : من ورة عمايلج السودة .. شيحب منج ام السحورة .. شوفتي بتة الضيم .. تگومين وتگعدين تحجين عليهة وعلى مرتة وتغلطين .. وتعايرين بي بسالفة انتي سويتيهة .. ولج خلصتي عمرج تكليلة عافتك ومشت وية واحد تحبة .. شترررددديين يحب منننج ..

نعمة تمسح بدموعهة : عمممة من حرگة گلبي .. شفتيني قصرت وياه گبل لا ياخذهة علية .. شتردين اسوي من اشوف رجلي جاي ومتزوج وحدة كردية وجايبهة ابيتي .. شلون تردين اسكت ..

حبوبتي : لو بيج عگل جا بساعتهة گبعتي روحج ووليتي لاهلج وخليتي لروحج كرامة .. مو ضليتي بالبيت وتدورين عرايك وخراب بيوت ..

نعمة : وتردين اروح واعوف حگي الهة .. هي الجان مفروض تروح من بيتي .. هي الاجت واخذت مني رجلي .. ام الزلللم هاي ..

ثواني وما اشوف الا جيلان دخلت بالنص ورفعت ايدهة وسطرتهة على خد نعمة ..
عاطت بيهة : كااافي ما مليتي وج بت الاوادم حسسسي عااد .. ماايرييدج .. ليش تلطشييين .. تجين تهددين على امي عبالج محد يسكتج ..

راسم سحل جيلان من بلوزتهة وطلعهة واني لازمتهة نريد نطلعهة راسم عاط بيهة : وج تخبببلللتي ؟؟ جيييلللااان .. شلون تمدين ايدج عليهة ..

جيلان بعياط تحاول تفك روحهة من عدنة : فككوووني .. خل اطيح حضضههة .. اشايفة روحهة هاي ..
سحبهة راسم ودخلهة لغرفة امي واني وراهة ..

رجع يريد يطلع وباوعلي : ديري بالج تخلينهة تطلع .. ترة هاي اعصابهة محترگة على موضوعهة هي وحارث وتريد تطلع حرگتهة بنعمة .. الزميهة ..

طلع وطبگ الباب ..
جيلان : ماااا معصبببة .. شنو تصيييح على امي ..
طلعت وقفلت الباب عليهة ..
رجعت للصالة ..

باوعت لنعمة : ليش بعدج واكفة .. روحي منا ترة محد غلطان غيرج ؟؟
نعمة باوعتلي وجرت نفس .. نزلت دموعهة وطلعت من البيت ورگعت الباب ..

امي رادت تروح لجيلان بعصبية واني صرت كدامهة : ماما فدوة لا .. عوفيهة لا تحاجينهة .. والله هي لا ما تقبل تحجي عليج سوت هيج .. ما تعرفين جيلان شكد عصبية ..

باوعتلي بعصبية : مريم وخري اريد ادبهة ..
باوعتلهة بترجي : ماما لخاطري .. اول مرة اطلب منج شي ..
باوعتلي بحيرة وتنهدت وراحت ..

فتحت باب الغرفة بسرعة وسحبت جيلان من ايدهة اريد اصعدهة فوك ..
طلعتهة وهي تتلفت : وينهة وينهة هاي خرابة البيوت وين راحت ؟

سديت حلگهة بيدي : دمممشييي .. لا تسمعج امي والله تطيح حضج .. بس خل نوصل لغرفتج ..

رضوان //

صارلي جم يوم ما اكدر انام بليل وانزل على امي تقرة على راسي .. وعلى هالحالة ..
اليوم رجعت العصر للبيت ..
وية ما دخلت صارت بوجهي بت خالي زينب ..

شافتني دنگت راسهة كملت طريقهة تريد تطلع ..
حاجيتهة : اوكفي زينب ذاك اليوم ردتيني بموضوع ..
ما التفتت علية حتى وطلعت بسرعة ..

دخلت للبيت مستغرب واسمع صياح امي ..
رحت بسرعة : ها يمة شبيج تصيحين ..
باوعتلي بعصبية وصياح : امشي هسة توديني لبيت خالك ..

