رواية بواقي روح الفصل الخامس عشر 15 - بقلم نسمه عبدالله

رواية بواقي روح

الفصل الخامس عشر15

بقلم نسمه عبدالله

فتحت الورقة التانية و انا بقراها بهدوء كانت وثيقة عقد زواج فكرت انها حقت امي و ابوي يعني ، بس لما وصلت اسم الزوجة م كان اسم امي كان باسم رزاز فضيل المرضي ،ابوي انا متزوج مرا تانية ، يدي بقت ترجف و خصوصا انو تاريخ الزواج قديم حتى وقتها انا م مولودة ، يعني معقول ، شكلها امي م عارفة بالحوار دا و الا الدنيا دي مستحيل تقعد و دا شنو الدهب دا، قريت الفواتير و كلها مسجلة باسم ابوي ، شلت ورقة التنازل و قريتها واحد اسمو عبدالله سليمان متنازل عن بيت بحي الرياض لأبوي ،نحن عندنا بيت و قاعدين في الاجار ؟؟ ،عايزة اكذب الشايفة بس كل الوثائق موثقة ب ختم ، ابوي دا بخطط لشنو ،م عارفة ليه فكرت كدا بس امي لازم تعرف بس ابوي كيف قادر يخت علبة ملانة دهب و وثائق زي دي في حتة مكشوفة كدا، يمكن عشان عارف انو نحن م بننضف ورا الدولاب او يمكن دي تكون اخر حتة ممكن الواحد يفكر انو يدس حاجة فيها ، قفلت العلبة سرعة و رجعتها محلها و قلبي بيضرب لا كلام زي دا م مفروض يفضل سر ياربي معقول امي تكون عارفة لا لا مستحيل ، طلعت برا و لقيت الجبنة لسه م خلصت ي الله انا اصبر لمتين ، فضلت ماشة و جاية في الاوضة لحد م رجلي نملت ، لا قدرت اقعد لا قدرت اقيف ،سمعت صوت الباب بضرب م اهتميت اسي دي تكون وحدة من شلة امي رجع ضرب مرتين و ماف زول فتح ، لبست توبي و مشيت فتحتو و كانت بت م حصل شفتها صغيرة كدا يمكن عمرها ١٦ او ١٧ و شايلة بت في كتفها يمكن عمرها ايام، جات فكرة ف بالي و قلت هي م تجني دا تأثير المخدر ي بت نفضت الفكرة و عاينت للبت ،ملامح التعب باينة في وشها ، اترددت اول و هي م قالت ولا كلمة ، قلت ليها اتفضلي جاية لأمي، هزت راسها بلا ، قلت ليها طيب عايزة حاجة اقدر اساعدك ، ختت البت في يديو حرفيا قلبي قال لي م كذبت عليك ، رجفت يدي و قربت تقع من يدي عاينت ليها و قليل لو قلت البت فلقة من القمر قالت لي بحرقة و دموع دي بت ولدكم و مشت ، نعممم هييي انتي لحظة دا شنو و دا كلام شنو ، قالت لي م عندي شي اقولوا، لا لا مستحيل طبعا وحدة تقول لي بت اخوك و اصدقها ، قلت ليها عايني م هو الموضوع م شربة موية تجي تجدعي لينا بتك و تقولي بتكم انتي تعرفي اخوي من وين ، قالت ليها و صوتها رايح و بتتكلم غصب اخوك معتمر الحرامي ولا غيرو الطويل و الشعرو اسود غزير هو ولا م هو ، قلت ليها دي حاجة اي وحدة بتعرفها ، قالت لي اسمعيني انا م ح اجي لحد بيتكم و اتبلى على ولدكم و على شرفي بالكذب البت بتكم عايزنها م عايزنها دا شي يرجع ليكم أسرة زي دي الواحد يتوقع منها شنو ، قلت ليها انتبهي ل كلامك ، قالت لي م ح انتبه ح تعملي شنو مثلا م صحي انتوا أسرة م نافعة ، قلت ليها بهدوء انتي لو نافعة م كانت دي في يدي .. و رفعت ليها البت في وشها..قالت اخوك غشاني و انا صدقت ، قلت ليها غشاك و انتي م كنتي بتعرفي الحلال من الحرام؟؟ اكيد عاارفة بس رخصتي نفسك و دي النهاية ، قالت لي و ان يكن البت م عايزاها ولا عايزة اشوف خلقتها و إياكم ثم إياكم تفتشو على و تجيبوها لي او تعرفوها اني امها و مشت ركبت عربية بيضا واقفه في آخر الشارع شكلهم ديل أهلها لانو في بت و مرا و راجل كبير أنا متأكدة انو الكلام دا م من قلبها بس دي شنو المصيبة دي ي الله انا كنت في صدمة ابوي متزوج بقيت في صدمة بت معتمر والله حاسة ركبي م شايلني البت عيونها م فتحو لسه يدي بترجف بقيت خايفة تقع مني ، دخلت البيت و انا بجهز ل انسب طريقة اكلم بيها امي عن الخبر دا بس فجاءة حسيت جسمي تقيل و رجفة يدي زادت ، دا تأثير المخدر الكلمني عنو عزام، دخلت الاوضة ختيت البت في السرير و قعدت كنت حاسة بلفة راس خفيفة و صداع شديد كلها كم ساعة و بروح لازم اصبر شوية ، حسب كلامو انو الأعراض كان ممكن تكون اسوء لو ادمنت جد جد الموضوع بصل حد الجنون ، فضلت يمكن ساعتين بالحالة دي بعاين للبت و سامعة جوطة ناس امي متين يمشو امي لشنو م حاسة ب حجم المصيبة النحن فيها دي ، ضحكت و قلت ح تحس ب وين و هي م فاضية من الكذب عاينت للساعة و كانت وحدة و حاجة م عدو دقيقتين الا و سامعة امي بتودع ضيوفها ، اسي يعني ممكن زول يجي يسرق البيت دا و هي م جايبة خبر معقول بس ، ح تجي اسي عشان تحسب المكسب ، قعدت زي عشرة دقايق فيها لملمت امي المحل لا من شاف لا من درى ، و جات داخلة الاوضة و طبعا بتحسب و انا قاعدة متمحنة بعاين ليها اتخلعت و القروش وقعت اتشتتت كلها و كانت قروش من فئة الالف جديدة، قالت لي بعد م نزلت تلم القروش ، إسراء انتي جيتي متين ، قلت ليها من بداية جبنتكم ..أمي جديا كدا انتي بتعملي فشنو انا كل م اقول انك خفيتي شوية اجي القاك بقيتي اسوء ولا جبنة بالطقم الأسود كمان ، م ردت علي و حتى م لاحظت للبت النايمة من ساعة م جابوها ، دخلت القروش و اتلفتت علي عايزة تقول حاجة و اتفاجاءت بالبت ، قالت لي دي منو ، قلت ليها ي سلام ي دوب فتحتي ، قالت لي إسراء دي بتك ، اتلفت عليها و قلت امي عليك الله بتي شنو عليك الله هو انا شبه المصايب دي ولا شبهكم، قالت لي طيب جايباها من وين ، قلت ليها لا جبتها لا شتين امها جات جابتها لحد بابكم دي طبعا حفيدتك بت ولدك المحترم ، قالت لي انتبهي ل نبرتك و انتي بتتكلمي معاي خلي بالك ، قلت ليها اتفضلي اتصرفي مع مصايبه ، طلعت و اول م عتبت باب الاوضة البت فتحت خشمها و دورت بكا عاينت ليها و ل امي البتعاين ليها مصدومة فتحت شنطتي طلعت قروش و قلت ليها ح امشي اجيب للبت دي حاجة تأكلها طلعت بس م بضمن امي الصراحة تقوم تجدعها ساي و تبقى المصيبة اتنين ، رجعت ليها و قلت ليها ياريت ي امي تتعاملي مع البت بشوية إنسانية، طلعت و أقرب صيدليه جنب الظلط خففت رجلي و جبت ليها لبن و بزازة و القلق وصل حدو نحن لشنو م ناس عادين نكبر و نتزوج عادي ولا هو نحن مصرين نبقى الأوائل في الذنوب ، رجعت و لقيت امي قاعدة في الحوش و البت تصرخ جوا ، قريت كيف يعملو اللبن عملتو و اديتها اول م سكتت امي دورت قالت اصلا اخوك دا مباري درب ابوك و م كان بعيد يعملها الفقر عشان كدا مختفي ليهو اسبوع تربية ابوكي تتوقعي شنو ، قلت ليها اااا م نسيت اكلمك من كترت الهم النزل علي مرا وحدة دا ، ثالت لي هم شنو ، قلت ليها القاها منكم ي امي الوداعية ولا ابوي سيد القمار ولا اخوي الحرامي ابو البنية الاستغل وحدة شافعة ولا من شغلي و شغلة الغسيل ولا من صفية و عزام و عادل ولا اسي من البت دي و الضغط النفسي حق اهلك م نافعين ، قالت لي نبرتك، قلت ليها معليش ي امي والله بس انتي جربي تتحكمي في نفسك و انتي مغيوظة من ابوي المتزوج عليك من سنين

الفصل السادس عشر من هنا