رواية بواقي روح الفصل الرابع 4 - بقلم نسمه عبدالله

رواية بواقي روح

الفصل الرابع4

بقلم نسمه عبدالله

، لحد المغرب لملمو الجبنة قمت صليت و حرفيا نفسيتي مرتاحة لانو ماف غسيل لباقي الاسبوع ، رجعت حتتي لقيت امي بتحدر لي و بتاشر لي اجيها ، مشيت ليها قالت لي بصوت واطي مالك لابدة جنب عفشك زي دا من جيتي قاعدة في مكانك ، قلت ليها اسوي شنو م هدا م شاء الله جايبين خدم يشتغلو اي شي ، قالت لي دا م قصدي ي عويرة امشي استحمي و البسي حاجة لايقة، قلت ليها و لبسي دا مالو ، قالت لي كنت حاسة انك ح تمشي الشغل و تجي تقعدي بنفس الهدوم للقعدات و غيرها ، قلت ليها و مالة هدومي بس ، لوت خشمها و قالت إذا أنا م بلبس لبس زي دا و شايفة حق عجايز اخليك انتي تلبسي قدام الناس و تبشتنيني ابدا ، يلا سرعة و جبت ليك جل للاستحمام و عطر برضو شيلي عفشك ختي في الغرفة ديك مع عفشي شلت شنطتي دخلتها جو طلعت كيس القروش و لفيتو كويس و دخلتو تحت بدلة الشغل عشان امي م تشوفو امي جات داخلة ، فتحت شنطتها طلعت لي عباية استقبال لونها بيجي و طلعت العطر و الصابون و شوية حاجات مكياج و طلعت ، الاهتمام الزايد دا لانو امي عايزة واحد من اولاد أخواتها يخطبني مثلا بس انا ب اضاني سمعتهم بقولو ماف واحد يفكر في بت زينب ،ماف زول داير وحدة امها سحارة و ابوها بتاع قمار و اخوها حرامي، بس امي لسه معلقة امالها عليهم يمكن تتنعم بجزء من العز الهم فيهو دا ، مشيت استحميت و غيرت عملت مكياج خفيف مع انو عارفة انو مهما سويت مستحيل زول يعاين لي بس بعمل كدا عشان ارضي نفسي يمكن ، طلعت و لقيت صواني العشا بتنزل قعدت اكلت شوية و قمت م يقولوا علي جحمانة ساي جبت تلفوني و لقيت مكالمتين فايتات من رقم غريب ياربي دا صاحب القروش رجعت للرقم الاتصلت عليه جبيل طلع نفسه معناته دا صاحب القروش ذاتو لازم ارجع احاول اتصل للرقم عملت إعادة اتصال و انا عارفة رصيد م عندي ، نزلت التلفون من اضاني و انا بقفل الخط بزهج ، عايزة رصيد ضروري عاينت لأمي لقيتها مشغولة مع النسوان قمت جبت قروش من الشنطة و طلعت كان الشارع فاضي بطريقة مخيفة مع انو العشا ي دوب بأذن كنت مترددة بس اتوكلت و مشيت حولت الرصيد و انا راجعة سمعت صوت بت بتقول انتي بت زينب اتلفت عليها و قلت معاي انا، قالت لي باستهزاء . في غيرك ، استغربت نبرت صوتها و قلت ليها عفوا بس نحن بنعرف بعض ،صرت وشها و حدرت لي و اتلفتت عايزة تمشي قلت ليها لحظة كلامنا م انتهى ، قالت لي م عندي حاجة اقولها ، قلت ليها اجي ي كدا من البداية فاتحة خشمك معاي لشنو ،.. إسراء ، اتلفت اشوف دا منو بناديني لقيته العميل الاسمه طه المستأجر الشقق الملكية ،قلت ليه باستغراب اكبر انت بتعمل هنا شنو ، عاين وراي و رجع عاين لي و قال ح اكون بعمل شنو ، قلت ليه بتلحقني صح ، قال لي بطلي هبل الحقك لشنو يعني. قلت ليه طيب بتعمل هنا شنو. قال لي الحي دا باسمك ، انتبهت اني انفعلت شوية اتلفت للبت لقيتها واقفة كأنها بتحضر مسلسل ، قلت ليها و انتي م قلتي لي عايزة شنو ، م عاينت لي زاتو بس عاينت ل طه و ابتسمت ابتسامة غريبة و مشت ، عاينت وراي لقيتو هو برضو واقف و بعاين للبت الماشة بصرة وش ، رجع عاين لي وقال م انصحك تصاحبي النوعية دي من البنات ، قلت ليه اولا هي م صحبتي ثانيا دي شنو حركات الأفلام البتعملها دي و جبيل هابش راسي لشنو ، ابتسم وقال مزاج بس ، اتحركت من قدامه بدون كلام لانو بيعمل كدا عشان عايز انتباه و م ح اديه ليه نهائي ، اخر شي سمعتو صوت ضحكتو ، رجعت اتصلت في الرقم و من اول رنة رد