استغربت : شكو صاير شي ؟
امي : هو كول شني الما صاير .. انننة يضحكن علية ؟ بس العتب مو عليهن .. على اخوي الغدر بية ؟

طبگت حواجبي : شنو الموضوع بشنو غدر بيج ؟؟
امي تتراجف من العصبية : هسة اكلك تاخذني الهم امشينة .. لا اخذ منهم مرة ولا اطببهة لبيتي هالحية هاي ..

فتحت عيوني بفرحة : تأمرييييييين .. يلة امشينة .. بس فهميني السالفة بالاول ..

امي : زينب جايتني المكرودة هسة اتگلي عمة انة اريد ابري ذمتي وماكدر اسكت عن الحق .. ترة اختي عدهة مشكلة بالرحم وما تكدر تخلف ابد واكتشفت هالمشكلة من اول ما بلغت .. وكالت ابوي من درى ذبهة برگبة رضوان كال وافشلة ما يكدر يرفضهة ..

فتحت عيوني وتصنعت العصبية واني كلبي يريد يطير من الفرحة : شلووون .. اني هيج يسوون بية .. امشي يمة امشي .. ما ناخذ منهم مرة لو تنگلب الدنيا .. امشي نهد عليهم ..

تلبس بعباتهة ومشت كدامي : انت بس وصلني وضل بالباب .. مالك شغل انة اهد .. احرك شيب الخلفعهن اليوم ..
ابتسمت ورحت فتحتلهة الباب : اببششري ..

صعدت بالسيارة وحركتهة لبيت خالي رغم همة قريبين علينة واكدر اروحلهم مشي بس امي ما تكدر تمشي لان تعبانة ..
الطريق كلة امي تدردم وتغلط وبنات فلان وهيج هيج منجن ومن ابهاتجن .. واني كلبي يركص من الفرحة ..

وصلتهة لبيت خالي وهي نزلت تضرب بالباب بكل قوتهة ..
لمن فتحتة الهة بت خالي الزغيرة وهي دفعتهة وطبت وركعت الباب بوجهي .. يلة ميخالف المهم راح اخلص ..

وكفت يم الباب واسمع صياح امي وغلطهة ..
واني بودي اضرب جوبي هسة ..
يا ويلاه راح اخلص من هيام وتفرغلي الساحة وية دلوو ..
يابووي والله مشتاقلهة .. بس يلة ما ضل شي واشوفهة ..

طلعت تليفوني ودگيت على راسم : حي الله اخوي الجبير .. حي الله زين الشباب .. حي الله دكتورنا الغالي ..
راسم نتر : احجي من الاخير شتريد ترة واصلة لخشمي .. وهستوني طلعت من عركة نسوان ..

ضحكت : اني يمي بعدهة العركة مستمرة عوزهة شوية وتستوي ..
راسم : عركتيش ولك ؟؟
ابتسمت : عركة من العيار الثقيل .. امي جاية هادة على بيت خالي وتكللهن ما نريد بتكم .. واني برة انتضرهة تطلع ..

راسم : اممااانة .. امي ما تريد هيام ؟؟
ضحكت : اي والله .. وانت تخيل بعد ..
راسم : ليش شكو شصار فجأة ؟؟

شفت امي طلعت ووجهة احمر : بعدين احجيلك .. امي طلعت ..
سديت التليفون وباوعتلهة فتحت الباب وهي صعدت ..
افتريت اني وصعدت : گواج الله ام راسم .. شصار ؟؟

حجت بعصبية : اطيتهن المقسوم هي وامهة .. وابوهة ما اريد اشوفة ابد ..
حركت السيارة : بكيفج يمة ..

