رواية بواقي روح الفصل الرابع والعشرون 24 - بقلم نسمه عبدالله

رواية بواقي روح

الفصل الرابع والعشرون24

بقلم نسمه عبدالله

اتنهدت دلال و قالت لمن أحمد جا أتقدم قبل سنة و نص يمكن اهلي رفضوه عشان وضعو المادي ، قلت ليها أحمد دا منو ، قالت لي العريس الح اتزوجو بكرة ، قلت ليها و عرفتي كيف ، قالت لي كان شغال في مكتبة قريبة للمدرسة ، عاينت لأمها و قلت ليها بت عمرها م عدا ال١٨ انتي وين من الكلام دا ، امها قالت ليها يعني دا كله خطة منك انتي و أحمد ، قلت ليها عاتبيها بعدين دا م وقتو ، كملت دلال كلامها و قالت قدر م حاولت امي و ابوي رفضو و كانو مصرين على ود عمتي مع انو ولد عمتي دا لا فتح خشمه لا قال انا عايزها و حتى معتبرني زي اختو بس ناس امي م فهموني و قدر م اتكلمت و قدر م قلت م سمعوني، أحمد كان صاحب معتمر اخوكي يعني صحبتهم م قوية ، المهم خططنا انا و احمد ، قلت ليها قولي أحمد خطط ، عاينت لي و كملت كلامها، اتفقنا انا احمل منو و كدا اهلي يطرو يوافقو بيهو ، قلت ليها واو الوحدة بقت تمسك أهلها من اليد البتوجع لو نهروها ساي تجري تحمل، عينها م قدرت تختها في عيني و قالت حملت و حسب المخطط أتم تلاتة شهور حتن اكلمهم عشان م يلقو طريقة ينزلو ، قلت ليها و عندو خبرة كمان ، كملت و قالت تميت التلاتة شهور و تلاتة اسابيع كنت قاعدة مع اختي جبنا سيرة احمد كيف كيف قلت ليها انا حامل ، انفعلت و مشت كلمت امي و منها ابوي عرف ، قلت ليهم قال ح يعرسني بعد الد وقتها ابوي حلف و قال لو اخر راجل م تعرسي دا كلو و انا م وريتهم انو الاب أحمد راسي ضرب انا عاملة الخطة عشان اعرس أحمد يجي يقول لو اخر راجل م بعرسو ليها ، امي وقتها قالت لي ابوي و منو يرضى بيها قال ليها لو تقعد لمن تموت خلي تقعد ، ابيت اديهم اسم و التواصل بيني و بين أحمد اتقطع م عرفت اسوي شنو حسيت انو دا كلو راح هوا ، بعد شهر كدا شلت تلفون اختي و اتصلت لأحمد و حكيت ليه الحصل ، قلت ليها شهر كامل تغيبي م سأل منك عشان اصلا م فاضي ليك ي عويرة ، قالت لي قال لي حاولت اصل ليك م قدرت ، قلت ليها الداير يصل بيصل ي حبيبتي حيطة م بتوقفو، عضت شفايفها بضيق و قالت وقتها اقترح علي نقول ابو البت معتمر ، قلت ليها هوبااا معتمر مرة وحدة و ترموها في اخوي المسكين م قلتو مع نفسكم هو ح ينكر و الحقيقة ح تنكشف زي م حصل اسي ، قالت لي وقتها قلت ليه كدا قال لي ح يفكر في خطة ، بعد تلاتة شهور رجعت اتواصلت مع احمد و الخطة كانت انو أحمد كان عندهم واحد صاحبهم اخوه مغترب في أمريكا اتفقنا يقنعو معتمر يسافر هناك و هناك اخو صاحبهم يهدده و يقول انو سرق منو ولا اي مشكلة و طبعا انتي عارفة القانون هناك صارم م زي هنا ، اخو صاحبهم رفض الكلام دا يعني م ادينا سبب مقنع عشان ينتقم من إنسان بريئ ف كذبنا و قلنا انو غشاني و اخترعنا الف حجة و سبب لحد م اقتنع اننا مظلومين و القروش الاتدينها معتمر و سافر بيها سرقها من اصحابو و شرد بيها برا البلد و ناس احمد ح يتفتحو بلاغ هنا و مجهزين الشهود و اي حاجة و يخيرو ل معتمر بين يقول الولد ولدو و بين السجن و اذا اتسجن في امريكا م ح يقدر يطلع بسهولة و يرجع السودان ف الافضل يسكت و يقول هو الاب، و المفروض المخطط يبدأ اول م معتمر يصل أمريكا بس معتمر اول م وصل نزل شغل مباشر و حتى انو اخو صاحبهم لقى انو معتمر زول أخلاقه عالية و م باين عليه كدا و رفض