-الو السلام عليكم

=وعليكم السلام و رحمة الله ، معليش بس انتي لقيتي الكيس حقي

- اي انا ، لو ممكن وصف للحاجات الجو الكيس عشان اتأكد ..

وصف لي الحاجات بالضبط زي م هي حتى الوان الفساتين و اتفقنا انو بكرة نتلاقى يستلم الحاجات ،

بعد فصلت الخط اتنفست ب راحة لانو القروش دي هم كبير و انشال، م لحقت اتنفس زي الناس جا وقف قدامي ولد خالتي نهال الحاليا عرس بتها دي و دا ولدها البكر اسمو عادل ، ربع يدو و بعاين لي ب طريقة م باقي الا ياكلني حية، قلت ليه عفوا انت واقف في الشارع ، قال لي بنبرة متعالية و نهرة . اذا انتي م عندك أهل يربوك نحن نربيك و قلة الأدب دي م بنسمح بيها هنا و تعملي لينا سمعة ، اتصدمت و قلت ليه قلة ادب !! مسكني م معصمي و ضغط عليه و قال واقفة مع راجل نص الشارع ومع شاهندا كمان و زي الزمن دا عندك شنو. نفضت يدي و قلت ليه انت م دام شفتني مع الاسمها شاهندا اكيد شفت الراجل لما جا م انا مشيت ليه و انا متين بجي حيكم عشان اعرف ناسو و كان تجي بنفسك و تسأل و تشوف الحاصل بدل تعمل سيناريوهات في رأسك دا و زح كدا م كان ناقص غيرك ، مسك يدي و قال و لسانك طويل كمان ، رجعت نفضت يدي و قلت ليه م تمسكني لانو يعتبر قلة ادب تمسك مرا م تحل ليك ، دخلت البيت و مزاجي خرب على الآخر

قعدت مع البنات و يدوب لاحظت اني م شايفة امي في المكان ي ربي مشت وين قلبي اكلني و قلت اقوم اشوف القروش و اول م دخلت لقيت امي قاعدة في الأرض و اللبسات جنبها و ريطة في يدها و التانية في رجلها و بتحسب ،قلبي عمل شححح. خطفت القروش و ملابس البت بسرعة لدرجة امي اتخلعت سرعة لميتهم جوا الكيس و ضميت الكيس علي، وقفت على حيلها و قالت لي جايبة القروش دي من وين ، قلت ليها أمانة ادوني ليها امي انتي كيف تفتحي شنطتي ، قالت لي اصلا حسيت انك داسة مني شي ، قلت ليها اصلا بكرة ست الأمانة ح تشيل امانتها ف م حسيت انو في داعي اكلمك ، قالت لي و لشنو تخت القروش الكتيرة دي عندك و دي منو هي اصلا ...