وصلت للبيت .. ونزلت اني ورحت لغرفتي اريد ابدل واحس هم وانزاح عن گلبي ..
انفتح الباب بسرعة وطبت امي : خير يا ساتر يمة شبيج ؟؟

ما باوعتلي وراحت لفراشي : انت من تنام هنا راسك يوجعك ؟؟
هزيت راسي : اي ؟ ليش ؟

جرت المخدات تدور بيهن ..
فتحت الثانية وطلعت منهة مثل حرز ملفوف بقماش سودة ..
طبگت حواجبي : هاي شني ؟؟

ضربت على راسهة : هاي المفلوكة حاطتلك سحر .. ذاك اليوم من طبت غرفتك حطتة امبين .. امشينة اخذني اهد عليهم ..

لزمتهة من ايدهة : يمة شني السالفة خل تولي .. كلساع رايحيلهم حتى رجليج طاحت .. عوفيهة لا تكبرين راسهة ..
اخذتهة هي وطلعت وتتوعد : سهلة يبيت اخوي سهلة ..

بسمة //

كاعدة اني ومريم وديلارا بالصالة يم حبوبتي ..
ام مريم بغرفتهة .. وجيلان هم بغرفتهة ..

دخل عمي عاصم وشكلة يدري بالسالفة ..
باوعلنة : وين زمن ..
مريم : بغرفتهة ..

دار وجهة وراح لغرفتهة ..
حبوبتي باوعتلنة : شبيجن مخلوسات ؟ مو ليگول متعودات على عرايك نقمة .. كومن يلة شوفن شغلجن ..

باوعتلنة اني ومريم : وانت كل وحدة تروح لزلمتهة وتنطي خبر بليل نروح نشوف ريمة .. يلة كومن ..

كمت اني ورجعت للبيت ..
دخلت للصالة واسمع صوت خالتي نعمة جاي من غرفتهة تبجي ..
تنهدت .. هي غلطت بتصرفهة الي سوتة من البداية يعني من قبل سنين ..

ضلمت مريم وضلمت امها وضلمت عمي همين ..
كل هالشي علمود نفسهة .. وهالشي غلط ..

صعدت لغرفتي شفت جبران متمدد عالجرباية وحاط ايدة على عيونة ..
استغربت وتقربت منة : جبران حبيبي من شوكت اجيت ..

حجة بدون ما يتحرك ابد : قبل ساعة ..
لزمت ايدة ووخرتهة عن عيونة : شو ما شفت سيارتك برة .. مادري بيك اجيت ..

هز راسة بهدوء بدون اي تعبير بوجهة : صاحبي وصلني للبيت وراح .. سيارتي بقت بالمعمل ..
استغربت : يعني سمعت صوت الصياح وبقيت كاعد ..

تنهد ببرود : سمعت صوت امي ابيت جدي .. وسمعت صوت صياح ابوي هسة على امي .. بس شنو الجديد .. مليت من العرايك .. شعلية اني بيهم ..

استغربت طريقتة بالحجي اباوع عيونة ذبلانة وبيهن احمرار بسيط : حبيبي شبيك .. تعبان شنو .. ليش هيج وجهك ..

حط راسة على فخذي وغمض : مابية شي ..
حطيت ايدي على خدة : لا والله شوف وجهك على عيونك حمر .. متأكدة بيك شي ..
باوعلي طابك حواجبة بأنزعاج : كتلج مابية شي .. بس اريد انام ..

لزمت ايدة : جبران والله بيك شي .. كلبي ما يرتاح الا اتطمن عليك ..
وخر راسة ودفع رجلي بعصبية وايدي ونتر : شو وخرري شكد تلحين .. من اگلج مابية شي معناها مابية شي .. امشي من كدامي خل انطمر ..

وكفت واباوعلة بصدمة .. اول مرة هيج يحجي وياي ..
عفتة براحتة وطلعت .. اكيد تعبان واني لحيت علي ..
يمكن متعصب من ورة الشغل .. اي اكيد ..

ردت امشي بس تذكرت حبوبتي كالت كليلة نروح لبيت عمو ضافر نشوف ريم ..
تنهدت كلت خليهة بعدين من نريد نروح اگلة .. هسة معصب ويريد ينام ..