يقيف معانا ، ولدت بعد سفر معتمر ب يومين ، احمد وقتها قال لي انو ح يتصل على معتمر و يقول ليهو انو يقول البت بتو وعلى بال م نتزوج و بعدين نشيل بتنا ، تاني قال لي لو قلنا ليه لغايت نتزوج م ح يقبل و اتفقنا على التهديد ، و م عارفة لشنو م هددو تاني قال لي حاليا التواصل مع معتمر مقطوع امشي زي م خططنا و قولي لأهلو البت بتكم و ورا هو ح يتصرف و امي و ابوي م استنو و انا برضو م فكرت و قلت ليهم بت معتمر و جاي جاي وصلنا بيتكم و كنت متوقعة انو احمد ح يحل القصة في الفترة دي و حتى هو قال لي ح اتصرف بس...قاطعتها و قلت ليها وانا بعد على اصابعي يعني انتي زنيتي و اتهمتي زول بريء ب الز'نا و كذبتي كذب قدر الدنيا و طلعتي معتمر برا البلد عشان تعرسي واحد زي دا و اهلك رافضينو؟؟؟ قالت لي انتي يمكن م حبيتي ، قلت ليها والله لو الحب زي دا دا طرفي منو عارفة ابوك رفضو لشنو؟ قالت لي عشان م عندو قروش ، قلت ليها عشان م عندو اخلاق زاتو عايزة اقول ليك ي حمارة بس م قادرة ..الناس الكبار عندهم نظرة و اصلا من قال ليك تحملي و الكلام الفاضي دا مفروض تعرفي انو زول استرخصك بالطريقة دي م بستاهلك ولا يستاهل ضفرك ، امها كانت قاعدة و متمحنة ، قلت ليها سؤال طيب طالما احمد بتاعك دا م عندو قروش ليه م سافر هو أمريكا بدل معتمر يشتغل هناك و يصلح امورو و يجي يخطبك ، قالت لي الوقت داك كنت خلاص حامل و بعد الابوي قالو جبنا الخطة دي ، قلت ليها انتي م دام اتشددتي لآخر لحظة و م قلتي ليهم اسم كان تواصلي و م تكلميهم ولا تخترعي اسم من راسك يغلبك ؟؟؟ردي علي يغلبك بس في الدنيا دي كلها م لقيتي الا معتمر اخوي؟ ، قالت لي لو قلت اسم تاني كان ح يصر يعرف عنوان بيتو من وين كنت ح اجيب العنوان ، قلت ليها و لسه ليك عين تتحججي والله الولد مسح مخك دا و حتى بدلو حجر شفتي احمد بتاعك دا عندو مشكلة مع معتمر و الا م كان ختا خطة وسخة زي دي الضحية فيها معتمر اخوي، اسي زي الشاطرة تتصلي على احمد بتاعك دا و تقولي ليهو الناس ديل كشفو خططنا و اخدو احتياطهم يعني كل العملنا راح ، قالت لي بس ابوي لو عرف ح يلغي العرس طيب انتي خلي العرس يكمل و نحن بنجي نشيل البت و نتصرف معاها بس رجاء م تتكلمي اسي ، سكت ل لحظة و بعدها قلت انتي لو يومها جيتي حكيتي لي ظرفك و قلتي لي أمسكي البت أمانة عندك اصلح اموري و اجي اشيلها كان فهمتك و مسكتها ليك بس انتي جيتي بتمثلي علي دور المظلومة و لاعبة الدور صح ، سكتت ، قلت ليها لحظة انتي عندك حاجة ب اسمك بيت عربية اي شي ، امها قالت لي و لشنو السؤال ، قلت ليها انتي ي ام دلال خشمك م فتحتي لما كنا بنتناقش في عمايل بتك جاية تفتحي وقت القروش ياهو الوصلكم ل هنا ، رجعت عاينت ل دلال و قلت ليها سألتك عندك ، قالت لي اي ابوي ماشاءالله م عندو غيرنا انا و اختي ف مسجل لينا اراضي و بيوت ، قلت ليها و احمد بتاعك دا عارف ، قالت لي عارف ، قلت ليها اتصلي عليه اسي و قولي ليه ابوي شال الاداني ليه و عرف الحصل و ابقي واجهيني لو العرس دا تما ، وقفت و شلت البت ، قالت لي و البت مودياها وين ، قلت ليها مالي مجنونة اخليها تتربى في بيئة زي دي ولا اخليها ليكم عشان ترموها في الكوش ح اتكفل بيها واهتم بيها و لا تفكري يوم تورينا وشك ولا تحاولي تعرفيها انك امها و زي م نكرتيها واصلي نكرانك ليها و زيدي على كدا اخوي معتمر لو جاتو حاجة م ح يحصل خير نهائيا