رجعت للبيت الجبير ..
بقيت اساعد البنات بالمطبخ ..
سوينة العشا وكملنة ..
جيلان ما تنزل اصلاً والبنات ياخذلهة اكلهة فوگ ..

بعدنة واكفين بالمطبخ ودخل هادي ..
سلم علينة لان جان ابغداد صارلة يومين ..
فتح الثلاجة وحط مي بكلاص ويشرب ..

ديلارا شارت ماعون الشوربة جان يوكع منة شوية على ثوبهة ..
شهكت هي : يبووو ..

هي حجت هاي حجايتهة وهادي شرگ بالمي وكام يكح ..
مريم تباوعلة طابگة حواجبهة : اسم الله شبيك ؟؟

من بعد ما هدئ كام يضحك ..
احنة نباوعلة مستغربين ..
ديلارا : ترة ما گلت شي .. شدعوة عليك ؟

هادي بأبتسامة : احمم اترخص منكم ..
طلع من المطبخ ..
مريم فاتحة حلگهة : هذا هادي الزين هيج اخترب .. لعد ما ينعتب على جبران وحارث ..

كملنة العشا وصبيناه والكل تعشو ..
رحت للبيت اريد اصيح جبران من دخلت ما لگيتة ..
طلعت تليفوني اتصل علي ميجاوب ..

خابرتني مريم واني بغرفتي : بسمة يلة حبوبتي كالت بدلن حتى نروح لريم .. استعجلي ..
بسمة : ياا ولج اني ما كايلة لجبران بعدني ..

مريم : ديلة عاد على اساس راح ايگول لا .. قابل وين رايحين هي لبيت عمي .. بسرررعة يلة حبوبتي اتكول لا تأخرنة ..

كمت : ماشي يلة بس ابدل واجي ..
رحت بدلت ملابسي ولبست عبايتي ورحت للبيت وادعي بلكي اشوف جبران حتى انطي خبر وهم اتطمن علي لان مساع جان تعبان وهسة ميرد على اتصالاتي ..

البنات جانن مبدلات ..
فرحت من شفت جيلان هم متحضرة بس وجهة باهت وكوة كاعدة ..
كعدت بصفهة وحجيت : جلاتينة يلة عااد ميلوگلج الزعل .. رايحين نتطمن على ريم .. شوية اضحكي ..

جيلان : بسمة والله مالي خلگ لشي .. البنات سحبني سحب وياهن .. ماريد اروح اني .. بس هم علمود ريم ..

كمنة لبسنة عباياتنة من صاحنة هادي كال يلة اطلعن .. صعدنة حبوبتي بالسيارة ..

بعدنة بالباب وجان يطلع عمي عاصم ..
باوعلنة وعينة اجت على جيلان : ها كلجن رايحات ..
مريم : اي بابا .. منتأخر شوية ونرجع ..

شبگ ايدناتة ورة ضهرة ببرود  : الله وياجن روحن .. بس جيلان تبقى يمي ..
امها طبگت حواجبهة : ليش شمعنى جيلان .. مسوية شي ؟؟

جيلان باوعتلة بخوف ..
هز راسة ببساطة : لا ما مسوية شي .. بس راح يجوني جماعتي .. واريدهة تسويلي جاي وتحضر الضيافة .. منو يسويهن يعني اذا كلجن رايحات ..

زمن : اذا تريد خلي ديلارا تبقى احسن .. لان جيلان اذا لزمت شي بالمطبخ تحرگة ..
ديلارا بسرعة : اي بابا اني ابقى .. ماعندي مشكلة .. جيلان حتى الجاي تحرگة ..

اني هم حجيت بسرعة : اني ابقى اذا تردون .. لان يعني اصلاً ما كلت لجبران .. وهم اسويلك الضيافة ..
هو باوعلنة برفعة حاجب ..

احنة نحاول نخلي جيلان تروح لان نفسيتهة تعبانة ونريدهة تغير جو ..
حجة بهدوء : روحن بابا .. لشوكت تبقى ما تعرف جيلان .. هي تبقى وانتن ترحن .. يلة توكلن بالله ..

جيلان باوعت علينة : سلملي على ريم .. وكللهة ما عدهة غير العافية ..
دارت وجهة بهدوء ودخلت للبيت ..

مريم حجت بسرعة : اني ماروح ابقة يمهة ..
ديلارا : اني هم ..
حجيت بسرعة : اني هم ماروح ..

هو باوعلنة بنفاذ صبر : روحن بابا روحن عيب من بت عمجن .. مطياتهة خبر .. روحن يلة امي صارلهة ساعة تنتضر بالسيارة ..

تنهدت بقهر وصعدنة بالسيارة والبنات وياي ..
مسويلهة حبس بالبيت .. ميخليهة تروح لبيتهم خاف تشوف حارث ..

حارث //

كاعدين اني وعباس بالحديقة الي دوم نكعد بيهة ..
عايفين الكراسي ومتمددين بالكاع ..
اني مادري هاي يا جكارة اخلصهة ..

روحي طالعة ومختنگ ..
ريم حاجتني قبل شوية كالت بعد لا تتصل عليهة لان البنات كاللهة ابوهة ساحب تليفونهة وقاري الرسائل مالتنة وعارف بعلاقتنة ..

رجعت راسي على حافة الكرسي وزفرت الدخان من حركي بقهر ..
عباس سحب الجكارة من ايدي وشمهة بالكاع : بسسك ما شبعت .. جم باكيت خلصت .. اخذ نفس شوية ..

باوعتلة بقهر : عباس روحي تريد تطلع .. وين اروح بعد ..
اروح لعمي يگلي ما انطيك بنتي .. اروح للبيت ابوي كالب وجهة علية ..
اجي هنا انت هم صافن ومدري شبيك ..
بيمن اطلع حرگة كلبي .. شعدي غير الجكاير ..

عباس : وشني عبالك هاي حل .. بوية هذا سم ..
تأففت وجريت حسرة .. كمت بهدوء : يطبني طوب ..

بعدت شوية عنة .. اتصلت على ريم ..
اجاني صوتهة ويمهة هوسة : ها ريمي منو يمج ؟؟
ريم : حبوبتي وزمن والبنات اجن عليهة هسة جابهن هادي ..

حجيت بلهفة : ومشمش .. مشمش يمج .. انطيهة التليفون احاجيهة عليج الله ..
ريم بتنهيدة : عمو عاصم ما خلاهة تجي ..
حارث : شنو بس لا ضاربهة .. ريم احجي شگالن البنات ..

ريم : لا ما ضاربهة .. بس ايكولن محبوسة ابغرفتهة متطلع منهة .. وبس تبجي ..
جريت حسرة بقهر واحس كلبي ينهش بية ..
كلة من وراي هيج صار بيهة ..

سديت التليفون ورجعت كعدت يم عباس ..
باوعلي وحجة بسخرية : متعذب ومتدولب لان صارلك يومين ما سامع صوتهة ..
انة شأكول راح يصيرلي شهر لا سامع صوتهة ولا حتى رسالة .. بس ولو اذا انة الغيرت رقمي ..

باوعتلة بقلة صبر : عباس لو تحجي السالفة زين لو لا تحجي الغاز .. خانتك شنو ؟؟ ليش هيج تحجي ؟
تنهد : انة الخنت مو هي ..

فتحت عيوني : شنو .. شجاي تحجي انت .. لك انت الكاتل نفسك عليهة وميت بيهة .. شنو خنتهة .. لا والله ما تسويهة .. لو اشوفك بعيني ما اصدگ ..

نزل راسة بقهر : ما خنتهة هي .. خنت صاحبي وعزيز علية .. وطعنت بي وانة ما ادري بروحي ..

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

الكاتبة : سارة الشمري🖤
مرحبا للكل .. اسفة عالتأخير ..
وادري البارت قصير بس والله عدنة خطار وما الحك اكتب شي ..
اتمنى حبيتو البارت وعجبكم ..

ولا تنسون صوتو وعلقو وكلشي ينداس دوسو ..