و شكرا ، طلعت و انا دمي فاير تفكير يتعلم منو شيطان ليه الناس بقت تتهاون ب حدود ربنا بالشكل دا عاينت ل مكة في يدي و قلت ولا هي الولادة بقت شي عادي ولا الطفل الاترمى دا ح يمشي وين و يعيش كيف ، اتخيلت انو دلال رمت مكة و ماف زول قدر يلقاها قلبي اتقبض ، رجعت البيت مصدعة و تعبانة اول م دخلت البيت اسمع أصوات امي و ابوي ، دخلت بسرعة اعرف الحاصل شنو لقيت ابوي ماسك معصم امي و جايطين و م كنت قادر اسمع غير صوت ابوي بقول ليها رجعي لي حقي ، و امي تقول ليه ولا موتنا م برجعو ليك ، رجعت لورا و سالت نفسي نحن الوصلنا ل هنا شنو ؟ انا الوصلتنا هنا كان لازم اسكت لما شفت الدهب م كان اكلم امي عن عرس ابوي ب رزاز ، انا راضية اغسل بس يرجع الوضع هادي بكيت و بكت مكة في يدي و امي و ابوي كل واحد بيعلي صوتو على التاني و صدى صوتهم بتردد في البيت ، الباب دقا اكيد ديل الجيران جاين يعرفو سبب الفوضى دي ، دخل عادل فجاءة و اتخلع من الوضع احتار يسكتني ولا يسكت مكة ولا امي و ابوي ، مشى سحب امي بعيد من ابوي و قال ليهم انتوا جنيتو ناس في عمركم دا بتشاكلو ؟ خليتو للصغار شنو ..الناس تتفاهم بالهداوة.خليتو لاسراء شنو البت جاها ضغط نفسي ولا م شايفين ولا ح تشوفو كيف و انتو وسط الصراع دا ، ابوي قال ليه انت المدخلك بيناتنا شنو ولا زينب جايباك تتحامى فيك ، امي قعدت وومسكت راسها وقالت انا تعبت والله طول الزمن دا وقفت معاك وقفة راجل م بقيفها بس انت عملت شنو اتزوجت رزاز و سكنتها احسن البيوت و لابسة احسن لبس و لاا جايب منها بدل الولد أربعة، تتذكر قلت لي شنو ..ي زينب الزمن بقى صعب و الشغل رزق اليوم باليوم نكتفي ب معتمر و إسراء.. تتذكر وانا الغبية سايرتك ، ي زينب إسراء دي تخلي القراية ظروفي م بتقريها ، قلت ليها اقعدي ي بتي القرو عملو شنو ، معتمر من قام طبعو شين طالع ليك و لمن م قدرت عليه قبلت على إسراء و انا قلت معليش تخدم ابوها م زول غريب ، بديت قمار قلت م مشكلة بكرة الله بهديك بس ولاا ولا شكلك م عايز تتعدل اساسا و م بنكر انا كمان باريتك و شلت طبعك و اشتغلت وداعية و هدي ل اسي بعاني زمان ابوي قال لي الودع و كلام بشوف ليك الخيرة دا كلو بلا و زيو زي اي مرض لازم تتعالجي ، كنت ماشة كويس و تتوقع حصل شنوو، انت السبب من البداية في كل المشاكل دي م نحن و الدهب دا أقل شي تحاول تعوضنا بيه و انا بعتو و بعت الدهب الجبتو لي تتذكرو الكنت ناوي تشيلو و تقول لي خسرتو و تودي ل ست الحسن رزاز ..اشتريت نص نمرة و سجلتو باسم إسراء اكتلها لو داير و شيل حقك لو تقدر، انا دا حق بتي طلعتو و دا شقى عمرها في الغسيل و حقي م دايرة شي تديني ورقتي و زي م خشينا بالمعروف نمرق بالمعروف ، وقفت بكا و وقفت على حيلي و طلعت برا خليهم يتفاهمو و يختو حد للحوار دا جا عادل قعد جنبي و قال الجو ظريف صح ، اتنهدت و قلت م وقتو ي عادل لاني م من الناس البفرزو انو دا سبب زعلهم و دا لا انا بتفشى في اي زول قدامي ، شال مكة من يدي و قال انتي عارفة انو ح يجي يوم زي دا ، قلت ليه للاسف اي ، قال لي لخير يمكن الانفصال يكون احسن خيار ، قلت ليه تتوقع كدا ، قال لي اي و ايي حاجة مقدر ليها يوم تحصل فيه ..عندك انا مثلا كنت جاي افاتح ابوك ب موضوعنا اتفاجاءت بالوضع دا معناته دا م اليوم المناسب، قلت ليه عادل الصراحة انا حاليا م عندي طريقة اتزوج

الفصل الخامس والعشرون من هنا